《慾望樂園》（2）

pudh

lush

［511］
「你又唔使咁擔心嘅，我都對你有信心。而且我自己對training呢方面都幾有自信～只要你夠聽話，得到我嘅歡心，我自然都會幫你創造到你應該要有嘅價值～到時我又點捨得遺棄你呢？」左副園長聽完我嘅回答之後，心入邊似乎有種難以掩蓋嘅喜悅，甚至係興奮，就連語調都變得風情萬種。

「多謝左副園長嘅厚愛。」我盡量保持表情同行為嘅平靜，但係內心已經戰戰兢兢。

「哈哈哈！好，好啊，今日心情真係好！嚟！我哋再乾一杯！」左副園長心情大悅，高舉手上嘅香檳杯。

我同野馬當然唔敢怠慢，攞起香檳杯同左副園長輕輕碰杯。

左副園長今次飯宴嘅目的已經達到，跟住落嚟並冇再發生啲咩特別嘅事，我哋食埋甜品之後飯宴就到達尾聲，而場外嘅商品競技表演亦都已經結束，客人開始離場。

「好啦，時間都差唔多啦，我哋今日就到此結束啦。Ryan既然你已經恢復得差唔多，我諗過多排我就會安排競技活動或者其他活動俾你，你返去好好準備啦，同埋唔好唔記得我今日同你講嘅嘢啊。」左副院長最後再提醒多我一次，已確保糖果同鞭子嘅效果可以深深咁印喺我心入邊。

「明白，只要可以令到左副院長你開心嘅，我都會盡我嘅能力去做。」我表現得忠心耿耿，一副臣服於左副園長嘅樣子。

［512］
左副園長再次意味深長咁對住我笑，然後就優雅咁樣由椅子企咗起身，然後轉身離開向着大門走去。

我望住左副園長離開嘅背影，黑色晚禮服貼身嘅剪裁，再加上高踭鞋。令到左副園長行路嘅時候由後面睇就可以欣賞到隨着步伐而擺動嘅翹臀，令到本來只係單純想目送左副園長離開嘅我視線不受控制咁樣集中喺呢個吸引嘅部位。

「兩位都可以起行，離開返去休息㗎啦。」就喺左副園長由大門離開咗之後無耐，毒蛇就用住佢依然聽落有氣冇力嘅語氣對我哋講。

「今日麻煩晒你嘅接待，既然係咁我哋就唔阻住你哋之後嘅清理工作啦，Ryan，我帶你返返去你嘅專屬房間休息先啦。」野馬聽到之後同對方簡單客套一番，然後就離開座椅，並且示意我都一齊同佢離開。

既然晚宴已經結束咗，我亦都冇必要繼續留喺度，更何況經過呢一輪晚宴，我都的確好想快啲返去休息一下自己嘅身心，於是我向着野馬輕輕點一點頭，亦都由座椅起身。

如是者，我同野馬沿着過嚟嘅道路返返去我嘅專屬房間。

「下次你要參加競技活動嘅時候我就有機會向你解釋晒所有嘢。」就係野馬上前準備用職員手錶幫我開啟房間房門嘅時候，行過我身邊嘅幾秒鐘細細聲咁講咗句。

「嗯。」我並冇太大反應，甚至連一啲肢體動作都冇，只係同樣地細細聲應咗一聲，話俾野馬聽我已經聽到。

［513］
如是者，又過去咗平淡嘅幾日。

咯，咯，咯，房間門口又一次傳嚟敲門聲。

「Ryan，今日有你嘅商品競技表演。」來者果然係野馬。

「哦？我以為我依家會提夢收到通知添。」我都估到我差唔多係時候再次上場，但我以為自己可以收到相關嘅通知或者情況做安排。

「一般日常嘅商品競投表演大多數情況我地都係即日安排，再加上規則都比較簡單，你提早知都無咩影響。」野馬向我稍作解釋，然後企到門口一邊讓出空間示意我出嚟。

我當然乖乖配合。

又係熟悉嘅通道，前往競技場嘅路我已經熟到可以自己識行過去，甚至樂園嘅佈局我都已經慢慢摸熟。

我同野馬兩個入到鬥技及小型活動場嘅等候室。

我哋兩個入到去關上門之後，野馬第一時間係周圍檢查等候室嘅環境。

我一睇到就知道佢係想確認呢個環境係咪安全可以俾佢講跟住落嚟要講嘅嘢，所以我亦都好配合咁喺一邊慢慢等待。

「跟住落嚟我所講嘅嘢你要好好聽住，無論如何，都要保守秘密！」檢查完周圍環境嘅夜晚行到嚟我面前雙手搭到我膊頭上，眼神死死咁盯住我嘅眼睛。

我都係第一次見到野馬咁認真嘅眼神同表情。

「嗯，我向你保證。」我微微點頭。

「我咁樣做嘅風險好大，但為咗成功突破呢度，我只可以咁做。」野馬深呼吸一口氣，儘管擔心但係佢都必須下定決心。

左副園長竟然咩都冇做

［514］
「你應該聽過咩叫國際刑警㗎啦？」野馬表情依然嚴肅認真。

「噗！你唔係認住同我講你係掛…」我第一反應係忍唔住笑咗出聲，但我根據野馬頭先嘅行為判斷佢好大機會係講緊真話，但我依然覺得非常不可思議，野馬比我嘅印象完全同國際刑警大纜都扯唔埋。

「你咩意思？我係最出色個批添啊！」野馬見到我似乎係到睇小佢而忍唔住要為自己平反。

「你係國際刑警派嚟調查慾望樂園嘅？」我追問野馬，但表情同語氣依然充滿疑惑，我直頭有意過野馬一係食錯藥精神錯亂，一係就有心玩鳩我。

「無錯！」野馬眼神充滿堅定，直接承認。

「Er…」我一時之間語塞。

對於野馬嘅身份同埋佢嘅目的仲有點解要搵我合作我一直都有思考過。我諗住各種各樣嘅可能性，好老實講國際刑警依樣嘢我並唔係無諗過，但係我好快就放棄猩依個方向，原因依然都係因為野馬比我嘅印象完全同國際刑警大纜都扯唔埋。

「我冒着生命危險講依個秒密你知，你就係咁嘅反應？」野馬對於我睇小佢越嚟越不滿。

「我都估到過可能係咁㗎啦，只係估唔到原來真係咁啫…」我內心感嘆原來世界有時候真係咁不可思
議。

「咁就證明我做得好！你知咁多嘢都睇唔出，慾望樂園嘅其他人就一定更加睇唔出！」野馬一見有機會就借機讚自己，繼續說服我相信。

［515］
「如果係咁我就多問題想問啦…你有冇啲咩可以證明自己係國際刑警啊？」我始終都覺得事情嘅發展越嚟越出乎我所料，只好問吓對方有冇多啲證據去說服我。

「你幾時有見過警察會帶埋佢張委任證做臥底㗎？咁樣棧自己捉蟲嘅啫。我嘅身份一旦喺度俾人發現，我就死硬㗎啦！」野馬聽到我咁講，眼神多多少少有啲無奈。

「啊！係喎…」我都爭啲比自己蠢到笑，野馬講得啱，如果佢所講嘅係真嘅話，帶住啲可以證明佢係國際刑警嘅文件或者證據喺身同自殺冇乜分別，只怪我收到嘅消息太過衝擊，大腦未係好運作到。

「但係既然慾望樂園嘅存在連國際刑警都知道，咁當地警隊冇理由唔知㗎？咁大個樂園到依家都仲可以繼續運作？」呢個都係我一直以嚟嘅疑問。

當初我係喺昏迷嘅狀態下被帶到慾望樂園，但經過長時間喺到嘅生活，透過語言同用詞可以得出依到大多數職員客人同埋商品都係香港人，如果慾望樂園嘅位置唔係香港嘅話語言同人種結構應該佔比唔係咁樣，同埋以依家嘅情況如果話慾望樂園唔喺香港嘅話營運成本就未免太大。所以我一直都認為慾望樂園就位於香港境內。

但係咁問題就嚟啦，香港地寸金尺土，有一個咁大嘅空間可以無人知？依到保持營運需要大量嘅資原，包括水電煤、物資、垃圾處理、排污等等。

［516］
要將呢個咁大型嘅地方完全收埋根本冇可能，除非…

「依一層我諗你自己多少都有啲頭緒㗎啦，根本就唔難估到，由其係以你嘅智力嚟講。當地警隊高層當然係知道嘅，當地政府高層都一樣知道，同埋依個當地就係香港，依到仲係香港境內。」夜馬嘅回答確切左我嘅諗法。

「或者你等我同你解釋一次先，你聽完之後有咩問題再問我啦。」夜晚見我嘅表情充滿疑問，與其我咁樣東一忽西一忽問落去，倒不如由佢向我解釋一次來龍去脈，成件事會更加順暢。

「嗯。」我洗耳恭聽。

「慾望樂園係一個大型，而且好有組織嘅地方，由其是係保密上更加可以高係世界頂尖，比好多地方嘅政府喺保護機密上都要做得更好，當然都得益於佢係一個身在暗處嘅組織。樂園嘅實際地址只有部分高層同位居心腹嘅經理知道，其他所有人包括職員進出樂園都要戴耳塞蒙眼由知情人士帶入嚟，而且起程之前仲要先接受嚴格嘅檢查，確保身上無定位之類嘅可疑物品。但天下無不透風嘅牆，有一樣野始終係樂園控制唔到嘅，嗰樣嘢就係客人把口。」野馬開始將事情嘅真相徐徐道來。

「嚟依到嘅客人都係非富則貴，而且唔滿足於外邊世界可以合法帶俾佢地嘅物質同享受，佢地需要一個絕對安全嘅地方俾佢地盡情享受錢帶嚟嘅快樂，買到外邊有錢都唔買得嘅嘢，行使外面不被允許嘅權力，盡情滿足佢地心底嘅慾望。」野馬繼續道。

國際刑警嗰part好搞笑

會唔會到最後野馬係利用佢上位 呃佢

「我冒着生命危險講依個秒 秘密你知，你就係咁嘅反應？」野馬對於我睇小佢越嚟越不滿。

［517］
「但係呢一種人好多都有一個特點，就係佢哋鍾意互相攀比，互相炫耀。雖然慾望樂園行緊類似於高級會所嘅會員推薦制度，只有小部份客人可以向樂園推薦新客人，然後再由樂園調查清楚對方背景後對其進行邀請，而且樂園明令禁止客人私自將樂園嘅事透露，但係樂園始終無辦法控制到所有客人把口。一啲客人就向外將自己喺度嘅經歷炫耀，令到依到嘅存在俾我地留意到。」野馬開始解釋佢嚟依到調查嘅前因後果。

「咁啫係其實某程度上慾望樂園一早就已經曝光咗？」我追問野馬。

「你可以話佢曝光左，令到我地知道左依個不法組織嘅存在，但同時佢都無曝光到，因為我地咩都做唔到。」野馬臉色一沉，可見事情嘅棘手。

「我地一開始收到相關情報嘅時候，就通知左香港政府，打算同佢地聯合調查，但係過程中我哋可以話係一無所獲，所有線索查到最後都會消失得無影無蹤。我地好快就意識到，政府根本就知道慾望樂園嘅事，係當中嘅既得利益者，而且好可能唔少高官都係慾望樂園嘅客人，同佢地一齊調查跟本無可能查出任何事！」野馬露出一副可惡嘅表情。

「所以後來國際刑警就決定以慾望樂園情報錯誤，好可能只係一個都市傳說為由主動終止調查。過咗一段時間之後再暗地物識調查人員，以最高機密型式建立檔案，暗地裏展開調查。」野馬道。

［518］
「歷經千辛萬苦，我哋先至成功混入慾望樂園。只可惜呢度嘅管理的確相當謹慎嚴謹，哪怕我而家立咗大功都好，依然冇任何機會可以接觸到部門嘅機密資料。」野馬面有難色。

「咁我哋可以點樣曝光呢度？你唔係話有計劃嘅咩？」聽到野馬咁講，我都擔心起嚟。

「我係有計劃，不過你聽我講埋先。既然香港嘅政府已經係慾望樂園背後嘅勢力之一，就唔可以以尋常嘅方式捅破呢度，就算我哋而家收網都係毫無成果，一嚟我哋唔知道呢度確實位置，二來就算利用國際壓力向香港施壓，迫佢地做嘢都好，佢哋都可以事先做好安排，搵一啲死士出嚟交數就算數，冇辦法將慾望樂園一網打盡！」野馬臉上少有地展露出嫉惡如仇嘅表情。

「所以成件事要喺香港政府唔知道嘅情況下辦成，以免佢哋提早做好準備！」野馬嘅語氣充滿決心。

「咁到底我哋應該要點做？」聽咗咁耐我已經心急到按捺不住，想要盡快知道佢嘅計劃。

「鑒於政治問題，我哋唔可以搵人進駐呢度去打擊慾望樂園，所以我哋最後都係要借香港政府之手，第一，我哋要收集到慾望樂園嘅機密資料，包括職員客人資料，佢哋嘅流水等等，第二就係我哋要喺呢度引發一場變故，仲要係災難及嗰種，令到慾望樂園被迫浮現於世，咁香港政府就唔可以唔做嘢。」野馬向我講解。

［519］
「咁呢兩樣嘢點先可以做到？你又話就連你咁樣立左大功嘅人都冇辦法接觸到嗰啲機密資料嘅？」聽完野馬咁講，我心感成件事難上加難。

「第二樣嘢要靜候時機，日後總有機會。反而第一樣嘢做唔到嘅話就算做到第二樣都冇咩大作用，而要完成第一點就要靠晒你！」野馬好認真咁望住我。

「我？你混入呢度身為職員都做唔到，我可以做到啲咩？」我深感困惑。

「就因為你喺呢度嘅商品！我雖然身為職員，但呢度除咗高層同埋某啲核心成員之外，其他所有職員都冇資格接觸呢啲資料，而且受到嘅防範非常之大。畢竟我哋係可以離開慾望樂園嘅人，你可以理解為我哋都係打份工，唔會長期生活喺度，大家外面都有自己嘅生活，正因為係咁，為咗避免我哋走漏風聲，甚至係出現內奸。慾望樂園對我哋非常謹慎，絕對唔會允許有機會比呢啲事發生。但係你就唔同，你身為慾望樂園嘅商品，喺佢哋眼中你係唔會離開呢一度，喺死之前都只可以繼續為慾望樂園帶來利益，所以反而你有機會接觸到呢啲資料。更何況你而家貴為咗副院長嘅專屬商品，只要你取得佢嘅信任，就有機會喺佢嘅電腦上攞到呢啲資料！
」野馬捉住我膊頭嘅手越嚟越用力。

「大佬你講就容易，我點樣可以無啦啦攞到佢電腦啲資料呀？」聽到夜晚想我做嘅嘢我簡直無從入手。

睇嚟到戲玉了

其實樂園就係香港政府開嘅

似了

［520］
「所以我先要你取得左副園長嘅信任，我哋而家第一步要做嘅就係要令佢打從心底相信你。正如我所講，喺佢哋眼中你係一世都只會留喺慾望樂園，咁我哋就順其道而行之，慢慢咁令到對方都覺得連你自己都係咁諗，令到對方覺得你為咗喺呢度獲得更好嘅生活更多嘅權利而不得不依賴佢，對佢百般貼服，咁先可以令佢對你徹底放心，你先有機會做到呢樣嘢。咁樣唔難做到嘅，以我所知對方亦都係想你依賴同埋墮落喺佢手上，既然雙方喺呢一點上係相同嘅，咁你只需要按照對方所諗咁扮到慢慢變得服從同依賴，過程中唔好太過突兀顯得唔自然，導致對方覺得可以，咁完成呢一步就只係時間問題。不過當然啦，少少犧牲就在所難免。」野馬嘅眼中充滿期待，彷彿同我講緊呢一切就靠晒你。

「做大事有犧牲我明白，如果係我自己嘅話幾咁苦我都可以忍受，但係咁都係第一步啫，我要點樣攞到佢啲資料呀？」我依然充滿困惑。

「呢一層你唔使擔心，等你徹底取得佢嘅信任之後自然有千百種辦法可以做到，至於攞到嘅途徑就等我去煩惱啦，呢一刻我淨係想你專心一致咁樣做到第一步！喺過程中我都會盡力去幫你，我哋依家係同一條船嘅人，如果你被懷疑就連我都唔會好過。」野馬一拍一拍我膊頭，彷彿向我表示自己唔係一個人去完成。

［521］
而野馬亦都講得啱，要攞到徹底得到左副園長嘅信任，過程中盡量要唔好令對方生疑，如果我將心思花喺下一個過程，就唔可以專心一致咁樣做好，畢竟所有嘢嘅大前提都係我要先取得對方嘅信任。

「咁好啦，咁我依家就專心完成咗第一步先，之後嘅事就等你安排。」雖然依家要完成嘅事同之前冇變過，夜晚一早就同我講要取得對方信任，不過喺得知背後原因嘅情況下，我對應應該點做更加清晰，而心入邊亦都安心咗唔少。

「好！暫時要同你講嘅就係咁多，後續嘅安排我會根據情況嘅變化作改變，我依家係左副園長手上專門負責你嘅職員，有咩特別我會搵機會同你再講。一陣間就係你成為專屬商品之後第一次參加商品競技表演，記得好好把握機會繼續保持住你喺左副園長眼中嘅好印象。」聽完我嘅答覆之後，睇得出野馬都安心咗唔少。

「冇問題，我唔會令左副院長失望嘅，當然更重要嘅係我唔會令你失望嘅。」我對住野馬微微咁一笑。

「呢啲咁肉麻嘅說話，如果係出自一個玲瓏浮凸嘅妙齡少女你話幾好呢？」野馬連退數步，保持住佢尷尬而不失禮貌嘅笑容，一講完正經嘢佢又變返嗰個條條揈嘅野馬。

「我屌…」我忍唔住細細聲暗罵咗一句，開始後悔俾咗呢個機會野馬挖苦我，然後就開始熱身，為一陣間嘅商品競技表演做好準備。

［522］
唔係過咗好耐，出邊觀眾傳來嘅聲音開始變得熱鬧，我知道競技表演好快就會開始。

「咁多位光臨樂園嘅客人大家好…」果然轉個頭虎鯨嘅聲音就喺廣播入邊傳咗出嚟。

隨着虎鯨嘅主持同埋介紹，第一場嘅商品競技表演就開始咗。

出場都係一啲我唔熟悉嘅其他商品，而我亦都完全冇興趣去睇出邊嘅商品競技表演，慾望樂園嘅競技表演全部都係用商品嘅性命同身體去取悅客人，過程中總係腥風血雨，充滿人性嘅醜惡。對於咁樣嘅場面，其實我係一啲興趣都冇。所以我繼續專心做好我嘅準備，喺等候室度等待自己嘅出場。

好快第一場嘅商品競技表演就結束，隨着虎鯨宣佈結果之後，佢就開始介紹下一場嘅出場商品。

下一場嘅商品競技表演有多位商品出場，隨着虎鯨嘅介紹我忽然眼前一亮，因為我聽到一個熟悉嘅商品編號，而嗰個就係阿宗！

阿宗同我始終都算係生死之交，有一定嘅感情。所以令到我不得不留意呢一場嘅商品競技表演。

我由鐵閘望向外面嘅競技場，五個商品分別由等候失蹤行出嚟，而且身上嘅衣着彷彿就好似古羅馬競技場嘅角鬥士一樣，赤裸上身頭戴鐵盔手持圓盾短劍。

根據虎鯨頭先嘅介紹，呢場係一場極其險惡嘅商品爭奪競技，規則有啲類似道友商品個場，都係一場大混戰，只不過唔一定要殺死對手，只要令對方喪失戰鬥能力都可以，但係最後勝利嘅就只得一個。

睇嚟始終係要溝左副園長

［523］
隨住虎鯨嘅一聲令下，依場商品競技表演正式開始。

一如我所意料，商品競技表演開始之後五位參賽商品都無輕舉妄動，而且互相觀察住對方嘅動向，互相提防住對方，畢竟大混戰嘅規則之下大家都係敵人，一但自己出手就有機會露出破綻俾其他人乘虛而入，再加上每個人都想等其他對手先打個你死我活，自己再座收漁翁之利。

競技場上一時間陷入膠著狀態，但可以睇得出雖然五人係喺到互相提防，但當中嘅四人明顯更留意剩番底嘅一個人，依位係一個身材特別高大嘅商品，接近兩米嘅身體再加上一身結實嘅肌肉同埋皮膚上嘅疤痕，種種嘅因素令依位商品身頭戴鐵盔手持圓盾短劍嘅情況之下彷彿就好似真係以往古羅馬鬥獸場上嘅角鬥士再現一樣。

而我所講緊嘅依位當然就係阿宗，盡管佢自己都意識到佢係剩低其他四個人特別提防嘅對像，但阿宗依然表現得十分淡定，以不變應萬變，準備好以逸待勞侍機而動。

相反另外四個人時刻戰戰兢兢，彷彿一隻驚曲之鳥，少少風吹草動都足夠令佢地大驚失色。

「咁多位…我有一個提議！」依個時候一個商品大嗌起嚟。

依位商品講完之後呼吸都變深咗，緊張地留意住其他商品嘅反應。

「你有啲咩提議？」另一個商品深知自己無能力打破僵局，聽到其他人有提議好奇之心熊熊燃起，決定開口追問對方。

［524］
其他商品都無出聲，但亦無其他行為。只係繼續住自己嘅防備，似乎都等待緊佢嘅高見。

「我建議我地四個聯手對付左阿宗先！之後再兩兩對決得出最後嘅贏家！」提議嘅商品將手上嘅短劍劍尖指向阿宗。

「嗯？！」聽到有人竟然係自己面前大聲商議要聯手對付自己，阿宗當然唔會咩都唔做。

阿宗一步踏出，但其他所有商品一見到都有默契地舉劍提防，始終對佢哋嚟講阿宗的確係最大威脅。

阿宗儘管勇猛，但係同時面對四個持械嘅對手明顯唔係一個明智嘅選擇。

「你地點樣可以確保對方唔會背後偷襲你？講到底大家都係敵人，如果要聯手你地又邊個打頭陣？我最少都有信心帶走你地一兩個！就算唔死都重傷！咁你之後仲點同其他人鬥！我本來並無打算要殺你地，但始果我情況危急起上嚟就無辦法擔保啦！到時候我就只可以落死手！」阿宗當然唔會坐視佢地四個聯手對付自己，所以出言喺佢地合作之前離間佢地。

阿宗所講嘅嘢並非無道理，所以亦都成功帶嚟咗一定嘅效果，對面聽完之後亦都開始懷疑起上嚟。

「唔洗聽佢講！刀劍無眼你點知佢就唔會下殺手！更何況揸流攤有咩後果大家都知！我地拎刀斬佢佢唔通唔斬番我地咩！佢先係我地最大敵人！我地圍攻佢就唔怕有人偷襲自己，你哋唔敢就由我帶頭！」一開始提出要聯手嘅商品再次出聲，睇嚟佢決心一定要解決咗阿宗先。

［525］
「…好！我地聯手！」一名商品一咬牙作出咗決定。

「好！就解決咗佢之後再算！」其他商品見狀都加入。

「嘖…」阿宗面色一沉，對於自己嘅處境感到相當無奈。

而嗰個商品亦都好似佢所講咁一樣，帶頭開始慢慢迫近阿宗，其他商品見狀亦都開始分散起嚟一齊向阿宗行近，形成扇形嘅包圍圈。

暫時阿宗依然保持警惕，並冇太大嘅反應，但係隨着佢同其他四個商品嘅距離慢慢拉近，好快就即將到達雙方嘅攻擊距離。

就係呢個時候阿宗終於有所行動，但係佢並唔係率先發爛攻擊最近佢嘅對手。而係選擇咗一個轉身頭也不回咁樣跑走。

阿宗嘅行為，當然引嚟觀眾嘅不滿，始終好多觀眾期望嘅都係阿宗背水一戰大殺四方血濺當場。

但係阿宗嘅行為亦都屬於人之常情，魯莽咁樣以一敵四係不智嘅行為，無論最後幾勇猛死嘅都係自己，所以逃跑一啲都唔可恥。

嗰四個商品見到阿宗轉身逃跑，以為係佢哋嘅策略生效，準備乘勝追擊繼續撲殺阿宗。

四個商品即刻從後追趕，於是喺短時間之內競技場上彷彿出現咗一場短跑比賽。

提議圍攻阿宗嘅商品係追得最近嘅，一開頭佢根本唔夠阿宗跑得快，完全追唔上。但係逐漸距離竟然被拉近，即將追上阿宗。

而呢一刻嗰位商品臉上浮現出疑惑嘅表情，對於自己竟然可以追上對方感到意外。