《慾望樂園》（2）

變格鬥了

打柒馴鹿
咁寸吖嗱

[442]
「你想贏咗我之後將功補過咩？我一定會贏埋呢場商品爭奪競技，到時就係因為你所以右副園長先至會將書俾左副園長，你就帶住呢個污點比所有同事恥笑啦！」馴鹿嘅表情喺我眼中實在太過面目可憎，令到我忍唔住要開口還擊。

「有鬥志係一件好事，但係你係咪頭先俾我打壞咗個腦啊～我又真係想知你到底邊度嚟嘅自信？唔同你講咁多啦，我都係直接講重點啦，如果唔係周圍嘅觀眾會悶㗎，作為職員我有責任要提供最好嘅表演俾客人㗎麻～」馴鹿係巨大優勢之後完全冇將我放在眼內。

而我嚴陣以待，等待反撲嘅時機。

「雖然咁做唔係好符合我嘅風格，不過為咗最大咁取悅慾望樂園嘅客人，同時亦都當係我對你呢份堅持嘅佩服，最後呢個階段我哋就嚟一場近距離互射啦～以你而家身體狀況，我大可以㩒你喺地下慢慢蹂躪，所以呢個已經係對你最大嘅照顧，用一個好睇而你又冇咁痛苦嘅方式為呢場商品爭奪競技畫下句號，我係唔係好體貼呢～希望一陣唔會演變到你好似隻老鼠咁周圍走，而我就喺後面享受捕獵嘅樂趣啦，雖然咁樣客人應該都幾享受嘅～」馴鹿向下張開雙手，扮到自己好似慈悲為懷嘅聖人咁樣。

我嘅輔助手伸向自己放彈夾嘅腰帶處，但另一隻手始終放喺槍柄上面，繼續指向馴鹿準備隨時用食指拉動扳機射擊。

[443]
「你放心喎～作為最後嘅禮讓，我就俾你換埋呢次彈夾，喺大家充足準備嘅情況之下展開最後嘅廝殺～」馴鹿手上做出請嘅姿勢。

彭！反正都係要換子彈，無論馴鹿講嘅係真定係假都好，佢企喺度唔郁就係我最好嘅射擊機會，我拉下扳機向佢射擊，子彈正中佢嘅心窩。本來我想瞄準嘅係佢嗰個越睇越乞人憎嘅臉，只可惜以面部作為目標嘅話面積實在太細，為咗唔好浪費呢一發子彈，我只好瞄準容易擊中嘅身體。

而我亦都隨即攞出新嘅彈夾，換到入去kar98k嘅子彈倉裏面。

「嗯啊～」子彈似乎擊中馴鹿橫膈膜部位，衝擊力令到橫膈膜向上擠壓肺部，令到馴鹿不禁輕微弓起身體。

「呢一槍就送埋俾你啦～一陣就唔會咁有着數㗎喇～既然你已經換好子彈，我哋就唔好要觀眾等咁耐啦～而且，我都唔想俾你用呢樣嘢做藉口繼續向我開槍～」由馴鹿嘅語氣可以聽得出其實佢仲未由衝擊中回復，只係夾硬保持住自己所謂嘅優雅同笑容，但字裏行間已經聽得出佢嘅殺意。

而係佢講完呢句之後，馴鹿迅速將背後孭住嘅kar98k移到身前攞喺手上，並且快速咁向我開咗一槍。

彭！子彈由馴鹿嘅槍管之中飛出，同樣擊中我嘅腹部。

「嗯！」儘管打中嘅唔係橫膈膜位置，但因為我身上事前已經受傷，痛楚越發明顯。

而馴鹿依一槍亦正式打響咗我哋最後嘅交鋒。

[444]
我馬上就開槍還擊，但因為身體狀況以及中槍嘅影響，就算有紅外線瞄準器嘅幫助我都根本唔可以好好地瞄準馴鹿，更何況馴鹿一開完槍就快速移動，我射出嘅子彈完全打唔中佢。

馴鹿邊移動邊拉動槍機，準備下一發嘅射擊。而我都做緊同樣嘅事，但出嚟嘅效果簡直係天差地別。馴鹿郁動起上嚟快速又流暢，而我就因為受傷腳步移動得好似掛住鉛塊一樣拖泥帶水。喺觀眾嘅眼中馴鹿何其優雅，而我就何其狼狽。

彭！彭！馴鹿開完一槍又一槍，佢嘅射擊技術喺依一刻顯現得淋漓盡致，喺無輔助之下依然可以移動嘅同時瞄準，而且兩槍都成功打中我，分別一槍打中大髀，一槍打中膊頭，而我就成為佢喺樂園客人面前炫技嘅工具。

彭！反觀我瞄準好耐先成功開出一槍，而更攞命嘅係馴鹿好似估到我嘅開槍時機一樣，係我開槍前一刻快速轉向，令到我又打空一槍。

我拖住沉重嘅腳步且戰且退，而馴鹿見狀亦都拉近距離，由於佢依家移動能力比我好得多，令到我地之間距離冇被打開，而係始終休持住咁上下嘅距離互射。但馴鹿就好似佢一開始所講咁，冇衝過嚟埋身放倒我再攻擊，喺佢眼中我已經無還手之力。

同馴鹿相反嘅係，現埸觀眾對進展充滿期待，因為只有上帝視角嘅佢地知道我事前做咗啲咩嘢準備。

我一路後退，終於退到一架廢棄車輛旁邊，我掉低手上嘅kar98k，由車底拖出我收埋嘅m134迷你炮機槍。

［445］
馴鹿馬上就停低咗腳步，但佢並無再次拉開距離，似乎m134迷你炮機槍依個時候喺我手上出乎意料之外，但不足以令佢動搖。

「喂喂喂，你唔係諗住依舊嘢可以嚇到我掛～我一早已經將依舊嘢變咗做用唔到嘅廢鐵….咩話！！！」馴鹿一開始見到被佢破壞失去動力嘅m134迷你炮機槍都依然保持佢嘅自信同優雅，直到佢見到跟住落嚟我做嘅嘢，表情終於變得驚訝。

m134迷你炮機槍嘅電纜中火線同水線被我夾上一條過江龍，喺我早前搜索車尾箱嘅時候曾經見到過嘅嘢。我用同樣曾經喺車尾箱見到過嘅汽車維修工具將電纜火線同水線外嘅包膠剪開，露出入邊嘅銅線，再用過江龍夾住，依啲當初被我認為冇咩作用嘅物品反而喺最後嘅最後為我帶嚟一線嘅希望。

「你無連接到電源，你個電池已經被我打壞咗，你一樣用唔到依把槍！」馴鹿仔細觀察過江龍嘅另一端，並無連接上任何嘢，啱啱見到我嘅時候就已經確認咗後備電池唔喺我身上，應該已經成功被自己破壞，但佢嘅內心依然充滿不安，因為佢知道我一定有所準備。

「咁就真喺要多謝你地啦，一但體驗過一次就唔會忘記有幾痛苦，我點都估唔到依樣嘢竟然有幫到我嘅一日。」我一邊講，一邊將過江龍另一邊嘅鉗夾到我頸上邊，樂園用嚟支配商品嘅商品頸圈上邊。

［446］
「咩話…你依家嘅狀況頸圈一發電就會暈低！你唔係咁天真以為可以用啲咁嘅方法贏到我啊！？」馴鹿已經無辦法保持住自己嘅冷靜同優雅。

「本來我都擔心呢個頸圈可唔可以喺呢個時候觸發到，不過你之前講過，”你哋呢邊”暫時取消咗對我頸圈嘅權限，咁即係我哋呢邊冇啦。唔試吓佢點知我頂唔頂得住啊？我勸你唔好睇小我要打低你嘅決心！」我將m134迷你炮機槍槍口對準馴鹿。

「你喺咪癲㗎！」馴鹿見到事態發展成咁，顧不上形象只可以準備轉身逃跑。

「野馬！致勝嘅關鍵就係依家啦！！！」我大聲吆喝出嚟，突然諗起野馬喺接我過嚟進行商品爭奪競技嘅時候講過，我哋之間友情嘅羈絆可能就係致勝嘅關鍵，又真係俾佢講中咗。

「你真係痴線佬嚟，我唔理會變成點㗎啦！你一定要頂住啊！我地一齊贏咗依地競技佢啦！！！！」野馬由場地嘅螢光幕睇到同聽到我做緊咩，雖然唔知我會唔會聽到但佢都大喝一聲，然後透過職員手錶觸發我頸圈上嘅放電。

「嗯！！！！」電流由我嘅頸圈放出，即使有唔少透過過江龍傳到我手上嘅m134迷你炮機槍電機，但依然電到我發出痛苦嘅呻吟。

我嘅手指一早握咁喺機槍嘅發射制上邊，電流引起嘅肌肉抽搐更加幫助我死死撳住唔放手。

而同時喺得到動力來源嘅情況之下，m134迷你炮機槍嘅六管旋轉槍管開始轉動。

［447］
彭！彭！彭！彭！彭！彭！喺旋轉槍管嘅轉動之下，機槍子彈被逐一擊發，長長嘅子彈鏈不斷為m134迷你炮機槍提供源源不絕嘅彈藥。

馴鹿會逃跑係我意料之中嘅事，所以我一開始瞄準嘅根本唔係得分比較高嘅軀體或者頭部，而係最可以限制佢活動能力嘅雙腳。

腎上腺素嘅作用同樣適用於馴鹿，佢強行頂過一開頭嘅攻擊，想盡量遠離我。

只可惜一切都係我嘅計劃之內，光圈已經縮細到廣播所講嘅最細範圍，亦即係一個直徑10米左右嘅圓圈，我由諗到呢個計劃嘅時候就已經開始留意光圈嘅縮細情況，並且大概判斷光圈最後定格嘅位置，事先將所有嘢搬到呢個範圍之內。

如果係正常情況之下，以我而家嘅狀況根本冇可能將馴鹿控制喺我嘅攻擊範圍，就算對方逃走我亦都冇辦法追趕得上，但就係因為呢個光圈限制咗馴鹿嘅活動範圍，我先可以放心集中喺保持攻擊同埋集中精神唔好冧低。

而且咁啱得咁蹺嘅係，依把機槍嘅火力輸出同埋覆蓋範圍根本唔需要我瞄準，只需要將槍管指向目標位置，密集嘅火力總可以擊中對方，所有嘅因素都配合到我依家嘅狀況，成為我最後反擊嘅力量。

如果馴鹿離開光圈位置每秒嘅扣分都足以令佢輸咗呢場商品爭奪競技，而係光圈內就要面對我不斷嘅攻擊，而且最令佢絕望嘅係光圈嘅範圍內根本冇乜掩護物。

點解一定要叫野馬個名，唔叫個名佢都應該配合到啦

咁上面啲人咪知道到野馬應記一功，可以幫佢上位，方便計劃

［448］
「啊，啊！啊！！！」馴鹿失去咗頭先展示出嚟自信又優雅嘅形象，突然陷入困境嘅佢竟然發出狼狽嘅叫聲。

馴鹿已經無處可逃，依家嘅佢唯一可以做嘅就只有不斷改變方向左右跑，並且馴鹿一個轉身，似乎係想將我撲倒，強行停止我嘅攻擊，依個的確係佢目前可以做嘅最佳選擇，亦係我最擔心嘅事之一。

不過佢咁做同樣有風險，越係接近我中彈嘅機率就越大，而射擊距離近咗威力亦都會大咗，所以佢必須盡快接近以減低傷害同埋失分。但直衝風險會太大，而左右跑又會變相延長距離，增加接近所需嘅時間。

另一方面，我嘅情況都不容樂觀。本來就傷痕累累嘅身體係電擊之下更加搖搖欲墜，我咬緊牙關咬到牙齒都就快碎裂先勉強保持意識，要不斷調節槍管方向對準左右移動嘅馴鹿同埋低抗後助力簡直攞咗我條命。

「嗚嗚！！！」痛苦令我好想慘叫，但電擊之下我個口根本打唔開，而我所有精力只可以用嚟保持身姿，所以唯一可以發出嘅就只得可憐嘅低嗚。

馴鹿離我已經越來越近，我不斷努力集中攻擊佢雙腳，特別是係佢膝頭哥嘅位置，希望喺佢嚟到我面前之前將佢擊倒。

「呃！」喺我嘅努力之下，馴鹿嘅腳終於承受唔住攻擊，連腎上腺素都幫唔到佢，一腳踏係地上發軟之後成個人失去重心，重重咁摔倒咗喺我前面。

［449］
馴鹿依一跌將自己最後一根嘅救命稻草都甩埋手，馴鹿同我只差五步左右，咁近嘅距離令到我手上機槍嘅大近分子彈都可以打到落馴鹿身上，就算對方跌低咗我嘅攻擊目標都依然無變，繼續向住馴鹿嘅雙腿傾瀉火力。

喺接二連三嘅攻擊之下，馴鹿無法馬上企番起身，只可以係地上邊掙扎透過不斷扭動身軀保護雙腳然係盡量起身。

不過我當然唔會俾馴鹿咁輕易就得逞，我用腳步嘅移動繞過馴鹿，搵出一個更好嘅射擊位置，繼續限制對方嘅活動能力。同時我亦都係到慢慢咁拉番遠距離，避免萬一馴鹿真係再企番起身之後嘅攻勢。

不過以上動作講就好似好容易，我實際上執行起上嚟就幾乎博咗自己條命。先唔講我身上受緊嘅痛楚彷彿強烈到神經都要壞死，被電擊電到收縮嘅大腳肌肉僵硬到好似石頭一樣，我用盡住力先成功邁開一丁點嘅腳步，而且每次提起腳步郁動我都介乎於要倒下嘅邊緣。

馴鹿經過一番努力之後艱難地抽起腳半跪於地上，髮型已經被打亂嘅佢臉露兇光，眼神中透住殺意，準備再次向前衝鋒將我撲倒。

我心感不妙，準備好迎接馴鹿飛撲。但喺對方一發力準備起身嘅時候，馴鹿再次好似斷線嘅公仔一樣下墜，向住地板自由落體。或者係腎上腺素效果已經結束，馴鹿雙腳已經唔可以再支撐佢嘅身體。

［450］
失去移動能力嘅馴鹿喺我眼中簡直就係肉隨砧板上，但並唔代表我已經可以有條件贏出呢場商品爭奪競技。

馴鹿知道自己已經冇辦法逃離，唯有將身體捲縮一舊徹底放棄自己形象，令到自己身體上邊高得分嘅部位盡量遮蓋着。並且祈禱我喺獲得足夠反超佢嘅分數之前承受唔住電力嘅傷害率先倒下。

儘管我已經逼到馴鹿去到如此絕境，勝利就只係喺眼前面，但係我嘅身體已經就嚟堅持唔住，意識就好似暴風雨之下嘅風箏咁樣隨時都會斷線。

我眼睛見到嘅光線開始模糊，耳朵聽到本來周圍仲係歡呼雀躍嘅觀眾聲開始越嚟越遠，而且就好似訊號受到干擾一樣聽到嘅幾乎變做雜音。

但我知道自己仲需要堅持，我已經冇餘力計算剩低嘅比賽時間仲有幾耐，我只可以不斷話俾自己聽，我要再堅持多陣，再堅持多一陣就可以啦。

我內心不斷向自己吶喊，頂住啊！唔可以瞓着住！我嘅雙腳要頂住！唔可以喺呢個時候跌低！我嘅雙手要頂住！唔可以移開對準馴鹿嘅槍管，唔可以放開機槍嘅發射制！

感覺就好似如果自己只要有一刻唔向我身體發施呢啲號令，佢哋就會本能地停低工作，減低對身體嘅傷害，但係我要做嘅就恰恰相反，我要繼續承受住呢啲傷害。

原本幾乎已經漆黑一片嘅視野，入邊突然出現一道光芒，呢道光芒慢慢佔據我嘅視線，我嘅意識亦都好似逐漸回復正常，但我睇到嘅竟然係天花板嘅光管，一股消毒酒精嘅味道亦都傳入我嘅鼻腔。

睇吓邊個夠耐力

好耐無留言！ 支持下先！

[451]
「喂！你終於醒番啦！」熟悉嘅聲音喺耳邊響起，我移動眼球向旁邊一望，野馬喺我身旁依靠住床邊企起身望住我，眼神相當憔悴，但依然露出一副驚喜嘅表情。

「點解你會喺到？」無數問嘅喺我腦中出現，好明顯我完全搞唔清情況。

咪住先？！我訓喺床上邊？！我眼睛嘅餘光睇到野馬身後嘅布簾，大腦𣊬間清醒過嚟，我可以好肯定我依家身處嘅係醫療室嘅病床上邊！

明明我記憶中自己喺身處於同馴鹿嘅商品爭奪競技尾聲當中，而且正值勝負關頭，而我下一刻嘅記憶就已經喺依到，啫係我無成功堅持落嚟，喺電擊之下由競投嘅中途暈低！

我第一個反應就係想由病床坐起身捉住野馬問清問楚，但我一郁動身體嘅時候全身都傳嚟痛楚，唔單止係肌肉，就連骨頭同關節都一齊向我大腦傳嚟各種各樣嘅疼痛。

因為依啲痛楚我無辦法坐起身，全身嘅細胞都要求我唔好郁動以保護自己，甚至乎連肺部都要我受苦，令我狂咳不而。

「喂你見點啊！你訓咗成兩日架啦！你唔好再勉強自己啊！嚟！深呼吸！」野馬連忙安撫我。

「咳咳！我暈咗…咳咳！兩日？！咳咳…」我聽到依個咁震驚嘅消息咳得仲西利。

「你冷靜啲先啦！唉唔係啦，我扶你起身先啦，幫你掃下背你會好啲嘅。」野馬講完就伸手輕輕扶起我。

起身嘅過程依然痛，但比起自己發力起身要好得多。

[452]
「啊哈，啊哈，啊哈…」經過幾個深呼吸之後我終於舒服咗好多。

「我係咪…喺商品爭奪競技結束之前就暈低咗啦？」我啱啱恢復到可以講嘢就急不可待地問番野馬。

「你係啊…」講到依個話題，馴馬神情明顯有啲失落。

由佢嘅反應我已經大概得知我一陣間想問嘅問題答案係咩，但人總係唔見棺材唔流眼淚，我都係要親耳聽到答案先心死。

「咁最後嘅結果點啊，我已經唔太肯定自己失去意識嘅時候仲有幾耐競投就完結，我有冇喺時限之前將得分追番上嚟啊？」我苦笑低頭，準備正式面對答案。

「其實我都唔肯定你喺幾時開始斷片個啵。」野馬一面無辜咁望住我。

「咩啊？咪我暈低個吓囉？」野馬嘅回答聽得我都一頭霧水。

而依個時候病床旁邊嘅布簾被拉開，一舊著住緊身性感護士服嘅扎肉出現，來者正正就係醫療室標誌性人物護士。

護士嘅出現永遠都係咁震撼，衝擊性嘅形象就好似直接將一支咖啡因打落我個腦咁，成個人醒曬，嚇到醒晒。

就連野馬知道對方入咗嚟都一樣唔敢擰轉頭望過去，死死地盯着我以免視線受到不必要嘅刺激。

「我聽到呢度咁熱鬧，就知道我隻豬仔醒咗啦～不過豬仔要聽話喎～你有排都未好返啊，要繼續好好休息先得㗎～」護士講嘢故意嘟起身嘴，強迫佢強而有力嘅聲帶發出娃娃音。

[453]
我吞一吞口水，呆咗咁樣望住佢，視覺聽覺嘅衝擊令到我就好似中咗五條悟嘅無量空處咁，大腦處理唔到呢啲資訊，只好停機令到自己一片空白。

雖然野馬刻意令到自己唔望過去，但係聲音佢係冇辦法拒絕接收嘅，聽到護士講完嘢之後野馬瞳孔擴張，冷汗由佢額頭流落嚟。

「豬仔做咩呆咗啊～吞晒口水咁～太耐冇見我都唔使咁緊張喎～你咁可愛我會忍唔住想蝦你㗎～」護士講完之後仲要對住我咬唇舔脷。

「你…攞住呢啲…係咩嚟㗎？」我嘅大腦為咗保護自己唔好燒壞，決定馬上拉開話題，我見到護士手上捧着一盤嘢上面放住啲碗碗碟碟，於是即刻追問，但講嘢依然被震撼得食晒螺絲。

「呢個係左副園長特別為你準備㗎，佢吩咐我等你一醒咗就提供俾你，全部都係啲好好嘅補品嚟㗎，可以幫你快速恢復返身體。佢仲話依家你正式喺佢手下面效力，如果表現好着數陸續有嚟喎～」護士將餐盤放喺我病床上嘅餐枱，然後用手指低住下巴做出一個思考嘅模樣。

「正式喺佢手下面效力？」成段說話之中，只有呢句嘢最吸引到我注意。

「你啊～雖然咗副園長俾咁多好嘢你食，但係你都唔好唔記得我對你嘅付出啊～我嗰啲先至有心意㗎～好啦，我出返去做嘢先啦，一陣再入嚟睇你呀豬仔～」護士扁一扁嘴之後轉身離去。

護士離開之後我同野馬對望，兩個人都起晒雞皮。

［454］
我望向餐枱上嘅嘢食，有蟲草雞湯，藥膳排骨，杏仁燉水梨等等嘅藥膳類食材，根本上已經係我依家身體可以食到最適合同埋最好最補嘅嘢。

「護士話…我依家正式喺左副園長手下面效力？」我繼續望住餐枱上嘅嘢食，如果我失敗咗應該會被左副園長狠狠地拋棄，但嘅然佢仲向我提供咁多嘢食嘅話…

「仲諗住玩多你一陣添，點知俾護士佢督爆咗。恭喜你啊ryan，你真係做到啊，你贏咗場商品爭奪競技，今次真係辛苦你啦。」野馬難得地露出一個正經啲嘅表情，微笑住同我講。

「屌你…頭先嚇死我啦，原來我贏咗…真係好彩，我以為暈咗就輸硬，好彩都夠贏…但係馴鹿無係我暈低之後做啲嘢咩？我暈嘅時間佢都暈咗？定時間已經唔夠佢追番？」我聽到之後如釋重負，暗自多謝幸運女神嘅眷顧，但對結果有啲奇怪。

「最後嘅得分你啱啱好贏佢6分，而且係最後一秒先啱啱好反超前。」野馬輕輕搭住我膊頭同我講。

「最後1秒我先至反超前？原來我堅持到最後1秒先暈低咩？」對於原來自己啱啱好堅持到最後，令我有一絲安慰。

「你幾時暈我就唔知啦，我淨係知你開窗槍最後一刻，直到競技結束我停止電擊你都保持姿勢喺度唔郁，其他職員過嚟檢查嘅時候你仲死死撳住扳機，但係冇任何反應一早失去意識。」野馬將事件嘅真相同我交代。

［455］
「原來係咁…」我聽完野馬咁講，回憶起我喺商品爭奪競技嘅最後記憶，以我當時嘅體感時間嚟講，距離競投結束應該最少都有番幾分鐘時間，我應該唔係最後一刻先暈低，而係暈低咗之後我嘅身體回應咁我嘅決心，幫助我保持住向馴鹿開槍，我先可以嗎最後一刻反敗為勝。

我放鬆身體，慢慢咁深呼吸，既然我嘅身體幫助咗我支撐到最後，咁佢哋都的確係時候要得到充分嘅休息同回復，呢段時間我會好好養傷作為對身體嘅感激。

「點都好啦，總之你而家已經成功通過咗商品爭奪競技，正式成為左副園長嘅專屬商品，而且佢對於你喺商品爭奪競技中嘅表現仲非常滿意，以後你就會作為佢勢力嘅商品參與活動…而我哋之後嘅計劃亦都可以進行落去。」野馬最後一句刻意靠近我，而且細細聲咁講。

「…咁你而家可以講多啲俾我知道未？」我亦都細細聲講。

「可以，不過呢度唔係一個討論呢啲事情嘅好地方…你依家就好好養傷先啦！其他嘅嘢我會處理㗎啦，到你恢復得咁上下嘅時候我會過嚟接你走，到時候我再同你講關於專屬商品之後嘅詳情啦。」野馬細細聲講完第一句之後，重新回復返正常聲線。

「嗯。」我已經明白野馬嘅意思。

「我暈咗呢段時間你唔會係隔離一直等我起身掛？」我望向野馬。

［456］
「咁又唔完全係嘅，不過都差唔多㗎喇，大部份時間我都喺度嘅，你真係係要多謝我㖭啊！」野馬擺出一副好似做咗我救命恩人嘅表情。

「你應該㗎喎，我估你可以大部份時間喺得到都係左副園長較帶落㗎啦，如果唔係你可以咁得閒？」我一睇就睇得出。

「喺～我係奉命過嚟睇住你狀況嘅，但係我大可以就咁望住你，你都唔知我為你做咗啲咩！」夜晚一副委屈嘅語氣。

「你做咗啲咩？」而我亦都真係好奇。

「你都知護士佢係點㗎喇…你嚟到呢度醫生檢查完之後就由佢同你除衫包札換藥抺身，如果唔係我喺旁邊極力制止佢，你就係佢嘅吹氣公仔咋！你都唔知道佢嗰啲所謂護理手法幾咁猥瑣！」夜晚再次靠近我細細聲同我講。

「…多謝你…」我突然諗起之前護士嘅對話同埋佢做過嘅事，的而且確佢更加鍾意瞓喺度郁都唔郁嘅對象，而且佢會做嘅事亦都不堪入目，唔難想像如果我單獨喺度暈咗兩日，應該渣都冇得剩…

「唔同你講咁多啦，既然你醒咗我都要返去通知聲左副園長，你自己喺度執生啦，有機會我之後會搵一個合適嘅地方同你交帶番啲詳情㗎喇。」野馬話中有話。

「嗯，我等你安排。」我輕微地點一點頭。

野馬隨即就起身拉開床簾離去。

「依？野馬你走啦？」病房外護士嘅聲音傳過嚟。

「er…係啊，既然18號已經醒返，我要返去同上邊講聲先，啊係啦…佢啱啱醒返，你俾佢休息多陣唔好打擾佢啦，佢有需要嘅會自己叫你入去㗎喇。」野馬回應護士，我同野馬都聽得出護士有陰謀，於是夜晚臨走前都盡量幫一幫我。

想知馴鹿點