【校園／愛情】戀上鄰家女孩（布甸篇）

35.

當我想回頭質問黃子瑜嗰陣，牆角早已空空如也，剩低嘅只係得返佢嘅陣陣餘香，而佢個人已經向住課室門口方向逃跑緊，即係佢趁我頭先鬆懈嗰剎那間，成功擺脫咗我嘅圍困。

「咪走啊你！！」見到黃子瑜一跑，我就幾乎自動波追住佢跑。

但當我追到出課室門口，就見到黃子瑜同走廊個男仔迎面相撞，仲要係撞到應一應嗰種，嚇到黃子瑜花容失色，差啲失平衡跌親，而個男仔俾佢撞到手上面疊單行本跌到成地都係。

嗱...黃子瑜你係咪衰呢，撞到人喇...

我望一望呢個男仔，確認唔係我哋班同學，見佢呆咗咁望住黃子瑜，表情有啲不知所措，我好心上前幫佢執返啲單行簿，依稀見到姓名嗰欄寫住「X家樂」，但因為呢個姓太多筆劃，嗰陣我真係唔識讀。

誰不知呢個時候，我感覺到後頸一陣濕淰淰嘅感覺，情不自禁打咗個冷震，即刻揞住條頸，你個衰女包竟然趁我幫緊人執嘢嗰陣偷襲我！？將啲水抆晒落我條頸度？

「嘻嘻！呢個係報仇嚟㗎，鬼叫我差啲俾你夾死。」

黃子瑜一邊勁得戚咁望住我，一邊拍走手上面剩低嘅水滴，顯然對自己頭先嘅偷襲計劃係相當滿意。

事情暫告一段落？仲未完...

隔咗陣，子瑜又再行開咗，曉琳放低手頭上嘅工作，走過嚟拉一拉我衫袖問我：「陳佑男，咩嘢係『差啲俾你夾死？』」

我窒咗秒，諗咗一諗，但我直覺話俾我知，我唔想將我同子瑜相遇嘅故事分享俾任何人知，於是答：「鬼知佢講咩！黃子瑜黐黐地線㗎。」

原來由嗰一刻開始，我就決定欺騙曉琳，守住我同黃子瑜之間嘅秘密，親近如曉琳亦唔想俾佢知道。

曉琳聽完之後微微一笑，雙手抱胸走開咗，但我聽到佢細細聲喺度自言自語：「好羨慕你哋...」

細聲到我幾乎聽唔到佢講咩。

曉琳返咗埋位之後，只係低頭默默咁執緊啲勞作，無再出過聲，我諗返啱先我係咪俾咗一個失望嘅答案佢...但我既然選擇咗行呢一步，都已經無得再返轉頭。

「陳佑男！！」又係黃子瑜把聲...

我擰轉頭見呢個衰妹個樣不懷好意，又唔知想點樣整蠱我，但最莫名其妙嘅係，呢一次我聽到子瑜嗌我個名嗰陣，我竟然有種期待已久嘅感覺。

諗返起，頭先同黃子瑜你追我逐嘅時候，我哋兩個當咗同樣喺課室嘅曉琳完全唔存在咁，當黃子瑜撞到隔離班嗰男仔亦無動於衷，似撞到件死物多過撞到人，感覺上好似有股無形力場將我同黃子瑜包圍住，跟住將我哋同外界事物徹底隔開。

唔通真係正如曉琳所講，我同黃子瑜係一個願打一個願捱，喺度打情罵俏？但對於當時嘅我嚟講，要將黃子瑜成日老點我同整蠱我嘅原因，諗成係因為對我有意思所以先咁做，點講都好我都覺得有啲匪夷所思。

不過點都好，我哋第一年嘅壁報板設計比賽就喺我同黃子瑜吵吵鬧鬧之下謝幕結束，憑住黃子瑜出色嘅主題構思，同埋曉琳專業嘅美術指導，最後加埋我任勞任怨嘅技術支援，成功為我哋班贏到第一個班際冠軍，我哋三個瞬間變成班裡面一舉成名嘅人物，呢個冠軍亦都見證住我哋三個之間嘅友誼正式開始...

咦？乜我唔係同曉琳煲緊電話粥㗎咩，點解無端端我又搬返中一啲前塵往事出嚟講，仲要子瑜前子瑜後，唔怕曉琳唔鍾意咩？

無計啦，我哋傾電話傾咗無耐之後，曉琳好快就開始攰到咿咿吟吟，到最後剩係得返啲鼻鼾聲，我就知道，呢個傻瓜肯定食完藥之後，藥力發作恰著咗都唔知，咪剩返我一個人，但我又唔捨得再cut佢線。

但你知喇，一個人夜闌人靜嘅時候，總係特別容易亂諗嘢...

過咗陣...

「呃...我瞓著咗喔...」電話話筒再次傳嚟曉琳嘅聲線，將我從回憶當中拉返嚟現實。

「傻瓜，瞓醒喇？」

「嗯...我瞓咗幾耐啊？」曉琳啱啱瞓醒把聲，咬字仲有啲唔清唔楚，但反而更加惹人憐愛。

「而家九點幾喇，差唔多有兩個鐘。」

「吓咁點解你唔收線嘅...？」

「唔捨得囉，想陪住你。」

「嘻～乜你對我咁好㗎咩。」

就算而家只係隔住電話，但我都可以感受得到曉琳爛漫嘅笑容，只係我唔知自己有無信心，可以保證到呢份笑容，能夠一直維持到永遠。

36.

結果無幾耐，曉琳又再瞓返著，今次我真係收咗線，其實今日發生咗咁多事，我都需要啲時間沉澱同消化。

而第日星期六，曉琳亦有乖乖地聽話準時食藥，而藥力副作用發揮令到佢全日只能夠攤喺張床度休息，但佢喺電話度應承我一定會好好咁抖足精力，咁先可以趁星期一中秋節補假一齊出去拍拖，佢仲話已經諗好咗去邊度玩，不過又懶神秘唔肯話俾我知。

「唔俾問咁多啊。總之呢，到時候你就會知，而家講咗就無驚喜㗎喇。」曉琳把聲明顯比尋晚虛弱好多，說話語速都比平時慢咗半拍，不過依然係咁溫柔咁好聽。

「咁我係咪真係無嘢要準備㗎？」

「嗯嗯，你...只需要帶你個人出嚟就得㗎喇...吖唔係吔，有樣嘢你要準備定先啊，你記得要增值定張八達通...」

究竟係咩原因要我增值定張八達通先呢？唔知啊，不過到時就會知㗎啦，既然曉琳咁講得，我只要乖乖地聽女朋友話就可以，所以今日嚟到星期一，我出門口嘅第一件事，就係將銀包裡面嘅所有紙幣都㨃晒落張八達通度。

好！出發！

我望一望個電話，而家十點半都未夠，距離我哋約好咗十一點喺葵芳地鐵站等仲有大把時間，就算我慢慢行過去都唔會遲到。

不過我喺地鐵站企咗成九個字都未見曉琳蹤影，而佢亦唔似係會遲到嘅女仔，我開始有啲擔心呢個傻妹會唔會仲未好返而瞓過龍，我拎咗部電話出嚟，但又糾結好唔好打俾佢，我又怕搞到好似催佢咁。

而喺我猶疑之際，我感覺到有人從後輕輕拍我膊頭，古語有云未見其人先聞其聲，但而家係未見其人先索其香，我背後呢股少女芳香，瞬間將我嗅覺刺激到極點，甜得嚟又唔會太膩，有種令人心動嘅魔力，唔使問都知道係我可愛嘅女朋友到咗。正當我諗住擰轉身捕捉我女朋友嗰陣，曉琳已經搶先一步彈咗喺我面前，含情脈脈咁望緊我。

嘩嘩嘩嘩嘩...曉琳你今日...

我懇請大家容許我花少少筆墨去形容一下曉琳今日呢身裝束，因為我真係唔想辜負咗佢悉心打扮所花嘅心思。咁我哋就由上而下順住落講，首先係髮型，空氣瀏海真係曉琳嘅標誌性髮型，好多女仔嘅瀏海都緊貼住額頭，當面油一出，髮型隨之變型，但曉琳就完全無呢個問題，而且今日唔使返學所以亦都唔使紥辮，佢將頭髮放晒落嚟，髮尾部份仲比平時更加捲曲，唔知係咪有刻意用髮夾夾過，我都唔識形容，總之就好似城堡公主咁。

至於曉琳本身咁靚女，五官標緻、眉清目秀、皮膚嫩滑呢啲就唔噆氣多講，但今日佢仲畫埋眼妝，令佢原先對大眼睛輪廓更加奪目，加埋blink blink嘅粉紅色唇膏。不得了，讚！

最後不得不提嘅係曉琳套衫，白色低領長袖衫加一條英倫學院風嘅格仔紋短裙，啲人話女仔嘅鎖骨其實都係一處令人迷暈心竅嘅部位，但計我話曉琳今日條短裙先至係最搶眼，灰黑色系嘅格仔花紋好睇之餘，條裙長度盡顯佢對得天獨厚嘅白滑長腿，再襯埋對黑色皮鞋，感覺清純又帶點性感，而最令我為之一震嘅係，黑色皮鞋係配小白襪啊啊啊啊啊...

我興奮到差啲忍唔住嗌咗出嚟，而曉琳就一臉疑惑望住我。

「喂喂，你做咩唔出聲嘅？係咪嬲咗我遲到...對唔住啊...」

「無啊，點會呢，我怕你唔知醒咋。」

「嘻嘻，我今朝早真係差啲起唔到身㗎～」

我情不自禁伸手摸一摸曉琳個頭，下秒鐘曉琳已經翹住我手臂，然後興致勃勃咁舉高另一隻手，向住中環月台方向前行：「出發出發～」

希望男主唔好傷害曉琳

子瑜講過㗎，如果佢傷害曉琳實唔會放過佢

但係我覺得子愉會頂唔住

Lm

子瑜就快想殺咗我做咩雪咗佢咁多集無得出場

37.

其實到目前為止我都仲未知道今日嘅行程，但見曉琳原來仲有個背囊孭住喺身，相反我就兩手空空，我覺得我有必要盡返男仔風度，於是我主動提出不如交俾我孭。

「唔使啊唔使啊，呢隻色咁女仔，唔啱男仔孭㗎。」

我輕輕睄一睄曉琳個背囊，係薄荷綠色，仲吊住咗隻布甸狗公仔。

布甸狗...？

假期嘅地鐵站人潮如湧，唔使幾個站，四方八面嘅人群將我同曉琳越逼越入，車裡面嘅人想走出去，車外面嘅人就搏老命咁塞入嚟，總之每次停站都要經過一輪你推我撞，曉琳今日打扮咁靚，我擔心容乜易會俾啲麻甩佬乘機抽水。

「啦～啦～啦～」不過曉琳完全無呢個憂慮，佢挨咗喺我懷抱裡面哼歌，有股稚氣不斷散發緊出嚟。

「你唱緊咩啊？」見佢唱得咁開心，我專登伸隻耳仔埋去扮專心聽。

「你估吓吖。」跟住佢又真係哄埋我耳邊，繼續哼佢首歌，唱唱吓仲自己忍唔住喺度傻笑，你個傻妹吖，又會開心成咁嘅，睇嚟早幾日個病都已經好返晒。

有曉琳嘅甜美歌聲伴隨，就算呢程地鐵再逼都好，都唔算得上係啲咩，霎眼間我哋就嚟到中環，我哋順住人潮行到上嚟一座行人天橋。

「估到我哋要去邊未呢？」曉琳搖住我手臂問。

自我呱呱落地以來，我都未踏足過港島呢塊土地，我真係完全無頭緒我哋去緊邊度，但又唔想顯得我成個大鄉里出城咁，好彩呢條天橋每隔兩步就有啲方向牌不斷俾緊提示我。

「長洲？南丫島？」我答，但我統統都未去過。

曉琳擰擰頭：「唔啱啊～」

「咁係迪士尼？」

曉琳又擰擰頭：「都唔啱啊～迪士尼無得搭船去㗎，我哋係去愉景灣啊。」然後笑瞇瞇望住我。

吓？愉景灣？聽個名都感覺到係高尚地方，但諗諗吓又幾合理，配合返曉琳嘅小康家庭背景，斷估佢之前有同屋企人去過。之但係，我連愉景灣喺邊度嚟都唔知。

唔緊要啦，好快我就會知道答案，我同曉琳穿過天橋嚟到中環碼頭，由七號碼頭沿住海傍一直行，經過梅窩、長洲、索罟灣碼頭，沿途有好多大哥哥大姐姐孭住個笨重背囊準備露營，偶爾又會有幾個外國人揸住杯咖啡出沒，又有一對對情侶手拖手準備上船，而我同曉琳就係其中嘅一對小情侶，雙雙嚟到三號碼頭閘口。

望一望個船票價，嘩頂你成四十幾蚊，來回差唔多成舊水，好彩我哋有學生優惠，我終於知道點解曉琳話要預先增值定張八達通。

「點解你八達通有咁多錢嘅？」曉琳笑問。

「因為你叫我增值定先吖嘛，我好聽女朋友話㗎。」我答。

「正傻瓜，咁都唔使入成幾百蚊落去㗎～」

呢刻曉琳笑得好開心，我唔知佢係笑緊我蠢將銀包啲錢塞晒入八達通裡面，定係因為聽到我講我好聽女朋友話而笑得咁燦爛，但係只要佢開心，我就好滿足。

「咁入多啲錢，咪可以請你食嘢。」我自圓其說。

「唔使啊～我準備咗好多食物...」曉琳講到一半即刻雙手揞住自己個嘴，眼仔碌碌咁望住我，佢好似唔小心爆咗個秘密出嚟…

曉琳眼神開始流露出失望嘅表情：「啊...唔講得㗎，唔講得㗎，講咗就會無驚喜。」仲垂頭喪氣咁扁晒嘴。

「傻瓜嚟嘅，我都唔知有咩食物，放心啦，個驚喜仲喺度。」我摸摸佢頭髮安慰佢。

「咁陣間去到公園草地嗰陣，你要扮唔知道有食物㗎。」曉琳依然扁緊嘴，撒嬌道。

啱啱曉琳係咪唔小心自爆埋我哋今日個拍拖活動？

「公園草地？原來我哋今日係去野餐啊？」我唔係故意逗佢，但又真係忍唔到口。

「喂吔...」好喇好喇，望住曉琳楚楚可憐嘅表情，叫我仲點忍心再刺激佢。

曉琳好可愛

歡迎新讀者支持

Lm

歡迎新讀者支持

歡迎新讀者加入先啱，未瞓醒手殘

有個咁好嘅女朋友，希望陳佑男識珍惜

新讀者留名

多謝支持

38.

由中環去愉景灣需要半個鐘船程，曉琳坐喺窗口位，不停扯我衫袖叫我陪佢欣賞沿途風景，又問我呢個島叫咩名，嗰三支煙囪係邊度嚟，基本上我全部都唔識，只能夠陪住佢一齊傻更更咁讚嘆眼前所見到嘅景象。

但其實曉琳亦都無在意過我識唔識嗰啲地方，只要有我陪住佢一齊睇就已經好開心，而佢都似乎將頭先唔小心自爆嘅瘀事拋諸腦後。

落船行出碼頭之後，我無辦法再掩飾大鄉里出城嘅雀躍心情，前面一座歐陸色彩嘅圓型廣場，一張又一張嘅露天帆布餐枱，四周圍都有外國人拖住隻狗閒談漫步，只要俾啲想像力，真係會有種仿如置身外國嘅感覺。

忽然間我諗起一樣嘢，曉琳今日著嘅英倫風短裙，話唔定就係為咗要襯托返我哋而家身處嘅地方。

「好靚啊，好似去咗歐洲咁。」曉琳似乎都俾眼前景色吸引住，而因為呢個傻妹一早就唔小心透露咗我哋今日嘅行程，所以我都知道呢個廣場並唔係我哋嘅目的地。

穿過廣場之後，映入眼簾係一條靠山而建嘅馬路，我哋企喺巴士站度等緊下一班車送我哋去中央公園。

「嘩，你快啲睇吓，係高爾夫球車啊。」曉琳不停扯住我衫袖指向左邊叫我望過去。

我順住曉琳指住嘅方向，真係有架平時喺電影先會見到嘅白色高爾夫球車，出現喺條馬路上面，向住我哋個方向駛緊過嚟，喺我哋面前掠過嗰陣，仲可以近距離清楚望到揸緊車嘅係個戴住副黑照，踢住拖鞋嘅外國人，成個畫面好chill。

我以為呢啲白色車仔只會喺高爾夫球場先可以揸，點知竟然喺馬路中心駛過，雖然好似有啲違和，不過又幾符合呢度嘅異國風情。

「好cute cute啊。」曉琳目光一直跟住架車，直至佢遠離我哋視線。

「我人生第一次見高爾夫球車。」我讚嘆。

「我都係啊…」曉琳和應。

「嗰度仲有一架啊。」我捉住曉琳隻手，指向另一邊。

就喺等巴士嘅短短幾分鐘裡面，耐唔耐就會有架高爾夫球車喺我哋面前駛過，曉琳話呢啲咁可愛嘅車車，似係區內居民日常代步嘅交通工具。

過咗無耐，巴士到站，帶我哋嚟到中央公園，呢個公園同啱先見到嘅新奇事物相比之下略嫌普通，草地面積都唔算好大，但勝在無乜人，雖然稱不上係世外桃園，但若然想靜靜地享受下二人世界亦不失為一個好地方。

我同曉琳隨意咁搵咗個又有樹陰又坐得舒服嘅位置，然後曉琳除底個背囊，喺裡面攞咗張野餐墊出嚟，我哋夾手夾腳鋪好張墊，再各自除低自己對鞋出嚟砸住四個角落，咁就唔怕張墊俾風吹起。

我哋之間嘅默契經過壁報板比賽，慢慢磨合得越嚟越好。

「坐得啦。」整頓好張墊之後，曉琳就率先跳咗入去踎低，喺背囊裡面將食物盒、餐具同水壺好似百寶袋咁逐件逐件摷出嚟，再整整齊齊咁排列返好。

呢個時候，我視線反而專注咗另一樣嘢度...

除咗鞋之後嘅曉琳，露咗對幼嫩嘅小白襪...

今時唔同往日，而家嘅我理應係攞正牌，可以喺光天化日之下近距離欣賞曉琳對腳，我視線沿住佢啲腳趾一直慢慢往上爬，經過小腿再去到佢對白滑大脾就停咗落嚟，頭先搭船嗰陣我已經忍唔住向住曉琳對大脾睄咗好幾次，但而家可以用另一個角度再觀賞多次，唔知道視姦自己女朋友算唔算犯法㗎呢？

唔理得咁多住，我趁曉琳摀前摀後專心咁整理緊面前堆食物盒，再加上今日佢條裙咁短，我繼續控制眼球由大脾位置往上探索，曉琳大脾內側嘅防線目前處於半開半合狀態。

唔使一陣，我已經順利突破防線，呢刻只要一鼓作氣再攻埋入去，就可以清楚窺探曉琳嘅神秘三角地帶。

於是乎我深呼吸一口氣…

終於可以揭曉…

係白色！！

仲要係綿布質地！！

白色綿質底底，清純嘅代名詞。

睇真啲仲有啲繃緊…個輪廓…

若隱若現！！

「喂喂，你喺度望緊咩啊？」弊傢伙喇！俾曉琳發現咗我不懷好意。

「曉…曉琳，你頭先走晒光喇，不如坐返好啲先，如果唔係會俾人睇蝕晒。」呢刻我都幾佩服自己嘅無恥同機智，明明頭先𥄫完曉琳走光而家走嚟扮好心提佢。

「怕咩喎？附近又無人，得你睇到咋嘛～」

nani！？

39.

「咁...反正遲早都會俾你睇晒...早啲睇同遲啲睇...有咩分別喎。」曉琳塊面已經紅粉緋緋。

咩咩咩話！？我幾乎以為自己聽錯。

我都差啲唔記得曉琳總係有種唔聲唔聲，嚇你一驚嘅能力。

跟住佢仲要摀低身喺張野餐墊上面，一步一步咁爬過嚟我度，佢件白色低領長袖衫受到地心吸力嘅影響，原先暗藏喺裡面嘅小小乳溝，而家喺我面前一覽無遺。

雖然曉琳平時挨埋嚟嗰陣，我都試過享受觸感上嘅快感，但視覺感受反而係第一次。

而即使眼前呢個女仔已經係我女朋友，但呢一刻我依然保持住喺街上面𥄫女仔嘅興奮心情。

曉琳爬到我面前然後一個轉身，「噗」一聲用背脊挨咗落我心口度，將我當成係梳化咁，我都未嚟得切俾反應，佢已經開始撒嬌。

「你剩係掛住望人，都唔理下人哋整嘅嘢食嘅...」

經過曉琳剛才連番有意無意嘅誘惑之後，進入咗意亂情迷狀態嘅我，雙手不由自主咁從後攬住佢條小蠻腰，曉琳身材keep得好無小肚腩但又未至於骨瘦如柴，所以都幾好攬。

「好香啊，全部都係你整㗎？」我一路摸住曉琳條腰，一路細細聲喺佢耳仔邊講。

「你好衰啊，你講大話嘅，都未打開個蓋，點會咁快聞到香唔香。」

「係咩？唔通係你身上散發出嚟嘅香味？」我哄埋落曉琳條頸度索咗一下。

「喂吔，有變態佬啊，救命啊。」阿曉琳小姐，你嗌救命嘅同時，又越挨越埋，好無說服力喎。

「食嘢囉不如。」而我呢個變態佬就索性將曉琳越攬越實，嗰頭我仲怕曉琳走光俾其他人見到，呢頭我哋兩個已經黐到實一實，水乳交融咁，乜嘢途人目光一律唔理得唔多。

「快啲喇～而家就係等你打開佢哋。」

眼前總共有四盒食物，大小不一，我先打開左上角第一盒，係兩舊細細地嘅墨西哥薄餅卷，不過未咬落口就知道裡面包住嘅餡係雞肉。點解會知？事關塊薄餅捲得唔夠實已經散開咗。

與此同時我睄咗一眼曉琳個表情，佢咬緊嘴唇眼仔碌碌咁注視住我嘅反應。我諗，話晒今次都係曉琳第一次整愛心飯盒，所以佢肯定會好在意我望到佢嘅成果嗰陣嘅表情同反應。

好，咁到第二盒揭曉，係金菇肥牛卷，打開蓋嗰刻陣肥牛香味瞬間撲鼻，色相亦都唔錯，除咗啲金菇切得唔勻旬，搞到某幾條好似營養不良咁，其實整體嚟講算係唔錯。

曉琳個表情雖然有返啲信心，但仲係緊張兮兮。

輪到第三盒，一打開之後，我望住裡面嗰pat嘢，唔...咩嚟㗎呢？我望住眼前呢堆物體，忍唔住笑咗出聲。

「啊啊啊...散咗啊個飯團，唔好望啊嗚嗚...」曉琳即刻伸手將我手上面個蓋搶走，跟手扱返實個食物盒。

哦...原來係飯團嚟嘅...頭先我見到裡面一pat豉油撈飯再加啲紫菜，仲想話向住丼飯個方向去諗，但又見唔到裡面有其他配餸，唔係曉琳講我都估唔到。

我好好奇想知埋最後一盒會係點，打開見到一片片西瓜同哈密瓜，係飯後水果拼盤，最正常不過。

就係咁，四盒食物全部亮相完畢，不過曉琳仲抱住緊盒飯團唔捨得放手，望住我搖搖頭。

「唔得啊，佢哋好醜怪唔俾得你。」

「但係我覺得呢盒反而會係最好味。」

「佢哋本身唔係咁㗎，今朝早我放落盒嗰陣，佢哋仲好地地㗎，唔係咁樣散晒㗎...」曉琳扁扁嘴，始終唔肯放開盒飯團。

今朝早？唔知點解我聽到曉琳呢句嘅時候，我著眼點並唔係呢幾舊飯團本身整成點，而係曉琳今日雖然遲咗九個字先到，但如果佢今朝早唔係一早起身準備，根本就無可能有呢四盒食物，雖然我平時少煮飯，但我好清楚知道，每一道菜所花嘅時間同心血。

「散咗都唔緊要啊，我想食呢個先～」我伸手去搶曉琳個飯團盒。

況且，墨西哥卷嘅雞肉饀料要醃要切又要煎，煎完熱焫焫仲要包；金菇肥牛卷看似簡單，但都講究肥牛同金菇嘅均勻分配，何況捲起晒呢度咁多串，無可能一時三刻可以變到出嚟；數到飯團就更加唔使講，啲飯煮完又要攤凍仲要捏成餅形，以上三樣都係對手工嘅考究；最後我當水果拼盤可以買現成貨，咁包埋以上所有食材嘅買餸時間，統統都要花時間準備。

「唔好喇，真係好醜怪。」曉琳原先仲攬實個飯盒，但見我咁堅持要食，最終都係由我拎走。

老實講啊，食落口味道就真係麻麻，可能平時隔離屋嗰個手勢實在太好，食到我有啲嘴刁。不過點都好，我都覺得我有責任要食晒呢度嘅所有食物。

「係咪好難食啊？你可以照直講㗎...唔使勉強食㗎…」

「曉琳啊...」

「嗯？」

「你為咗準備佢哋，今日係咪好早就起咗身？」

因為我知道重點其實不在於個味道同個賣相。

男主角好男人

唔好咁易相信男人

唔通男主角做戲

其實陳佑男又唔似係會做戲嘅人，我相信佢內心係善良嘅，但呢個世界無人保證到，好人好心就可以做成好事。

就好似沈從文篇邊城咁，成堆好人行埋一齊，都可以成就一件…

都係唔講咁多嚕

多謝各位一直以嚟嘅支持。

40.

「無啊，最衰都係我懶瞓啦，原本較咗七點半鬧鐘，但我拖到八點先落到街買餸，搞到之後趕頭趕命，我化妝又慢晒咗好多時間，結果要你喺地鐘站等咗我咁耐，而家個飯團又散晒，我無樣嘢做得好，對唔住啊...」

曉琳你正一傻瓜嚟㗎...

你付出咗咁多，但就剩係記住自己做得唔好嘅地方，仲不斷喺度自責，自從食物盒打開之後到而家都係皺住眉頭扁晒嘴。相反我瞓到十點先落床兼且兩手空空無所事事，我根本就無資格去恥笑你所花嘅心思。

「傻瓜嚟嘅，唔使講對唔住啊，下次可以叫埋我一齊準備吖嘛，你一個人整咁多嘢食會好辛苦。」

「唔辛苦啊，早幾日你又陪我睇醫生，返到屋企傾電話傾到我瞓著咗，你都無收線陪住我，你對我咁好所以我想搵個機會好好報答返你。唉...都怪我煮嘢食唔叻，我媽咪話過㗎，女人要留住男人個心，就要首先學識點樣留住佢個胃。」

明明嗰晚我因為子瑜而cut咗曉琳線，明明曉琳瞓著咗嗰陣我個腦一味回想返同子瑜嘅片段，反而曉琳仲親自下廚報答返我，調返轉頭我都覺得自己有啲慚愧。

「咁男朋友對女朋友好係天經地義嚟㗎嘛，你唔好咁放上心啦，無論你煮嘢食叻唔叻都好，我都一樣會對你咁好。」我攬住曉琳，安慰住呢個咁努力付出嘅小妹妹。

「嘻嘻。」曉琳終於有返啲笑容。

「做咩事咁開心啊？」我發覺曉琳其實係個好容易唔開心，但係又好容易氹得返嘅女仔。

「唔話你知～咦？原來舊飯團淡茂茂無味嘅，你食咗咁耐都唔同我講嘅...」

「唔係啊，好好食啊，好夠飯香。」我大啖大啖咁狼吞虎嚥。

「喂吔你唔好食得咁急啦，因住哽親啊。」

就算塊墨西哥卷再乾再硬又好，舊飯團變成淡而無味嘅紫菜撈白飯都好，都唔會難到我，我哋兩個食飽飽之後就挨埋一齊，開始談天說地，雖然大部份時間都係曉琳講，我負責聽。

眨下眼就過咗兩個鐘，附近都多咗幾對情侶坐低聚餐，曉琳就提議不如起身散吓步。

跟住我哋就起身執拾好啲餐具同野餐墊，然後我拎住曉琳個背囊，二話不說就孭咗上身。

「我幫你孭啦。」我笑說。

「唔好啦，隻色真係好女仔。」曉琳扯住自己個背囊。

「唔會啊，你諗吓，如果我一個人孭嘅話，就話覺得我孭女仔書包啫，但而家有你喺我隔離，啲人只會覺得我係幫緊女朋友孭書包。」

「好啦好啦，唔夠你講，聽你話啦。」

就係咁，離開呢片草地之後，曉琳帶我穿過一排歐陸風格嘅露天商場，眼前仲有一座樓高大概三四層樓嘅鐘樓，附近有幾間戶外餐廳，四圍人潮亦都比頭先中央公園熱鬧唔少。

正當呢個時候，忽然間曉琳拉住我隻手，一股衝勁向前跑。

「咁急去邊啊？」

「好快你就知㗎喇。」曉琳邊跑邊答。

「唔通又有驚喜？」我心諗。

瞬息之間，幾棵棕櫚樹擦身而過，我哋沿住露天劇場嘅觀眾席樓梯急步而行，嚟到一處海濱長廊。

「到喇到喇，係心鎖長廊啊！」

唔知由幾時開始，曉琳手上面已經多咗個金屬鎖，佢捉住我隻手行埋去堆密密麻麻嘅情人鎖面前左望右望。

「你睇吓，我寫咗我哋個名喺上面㗎啦，我哋搵個空位扣起佢囉好唔好。」我哋個名之間仲有粒心心連住。

意想不到嘅係，原來今日除咗野餐之外，曉琳仲安排咗呢個情侶先會做嘅環節。

「就呢度？」我指住某處空位。

「好啊！嗯，等我摷埋條鎖匙出嚟先。」我仲諗緊曉琳會唔會唔知收埋咗條鎖匙喺邊度，但佢下一秒就拎咗條鎖匙串出嚟，扣住咗兩條細鎖匙。

「咁我哋扣呢度啦，一齊扣啊。」曉琳捉住我手。

咔嚓——

「鎖匙係一人一條㗎，唔可以整唔見㗎，我仲有份禮物要送俾你～」

「仲有禮物收？」我驚訝地問。

「你擰轉身先～」

正當我以為叫我擰轉身，係準備會有啲咩神秘驚喜彈出嚟之際，我聽見曉琳喺我身後打開背囊拉鍊，摷咗一陣之後就閂返好拉鍊，跟住就跳埋嚟我面前。

「登登～送俾你㗎，呢個都係一人一條。」

瞬間我眼前多咗條藍白間交叉編織而成嘅手繩。

「我幫你綁埋吖，你鐘意戴喺左手定右手？」

「唔...右手啦。」我答。

跟住曉琳就將條手繩綁咗喺我右手上面，之後曉琳另外再拎咗條薄荷綠配白色嘅手繩出嚟。

「你幫我綁吖。」

「咁你鐘意右手定左手？」我問。

「我學你，都係右手～」

忽然間，我諗起巴黎曾經有條舉世知名嘅情人橋，見證過唔同情侶在此留下彼此相愛嘅印記，而今日呢條沿住海濱而建嘅心鎖長廊，亦從此留低咗我同曉琳呢對名字，而我哋兩個人手上，都多咗條定情手繩。

「靚唔靚呀？我尋日整咗好耐㗎...整完之後我好想好想即刻同你分享，我忍得好辛苦，頭先好幾次差啲就唔小心爆咗出嚟，終於等到呢刻可以俾你知喇，呼～」

曉琳呢個傻瓜，咁短時間之內準備飯盒、情人鎖同埋DIY手繩，結合埋呢處良辰美景...

我將目光放遠，眼前所見嘅弧形海灣，午後陽光為海面波浪添加咗一層波光粼粼。曉琳挨咗喺我肩頭，望住屬於我哋兩個嘅情人鎖，喺我耳邊又繼續哼歌，加上微風翻起嘅海浪聲配襯，兩者一唱一和，我不自覺咁陶醉咗喺呢片氛圍當中。

我突然間靈光一動，終於認得出曉琳哼咗成日嘅旋律係咩歌，腦筋清醒過後，仲醒起有樣嘢差啲唔記得咗做。

「弊喇！我應承咗Miss Chan要買嘢食慰勞班女仔！」

曉琳真係好可愛

同曉琳sweet sweet嘅野餐篇就快完啦，唔知有無得收返愉景灣嘅廣告費呢