【校園／愛情】戀上鄰家女孩（布甸篇）

84.

離開醫院嘅呢程小巴，我同子瑜兩個依舊揀咗最後嗰排坐，而佢就好似個小妹妹咁挨埋嚟我度，輕輕力咁翹住我隻手。

「陳佑男。」未試過聽過子瑜把聲咁溫柔。

「做咩？」而我都不知不覺間咁配合返子瑜嘅溫柔。

「無啊，純粹想講聲多謝你咋嘛。」

「傻瓜，之後有咩需要幫手嘅話都可以隨時搵我，探病、拎功課同接出院我統統都可以㗎～」

「點解你係要對我咁好…？」

做咩我要對子瑜咁好？可能係我辜負咗佢太多？定係我唔忍心見到子瑜掛住照顧身邊嘅人而忽略咗自己，定係單純因為我鍾意呢個女仔，總之我就好想繼續為子瑜佢做多啲嘢。

但良心話俾我知，其實我對子瑜一啲都唔好，如果係好嘅話，就唔使搞到個局面好似依家咁。

無論點都好，我同子瑜喺醫院探黃子俊嘅經過就去到呢度暫告一段落。

至於你問我，咁條玉桂狗鎖匙扣有無送到出去？邊有咁易吖，雖然唔知道黃子俊喺邊度學埋晒呢啲買小禮物追女仔嘅技倆，不過呢條玉桂狗鎖匙扣究竟應唔應該送出去，同埋點樣送又係另一個問題。

第二朝返學，我差啲唔知醒，因為電話唔喺身，床邊個鬧鐘㩒咗又無反應，好彩我呀媽拍醒我，跟住我就即刻衝入廁所沖涼刷牙洗面梳頭一氣呵成完成，笠埋套校服上身準備出門口。

踏出門口嘅一剎那，望住子瑜屋企度鐵閘，佢應該出咗門口，我諗返起過去兩日所發生過嘅事，就好似發咗一場夢咁，夢醒過後個世界已經變咗，原本個世界已經無得再返轉頭。

我諗我都未試過返學會咁緊張，唔知道今日返到課室見到曉琳可以講啲咩好，對住芯玲我仲可以點解釋，當住全班同學面前我仲有無面目做人…

一個人行吓行吓就返到學校，入課室之後我第一時間望吓曉琳返咗嚟未，但見佢個位空空如也，旁邊開始傳來鄙視嘅目光，有幾個女同學望住我喺度竊竊私語，我都唔敢四圍再望，即刻耷低頭行返埋自己個位坐底。

當我坐低之後，先發現原來芯玲已經坐咗喺度。

「仲以為你唔會再返嚟添。」芯玲眼尾都未睄過我，雖然我知道佢同緊我講嘢。

「對唔住啊…」

「唔使同我講我對唔住啊，你留返同曉琳講啦。」芯玲趁仲未打鐘拎咗份Chem功課出嚟慢慢做，依然無望過我一眼。

唉，我連有啲咩功課做都唔記得晒，係…我知道呢個係學生嘅本份，但呢幾日我仲邊有心情去處理呢啲瑣碎事。

我斜眼望過去短髮妹妹同家樂嗰邊，佢兩個都已經返咗嚟，不過就只係各自各坐完全零交流，家樂一副生無可戀嘅模樣，望到個心都唔好受，至於短髮妹妹雖然無家樂咁低氣壓，但係都唔好得去邊，只不過憂愁嘅表面背後係流露住一點點氣憤。

鏡頭一轉，圓框眼鏡妹妹揹住書包走入課室，佢一返嚟見到短髮妹妹唔開心就即刻上前安慰佢。

「吖，係啊，嗰日曉琳幫你執返你個背囊，你啲電話銀包統統都幫你保管好。」芯玲張份功課揭去第二頁繼續默默咁做。

「咁我一陣問…」我仲諗住呢個就係契機可以同曉琳溝通，點知芯玲打斷咗我。

「不過曉琳將你啲嘢交晒俾我，嗱你個背囊啊，你自己睇吓裡面啲嘢整唔整先喇。」芯玲唔知喺邊度變個背囊出嚟㨃俾我，但依家個重點唔係裡面啲嘢齊唔齊。

「咁點解…曉琳會託你將啲嘢交俾我嘅？」我眼角再望一望曉琳個位，其他同學都已經返得七七八八唯獨是曉琳仲未返到。

「我係你嘅話，我就會睇吓自己部電話先喇，我要講嘅嘢係咁多，你睇唔睇都係你嘅事，唔關我事。」芯玲講完之後就將份功課塞返落櫃桶，雖然我已經有心理準備芯玲對我嘅態度唔會再好似以前咁，但到親身感受嘅時候依然唔太好受，之不過我又可以怪邊個，一切都係我自己攞嚟嘅。

「電話…？」有啲咩睇？

正當我諗住伸隻手摷部電話出嚟望嗰陣，班主任Miss Chan對高踭鞋嘅腳步聲已經猶如死亡喪鐘咁敲響，嚇到我即刻將部電話塞返落背囊裡面。

夠鐘返學啦

唔通係發現男哥睇重口a片

停係依個位

要check手機應該唔使等到呢個時候

又要等樓豬唔知幾多日先有文

就算甩咗p，淫棍巴都仲會入嚟撐場

週末冇文

85.

Miss Chan一入嚟，身為男班長嘅我，已經係本能反應咁彈起身叫起立敬禮。

「得喇，今日唔使敬禮。」Miss Chan揮一揮手示意大家坐返低，下一秒鐘佢目光已經轉向我。

「男班長你出一出嚟。」

我留意到幾乎全班同學嘅目光都放咗喺我身上，除咗芯玲三姊妹同家樂，仲有幾個不問世事嘅同學之外。

「係…嚟緊…」

雖則我都唔係第一次早會嗰陣俾班主任傳召，不過今次唔同嘅係，佢直接叫咗我出去走廊度傾，雖然我都知道因咩事幹，但咁樣一嚟都話咗俾我知，件事嘅嚴重性。

呢刻，全級同學都喺課室裡面聽緊廣播，唯獨是我同Miss Chan就企咗喺走廊度，我垂頭耷耳唔敢直視佢，而佢第一句就揶揄我。

「幾叻仔吖，第一次跑社際接力就拎到冠軍…」不過都係Miss Chan咁講，我先知我哋真係羸咗比賽。

「不過你好似有啲混淆咗條終點線，明明條終點線畫得咁清楚你都仲要繼續跑，點吖，你仲有無啲咩想解釋？」

「Miss Chan你係咪已經都知道晒？」以佢嘅聰明才智同人脈關係我估佢點都收到風。

「人哋A班班主任同返我講啊，黃子瑜起碼都識得問准咗佢先至離開運動場㗎，你有無問過我啊？你有無同任何一位老師講過啊？陸運會擅自離開運動場，知唔知犯咗幾多條校規？你啲兒女私情我都唔想理你咁多，但你想我點同校長解釋先？」

講真嗰句，雖然平時Miss Chan好嚴，但佢絕對唔係啲黑人憎嘅老師，但今次我帶咗咁大個麻煩俾佢，我自己都好過意唔去。

「Miss Chan我知錯喇，我無諗住逃避責任㗎，我甘願接受一切懲罰…」

「呢層你可以放心，罰就罰硬，差在係點罰你，你今日放咗學即刻落嚟教員室搵我，不過唔記得同你講，今日曉琳請咗病假，咁女班長嘅嘢…你都做慣㗎啦。」

「知道…」我無估錯，曉琳今日真係無返學…

「做咩啊？面有難色咁喎，定係我阻住你放學去箍煲啊？」Miss Chan最後個奸笑表情...唉，話晒佢都算係後生又幾靚女，呢啲中學生拍拖嘅嘢佢以前肯定經驗豐富，所以專登笑吓我。

「返入去聽早會廣播啦，咦…另一個女主角過緊嚟搵你喎。」Miss Chan講完就抌低咗我呢個學生，自己行返入課室。

之但係，咩係另一個女主角？我側頭一望，先見到走廊盡頭有個嬌滴滴嘅女仔慢慢行緊過嚟。

原來係子瑜…

子瑜喺早會期間走出嚟做咩？可能係去廁所？唔知道佢今朝返學有無聽到啲難聽嘅說話呢？不過依家呢度實在係此地不宜久留，話晒全班同學可以透過走廊個趟窗望到我，一陣間子瑜走到埋嚟佢哋實會見到，我真係無必要再製造無謂嘅花生。

所以我趁子瑜仲未行到過嚟，先行一步走返入課室，但我依稀見到我臨入課室嘅剎那間，子瑜最後好似停低咗腳步，而我直到返埋位坐低之前，都唔敢擰過去走廊嗰方向去望子瑜有無經過。

坐低之後，我仲有另一樣野等緊個機會去做，但礙於早會完咗接住落嚟嗰兩堂都係Miss Chan嘅中文堂，我連拎部電話出嚟嘅機會都無。

鈴鈴鈴———

終於俾我捱到小息鐘聲響起…

我目送完Miss Chan離開課室之後，即刻拎埋部電話衝出課室，喺走廊搵咗個無咩人嘅角落，準備睇吓電話裡面有啲咩特別，想知道點解今朝我一拎返部電話嗰陣芯玲會叫我睇吓部電話。

我一㩒著個mon，部電話較咗做勿擾模式，但係電量幾乎係滿電，我諗…都係得一個可能性，就係曉琳幫我叉過電嚟，因為芯玲肯定唔會得閒理我部電話有無電。

解鎖之後，我就去搵有咩唔同到，首先wallpaper無變到，依然係我同曉琳喺愉景灣草地上面嘅合照，跟住相簿都無多到相，來電記錄亦都無任何特別，咁唔通係message？

我即刻打開個app，果然見到曉琳嗰個對話框框有段未讀訊息，㩒入去原來只係簡單一句...

『陳佑男...如果你個心依然仲有我嘅話，聽日放咗學之後可唔可以見個面，地點邊度都可以㗎。』

咦？曉琳講嘅係聽日，而呢段文字係尋晚send嘅，咁即係指今日放咗學之後？

週一有文

戲肉了

怪唔得miss話箍煲
但係去咗嘅話，可能又再hurt多子愉一次

曉琳好慘…

不如要哂兩個算啦

大家係咪想睇佑男同曉琳大戰

miss睇穿咗佢未箍煲

如果鄰居關係一開始已經人人都知又冇人覺得有咩古怪 中間冇障礙 男哥應該一世都唔會戀上鄰家女孩 其實唔止男哥 我諗所有男人談戀愛都係咁 只要冇必要又keep到段關係 就唔會諗要一齊

仲有一個原因，就係把口講好鍾意，實在未鍾意到我想再踏前多步

又個俾死人作者拋棄咗差唔多成十集

佢好似想…係咪呢？

好中 所以就算最後揀咗子瑜啲問題都會慢慢浮現
咁樓主你覺得sports day crush on曉琳/同子瑜打鬧日久生情邊一種形態更接近愛情嘅模樣 唔洗代呀男答

我偏心㗎

不過我覺得兩種相愛嘅過程係無高低之分㗎喎，就算最終錯過彼此，都應該為曾經出現過喺你生命之中嘅佢哋而感到驕傲，因為茫茫人海中，相遇相識本來就係一種難得嘅緣份，能夠相戀更顯可貴。

86.

我放低部電話沉思咗一陣，無耐小息鐘聲再度響起，我返到課室之後，決定鼓起勇氣，拎起部電話覆返曉琳。

『曉琳，今晚我要俾Miss Chan留堂，但放咗學之後我嚟你屋企樓下等你可以嗎？』

出乎意料嘅係，下堂教Bio嘅鍾sir都未嚟到課室，曉琳就已經覆咗我可以。

又會覆得咁快嘅…唔通曉琳一直喺度等緊我嘅答覆？諗到呢度，我愧疚感湧現晒出嚟。

平時上堂嗰陣，芯玲都會撩我傾啲無聊八卦嘢，但今日明顯係例外，除咗課堂上有啲咩唔明佢會問我之外，基本上佢都一副懶得理我嘅態度，但往好嗰方面諗，起碼佢無同我絕交…

不過Lunchtime就唔使旨意同佢哋三姊妹一齊食，我到呢刻先發現，原來我喺學校係無咩飯腳，雖則我唔係小毒毒，亦唔係無朋友，但過往剩係同子瑜、曉琳、家樂或者芯玲三姊妹食，好少可群埋落啲男仔堆度，結果今日我就要面臨自己一個食嘅局面…

而我開始有個預感，往後嘅日子可能都會係咁，不過都無辦法嘅，食飯鐘聲打響，我留意到總有啲同學其實都係默默咁自己一個人行出課室，無論係男定女都好，話唔定終有一日我都要學識同自己相處。

課室裡面大部分同學都嘻嘻哈哈咁出晒去食飯，連最後一個平時唔多出聲嘅男仔都起身離開，而我就仲孤伶伶咁坐咗喺位度諗。

唔知子瑜依家點呢？忽然間我想過去子瑜班房望吓佢仲喺唔喺度，結果我一出課室門口，就喺走廊迎面撞到個傻妹。

我哋兩個即刻相視而笑，好似都已經知道對方諗緊咩。

「跟我嚟吖。」子瑜輕聲溫柔說。

子瑜想帶我去邊，其實我都毫無頭緒亦都無所謂，但係我可以估得到佢嘅原因同目的係咩。

轉咗幾個街口，嚟到一間舊式茶餐廳，舊到地板仲係鋪緊幾何三色地磚，餐巾仲係用油紙而唔係紙巾嗰種，冷氣欠奉但天花板吊住把大風扇已經夠晒涼爽。

我同子瑜入到去就揀咗個卡位對住坐，即刻有伙記埋嚟擺低兩杯水。

「呀妹，今日咁好嘅，有個男仔嚟陪你。」

「帶多啲生意俾你吖嘛。」子瑜笑咪咪咁回應。

跟住子瑜哄埋嚟同我解釋，原來頭先個伙記就係呢度嘅老闆。

「我呢排都係自己一個人嚟呢度食，貪呢度靜靜地無咩人，又唔會撞到啲同學。」

子瑜表面上好似講得好輕鬆，但我就聽到有啲心酸，呢個時候，我偷偷地摸一摸褲袋，確認條玉桂狗鎖匙扣仲喺度。

「子瑜…呢段時間辛苦你喇…」

「傻啦，唔好講咁多嘢住先啦，嗱餐牌啊，你快啲揀嘢食先，我好肚餓喇。」子瑜不斷用佢對腳仔踢我，催我快啲揀。

「我揀好喇。」

跟住我舉一舉手叫老闆落單，子瑜用眼神示意要我嗌先。

「沙嗲牛肉麵，凍奶茶。」咁我係照舊㗎啫。

「兩份吖～」子瑜幫我放返好塊餐牌。

我哋兩個又再一次相視而笑，落好單之後，我問子瑜。

「點解你咁鍾意踢我㗎？」

「因為你唔會反抗囉。」子瑜諗都無諗就答我。

「咁等我試吓還擊踢返你先。」我縮起隻腳向後拉弓，作勢準備要踢返子瑜一下。

「你夠膽就試吓啦～」子瑜漲起兩邊腮望住我。

老實講，我真係唔敢，亦都唔捨得咁做，子瑜對腳仔咁弱質纖纖，我怕輕輕力踢都會整痛佢。

話咁快兩碗沙嗲牛肉麵就送到面前，我拎起支鐵叉，浸過水抹乾淨之後再遞俾子瑜。

「今日放咗學一唔一齊探黃子俊？」

「但我今日俾Miss Chan留堂啊，唔知道要搞到幾晏。」我刻意隱瞞放學我仲約咗曉琳。

「嗯嗯，咁我同佢講你俾人罰留堂唔得閒啦～」

天花板把大風扇依然默默咁轉動，偶爾會因為機件殘舊嘅關係而發出一兩聲怪響，除此之外呢度環境真係好寧靜。

靜到感覺上，就好似我同子瑜兩小無猜喺度偷情咁，我心情都因為子瑜而好返唔少，但到最後，我都係無同子瑜提起我今晚會同曉琳見面嘅呢回事。

放學鐘聲終於響起，我執埋啲嘢，就乖乖地落去教員室靜心等待Miss Chan處置。

結果罰企，寫悔改書，加埋記小過俾訓導主任訓話，唔使見家長都算我執到，不過嚟緊半年嘅學校活動，全部都要強制被逼做helper幫手，呢招唔知係咪用嚟以防我再次中途逃走…

搞掂好晒所有嘢行出教員室，望一望個鐘都差唔多六點幾，終於可以放學…我諗呢個鐘數，學校四周圍都已經空無一人，但係我怕曉琳已經等咗好耐，所以我嗱嗱臨揹返起個背囊就出發去搵曉琳。

走咗一段路之後，終於嚟到呢段同曉琳一齊行過唔知幾多次嘅斜路，行埋上去就到曉琳屋苑。呢一刻，越近曉琳屋企，我心情就越緊張。