【校園／愛情】戀上鄰家女孩（布甸篇）

Sorry大家寫得比較慢但絕對唔會失蹤

感謝你一直支持

最快今晚有文

66.

我知道曉琳好在意自己個髮型，所以錫完佢額頭之後我即刻幫佢撥返好啲瀏海，曉琳見到我呢個咁細心嘅事後服務，對我嫣然一笑。

「做咩你今日著校服出嚟嘅？」我仲留意到，曉琳今日畫埋眼影同搽咗層晶瑩透亮嘅唇膏。

「因為我要呃我媽咪話要返學校溫書～」呢刻曉琳嘅笑容，係頑皮㗎。

「你幾時變到咁曳曳㗎？居然學識咗呃媽媽。」

「俾你帶壞咗囉，最衰都係你～」曉琳跟住挨埋落嚟我手臂度，基本上我成個手肘就壓住咗佢半邊波波，感覺好柔軟、好軟熟。

「芯玲仲叫我今日要小心啲。」曉琳對住我微微露出奸笑。

「小心啲咩？」

「唔話你知～」而曉琳嘅笑容，又變返天真爛漫。

話就話曉琳想上我屋企玩，但係男女共處一室，仲要係男仔屋企，情到濃時起上嚟，會發生啲咩事真係好難控制㗎喎。

沿路行返我屋企嘅途中，我留意到曉琳今日著嘅嗰條校裙同平時唔同，明顯地係短咗一截，露咗佢對白𠽌𠽌嘅大脾出嚟，再加上佢個淡妝，看似就係普通返學裝扮，實際應該係落咗唔少心思打扮。

我拖住呢個曳曳豬女朋友，行吓行吓就返嚟到我屋邨範圍，你問我有無擔心喺呢個時候會撞到子瑜，我答無你都唔會信啦，但係我諗，假如喺樓下附近撞到嘅話，都無嘢嘅，曉琳又唔係唔知道我同子瑜住埋同一座屋邨，真正隱瞞住佢嘅，係我同子瑜係住對面，相隔兩步路距離嘅鄰居。

再諗深一層，最壞情況有兩個，第一係不幸地我哋入到𨋢之後撞到子瑜，第二就係出到𨋢之後同子瑜喺一條走廊窄路相逢，兩種情況我都無乜可能作到大話去解釋，而後者更加等於即時揭穿咗我同子瑜係鄰居嘅呢個秘密。

慶幸嘅係，呢兩種情況並無發生，我成功帶住曉琳達陣返到屋企，但意料不及嘅係，入到屋之後我連鞋都未趕得切除，曉琳已經飛撲咗埋嚟。

咩話？你話最期待嘅畫面終於出現？咁可能要令你失望啦，我哋無做啲咩越軌嘅行為，而曉琳亦絕對係一個矜持嘅女仔嚟㗎，佢撲埋嚟只係為咗想錫我一啖，咁你問我有無失望？其實有咩好失望吖，只要曉琳開心我就心滿意足。

之不過，任何一對熱戀中嘅情侶獨處一室，都難免會有親密嘅身體接觸嘅，我簡簡單單煮咗兩碗腐皮烏冬餵飽咗我同曉琳之後，就同佢兩個攤咗喺我張床度，佢挨喺我心口前面，我從後環抱攬住佢條腰仔，開著部手提電腦一齊搵啲電影打發時間咁囉。

咁我都認我係好百厭㗎，有時候手多多會隔住曉琳條校裙，對住佢個肚仔毛手毛腳，但要我再摸上啲，或者再摸落啲，我就未有呢個膽量。

就係咁，歡樂嘅時光過得特別快樂，我哋睇完一套又開另一套戲接住睇，但啲戲講咩我其實都無點樣細心品賞，同曉琳攤喺同一張床上面嘅親密接觸，再加上佢對白皙長腿同埋小白襪嘅視覺效果加持之下，我嘅性荷爾蒙指數一直處於上升狀態。

「喂吔，做咩係咁摸住我個肚喎？」曉琳撒嬌問。

「因為你個肚仔好好摸囉。」

「你...剩係掛住摸住我個肚仔，唔會...覺得悶咩？」

我幾乎以為自己聽錯，但原來女仔百厭起上嚟可以遠勝於男仔十倍，呢個時候曉琳拎開咗部電腦，慢慢將個身擰轉過嚟向住我，試探性咁一步一步喺我身上越爬越埋，雖然曉琳眼神仲有啲怕羞閃縮，但又見佢每一下動作都好認真努力，更加顯得曉琳嘅青澀同可愛。

終於，我哋兩個塊嘴唇逐漸互相結合，我伸出雙手攬住曉琳條腰，而曉琳就箍住我後頸，我可以感覺到曉琳條脷嘗試圍住我條脷打圈，起初個節奏同個方向有啲凌亂，但係好快我哋兩個就摸索到個竅門。

就好似，一對男女鋼琴家表演四手聯彈，當個男仔突然間加快拍子嘅時候，個女仔可以隨即跟上速度，而當個女仔放慢節奏嘅同時，個男仔亦都可以好自然咁調整韻律，彈指之間，蘊藏住兩人嘅默契。

更甚嘅係情迷意亂之下，其實你係唔會察覺到時間嘅流動，但當我回過神時，發現床邊窗外已經滲透住黃昏日落嘅光線，映射緊呢間細小房間入面嘅一對小愛侶，你就唔好問我依家我對手放喺邊啦，我怕講咗出嚟曉琳就會臉紅，雖然我唔知道呢個係霞光嘅效果，定係曉琳怕羞嘅生理反應。

正當我以為我哋再咁攬攬錫錫落去，就會自自然然發生嗰樣嘢嘅時候，曉琳突然趷返起身，抱住膝頭，坐咗喺度一本正經咁對住我講。

「唔得～」

「唔得咩嘢？」我似懂非懂咁問曉琳，乘機將佢其中一隻小白襪剝咗落嚟。

「唔得唔得～芯玲話過唔可以咁容易俾你得到㗎。」曉琳咬住嘴唇，塊面早已經紅卜卜。

芯玲呢個衰妹吖，居然喺背後從中作梗，究竟曉琳同芯玲私底下傾咗幾多嘢，真係得佢兩個先至知道。

「咁要點樣先可以？」我連曉琳另一隻小白襪都除走埋，再將佢推返落床。

「唔...我諗到，除非你喺陸運會接力比賽拎到冠軍，咁先俾你啦～」曉琳思考咗一陣，隨即將個答案娓娓道來。

「俾啲咩我～？」

我根本就係明知故問，企圖誘導曉琳直接講嗰樣嘢出嚟，同時間再輕輕錫咗佢嘴唇一啖，佢都無反抗由得我繼續放肆。

不過，命運眷顧你嘅時候，會企喺你嗰邊幫你達成你嘅心願，曾經我嘅心願係成功追到曉琳，但係命運亦都會有捉弄你嘅時候，當呢一刻降臨之時，一切嘅反應已經來得太遲。

就喺呢剎那間，我大門鐘聲忽然響起，敲起命運嘅迴響。

要各位久候真係唔好意思，今集長度加碼

喺呢度停

言而有信抵讚

唔通係細佬搞事

邊個㩒門鐘咁百厭，最衰都係佢

然後又要等啦

咁要開門睇睇咩事先知道

應該係布甸撳門鐘，話今晚煮多咗餸，問佢過唔過去一齊食飯？

追落去就知㗎啦

67.

「點解我好似聽到有人㩒門鐘嘅？」曉琳披頭散髮，一路喘住氣一路同我講，原本紥住馬尾條橡筋早已經唔知飛咗去邊。

「可能只係有人白撞，我哋唔好理佢啦。」我哄埋去啜咗曉琳一啖。

「但係佢仲一直㩒緊喎，好唔好去睇一睇先。」曉琳慢慢爬返起身，將條校裙拉返好，遮返住露咗出嚟嘅屁股仔。

「咁曉琳你留喺房唔好出嚟住，我去睇吓。」

其實我事前都有同曉琳打定底，屋邨地方龍蛇混雜，有收數佬同白卡佬出沒一啲都唔出奇，之但係，我又點會認唔出呢個㩒門鐘嘅節奏，喺我認識嘅人入面，會咁樣㩒鐘嘅就只係得一個。

「黃子俊！你做咩走過嚟㩒我個門鐘？」一打開門我就細細聲喝住佢，同時間我唔敢將度門開得太大，費事陣間俾曉琳見到。

「哼！我唔係想過嚟搵你㗎，係因為我真係唔夠高，所以先要搵你過嚟幫手咋。」黃子俊依然一副不屑嘅眼神斜視住我。

「但係我依家唔得閒啊。」

「好快咋嘛，你過嚟幫我喺廚房度拎個煲落嚟吖。」

「你自己擔張凳拎啦。」

「試過啦，拎唔到，黃子瑜將個煲收到好入。」一聽到黃子俊提起佢家姐個名，我就知道再拖落去，處境只會越嚟越危險。

其實我唔係唔想幫呢個細路，但我依家真係無時間同佢喺度周旋，仲要只係啲喺廚房拎個煲嘅濕碎事，萬一轉頭曉琳喺房出嚟見到黃子俊嘅話，就可能會更加麻煩。

「你叫你家姐幫你攞啦。」我提都唔敢提起黃子瑜三隻字，因為我感覺到曉琳好似喺房行緊出嚟，再係咁僵持落去肯定會出事，我隻手已經蠢蠢欲動想閂埋度木門去。

「黃子瑜佢病咗成日，瞓喺張床度起唔到身，我只係想煮嘢俾佢食咋，你唔幫我咪算囉！」

「...」

黃子俊激動到兩行眼淚標埋出嚟，與此同時曉琳已經走咗出房門口，頭先黃子俊咁大聲講嘢，曉琳好可能已經聽到門口發生咩事，甚至聽到黃子瑜三隻字，一個今日絕對唔可以出現喺我屋企嘅女仔名。

呢一刻我夾喺中間，除咗不知所措之外，我已經諗唔到仲有咩形容詞可以形容我依家個狀況。

「點解會有個小朋友喺度嘅？」曉琳喺我旁邊翹住我隻手，挨喺我膊頭度傻更更咁望住鐵閘前面嘅呢個細路。

同一時間，黃子俊望返曉琳轉頭。

「哦！我知道喇，你就係嗰個曉琳bb，咁大個人仲要叫做bb，都唔知你知唔知醜嘅！」

講真嗰句，平時任由黃子俊點樣詭計多端搵我笨都好，我都唔會嬲，但係佢咁樣一見到曉琳就無理取鬧，我就即刻火冒三丈。

「喂！講夠未？」我怒氣沖沖。

「我有講錯咩？」

點知黃子俊仲要理直氣壯咁駁返我，相反曉琳俾佢鬧完之後一臉茫然，但我已經唔知道可以點樣收科，去到呢個地步根本就唔容許我停低落嚟再慢慢思考。

而且禍不單行，今日最唔可以出現嘅人物，最終都係被命運嘅漩渦捲進呢個舞台。

「黃子俊，你又走過去隔離屋做咩啊？」

而當我聽到呢把熟悉嘅女孩子聲音之後，我就知道，我同黃子瑜嘅秘密，自此以後就再唔係我哋兩個之間嘅秘密，因為從此亦會多咗另一個人知道。

「子瑜...？」曉琳露出驚訝嘅目光。

「曉琳...？」企喺鐵閘另一邊嘅子瑜，聲線微弱，面色蒼白，額頭仲痴住塊退熱貼。

呢一刻，曉琳隔住鐵閘門清清楚楚見到子瑜嘅身影，子瑜只係著住件睡衣赤住腳咁企喺門口位置，一眼就可以睇得出曾經嘅好姊妹，原來就係住喺佢男朋友對面，而且仲有個十歲大嘅細佬，俾我同子瑜兩個隱瞞咗三年，今日終於親眼一次過揭曉。

「跟我返嚟啊，你無端端做咩走去打擾人哋？」即使子瑜腳步虛浮，但依然赤住腳板行出走廊，嘗試將佢細佬捉返入屋企。

「我唔要吖，我要陳佑男過嚟幫我，佢依家寧願同另一個女仔玩，都唔肯過嚟睇吓你！！」但黃子俊就開始發爛渣捉住我道鐵閘唔肯走。

啪———！！！

子瑜一巴車咗落佢細佬度，黃子俊塊面當堂紅咗，可見力道之大。

「你癲夠未啊？」

我從來都未見過子瑜會對佢細佬咁惡，子瑜甚至激動到連額頭塊退熱貼都甩咗落地，胸口不停起伏氣喘喘咁睥住佢細佬，而佢細佬俾佢家姐打完一巴之後已經喊到收唔到聲，跟住俾佢家姐夾硬拖返入屋。

臨別之時，子瑜再一次望返過嚟我同曉琳呢邊，然後耷低頭留低咗句：

「對唔住啊...」

最後木門又重新鎖上。

剩低子瑜塊退熱貼留咗喺地板上面。

走廊再一次回復平靜。

但一切都唔會再有機會回復平靜。

兩個必有一個受傷

兩個女仔同時間鍾意咗呢個衰仔，都幾難幫到佢哋喇

個男仔太猶豫就累事，處理得好啲咪左擁右抱

男哥過去煲粥啦
嗌埋曉琳咪唔洗驚

左擁右抱會唔會變成渣男故

會
講真，我覺得愛係一定包獨佔慾

呢條橋諗得過，但唔知佢敢唔敢帶埋曉琳bb去敲門鐘呢

如果真係愛既又點會揀唔到，咁最好兩個都唔好揀

要睇佢生唔生性