【校園／愛情】戀上鄰家女孩（布甸篇）

大撚鑊，睇嚟子愉始終搞唔掂了

曉琳向來比子瑜主動都係事實

想知道係呢個情況之下，究竟最後男主角會唔會忍得住？

所以要靠男哥打救

既然上個宇宙係忍唔住，今個應該係忍到？

佢咁優柔寡斷，好難講

91. 命中注定的犧牲？（重製版）

「Miss Chan～」背後傳來一聲悠揚悅耳嘅聲音，再伴隨住一陣熟悉嘅少女體香，曉琳已經嚟到我旁邊，雙手翹背直接同我肩並肩咁企。

睇見Miss Chan個奸笑眼神，差在佢手上面捧住嘅係一大疊簿而唔係一大筒花生，霎時間我都整理唔到發生緊咩事，理解唔到點解曉琳要做我partner。

「曉琳你嚟到就啱，我仲未印好一陣上堂啲notes，你將嗰日Christmas party要注意嘅嘢講俾佢知啦，我唔理咁多喇，我將呢條友仔交俾你喇。」

「知道～」

跟住Miss Chan就咁揚長而去，賴低咗我同曉琳兩個，乜依家老師咁忙㗎咩，由得自己啲學生自由發揮，唔怕會搞出意外咩？

「做咩見到我咁驚喎？」曉琳你會唔會哄得太埋...

「無啊，我只係有啲意外啫。」我嘗試維持住一個平靜嘅心態。

「吓唔得咩？當我聽到Miss Chan話搵咗你搞Christmas party嗰陣，我就問：『Miss Chan我可唔可以同陳佑男一齊做？』，跟住Miss Chan反問返我：『乜你兩個唔係分咗手，唔會怕尷尬咩？』我就答：『唔會啊，況且佢一個人肯定搞唔掂。』，然後Miss Chan就話：『咁你幫我睇住條友仔啦，我唔理咁多喇。』」

又唔理咁多…呢個班主任真係吖。

「Christmas party啫，年年都係嗰幾味嘢，唔係大食會就係玩吓遊戲最多搞埋抽獎環節，只要大家有得又食又拎就最開心，所以應該我一個人都搞得掂？」

其實我都知多個人幫手就點都好過自己一腳踢，仲要係曉琳呢種靚女主動嚟幫我，理應開心都嚟唔切，我都唔知點解我會對住曉琳講埋啲咁嘅嘢，究竟係源自於我對曉琳嘅主動開始多咗一份抗拒，定係其他原因，呢一刻我都唔清楚。

「好囉…」結果我真係搞到曉琳頭耷耷咁行開咗。

見到咁嘅情景我又有啲唔忍心。

「等等，曉琳啊，不如…」我都未講完，佢已經擰返轉頭望住我。

「不如我哋約個時間一齊傾下Christmas party搞啲咩好唔好？」

個傻妹兩隻眼已經開始發緊光。

「好啊，我今日放學得閒啊，放咗學你上嚟藍社社房搵我吖～」我都未應承，曉琳就笑逐顏開咁同我揮揮手講拜拜，然後急急腳跑走咗。

食晏鐘聲響起之後兩堂又過去，放學鐘聲都未響完曉琳就執埋書包衝咗出課室，連短髮妹妹同金絲眼鏡妹妹邀請佢放咗學去睇戲都藉辭推搪咗。

結果，我都係出現咗喺社房裡面，一如所料總之呢間房雜物堆積如山，座山裡面我諗仲應該包含咗好幾屆嘅遺物，而最顯眼嘅就係嗰支陸運會我都有份幫手插嘅社旗。

至於呢度其實一張用嚟開會嘅枱都無，充其量只係用兩張學生枱合埋一齊再加多幾張凳，就可以夠幾個人開會用，咁我同曉琳兩個人，求其擔一張枱出嚟都夠用。

問題係，做乜曉琳要約我上嚟藍社社房，你哋社幹事唔係逢禮拜五放咗學都要喺度開例會㗎咩？

「無啦～自從陸運會之後我哋都無咩社際活動要搞，結果間社房都就嚟丟空成個月。」曉琳用紙巾掃一掃枱上面啲塵，望住堆塵似乎佢又真係無講大話。

「咁唔怕佢哋會無啦啦入嚟咩？」

「唔怕啊，佢哋成班中五生都開始考試，日日約埋一齊去自修室，起碼都要等到考完試放埋聖誕假先至記得呢個地方，所以就好啱俾我哋兩個喺度用喇， 嘻嘻～」

總係有種感覺，曉琳就好似早有準備咁，而話就話我先至係俾Miss Chan欽點嘅活動搞手，但當佢曉琳一坐低埋位，就將啲idea源源不絕咁拋出嚟。

我除咗點頭同點頭之外，幾乎可以話係毫無貢獻。

「嗱，我諗過㗎啦，我哋班有三十幾人，一定要分返四組玩遊戲鬥高分先會刺激，所以呢嗰日就…喂吔你有無聽我講嘢㗎？」

有嘅...點會無呢，之不過霎時間我都記唔到咁多細節，為咗玩遊戲又要買呢樣又要買嗰樣，連到會都計好埋份量，仲要推斷埋班上面啲同學鐘意食啲咩，莫講話聖誕佈置都已經係計劃之內，原來看似簡單但搞起上嚟都幾多嘢要注意，我真係不得不佩服曉琳，果然係做過社幹事，所有嘢都plan得頭頭是道，變相我只係一個游手好閒嘅free rider。

「喂喂，你覺唔覺得我哋好似返番去壁報板設計比賽嗰陣咁？」曉琳用枝筆篤我手臂，我有種好似魂遊太虛完重回凡間嘅感覺。

「吓！？」直頭唔記得咗曉琳頭先問乜。

「唔似咩？你記唔記得嗰陣呢，我走埋嚟你隔籬擒上張凳上面度尺，但係你都唔理人哋嘅，直頭好似當睇人哋唔到咁，剩係顧住執書包。」曉琳一輪嘴咁講，個頭仲要越哄越埋，最後就快連個身都挨埋嚟。

我諗返轉頭，嗰日我好似剩係掛住𥄫佢對白襪仔，都無為意到個女仔就係佢。

「人哋嗰陣係專登走過你搵你㗎，你都留意唔到人。」呢個時候我望到曉琳仲戴住我哋條情侶手繩，而我嗰條就…喺分手嗰晚已經除低咗。

「…」我都唔知點回應曉琳好。

「你做咩縮開喎？」曉琳成個身放軟晒咁挨埋落嚟，我隔住件冷衫都feel到佢嗰對軟綿綿嘅彈彈波。

「欸…曉琳…我哋頭先唔係話，要諗吓呢個game如果遇上同分嘅話要點解決咩…？」

「又唔急嘅，反正依家子瑜喺出面望緊我哋，不如我哋就…」

吓？咩子瑜？我仲未同子瑜道歉，而且又佢點會無啦啦上嚟學校頂樓呢層嘅…？

正當我望出走廊窗口之際，果然真係見到黃子瑜企咗喺窗邊望住我同曉琳。同一時間，曉琳就用手托住我臉頰哄埋嚟嘴對嘴咁錫咗我一啖。

曉琳會唔會太撚黐線

曉琳主動啫 點解會變成咁

今次擺明係專登挑釁子瑜

子瑜

曉琳咁癲咩
噉樣鑑粗

子瑜唔會發嬲嘅

大家似乎都估唔到呢個女會咁做

推

推

Pish

推推推 幾時有文

樓豬去咗邊

今個星期要考試，未必出到

92. 不許你註定一人（重製版）

啜———

成條口水絲喺曉琳嘴裡面拉咗出嚟，吊喺半空之中，曉琳就擰轉頭望向窗外面，雙手搭住我膊頭，用一副勝利姿態嘅眼神同子瑜對望。

但子瑜就完全俾曉琳嘅氣勢比下去，咬住嘴唇頭耷耷咁默默地離開我哋視線範圍。

而我衝出去想追返子瑜嗰陣，就已經俾曉琳捉住我隻手，截停咗我。

「我唔准你又再抌低我啊…」

唉，死喇，唔知道子瑜係由幾時開始發現我同曉琳兩個單獨喺社房相處，唔知道子瑜會唔會誤會咗我同曉琳之間嘅關係，今次真係水洗都唔清。

「喂吔，你有無聽我講嘢㗎？」曉琳扯住我隻手。

「曉琳，點解你要咁樣做？點解你要當住子瑜面前錫埋嚟？」我feel到自己嘅語氣都有啲冷冰冰。

「咩啊，我錫自己鍾意嘅人有咩問題喎？你做咩對我咁惡…」曉琳捉住我隻手，好似小朋友向大人扭計咁搖嚟搖去。

「曉琳，你放手先…」

「唔放啊，無論如何我今次點都唔想再放手。」曉琳雙手並用從後抱住我，俾佢咁樣攬住除非我夾硬嚟，唔係我都走唔甩。

「但係…子瑜佢依家可能匿咗喺某個角落喊緊，佢需要我。」

「咁我呢？」

呢個時候，曉琳兩隻手箍得更加實，同曉琳親密嘅身體接觸之下，搞到我都開始有啲動搖，有啲心軟…

「我晚晚匿埋喺房喊，無時無刻都喺度諗緊你，我又會好驚你已經忘記咗我，同黃子瑜喺埋咗一齊…」

「我同子瑜無一齊…」

「咁，咁你做咩咁快就唔再戴我織俾你嘅嗰條手繩喎。」

「咁係因為我哋都已經分咗手…」

我講完之後，曉琳都靜咗，我就開始嘗試去解開曉琳箍住我嘅嗰對手。

「陳佑男...你係咪唔再鍾意我喇…？」

我無直接回答曉琳嘅呢條問題，我只係運用我最大嘅溫柔，慢慢去解開曉琳呢對手，當我離開社房之後，我send咗個訊息俾芯玲，我希望今日星期五，佢唔會咁快返屋企住，因為呢個時間，可以信任而又肯幫我嘅朋友，可能只係得佢一個…

「喂你條友搞咩啊？阻住我同男仔行街街。」電話另一邊嘅芯玲火力全開，炮轟緊我。

「我都唔想麻煩你㗎，但係我始終都係好擔心曉琳，而我剩係諗到你可以幫到我…」我一邊解釋，一邊快步喺走廊探頭入去課室逐間逐間掃視。

「得喇得喇，我依家趕緊返嚟喇，你搵到子瑜未啊？」

「未啊，我已經搵勻晒成層form 4都唔見佢。」

「操場呢？天台花園呢？你快啲啦，子瑜有咩事嘅話我一定唔會放過你！！」

「知道喇，咁…曉琳就拜託你喇…芯玲我差你呢個人情我一定會還。」

「唔需要喇，我唔係好想同你有咩瓜葛…」跟住芯玲就收咗我線。

除咗女廁之外，成間學校都幾乎俾我搵勻晒，我一路搵就一路打俾黃子瑜，但個衰妹就不停咁cut我線，即係佢擺明有睇電話，只係鬥氣唔肯聽我電話。

隔咗一陣之後，另一邊廂嘅芯玲send咗個訊息俾我，話我知佢已經搵到曉琳，帶咗佢出去買嘢食順便開解吓佢。

咁就好，其實到頭來，呢段關係裡面，曉琳同樣都係受害者，同樣都係渴望有人惜，有人安慰，但我唔可以再同佢糾纏落去，再糾纏落去只會令到曉琳無辦法忘記到我…

忽然間，我腦海又閃過一句說話…

「你知道女仔咁樣跑咗去，其實係想個男仔去追返佢㗎可？」

無錯，子瑜你曾經咁講同我過，係咪證明你呢刻其實都好想我去追返你，但係我之前辜負過你咁多次，你又點會俾我咁容易就追到你返嚟。

剎那間，我好似醍醐灌頂咁，個腦突然間開竅，跟住就直衝過去校務處，腎上腺素開始急劇上升，唔知道我今次咁樣做，個後果會係點呢？

記缺點？小過應該係最低消費，見家長？我諗都走唔甩，Miss Chan應該會剷到我飛起，上次陸運會我眾目睽睽之下跑走咗已經成為咗訓導主任嘅眼中釘，希望今次唔會俾人踢出校無書讀，不過呢刻我最怕嘅係，一陣間入到校務處俾個文書阿姨截住我，佢出咗名寸貢貢黑人憎。

當我衝到落地下嗰層嘅時候，竟然就見到個文書阿姨捧住一大疊文件夾行咗出嚟，我趁佢唔為意之下就祟咗入校務處裡面，再伸個頭䚎一䚎入面間校長室。

正！校長都唔喺度，成個校務處居然空無一人，簡直係天助我也。

我走埋去廣播器面前，撻着部機，扭盡個volume，然後拎起支咪，清一清喉嚨，費事一陣走音就樣衰，跟住就對住支咪大聲講。

「黃子瑜同學！請盡快到校務處！陳佑男同學有事想搵你！」

樓豬世一！考試都出文

男哥好型！

無啦啦有靈感，寫咗先算