深夜甜品
2023-10-05 17:50:08
93. 微風帶著你重臨
「Miss Chan~」背後傳來一聲悠揚悅耳嘅聲音,再伴隨住一陣熟悉嘅少女體香,曉琳已經嚟到我旁邊,雙手翹背直接同我肩並肩咁企。
睇見Miss Chan個奸笑眼神,就好似佢兩個女人夾埋氹咗我入局咁,霎時間我整理唔到發生緊咩事,理解唔到點解曉琳要自動請纓做我partner。
「曉琳你嚟到就啱,我仲有好多文未改,你將嗰日聖誕聯歡會要注意嘅嘢講俾佢知啦,我唔理咁多喇。」
跟住Miss Chan就咁揚長而去,賴低咗我同曉琳兩個,乜依家老師咁忙㗎咩,由得自己啲學生自由發揮,唔怕會搞出意外咩?
「Hello…原來Miss Chan所講嘅幫手係你...」呢段日子我對住曉琳,連曉琳兩個字都嗌唔出口,呢個暱稱我好似已經無權再用咁。
「點解唔可以係我喎,唔係我仲有邊個會幫你~」
「聖誕聯歡會啫,年年都係嗰幾味嘢,唔係大食會就係玩吓遊戲最多搞埋抽獎環節,只要大家有得又食又拎就最開心,所以應該一個人都搞得掂?」
唉,其實我都知多個人幫手就點都好過自己一腳踢,仲要係曉琳呢種靚女主動嚟幫我,理應開心都嚟唔切,我都唔知點解我會對住曉琳講埋啲咁嘅嘢,係因為我太緊張?定係我有啲不知所措?但依家先嚟後悔講錯嘢已經太遲。
「做咩喎你?點解要咁諗啊,仲有啊,正正就係又要搞大食會又要搞大抽獎,你一個人邊準備到咁多嘢喎?」點知曉琳依然都係咁溫柔體貼。
明明當日係我一手傷害你,我都唔知道點解你仲會咁好返轉頭過嚟陪我搞聖誕聯歡會,但當然我就無問出口啦,就係咁我俾曉琳捉咗返課室傾活動流程,話就話我先至係俾Miss Chan欽點嘅committee,但曉琳就好似已經早有準備咁,一返到課室坐低喺位,就將啲idea源源不絕咁拋出嚟。
我除咗點頭同點頭之外,幾乎可以話係毫無貢獻。
「嗱,我諗過㗎啦,我哋班有三十幾人,一定要分返四組玩遊戲鬥高分先會刺激,所以呢嗰日就…喂吔你有無聽我講嘢㗎?」
聽住曉琳講吓又講吓,忽然間我有種感覺,好似返番去當日壁報板設計比賽嘅時候,呢一日課室又係唔知點解無晒其他同學喺度,不過我又覺得有時有啲嘢只要經歷過一次就會唔同咗感覺,就好似第一次去某一個地方旅行會覺得嗰度好靚,有種初戀嘅感覺,但第二次去同一個地方嘅時候,個感受已經無可能再係一樣。
後來我諗通咗,或者呢種差別,就係源自於自己心境變得淡薄咗?
只係我望住曉琳手上面條手繩,諗唔明點解佢仲有一直戴住,更加唔明白點解佢要主動同Miss Chan講過嚟幫我搞聖誕聯歡會。
結果呢個星期,曉琳會刻意等到課室無晒人嘅時候,然後同我一齊留低喺度plan聖誕聯歡會,有時候課室有人嘅話,佢就會帶我上去位於學校頂層嘅藍社社房。依家朝早上堂嗰陣,我會專登留意芯玲對我嘅態度有無改變到,但佢依舊對我都係不理不睬,由此我判斷芯玲應該唔知道我同曉琳偷偷地相會。
呢日星期五,原本我以為曉琳要開藍社例會,應該唔得閒理我,但係落堂無耐我就收到曉琳message,約我一陣間五點半鐘喺社房等。
個message一彈出嚟我就即刻冚返轉部電話,我都唔知自己驚啲咩,但就係唔想俾芯玲知道,然後我偷偷地望過去曉琳個方向,見佢已經執好書包行緊過去短髮妹妹嗰邊,圓框眼鏡妹妹就一邊衝緊過嚟一邊催芯玲快啲執書包,我就知道佢哋四姊妹應該又唔知放學約好咗去邊度玩。
無嘅,其實都係日常會發生嘅事,我都習慣了,我一個人留喺課室,靜靜咁等待五點半鐘來臨,求其拎咗功課出嚟就喺自己位慢慢一題一題咁做,同曉琳約定嘅時間就一分一秒咁接近。
到差唔多夠鐘我就執好書包,上定去藍社社房門口等曉琳嚟。我望一望個鐘雖然已經到咗五點半,但時間都仲係尚早,我估曉琳同芯玲佢哋出咗去玩應該都唔會準時返到嚟,不過反正我又無事無幹等多陣都無妨,點知道...
「喂喂,你係咪等咗好耐啊?」忽然間走廊遠處傳嚟曉琳嘅聲音。
曉琳好似趕頭趕命咁急步行過嚟,仲差啲唔小心撠親,好彩佢手腳協調得好先無跌親,當佢行到埋嚟我度嗰陣,就將杯珍珠奶茶連埋支吸管㨃埋我面前,杯面張包裝紙依然係完好無缺。
「嗱,買俾你㗎。」曉琳望住我嫣然一笑。
深夜甜品
2023-10-10 13:22:18
94.
「咁好嘅?多謝你。」我伸手接過曉琳杯珍珠奶茶。
「做咩你個樣咁錯愕喎?」曉琳問。
我嘗試裝扮得好開心,但心裡面嘅感受都係俾我嘅臉部表情出賣咗,然後再俾曉琳識破。
「邊有啊,咁啱我都好肚餓,有得飲已經好開心。」我邊講邊拆開飲管包裝。
「你肚餓嘅早知我買多份章魚燒返嚟啦。」
結果支飲管都未篤到落杯底,曉琳就已經哄埋嚟杯奶茶度啜咗一啖,同一時間佢啲頭髮亦都直接掃晒落我塊面度,霎時間髮香掩蓋咗所有奶茶嘅香味。
「唔…個奶蓋好甜好好味啊。」
我仔細一望先發現,原來曉琳今次買嘅呢杯珍珠奶茶仲要有層厚厚嘅白色奶蓋喺面,呢層邪惡嘅物體一睇就知肥到要死。
與此同時個傻妹居然可以飲到個嘴角白色一撻撻,我都唔敢亂估曉琳咁做係有心定無意,但呢個時候扮咩都睇唔到應該係最妥當?
「我哋入去先?」我指住社房道門主動提議。
「嗯嗯。」
藍社社房需要鎖匙先可以入到,當然我係無鎖匙的,要靠曉琳抹乾淨嘴嘴之後拎鎖匙出嚟先入到去,至於你問我社房裡面有啲咩好形容?其實我都係呢個禮拜跟住曉琳上嚟先有機會造訪,不過一如所料總之裡面就雜物堆積如山,座山裡面我諗應該包含咗好幾屆嘅遺物,而最顯眼嘅就係嗰支陸運會我都有份幫手插嘅社旗。
曉琳話,平時佢哋開會都係將幾張學生枱求其拼埋一齊就當係會議枱,而我同佢呢,得兩個人,所以一張學生枱兩份用已經夠。
「係呢,你唔係同芯玲佢哋出咗去玩㗎咩?」坐底之後我問。
「嗯係啊。」
「但係今日唔係星期五咩?」
「星期五做咩?」
「星期五你要開藍社例會嘛。」
「無開好耐喇,自從陸運會完咗之後就幾乎無開過會咁濟,嚟緊又考試,下學期又無咩社際比賽,所以其實我哋依家都幾得閒~」曉琳講完之後淺淺一笑。
「哦~所以先至搵我嚟攝時間。」唔知點解我見到曉琳笑,我竟然會忍唔到口挑逗佢。
「邊有喎,芯玲佢哋原本仲話即興去睇戲㗎...但我同你約好咗嘛…」跟住仲要俾曉琳一手搶咗我杯珍珠奶茶嚟飲,見佢怕怕羞羞個樣就快要用杯奶茶嚟遮住自己塊面。
咁聰明如我都大櫬估到係咩事,九成都係曉琳作咗個藉口使開咗睇戲約會,瞞住芯玲佢哋返咗嚟學校陪我做聖誕聯歡會,但睇見依家曉琳嘟起個嘴默默咁喺度啜緊杯珍珠奶茶,好似想嬲又係又忍住忍住咁,我諗其實我都無必要去篤穿佢呢個內心小秘密?
「喂喂,你飲晒我無得飲啦。」
結果杯珍珠奶茶真係幾乎俾曉琳飲晒,連個奶蓋都俾佢舔到一乾二淨,呢日其實我都唔知自己做咗啲咩個天又已經黑晒,而下個星期就係聖誕聯歡會,好彩我同曉琳已經訂好晒到會,計好晒份量同埋推斷埋班上面啲同學鐘意食啲咩,連聖誕佈置都諗好埋,係差在未買大抽獎嘅禮物,原來看似簡單但搞起上嚟都幾多嘢要注意,真係全靠曉琳先至可以咁順利又無out budget,做過社幹事搞過活動有經驗係唔同啲。
呢晚我同曉琳坐到俾訓導主任趕走,好衰唔衰個訓導主任仲認得我唔係藍社幹事,居然審犯咁問我做咩會出現喺藍社社房,方死驚我同曉琳兩個孤男寡女共處一室會亂咁男女關係,不過曉琳轉數好快,即刻話我嚟緊下年有興趣做社幹事所以上嚟社房參觀下,最後仲使出嬌嗲攻勢成功擊退咗訓導主任。
「曉琳,頭先好彩有你。」行到出學校大門嘅時候,我覺得點都要曉琳講聲多謝。
啊弊!我唔小心用咗暱稱叫佢...
「傻啦,如果唔係作個大話嘅話,可能你有排都未放得學呢。」
「總之真係要多謝你。」
「咁你諗住點報答我先~?」忽然間曉琳好似隻兔仔咁一兩下小跳步跳到我面前。但吓?要報答㗎咩?我可以報答啲咩?最多請佢食返盒章魚燒?
「欸...」我實在係諗唔到可以點報答。
「咁你今晚送我返屋企吖。」呢個時候,曉琳一臉稚氣咁企咗喺我面前,雙手翹後望住我對眼。
「吓?」我就一臉疑問咁望住曉琳。
「唔送就算啦,仲諗住有啲嘢同你講添。」結果曉琳都未等我答覆,扁扁嘴就轉身走咗去。