【校園／愛情】戀上鄰家女孩（布甸篇）

用廣東話描述得幾細緻，有與別不同其他粵語文學嘅感覺。

曉琳真係充滿魅力，希望男主角唔好傷害佢

樓主文筆真係幾好，好吸引到我繼續睇落去，不過硬係覺得有啲回顧返以前嘅歷史好似太多，例如同子瑜去迪士尼嗰part好似太長了

我覺得咁樣反而令我更易理解女主角諗法

啱啱先返到屋企，但其實每個留言我都有認真睇，聽日我會細心回覆兼且補更，同埋加快進度

感謝各位支持

都係，不過有時候都想個節奏推快啲，樓主描寫曉琳實在太好了，唔捨得佢俾人傷害

同感
曉琳同子愉都好可愛
唔想佢哋受傷

真係唔敢將自己嘅文字視之為文學，但係用好粵語（準確啲講係香港粵語）去寫故，我認為係一件值得堅持嘅事。

原來大家追故追到去紙言睇文，絕對係我嘅榮幸

關於佑男同子瑜嘅回憶，我只係想講，我唔能夠講太多了，怕會劇透，希望大家賞面繼續追落去。

至於子瑜嘅內心諗法，大家如果唔介意地方淺窄嘅話，可以去我ig睇吓，有兩篇文係關於劇情嘅解說。

最後，我會加快兩邊同步㗎

ig: midnightdessertstory

31.

傾傾吓，姑娘終於嗌到曉琳個名，好彩醫生都話無咩事只係小小感冒。我哋攞完藥行出診所之後，曉琳就捉住我手臂係咁搖、係咁chok，似足個小妹妹扭爸爸買玩具咁。

「買嘢食～買嘢食～我肚仔餓喇...餓扁喇...」曉琳講完就翹住我手臂行。

帶完呢個小妹妹又飲又食之後，佢都開始攰到語無倫次，我捉住佢手仔餵埋佢食藥，再氹佢早啲返屋企休息。

返到曉琳屋苑樓下，佢住嘅地方同我同子瑜完全係差天共地，佢屋企係一座私人屋苑，即係有保安叔叔主動開門同你打招呼嗰種，我咁大個仔都係第一次接觸呢啲高級地方。

保安叔叔離遠見到曉琳已經認得自己個住客，準備開門之際，曉琳就係呢個時候停低咗。

「陳佑男，你係咪剩係鍾意我一個㗎咋？」

「傻瓜，當然喇。」

「咁你掂過我啲口水尾以後就要聽晒我話㗎喇...」

「呃？」

我都未get到曉琳呢句話嘅意思，佢就哄埋嚟錫咗我一啖。無呃你...保安叔叔可以做證。

「又係你話嘅，今日第一日係例外，所以要紀念下，goodbye kiss嚟㗎，byebye～」

「byebye喇。」

我忽然間，覺得呢一個吻別好似嚟得特別沉重，係代表住我對曉琳嘅一個承諾，同時間我都感覺到曉琳對我嘅感情，遠遠超越我原本所想像嘅。

錫錫完之後，曉琳興奮到好似細路女咁跳跳紥走向屋苑大門，保安叔叔笑到四萬咁口拉開道玻璃門迎接曉琳。

「唔該龍叔～」曉琳停低同保安叔叔好有禮貌咁點頭道謝，然後又擰返轉頭向我揮手道別，曉琳佢又靚女又有禮貌，莫講話我，連保安叔叔俾佢都電到暈。

曉琳入咗去之後，龍叔仲離遠向我點咗一下頭。做咩啊！？我未結婚㗎，無利是俾你...

我即刻擰轉身逼開龍叔視線，望吓個天一片晚霞，遠處嗰幾幢公共屋邨就係我同子瑜嘅屋企，今晚個天色幾乎同上一次送曉琳去補習嗰晚一模一樣，而好似曉琳呢種咁靚女，身材又正，又識嗲人嘅女仔，同佢一齊個感覺真係好舒服，有個咁鍾意自己嘅女仔，夫復何求？

不過我仲有啲好重要嘅事情唔可以唔理，我拎返部電話出嚟，望一望個鐘，已經過咗六點半，未接來電就有三個，全部都係子瑜打過嚟，我輕輕一撥打返俾佢。

嘟...嘟...嘟...

搞咩啊你個黃子瑜，頭先打俾我咁急，而家打返俾你又唔聽，仲要連續打咗俾佢兩次都無人聽，係嬲咗我頭先無聽電話？

我沿住啱先行上嚟條斜路一邊行返屋企，一邊諗緊子瑜究竟因咩事連續打咗三次電話俾我，嗰段時間一早就過晒壁報板比賽deadline時間，肯定唔會係搵我過去救佢命。

不過佢而家唔肯聽我電話，我都唔會知道個答案。

直至我返到屋企，我先可以從佢鐵閘上面個氣窗透出嚟嘅光線，大概估到子瑜應該都返咗屋企，但其實都係靠估，因為佢媽咪呢個鐘數仲未放工，而子瑜就應承每晚都會煮飯俾佢細佬食，理應好少咁夜都未返。

但除咗估佢已經返到屋企之外，對於子瑜喺我離開班房出去追曉琳之後所發生嘅事，我都係一概不知，但我又好想知，那怕佢屋企傳出一粒聲都好，我哋只係隔咗嗰兩步路距離，有時候黃子俊個死仔包講嘢大聲啲我都可以聽得一清二楚。

攤咗喺梳化一陣，電話忽然間震，我幾乎本能反應咁拎出嚟睇吓係咪子瑜打返嚟。

原來係曉琳。

「喂喂，你返到屋企未啊？」

「返到喇。你做咩唔休息吓啊？」

「咁我掛住你嘛...」

於是乎，我哋隔住個電話，傾咗啲咩？都係啲講完隔咗兩分鐘我已經唔記得嘅話題，不過都有重點嘅，原來曉琳每個禮拜日都要陪爹哋媽咪family day，即係無得同我出街拍拖。

「喂～咁你而家做緊咩啊？」曉琳問。

不過同曉琳傾電話都無咩壓力嘅，因為呢個女仔總係有源源不絕嘅嘢同你講，把聲又好聽，但就係呢個時候有電話入，我即刻拎起一睇。

來電顯示：子瑜

仲響緊！我要把握時間接先得！

「曉琳啊？」

「嗯？」

「我媽咪打俾我啊，轉頭打返俾你得唔得？」

「嗯嗯，梗係得啦，快啲聽啦，乖仔～」

「好。」

於是我就cut咗曉琳線，趁佢仲響緊嘅時候，對準個綠色接聽掣一㩒。

「喂子瑜？」

男主角講大話

32.

「陳佑男！！你做咩咁耐先聽我電話？」

來電顯示雖然係子瑜，但打俾我嗰個又係佢細佬，唔知佢又想玩啲咩，我承認接電話一刻唔係子瑜把聲我係有啲失望，同時有啲後悔因為咁而cut咗曉琳電話。

「阿子俊哥，做咩又偷你家姐部電話打俾我？」

「唔好講咁多廢話住先，黃子瑜沖緊涼，所以我先有時間打到俾你。我問你，今日有個男仔送黃子瑜返屋企，你點解釋先？」

吓？子瑜有男仔送返屋企做咩要我解釋，解釋啲乜？

唔係喎！邊個男仔送子瑜返屋企先係重點。

「你確認個男仔唔係我？」對住曉琳講咗半日甜言蜜語，竟然唔覺意將呢種油腔滑調帶埋過嚟。

「係鬼你啊！黃子瑜佢又唔記得帶鎖匙，係我開門俾佢㗎，一開門就見到有個男仔企喺佢隔離。」你家姐唔係唔記得帶鎖匙，係又唔知塞咗條鎖匙喺邊啫，不過呢個都唔係重點。

我腦裡面唯一聯想到只有一個可能性，於是我就將佢個樣形容俾黃子俊聽，但呢個豆釘又唔肯幫我認人。

「你快啲氹返黃子瑜啦！我都未見有人做男朋友做到好似你咁屎都有，黃子瑜俾其他男仔送返屋企都唔知。」

「講咗幾多次，我同你家姐已經...」我都未講完佢細佬就打斷我…

「喂...唔同你講喇！黃子瑜好似沖完涼，我仲要delete返個紀錄唔可以俾佢發現我打俾你...」

連bye bye都未講就收咗線。

結果原來只係我一廂情願，因為唔使問都知頭先嗰三次未接來電都唔係子瑜打俾我，而係佢細佬趁佢家姐煮緊飯嗰陣，偷偷地拎咗部電話打俾我。咁即係子瑜根本就無搵過我，反而係我打咗兩次俾子瑜，佢都無聽我電話。

仲未計有個男仔送子瑜返屋企，雖然我諗都係得一個可能性㗎啫，唔係家樂仲會係邊個？但而家我應該要快啲打返俾曉琳先，如果唔係就會輪到佢心掛掛。

電話再次接通，跟住就開始聽曉琳嘅自我介紹…

簡單啲講，曉琳喺電話度，幾乎將佢嘅一生都講晒俾我知，包括佢係獨生女所以佢爹哋媽咪當佢掌上明珠咁好錫佢，過年過節啲姨媽姑姐表哥表弟又會聚首一堂，小學年年都會去某公園BBQ做秋季旅行，風雨不改，然後仲有中一中二中三中四加埋中五中六啲同學嘅八卦是非兼私人恩怨，點解會有埋中五中六？因為曉琳係藍社幹事識好多師兄姐嘛，但我就無問曉琳關於嗰個藍社社長嘅事啦。

曉琳講幾多，我咪聽幾多，無謂顯得我小氣。

另外我而家知道曉琳除咗星期日要陪爹哋媽咪之外，星期二四都要去補習，星期五要開藍社幹事會。不過講咗咁耐，有個人我哋兩個都識，仲要同佢係糖黐豆嘅好姊妹反而全程都無提及過，就係子瑜。

「我講咗咁多，係時候同你講喇。」

「你想聽啲咩？」

「就...講吓你媽咪頭先打俾你，同你講咗啲咩吖，可唔可以？」

「哦...無啊，佢叫我唔好咁晏返屋企，唔好掛住溝女仔。」

「嘻嘻，你媽咪好叻啊，咁都知道你喺度溝女仔。喂吔！我頭先講咗咁多，而家輪到你講返你嘅嘢俾我知喇...」曉琳又開始撒嬌。

而我第一日已經開始對住曉琳講大話，其實都唔係第一日，係由最初相識嗰陣，我就開始對佢隱瞞住好多嘢。

冷靜啲放低把刀先

邊個呃鳩曉琳子愉，邊個就要收刀片

33.

時光再次倒流，返到嚟中一上學期，某日放咗學之後...

「等埋啊～」我邊跑邊嗌。

好彩我跑得快，成功喺部𨋢閂埋門之前攝到入去。

入到去，先發現有個熟口熟面嘅女仔發晒狂咁猛咁㩒個閂門掣，原來係黃子瑜！

「哎吔...夾佢唔死。」黃子瑜一副失望嘅表情。

嘩...心腸壞得你吖...

隔離仲有粒著住小學雞校服嘅豆釘，一臉天真無邪咁拖住黃子瑜隻手，一睇就知係佢細佬。

「黃子瑜你做咩要夾死佢？」粒豆釘抬高頭問佢家姐。

「因為呢條友上個禮拜想夾死我。」喂黃子瑜你唔好教壞細路先得㗎。

「我邊有...」

「哦～咁下次我一齊幫手㩒，一齊夾死佢！」粒豆釘忽然好似得到一件新玩具咁，勁興奮。

正所謂雙拳難敵四手，唔通我陳佑男終有一日要命喪喺呢兩姊弟手上？

成程𨋢就得我哋三個人，而佢兩姊弟你一言我一句咁，完全當我透明，但其實每一句都係針住我嚟講。

「20樓，Twentieth Floor，升降機門正在打開。」

𨋢門一打開，子瑜就湊住佢細佬行先一步，我就十足個外人咁跟喺後面，咁我又真係外人嚟嘅...

瞓醒覺第二朝返到學校，早會唔使集會留喺課室無嘢做悶到傻，而坐我隔離嗰個又唔出聲，於是我決定做破冰使者。

「喂黃子瑜，你咁記仇㗎，嗰日我唔係真心想夾死你㗎。」

「係㗎啦，記足你一世添啊。」黃子瑜托住腮，神情冷漠。

救命啊...有無咁小氣啊...

究竟呢個女仔點先肯相信我當日純粹係手殘㩒錯掣...

呢個時候班主任話有嘢要宣布：「各位同學，嚟緊就係壁報板設計比賽，呢個係我哋學校每年學期初都會舉辦嘅活動，為期一個禮拜，目標就係整靚我哋後面呢塊壁報板，有無邊位同學本身畫畫叻，或者覺得自己有藝術天份嘅，或者有責任心，想自願放咗學之後留低喺課室幫手㗎？」

運動細胞我就有，藝術天份？唔好搞我，都唔知咩人咁蠢先會自願留堂做義工。

點知坐我隔離個黃子瑜第一個舉手，我簡直瞬間傻眼，佢隻手仲要舉到好直，撐到件校服有啲繃緊。

「好，子瑜最乖，仲有無同學想自願幫手呢？」班主任滿心歡喜咁望住我哋，似係期待緊下一個水魚出現。

「我做！！」

我都唔知我哪來的勇氣，總之而家隻手舉到直一直，又唔知係咪我嗌得太有霸氣，而家搞到全班同學目光都聚焦落我度，仲好似聽到有女仔笑聲。

「好，有男仔幫手都係好事，仲有無其他同學願意一齊加入佢哋呢？」喂班主任唔讚我嘅...

「Miss Wong，我都想幫手啊，可唔可以啊？」嘩...呢把聲咁清純、咁溫柔，我即刻趷高個頭望吓究竟係何方神聖，諗諗吓仲覺得佢把聲幾似頭先偷偷地笑我嗰個女仔，但又唔記得咗佢叫咩名。

「當然可以啦，咁就拜託你哋三個負責喇，其他同學如果想幫手嘅話都可以搵佢哋...」

就係咁，我同黃子瑜，再加另一個唔記得咗佢叫咩名嘅女仔組團，成為咗壁報板比賽嘅負責人。

如果你問我點解當初會舉手自願留堂做義工？其實我都唔知點解，可能只係一時衝動，或者只係心血來潮，總之嗰刻我見到黃子瑜舉手，我就有股衝勁舉埋一份，我唔知係咪因為當日我唔小心㩒錯掣夾親佢，我唔知係咪因為佢係我第一個認識嘅中學同學，我都唔知關唔關佢住喺我對面事，抑或係我心裡面覺得佢其實好靚女，總言之，我想留返個好印象俾佢，所以我明知自己同藝術絕緣，但係我都想留低課室陪佢一齊做，希望佢會因此而對我改觀。

就係咁，放咗學之後，其他同學都執書包撇人，而呢個時候，今朝早另一個舉手嗰個女仔，就行埋嚟我同子瑜面前。

「子瑜你好啊，我叫曾曉琳啊，我係今朝舉手想幫手整壁報板嗰個女仔啊，我坐喺嗰度㗎...怕你哋唔認我。」

原來係叫做曉琳，個名又改得幾好，但當佢指住自己個位嗰陣時，其實我無認真去望，剩係覺得佢生得好靚，皮膚又白，笑容又甜，同埋把聲真係好好聽。

「Hello啊，我認得你啊，你咁靚女點會唔認得～」咁我隔離呢位其實都唔差，你同佢根本上就係不相伯仲，係對我惡咗啲啫。

「咁你呢，你叫咩名？」曉琳望住我問，鬼咩？頭先班主任又唔讚我又唔提我個名。

跟住黃子瑜就企咗起身，翹住曉琳隻手，對住我擺出一副不屑眼神：「佢？閒人嚟㗎咋，唔使理佢㗎喇，我哋兩個傾吓整啲咩仲好啦。」

喂！使唔使咁啊子瑜姐...家陣我想識女仔都唔俾。

小心寄錯咗隔離屋

原來曉琳捕咗男主角咁多年

然後子瑜一眼就睇得出，所以當場拉走咗曉琳

34.

黃子瑜同曾曉琳由第一日相識，感情就已經好到每分每秒都要黐埋一齊，不過而家諗返佢哋互相之間都係中學第一個認識嘅朋友，i mean唔計我嘅話，反正黃子瑜都話我只係閒人一個...

接住落嚟個禮拜，其他男仔放咗學可以返屋企打機，而我就要陪住兩位小姐出去買顏色紙、買文具，然後黃子瑜仲會將啲嘢㨃晒比我拎，相反曉琳係個好女仔，見我咁慘豬會主動幫我分擔下。

返到課室，黃子瑜又會命令我剪呢樣剪嗰樣，跟住又話自己唔夠高，叫我擒高幫佢釘完呢邊又釘嗰邊。阿黃小姐啊...明明你就成日笑我矮過你，點解你自己唔釘，係要我擒上去釘。

呢一日，我哋三個如常咁留低課室做義工，曉琳趁子瑜去廁所出咗去，就走埋嚟問我：「陳佑男，你同子瑜係咪本身就識㗎喇？」

「唔係啊，點解咁問嘅？」雖然嚴格上嚟講我哋又真係本身就見過面，只係我去到開學嗰日先知道原來黃子瑜就係住我對面嗰個女仔咁解。

「無啊，總係覺得你同子瑜關係好好。」

「吓？點會啊，黃子瑜應該好憎我，先會成日當我阿四咁使...」

「唔係囉，我覺得你哋係一個願打一個願捱，似喺度打情罵俏多啲。」

曉琳講到願捱嗰陣個眼神，明顯就係話緊我係俾人打嗰位，但咩打情罵俏就真係聽到我一頭霧水，佢見我無晒反應又繼續講落去。

「你有無聽過打者愛也吖？即係話子瑜對你有意思，所以先對你呼呼喝喝，想你在乎佢。」咁呢層曉琳你就有所不知啦，黃子瑜點會對我有意思，佢早幾日先想夾死我。

「而你呢，又願捱喎，咁...係咪因為你都鍾意子瑜，所以先咁抵得諗，嘻嘻～」

曉琳越講越離譜，我發覺佢啲想像力原來都幾豐富，唔怪之得藝術天份咁好。

「陳！佑！男！！你係咪又喺度偷懶啊？俾我睇吓你呢個剪成點？」

嘩！黃子瑜你失驚無神返入嚟課室又唔敲門，想嚇死我咩？

跟住佢就挨咗喺我側邊，拎起我啱啱剪好嘅圖案準備驗貨，而家我同黃子瑜距離近到可以聞到佢去完廁所洗手嘅泡泡香味，欸...定係佢嘅少女體香嚟呢...？

正當我意識鬆懈嗰陣，誰不知佢突然間伸晒兩隻手過嚟，一嘢抹落我塊面度，然後就跑走咗。

頂你個黃子瑜啊，濕嘅你隻手！？邊有人去完廁所唔洗手咁核突，啊唔係，唔抹手先啱。

「黃子瑜！你走去邊啊！？好玩唔玩學人玩水！？」

我即刻彈起身追住佢跑，話就話我矮過佢，但係講跑步佢又點會夠我快，唔使兩三步我就追到佢，俾我逼到埋課室牆角。

黃子瑜背對住牆角，逐少逐少咁退後，腳踭已經掂到牆身，走投無路，我故意扮個凶神惡煞嘅樣嚇下佢，搞到佢都好似有啲緊張咁，眼仔碌碌咁望住我會有咩舉動，而我反而留意到另一樣嘢...原來而家嘅我已經同佢一樣咁高。你下次唔使旨意再笑我矮！

「你...你想點啊？我隻手仲濕㗎，係咪想試多下？」

黃子瑜兩隻手喺我面前攘嚟攘去，作勢又想抆啲水落我個身度，但如果我選擇避開，佢實會趁有空位走甩，電光火石之際我索性捉住佢手腕，等佢無得再郁嚟郁去。呢一刻黃子瑜俾我困住喺牆角，又俾我捉住對手，簡直係任由我魚肉，形勢完全俾我逆轉咗。

不過出奇嘅係...黃子瑜佢又無掙扎，亦無嗌我放開佢隻手，似係俾我突如其來嘅舉動嚇到呆咗，眼神閃縮唔知聚焦咗去邊，又咬住嘴唇，連塊面都開始越嚟越紅，與此同時，仲有陣香味又喺佢身上散發出來。

而家靜咗落嚟我先開始察覺到，喺學校課室貿貿然捉住女仔隻手好似唔係幾妥，一陣俾老師見到就大鑊，於是我就慢慢鬆返開咗佢對手。

黃子瑜一見我鬆開手，就即刻將對手縮埋喺背脊後面，尷尬嘅氣氛籠罩住我哋兩個，我亦都唔知下一步應該做啲咩好。

正當此時，黃子瑜忽然間擺出一副正經嘅模樣，指住我後面講：「你睇後面，曉琳好似搵你喎。」

吓？但我都無聽到曉琳講嘢，不過我依然順住黃子瑜手指指向嘅方向望過去，但見曉琳耷低咗頭專心整理緊啲顏色紙...邊有搵我啫？呃我啊你個衰女包？

子瑜都咁鬼馬

甩p 了

戀愛少女果然唔講得笑

多謝你一直以嚟幫手推文

再推

JM巴