【校園／愛情】戀上鄰家女孩（布甸篇）

曉琳又俾男哥賣咗

琳琳慘到

芯玲：呢條友仔無救㗎喇…

希望呢次係最後一次…

喺你既嘢，無論點都係屬於你既，反之亦然。

命裏有時終須有，命裏無時莫強求

故事嘅標題已經講咗俾你聽邊個先係正印

Push

有文未

推

呢幾日病咗狀態好低迷，所以可能要等多陣先有文

都怪我寫細佬車禍出事，即刻有報應

追到live啦

樓主保重

好感動又有新讀者留言

感謝大家嘅厚愛啊，我決定今晚，出文！！

78.

我咁樣粒聲唔出擅自離開運動場，都唔知到時候返到學校會點樣俾班主任罰，分分鐘都唔係班主任可以處理到嘅層面，我諗最低限度都起碼要見訓導主任甚或至乎要見家長。

迷糊嘅記憶當中，我好似有印象當時大師兄已經去到終點位準備同我慶祝，不過佢肯定點估都估唔到終點對於我嚟講只係一條失去咗意義嘅白線，越過呢條白線之後我並無放慢腳步，依然向住我嘅終點繼續前進。

啊！芯玲三姊妹肯定以為我癡咗線，特別係芯玲，比賽之前佢仲笑我因為緊張而肚痾，唔知佢會唔會以為我咁樣衝出賽道，係為咗避免意外決堤要衝入廁所呢？但係佢好似都睇到我係向住運動場大門方向跑，而唔係向住廁所方向跑。

至於曉琳，唉...我都唔知點算好，唯有寄望返到去仲可以有彎轉。

「後生仔，見你啱先嗰個樣緊張到呢，計阿叔話，九成都係為咗女人㗎喇，嗱老老實實話俾阿叔知，係為咗女朋友定係阿媽先？」

面前呢個的士佬，係頭先見我喺條街跑到幾乎甩肺，駛埋嚟拉低車窗問我想去邊，我答話我趕住要去醫院跟住佢就叫我上車，仲拍晒心口話唔收錢免費車我去。

「兩樣都唔係。」

「吓？唔通你係基嘅...？」

「唔係，只不過佢真係唔係我女朋友...」其實我都無咩心情陪佢講笑，但見佢咁熱情又咁好心，患難見真情肯免費車我去醫院，我都無得求其敷衍佢。

「哈哈同你講笑啫，點都好啦，阿叔相信呢個世界，係你嘅始終會係屬於你嘅，唔係你嘅嘢你點樣強求都無用㗎喇，愛情都係一樣啊，任你點樣死心塌地付出都未必有收穫㗎喎，因為唔係屬於你嘅嘢，就算俾你一時三刻得到，最終都係要還返出嚟，到時候仲可能要加倍奉還添啊...」

點知的士佬就越講越興奮，就算架車到咗醫院停咗車，都仲雞啄唔斷沒完沒了。

「欸...司機大哥，好似到咗喇，我可唔可以落個車先...」

「得得得，梗係得啦，開埋車門俾你都仲得添啊，加油呀後生仔。」

落車之後，的士佬使出一個急轉彎就揚長而去，然後眨吓眼就喺我視線範圍消失咗，剩返我一個企咗喺醫院嘅急症室大門面前。或者真係正如子瑜所講，只要你真心渴望一樣嘢嘅時候，全個宇宙都會嚟幫你，而啱啱嗰個咁好人嘅的士佬就係其中一份子？

不過依家都唔輪到我停低思考，我只係想快啲可以搵返子瑜，俾佢知道呢個世界裡面，佢唔需要一個人獨自承受所有嘅痛傷，因為仲有我願意幫佢分擔。

問題係，成間醫院咁大我真係無從入手，急診室幾乎可以一眼望盡，除咗公公婆婆之外，就係啲陪佢哋一齊嚟睇病嘅親朋戚友或者工人姐姐，總之就無一個好似我同子瑜約莫嘅年紀。

詢問處嘅護士姐姐話我無帶身份證，又唔係病人家屬唔肯幫我查黃子俊喺邊個病房，於是乎我索性行去電梯大堂對住個樓層表，鎖定最有可能嘅嗰幾層病房，自己逐層逐層去搵。

之但係咁樣搵法，同大海撈針真係無咩分別，兒童科我又去過，連深切治療部個門口我都摸過，不過呢度除咗冷冷冰冰之外真係完全唔見子瑜身影，但我一身中學運動服連埋對跑步釘鞋，喺醫院跑起上嚟鞋底發出咯咯聲又特別容易惹人注目。

為咗唔好俾護士當我係壞人抨我扯，所以我都係落返樓下急症室，靜靜哋諗吓下一步應該點做，呢刻我望住個電話亭，心諗自己電話又無帶，銀包又唔喺身，我摸下自己條運動褲褲袋，空空如也連個銀仔都唔多個，想打個電話俾子瑜問吓佢喺邊都唔得，對住個電話亭我只能夠望洋興歎。

突然我靈光一閃，頭先我跑過嚟醫院就有的士佬免費車我過嚟，咁話唔定有人跌咗個大餅喺地下等我執呢。

「使唔使借個一蚊俾你啊？」正當我耷低頭望緊地下嘅時候，我背後就有把清脆悅耳嘅女仔聲出現。

「好啊。」

好乜鬼吖？我擰轉後面一望，眼前呢個女仔，咪正正係我依家最想搵到嘅嗰個女仔。

子愉

樓主好短

我…唔短㗎

推

作為曉琳Fans，好傷心

全校睇住自己男朋友跑走咗，芯玲應該安慰緊佢，社長可能諗緊好唔好乘虛而入，唔知家樂會唔會將件事講出嚟呢？

79.

「你過嚟呢度做咩？」眼前呢個女仔雙手翹喺背後，側頭仰望住我。

「子瑜...」

有時候有啲嘢真係唔到你唔信，我以為自己會搵唔返呢個女仔，結果就遠在天邊近在眼前，我懶理呢個係咪幻覺，即刻衝埋去攬住子瑜，佢俾我突如其來嘅舉動搞到有啲不知所措。

「我以為我會唔見咗你。」我將子瑜攬到實一實。

「喂陳佑男你攬到我咁實做咩喎，我透唔到氣啦，縮開先縮開先。」但係子瑜剩係用手不停打我心口，又無推開我嘅意欲。

「知道知道。」不過我好乖㗎，聽到子瑜叫我縮開我就即刻照做，鬆開子瑜退後一步。

「我問你啊，做咩你過咗嚟呢度，你唔係要跑比賽㗎咩？」

「跑完喇，跑完就即刻衝過嚟搵你。」

「哼！邊個要你過嚟喎。」子瑜兩邊腮開始脹起。

「咁我知你細佬出咗事，我唔想你再孤伶伶一個人，所以我一跑完比賽就即刻衝過嚟搵你。」

「都…睇得出嘅，著住件PE衫，仲要連對釘鞋都未換。」子瑜眼睛上下打量我。

其實子瑜都係著住套運動衫，只係唔知點解佢條PE褲特別短，不過子瑜對腳輪廓修長又夠幼，所以就算佢係細細粒都好，但身型比例依然好好睇。

而且子瑜依家著住對白飯魚，同我著住對有增高效果嘅釘鞋，我哋兩個拍埋一齊就更加突顯佢嘅嬌小玲瓏，矮得得咁超可愛，搞到我忍唔住又想上前攬住佢。

「係呢，咁你細佬依家點啊？佢有無事？」為咗抑壓住自己嘅衝動，我決定要入返正題做返正經事。

「我啱啱探完佢啦，醫生照完X光話佢左腳有骨折，包完石膏要留院觀察幾日。」相比喺運動場嘅嗰陣，子瑜嘅情緒似乎亦都平復返唔少。

但聽到粒豆釘嘅傷勢，個心唔痛就奇怪，可能我都一早當咗佢係我細佬。

「我可唔可以探吓佢？」

「嗯嗯，好似仲未過探訪時間，不過頭先佢瞓著咗，但係都可以去望吓佢。」子瑜提起佢細佬，就會收起稚氣嘅聲線，取而代之嘅係散發住一種成熟嘅感覺，但又夾雜住一點點嘅溫柔。

我跟住子瑜搭𨋢上咗幾層，再穿過幾條走廊，嚟到一間多人病房，終於可以見到黃子俊個傻瓜，佢左腳扎住石膏，右手插住點滴針管，額頭俾卷繃帶纏住，冚住張被瞓著咗，周圍嘅環境好靜，我放慢腳步，慢慢行埋去黃子俊病床旁邊張圓凳坐低，靜靜咁望住佢，偶爾會同企喺我旁邊嘅子瑜對望兩眼，不過我哋兩個好有默契一句說話都無講，我哋都唔想打擾呢個熟睡中嘅小朋友。

「你要快啲好返啊。」臨走之前，我細細聲向住黃子俊打氣，望住佢腳踝上面舊石膏，年紀輕輕就要承受呢啲痛楚，無論係邊個見到佢呢個樣，個心情都唔會好受。

離開病房之後，子瑜一直頭耷耷神情消沉，眼球都失去咗焦點，我同佢喺電梯大堂搵咗張長凳坐低，之後子瑜就開始講返佢細佬發生車禍嘅經過。

子瑜話，原來黃子俊係放學過馬路嘅時候，比架私家車撞到，好彩附近啱啱有同校嘅家長經過，即刻報警同通知學校，所以入院手續都係黃子俊個班主任臨時幫忙做住先。

子瑜仲話，學校嘗試過打電話俾佢媽咪，但係打咗好多次都無人聽，好彩本手冊緊急聯絡人嗰欄，留多咗個電話，學校先至可以憑住呢個額外嘅電話搵到子瑜。

等到班主任幫黃子俊搞掂好晒啲入院手續之後，子瑜先至聯絡到佢媽咪，但係佢媽咪話公司太忙走唔開，等到收工再過嚟醫院，都好可能過咗探訪時間。

不過班主任都要趕住返學校匯報返件事俾校長知，剩返子瑜一個留喺醫院，子瑜話想留多陣陪黃子俊，就係呢個時候咁橋見到我喺急症室大堂對住個電話亭發呆。

我都無為意由幾時開始，子瑜挨咗喺我膊頭上面。

巡房嘅醫生同埋探病嘅家屬不時出出入入，有時目光會停留喺我哋身上，但大多數都只係望一兩眼就會轉移視線，一張長凳，正好變成我同子瑜兩個獨處嘅小空間。

講吓講吓，子瑜又講返起當日佢當住我同曉琳面前，狠狠打黃子俊嘅嗰一巴掌，自此之後黃子俊就發脾氣唔睬佢家姐，就算一齊食飯嘅時候兩姊弟都係沉默寡言。

「我記得，我老豆佢仲叮囑過我要好好咁照顧黃子俊，結果我就搞成咁...」

「但係，我覺得你身為家姐，已經做得非常之好。」

斜陽光線從醫院窗外照射入嚟，將淡白色嘅地板曬成一片雪白，呢刻我可以清楚望見我哋兩個嘅倒影，不知不覺間，一陣陣啜泣聲喺我膊頭傳出，慢慢喺我耳邊迴響。

而且仲越喊越激動。

我伸手繞過子瑜後頸，攬住佢膊頭安慰佢。

呢一次，我一定會好好咁攬實呢個女仔。

陣間又攬下曉琳先

唔好啦，會兩個都好sad