【校園/愛情】戀上鄰家女孩(布甸篇)
深夜甜品
880
回覆
27 Like
2 Dislike
第 1 頁
第 2 頁
第 3 頁
第 4 頁
第 5 頁
第 6 頁
第 7 頁
第 8 頁
第 9 頁
第 10 頁
第 11 頁
第 12 頁
第 13 頁
第 14 頁
第 15 頁
第 16 頁
第 17 頁
第 18 頁
第 19 頁
第 20 頁
第 21 頁
第 22 頁
第 23 頁
第 24 頁
第 25 頁
第 26 頁
第 27 頁
第 28 頁
第 29 頁
第 30 頁
第 31 頁
第 32 頁
第 33 頁
第 34 頁
第 35 頁
第 36 頁
香江第一淫棍
2023-04-19 01:33:13
深夜甜品
2023-04-19 18:59:54
可能係因為想同佑男有多啲接觸?至少子瑜喺呢段時間都偷取到一啲值得開心嘅回憶,例如係支布甸狗波板糖,又例如呢日有佑男陪佢一邊整壁報板一邊嘻嘻哈哈,只不過子瑜自己可能都無諗過,要發生嘅事,已經提早降臨...
深夜甜品
2023-04-19 19:07:00
26.
我衝出子瑜班房門口之後,放眼望過去成條走廊人影都無隻,跟住我一口氣穿過成條走廊,隔離嗰幾個班房就仲有人喺度整緊壁報板,但我哋課室就空空如也半個人都無,只係祈求曉琳唔好匿咗入女廁。
我焦急盤算緊:「曉琳你去咗邊啊?」
去到走廊盡頭嗰時,我毫無頭緒之下,唯有調返轉頭重新行多次,確保自己真係無睇漏眼,當我去到自己課室門前,裡面依舊如是,但我依稀聽到有把柔弱嘅女仔喊聲,行入去就發現有個女仔踎咗喺我個位隔離喊緊。
「曉琳...」我慢慢行近,睇見曉琳拎住杯珍珠奶茶踎喺地下,耷低頭喊到個身一下下咁抽搐,我個心都乸住乸住,呢個時候唔係用嚟探究佢有無春光乍洩,重點係我要安慰返呢個女仔,仲要係我鍾意嘅女仔。
我即刻摸摸褲袋,好彩晏晝食飯嗰陣仲有張餐廳送嘅紙巾未用,我拎出嚟諗住遞俾曉琳,但覺得太過肉酸於是我又收返埋佢。點解上次喺布甸燒鋪前面,子瑜可以咁容易就氹返曉琳,但而家到我親自落馬嘅時候,我又無從入手咁。
「曉琳啊,唔好喊喇...」我索性學曉琳而家個姿勢,踎喺佢前面,雖然我表面上鎮靜,但其實心底裡完全係不知所措。
「你...過嚟做咩喎,你過返去搵子瑜啦...嗚嗚...」曉琳原本已經係一路索住鼻一路喊住咁講,點知講完之後喊得更加激動。其實頭先俾曉琳撞到嗰陣,從佢嘅反應我都估到九成關我同子瑜事,呢個禮拜佢雖然少咗試探我同子瑜嘅關係,但我估唔到曉琳會將呢樣嘢睇得咁重。
望見曉琳喊到水汪汪嘅大眼睛,淚流滿臉,楚楚可憐個樣,我又於心何忍再刺激佢...
「我應承你,我唔會返去搵子瑜,我留喺度陪你。」我幫曉琳拎開咗杯珍珠奶茶,將我褲袋僅餘嘅嗰張餐廳紙巾遞俾佢,張紙巾仲保留住我嘅餘溫。
「嗚嗚...你尋日...你尋日夠應承過我...應承我會留低...會繼續幫班女仔整...」
曉琳揸住我張紙巾喊到哭不成聲,連一句完整句子都要窒吓窒吓好辛苦先講到出嚟,但係我大概都明佢想講咩,簡單講就係尋日我應承咗佢,今日我會留低睇吓班女仔仲有咩需要幫手。
「我仲諗住...買杯珍珠奶茶...請返你飲...因為你尋日請我食章魚燒...點知返到嚟一個人都無...原來...原來你去咗搵子瑜...嗚嗚…」
唉...都係我惹嘅禍,其實我無唔記得佢講嘅嘢,我真係有問過仲使唔使幫手,但係佢哋都覺得塊壁報板已經搞掂好晒無嘢需要再加,我先過去搵子瑜,但最終我好衰唔衰俾曉琳撞到正一正,見到我同子瑜整緊壁報板,啊唔係,曉琳應該剩係見到我同子瑜兩個玩緊,雖然我無後悔去咗子瑜班房,但諗到呢度我又有啲自責...
「今日我有問過芯玲㗎,但佢都覺得無咩嘢要執,所以我先去咗幫子瑜咋...因為子瑜嗰班無人幫佢...」我都唔想曉琳一而再再而三咁誤會咗我同子瑜嘅關係。
「你剩係掛住幫子瑜,我今日唔喺度你就即刻去咗搵子瑜...你係咪好唔鍾意同我一齊整壁報板...」曉琳扁晒嘴咁望住我,一臉委屈咁,係男仔見到都想即刻攬實佢安慰返佢。
「唔係啊...點會唔鍾意啊,我想日日都可以同你一齊整壁報板,仲有呢,今日我俾Miss Chan罰,因為今朝早我以為你遲到,跟住點名嗰陣幫你作咗個大話,話你因為藍社嗰邊有啲嘢忙,所以先未返到課室,點知轉個頭Miss Chan就話你請咗病假,當場篤穿咗我個大話,仲罰我陣間五點鐘留堂。」
其實去到呢刻,我大概都肯定曉琳係鍾意我,如果唔係嘅話,又點會將子瑜同我嘅關係三番四次咁掛喺嘴邊。見到曉琳喊成咁,又踎咗咁耐,我怕佢對腳會好攰,我呢刻好想盡男仔風度扶返曉琳起身,再攬實佢氹返佢開心,但我又真係怕自己會捉錯用神,加上佢鍾意我都唔代表我可以任意咁對佢攬攬錫錫,萬一最後曉琳覺得我喺度非禮佢,咁樣會仲更加傷害咗佢。
但曉琳聽完我解釋之後,開始眼仔碌碌,百感交集咁望住我,而且我都留意到佢嘴角慢慢有返少少笑意。
「嘻嘻,抵你死吖,Miss Chan罰得你啱。」
「咁...為咗你俾佢罰吓有咩所謂。」
「唔得吖...你要補償返俾我...」冷不防突然間俾曉琳摵咗我手臂一下。
大西北姿粉客
2023-04-19 23:53:57
但係哩種關係注定奶嘢
如果你冇睇過school days嘅話,你睇完就會明我點解咁講
大西北姿粉客
2023-04-20 00:00:17
曉琳都好可愛
點算呀,咁落去一定會hurt到其中一個
深夜甜品
2023-04-21 00:02:54
既生瑜…
深夜甜品
2023-04-21 00:05:46
今晚趕唔切出文,按照慣例聽晚補多更
雖然我都係喺紙言搬過嚟,但因為我會校多次稿先出文,所以始終都要花啲時間去處理。
大西北姿粉客
2023-04-21 01:32:03
加油
深夜甜品
2023-04-21 21:24:22
27.
嘩!痛得我啊!今日俾人攻擊完下身之後,上身都無辦法全身而退,我好想同自己啲手手腳腳講聲對唔住係我虧待咗你哋,點解你兩個女仔望落弱不禁風咁,但實情可以咁大力㗎?
我唯有忍住痛咁回應:「好啊...你想要咩補償...?」
唔知道曉琳想我點樣補償呢?唔通要肉償?頂係呢個時候仲得閒諗埋晒啲衰嘢?
「俾我攬吓...」
曉琳細細聲咁講呢四隻字,細聲到我幾乎以為自己聽錯之際,下秒鐘曉琳已經成個身體挨咗埋嚟,直接撲咗入我懷抱,原本踎緊喺度嘅我,一個失平衡屁股向後重重咁坐咗落地下,唔通連pat pat都要受罪...?
只不過,我連發夢都未發過嘅場面,竟然呢刻俾我親身感受到,曉琳雙手搭住我後頸,佢啲頭髮直接掃咗落我條頸度,痕到我有股衝動想用手撥開佢哋,但我又怕咁樣會俾曉琳覺得我嫌棄佢啲頭髮,好彩有陣清香撲鼻嘅髮香慢慢散發緊出嚟,我唯有忍住痕,俾自己嘅嗅覺享受一下先。
但講到我對手,而家簡直唔知擺邊度好,唯有當自己係殭屍咁向前伸直就算...
然後我發現,呢個時候我個心已經噗噗咁跳,我嘗試克制住自己唔好衝動亂諗嘢,但係曉琳胸前嘅兩團小肉球毫無保留咁壓咗埋嚟,我可以好清楚咁感受到佢心跳嘅起伏,雖然應該隔咗層bra,但係個感覺依然係軟綿綿好舒服。
而家我手唔知擺邊好,又驚個腦諗埋晒啲猥瑣嘢,唯有控制吓自己對眼,點知一個唔覺意就望到壁報板我同曉琳兩張大頭相,我依家都真係不得不承認,呢兩張相釘到咁近真係好顯眼...不過釘得再近,都唔夠我呢刻同曉琳個距離咁近。
「喂...陳佑男你都...你都唔安慰下我嘅?」曉琳挨近我耳邊,近乎吹氣咁細細聲講,亦都間接提醒咗我唔好再胡思亂想。
「呃?」我解封返自己兩隻僵硬咗嘅手臂,移向曉琳頭頂,順住佢啲頭髮線條慢慢摸頭,越摸我個心就好似跳得越快,欸其實我都已經分唔到係自己嘅心跳抑或係曉琳嘅心跳。
「對唔住啊曉琳,我知衰啦,係我搞到你唔開心...曉琳你大人有大量唔好嬲我啦,我以後都唔敢再激嬲你,我以後都會乖乖地聽晒你話...請你食多啲章魚燒...帶你發掘多啲好嘢食,同你一齊share慢慢食...」
講講吓押埋韻添...弊傢伙喇!我好似唔小心衝口而出講咗一大堆男朋友氹女朋友先會講嘅說話,但我又真係發自內心,唔想曉琳再因為我同子瑜嘅事,令到佢成日都要自己屈埋喺個心入面估估吓咁難受。
誰不知我講完之後曉琳將我攬得更加實,我哋兩個嘅心跳已經好似溝埋左一齊咁。
我索性將兩隻手搭喺曉琳背脊度,掂到佢校裙條拉鍊之餘,仲好似feel到佢個bra扣,但我就梗係唔敢周圍摸,連掃背都唔敢,不過我又唔想好似懶係紳士咁,離手凌空咁攬住佢,因為我都想俾曉琳感受到我對佢嘅關懷,而唔係純粹單方面借個身體俾佢攬住。
於是乎,我哋保持住呢個姿勢維持咗一陣...只係怕如果有人闖入課室,見到我哋攬成咁,都唔知第日使唔使見家長…
「我病咗㗎喎,你攬住我唔怕我會惹到你咩?」曉琳聲線溫柔到有種可以軟化一切嘅魔力。
「唔怕啊。」而我個心都俾曉琳軟化埋,我居然連講嘢把聲都變到好溫柔,怕講嘢粗魯啲都會再傷害到佢。
「反正尋日我都飲過你嘅啲口水尾。」
點知我講完之後曉琳就鬆開我懷抱。吓?但係我答咗我唔怕喎,做咩要縮開嘅咁?唉一定係因為我後尾個句講得太過黐線...正當我後悔想道歉嗰陣,然後下一秒鐘,曉琳就瞇埋雙眼,哄埋嚟…錫咗落我個嘴度...
曉琳塊嘴唇,暖暖哋又好軟熟。
如果要搵一個四字成語嚟形容我而家嘅狀況,我其實都唔係好識,但我諗我會揀,天旋地轉。
香江第一淫棍
2023-04-21 22:21:10
JM
2023-04-21 22:33:53
推,樓主加油
大西北姿粉客
2023-04-21 23:09:44
曉琳好可愛呀
深夜甜品
2023-04-21 23:56:05
28.
「嗱,如果你病咗嘅話,唔可以賴我㗎。」曉琳含羞答答咁望住我,兩邊面珠墩紅到好似個蘋果,但係仲有粒淚珠掛咗喺佢眼角上面,個樣好惹人可憐。
我不由自主伸隻手指出嚟,對準個位置,就住度力,好溫柔咁幫佢抹走滴眼淚。眼睛呢個靈魂之窗咁敏感嘅部位,曉琳都無縮開到,由得我幫佢抹走嗰滴眼淚,係信得過我先會咁放心...
曉琳滴淚水就係咁沾咗喺我手上面,好想舔落肚...當留個紀念。
唔~鹹鹹地又幾好味...
「你做咩舔我啲眼淚啊,黐線佬啊...」曉琳嫣然一笑過後,又多咗滴淚珠從眼眸裡,滴咗落佢條白𠽌𠽌嘅校裙上面,濕咗一撻。
「唔係啊,我想咁樣好好記住,以後唔會再整喊你。」我仲想舔埋曉琳條校裙上面嗰撻眼淚。
「係至好講啊,你做咩係咁望住我啊?」曉琳雙手抱住膝頭坐喺地板度,嚴格上嚟講我哋兩個對腳嘅擺位已經係去到互相交纏嘅地步,曉琳所散發出嚟陣陣嘅少女體香周不時刺激住我嘅嗅覺,而我哋之間個距離大概係只要互相哄埋就應該可以錫到對方。
不過,曉琳咪又係同樣含情脈脈咁望緊我。
我都已經懶理有無人會突然之間喺呢個時候行入課室咁唔識撈,呢刻我都唔想郁,只係想維持現狀同曉琳互相對望,佢對水汪汪嘅大眼睛真係好靚,啲眼睫毛又長又自然,越望我個心就越舒暢,仲有股衝動想錫佢。
「曉琳...我可唔可以...」我嘗試靠腰力支撐着身體嘅傾前幅度,慢慢哄埋去。
「唔俾啊~」曉琳伸手揞住我個嘴,唔俾我再向前,於是乎就係咁我就錫咗落佢手掌心度,雖然比唔上曉琳嘴唇嘅軟熟,但都係另一種享受。
「一日只可以錫一次。」曉琳扁扁嘴,用教訓小朋友嘅語氣對住我講,我就係嗰個挫敗嘅細路仔。喂咪住先?咁講咪即係可以日日都同曉琳錫錫?
我呢啲細路仔百厭係天性嚟㗎嘛,駁嘴就梗㗎啦。
「不過今日例外,要紀念下。」我嘟起個嘴瞇埋眼,期待住曉琳再錫落嚟。
我憋住呼吸,空氣靜止咗兩秒鐘...
然後我好快又感受到另一次同曉琳嘴唇碰觸嘅快感,雖然今次只係一下蜻蜓點水,但係我早有預備,諗住曉琳錫落嚟嘅時候,我就即刻擘大眼,咁就可以近距離望多次佢錫錫嗰陣個怕羞樣。
點知我一擘大眼,見到嘅係曉琳用食指同中指平排打橫咁扮嘴唇,當俾我發現咗就即刻縮開隻手。
可惡啊...估唔到原來你先係最百厭嘅細路女。
「錫咗喇~」曉琳仲要笑住咁講大話,曉琳笑嘅時候特別靚女。
不過我都唔會咁輕易就失望嘅,話晒而家可以同曉琳匿喺課室裡面打情罵俏,我諗都夠我開心成晚,而且曉琳話過一日可以錫一次㗎嘛。
「曉琳...」
「嗯?」
「你病咗都專登返嚟搵我咁好嘅?係咪掛住我...」原來甜蜜感覺係會沖昏頭腦,講嘢唔覺意仲放膽咗,誰不知曉琳又再一下搣落我手臂度。
嘩!痛!辛苦你啦手手…
「你就想喇,我返嚟係要去開會啊,藍社嗰邊啊。」我又諗起嗰個藍社社長,不過我而家應該要對自己有返啲信心。
「你病咗就唔好返嚟嘛,睇咗醫生未㗎?好返啲未?」
「咁我應承咗佢哋嘛,所以點都要返嚟...同埋,我未好返㗎,因為有人頭先激到我又病病哋,又唔氹返人。」
睇嚟曉琳對於承諾呢樣嘢真係睇得好重,佢應承咗要開會,就算唔舒服都會換埋校服返嚟學校,而且會記得尋日我請過佢食章魚燒,然後專登去買返杯珍珠奶茶俾我飲,話就話我本身唔好呢埞甜到漏嘅肥仔水,但而家就算曉琳買苦茶俾我,我諗都可以化成糖水甜到入心。
「咁陣間我等埋你開完會一齊放學啊?」
「嘻嘻,你唔使等我啦,今日佢哋要開會傾陸運會嘅準備細節啊,我都唔知要開到幾點㗎,你呢...就乖乖地去搵Miss Chan罰留堂啦,睇吓佢今次會罰你寫幾多字悔改書~」
「吓...但係我唔捨得同你分開喎...」雖則我把口就話唔捨得同曉琳分開,但實際我係擔心佢又會俾個藍社社長強行綁架多啲。
「哼哼,第一日就咁口甜舌滑,唔理你喇,我走喇,嗱你杯珍珠奶茶啊,咁一陣...喺雨天操場等啦。」曉琳拎起杯珍珠奶茶直接塞咗喺我手裡面,然後就轉身跑走咗。
我接住曉琳杯珍珠奶茶,又一次目送佢離開我嘅視線範圍,雖然今次呢杯奶茶就一滴曉琳嘅口水尾都無,但係佢嘅珍貴程度...
喂等陣先?曉琳啱先話第一日?咩第一日至得㗎!?
深夜甜品
2023-04-21 23:57:33
深夜甜品
2023-04-21 23:57:45
謝謝你
深夜甜品
2023-04-21 23:58:31
曉琳仲好百厭
大西北姿粉客
2023-04-23 06:37:50
真係好百厭
整蠱男主角
你好,香港!
2023-04-23 13:04:26
紙言個進度快咁多嘅
深夜甜品
2023-04-23 17:56:18
好快呢邊就會追到
深夜甜品
2023-04-23 19:23:05
29.
曉琳啱先講嘅第一日,唔通係指我哋拍拖嘅第一日?即係佢已經當咗我係佢嘅男朋友?
啊!做乜要講到咁隱晦㗎,而家又走咗去開會,分明就係想吊我癮,你個百厭妹吖。
唔得,無論如何我陣間都要搞清楚!但仲有成粒鐘先到五點喎,又唔知道Miss Chan要罰我留到幾晏,萬一曉琳早過我走得,佢就要一個女仔為咗等我,孤苦伶仃咁留喺雨天操場,容乜易會俾啲不懷好意嘅男同學流晒口水咁拐走咗㗎。
不過當曉琳走咗之後,成間課室就得返我一個,靜到連隔離班跌咗部釘書機落地嘅碰撞聲,我都可以聽得一清二楚,相比之下我哋課室而家冷冷清清咁。
而家個人靜落嚟唔知係咪特別容易亂諗嘢,明明頭先又感受過曉琳頭髮掃落頸嘅痕癢,又享受過曉琳成個身體挨落嚟嘅球感,仲要同曉琳嘴對嘴錫過一次,感官細胞一次過經歷咗一場豐富盛宴,反而我覺得頭先俾子瑜踢中個位仲有啲痛。
回想返起,當初第一個知道我鍾意曉琳嘅人係你,當日我第一個諗到可以幫我追曉琳嘅人又係你,今日叫我追出去嘅人都係你,而家我終於追到曉琳,本來我應該會急不及待捉住你,同你分享呢個喜訊,俾你做第一個知道嘅人,但諗起你頭先叫我唔好理你要我追出去嗰番說話,就算我無應承曉琳唔搵你,我都唔知點面對你好。
而家我可以做嘅嘢,只係希望你可以順順利利咁趕得切整好塊壁報板,唔好衰俾你嗰班啲八婆睇。但其實喺我心入面,當我第一眼望到你塊壁報板之後,就覺得冠軍係屬於你。如果你哋仲係同班你話幾好,你哋又唔使爭,老師都唔使揀得咁辛苦。
唉...我一個人坐喺課室無所事事,變咗亂咁諗嘢,與其係咁,倒不如早啲落去俾人罰留堂仲好,反正都差唔多夠鐘,乾脆早啲孭埋個書包準備搵Miss Chan,但我走嗰陣家樂都未返嚟執書包,我諗佢同子瑜仲喺度爭分奪秒緊,呢刻每一秒鐘對佢哋嚟講都好重要,加油啊!黃子瑜...
「May I see Miss Chan?」
「咁遲先落嚟搞咩嚟啊?」我望吓教員室個鐘——16:55,明明就仲有五分鐘先五點,邊處遲?
「吓唔係五點鐘落嚟搵你咩...」
「塊壁報板未整好咩?」Miss Chan反問。
「尋日已經搞掂啦。」
「咪係囉,搞掂又唔早啲落嚟要我喺度等你。吓!而家咁快搞掂得戚啦係咪?」我其實唔係好明,咁快搞掂同得戚兩者有咩關係,不過都係唔好問咁多,扮聽得明,擰吓頭否認咗佢就算。
「唔係啊,我準備好俾你罰我留堂㗎喇。」
「嗤...邊個話要罰你留堂啊,咁想留堂嘅...而家喺走廊企返一個鐘反思吓先囉。」唔好喇啩,頭先喺課室仲反思唔夠咩?
「唔好啦,我寫悔改書都可以㗎。」寫悔改書起碼可以控制寫字速度吖嘛,早啲寫完早啲收工,罰企就無呢支歌仔唱。
「寫咩悔改書?你做錯咩事講嚟俾Miss Chan聽吓啊?嚟啊,講嚟聽吓啊!」臨尾個啊字仲要扯高幾個音。
「無無無...」又唔使留堂又唔使寫悔改書,唔通其實Miss Chan唔係罰我今朝一早幫曉琳講大話?
「我叫你落嚟,係想你嚟緊星期六日去買啲嘢食,下星期返到嚟慰勞吓班女仔,多謝吓佢哋呢個禮拜留喺課室幫手整壁報板,知唔知?」早講嘛...原來叫我落嚟唔係要罰我,好彩我都無自爆啫。
「係...知道...」
「嗱...呢度私底下俾兩舊水你去買嘢食,低調啲啊知唔知?如果唔知買咩好嘅,咪搵埋曉琳陪你囉。」原本講到錢嗰陣就細細聲講,但臨尾個囉字又扯高幾個音。
「係嘅,多謝Miss Chan。」我都識做嘅,拿拿臨將兩張紅衫魚以最快速度塞落褲袋。
「走啦你,知你趕時間,早啲落嚟搵我吖嘛。」呢個班主任真係神通廣大,咁都知我趕時間想快啲罰完留堂去搵曉琳,但終歸原來係Miss Chan對眼犀利,我向右擰轉面先發現,曉琳唔知幾時已經靜靜雞咁企咗喺我幾個身位之外,雙手翹咗喺後面,挨住走廊幅牆含情脈脈咁望住我。
保羅帶bra拿
2023-04-24 00:29:57
JM
2023-04-24 00:48:25
曉琳好可愛
深夜甜品
2023-04-24 20:56:44
Hello
深夜甜品
2023-04-24 21:42:00
30.
「好㖿~原來唔係俾人罰留堂,戥你開心啊。」曉琳彈吓彈吓咁跳到我面前,然後伸手「啪啪」咁拍咗我兩下膊頭。
我仲未描述完,曉琳停步嗰下,嗰對又白又長嘅美腿並排而立,真係睇到我精神為之一振,由對皮鞋到大脾嘅曲線線條完全係無懈可擊,成個畫面簡直係一種無與倫比嘅視覺享受,好彩無俾其他男仔拐咗去...
「曉...曉琳...你咁快就走得嗱?」差啲俾自己啲口水濁親。
「唔好咩?佢哋傾傾吓又傾咗去自己班啲嘢,我咪話作個藉口我唔舒服想走先。」阿曉琳小姐,其實你好似唔使作個藉口話你唔舒服,因為你今朝係請咗病假攞正牌隨時可以撇人㗎啊,當然我無咁樣講出口。
「你唔舒服啊就唔好勉強自己吖嘛,你睇咗醫生未㗎?」面對住曉琳,始終都係俾多啲關心佢好啲,與此同時我哋兩個向住校門方向慢慢行。
「未啊,今朝起身嗰陣攰到落唔到床,我媽摸吓我個頭話我發燒,幫我請咗假,叫我去睇醫生,但我就話,咁早醫生都未開門㗎啦~於是呢,我就繼續攤喺張床度,佢又趕住返工喎,結果我就瞓著咗,瞓醒嗰陣都已經係晏晝嚕。」
真係俾你激死,發燒發到落唔到床都可以講到咁繪形繪聲,諗諗吓尋日曉琳僕低喺我張枱度,恰咗成個鐘分分鐘已經發緊病,但今日請咗病假都仲自己走去買珍珠奶茶俾我,又返嚟學校開會,但我反而搞到佢一個人匿喺課室度喊,完全辜負咗曉琳對我嘅一番心意,忽然間我心血來潮,我一定俾心機,對呢個傻瓜好啲。
行出校門之後,我見周圍又無同學又無老師,我就捉住曉琳手腕:「跟我嚟!」
「去邊啊?」曉琳手腕俾我捉住但都無掙扎,一路跟喺我身後面行。
我回頭一望,見曉琳一臉疑惑咁望住我,但我又怕佢病緊唔行得快,於是我放慢腳步遷就返佢嘅步伐,誰不知曉琳突然兩下小跳步就已經追咗上嚟同我肩並肩咁行。
「你帶我去邊啫~」曉琳拉拉我衫袖開始嗲我。
「睇醫生。」
「唔...仲以為你會帶我去買嘢食添...」曉琳露出一個失望嘅表情。我用食指關節勾位,輕輕對住曉琳額頭敲咗一下,佢俾我擊中之後,即刻耷低頭皺住眉頭用雙手撥返順啲陰,跟住扁晒嘴咁望住我,真係好想...錫佢一啖呵返佢。
點知喺診所一等就等咗成粒鐘,但係呢個鐘曉琳全程都挨喺我肩頭上面,起初我哋兩個隻手總會有意無意咁掂到對方,但慢慢曉琳主動將隻手搭喺我手腕上面,然後越摸越落,最後去到手掌心之後,就順其自然變成十指緊扣。
我輕輕握實曉琳隻手,放喺自己大脾上面…好好咁珍惜呢個時刻。
「你呢…可唔可以話我知,你係幾時開始鍾意我㗎?」曉琳望住我,期待緊我嘅答案。
於是我就如實咁將上年陸運會前嗰排,我哋三個成日約埋喺運動場練跑,我幫佢哋計時,我望住曉琳跑步個背影,一個唔覺意就俾佢攝走咗個靈魂嘅呢段故事,重新講多次俾曉琳聽,呢啲大家喺第一集都聽過一次㗎喇,不過今次對住曉琳我自然要刪減返子瑜嗰部份。
「哦~原來你當我係貝多芬!!」曉琳指住我講,但個樣明顯係聽得好開心,眼神充滿甜蜜。
「邊有啊,咁到你講,你又係幾時開始鍾意我?」
「嘻嘻,唔話你知...」你個百厭妹吖,又想吊我癮喇,但跟住佢又講落去。
「乜你唔覺得…嗰陣時都係我搵你計時多㗎咩?」曉琳扁扁嘴咁望住我。
咁講法,係咪代表原來曉琳同我都係同一個時期鍾意咗對方?不過我哋而家提起嗰啲嘅陳年舊事,其實通通都有子瑜在場,但係我哋又有意無意咁skip咗子瑜,而偏偏呢個時候,我褲袋電話喺咁震,拎起一望。
來電顯示:子瑜
曉琳都伸咗個頭過嚟望,唔知係咪子瑜感應到我哋skip咗佢,專登打過嚟投訴,不過頭先經歷過曉琳喊生喊死咁,而家又拖住佢喺身邊,我仲邊敢接。
你當我喺未來女朋友面前表忠又好,唔想喺呢個時候破壞我哋談天說愛嘅雅致都好,我用咗一秒時間就決定將部電話直接塞返入褲袋,曉琳向我報以一個微笑。
「你唔接嘅?可能子瑜有事要搵你呢?」雖然曉琳聲線溫柔,但我知係一個陷阱。
震完無耐,部電話又再震過,我都唔知子瑜因咩事搵得我咁急,但既然我決定咗唔聽,我索性伸隻手入褲袋㩒停佢。好衰唔衰部電話靜咗落嚟之後,我個心反而仲牽掛。
「唔啦...可能佢只係想問我你頭先做咩跑咗去啫...」我求其幫子瑜作咗個理由。
「可能人哋掛住你所以打俾你呢?」曉琳進一步試探。
「點會啊,可能人哋同緊家樂卿卿我我緊呢,好似我哋依家咁。」
我一邊拖住曉琳隻手,另一隻手再搭埋上去,然後輕輕將佢拉近喺我身邊,唯有用堅定嘅身體語言,先可以化解到曉琳對我同子瑜嘅憂慮。
然後我發覺每當曉琳講到子瑜嗰陣,家樂都會係一塊救命用嘅擋箭牌,萬試萬靈。
「家樂份人先無你咁百厭囉!喂喂!我仲有好多嘢想問你㗎,我想問呢...你可唔摸耳講俾我知,你鍾意我啲咩嘢啊?」曉琳先係一嘢拍咗落我心口度,然後又翹住我手臂挨喺我肩頭上面。
我鍾意曉琳啲咩啊?我腦海裡面收埋咗好多好多個鍾意曉琳嘅理由,但霎時之間咁樣問到,我又竟然半個理由都噏唔到出嚟。諗多兩諗,鍾意一個人可以由好多個原因,加埋天時地利人和混雜而成,亦都可以係完全無原因,咩話你話你諗唔到點答好?咁今晚你想跪玻璃定瞓梳化吖?
不過,曉琳絕對唔係啲巴渣嘅女仔嚟,我慢慢開始體驗到,曉琳會係一個好識撒嬌、好鍾意嗲人嘅女朋友,同佢一齊嘅時候,自自然然就會有種甜到滿瀉嘅感覺,有種可以令你暫時忘記塵世間煩惱嘅魔力。
咁個「第一日」又係指咩?無問到啊,反正我哋仲會有好多個第一日啦、第一次啦,來日方長啦係咪先...
深夜甜品
2023-04-24 21:42:34
佢係好女仔嚟㗎
第 1 頁
第 2 頁
第 3 頁
第 4 頁
第 5 頁
第 6 頁
第 7 頁
第 8 頁
第 9 頁
第 10 頁
第 11 頁
第 12 頁
第 13 頁
第 14 頁
第 15 頁
第 16 頁
第 17 頁
第 18 頁
第 19 頁
第 20 頁
第 21 頁
第 22 頁
第 23 頁
第 24 頁
第 25 頁
第 26 頁
第 27 頁
第 28 頁
第 29 頁
第 30 頁
第 31 頁
第 32 頁
第 33 頁
第 34 頁
第 35 頁
第 36 頁
吹水台
自選台
熱 門
最 新
手機台
時事台
政事台
World
體育台
娛樂台
動漫台
Apps台
遊戲台
影視台
講故台
健康台
感情台
家庭台
潮流台
美容台
上班台
財經台
房屋台
飲食台
旅遊台
學術台
校園台
汽車台
音樂台
創意台
硬件台
電器台
攝影台
玩具台
寵物台
軟件台
活動台
電訊台
直播台
站務台
黑 洞