【校園/愛情】戀上鄰家女孩(布甸篇)
深夜甜品
880
回覆
27 Like
2 Dislike
第 1 頁
第 2 頁
第 3 頁
第 4 頁
第 5 頁
第 6 頁
第 7 頁
第 8 頁
第 9 頁
第 10 頁
第 11 頁
第 12 頁
第 13 頁
第 14 頁
第 15 頁
第 16 頁
第 17 頁
第 18 頁
第 19 頁
第 20 頁
第 21 頁
第 22 頁
第 23 頁
第 24 頁
第 25 頁
第 26 頁
第 27 頁
第 28 頁
第 29 頁
第 30 頁
第 31 頁
第 32 頁
第 33 頁
第 34 頁
第 35 頁
第 36 頁
支那追擊手
2023-11-25 19:40:32
雖然覺得現行發展變調 但更多想知點解樓主feel like咁寫
係因為想寫人七情六慾真實嘅一面?定係有身邊嘅人/個人經歷?
由高登時代已經追唔少故 好多時候啲故去到後期變調反而係作者有壓力太大嘅情況或者一開始冇plan定 所以對樓主表示一直都想行呢種風格會覺得好奇
深夜甜品
2023-11-25 21:48:53
關於呢樣野,我可能會留返ig講,畢竟嗰邊都好耐無更新
深夜甜品
2023-11-25 21:50:00
好開心仲有人留言同睇呢個故,我努力啲睇吓聽晚出咗第一篇文先
支那追擊手
2023-11-26 11:25:51
期待!
我哋係真心支持你嘅構思 唔係純粹希望個故行我哋嘅預期發展咁單純㗎
大西北姿粉客
2023-11-26 11:53:54
支持
深夜甜品
2023-11-27 19:33:18
86. 天空就要塌下嗎(重製版)
我放低部電話沉思咗一陣,無耐小息鐘聲再度響起,我返到課室之後,決定鼓起勇氣,拎起部電話覆返曉琳。
『曉琳,今晚我要俾Miss Chan留堂,但放咗學之後我嚟你屋企樓下等你可以嗎?』
出乎意料嘅係,下堂教Bio嘅鍾sir都未嚟到課室,曉琳就已經覆咗我可以。
又會覆得咁快嘅…唔通曉琳一直喺度等緊我嘅答覆?諗到呢度,我愧疚感又浮現晒出嚟。
以前上堂嗰陣,芯玲都會撩我傾啲無聊八卦嘢,但今日明顯係例外,除咗課堂上有啲咩唔明佢會問我之外,基本上佢都一副懶得理我嘅態度,但往好嗰方面諗,起碼佢無同我絕交…
不過Lunchtime就唔使旨意同佢哋三姊妹一齊食,我到呢刻先發現,原來我喺學校係無咩飯腳,雖則我唔係小毒毒,亦唔係無朋友,但過往剩係同子瑜、曉琳、家樂或者芯玲三姊妹食,好少可群埋落啲男仔堆度,結果今日我就要面臨自己一個食嘅局面…
而且我開始有個預感,往後嘅日子可能都會係咁,不過都無辦法嘅,食飯鐘聲響起,我留意到總有啲同學其實都係默默咁自己一個人行出課室,無論係男定女都好,話唔定終有一日我都要學識同自己相處。
課室裡面大部分同學都嘻嘻哈哈咁出晒去食飯,連最後一個平時唔多出聲嘅男仔都起身離開,而我就仲孤伶伶咁坐咗喺位度諗。
唔知子瑜依家點呢?忽然間我想過去子瑜班房望吓佢仲喺唔喺度,結果我一出課室門口,就喺走廊迎面撞到個傻妹。
我哋兩個即刻相視而笑,好似都已經知道對方諗緊咩。
「跟我嚟吖。」子瑜輕聲溫柔說。
子瑜想帶我去邊,其實我都毫無頭緒亦都無所謂,但係我可以估得到佢嘅原因同目的係咩。
轉咗幾個街口,嚟到一間舊式茶餐廳,舊到地板仲係鋪緊幾何三色地磚,餐巾仲係用油紙而唔係紙巾嗰種,冷氣欠奉但天花板吊住把大風扇已經夠晒涼爽。
我同子瑜入到去就揀咗個卡位對住坐,即刻有伙記埋嚟擺低兩杯水。
「呀妹,今日咁好嘅,有個男仔嚟陪你。」
「帶多啲生意俾你吖嘛。」子瑜笑咪咪咁回應。
跟住子瑜哄埋嚟同我解釋,原來頭先個伙記就係呢度嘅老闆。
「我呢排都係自己一個人嚟呢度食,貪呢度靜靜地無咩人,又唔會撞到其他同學。」
子瑜表面上好似講得好輕鬆,但我就聽到有啲心酸,呢個時候,我偷偷地摸一摸褲袋,確認條玉桂狗鎖匙扣仲喺度。
「子瑜…呢段時間辛苦你喇…」
「傻啦,唔好講咁多嘢住先啦,嗱餐牌啊,你快啲揀嘢食先,我好肚餓喇。」子瑜不斷用佢對腳仔踢我,催我快啲揀。
「我揀好喇。」
跟住我舉一舉手叫老闆落單,子瑜用眼神示意要我嗌先。
「沙嗲牛肉麵,凍奶茶。」咁我係照舊㗎啫。
「兩份吖~」子瑜幫我放返好塊餐牌。
我哋兩個又再一次相視而笑,落好單之後,我問子瑜。
「點解你咁鍾意踢我㗎?」
「因為你唔會反抗囉。」子瑜諗都無諗就答我。
「咁等我試吓還擊踢返你先。」我縮起隻腳向後拉弓,作勢準備要踢返子瑜一下。
「你夠膽就試吓啦~」子瑜漲起兩邊腮望住我。
老實講,我真係唔敢,亦都唔捨得咁做,子瑜對腳仔咁弱質纖纖,我怕輕輕力踢都會整痛佢。
話咁快兩碗沙嗲牛肉麵就送到面前,我拎起支鐵叉,浸過水抹乾淨之後再遞俾子瑜。
「今日放咗學一唔一齊探黃子俊?」
「但我今日俾Miss Chan留堂啊,唔知道要搞到幾晏。」
「嗯嗯,咁我同佢講你俾人罰留堂唔得閒啦~」
「但仲有一樣嘢…」由頭先開始我就糾結緊好唔好講出嚟。
「仲有咩?」子瑜問。
「仲有…其實今晚曉琳約咗我…」最後我都係相信自己直覺,我都係想同子瑜坦誠相對。
「哦…原來呢個先係重點…」子瑜只係耷低頭密密咁食無望到我。
「唔係呀,我係諗住趁今晚同佢講分手。」
「吓?咁突然嘅…?」其實邊會突然,只係我都感覺到子瑜唔知俾咩反應先至合適。
「我覺得,當初我唔係真係咁鍾意曉琳,可能只係一時好感令我誤以為自己鍾意佢…既然發生咗啲咁嘅事,我諗我係時候都要同佢講清楚…」
「咁你諗清楚㗎喇…?」原本我以為,我同曉琳分手對子瑜嚟講會係一件好事,但睇佢表情又唔似係。
「事到如今我都無得選擇。」
天花板把大風扇依然默默咁轉動,偶爾會因為機件殘舊嘅關係而發出一兩聲怪響,除此之外呢度環境真係好寧靜,當我講完今晚打算同曉琳提出分手之後,我哋兩個就無再講其他嘢。而子瑜成餐飯亦都好似若有所思咁。
放學鐘聲終於響起,我執埋啲嘢,就乖乖地落去教員室靜心等待Miss Chan處置。
結果罰企,寫悔改書,加埋記小過俾訓導主任訓話,唔使見家長都算我執到,不過嚟緊半年嘅學校活動,全部都要強制被逼做helper幫手,呢招唔知係咪用嚟以防我再次中途逃走…
搞掂好晒所有嘢行出教員室,望一望個鐘都差唔多六點幾,終於可以放學…我諗呢個鐘數,學校四周圍都已經空無一人,但係我怕曉琳已經等咗好耐,所以我嗱嗱臨揹返起個背囊就出發去搵曉琳。
走咗一段路之後,終於嚟到呢段同曉琳一齊行過唔知幾多次嘅斜路,行埋上去就到曉琳屋苑。呢一刻,越近曉琳屋企,我心情就越緊張。
女傭Cafe打手
2023-11-27 20:26:35
推
辛苦樓豬了
聚賭最多罰三千
2023-11-27 21:01:42
男哥今次有坦白
深夜甜品
2023-11-27 22:18:02
辛苦你哋追咗咁耐
深夜甜品
2023-11-27 22:18:40
平行時空下嘅第一條分叉線
深夜甜品
2023-11-28 19:19:26
87. 笑容也會迷路吧(重製版)
去到曉琳屋苑樓下個迴旋處之後,我抬頭望上天,夕陽經已沉沒於山嶺之下,僅餘嘅一片晚霞亦幾近消散,然後我拎部電話出嚟打俾曉琳,但就緊張到啖口水卡住喺喉嚨差啲講唔到嘢。
「曉琳…我到咗喇。」
「嗯,你直接上嚟吖,我同咗龍叔講,佢會俾你入嚟㗎喇。」就咁聽佢把聲就同平時無咩分別,依然有佢嗰種柔情蜜意嘅感覺。
曉琳仲講埋佢個單位俾我知叫我記住,雖然我送過佢返屋企咁多次,但就從來未試過登門拜訪過佢香閨。
正如曉琳所講,保安龍叔離遠見到我已經笑到四萬咁口幫我開門,唔講仲以為我係呢度長期住客,跟住仲幫我用佢張保安卡嘟一嘟之後㩒埋𨋢,服務咁周到,唔知道曉琳施咗啲咩魔法。
呢刻我去諗點解曉琳要我上佢屋企都無意思,話唔定上去到曉琳好似我咁,諗住提出分手,不過做錯事嘅人係我,最終我哋要走到呢步我都無得怪人,要怨就怨自己個心一直裝住兩個女仔,但點都好,我都唔想再見到曉琳唔開心。
雖然我都再無咩資格咁講,明明佢嘅痛苦就係我一手造成,而我有責任了結呢個痛楚。
「56樓,升降機門正在打開———」
終於嚟到曉琳屋企門前,我整理一下儀容,揹返好個背囊,拍一拍塊面幫自己打氣,深呼吸一口氣之後,我細細力㩒落個門鐘度。
清脆響亮嘅一聲叮噹,大門隨之輕輕打開咗一條隙,跟住就聽到腳步聲急促咁跑走咗,但唔見曉琳踪影。
我推開門探頭望入去,成間屋無著燈,雖則未至於完全漆黑一片伸手不見五指嗰種,靠住窗邊殘餘嘅霞光都仲可以依稀望到間屋大致上嘅輪廓。
「曉琳…?」
無應我,點解有啲似惡作劇嘅感覺,但頭先有人開門俾我,即係裡面一定有人,唔知曉琳搞啲咩古靈精怪嘅嘢出嚟。
「曉琳你喺邊呀?做咩唔開燈嘅?」
我擰轉身閂好道門除埋對鞋之後,嘗試搵吓呢間屋嘅燈掣喺邊,但我真係第一次上嚟曉琳屋企,完全係人生路不熟,我都唔敢亂咁摸,而當人類嘅視覺受到障礙嘅時候,聽覺同嗅覺就會自動提升,不過呢一刻四周圍都好靜,反而我就聞到曉琳間屋散發一陣甜絲絲嘅香薰味。
「唔准開燈啊,你過嚟我間房吖。」忽然間聽到曉琳把聲,我順住佢聲線方向,戰戰兢兢咁行過去,驚唔小心撞到佢屋企啲傢俬,亦都驚走錯方向,行咗幾步終於俾我見到有類似房門嘅形狀。
「咁我入嚟啦。」
「你除咗鞋未㗎?」我聽到曉琳把聲只係近在咫尺,更加肯定自己唔會入錯房。
「除咗啦。」
我對眼慢慢習慣咗黑暗之後,都開始隱約睇到眼前呢間房嘅細節,有幾隻毛毛公仔放咗喺床頭,的確係女仔房常見嘅擺設,至少子瑜張床都係咁,但就始終唔見曉琳嘅身影,唔知佢匿埋咗喺邊。
正當此時,忽然間我感覺到有人用塊布之類嘅物體,從後包住我對眼,本來都叫做開始慢慢睇到嘢,家陣就真係乜都睇唔到。
「喂喂…做咩事啊?曉琳?」呢次弊喇,會唔會係因為我hurt得曉琳太傷,佢表面話想同我見面,實際係想報仇…
「唔准嘈亂巴閉呀,乖乖地過嚟瞓喺度,嘩你好重…」把聲的確係曉琳無誤,我估頭先佢就係匿埋咗喺房門內側,等我一入嚟就從後偷襲我。
跟住我手腕俾佢扯住行咗兩步,再嚟後腳踩前腳一個失平衡,當我以為自己準備要跌落地嘅時候,背脊已經糊里糊塗咁撻咗喺張軟綿綿嘅床褥上面,撲鼻而來係一陣熟悉嘅味道。
我索咗一啖,無錯!就係平時我哄個頭埋曉琳件校裙度,聞到嘅嗰陣少女香味。
「對唔住啊曉琳,有咩事可以慢慢商量…我以後都唔敢啦…」
「依家未輪到你講嘢住啊。」去到呢刻,我都好肯定面前呢個女仔係曉琳,但真係唔知道佢跟住落嚟會想對我做啲咩。鞭打我?定係剝我光豬再趕我落去遊街示眾?
點知道佢直接騎咗上嚟我度,唔係講笑係真係坐咗喺我個肚對落個位置,而且用佢身體重量將我個人壓喺張床上面,但我連個背囊都仲未除㗎。
「啊!曉琳...我個背囊...哽住咗我背脊,可唔可以除咗佢先。」裡面仲有你今日啲功課㗎曉琳...
「咁麻煩㗎你,嗱幫你除咗喇,咁唔差在除埋件恤衫去啦~」
咩話!?呢頭我背脊feel到個背囊無咗之後,嗰頭我心口已經開始涼涼地,曉琳喺度逐粒逐粒咁幫解開件恤衫啲釦。
「陳佑男...我話過,只要你贏到接力比賽我就可以俾你,我唔似得你啊,我應承過你嘅嘢,我係會遵守諾言㗎...」然後曉琳一啖錫落我嘴度…
深夜甜品
2023-11-28 19:21:37
PS:第87集同舊版係幾乎一樣的,而由聽日開始,平行時空將會擴大差別
深夜甜品
2023-11-29 21:05:30
88. 那初戀仿似流沙(重製版)
曉琳嘴唇軟綿綿好濕潤,好似搽咗層薄薄嘅唇膏,而且仲有陣櫻花味飄過嚟,芳香撲鼻真係好香,係男仔都抵抗唔住,過咗陣曉琳嘗試伸埋條脷入嚟,我感覺到佢有種好想得到我嘅慾望,但我係咪應該趁我仲未俾曉琳攻破理智之前,阻止呢個錯誤繼續落去?
「曉琳。」縱然我係想推開佢,但我又唔忍心咁決絕。
「都叫咗你唔好講嘢住。」曉琳一隻手揞住我嘴,另一隻撫摸住我塊面。
「曉琳你等等…我有啲嘢想同你講。」
「唔准講嘢住啊…」曉琳直接用佢嘴唇封住我把口,然後慢慢將我塊面每一寸肌膚都錫勻。
而佢嘅每一吻,都衝擊住我嘅理智,我已經情不自禁咁扶住佢條纖腰,但另一方面我仲想努力想保持住我嘅理智,但我開始懷疑根本就唔可能…
「唔通,你唔想要咩…?」曉琳連聲線都開始變得嬌喘。
想,點會唔想…更何況係曉琳咁靚嘅女仔,仲要咁佢主動,而且佢呢刻名義上同實際上都仲係我女朋友,但我個心已經決定咗分手…
「曉琳…」我已經控制唔到我隻手沿住曉琳條腰向上發展…
「我等咗好耐㗎喇…」曉琳就索性直接捉住我隻手,放喺佢對波仔上面,雖然我俾人矇住對眼乜都睇唔到,不過人類對於呢種軟綿綿質感嘅辨別,係有如生俱來嘅感知能力,絕對唔會有錯。
但係…我今日晏晝先同子瑜講我會同曉琳分手,如果我咁樣同曉琳發生關係,我咪會對子瑜唔住…
呢刻我個心簡直係處於天人交戰狀態,我理智就快被消磨得一乾二淨,我感覺到無論係我心理定係生理都逐漸唔受我大腦控制,但我腦海中忽然間浮現出一句說話。
無錯,呢句說話仲要越嚟越明顯,越嚟越強烈。
而呢句說話喺我思緒之中越強烈,我就越感覺到依家我做緊嘅嘢係一件錯事。
我深呼吸一口氣,決定放開摸住曉琳嘅嗰對手。
「曉琳…」
「你唔准講啊。」
「我鍾意嘅人…其實係黃子瑜。」俾曉琳揞住個嘴嘅前一刻,我將心底裡面嘅嗰句說話,一字一句咁清清楚楚講咗出嚟。
「都話唔准再講咯!!」
其實原本上嚟之前,我都唔知分手對白可以點講好,我無諗過結果竟然係用咗呢句嚟替代千言萬語,同時間我feel到有一粒兩粒水珠,滴落我塊面度,當流到落我嘴邊嘅時候仲舔到係鹹鹹地嘅,跟住我就聽到曉琳開始喺度喊…
「曉琳…」
我除低副眼罩,依靠住微弱嘅光線,隱隱約約見到曉琳雙眼水汪汪,眼眶旁邊啲淚珠一串又一串咁滴落我身上面。
「嗚嗚…你做咩除咗個眼罩去…?」曉琳喺我身上面喊到不斷抽搐。
但如果唔係我除咗個眼罩,我都唔知道原來依家嘅曉琳就好似一隻白兔仔咁,紥住條孖辮,著住套白色喱士情趣連身裙,加埋條白色毛毛頸圈,絕對係我見過佢著得最少最少布嘅一次。
呢條喱士連身裙唔剩止露咗曉琳成個北半球仔,而且條裙短到應該連佢個屁股仔都遮唔晒,一對又白又滑嘅大髀放喺我面前一覽無遺,至於點解我會話曉琳依家好似隻兔仔咁?就係因為佢戴住個頭飾多咗兩隻兔仔耳。
完全無諗過,曉琳今晚係咁悉心打扮,不過我覺得佢嘅呢份溫柔,我唔值得再擁有。
「衰人你唔好再望啦…」
「我無望啊…不如搵件衫俾你著返先?」
「唔要。」
曉琳一手扯起成張被包住自己,扁扁嘴望住我,話晒我都係個正常男仔,平時都會睇吓啲日本愛情動作片,又點會唔知咩係情趣內衣同埋係著嚟做咩,但當我親眼近距離見到曉琳著嘅時候,我只係覺得,啲咩女優統統都及唔上眼前呢個女仔,可能係因為我知道呢個女仔係真心真意咁鍾意我,甚至俾我傷害完之後都願意獻出佢嘅貞操?
我左望右望,都唔見邊度有衫可以俾曉琳笠住先,佢間房實在係太整齊。
不過就算張被點遮住都好,曉琳頭頂嗰對兔仔耳都係依然好可愛咁豎起咗,但佢啲眼淚就無停過咁流。
「我覺得自己依家好醜怪。」曉琳捉實張被,死都唔肯放。
「點會啊,我覺得你著得好靚女…」
「無用啦,幾靚都好你都唔要我囉。」曉琳拎起個枕頭掉落我度。
我唔係唔要你,只係我都無資格再接受你對我嘅好,去到呢刻我都唔知可以再講啲咩,我同曉琳兩個同床坐咗喺度,互相望住對方,時間唔知過咗幾耐,直至曉琳再一次主動打破沉寂。
「可唔可以再俾我攬多一次?」曉琳楚楚可憐嘅表情,俾著其他男仔肯定諗都唔諗即刻擒咗落去。
但係我覺得我呢次唔可以攬落去,唔拒絕啲嘅話就只會再次跌入呢個輪迴裡面,於是我搖搖頭,曉琳就縮返入個被竇裡面。
「曉琳…其實我真係唔係一個好男仔,同埋我覺得以你咁好嘅條件,你肯定可以搵到一個,比我更加好同更加錫你嘅男仔。」
我一路講,佢啲眼淚就不停流,就係呢個時候,終於俾我望到曉琳身後面有個掛牆衣架上面有件外套,我決然離開佢張床,走過去將件外套輕輕攞落嚟,放喺曉琳面前。
「對唔住…」跟住我扣返自己啲衫鈕,拎埋我個背囊摸住黑行返出曉琳睡房。
今次真係唔可以再瀨低個背囊了,原本唔屬於呢度嘅嘢就應該一早帶走。
最後我喺門口搵返自己對皮鞋,摀低身著返好準備離開之際,曉琳推開房門走咗出嚟,從後攬實咗我。
「你可唔可以唔好走…」俾個傻妹攬住我,霎時間都走唔到。
「但係我留喺度都無意思。」
「唔係㗎,我可以接受到你心裡面有第二個女仔,我可以忍受到你鍾意子瑜,只要你唔好離開我…」
「咁既然明知係錯嘅,又何苦繼續落去呢…」
「唔係㗎…」
結果,曉琳攬住我又喊咗一陣,客廳無著燈,四周圍黯淡無光,剩低嘅只有曉琳嘅體香同埋佢嘅啜泣聲,直到某個時間點,今次輪到我嘅直覺話俾我知,真係時候要完結了,我慢慢解開曉琳攬住我嘅嗰對手仔,轉身幫佢輕輕梳返順啲頭髮,抹返乾淨啲眼淚,再搣咗佢一下面珠墩。
「曉琳,我真係要走啦。」
「陳佑男,我可唔可以問你一個問題?」
「可以啊。」
「我有邊度比唔上黃子瑜?」
「無,其實喺我眼中,你各方面都好過子瑜,但係其實亦都唔關黃子瑜事,亦都唔係曾曉琳嘅錯,成件事我先係個問題所在,陳佑男係一個衰人。」
其實我仲想講,係我當初無諗清楚,就貿然決定同你喺埋一齊,最後先至發現原來我並無想像中咁愛你,所以離開我,某程度上對你嚟講都係一件好事,但係我又覺得呢啲說話會傷害到曉琳,所以始終我都係無講出口,我只能夠默默祝福你可以搵到一個更加好嘅男仔。
「啊,曉琳你今日啲功課,我就擺喺枱面呢度,拜拜喇。」
就係咁,我推開呢度大門離開呢個地方,落到樓下大堂龍叔用訝異嘅目光望住我,佢呢個眼神即係點?算啦我都無心機去思考。
呢條返屋企嘅斜路我已經行過唔知幾多次,如無意外應該係最後一次行啦掛?記得第一次行呢條路就係同曉琳拖住手仔行,但如今人去樓空物是樓非,咩話?你問我明明係讀理科做咩突然間咁好文采?我都唔知道,可能一個人觸發到情緒嘅時候,就會自自然然出口成文,啲古人吟詩作對唔係都係咁咋咩?
行多一陣,我褲袋電話猛咁喺度震,打擾咗我望住個夜空斯人獨憔悴嘅雅致。
來電顯示:子瑜
女傭Cafe打手
2023-11-29 22:09:30
呢一章既情節好有隔離大姐姐故熙𤋮同淇淇分手個feel
不過呢啲時刻真係好sad
穆念慈
2023-11-30 07:58:17
其實我prefer主線連載完先開始入返平行時空,但我知大家都期待平行時空條線好耐
今日嗰篇好正 男哥再來一次終於做返我哋讀者expect佢做嘅事
深夜甜品
2023-11-30 09:20:32
陳佑男太好文采,係「人去樓空,物是人非」先啱,僅此致歉免得俾人垢病教壞人中文
香江第一淫棍
2023-11-30 16:32:58
哦,哈哈。
噉又唔一定。
如果某些情況下,依據語境係可以變換詞語。
如果真係需要用到「物是樓非」,而且比原來更配合環境,係可以用嘅。
唔係胡亂篡改,係真係有需要,詞能達意。修辭上,稱為「化用」。
古人都成日咁做,創造新嘅詞語。
深夜甜品
2023-11-30 20:54:31
大個女啦,無事嘅
深夜甜品
2023-11-30 20:56:51
主線完故我有感會寫到2046
至於曉琳成功被分手,相信真係源自於佑男理性與感性嘅一念之差
多謝你鍾意呢個版本
深夜甜品
2023-11-30 21:03:26
物是樓非就要等到50-60年後曉琳住嗰幢樓拆咗先會有喇,到時候層樓就唔喺度,但可能會留低一份集體回憶,同埋我嘅足印。
話說我確實有具體度到曉琳住邊,而且我都唔止一次偷偷地去拜訪,可惜龍叔視我如無物,無開門俾我。
深夜甜品
2023-11-30 21:41:01
89. 秋分過後的那天(重製版)
「喂喂!你點啊?」電話另一邊嘅子瑜問。
「冇啊…」
「你同曉琳講咗喇?」
「嗯…算係嘅。」
「你點同佢講?」子瑜問。
「我咪直接話…我鍾意嘅人其實係你,」
「吓,咩…咩呀,依家邊個俾你同我表白喎?唔理你啊,我…啱啱探完黃子俊啊,你食咗嘢未啊?要唔要一齊食晚飯?」
「但係我依家真係無咩心情食,我想自己一個人靜一靜,摺埋一下先…」
「哦…咁好啦,咁我自己去搵啲嘢食…」
我唔係有心拒絕子瑜嘅好意,我明明聽得出電話另一邊嘅子瑜有種失望嘅感覺,但呢刻嘅我,真係再無氣力去照顧任何一個人嘅情感。
返到屋企之後,我都無精神去思考其他嘢,迷迷糊糊嘅狀態之下就瞓著咗,直至到第二朝鬧鐘響。
嗶嗶嗶嗶———
簡單梳洗過後,揹埋書包就出門口,點知一打開鐵閘就撞到子瑜,我想講嘅係呢個情況呢個學期係絕少機會發生,咁突然我霎時間都唔知俾咩反應好。
「哼!」結果一大朝早就俾子瑜嫌棄我。
跟住佢就無理過我,閂埋門之後就自己行去大堂,我就喺佢後面跟住。入到𨋢之後,個衰妹就全程嘟起個嘴擰歪面。
「子瑜你嬲咗我?」
「冇啊。」
「冇嘅話做咩擰歪面?」見佢兩邊腮又脹起咗,我就伸隻手過去想篤下。
「喂吔,咪搞啦。」結果俾子瑜一手擋開咗。
「唔得呀我見到就好想篤落去。」我懶理子瑜擋格,繼續搵空隙進攻。
「你心情咁快好返喇咩?尋晚又對人咁冷淡。」子瑜一邊退後一邊避開我。
「邊有喎?」我隻手無停過咁篤佢塊臉。
「咪整啦,有人望住㗎。」
「呃我?無人喎架𨋢。」定係你計埋個閉路電視?
不過下一秒我就知又中計了,子瑜趁我唔為意之下又一腳踢埋嚟,我哋兩個好似小朋友咁郁嚟郁去,差啲搞到困𨋢,諗諗吓我本來以為分完手之後心情會好差,但當見到子瑜又無晒呢啲煩惱。
「喂,我問你吖,分咗手係咪會好傷心?」離開屋邨範圍之後,仲要行多一段路先進入學校附近嘅範圍,子瑜篤一篤我手臂問。
「講真吖,我又無話好傷心…我都唔識講,反而好似有種釋懷嘅感覺?」
「吓你咁衰嘅,我睇啲愛情小說呢,啲男女主角分咗手都會好傷心好唔捨得對方,次次我都會睇到喊㗎。」子瑜用鄙視眼神望住我。
「你唔好睇咁多小說啦,遲早睇壞你個腦。」我輕輕力用手指篤返佢頭。
「你個腦就壞,不知幾好睇,同埋我又未拍過拖,我點知道分手嘅感覺係點喎。」
其實連我自己都唔知道分手嘅感覺應該係點,但係我諗每個人對於分手呢回事都會有唔同嘅感受?唔知道依家曉琳又點呢?
「做咩啞咗唔講嘢嘅?」子瑜見我無反應,又嚟伸隻手指篤我手臂。
「無啊諗緊嘢咋嘛。」
「諗緊咩?」
「諗緊究竟分手係一回咩嘅事,拍拖又係一回點樣嘅事,點解兩個人互相鍾意對方就會喺埋一齊?」
「鬼知道咩,你同個A0講呢啲好唔好意思㗎?」子瑜收返起篤我嘅手指,變咗自己篤自己手指。
「小姐你唔好唔記得你邊度係A0,明明中一嗰陣就俾你逼我做過你男朋友!」我一嘢敲落子瑜頭頂度。
「唔計啊!!嗰次唔算數啊!」佢俾我突如其來嘅一擊嚇到縮咗一下。
「咁邊次算數?」
「點知你。」跟住子瑜就急急腳向前跑走咗,唔知點解今次我並無本能反應咁即刻追住佢,而係維持住我原本嘅步伐,望住子瑜一路向前跑嘅背影,晨曦光線照住佢嘅身影,細細粒嬌滴滴咁條馬尾左捹右捹好可愛。
「喂!我去買早餐啊,你要唔要一齊買啊?」子瑜跑多兩步就回頭望返過嚟。
「黃子瑜等埋我!」我再次追上去呢個女仔面前。
追到上去,我先發現原來子瑜塊面早就紅卜卜,係陽光照射曬到佢咁吖?定係呢個平時唔多做運動嘅衰妹跑多兩步就血管充血,我都唔知道。
而你問我,咁樣係咪等於將子瑜追到手?同樣我都唔知道,不過我同子瑜之後可以話係相依為命,事關我哋兩個喺學校個朵已經臭到無得再臭,身邊嘅朋友都所剩無幾,同級同學都開始察覺到我同曉琳已經散咗。
自陸運會嘅嗰件事之後,我係一個公開拋棄女朋友嘅渣男,而子瑜就係個背後勾人男朋友嘅婊子。
不過我同子瑜喺學校範圍內都盡量避免有任何交集,仲嫌花生唔夠多咩?至於嗰間舊式茶餐廳呢,就變成我同子瑜食晏嘅地方,連老闆都成日笑我哋兩個係一對,喺嗰度,會令我產生一種錯覺好似同緊子瑜幽會咁,而且我哋總係要前後腳偷偷摸摸咁喺學校外面會合,咁嘅情況不知不覺又維持咗半個月。
好快又去到深秋,涼風一日比一日送爽,慢慢開始分唔到依家係秋天定係冬天,學校出咗通告話下個禮拜轉冬季校服,我喺衣櫃摷返套長袖恤衫出嚟,男仔嗰套冬季校服其實同夏季無咩分別,差別只係在於短袖同長袖之分,女仔嗰套就由白色校裙,變成白色長袖恤衫加條灰色背心連身裙,仲要戴埋條深藍色嘅領呔,而我覺得最大嘅分別係,感覺上班女仔每逢冬天就會成熟咗,唔知道係因為大家又大咗一歲嘅關係,定係套校服俾我嘅錯覺。
而呢一日,上緊堂嗰陣就忽然間俾芯玲問我晏晝去咗邊度食Lunch。
「吓…無啊,咪去咗轉角位嗰間車仔麵檔食。」俾芯玲失驚無神咁問,我都佩服自己咁機智作到個大話。
「嗰間出咗名難食你都食嘅。」
「無計啦,都無人陪我食飯。」我會唔會有啲此地無銀三百兩呢?
「無人陪你食飯,同你要揀一間難食嘅,又有咩關係呢?」啊!!芯玲點解你頭腦可以咁清醒?
「我覺得又唔算太難食嘅…」
又一個大話蒙混過關,總係覺得呢個聰明女想戳我晏晝同咗邊個食飯,可能佢估到我同子瑜偷偷地單獨見面?不過只要唔係俾佢撞到,同埋我死都唔認,應該唔會有事嘅。
「咁你哋呢?最近係咪都係同曉琳食?」我嘗試轉移話題,再加上我都想知下曉琳近況。
「問咁多做咩?專心上堂啦。」芯玲托住個腮,之後就成堂都無理過我。
啱嘅,做學生專心上堂係應份嘅,我望住塊黑板,唔夠一陣視線就轉移咗落坐前排嘅曉琳度,望住佢背影,唔知道佢依家諗緊咩呢?話就話我無資格再去關心佢,但係唔代表我內心唔再在意佢嘅感受。
嘩等陣先!忽然間曉琳擰轉頭望過嚟,好彩我即刻耷低頭扮抄筆記逃過一劫,個傻妹又會咁唔專心上堂無端端擰過嚟都有嘅?
大西北姿粉客
2023-12-01 09:24:18
終於肯出
深夜甜品
2023-12-02 10:31:22
等咗好耐了吧
深夜甜品
2023-12-02 10:35:03
90. 微風帶著你重臨(重製版)
然後有一日禮拜五,我差啲俾芯玲三姊妹周到我同子瑜私底下約食晏,話說嗰日我原本真係約咗子瑜,但因為佢晏咗落堂,所以叫我喺我哋嗰間舊式茶餐廳坐住等。
當我去到坐低嗰陣,茶餐廳老闆見到我已經慣性咁放低兩杯水同兩份餐具,幫我照舊落完單之後,我就收到個電話。
來電顯示:余芯玲
咩事…?
「喂!你去咗邊度食啊?」「邊間啊!?」「係咪自己一個!?我哋又嚟得唔得!?」唔係我手殘唔記得隔行,而係佢哋三姊妹真係七嘴八舌一輪嘴咁講。
「欸…」
「你可以講㗎喇,邊間啊?我哋過嚟搵你食。」終於剩係得返芯玲把聲。
「啊,我喺…」心虛之下,我居然將依家身處嘅地方報咗出嚟。
「哦~我知邊度,咁你幫我哋留多三個位啦。」
「吓?你哋真係嚟㗎?」咁亂嚟都得㗎咩?
「咩啫,你唔歡迎我哋咩?好啦唔講住先啦,收線啦拜拜。」
我真係想知究竟發生咩事,點解無端端會多咗三個女仔過嚟同我食飯,但呢刻我有樣更加重要嘅事要決定,就係咁子瑜點算好。
依家個情況係,子瑜過緊嚟,芯玲三姊妹都過緊嚟,咁到時候就會穿煲,芯玲就會知道我同子瑜單獨約食晏呢個秘密,再加上家樂嘅關係,短髮妹妹一向視子瑜為情敵,我怕佢兩個見到面分分鐘會演變成一場腥風血雨。
情急之下,我諗到嘅辦法唯有係咁…
「喂,子瑜?」我即刻拎起部手機撥個輪俾佢。
「做咩啊?唔好催我啦,行緊過嚟啦。」
「唔係呀,而係我想講,我今日可能同唔到你食晏…」
「吓?點解嘅?你未落堂咩?」
「我到咗茶餐廳坐低咗㗎啦,係因為無啦啦芯玲同佢兩個frd話要同我食,佢哋依家過緊嚟,你過嚟嘅話會撞到佢哋。」
「哦…咁…你想我點…?」我聽得出子瑜嘅失落。
「不如…我哋再約吖。」
「咁你食得開心啲啦。」
當子瑜收咗我線之後,我有啲後悔落咗個咁嘅決定,但我都已經別無他法,咁嘅情況好似除咗犧牲子瑜之後都無第二啲辦法,總唔能夠俾佢哋出現喺同一個地方。
趁芯玲三姊妹未嚟到,我叫老闆再俾多兩份餐具我,咁張枱加埋就有四份餐具,我都唔知自己點解要諗到咁周到,呢三個女仔無端白事話要過嚟搵我食晏,肯定唔方係好事,我已經有預感一陣個情況唔容易應對。
「喂條友仔喺嗰邊啊!」
呢頭講完嗰頭就到,一聽把聲就知係芯玲,然後就成班女就坐晒埋嚟,芯玲一馬當先坐我隔離,另外兩個妹妹坐我對面。
「有咩食㗎呢度?」短髮妹妹搶咗張餐牌嚟睇。
「你咪霸住張餐牌啦。」跟住圓框眼鏡妹妹伸手搶返張餐牌,我依家先留意到原來佢換咗副新嘅金絲眼鏡。
當兩個女仔好似細路女咁爭餐牌嗰陣,冷不防我大髀俾人兜野咁摙咗一下,痛到我差啲叫出嚟,唔使問都知係芯玲做嘅好事。
「我又要睇!」
我仲以為芯玲有嘢想同我講,點知佢摙完我就當無事發生若無其事咁同兩個女仔一齊睇有咩食。講真有乜好睇吖,當我碗沙嗲牛肉麵送到埋嚟嘅時候,個個都話好香好香跟住就抄我食同一樣嘢。
「呢間茶餐廳超舊,仲有少少污糟又無冷氣,夏天肯定會熱死。」金絲眼鏡妹妹左望右望。
「吓?無啊,路過見到咪入嚟試吓。」我希望老闆唔會喺呢個時候篤穿我。
「仲要呢度張餐巾係呢種油紙,都唔知點樣拎嚟抹嘴。」短髮妹妹插多把口入嚟吐糟。
你兩個女仔亂入搞到我要放子瑜飛機我都算喇,仲要喺度嫌三嫌四,芯玲雖然無同佢哋一齊吐糟,但佢成餐飯都係坐我隔離,我連拎起個手機睇吓子瑜有無搵我嘅機會都無,唔知道佢去咗邊度食,又唔知道佢依家係咪嬲緊我,不過多數都係㗎喇…
食飽飽就去埋單,返學校嘅途中芯玲故意殿後同我行埋一齊,正所謂芯玲走得慢,肯定有古怪...
「你今日真係自己一個食嘅?」芯玲個樣完全係不懷好意。
「係啊...」
「真係嘅?」
「呃你做乜。」
「嘻嘻~對唔住喇,阻住咗你同人哋幽會。」芯玲批肘撞我手臂細細聲講。
頂你個衰妹吖,你唔講出嚟猶自可,原來你根本就知道我同子瑜食嘅,仲要喺度奸笑,信唔信我將你就地正法!
「唓你一早知嘅,咁你做咩仲要專登帶埋佢哋兩個過嚟喎,搞到我要臨時臨急放子瑜飛機。」
「哈哈,原來真係子瑜!!」
「吓?」我俾芯玲佢擺咗一道?
「好嘢終於解咗我一個心結。」
「喂你唔好咁大聲先啦!」
「我估咗好耐㗎啦,多謝你提供答案俾我,但你放心啦我唔會爆出去㗎~」芯玲講完之後就雙手翹後,三兩下小跳步快步行返去會合佢兩位妹妹。
少年我真係太年輕,對住芯玲真係無咩可以隱瞞到佢,雖然我知道佢一直都好關心曉琳同子瑜,我信佢會幫我哋守住呢個秘密嘅,依家俾佢知道咗反而好似有種釋懷,況且有時候我都唔係好知點解我要隱瞞住,我同子瑜嘅關係,真係唔見得光咩?
返到學校之後,本來我趁仲有少少時間先打鐘,諗住過去八卦望下子瑜返到班房未,點知就俾Miss Chan捉住咗我。
「喂男班長,你間課室喺呢邊喎,你鬼鬼祟祟咁行過去文科班嗰邊做咩?」
「欸…」
「你落嚟教員室先啦。」
唉,心諗我咁都要俾Miss Chan罰,唯有死死地氣跟住佢落教員室,但點知去到教員室門口嗰陣,Miss Chan就笑笑口對住我。
「算啦唔玩你啦,同你講返正經嘢,我搵你嘅原因係,嚟緊月尾要搞Christmas party,上晝留喺課室玩聯誼活動,下晝就全體落禮堂聽sing con,咁你幫我諗諗計嗰日朝早有咩好做啦,你知㗎啦,你應承咗我嚟緊半年都要幫手搞活動㗎嘛,今次就俾個committee你做,但你放心,已經有人舉手自願做你partner。」
「Miss Chan,咁係邊個?」
搞活動我就無咩所謂,當有啲細藝打發下時間都好,不過邊個做partner就好大影響,你知啦唔係個個都夾得埋㗎嘛。
「咦,到啦,喺你後面。」
究竟係邊個呢?
我回身一望,係一個熟悉不過嘅女仔身影,亭亭玉立著住套冬季校服笠埋件海軍藍冷衫,帶住一種渾天而成嘅氣質。
我個partner,竟然係曉琳。
大西北姿粉客
2023-12-02 15:39:42
係!
第 1 頁
第 2 頁
第 3 頁
第 4 頁
第 5 頁
第 6 頁
第 7 頁
第 8 頁
第 9 頁
第 10 頁
第 11 頁
第 12 頁
第 13 頁
第 14 頁
第 15 頁
第 16 頁
第 17 頁
第 18 頁
第 19 頁
第 20 頁
第 21 頁
第 22 頁
第 23 頁
第 24 頁
第 25 頁
第 26 頁
第 27 頁
第 28 頁
第 29 頁
第 30 頁
第 31 頁
第 32 頁
第 33 頁
第 34 頁
第 35 頁
第 36 頁
吹水台
自選台
熱 門
最 新
手機台
時事台
政事台
World
體育台
娛樂台
動漫台
Apps台
遊戲台
影視台
講故台
健康台
感情台
家庭台
潮流台
美容台
上班台
財經台
房屋台
飲食台
旅遊台
學術台
校園台
汽車台
音樂台
創意台
硬件台
電器台
攝影台
玩具台
寵物台
軟件台
活動台
電訊台
直播台
站務台
黑 洞