肥羊聽罷也好像被黎生帶到他的推測之中,無力地插嘴:「嗰啲英雄片……死啦……如果大導係主角,實會俾自己留到最後……我呢啲角色……通常好快就會死……」
見肥羊也開始被唆使,阿美也看不過眼,懶理被黎生指摘感情用事而繼續坦護你:「你要點先肯相信大導?要點先肯大家合作一齊諗方法出咗去先繼續嘈?」
被阿美以實際的問題質問,黎生態度強硬得來又像說得動之以情:
「我同意留喺原位都唔係辦法,但我而家真係無辦法再相信大導。因為就係佢話要嚟拍片,我哋先至搞成咁,見過鬼怕黑都係人之常情。總之所有事情因佢而起,我點都唔會再聽佢講。」
肥羊也咬咬牙,喃喃低聲說了一句:還要我們今天真的見到鬼了。
他一直在旁靜聽黎生說的話,似乎也漸漸被這個說法唆擺到,以狐疑又不安的眼光投向你:「你話一啲人主力搵黎生、一啲人查探呢個地方,但我哋人分開咗,唔會仲危險咩……」
黎生想了一想,突然對你開口:「總之我哋就會去搵MK,你話要搵呢個地方發生咩事你就自己去。如果真係唔係你搞事,你就去搵啲證據返嚟,證明係呢個地方出事」
說罷,他便轉身作勢要往反方向走,並將一個重量匪淺的眼神落在阿美之上:「我同肥羊去搵MK,你做人女朋友唔係唔搵呀嘛?」她回頭看你的樣子一臉憂心忡忡,但腳步已經不知不覺跟上了黎生他們。她知道以她的身份,有些抉擇其實也並不是抉擇。
擁有這份擔憂的人不止是她。你深明一起行動固然會比較安全,可是一晚下來,你知道黎生開始對你心生芥蒂,連肥羊似乎也被他的說話影響到而對你警戒起來。你們明明同是被困宜卡傢俬的受害者,在拚命想辦法逃出時反被同伴懷疑固然難受。你擔心,如果在他們已經開始懷疑你的情況下還強行一起行動,不曉得會不會有反效果;
相反如果你提出讓自己暫時離隊,雖然在這個隨時會被攻擊的環境下獨行好像極不明智,可是暫時分開可以稍為緩和你們繃緊的關係,分頭搜索亦可能更有效率。獲得信任是很困難的,在被懷疑後重奪信任就更是難上加難。你很清楚洗脫嫌棄的最佳辦法,就是盡早找出真相,為他們挖出這間店所有怪事的源頭。