【逃出x選項】《夜半的宜卡傢俬》只有26.7%逃出機率的生存遊戲

「嗰啲已經係好耐之前嘅事。」

正當你無地自容得想要掘洞躲藏，阿美竟開口為你解圍：「每個人都有過去，我哋五個日對夜對，越親密就越多磨擦，你夠試過嬲我哋嬲到quit group啦，咁係咪又可以懷疑你有動機？想困住我哋逐一對付？」

黎生想起自己也有跟你們吵架的過去，鬧翻時也曾經也想過要永遠離開這個團體，最後還不是氣消了就回來。緣份夠深，感情夠真，離開後還是會常在。

他不忿地反駁：「你都打橫嚟講。你係MK條女，佢動機大好多！」

「就算佢係嬲我，對付我一個就得，點解要咁大陣仗困埋你哋？就當大導關事，你同肥羊點都無辜啦？」

阿美說得越來越激動。黎生的說法卻像繡花針一樣毫不留情地刺破她珍而重之的氣球。而於她而言，氣球的意義大於氣球本身，這一點沒有人知道。

「今晚喺呢度發生嘅怪事咁多，可能我哋純粹時運低撞鬼，可能好似大導話有其他Yxtuber喺度玩嘢，咁多可能性咁多原因，你可唔可以唔好懷疑自己人？」
阿美咬咬牙，說話的語氣儘可能沉穩。危機之下，不能有兩個不理智的人——這是她和MK在日常生活，長年累月磨練而來的堅韌。

見她態度軟弱，黎生更沉不住氣繼續爭論到底：

「咁你可唔可以唔好咁感情用事？而家所有證據都係指向MK有最大嫌疑—— 你差啲就被佢殺死，一次飛鏢，一次砸箱呀！你諗下，邊個知道我哋今晚會喺度過夜？邊個知道大導有部攝影機拍低證據所以要偷走佢？邊個同我哋打機嗰陣最叻奸茅，最擅長出埋啲蠱惑揦拃招？我發誓，嗰個推完箱急住逃走跑嘅背影肯定係MK嚟！嗰件死人MK仔褸呀，而家仲邊有人咁『好』taste呀？

今次搞唔到你，下個係咪大導？如果佢真係做得出，我同肥羊見證住晒都實走唔甩！」

「咁唔代表咩——」阿美噘嘴反駁，只是不擅長吵架的她也自知理據薄弱，從小到大都說不過伶牙俐齒的黎生。

「就係已經代表好多嘢！你成日一講感情就乜都唔知唔理，如果佢再喺貨架推個箱落嚟，你係咪會企定定喺度俾佢砸呀？」

雖然黎生嘴裏在罵阿美盲目，但你聽得很清楚他還是不希望再見到自己的朋友一個接一個地受傷，才會如此著緊，不想她對一次又一次壓在頭上的危機視而不見。

可能是黎生高談闊論的聲浪太大，說話的尾音像氣味一樣蔓延整個自助貨倉，縈繞不去。在阿美的心目中更是如此。

阿美或者只覺得黎生在有理沒理地攻擊她的伴侶，卻沒想到其實他為了分析大局，也在攻擊自己要好的朋友。那種親自對關係宣判死亡的矛盾和無力，沒有誰比誰更難受。

氣氛緊繃，你正打算仿傚狀況外的肥羊抿嘴不談，他們卻將話語權交到你手中。

阿美將目光投向你：「大導，你話……MK會唔會咁對我哋？」

她堅信MK不會傷害你們，黎生卻認為他因為舊事懷恨在心，由一開始藉詞去洗手間到留下一大灘血，刻意扮成自己失蹤的假像，都是計謀一部分。

黎生也拉你為他說話：「你哋講句理智嘅公道說話，以而家證據睇嚟，MK係咪最大嫌疑？」

再要好的朋友，仍然會各自相信著自己的真相。

「……有無人可以話我知乜事？」此時，一直在努力理解狀況的肥羊也喊著你的名字：「我係咪真係太蠢，你哋發生咗咩我都唔知……不過唔緊要啦……大導，咁你話……MK佢係咪會害我哋呀……？」

先是鬧鬼的事已經把你們弄得心緒不寧，加上遺失手機、正式被困這裏難免讓人失神。到底一切怪事是巧合而致，還是有人存心設局，另有內情？

你逼自己用力思考，在兩種真相中表達想法。
相信還是懷疑，在阿美和黎生的爭執越演越烈之中，人終究要有想法，很多事情都沒有中立的選項。說到底，你還相信這個朋友嗎？

【抉擇四】

A）懷疑。偏袒黎生，相信他親眼見到MK推箱。別讓朋友的感情綑綁理智，理性評論有嫌疑的人就是有嫌疑。

B）相信。偏袒阿美，相信她的感情和直覺。建議大家撇開前事不談，不要再懷疑自己人。


（正皮以下選項投票，24小時截數）

A）懷疑

B）相信

【投票開放中！】

本日營業時間已經結束
300正皮再加更

投票請正皮選項
留言講低想法

如果覺得好睇嘅，記得留個正皮同留言畀我
感謝大家追看，留言我會慢慢覆晒的


廣告時間：
IG（跟貼最新消息）：www.instagram.com/waittobewritten
PATREON（每月請我飲杯酒，支持我繼續寫作）： www.patreon.com/waittobewritten
FB（開嚟唔知有咩用）： www.facebook.com/waittobewritten

截

唔覺係mk 但揀黎生好似正路啲

推

啱啱重新睇過晒篇故

黎生淨係見到件mk褸啫
見唔到樣嘅話其實冇乜信服力

真 懷疑源日叔都係披件衫掛個牌扮
同埋之前獲得團結一致? 唔知有咩用 但唔又手議分化

裝神弄鬼好簡單啫 合理懷疑都仲揀得落 但黎生有啲激

其實兩次都針對條女應該大機會係MK搞事。但我會表態撐阿美先。

阿美講咁耐都無交代點解MK走左，個箱跌落黎閃咁快似唔似係普通人，連埋個保安摸佢無反應（可能因為無感覺），有理由懷疑條女有問題，甚至唔係人而係鬼。MK可能發現左d野所以先走。

黎生最有說服力既pt就係見到MK件衫，但單憑件衫其實無辦法肯定係MK本人，定係有第二條友扮MK。加埋未知黎生同MK有無私仇，唔建議係現階段落定論。

唔知MK同阿美係人係鬼既情況下：
1. 假設阿美係鬼，撐阿美一方面唔會刺激佢發癲，可以順便觀察吓條女有無其他唔妥。

2. 假設阿美係自己人，現階段阿美門面上都仲係主角團，信佢應該可以攞好感+團結。

3. 假設MK係鬼，可以比個假信息MK班人仲信佢，等佢放低戒心，下次再犯容易斷正。

4. 假設MK係自己人，而佢因為阿美所以有意避開主角團，主角表態fdship行先都可以比信心佢搵時機翻黎。


Touch wood MK已經收左皮，咁大機會係第二個人/石Q搞事，四人局更加唔應該搞分化，唔係更加難走得甩。

點計都信阿美

新加入
就咁睇阿美咁堅持無可能無MK
最大機會係阿美已經殺左MK?
咁可能MK係鬼咁就有動機搞阿美
如果係第二個人著MK件褸個動機就再諗

但番番個選擇都係覺得應該攞阿美信任
再套佢料
希望黎生唔好唔開心啦
你好理性好幫得手架

應該真係，得好模糊嘅記憶

我覺得大家太偏激 阿美信自己條仔係正常反應嚟 一嚟就話佢殺咗mk實在太誇張

btw 非常欣賞樓主你會解釋其他選擇既結果 但可能要小心劇透 個人覺得上次個解釋其實透露咗好多資訊 雖然好似無咩人講

今次揀B 主要真係因為樓主透露既資訊

MK失蹤咗
所以就係兇手
哩個說法會唔會太過直接?
所以我揀幫MK, 唔幫黎生

同埋感覺黎生好多次都鬼鬼哋
阻止報警, 聲稱見倒MK, 同埋知道主角同阿美單嘢(主角嘅反應話我知哩單嘢應該冇乜人知)
加上暫時黎講, 團結可能可以增加勝算
或者可以拎倒buff之後有用

呢到啲留言開始好認真好長
好正

我投嘅呢一刻係2個抉擇差一票 好緊張
覺得黎生都有可疑 佢話見到姐 都未必係真

想揀阿美繼續開發感情線

B

團結就是力量呀，信者得救呀

唔好俾敵人略施小計就分化到

樓主講過，唔出post阿美一開始就唔會被「那個人」襲擊。所以有外敵成數好高。

樓主亦都講過，如果MK冇失蹤，佢係會保護阿美。如果依家話MK 襲擊阿美，好似又講唔通。

鬼滅入邊炭治郎打得贏無慘係因為有朋友
哈利波特打得贏佛地魔都係因為有朋友
朋友就係逃出關鍵

解釋係會多左線索去推個角色既資訊，憑呢d訊息我想揀b，但係如果我係大導唔知咁多野就覺得保持懷疑更合理，所以都係揀返a

憑感覺我都會信阿美 好似上面巴打話齋
黎生個pt都係 mk條褸既背面 理據其實不足

直覺覺得兇手仲未出現