返咗近30年摩門教，你問我答(2)

thx 巴打
我係咁問你都keep住答

放心，你見我都係得閒先答。
有人keep住問，先可以畀我自己keep住反思同練習點樣解釋係最易被人明白
多謝你keep住有興趣問添

有問題諗到隨時再問，我好歡迎 有幾刁鑽都可以，或者一啲問題你覺得無答案都可以拎嚟傾下吹下水

巴打，最近YouTube上充斥咗一堆前教友/傳教士離開教會嘅影片同埋對教會嘅批評，你自己會點睇？

利申：純討論，冇惡意
https://youtu.be/aTMsfOcHiJg?si=GJYn4bGuxzDJ4EBS

https://youtu.be/6uicAn4l9z4?si=TbVQ67X4vpGgdZ0X

放心隨便問
我會覺得任何宗教同觀點都有反對嘅聲音。任何立場都有人跟隨或離開。唔使太介意。但有啲離教者會拎我哋視為神聖嘅嘢嚟玩（聖殿崇拜），就唔太尊重囉。個情況就好似一個伊斯蘭離教者拎豬油浸可蘭經／茶落清真寺咁。離教啫，唔需要變到完全唔尊重宗教。

你講呢兩個人我都知係邊個，Johnny Harris比較熟，而個女人，我知佢係乜人，但完全無睇過佢啲片。
我會覺得佢哋研究時嘅立場唔夠全面。佢提出嘅任一個反對嘅觀點我覺得都有反駁嘅地方，同埋佢對創教先知嘅一啲歷史比較膚淺同表面。

例如佢哋有提到一夫多妻個到，反摩門教嘅人一般會好簡單咁話Joseph Smith係因為想搞女人所以創呢個教義出嚟，仲會話JS娶咗幾多女人，啲女人幾多歲咁嚟大做文章。
但反對者無去仔細了解我哋有好充分嘅證據證明JS唔係為咗搞女人。例如佢娶多妻時嘅順序同人選，所有證據都指向佢唔想咁做。

Johnny Harris嘅回應可以睇呢兩條片。

https://youtu.be/39aq69TjNk0?si=jpfGjlgwpgZbBXx4

https://youtu.be/a1WuZu-flZE?si=KVKDd6INI2ib8RG6

我都算好詳細咁研究過反對者嘅論點，如果你想嘅可以一個一個咁拎出嚟傾，會比較集中 放心，只要你係好奇想知，我會好願意一個個主題咁深入討論。但簡單啲嚟講，我覺得大部份嘅反對者都只係一種Dunning-Kruger effect。我人會覺得可惜囉。因為我個人認為LDS嘅生活同世界觀的確係最好。

巴打，我得閒聽返我畀你嘅第一條片，如果你未睇嘅有時間睇下，因為片中個年紀大啲嘅男人叫Don Bradley，佢係個exex LDS，即係離教後因為Keep住研究教會歷史而最終知晒所有嘢後決定重新受洗，重新加入教會嘅人嚟。
你好難會搵到個比佢更熟LDS歷史嘅人。佢對Johnny條片有好多獨有睇法，因為Don經歷過Johhny呢段唔再信嘅時間，最終又再相信，所以佢啲答案同comment都好有參加價值

有興趣
但知自己懶又多物慾
冇信心做到忠信

我個人認為宗教嘅真諦係生命中有個比自己更崇高嘅目的，同埋有呢個渴望嘅心想要達成呢個目標。

如果你有興趣想知多啲或者有問題想問，隨時喺到留言

親巴入黎同你打個招呼

想問你要唔要著果套白色底衫

要，個套叫聖殿加門，Temple Garment。

當一個人選擇接受洗禮時係承諾會承受耶穌基督的名，同遵守佢嘅誡命。但洗禮其實只係同神立約嘅第一步。

洗禮後人可以選擇去聖殿到同神進一步立約，就好似神同亞伯拉罕立約，如果亞伯拉罕承諾事奉神又keep到佢嘅承諾，神就會根據呢個承諾畀祝福佢。同樣我哋喺聖殿到同神立約。

立完約後嘅人係承諾終身穿著聖殿加門。呢套加門係象徵住亞當同夏娃被逐出伊甸園前，神為佢哋用獸皮做嘅衫。套衫都象徵住我哋喺聖殿入面同神嘅承諾。
如果你好仔細咁讀舊約聖經，你會讀到件衫點樣一代代咁傳落去。

其實宗教服飾都唔係叫咩新奇嘅，天主教嘅聖袍、佛教嘅袈裟、猶太教嘅衣等等都係象徵住唔同嘅宗教意義。只不過我哋個套著喺普通衫入面。

聖殿加門對我哋嚟講係好神聖嘅嘢嚟。教會早幾年拍咗呢條1分鐘左右嘅片解釋咩嚟。
https://youtu.be/5vvN4qJRBM0?si=x6qUYVFI1LibeLv5

補充多句，唔係個個都會著，只有入過聖殿同神立過約嘅先會需要著聖殿加門。

親巴 thank you 剛收工先有時間睇
但如果普通人見係有d恐怖。
因為我都係上網睇果d神秘學KOL講先知

聖殿係咪指九龍塘果座？
同灣仔果座同唔同？

其實我覺得係因為啲人唔識啫。如果你有仔細睇舊約聖經就會知聖經都有類似意義嘅服飾。如果覺得LDS聖殿加門恐怖，咁聖經應該都同樣恐怖

可以睇晒出埃及記28章成章，神畀以色列嘅宗教服飾如果你今日著出街都一樣會覺得怪。

出埃及記:28:42 要給他們作細麻布褲子，遮掩下體，褲子當從腰達到大腿。

係，香港得一座聖殿，就係九龍塘個座，呢座聖殿唔對外開放。都唔係所有教徒可以入得。只有真係努力守誡命嘅人先拎到推薦書可以入去。如果你睇返舊約，會幕同聖殿都一樣有嚴格嘅進入條件。

灣仔個間係教會+亞洲區域辦事處。

唔記得咗附圖添

親巴 咁未世聖徒 耶和華見證人係咪=你地？

其實成班人著奇怪衫敬拜係驚架，好似好多年前果d一齊RIP果D有好似成套黑色衫咁

舊約係得利未人先可以入至聖所 如果唔係會比上帝秒……

教會名由1838年4月26日開始就一直叫 The Church of Jesus Christ of Latter-day Saints。呢個名係經由啟示由耶穌基督自己改嘅。因為呢間係耶穌基督嘅教會，而後期聖徒Latter-day Saints就係為咗同古代聖徒（第1～2世紀嘅早期基督徒）區分出嚟。
末世聖徒係Latter-day嘅舊譯名。

耶和華見證人同我哋唔同㗎，除非大家都信三位三體（聖父、聖子、聖靈係三位個別人物）外，我哋幾乎無嘢相似。

咁你未會好驚天主教禮拜或東正教禮儀囉 佢哋嘅聖袍好誇張㗎喎 我可能不嬲都有接觸唔同宗教，反而我唔覺啲衫有咩太特別。都係宗教意義嘅衫。

係呀，至聖所有佢嘅代表性，今日LDS某幾座聖殿都有至聖所㗎。例如我哋LDS起嘅第一座聖殿嘉德蘭聖殿咁，1836年4月3日喺聖殿嘅講壇後，幔子放下分隔出一個至聖所，耶穌基督、摩西、以來加同以利亞分別顯現，應驗咗瑪拉基書3章嘅預言。

另外以我所知仲有猶他州嘅曼泰聖殿、洛根聖殿都曾經有至聖所。目前應該得鹽湖城聖殿有一間真係會用嘅至聖所。

親巴, 認真問, 點解唔可以飲茶同coffee?
同埋你地會唔會有院牧果類駐醫院?

唔飲茶同咖啡其實係嚟自1833年嘅啟示，最初1833年唔係誡命嚟，而係一個健康建議。直到1921年先正式成為每個想拎聖殿推薦書（可以入聖殿嘅許可）嘅聖徒都被期望遵守嘅誡命。
今時今日你飲酒係唔會被開除教藉，但唔會拎正推薦書囉。

智慧語一開始係神畀後期聖徒嘅健康誡命，記載喺教義和聖約89篇，如果有興趣可以click入去睇晒佢。
https://www.churchofjesuschrist.org/study/scriptures/dc-testament/dc/89?lang=yue

智慧語有明確咁講酒、烈性飲料、煙草和熱飲料（茶同咖啡）都應該禁止使用；另外都包括一啲健康嘅飲食建議，最後有服從福音律法，包括智慧語會帶來屬世和屬靈的祝福。

其實神一向有畀人一啲誡命去使屬於神嘅人民同其他人有分別，分別為聖（set apart），亞伯拉罕時代有割禮，摩西時代有避免食不潔之物、衣著規矩甚至幾時可以同唔可以剃鬚（利未記），新約有洗禮同聖餐。
神同樣畀後期聖徒誡命去set apart。

其實智慧語都係一啲喺現代社會每日都遇到嘅問題，喺飲食上提醒自己係聖徒嘅身份。另外都係一個考驗嚟，當一個人受到神啟示畀佢知LDS係神嘅真理時，你會願意為真理犧牲幾多嘢？呢個入門嘅飲食犧牲都可以篩選一啲真心追求神嘅人，分別出軟弱唔願意用行動去信賴神嘅人。

…………

我哋無院牧，基督教最初設立院牧嘅一大原因係假如一個人死前唔係基督徒就會上唔到天堂。畀人臨死前可以悔改受禮。後嚟先開始有咩心理支援之類。

但我哋嘅救恩觀唔係咁，神唔係一刀切。我哋都無臨終前一刻受禮嘅嘢。如果一個人真係臨死前一刻悔改，佢喺後死嘅靈世界會有同樣已經死咗嘅聖徒傳福音，死者會喺靈世界悔改，再由我哋活人喺聖殿到為佢哋執行替代死者教儀。

如果一個人入院想有教會啲人睇，其實搵傳教士/主教就得。正如之前講過，我哋神職人員係不受薪，唔會有人全職喺醫院到。我哋嘅聖職支援係more to on call base。

我就係未見過你地教友黎探病人, 基督教果d好多時耐左就會同你切割, 教友會話有自己生活同家庭就切割, 互為肢體當你長期病冇進展就會切割.
就係想睇下你有冇呢類經驗

咁LDS喺香港人口係比較少，所以都真係無咁易見到都合理嘅。加上傳教士主要傳福音，探病主要係由主教/長老/會長做。佢哋唔會好似傳教士咁有牌，我哋主教又唔似牧師神父有特別裝扮，所以即使主教嚟過你都未必會知。

我真心唔敢講其他基督徒，我唔知人哋探病點。我講返自己認知。我識一個天生好似霍金個煩殘障人士，好非好嘅兄弟嚟。30年嚟教友都每個星期日車出車入幫手返教會。如果佢出席唔會教會都會有人送聖餐畀佢，我自己都送過。真心佩服啲兄弟。

但當然都聽過有人話教友做得未足。呢啲真係大難關嚟。但相對上教會有聖職組織、有婦女為主嘅慈助會，佢哋都會有唔同嘅支援。
但我又相信有基督徒比LDS更加關心人同勤探病。

我就係經歷緊先問下你
就算有血緣關係信主讀乜神學都光速切割.
所以我覺得唔好太介懷拗果d神學章節, 邊度都有hi人. 好熟聖經都可以好契弟

反而冇接觸開既弟兄姊妹仲關心

I'm sorry to hear that
我唔覺得我會做得比其他人好，所以我都唔評論人啦。
如果你只係想呻下，我可以陪你喺到東南西北咩都傾下。
因為呢到係我自己嘅LDS post啦，假如你係想有人探下你，有傳教士拎本摩爾門經畀你睇下，可以留TG，我搵人拎畀你。

親巴多謝您先
我只係覺得香港好多好吹得既信徒真係吹得only

我都覺得自己都係得個吹字㗎咋
但我相信聖徒就係一個不斷悔改嘅罪人