返咗近30年摩門教，你問我答(2)

巴打唔好意思無追晒post
想問你識唔識Utah既Hailey 同Adam
最近有留意呢個YouTuber 發覺呢個教唔係世人所認為既邪教異端 開始有啲興趣想了解多啲

我相信你講緊youtuber莫彩曦，唔識真人，有subscript佢channel。佢老公屋企嘅有錢程度絕對超過一般美國教徒嘅平均水準 城堡屋企真係睇到傻

樓主有冇睇雲海嗰post？
啲留言好激烈

有呀，你都見到，又係我哋無拿拿畀啲「正統」攻擊

疫情之後 lds傳教士仲有冇係街同人傳教 好似好耐冇係街見到

仲有，但人數的確係少咗。唔只香港，全世界都因為疫情而少咗傳教士。

30左右

hello
我有興趣知多d
但有d個人資料
請問可以tg我嗎
@Terre2022
thanks

已聯絡樓上

巴打你好
見你好認真又好耐性回post
好佩服

最近有位教友離教
佢提到其中恩道門儀式係由約瑟斯密加入共濟會後
參考共濟會而嚟
而喺gospel library嘅文章有提及
雖然係參考而嚟
但目的同背後意義完全唔同
嗰位教友提及到話
喺恩道門儀式開始前會播放一段創世影片
但內容同聖經提及嘅有所不同

對恩道門儀式都係半知半解
教會入面好似對儀式都好神秘唔會特別解釋
聽完嗰位教友講之後有啲好奇

所以想請問巴打會唔會方便講下恩道門儀式
同埋對上面嗰位教友嘅說法嘅睇法
唔該你

講共濟會先啦，雖然現在共濟會係講緊1717年成立，但最初共濟會出現其實係同石匠有關。
我聽過嘅共濟會相傳係由聖經嘅所羅門王興建聖殿嘅時候就係搵咗freemasons，因為佢就係最好嘅石匠。
咁我哋相信古代聖節同現代嘅聖殿做嘅嘢其實都好類似嘅，freemansons承諾幫手興建聖殿時，亦都要求所羅門王將聖殿秘密話畀佢哋知。即係換個角度嚟睇，所羅門王由神得到恩道門，傳畀共濟會，源頭都係嚟自神。

另外教會成立初期有好多人都係共濟會成員，老實講，如果你有研究過共濟會，根本就唔係啲咩邪惡組織。咁神好多時會根本人嘅傳統去傳遞真理，例如猶太人用橄欖樹無花果樹咁。既然教會初期好多教友都係共濟會成員，咁用返共濟會嘅手段去傳達真你都係好正常不過。

最後，恩道門裏面提到嘅創世，同聖經唔係話有出入而係有更多資訊囉。講真對於我哋後期聖徒嚟講，有更多嘅創世資料都唔係第一日嘅事啦。摩西書？亞伯拉罕書？呢啲已經係更多資訊。

你講個位教友我知佢係邊個，人我就唔評論啦，但佢有嘅問題每個我自己個人都認為好合理嘅解釋。佢唔接受未唔接受囉。人係自由嘅，佢去選擇佢鍾意信嘅嘢囉。

加多兩句，佢講嘅恩道門真係咁神秘咩？共濟會教儀同恩道門教儀早就喺youtube隨便睇啦。youtube都search到啲嘢，神秘啲咩？
我個人睇法係咁嘅，恩道門入面的確有叫我哋唔好隨便分享，唔係因為佢神秘，而係因為好神聖。神秘嘅話教會會花咁多資源去傳教同準備人入聖殿？講笑咩？
正如上面講，恩道門隨隨便便都可以喺網上搵到，佢爆啲喺youtube都搵到啲料仲算唔算爆料呢？我真係唔識講啦……但我個人認為神將恩道門畀人去保守秘密，原意唔係為保住個秘密，而係試下你呢個人可唔可信。又係你自己向神承諾唔講，轉個頭就爆響口，咁你呢個人仲值唔值的神相信呢？
如果你係教徒/認為自己有一日會入聖殿拎恩道門，我會建議你唔好search youtube搵，正如耶穌嘅比喻要用靈性去理解，你放棄去聖殿接觸恩道門而係去youtube接觸，會失去成個比喻好多嘅意義。

稍為有清晰啲
多謝巴打嘅回覆


但點解教會一直都好神秘咁唔公開講恩道門儀式嘅內容

唔識嗰位教友係無意中得知先見到
但多唔多教會嘅人討論嘅依件事

原來上面巴打你覆咗
感謝你！

睇完佢講之後
覺得自己真係有好大必要非常需要咁
繼續做多啲研讀等自己再了解啲

睇返聖經，其實都有好多嘢係唔講，例如耶穌釘十架前喺變型山所發生嘅嘢（路加福音:9:36 ），出埃及記會幕入面嘅至聖所之類。
連喺其他宗教，根本都一樣，好多嘢唔會公開講。人只能夠學習佢準備好學習嘅嘢，正如聖經呢到講
哥林多前書:3:2 我是用奶餵你們，沒有用飯餵你們，那時你們不能吃，就是如今還是不能。

我會咁講，要用懷疑嘅心去學每一樣嘢，但用一嘅呢個懷疑之心要應用喺所有嘢入面。例如個位前教會用懷疑嘅心去質疑摩爾門經同亞伯拉罕書，which is good。但佢用一個我會話非常膚淺同雙重標準嘅方法就落定論。因為如果用佢同一標準去分析聖經，聖經前5本書就已經過唔到關，要畀佢定義為假。
而我自己自問好深入咁研究完，只能講我認為呢間教會係真嘅機會大過假。

巴打多謝你

真心好佩服你會有咁認真嘅求學精神

追過post見你話十六歲自己主動深入研究
但嗰時係洗咗禮定未洗禮

我教會家庭長大，但16歲係認真想知呢個世界到底有冇神，同返開間教會係咪真。
我個人接受到自己錯，但接受唔到自己雙重標準去睇嘢/信一樣嘢。開post到而家5年嚟我都有學到新嘢同轉變，但結論依然都係呢間教會真嘅機會大過假。

再多啲有趣聖經經文，可以睇晒加拉太書1同2章，免得畀人話我斷章取義，呢到係保羅講述佢成為使徒嘅經過，第1章講佢成為信徒3年後去到耶路撒冷被召做傳教士，第2章講14年後成為使徒。咁呢到講嘅「右手行相交之禮」會係啲咩呢？會唔會就係講緊聖殿入面嘅嘢？死人洗禮呢？
Again，成本聖經都充斥住「神秘」嘅，但又唔見佢投訴㗎喎

加拉太書:2:9 又知道所賜給我的恩典，那稱為教會柱石的雅各，磯法，約翰，就向我和巴拿巴用右手行相交之禮，叫我們往外邦人那裡去，他們往受割禮的人那裡去。

哥林多前書:15:29 不然，那些為死人受洗的，將來怎樣呢？若死人總不復活，因何為他們受洗呢？

錯手負評咗
多謝你嘅解答

見嗰位教友又提到全視之眼同共濟會嘅關連
因為佢嘅立場係覺得共濟會係邪惡組織
而佢哋其中嘅標誌係全視之眼
所以當鹽湖聖殿嘅設計用到全視之眼
就係好似教會同共濟會有好大關連
同等咗教會都好似係邪惡組織咁

而喺依度我又嘗試搵多咗關於共濟會嘅資料
共濟會嘅教義又好似真係有啲奇怪(?)
例如佢哋會忽略救主耶穌基督係救世主
而佢哋亦唔會喺禱告提到耶穌基督嘅名
又或者係耶穌基督係眾先知之一

喺睇完之後
比起共濟會係咪邪惡組織
更多嘅感覺係異端
但又有好多宗教打壓咁
想請問喺巴打你理解嘅角度共濟會係一個點嘅組織？

而至於聖殿用到全視之眼嘅原因
喺摩爾門經亦有提及
好似喺尼二9:44/雅各書2:10/摩賽亞書27:31 等等
都係講到神會以銳利嘅目光注視我哋
所以全視之眼喺聖殿嘅出現只係好似經文所講
並唔係同共濟會有關
請問可唔可以咁樣理解作聖殿設計有全視之眼嘅原因？

不過正如好似之前巴打提到
教會成立初期都有好多成員或者一啲政客係共濟會
喺打後教會嘅成員同共濟會都續漸無關連
所以話因為有成員曾經加入共濟會
而到依家教會同共濟會有關連
又好似過於牽強

都係嗰句
自己都係一知半解
甚至係嗰位教友講多咗先至知原來有一回事
上面又打到1999咁
所以都係想同巴打請教下

個位教友應該要深入研究一下共濟會由來，成間共濟會都係用早期基督教嘅嘢關連出嚟，包括全視之眼都係聖經到出嚟。
我理解嘅共濟會只係一個兄弟會，共濟會本身無一個特別嘅神去宗拜，你要入共濟會只需要相信有一個higher power就得。我傳教時其中一個朋友嘅爺爺就係喺猶太洲共濟會嘅Master Freemason，佢哋根本就冇咩嘢好做。佢爺爺死個時有成班共濟會人嚟慰問，話會照顧佢屋企，但喪禮後從來都無出現過。
我對個位教友嘅評價就係咁嘅，佢提出嘅質疑全部都係好低層次嘅問題，亦有好多教會喺呢個層次就接受唔到，放棄信仰。但點解會話係低層呢？因為佢嘅問題基本上就係類似啲人質疑進化論時問「如果進化論係真，咁點解而家仲有馬騮？」
共濟會有關嘅可以睇下下面兩條片，第一條簡單講教會同共濟會關係，特別提到恩道門。另一條冇記錯係一個共濟會成員同時又係教友嘅人講有咩嘢係似，有咩唔似。
https://youtu.be/PhjBefSrqnE
https://youtu.be/9IX1wb9bJ5k

我就大概跟返個位前教友對教會嘅控訴作出簡單回覆啦。
1. 恩道門令人是否不安真係好主觀性，有人見到聖餐枱就感得不安，我無能力改變，所以唔評論。我個人因為去聖殿恩道門前已經有研究過好多宗教，包括相傳古時所羅書聖殿嘅「恩道門」做同講乜嘢。整體同現時教會做嘅真係好似，係似到好神奇。你話約瑟係靠估出嚟嘅機會大定真係神啟示嘅機會大？我覺得係後者囉。
另外聖殿使用大量嘅象徵來表達同教導真理，呢條片有詳細解釋。
https://youtu.be/2TLwFmhRjUY
2. 共濟會方面上面講過好多資料，就唔重覆啦。只能講現代共濟會係抄好多古代基督教嘅嘢（嚟自神），而相傳古時共濟會係由所羅門聖殿得到啲「秘密」（都係嚟自神）。所以現代聖殿做啲嘢似共濟會即係間接講緊似古代基督教同埋所羅門聖殿。
3. 亞伯拉罕書，呢個要好詳細先講得清，呢到有片可以講到好多重點。簡單講第1就係現代古埃及學者拎住嘅埃及卷根本就唔係教會宣稱嘅亞伯拉罕書。教會當年係買咗木乃伊、一埋古卷。當中有一卷係叫長卷，約瑟宣稱亞伯拉罕書係喺長卷到。但 芝加哥大火後長卷已經被燒毀，現時任何一個人話古埃及學者翻譯咗亞伯拉罕書嘅話佢一定係講大話，因為最少教會宣稱嘅長卷已經唔存在。
另外啲古埃及圖畫雖然好有趣，佢周圍嘅字的確唔係亞伯拉罕書嘅內容，古埃及人好興圖文不符咁用啲圖，我個人最好嘅猜測就係亞伯拉罕唔識畫畫， 咁咁啱呢啲圖畫可以描述到佢想講嘅嘢，就直接借人哋啲圖畫嚟用。啲圖要配長卷先會有意義。而教會都從來無宣稱過個啲字係亞伯拉罕嘅內容。
https://youtu.be/I11WGlmkyKE
4. 佢話摩爾門經搵唔到任何考古證據，事實上就的係有，不過佢唔知。
https://youtu.be/kGSEBwZMpsA
佢提到印第安人DNA，但摩爾門經從來都冇話過所有嘅印第安人都係以色列血統（ 稻草人謬誤）。
第一次異像有三個版本就因為約瑟係三個唔同嘅時間佢要講返同一件事。 情況就好似如果你接受訪問，將你嘅畢業典禮描述一次，三年後接受另一個人嘅訪問講多一次，十年後後再講第二次。當中細節必要會唔同。
https://youtu.be/RGJ0aFO6nbo
5. 一夫多妻，約瑟的確有40個老婆，而最細嘅的確係14同19歲，但你又知唔知約瑟同佢第一位妻子生咗幾多個小朋友？係9位，其中只有3位長大成年。好啦，183x年世上無避孕嘅情況下，一個有繁殖能力嘅男人如果因為想搞多幾個女人而娶40個老婆，其中最細嘅有14同18歲少女，你估下佢嘅多妻制39個老婆為佢生咗幾多個小朋友？係零。咁我哋就不禁要思考呢個多妻真係為搞女人？真係有搞到？BTW，聖經中嘅亞伯拉罕、雅各、以撒、摩西等等都係多妻者。如果佢哋上到天堂（相信無基督徒會質疑亞伯拉罕上到天堂，因為……
雅各書:2:23 這就應驗經上所說：『亞伯拉罕信神，這就算為他的義。』他又得稱為神的朋友。
加拉太書:3:6 正如『亞伯拉罕信神這就算為他的義。』
加拉太書:3:9 可見那以信為本的人，和有信心的亞伯拉罕一同得福。
路加福音:16:23 他在陰間受痛苦，舉目遠遠的望見亞伯拉罕，又望見拉撒路在他懷裡。
馬太福音:8:11 我又告訴你們，從東從西，將有許多人來，在天國裡與亞伯拉罕，以撒，雅各，一同坐席。），咁多妻者都上到天堂，請問多妻喺神眼中問題喺邊？對不對？

真係的啖笑

除咗上面啲新資料，我知你對思道門好好奇，呢條片其實真係解釋得好好。你睇完唔明可以再問我。教會其實真係無將呢啲整到好神秘，去過恩道門嘅人都知呢條片其實已經講晒會做啲咩，同點樣做。
https://www.youtube.com/watch?v=_NfYAIKqGMs&ab_channel=SaintsUnscripted

當留嚟畀自己之後refer返，娶14歲女仔問題可以無大家想像中咁大。https://www.youtube.com/watch?v=gyl-5-01DDA&ab_channel=SaintsUnscripted

共濟會同聖殿關係
https://www.youtube.com/watch?v=PhjBefSrqnE&ab_channel=SaintsUnscripted