返咗近30年摩門教，你問我答(2)

摩門教嘅一夫多妻同福爾摩斯講個間應該係唔同宗教嚟，最多係摩門教分支。
另外已經有教外內人好深入咁研究摩門教嘅一夫多妻，只能講你可以唔認同，但有參與嘅人都係自願無強迫。
如果多一本先知寫嘅書就邪，咁基督教由猶太教嘅舊約聖經到加咗新約加咗26本唔同人寫嘅書又邪唔邪……

咁講其實無咩意思，猶太教夠唔承認耶穌係彌賽亞同你個26本書。
你會唔會care猶太教所有教派都唔承認你新約個26本書？

你可以唔承認，但你承唔承認唔會令一個宗教係唔係邪。

套用返個概念畀你睇下個邏輯係點，
主流基督教 aka 天主教、正教、新教（歷史較耐嘅同根嘅宗教）唔承認摩門教（較新出現同時自稱同根嘅宗教）同埋佢嘅新經文（摩門經）同埋佢嘅宗教領袖（約瑟・斯密、百翰・楊等）。

vs

猶太教（歷史較耐嘅同根嘅宗教）唔承認基督教（較新出現同時自稱同根嘅宗教）同埋佢嘅新經文（新約聖經）同埋佢嘅宗教領袖（耶穌、保羅等）。

巴打你好，想請教一下： 我身處外國，有本地年輕LDS 傳教士上門傳教，佢哋都年輕健談，已經嚟過兩次。 想問吓應點樣拒絕佢哋令佢哋唔再上門呢？

如果你講緊要完全無人上門嚟敲你對門就無可能㗎啦，拒絕佢哋好單純話「Thank you but not interested」傳教士就好自然會ok bye bye

好呀，多謝你嘅回覆

巴打睇你PO令我多左好多對教會嘅認識
好多謝你咁有耐心嘅解答
Btw 你話犯罪者都會去星榮（一個都算好好嘅地方），我想問嘅係其實咁樣公平咩，例如某種職業都可以入呢個地方

PS其實我都係教二代，不過對教義冇好深嘅認識
我都冇乜好深刻嘅見證令我好確信神，但係由細返到大令我係有需要嘅時間我又會尋求神嘅幫助（有啲有事鍾無艷無事夏迎春嘅feel)

希望咁夜唔好打攪到你

多謝賞識先
我明你講咩，但其實我覺得係公平嘅，因為每一個人嚟地球前都係嚟自天庭，當然呢到我哋真係唔肯定係咪指緊日月星榮國度定另外有前生嘅特別地方，但最少所有人都係嚟自神。
咁去星榮都只係返返天庭，你當日月星榮全部都係天國嘅一部份但唔同榮耀啦。

有時我哋會好武斷去判斷某啲人好衰，但今生係一場考驗嚟，而且用某啲角度睇係一場好難嘅考驗嚟添，好多人一生喺唔同環境長大，會好影響佢嘅人生觀。我個人相信今生打生打死嘅仇敵，喺死後復活返到天庭有返前生記憶同對神完全嘅知識時就會發現，其實今生所有嘢都唔係咩大件事，就好似兩班朋友打機咁，打緊就緊係要殺死對方（當LOL，PUBG咁啦），但打完都係朋友嚟。當然呢個係我個人觀點。

你qoute完出嚟我先發現，我將低榮Terrestrial同中榮Telestial調轉咗

點解摩門教啲鬼佬，廣東話咁流利？佢地學左幾多年？

佢哋喺美國猶他州嘅一間傳教士訓練中心學9個星期廣東話。
但呢9個星期唔係單學廣東話，仲有去習慣傳教士生活，例如早睡早起、點樣同人簡單咁分享福音、做家務、每日讀經文等等……

咁9個星期係唔足夠講得一口流利廣東話嘅，所以呢9個星期係集中喺一啲基本功，令你有足夠知識去到香港後繼續自學。
所以啲傳教士一嚟到香港其實都唔太識聽同講，都係要時間浸出嚟。你喺街見到好流利個啲，一般係已經喺香港最少一年嘅傳教士。

最後就係一個人學語言嘅目的好影響佢嘅學習速度，例如你細細個喺學校學英文，你根本就唔想學／學完都用唔到，就自然學得慢。但傳教士係好想可以同人講廣東話咁分享福音，佢哋唔只想講到，仲係想講得好流利。
某程度上佢哋係相信神特別召喚佢哋去服務同照顧呢個特定民族，所以好多傳教士仲會深入去學習呢個民族嘅文化同歷史。
咁個心態都完全唔同，所以學得快同流利都好合理嘅。

I see.....以前曾經諗住跟佢地返教會，目的係想將佢地快速學中文嘅方法，套落學英文

其實係work，但心態好重要，有冇咩原因令你有好強烈嘅渴望令你短時間學識英文？唔好忘記傳教士都好努力學，當大家搭車睇緊手機個時，佢哋可能係一路背緊啲單字。
最少我做緊傳教士個陣真係一路行一路背，不過香港啲傳教士的確係勁，我做完傳教士時啲本地話都無佢哋啲廣東話咁好

因為鍾意英美文化


Btw, 其實如果你申請去美國傳教，教會幫唔幫到你移民美國？

唔會，傳教還傳教，移民還移民。
而且去傳教無得申請去邊，係教會派你去邊就去邊。

同埋如果你目的係英美文法同移民，咁其實同入唔入教會無關。
例如：
你要去英美，而家咁多新移民方法同簽證，唔需要經教會啦。
要日日同外國人傾計，買機票飛過去喺街同人傾就做到，唔需要經教會。
去讀書雖然係有教會大學，但你唔需要成為教徒都入到教會大學，你考入去再畀錢讀就得，你做傳教士／教徒唔會令你可以免費去讀教會大學。
加上傳教係2年嘅工作嚟，仲要係自費嘅添，2年隨便搵份工都過萬幾，你去傳教士即係放棄緊2年嘅工作經驗同埋最少24萬港幣，仲要無人保證你考到入教會大學

所以你真係想因為移民去信教／傳教？

傳教士係自費嘅義工嚟，我哋連地區神職人員同絕大部份嘅全球神職人員都係義工嚟

你去到英文無嘢做去做傳教士會連食都無得食 就算你真係做到，傳教士年齡只係18～25左右，同埋只可以做2年。唔係職業嚟，係服務嚟

我估你第2段講緊復活？

我先唔排除傳教士真係講錯字，因為佢可能仲係新人，廣東話唔好用錯字。
但有另一個方能佢真係講緊「復興」（Restoration），如果我要將復興簡略到成一小段說話話，就係：

我哋相信耶穌基督復活升天後將佢嘅教會交畀佢所召喚嘅使徒去管理，仲將一啲重要嘅聖職權柄交咗畀使徒。後嚟人將佢所召嘅使徒一個個咁趕走／殺死，令呢個權柄喺世上消失。
但神已經再次召喚活著嘅先知使徒，當初耶穌親手建立嘅教會已經從新建立於世。

唔係拗，而教會真係用呢隻字
我哋教會傳嘅就係「耶穌基督復興的福音（Restored Gospel of Jesus Christ）」
呢隻字Restore／Restoration教外人好少用，加上中文更少人用
呢個封面係我哋教會用嘅小冊子


我都經歷過學外語咁傳教，所以我覺得佢有機會講緊個樣都唔定，都係合理推論啫。

去過香港同歐洲幾間靈恩派聚會，好多人大嗌哈利路亞，除此以外佢哋牧師講聖經講耶穌嘅教導覺得無咩嘢，大家都係學習緊點樣更加似耶穌。

去過香港幾間福音派聚會，牧師叫人企出嚟立志信主，再用主點頭頂就話洗咗禮，當然都係講聖經。

去過歐洲東正教聚會，唱歌同神職人員主持嘅儀式為主，復活節特別聚會超正，會將象徵耶穌復活嘅光（ 蠟燭上嘅火）傳開畀身邊嘅人，好有feel。

去過歐洲耶和華見證人聚會，都係講聖經同佢哋對聖經嘅理解，無偏見嘅話同靈恩福音派無咩分別。

去過香港天主教堂好多次，但無參加過聚會。

======

分別一定有，我哋無地區職業神職人員，包括主教到香港距區會長都係無薪義工嚟。
講道相比之下更加人性化，著重點解將信仰應用喺生活到，讀經課程方面有一定總會課程書指引，但都好自由互相分享。

聽過佢哋教會但從來無認真研究，所以唔知你講緊嘅「將基督徒被提同曼德拉效應」扯上關係係咩一回事。個人對佢哋無咩大興趣，但如果你有好明確嘅主題我都可以就住個個主題講下我哋教會有咩睇法