「唔好擋住我呀!」我對住佢大嗌,
「你呢班人……根本唔值得俾人拯救!」
大概係感受到我眼神嘅殺意,美藉華人被震懾到向後退一步。
「拯救?」Fiona望住我講,「你哋所講嘅半個鐘早就已經過咗……根本咩事都冇發生到。」
我抹一抹嘴唇旁邊嘅血,望返去Kathy嗰邊,只見佢都係一臉不解咁望向我。
「事實勝於雄辯,你哋……」
Fiona講到中途就冇講落去,轉身望去旁邊嘅工作間,雙眼睜得好大……
雖然喺呢邊冇辦法知道佢睇到咩啲,但我感覺到一陣可怕嘅寒意,直捲全身。
「啊啊啊啊啊啊啊啊!!!!!!」
就喺下一瞬間,四眼仔突然慘叫起嚟……所有人嘅目光都從Fiona身上移過去。
呢刻,四個仔整個下半身陷落喺地板以下,就好似有乜嘢喺下面強行將佢扯落去。
佢不停用雙手掙扎,感覺就好似喺海上面遇溺咁。雖然成功抓住座椅椅腳,
但最後都係鬥唔贏嗰一股「力量」,成個人被扯落去。
成件事實在嚟得太突然,冇一個人反應得切去幫佢……
「成功喇……」Fiona開聲講,佢露出期待已久嘅狂熱表情。
「……今次我哋一定可以到達目的地。」
猶如打開咗潘朵拉盒子一樣,「絕望」開始喺整個客艙爆發起嚟。
(待續)
位置圖:(完集時)