望一望四周,呢刻後面艙間(59至71行)已經冇哂人,
但前面艙間(43至57行)就比起我離開嘅時候多咗幾個人。唔計阿琪佢哋,
最有印象就係張議員……呢刻所有人都係望住我哋呢邊。
「咦?」老陶注意到我旁邊嘅阿響,「你隻腳係咪傷咗?」
「係……」阿響回應,自從遇到首領之後佢就一句聲都冇出過,「你哋有冇人可以幫我止血……」
「我記得機艙最後有個醫療箱。」老陶回應,「但唔知有冇人識止血同包紮……」
「我有學過,」Kathy回應,「或者可以幫到手……」
「咁就靠妳喇,」老陶望返過嚟,
「Rex,要再辛苦你多陣扶佢過去,我同Fred要守住呢度。」
「嗯。」我冇拒絕到,再同阿響講,「你頂多陣。」說罷,
開始扶佢去機尾嘅位置,而Kathy就跟喺我後面。
事實上,呢刻我嘅心情已經放鬆唔少。既然班掠博者冇追上嚟,最後呢一段路根本唔係咩大難題……
最重要係呢度仲係安全,其他事可以先擺埋一邊再處理……
碰!
但就喺下一刻,身後突然傳來一聲悶響,係機艙門關閉嘅聲音。
我哋幾個即刻擰轉身,只見老陶同Fred都一臉疑惑,盯住艙門……
「我哋咩都冇做到……」Fred慌張咁講,「道門就係咁自己關咗……」
「係唔關你哋事,」一把女聲由服務員工作間傳嚟,係空姐Fiona,
「艙門之所以會關,因為要嚟嘅人都已經嚟齊。」