「地下有條血路,」就喺下一刻,張議員企起身指住走廊地毯,
「一直通去後面……唔通殺死個後生仔嘅兇手就喺機尾?」
「唔係嘛?」剛才嗰位中年阿姨聽完即刻企起身,旁邊嘅一男一女都有差唔多嘅反應,
喺佢哋附近嘅公公婆婆就表現得非常困惑。
而同一時間,美藉華人亦都帶阿媛過到嚟呢邊艙,Fiona亦都出現喺另一邊。
「冇錯……肯定係咁,我一早就話飛機裡面有其他恐怖份子!」
張議員加重咗語氣,「而家真係死人喇,你哋肯信未!?」
「就算信又點?」軒少回應,原來佢冇加入到Kathy佢哋嘅討論,
「而家架機俾佢哋挾持緊,根本冇嘢可以做。」
「有……我哋可以進行談判!如果班恐怖份子嘅目的係想殺哂我哋或者搞恐怖襲擊嘅話,
一早墜機或者搵地方撞就得啦?點解要搞咁多花神?」
講到呢度,佢轉身望過去Fiona度,「你哋到底想要啲咩?錢嘅話,
我相信中央同香港政府會盡量滿足你哋嘅要求……
但如果你哋再繼續殺人,成件事就唔會有彎轉,你哋咩都唔會得到。」
企喺艙門旁邊嘅Fiona一聽完,忍唔住冷笑一聲,並冇回應。
「算鳩數喇!張議員!班賤人喺度恥笑緊我哋呀!」鄉音阿叔怒吼道,
「真係唔發火就當我病貓!既然係咪都要死,我寧願同佢哋攬住一齊死!」
說罷,佢嘗試喺儲物櫃裡面睇下搵唔搵到武器。
「呢位先生,你冷靜少少……」
「我就係太冷靜!先會害死陳伯!」
事態發展開始急速變化。冇辦法開聲嘅我越坐就越焦急……
到底Kathy喺度計劃緊啲咩?唔通佢喺呢刻先決定改變主意?
「我哋只可以用談判呢招……」
「殺死哂佢哋就唔需要!」
「你咁樣係會害死哂我哋!」
「各位!」終於,Kathy開聲了。「我有件好重要嘅事……請大家認真聽我講。」
爭吵聲停了,見所有人都靜哂,佢繼續講落去,
「頭先……正確嚟講係我哋醒返之後,我收到一個短訊……」
而家呢個畫面就同當時Fred嗰陣差唔多。
Kathy應該想用近似嘅模式,增加成件事嘅可信性。
呼……我突然有種鬆口氣嘅感覺。但老實講,就算Kathy真係臨時反悔我都唔會睇佢唔起,
更加唔會責怪佢,換轉係我都有可能咁做。