四百九十七
多得秋兒姐姐果一吻,我等放榜既緊張感完全消除晒了。
「熙熙,唔駛緊張架。」可能係見我出左門口之後一路都冇出聲,老豆以為我因為放榜而緊張。
其實我只係仲沉醉緊響啱啱秋兒姐姐果一吻度。
只係錫面都夠我甜成咁。
可能呢啲就係愛情。
唔怪得我以前扑女又或者拍拖果陣就算錫咀都好,都冇果種甜甜蜜蜜既感覺,因為我同啲女本身就冇乜愛情基礎可言。
就算淇淇都唔例外。
我響度諗緊愛情哲學,老豆就以為我緊張到唔出聲,於是再開解我:「熙熙,老豆有聽秋兒講過你好比心機去準備呢次會考,所以就算真係考得唔好,老豆都以你為榮架。」
「老豆,我知道喇。」再唔應老豆佢真係會以為我緊張架。
啱啱就真係有緊張既,但秋兒姐姐錫完我之後就得返甜蜜既感覺咋。
不過我個樣似緊張到出唔到聲咩?
「就算升唔到學既,學返一兩門手藝,日子咪一樣咁過到,行行出狀元啊…」老豆仲響度自顧自咁鳩UP落去...
*
因為老豆係咁催既關係,所以我地其實係早左出門口,我返到課室既時候,阿必、淇淇佢地都未到。
佢地會約埋一齊?
我響課室入面靜靜咁等待,而老豆就同其他家長一樣響課室出面等。
我今日著左便服,但我見有同學係著校服返黎,好似話咁樣扣門搵學校顯得有誠意啲喎。
而課室入面其他同學似乎係一早約埋一齊返黎既,佢地返到課室之後都圍埋一齊有講有笑,成個課室得我一個孤零零咁。
間中都有同學同我打招呼問候兩句,但……僅此而已。
老豆會唔會以為我冇朋友架?
……
咁我真係冇朋友。
我望出去課室靠走廊果排窗一望,正好同老豆對望左一下,佢向我微笑點點頭,想鼓勵下我。
呼,好彩佢乜留意到啫。
等左一陣,我見到阿必、淇淇佢地四個仲有兩個男同學(我認得係阿必以前響E班既朋友)總共六個人著住便服咁響走廊末端出現,淇淇見到我老豆,表情好似有啲複雜,但都係有同我老豆打招呼。
忍者欣同八婆儀經過既時候都有同我老豆輕輕點頭打招呼講左兩句。
奇怪,乜佢地識架咩?
(作者按:佢地響醫院果陣有一面之緣,但當時余正熙啱啱做完手術仲訓緊,所以唔知發生過呢件事。)
阿必就完全唔理我老豆,同兩個朋友道別之後就直接大搖大擺咁走入課室,望都冇望過我一眼。
咁先叫正常架嘛。
啊…
其實我唔想咁樣架,不過阿必係要咁我都冇辦法。
之後淇淇都入埋黎,同樣係對我視而不見。
唉。
我諗佢都係仲未原諒我……
不過話說回來,我都係睇唔出阿必、淇淇同八婆儀佢地三個除左朋友關係之外,仲有冇其他進一步既關係。
佢地啱啱行入黎響走廊時既表現同以前好似冇分別,只係成日一齊玩既朋友咁。
......
其實係有分別既。
就係冇左我。
唉,如果我冇同淇淇一齊過就好喇。
......
又或者其實應該係自己可以一早成熟啲去處理所有野就好...
我就係咁響度胡思亂想,直至到班主任Miss Chan拎住一大疊會考成績表走入課室。
頂,本來因為秋兒姐姐今早果一吻同埋胡思亂想所以已經消除左既緊張感又返來了。
Miss Chan行到去老師枱前將會考張成績表放低,然後掃視一下全場既同學,開始講廢話:「今日係你地人生中第一個最重要既日子,有啲同學會考得好,都有同學可能會失左手,但其實唔緊要,因為你地既人生仲有漫漫長路...」
真係廢話來的。
而且咁長篇大論我都冇乜心機聽,我偷偷地望過去淇淇,佢正一臉認真地聽緊Miss Chan講野。我再望下阿必,條友竟然訓撚著左,真係吹鳩脹。
「...好喇,講左咁耐,希望大家一陣收到成績表既時候,考得好既固然唔好驕傲,考得唔好既都千其唔好氣餒。我而家會順住學號去派大家既成績表,大家聽到名既就過黎我呢度拎成績表喇。」Miss Chan終於講到重點!
「歐永洋。」
歐永洋好緊張咁起身,然後戰戰競競咁行出去。
然後一拎到張cert,目無表情咁行返自己坐低,突然雙手掩面,唔知係咪喊緊。
頂,一陣我會唔會都係咁?
(待續)