葉開葉開
2022-12-30 14:33:52
四百七十四
「多謝妳話左咁多野比我知。」我向遙遙誠心道謝。
儘管心情仍然很爛。
「你知道自己應該點做喇?」遙遙向我笑道。
「我知架喇。」故事既結局由我決定。
我唔知我黎緊決定做既野啱啱,但未試過就咁樣放棄,我係唔會甘心。
我呢幾年傷左唔少人既心,好多野都已經無法彌補到,但至少我希望順返自己既心意,可以補償返秋兒姐姐比我帶黎既傷害。
「點解……妳要咁幫我?」臨走前我忍唔住問。
「反正我想作為一個偵探磨練一下,再講我又睇唔過眼舅父果種拜金既態度,」遙遙笑了笑:「咪當係你比左一個機我體驗一下點做我心目中果種形象既偵探囉。」
「妳唔覺得我好人渣?」諗起呢幾年我成個人型自走炮咁,連自己都覺得自己人渣。
「你咁靚仔,有女仔鍾意幾奇?」遙遙講呢句果陣好似有啲面紅,旋即又道:「係你唔知自己想點啫,所以我而家咪幫緊你同你家姐囉。」遙遙又笑一笑:「一腳踏幾船果啲先叫人渣啊,你又唔係咁。」
係咩…
雖然我又真係冇同一時間同幾個女仔拍拖,甚至乎每一次同啲女做愛都係妳情我願,我完全冇偷呃拐騙……
但係我覺得縱慾濫交既行為都好大問題啊…不過我諗遙遙應該查唔到呢part……
如果佢知道,又會唔會當埋我係人渣呢?
「你快啲去喇。」遙遙望一望自己隻手錶:「你家姐返夜,就黎夠鐘收工架喇。」
我點點頭,唔再猶豫,轉身離去。
「喂余正熙。」
「唔?」
「加油,你一定得架。」遙遙向我豎起隻母指。
「多謝!」我轉身推門而去。
*
我知我電話係咁響、同時都知道一定有人搵過我,send訊息比我,但係我完全無暇去分心顧及佢地。
甚至雖然啱啱同淇淇分左手,但呢一刻我個心已經冇空間去掛住佢。
因為我成個心、成個腦都係秋兒姐姐。
我甚至乎冇鋪排過我一陣應該要點講,只係好想比秋兒姐姐知道我既心意、比佢知道其實佢冇誤會過,我真係好鍾意佢既。
我直接衝左去B's Cafe樓下,仲趕得切響佢收鋪前趕到。
B's Cafe係一間樓上Cafe,我就咁企左響樓下門口隔離,挨住牆等。
好神奇,呢一刻我冇任何緊張既感覺,甚至乎連早前既得知事實既震撼、同淇淇分手既痛心感覺,都暫時感覺唔到。
我淨係想將我心入面既感受講晒比秋兒姐姐知。
唔知等左幾耐,我見到秋兒姐姐同另一個女仔緩緩咁由大門度慢慢行出黎,冇望過黎我呢面,似乎發現唔到我。
「秋兒姐姐!」我向佢叫左一聲。
「唔?熙熙?」秋兒姐姐驚訝地望住我:「點解你會響度既?」
我諗起當年會考秋兒姐姐響麥當勞放工既時候見到既表情係又驚又喜,同而家單純既驚訝唔同...
可能,有啲野變左,就真係變左,返唔到轉頭。
只係...
個故事一日未結局,我都仲可以改寫到個結局既!
「我特登黎等妳收工架。」我回答秋兒姐姐:「有啲野我想同妳講。」
或者係我既表情太認真,秋兒姐姐意識到我講既應該係重要或者嚴肅既事,所以佢微笑地向佢同事講左一句:「阿宜,妳走先喇。」
阿宜都好識做,望左我一眼之後就點點頭:「咁……好喇。」
「聽日見喇。」秋兒姐姐向阿宜揮手道別。
阿宜走左之後,秋兒姐姐望住我:「熙熙,你有咩想同我講?」
秋兒姐姐有啲微笑咁望住我,但我睇唔出佢究竟佢係咪真係笑緊。
不過我唔理咁多,我行上前,開口:「秋兒姐姐,我鍾意妳。」
秋兒姐姐望住我,面上既笑容有啲僵硬:「下?」
「我話,我好鍾意妳啊,秋兒姐姐!!!!」我大大聲咁講出黎,我望到阿宜響秋兒姐姐身後望左我地呢面一眼。
「喂,熙熙,你傻左啊?」秋兒姐姐將我拉向阿宜既相反方向,去到一個靜靜地既街角先放開我。
「冇啊,我講真架。」我望住秋兒姐姐,將心入面既說話一次過講出黎,完全冇緊張既感覺:「我鍾意妳...由唔知幾時開始,我已經鍾意左妳。
「諗返起...可能係響細細個既時候,我已經鍾意妳鍾意到無法自拔...只係我自己察覺唔到。」
(待續)