我和鄰居大姐姐的故事（18）

之後返學日日要見到阿熙一定好難過

一定

四百六十八

「嘩妳咁直接問既？」我有啲驚訝。

「Girls talk係咁架喇！」

「乜係架咩？」

「喂你係咪想聽架？」遙遙微嗔道。

「係……係，Sorry。」我其實都好心急想聽（雖然我已經由報告入面知道結果），但唔知做乜鳩驚訝得滯打斷左遙遙發言：「咁……秋兒姐姐點答？」

「冇啊。」遙遙對我眨眨眼：「係咪好開心呢？」

……

……

……

「係啊。」

「哈哈。你好誠實。」遙遙繼續講落去：「我再扮晒驚訝咁追問：『唔係呱？妳咁靚女都冇男朋友？咁我點算好。

「林秋兒笑住講：『我都唔靚女。』

「我又繼續問：『但妳應該好多人追喇？』

「林秋兒搖搖頭唔答，不過我自己跟蹤過佢，同佢出街既都係女仔，所以我估而家應該冇人真係追緊佢，包括有錢仔。

「『唉呀！妳咁靚女都冇人追，咁我點算好啊！』

「『遙遙，妳已經有鍾意既人？』林秋兒問。

「佢咁問就正中我下懷，我扮到有啲怕醜咁答：『有啊。』

「『雖然我未拍過拖，但妳講出黎睇下我幫唔幫到妳？』

「其實果刻我都真係好驚訝，所以我擘大雙眼問：『妳咁靚女都未拍過拖？』喂喂喂，林秋兒係咪真係未拍過拖？」遙遙饒有趣味咁望住我。

「呃…一年前黎講，我就肯定佢冇既。」

「一年後黎講應該都係喇，我只係佢一個客人，佢冇必要呃我。」遙遙笑道。

我點頭同意。

咁佢同Jonathan之間究竟又發生左咩事？

「咁佢答我冇之後，我就特登咁講：『我鍾意左一個名校既男仔啊，佢又高大又靚仔又有錢，出入又有司機車接送……啊，我都想坐下佢架車啊！』

「林秋兒聽到我咁講，先係窒左一窒，然後面色變得唔係咁好睇。

「『有錢人啊…其實佢地都可以好重機心。』林秋兒好似諗緊啲往事咁。

「我望住林秋兒，等佢繼續講落去。

「『嗯…我識得一個有錢既同學，佢雖然好有錢，表面上都對妳好好，但實際上佢其實做緊一啲唔好既野，最後係會破壞妳對佢既信任。

「『例如呢？』我問。

「林秋兒望住我，溫柔咁微笑道：『反正都唔係一啲好事，如果唔係一啲巧合，我都發現唔到。妳要諗清楚自己係鍾意對方啲咩啊，比多啲時間去睇清楚人地係點先，咁妳先會清楚佢係一個點樣既人。』

「林秋兒咁講法，我都有啲替你擔心。所以我又扮晒不經意咁追問：『妳係咪鍾意過呢個有錢仔？』」遙遙又向我眨眨眼。

老實講我都有啲緊張，因為呢一part個報告入面冇提起過。

「佢……點講？」我明知遙遙係想吊下我癮，但係我都忍唔住開口問。

遙遙又向我眨眨眼……

……

……

……

「妳唔係又想問我拎錢食雪糕下嘛……」我見到遙遙既反應，心下湧起不祥既預感。

「你要識做呢。」遙遙唔止眨眨眼，今次仲伸伸手添……

……

……

……

唉，我輸比妳嘞。

「怕左妳...」我準備拎幾蚊雞出黎比遙遙。

都係幾蚊啫，用黎比偵探費抵到爛啊。

「講下笑咋！」遙遙俏皮地伸一伸舌頭。

唉，我發覺自己真係輸比佢。

遙遙繼續講落去：「林秋兒苦笑左一下：『我冇鍾意過佢，只係當佢係我既一個好好既朋友，不過佢對我就唔係咁諗...

「『的確，佢果陣響好多方面都幫左我好多，呢樣野其實係真既，冇得否認。我會考唔算考得好，只係啱啱好夠分仲要係好彩有同學放棄學位我先可以升讀原校，佢知道左我想努力讀書之後，就用佢名校生的身份拎左好多有用既notes、Mock試卷咁，仲話自己一向有搞開讀書會，邀請埋我一齊出席。呢啲活動其實真係好有用，我既成績真係再提升左唔少。

「『我以前都係自己間中學既學生會主席，而我都係因為搞聯校活動先識到呢位同學。同樣地，佢都係佢間學校既學生會主席，所以比左好多實用既意見我。

「『唔止幫我，佢都有幫好多其他人，所以我一直覺得佢為人真係好熱心幫人，係一個好值得交既朋友。所以佢果陣打比我、send好多短訊比我，我都有出於禮貌咁回覆。只係原來佢對我...

（待續）

推

推推

推

有無咁真心膠啊

都話秋兒係為左成績黐埋去架啦

突然間進展得好好

本身已經明知自己只係當一個人係朋友，點解要屌佢呢？ 如果有朋友一時飲醉，挨喺你身邊，你又有得食唔好嘥屌佢而你明知大家只係朋友？

我比較想知八婆儀同淇淇老竇有無打到葉開熙仆街，因為俾着係我老死或個囡咁俾個男仔玩感情，佢一定至少有幾年唔駛旨意好過

我反而覺得淇淇未必會講出真相

其實個重點係有冇顧住對方感受

道理嚟講，就算熙哥同秋兒一齊咗，莫講話佢哋一齊去讀書會，甚至兩條友單獨去旅行同房都得㗎？只要無拖無錫無扑嘢

問題係噉樣做嘅話，對方會唔開心，呢個咪點解唔可以咁做。

咁當然熙哥周圍屌女更加唔啱，但咁唔等於秋兒啱晒

Push

綠茶巴

我覆左凋零巴架喇我個回覆其實好中性

果次會考失敗實在令佢太深刻喇

狂推山區巴

四百六十九

「『呢位同學對我係好好，但同樣地我覺得佢其實對其他人都一樣咁好，所以最初我冇諗過佢對我會有意思。更何況...果陣我已經有鍾意既人。而呢個男仔都有成日出現響我日常生活上面，所以有錢同學都知道呢個男仔既存在。』其實我聽到呢度，原本想幫你八埋果個係咪你，不過難得林秋兒佢咁自然咁講晒所有野出黎，我都係唔好打斷佢好啲。」遙遙續道。

我點點頭示意明白。

雖然我好想知，但我都同意遙遙果陣既決定。

「『原本一切都好地地，我亦都好埋首咁努力溫書，亦冇諗自己同鍾意既人之後會點，淨係想考入心儀既大學先算。

「『不過呢個時候，我鍾意既人突然接到消息要離開香港，我好唔捨得佢，但為左佢前途好，我都冇任何理由去阻止佢。』

「『去外國讀書？』我問。

「『唔係，不過類似喇，總之係為左去日本追逐佢自己既夢想。』我聽完佢咁講之後，就肯定左林秋兒口中鍾意既人就係你喇。我記得你份調查報告提過你去過日本既職業球隊試腳架嘛。」遙遙向我笑一笑。

我點點頭。

但係雖然我之前聽完遙遙講秋兒姐姐份報告話佢鍾意我都有啲心理準備，但當真係由秋兒姐姐講出黎既時候我心入面仍然好震撼。

儘管已經係由遙遙把口覆述出黎。

「『我當然非常唔開心，有錢同學見我唔開心都有開解下我。而咁啱個男仔臨飛之前有場足球比賽，個男仔邀請我去睇，我當然即刻應承。我同有錢既同學傾開計既時候，因為同佢講我會缺席一次讀書會所以比佢知道左我果日會去睇比賽，佢就提議話不如讀書會果日暫停，由佢司機車晒我地幾個去為我鍾意既男仔打氣。

「『其實我想自己一個人去多啲，不過佢真係盛意權權，加埋其他同學唔知點解又好有興趣咁，冇辦法之下我唯有應承。

「『但係果場比賽，我鍾意果個男仔...佢發生左好嚴重既意外，佢左腳小腿比對方既球員踢斷左。果一刻，我嚇到成個人差啲暈左，唔理其他人自己衝落球場想睇下發生咩事。』林秋兒咁同我講。喂，我都唔知原來你受過咁重既傷，你而家好啲喇嘛？」講到呢度，遙遙一臉關心咁問我。

「已經好返好多喇。」我苦笑住咁答。

不過距離踢得返職業足球，仲離得遠啊。

「咁就好嘞。」遙遙對我笑一笑：「林秋兒繼續講落去：『我果陣嚇到六神無主，驚到淨係識喊，本來想跟埋上救護車，但救護員話淨係一個人可以跟車，而教練又係熟處理呢啲事大人，所以最後我都聽話比左教練跟上去。有錢既同學提議不如佢車我去醫院，睇下咩情況，我都唯有點點頭聽佢吩咐。因為……我真係唔知點做，而且好想知道個男仔情況點……

「『我果陣真係好驚……驚到我完全冇留意果個有錢既同學對我做左啲咩…而呢啲野又會點樣比人誤會……妳知唔知，我係聽返個男仔而家個女朋友講，我先知原來我喊果陣比個有錢同學係咁攬住……』

「『妳鍾意果個男仔有女朋友？』我咁問。」遙遙講完呢句之後眨眨眼咁望住我，其實佢係想問我。

「分左手喇。」我有啲尷尬咁講：「佢果陣無微不至咁照顧我又同我表白，咁我先至諗住報答佢……」

遙遙搖搖頭：「愛情唔係報恩啊，你地啲男仔明唔明架。」

講到自己睇得咁透徹咁，妳咪又係未拍過拖……

不過……

我今次既經歷話比我知……

遙遙其實講得好啱。

遙遙又繼續講落去：「林秋兒答：『係之後既事。不過……嗯，講得太遠。總之去到醫院個男仔做完手術之後，佢既情緒非常低落。

「『而奇怪既事就發生就響我探佢既果一日發生。本身我諗住自己一個去探病，但個有錢同學果日巧合地響我屋企樓下出現，話可以車我去醫院探病。我本來想婉拒，因為覺得呢個時候佢唔應該出現響醫院，但佢又話有私家車可以裝多啲日用品送去醫院比我，咁樣對我黎講都方便啲，我諗落佢都講得有道理，更上佢非常堅持要一齊黎，於是我都答應左，而臨去醫院之前，佢又陪左我去買多啲野去探病，話係自己一番心意。

「『我講過佢個人一向好鍾意幫人，所以我冇特別起疑，仲多謝佢一番心意。』」

唔怪得果日秋兒姐姐同Jonathan黎探病既時候，會拎住一大袋日用品上黎喇。

（待續）

秋兒真係蠢到冇朋友

係囉，無野既，朋友黎之嗎

有文

再推山區巴