葉開葉開
2023-02-15 15:25:36
四百九十四
「請問要幾成熟?」落單既時候侍應問。
下?
梗係要熟架喇,仲駛問?
「熟晒吖。」我理所當然咁答。
個侍應聽完之後一臉驚訝咁望住我。
乜我講左啲咩好搞笑既野咩?
秋兒姐姐都望住我發笑,道:「熙熙,冇人會叫塊100%全熟既牛扒食架。」
下,乜係咁架咩?
侍應都加多把口:「係啊,如果太熟啲牛扒會會好“鞋”。」
「哦。」噢,我柒左。
侍應續道:「如果你地食得生既,我會推介Medium,因為我地啲扒都好靚,生少少都冇問題,口感仲會更加好添。」
「咁我就要Medium啊唔該。」秋兒姐姐微笑咁遞返個餐牌比侍應。
「啊,我一樣吖咁。」其實我都唔知佢地講緊乜,不過秋兒姐姐話點我就跟佢點應該實冇死。
秋兒姐姐應該估到我籠野,對住我俏皮一笑。
啊,我又暈浪喇。
餐飯係唔錯既,我覺得啲乜鬼Medium牛扒係好好食,如果唔駛我出錢就好喇。
*
之後我同秋兒姐姐去埋食甜品,之後就兩個人搭車返屋企,然後我開始有啲緊張,因為我準備一陣做一樣野。
希望成功喇...
「熙熙,好多謝你啊,我今日好開心。」落車行返屋企果段路,秋兒姐姐開口道謝。
「其實我都好開心。」我答。
我真心話黎架。
我地行到去經過當年Christmas Ball練社交舞果個公園仔,我深呼吸一口氣,然後向秋兒姐姐提議:「不如入去公園仔坐陣?」
秋兒姐姐微一驚訝,不過好快就微笑住點頭答道:「好啊。」
呼...
如預計中一樣順利。
我同秋兒姐姐行左去一對千秋,然後兩個並肩咁坐低。
「秋兒姐姐,」我坐好之後,響個運動袋入面拎左份禮物出黎,再遞比秋兒姐姐:「生日快樂啊。」
「禮物?」秋兒姐姐今次面上一陣驚喜,問:「送比我?」
講起黎我除左送過部手提電話比秋兒姐姐之外,都冇咩特別送過咩生日禮物比佢。
「係啊,生日禮物吖嘛。」我笑說。
秋兒姐姐表情有啲開心,笑住咁接過份禮物:「多謝你吖熙熙...就算你送咩比我都好,我都會一樣咁鍾意架。」
頓了一頓,又問:「但係...貴唔貴架?我唔想你為左我咁破費...」
「唔貴架,況且我而家有返工架嘛。」又係呢句。
其實做老麥人工唔係好高架咋...
不過為左令秋兒姐姐開心,仲有我一陣間既計劃,洗少少錢都非常值得...
希望計劃順利喇。
「開黎睇下鍾唔鍾意?」我又向秋兒姐姐提議。
秋兒姐姐點一點頭,甜笑答道:「好啊。」
於是秋兒姐姐就開始拆我包裝得好核突既花紙,然後入面露出左一個數碼相機既盒。
「啊,係相機!」秋兒姐姐驚訝地道:「好貴架喎!」
「OK喇。」我笑道,然後都係用返果句:「我有返工架嘛,唔好理個價錢,最緊要妳鍾意。妳之後影相,唔駛成日問嘉嘉借相機喇。」
「多謝你啊熙熙……」秋兒姐姐知道左份禮物係咩之後再一次感激道謝,然後問:「但真係太貴喇,不如我比返錢你喇。」
其實秋兒姐姐咁講得,佢應該真係好似一個家姐咁好錫我,所以先唔捨得我咁破費。
「咦,點解好似開過黎既?」秋兒姐姐檢查個相機包裝既時候發現。
啊,來了。
我深呼吸一下,再道:「係啊,因為我試用左次部相機有冇壞吖嘛。」
秋兒姐姐噗哧一笑:「通常呢啲電子產品有保養架,同埋啱啱買就壞既話,通常七日之內有壞都可以拎去換架。」
「咁我想試真啲部機冇問題先送比妳吖嘛...」
「嗯,多謝你喇熙熙。」秋兒姐姐又甜笑左一下。
「部機冇問題,好易用架咋。」我伸手拎一拎過部相機過黎,著左佢,然後向秋兒姐姐道:「我之前已經試影過幾張相,妳睇下...」
我響部相機㩒左啲相出黎,第一張相係一張我既字跡手寫住「我」既紙既相片。
「乜野黎架?」秋兒姐姐見到忍唔住發笑。
「睇落去就知架喇。」我再按下一張相,都係張紙上面寫住左個字,今次係個「鍾」字。
我一路㩒比秋兒姐姐睇,全句句子就係「我鍾意妳,可唔可以做我女朋友?」
(待續)