葉開葉開
2023-02-06 14:40:44
四百九十
時間飛逝,轉眼間我已經中五last day。
順帶一提。
今年我主動退出校隊,所以連同阿必做隊友既機會都冇埋。
如果我唔係因傷退隊,我同阿必既關係有冇機會改善呢?
哈哈,原來我都不知不覺比呢間學校既文化感染左,寧願為社帶傷上陣,都唔會為學校響學界披甲。
中五last day果日,身邊所有既人都散發住一種不捨既氣氛,好多人都有帶相機返黎同人影相同埋互相寫紀念冊留念,甚至響校服上面叫人簽名。
我個人本身好摺,呢啲野本身全部都冇做,雖然秋兒姐姐借左Jessica既相機比我,仲送左本紀念冊叫我搵人簽名,但係我都冇乜點做到,更加唔好話響校服上面簽名。
不得不說,大個左之後有時諗返都有啲遺憾,不過我個人本身又真係對呢啲野冇乜興趣,所以其實我都冇乜野。
但我雖然冇乜興趣搵人影相,估唔到既係有好多人黎搵我影相又簽名,大部份都係女同學黎,甚至乎有啲低form妹妹仔(包括彈彈妹)偷偷地帶相機就係為左特登同我影相簽名。
以前黎講我會當佢地透明,不過人大左小小就覺得順下佢地意都冇乜所謂既。
只係最可惜既係,曾經同我係最好朋友既阿必同前女友淇淇(仲有八婆儀同忍者欣)全部都對我視而不見,當我係透明。
心入面係有一種難以形容既唔開心。
但都係我自己攞黎既,唔係咩?
我傷害淇淇既程度似乎遠比自己估計既仲深,所以佢而家先會咁對我。
我本來決定中五last day呢一日一定要同佢當面道歉,但最後都係搵唔到機會……
其實事後諗返,自己心底入面可能都有啲啲想避開佢,又或者覺得自己冇資格見佢,甚至……係害怕面對佢。
如果唔係,如果死唔要臉,又點會搵唔到機會同佢道歉?
所以一切都係藉口,都係自己攞黎,冇得怨。
題外話,WFC陳日朗似乎仲多女去搵佢影相,佢又攬頭攬頸又抽水咁,但啲女都笑得好開心。
話時話,唔知佢屌過既女數目多啲?定係我多啲?
不過我應該冇乜點增長架喇,我既目標得返一個,就係秋兒姐姐。
而且如果到時佢唔想既話我都唔會逼佢。
對於性慾強既我黎講真係難忍架,但我要為秋兒姐姐而努力。
中五既最後一日,就咁完結左,但我既會考戰鬥,先啱啱開始。
中五呢一年,我波又冇得踢,又唔多朋友約我去玩,所以我成日都一個吽響屋企。
而我響屋企有咩好做?
你地估下?
……
……
……
溫書!
我冇忘記過我應承過秋兒姐姐啲乜野,我要成為襯得起佢既男人,就起碼都要入到大學。
對我黎講呢條係一條全新既道路,好彩我讀書溫習既時候都跟得上,唔會話乜都唔識。
我以前一直係打算做職業球員,所以學業既野冇乜放在心上,全靠秋兒姐姐最初要提我唔好放棄學業起碼要讀到中五,我先冇荒廢到學業,如果唔係就會好似阿必咁,每年都係升級邊緣低空飛過(仲要係八婆儀幫手)。
但其實我學業仲跟得上既最大功臣,係我既前女朋友譚梓淇。
冇佢響我中四重傷休養緊既時候同我補習,好返之後好多時既拍拖活動係溫書既話,以我既惰性,加上當時我既頹廢情況,應該唔會再比心機讀書,又唔去做物理治療,一定會成為一個廢人。
所以我成日都話,淇淇係我既救命恩人就係咁解,可惜而家……唉,怪自己。
扯得太遠,等我講返自己備戰會考既情況先。基本上我呢一年都有keep住自己溫書,不過有時自己一個溫書就梗係冇咁有效率,溫溫下頂唔撚順去左訓覺係家常便飯。
不過我最愛既秋兒姐姐大學生活雖然忙碌,又要忙住補習、返兼職,但佢一得閒就會走過黎同我私補。
驚大家唔記得,佢會考果陣都係同我一樣讀純文科既。
雖然我其實最想係同佢私補補到上床,不過呢個階段都係唔好諗咁多住了。
有啲野要慢慢黎,等佢解開心結先既。
就係咁,響我自認為備戰充足既情況下,我就踏上會考既戰場了。
(待續)