大清亡國關慈禧蛋牛治 3

1001 回覆
42 Like 34 Dislike
2021-08-09 17:46:25


【常威近代史】(五百七十三回)
屠夫與豬

1930年10月30號,上海中國公學校董會作出決議,因為校長著名教育家、柏林大學工程物理學博士、曾出任北洋政府司法總長嘅知識分子馬君武(1881-1940)「干犯黨怒」,予以免職,由于右任(1879-1964)繼任校長一職。10月14號,中國公學政經系國民黨黨員學生李維、嚴照經等企圖包辦系學生自治會,亦即係我哋而家叫嘅學生會, 李、嚴與同學鄧中邦、魏佑翰等發生衝突,之後鄧中邦、魏佑翰被指控為共產黨員,被軍隊逮捕,第二日,馬君武將兩人保釋,而李、嚴二人因自把自為向軍方打小報告,擾亂學校秩序,被開除學籍。10月25號,上海國民黨第八區黨部通電指控馬君武不設黨課、藐視總理、不願掛黨國旗、包庇反動分子等罪名。大家亦可以睇到,馬君武雖然係一個大名鼎鼎嘅學者知識份子,但係犯上政治錯誤,都係要受到教訓!

馬君武被免職後,該校學生1200幾人召開大會,堅決挽留原校長,而蔡元培更親自前往敦勸于右任早日就職,平息風波。11月10號,學生因為馬君武被免職一事發生衝突,警方前赴顛壓,同日,赴日訪問嘅馬君武回到上海,中國公學學生代表前往迎接,懇請馬君武回校主持校政,11月26號,馬君武到校視察,校內一切仍由馬君武主持,真係國有國法,校有校規,政治一旦進入學校,其實好難處理。呢啲事,其實有理說不清,凡是牽涉到政治,就冇啱同錯嘅問題,只有勝和負嘅問題。接受唔接受都好,呢個係真相。

10月31號,北平公安局發表統計數字,至本月底,北平戶口居民為261,951戶,居民人數為1,318,218人,除開每戶大概有4個人左右(咁少嘅?),北平住咗百幾萬人,係當時嘅亞洲大都市。同日,汪精衛、馮玉祥、閻石山早已經離開北平,喺閻石山大本營山西太原開會,打輸中原大戰嘅馮玉祥、閻石山決定下野,之前已經講過,馮玉祥就慘到阿媽都唔認得,一鋪清袋,輸光輸淨,正式離開政治舞臺,閻錫山就繼續返番去山西,做其山西王,冇人吹得佢脹,兩者待遇有別。

所以,不得不承認,北洋一衆軍閥之中,以山西王閻石山最為機靈,永遠死唔去,亦係最長命,點到你唔服?冇辦法,世界上始終有幸運嘅人,亦有不幸嘅人,基本上亦同能力無關,尤其政治世界中,五分靠實力,五分靠運氣,一個人如果冇運,就真係好難搞。不過運嘅嘢,非常虛無飄渺,屬於哲學上嘅形而上學範疇,唔係每個人都可以掌握,「運」 唔係單純風水算命五行八卦,認真去講,其實係無從捉摸,所以冇得講。
2021-08-09 18:43:37
【常威近代史】第一部《大清亡國關慈禧蛋牛治》
https://play.google.com/store/books/details?id=C3hjDwAAQBAJ

【常威近代史】第二部《中國一百年前第一次開放改革》
https://play.google.com/store/books/details?id=_6KMDwAAQBAJ

【常公子近代史】第三部《#東方維多利亞女王之死》https://play.google.com/store/books/details?id=GaGrDwAAQBAJ

【常威近代史】第四部《霹靂大忠臣對決無敵大買辦》Round One
https://play.google.com/store/books/details?id=Np3PDwAAQBAJ

【常威近代史】第五部《霹靂大忠臣對決無敵大買辦》Round two
https://play.google.com/store/books/details/%E5%B8%B8%E5%A8%81_%E9%9C%B9%E9%9D%82%E5%A4%A7%E5%BF%A0%E8%87%A3%E5%B0%8D%E6%B1%BA%E8%B6%85%E7%B4%9A%E5%A4%A7%E8%B2%B7%E8%BE%A6_ROUND_2?id=puXmDwAAQBAJ

【常威近代史】第六部《最九衰的大軍閥時代》Round 1
https://play.google.com/store/books/details?id=bCMNEAAAQBAJ

【常威近代史】第七部《最九衰的大軍閥時代》Round 2
https://play.google.com/store/books/details?id=lPgaEAAAQBAJ

【常威近代史】第八部《最九衰的大軍閥時代》Round 3
https://play.google.com/store/books/details?id=fY8mEAAAQBAJ

【常威近代史】第九部《孫文之死》
https://play.google.com/store/books/details?id=evMsEAAAQBAJ

【常威近代史】第十部《蔣Sir狼死開拖》
https://play.google.com/store/books/details?id=SgE8EAAAQBAJ

*available on android and ios
2021-08-10 19:57:28
[常威近代史]第五百七十三回 屠夫與豬(高清錄音版)

#唔鍾意睇字可以聽

https://www.facebook.com/129055447762576/posts/786097458725035/
2021-08-11 12:02:40


【常威近代史】(五百七十四回)
借錢總要還 咪畀錢中介

1930年11月15號,香港《工商日報》增出晚報,創立晚報潮流,做人一日要睇兩份報紙,朝一份,晚一份,緊貼時局,《工商日報》於1925年7月8日創刊,創辦人洪興錦,督印人容守正,報社位於中環結志街六號。除賣香港之外,亦賣到中國同外埠。《華僑日報》、《工商日報》和《星島日報》係香港早期三大中文報紙,其中《工商日報》及《工商晚報》於1984年12月1日停刊,《華僑日報》做多10年貨仔,亦於1995年1月12日停刊,只有《星島日報》 頂到今時今日。報紙,曾經係最重要嘅媒體工具同社會喉舌,相信到咗今日仍然都係,一份報紙有幾大威力?你睇香港《蘋果日報》嘅前身今世就一清二楚,早前2021年6月《蘋果日報》停刊,成個香港社會嘅氣氛立刻轉變曬,相當得人驚。

11月15號,中華民國財政部召開有英國、法國、美國、日本等九個國家代表同埋國內債權代表出席嘅秘密會議,商討整理內外債務,咁多年利疊利,滾雪球效應之下,中華民國嘅債務問題已經到達頂點,即係無法償還嘅地步,自國民政府成立以來,已經有風吹要整理債務,但係因為戰火彌漫而無暇顧及,打多場中原大戰,債務有增無減,而且國府亦有以大規模舉債以作重設經濟之用,於是不得不召開債權人會議,公開承認以往政府所拖欠嘅債款,重新建立國際借貸信用,雖然舊債未清新債免問,但係唔借新債,又點有錢冚舊債呢?

根據財政部嘅估計,當時中華民國有外債200幾種,共值12億元,內債為8億元,一共欠債20億(如果用奉票計算,就係1000億奉票)。當中債務爭執較多嘅係鐵路債款是否同一般債款相同待遇?借錢畀你起鐵路,分擔風險同享有鐵路權益,同真金白銀借畀你花飲飲食食,始終係唔同。如果計算埋鐵路方面貸款,日本毫無疑問將會係最大嘅債權人。依次債權人會議並未達成任何具體協議,都係意料中事,「借錢總要還,咪畀錢中介」 從來都唔會錯。會議最後定立綱領如下:「自本年度起,以不違背債務,不損害債權國利益為原則,按年撥還各國債務。」並且預計,今年可以由海關撥還內外債500萬元,如果條數真係咁計,欠20億,一年還500萬,即係還0.25%?利息都未夠喎?有啲債,仲去到八九厘年息,點死呀?其實都唔使問,一早已經死咗。個情況就係比喻落場踢波,巴西對大溪地,未完上半場已經落後10:0,仲要領咗三張紅牌,龍門傷X埋,冇後備,你話反cup同追和嘅機會有幾大呢?answer係0。
2021-08-12 15:49:39
【常公子歷史頻道404回:替大軍閥平反系列之 支那佛學院佛學大師歐陽竟無】

♊ 佛教自魏晉南北朝由印度經絲綢之路傳入中國,自此大受歡迎,中國文化亦由儒家哲學和道家哲學之外,衍生出第三條路徑,因此構成了「儒、釋、道」三家鼎立之勢,當中,以佛家的宗教意味最重,義理亦最深。佛學在中國的發展,自成一派,到了唐代,始達顛峰,開出「天臺」和「華嚴」二宗,在女皇武則天的大力推動下,更成為國教,中國佛學文化漣漪向外急速擴散,波及整個亞洲大陸,影響力非同小可。

♑四大名著「西游記」中的主角唐三藏便是唐代的名僧玄奘大師,這位我認為是世界上最聰明的人之一,從天竺帶來了佛教的最高經典「唯識學」回到大唐,至此,佛教的哲學義理亦到達盡處,西方哲學要到200-300年後,方才到達相同層次,不過這是後話。不過凡事物極必反,中國佛教發展到最高峰,即是寺院最多出家人最多的日子,就是大唐盛世武曌統治的時代,武曌死於705年,在她死後的140年,唐武宗會昌五年,篤信道教的唐武宗就發動了中國歷史上一場最大的滅佛事件,史書記載,唐武宗勒令二十六萬人還俗,我並不認為純粹是「佛、道二教之爭」,只是佛教團體宗教勢力不斷坐大,除了影響國家經濟,也影響國家政權穩定性,所以統治階層不得不出手撥亂反正,或進行自保。

♈唐武宗滅佛事件影響極其深遠,事實上世界佛教的義理發展,在盛唐時期到達前所未有的顛峰,不過社會上也不需要太多思考哲學的「智者」,忠誠的「勞動者」反而才是必需品,唐武宗滅佛之後,中國佛教至高峰滑落,從此一蹶不振,淪作愚男愚女求神拜佛不在話下,有人說,中國並無「哲學」,終日把二千多年前秦始皇焚書坑儒掛在口邊,卻沒有人炮打唐武宗殺斷佛教哲學之源,歷史其實相當不公平。

https://youtu.be/MXiELvnL0-w

💙最新上線,請課金支持
【常威近代史】第十部《蔣Sir狼死開拖》
https://play.google.com/store/books/details?id=SgE8EAAAQBAJ
Kindle版
https://www.amazon.com/dp/B09C2FJD3S
2021-08-12 15:51:12


✅本土唯一香港土話近代史文本

❤【常威近代史】第一部《大清亡國關慈禧蛋牛治》,全面開放,免費下載, #freedownload!

Free下載連結🔽

https://play.google.com/store/books/details?id=C3hjDwAAQBAJ
2021-08-13 12:32:32


【常威近代史】(五百七十五回)
首先做好自己 一定冇錯

時間線進入1930年嘅12月,中原大戰戰火平息,以馮玉祥一鋪清袋收場,但係剛剛係中原大戰抽身出嚟嘅蔣Sir,就立刻親自部署咗對中共江西蘇區紅軍嘅第一次大規模圍剿,戰火其實從來冇平息,不過矛頭就直指中共堀起嘅朱毛紅軍。月初,蔣Sir乘坐「永綏」號軍艦沿長江西上,視察湘、鄂、贛三省嘅剿共部隊,對外宣稱剿共大軍合共30萬,對紅軍實施「 四面圍堵,無異網羅」 天羅地網式嘅大圍剿。12月9號,蔣Sir 喺南昌召開軍事會議,限定一個月內奪回紅軍手中嘅各個城池,兩個月來肅清紅軍,隨後,又通電各路指揮,懸賞五萬元緝拿朱德、毛澤東、彭德懷、黃公略(1898-1931)四人。

紅軍採用「誘敵深入」嘅戰術,先以小股兵力對圍剿嘅敵人節節阻擋,引誘敵人深入腹地,拉長補給線,再用遊擊戰略邊打邊走邊退邊進大打消耗戰略,以空間換取時間,12月19號,紅軍更主動放棄東固、退守靈都、興國、雩(音愚)都一帶,誘敵深入山林不毛地帶,24號,紅軍喺黃陂照開總前委會議,決定對分三路推進嘅剿共軍隊實行中央突破,30號,張輝瓚(1884-1931)嘅第18師同埋兩個旅喺龍江遭到紅軍圍殲,1931年1月3號,第50師一個旅又喺東韶被殲,至此,國軍嘅首次大圍剿以失敗告終,紅軍嘅遊擊戰術取得全面優勢,哩個時候,蔣Sir應該開始要重新思索,佢面對嘅究竟係一群乜嘢嘅敵人?紅軍嘅裝備大概遠遠不及閻錫山同埋馮玉祥軍隊,但係紅軍嘅戰意和韌力,就一定遠遠喺佢哋之上!

呢個時候,社會嘅經濟狀況究竟又係點呢?1930年年尾,統計數字講俾我哋知,全國計有各類工廠1975間,Yes!only 1975間,只有1975間,以一個四億人口嘅超巨大國家來講,實在少得可憐,19萬間都嫌少喇,其中紡織工業、飲食工業、化學工業及機械工業佔多數,如果我哋將中國嘅工業化起步點set向1860-1870年嘅洋務運動,咁樣未免行得太慢,比烏龜仲要慢,同一岸之隔嘅日本比較,正正就係龜兔賽跑。另外,全國累計有商業公司944間,連1000間都冇,全國新開辦嘅商業公司68間,總資本額約為3200萬,好少,真係好少!1930年,對外貿易進口額為13.1億兩,出口額為8.9億兩,好明顯,入不敷支,有巨大嘅貿易逆差。全國年產煤2603噸,鋼鐵225萬噸、石油36.4萬桶、金11.4萬兩、銀11.9萬兩。全國在學嘅中學生大概51.4萬人,大學生約3.7萬人。
2021-08-13 12:32:43
數字足以說明一切,凡事皆要用實質數字量化,先可以得知真相。我再重申一次,千萬唔好用今日嘅角度去睇當時嘅中國,當時嘅中國,只係一個貧窮落後、四分五裂嘅國家,大部份財富資源同人才,只係集中喺全國幾個(或十幾個)重要嘅城市內,其餘95%以上嘅廣大地區,都係以貧窮農民為主,亦冇所謂管理同規劃,甚至冇任何法治嘅概念(都唔識字,法咩治?),簡單啲講,叫自生自滅,理唔到咁多。1930年嘅中國,喺國際社會上,祇不過係今日嘅埃塞俄比亞或阿富汗伊拉克,冇乜人會理會,亦冇乜影響力,外國人淨係知道中國立立亂戰亂頻繁民不聊生(同我哋今日對阿富汗嘅認知大同小異)。當時世界嘅中心仍然係歐洲大陸,當然仲有以經濟力量工業力量強大崛起嘅日本同埋美國,凡事講錢,有錢就惡,冇錢收皮,其實非常簡單,一啲都唔複雜。

1930年12月4號,中蘇代表喺莫斯科召開第二次會議,決定將交涉分中東鉄路、通商、復交三組進行,有排傾,亦已經傾咗成年。12月6號,行政院嚴令教育部整頓全國學風,學校係最重要嘅意識形態國家機器,凡事要由教育做起,當時行政院認為全國學校學風不良,「不憔教育破產,抑且有亡國滅種之憂」,教育有幾重要?其實教育最重要。1930年,中央大學、勞動大學、中山大學等學校相繼發生學潮,理由有好多種,我亦都提過唔少,學潮令到政府非常頭痛,行政院喺今日命令宣佈一齊罷課、集會屬非法行為,責令「學生惟當一意力學、涵養身心,凜古子思不出位之訓戒,奉總理三民主義為依歸,不得干涉行政,致荒學業」,叫學生唔好再搞政治搞反抗,專心返學讀書,如有違令越軌者,政府「唯有執法嚴繩,以治反動派者治之,決不姑息」,話畀你聽,再搞事就拉,依法處理,歷史的確係喺度不斷重複又重複。

其實都冇話唔啱嘅,學生要搞政治?首先學生唔識政治,政治嘅嘢,亦唔係讀幾十本有關政治及政治哲學嘅書籍就能夠清楚瞭解,十零歲人仔,未響社會碌過捱過,又點知道世途有幾險惡呢?一腔熱血,年少氣盛,亦最容易衰衝動,亦最容易被人煽動或利用,一刀切唔好搞,其實亦係一個唔錯嘅選擇,出嚟衝出嚟犯法,利益由背後人獨佔,刑責則由自己承受,情況好多時候都係咁發生,今日大家相信已經一清二楚,無需要講得太多,實踐始終係檢驗真理嘅唯一方法。

高尚情操啲嘢,其實好虛無,千其唔好無限放大,真實生活,好多時候只係求三餐一宿,求活得安心,對身邊嘅人負上應盡嘅責任,其實已經相當足夠。有一句說話永遠冇錯,你以為可以改變世界?到頭來祇有改變咗你自己,或者無論點都好,首先做好自己,盡好自己責任,就一定冇錯。

#常威💀 #蔣介石平反系列 #黃金十年 #民國歷史
2021-08-14 19:15:13
【常公子歷史頻道405回:替大軍閥平反系列之 中國人自己嘅文藝復興】

新型冠狀病毒疫情果然是一件沒完沒了的事情,由2020年頭開始發展至今,已經就快兩年時間,但世界各國仍未能控制疫情蔓延,今天全球已經有二億人受到感染,平均每35個人就有一個曾經中招,疫苗出現亦冇為全球疫情帶來新曙光,感染病毒嘅死亡率仍然維持喺2%左右,情況同一開始一樣,並沒有顯著改善,殘酷嘅真相係,似乎每種疫苗嘅出現都冇辦法追上病毒嘅變種速度,病毒亦都不斷變種,繼續狙擊人類。

為咗阻止新型冠狀病毒擴散,全球各國採取封閉,隔籬,限制出入境等手段,亦因此令到全球人口流動大減,貿易額下降,所付出嘅經濟代價,有人講已經超過世界大戰。疫情發展至今,已經有好多人發問,究竟我哋應否付出這麼大的代價去應付一隻死亡率只有2%嘅病毒呢?答案唔可以肯定,因為每一個人都有唔同嘅睇法,我記得疫情起初出現,美國前總統特朗普已經講過毋需理會,當冇件事發生,冇必要戴口罩,當然佢亦為此丟失咗連任嘅機會,不過今日睇返轉頭,Donald Trump可能冇錯。

好多國家,實在頂唔順封關防疫措施,紛紛開放門戶,好似英國,就將所有防疫措施解除,要市民過返正常生活,同病毒共存,而亦有好多國家紛紛效仿——情況就係,既然付出好大代價都控制唔到疫情,不如乾脆唔控制。是對是錯?到目前冇人知道,正如冇人知道下一輪變種病毒會帶嚟乜嘢後果?美國最新公佈25000億美圓印鈔計劃重振疫後經濟,是對是錯?到目前冇人知道,再印多25000億會帶嚟乜嘢後果?亦冇人可以預料,不過印銀紙所引發嘅通脹,就一定要由全世界承受,依一點就肯定。再講多次,再講多一次,如果印銀紙可以解決問題,個世界根本完全冇問題……

https://youtu.be/pU8q2WMk9HI

【我奮鬥不奮鬥】 常公子 楊熙合著

電子書下載 https://play.google.com/store/books/details?id=CVo3EAAAQBAJ
Amazon Kindle版下
https://www.amazon.com/dp/B098XHWTDK
實體書訂購
https://www.382now.com/product?id=325
2021-08-14 22:39:25
2021-08-16 19:03:48



【常威近代史】(五百七十六回)
永久廢除厘金 收消費稅

1930年12月6號,當時中華民國最先進嘅大城市上海,真如國際無線電臺今日舉行開幕典禮。依座電臺係前年開始籌建,建築費用為美金40萬,國幣54萬元左右,由此可見,當時中華民國貨幣同美圓匯率大概係1:1.3,電臺喺11月完工,同美國舊金山同埋德國柏林試行通訊,運作正常。電臺開通之前,日本駐上海辦事處宣稱:段祺瑞政府於1903年曾經同日本訂立無線電臺合同,規定中國建立無線電臺,日本可獨佔借貨權,而今次向美國借錢興建電臺,與舊約牴觸,十鳩幾年前嘅嘢喎?講嚟把托咩?因此中國外交部對此未有理睬。

由上述事件可以睇得到,中日之爭,同步亦係美日之爭,美國同日本嘅關係亦都日益惡化,日本人一早唔妥美國人,日本嘅幕府封建門戶係比美國人強行打開,史稱「黑船事件」,日本人一直視為國恥,但美國人當然認為係我大美利堅為你小日本帶嚟西方文明教化,等你可以好似蒙面超人咁變身,唔著擋布學著底環。如今,只係區區半個世紀多DD過去,一個東方嘅封建落後島國,唔知點解食正個大運,打贏1895年嘅甲午戰爭同1905年嘅日俄戰爭,一個華麗轉身,脫亞入歐,已經成為世界軍事強權之一,兩者相隔一個遼闊嘅任賢齊傷心太平洋,早已經成為競爭對手,加上在華利益方面美國又大力插隻腳埋嚟,真正係新仇舊恨一朝了,遲早就要攤牌——攤出嚟嗰隻牌,歷史上叫「太平洋戰爭」,即係人類歷史上到此為止,一場最大型嘅海上大戰——最後由美國向廣島長崎投下原子彈為止,你話個仇恨幾大呢?

12月7號,陝西省大型水利工程開工,該工程由華洋義賑會發起,完工後可灌溉良田50萬餘畝,水利問題困擾中國幾百年,甚至上千年,去到近年三峽工程完工先有大規模嘅改善,不過溫室效應極端天氣之下,呢幾年內地又再多番水災,的確係永劫回歸。12月10號,國民政府整理舊稅制,開始籌備新稅制,財政部稅務整理委員會成立。12月15號,國民政府打算將全國陸軍280個師縮為100個師,打完仗就要裁軍,天經地義,歷史上無一個政府能夠長期處於戰爭狀態或維持多場小型戰爭,打仗好貴,速度快過燒銀紙,去到21世紀更加昂貴,你睇美國頂咗二十年都要響阿富汗全面撤兵,原因就係太貴。有個例子我唔怕舉多次,60年代,一場越戰就差啲打到美國破產,所以我個人唔相信戰爭會響21世紀嘅今天輕易發生,因為實在太貴,好似香港啲樓,冇人可以負擔得起,傳統嘅實質戰爭相信會以第二種模式表現,可能我哋早已經身處其中體會緊,不過唔多覺啫。
2021-08-17 01:03:23
【常威近代史】第一部《大清亡國關慈禧蛋牛治》
https://play.google.com/store/books/details?id=C3hjDwAAQBAJ

【常威近代史】第二部《中國一百年前第一次開放改革》
https://play.google.com/store/books/details?id=_6KMDwAAQBAJ

【常公子近代史】第三部《#東方維多利亞女王之死》https://play.google.com/store/books/details?id=GaGrDwAAQBAJ

【常威近代史】第四部《霹靂大忠臣對決無敵大買辦》Round One
https://play.google.com/store/books/details?id=Np3PDwAAQBAJ

【常威近代史】第五部《霹靂大忠臣對決無敵大買辦》Round two
https://play.google.com/store/books/details/%E5%B8%B8%E5%A8%81_%E9%9C%B9%E9%9D%82%E5%A4%A7%E5%BF%A0%E8%87%A3%E5%B0%8D%E6%B1%BA%E8%B6%85%E7%B4%9A%E5%A4%A7%E8%B2%B7%E8%BE%A6_ROUND_2?id=puXmDwAAQBAJ

【常威近代史】第六部《最九衰的大軍閥時代》Round 1
https://play.google.com/store/books/details?id=bCMNEAAAQBAJ

【常威近代史】第七部《最九衰的大軍閥時代》Round 2
https://play.google.com/store/books/details?id=lPgaEAAAQBAJ

【常威近代史】第八部《最九衰的大軍閥時代》Round 3
https://play.google.com/store/books/details?id=fY8mEAAAQBAJ

【常威近代史】第九部《孫文之死》
https://play.google.com/store/books/details?id=evMsEAAAQBAJ

【常威近代史】第十部《蔣Sir狼死開拖》
https://play.google.com/store/books/details?id=SgE8EAAAQBAJ

*available on android and ios
2021-08-17 11:38:41
2021-08-18 11:35:26


【常威近代史】(五百七十七回)
1931年係善後之年

中原大戰塵埃落定,時間線進入1931年,今年係善後之年,中國嘅軍閥時代終於正式結束,南方蔣Sir嘅南京國民政府與北方東北張學良聯盟取得全面勝利,某程度上南北統一中國,實現自從1911年辛亥革命以來,最大程度上嘅國家統一,當然統治核心以外,仲有幾個軍閥割地稱王,例如山西閻錫山,不過已經不成氣候,佢哋已經臣服於南京國府成為受控制嘅地方諸候,中華民國出現大範圍統一局面,相信最唔願意睇到嘅就係日本人,趁火打劫最easy,比你統一坐大,就叫養虎為患。呢個時候,「滿州國」project 已經如火如荼,上篇文章已經講過,日本已經向東北移民超過20萬,中國嘅東北滿洲地帶,日本人係志在必得,只係選擇用乜嘢手法獲取?

1931年1月1號,國民政府公佈《國民會議代表選舉法》及《政治犯大赦條例》,今日,國府特赦大量政治犯,當然未必包括共產黨人,去到1931年,盤鋸於江西一帶嘅紅軍遊擊勢力,已經成為蔣Sir頭號心腹大患。本日,中東鐵路中文俄文並用,正喺莫斯科舉行嘅中蘇馬拉松式談判,似乎有所進展;同日,全國軍隊亦都開始編遣,分為甲、乙、丙三種師,打完仗就要裁軍,要軍人放低槍搦返起個鋤頭繼續耕田,其實難度相當高。細心觀察當時當兵,當軍人未全面職業制度化之前,工作生涯其實相當短暫,同今日職業運動員一樣,可能十六七歲入行,廿零歲就要退役,如果天下太平,甚至會更加提早被遣返農村,所以有得返工(打仗)嘅時候,一定要搏命,儘量「賺」多啲,「揾」多啲,以供日後打算,其實都算係無可厚非之事。明白呢個道理,你就會明白好多事情,講到尾,其實都係一個錢字。

1月5號,山東官錢總局喺濟南開業,局面平靜,就要開始印銀紙,印唯一合法政權認可嘅銀紙,該局經理宋福祉稻過去山東全省發行紙幣竟然達到1008種,真係五花八門,有印刷機就有銀紙(或者手寫畫公仔都可以),問題就爭在你信唔信啫?由此可見,當時社會嘅貨幣流通其實相當混亂,1930年嘅人,大概唔明白貨幣因素係浚駕所有其他經濟因素之上,美國強大係因為美元強大,日本強大係因為日元強大,要做大一個國家嘅國力,第一件事,其實係要統一貨幣,製造堅定不移嘅流通信用,中國嘅貨幣幾時開始全面統一?答案係1949年中華人民共和國建立之後。

1931年1月7號,為期祇有一日嘅中國共產黨六屆四中全會上,高舉「執行國際路線」 旗幟嘅江蘇省委書記王明(陳紹禹,1904-1974) 被補選為中央委員,開始向中央權力中心邁進,王明係百分百嘅國際派,由莫斯科第三國際直接委派,接管中共權力,第三國際嘅角度嚟睇,王明的角色係撥亂反正!中共喺呢一次上海召開嘅四中全會,由共產國際代表米夫(1901-1938)呢位蘇聯學者歷史學家操縱下進行。
2021-08-18 11:35:38
之前,共產國際執委會就李立三路線問題先後於去年10月同12月向中共中央寫信,認為李立三自1930年6月開始進行進攻中心城市嘅冒險主義計畫,犯咗路線上嘅錯誤,並且同時指責瞿秋白主持嘅三中全會喺李立三問題上犯咗調和主義嘅錯誤,早前提過,犯錯嘅李立三人已經被送到莫斯科處理,來自莫斯科共產國際嘅意見,令到中共內部思想更加混亂,莫衷一是,究竟係打?定係韜光養晦?而王明喺其蘇聯老師米夫嘅支持下,則指責李立三嘅錯誤,其實係「左」嘅詞句下掩飾嘅「右傾機會主義」,左右問題,真係有理說不清,純粹睇吓你點演繹吧?不過王明最後同李立三一樣,一樣主張喺全國範圍內採取全面進攻嘅策略。王明喺去年11月根據共產國際嘅指示,寫成一本叫《兩條路線》嘅小冊子流通黨內,內裏已經整提出進攻主張,實情係,王明比李立三仲要左,但係佢卻入主中央政治局,不久又被補選為政治局常委,掌握咗實際嘅領導權,係之後一段時間,國際派王明嘅理論成為咗中共嘅行動綱領,是好是壞?下回分解。

1月9號,山西善後協進會喺閻石山大本營太原開會,決定將山西駐軍一律改編為中華民國國防軍,徹底百分百削去閻石山軍事力量,財政絕對公開,並將兵工廠改為農具製造廠,實行軍民分治。山西問題,就係咁解決咗,解決咗就係解決咗,閻錫山仍然係山西王,不過係一個冇兵在手嘅山西王,不過又係嗰句,點樣都好過蔣Sir結拜兄弟馮玉祥嘅。

同日,外交部限定上海為唯一進口鴉片口岸,睇到依度,我都覺得非常奇怪,禁煙搞咗咁多年,點解仲有鴉片可以進口嘅?唔通係藥用?點解唔一刀切全面禁止鴉片呢?我諗上述問題,就係當時中國最大嘅問題。今日,中華文化教育基金董事會喺上海開年會,決定每年資助北京大學革新事業20萬元,以5年為限。

1月15號,中國政府正式收回比利時喺天津嘅租界,比利時喺中國嘅租界於1902年2月簽訂《天津比國租界合同》中被劃定嘅,範圍為海河東岸740餘畝土地。1927年1月,漢口、九江英租界收回,響國內引起很大嘅震動,比利時政府隨即向中國表示願意交還天津租界,雙方經過談判,於前年8月31號喺天津簽訂租界交還協議書,首次以和平會議方式簽訂租界收回協定之例子。1月15號,中共蘇區中央局喺贛南寧都縣黃坡成立,任命周恩來為書記。

#常威💀 #蔣介石平反系列 #黃金十年 #民國歷史
2021-08-19 16:22:47
【常公子歷史頻道406回:替大軍閥平反系列之 好人內閣】

♊ 最近世界的焦點都落在塔利班身上,一般人都認為塔利班係一個伊斯蘭教原教旨恐怖組織,依個組織響二十年前曾經統治過阿富汗大部份區域,當時世界上祇有三個國家承認佢哋嘅政權合法,之後喺美國干預下,推翻塔利班,成立阿富汗新政府,但塔利班並冇消失,仍然活躍於阿富汗北部地區,終於到咗20年後,美軍撤出阿富汗,塔利班回朝,竟然喺短短日子內,以勢如破竹之勢短時間內成功奪取整個阿富汗,我非常相信,一個月前,世界上冇人可以估到會咁發生,就算拜登應該都唔能夠。

♈ 世事的確係稀奇古怪,難怪有人稱呼已經進入亂世時代,的確冇錯,20年前嘅塔利班,以炸毀著名古蹟巴利揚大佛聞名於世,當然侵犯女權亦係佢哋嘅代名詞,但究竟點解,塔利班仍然咁受阿富汗人民歡迎呢?我非常唔明白。好有可能呢個恐怖組織真係好恐怖?但亦有可能我哋所理解嘅並非真相?我冇去過阿富汗,我其實唔知道阿富汗究竟係一個乜嘢地方?或者當地人民究竟諗緊乜?一切都係新聞資訊給我嘅想像同憶測,但係唯一可以肯定嘅就係,當美軍同其他聯合國部隊撤出後,新政府就立刻倒臺,脆弱得好得人驚;另一方面,塔利班嘅影響力亦從來冇消失過,反而比以前更壯大,戰鬥力更強。相信上述兩點一定冇錯,否則表象唔可能會咁發生。

♑仲有一點亦百份之九十九肯定,就過去20年中,美國或西方國家並冇響阿富汗身上取得任何實質利益,美國宣稱,過去20年一共用咗二萬億美元軍費,有投資無回報,所以決定一刀切離開阿富汗呢個困局,一切都係同錢有關。至於正義的問題,我相信亦能夠談論,可能阿富汗自己都有自己嘅問題,旁人難以理解。仲有一點我可以肯定,宗教係阿富汗國家當中扮演嘅角色,一定遠遠比你同我嘅想像更加大,大好多好多倍,香港畢竟是一個缺乏任何信仰嘅特殊地區……

https://youtu.be/8u-5X61PBzU

💚【我奮鬥不奮鬥】 常公子 楊熙合著

電子書下載⬇ https://play.google.com/store/books/details?id=CVo3EAAAQBAJ
Amazon Kindle版下⬇
https://www.amazon.com/dp/B098XHWTDK
實體書訂購⬇
https://www.382now.com/product?id=325
2021-08-19 16:22:59


✅本土唯一香港土話近代史文本

❤【常威近代史】第一部《大清亡國關慈禧蛋牛治》,全面開放,免費下載, #freedownload!

Free下載連結🔽

https://play.google.com/store/books/details?id=C3hjDwAAQBAJ
2021-08-19 22:57:14
2021-08-20 12:28:31



【常威近代史】(五百七十八回)
冒險家樂園

1931年1月16號,繼閻石山山西問題後,西北善後軍事問題基本亦獲得解決。蔣Sir、張學良聯名通電,委任宋哲元(1885-1940)、商震(1888-1978)等為軍長,龐炳勛(1879-1963)為師長等編收馮玉祥留低嘅西北軍,同日,國民政府通電全國,自本年1月起,總司令部各公文均由陸海空軍副司令張學良副署,張支票要寫兩個名,就即係話同你分享權力,張學良東北40萬大單向蔣Sir投誠,亦得到佢應得嘅嘢,相當公平。

世事亦系如此,講係冇用嘅,落注嗰一part先係最重要,你買中贏嗰瓣,自然就會派彩,買唔中,就即係輸咗。政治世界同跑馬一樣,冇話對定錯,無是非黑白之分,狀態最好質素最高嗰隻馬亦唔會一定跑出,only只有輸贏之分,政治亦基本上係一場賭博,參與政治嘅人都係賭徒,作為一個職業賭徒,要懂得賭博,習慣賭博,不過賭錢其實都係得一句話——千萬唔可以all in,每一場賭局都要留番小小本錢在手,今場輸咗,下場可以再搏過。

1月16號,國民政府重申禁烟令,凡有毒癮者,唔凖服務公職,唔可以做公務員,我唔清楚當時社會上究竟有幾多人食鴉片?但沿住歷史步伐行嚟,睇怕當時居住於城市嘅男人,起碼有一成至兩成有毒癮,鄉村應該冇毒禍嘅,因為冇錢,不過冇資料可以睇到,當時有錢食鴉片,係一種高尚娛樂,就好似今日嘅人發達要買架跑車一樣,冇鋪癮喺身,有時候好難打入上流社會;好奇怪咩?一啲都唔奇怪,今日歐美國家吸食可卡因嘅人,大部分都係上流人。有人問我,點解有錢人會吸毒?我其實心中有答案,有錢即係唔使做,空閒時間就會多,加上大把錢洗,問心嗰句,其實人生又有幾多娛樂呢?除咗食同訓之外,不外乎就係嫖賭飲蕩吹(現代加旅行),五個範疇全部包攬,唔通有幾十億身家仲宅喺屋企打機寫小説咩?

1月17號,畢業於美國耶魯大學嘅外交部長王正廷(1882-1961)喺北平宣佈,已經解決13個國家係中國嘅治外法權問題,隨住收回租界,國中有國問題逐漸解決,香港同澳門係當時係小問題,細過一粒老鼠屎。最大嘅國中有國問題,存在響自由城邦大上海,根據當時嘅統計數字,上海人口超過315萬,係北平嘅三倍,當時嘅上海,係僅次倫敦、巴黎、紐約、柏林,世界上第五大都市,東京都未追上嚟,而且喺上海進行嘅金錢活動,涉及範疇亦唔單止係中國,可能係整個亞洲東南亞地區,上海其實係當時亞洲嘅金融中心,影響力無比驚人。經過二次世界大戰同1949年中華人民共和國建立之後,呢個金融中心嘅財力逐漸向更南方轉移,另覓替身重生,個替身叫香港,所以如果係未來一段日子,上海再一次取代香港成為金融中心嘅話,其實都祇不過係大師兄歸位。
2021-08-20 12:28:45
1月17號,中國國際貿易協會喺上海成立,張嘉璈(1889-1979)等17人當選為協會理事,張嘉璈字公權,江蘇嘉定人(今上海市嘉定區),中國近代政治家、銀行家、學者,浙江財閥巨頭,屬政學系,1901年考入上海廣方言館(上海言文館)學習法文,1904年考中秀才。1906年入日本慶應義塾大學專攻經濟學,師從堀江歸一、福田德三,最後由理財科畢業,中國第一代金融人,奠基者,響20年代張嘉璈擔任中國銀行總經理時,成立咗經濟研究室,為中國培養第一批經濟學家。

1月19號,著名投機大亨黃楚九(1872-1931)因為腦中風死於家中,終年59歲。黃楚九原名黃承乾,號磋玖、知足廬主人,浙江餘姚人,上海企業家,中國新藥業先驅。被譽為「商界奇才」和「百家經理」,一時有上海「新藥大王」和「娛樂業大王」之譽。晚年投身商業投機活動,債務累累,官司纏身。佢出生於一個破落地主家庭,早年隨母親喺上海灘以行醫賣藥為生,1905年,佢利用當時人崇洋嘅心理,將自己根據一份普通處方炮製嘅新藥,命名為「艾羅補腦汁」,假扮洋貨推出市面,結果大受歡迎發大財,並開始揚名上海灘,「艾羅補腦汁」 今日仲可以買到,係一個品牌嚟嘅,我細個我老母覺得我蠢,都畀我飲過一排。呢招扮洋貨橋唔怕舊,最緊要受,用到今時今日,記唔記得有個牌子叫「佐丹奴」?當時就係扮意大利貨出道,鱷魚恤嗰條鱷魚,係copycat,而且日本城同日本無關,德國寶唔響德國做,哈哈。

當時,民族捲烟工業舉步維艱,而黃楚九嘅福昌烟公司以買香菸送紅雞蛋嘅高超廣告手法,打響了「小囡牌香菸」品牌,令英美煙草公司亦自歎不如,最令王楚九聲明彈上天嘅,就係佢創辦咗上海「大世界」遊樂場,大概係中國第一個主題公園,而且佢仲別出心裁創辦咗一張《大世界報》。條條大路最後通向羅馬,1920年,黃楚九開設「上海夜市物券交易所」,即係做莊炒股票,可惜佢正正遇上上海銀根緊縮時期,股價暴跌,以致釀成「信交風潮」 依場金融危機,黃楚九嘅交易所亦被迫停業,之前半生贏返嚟嘅錢也差不多輸番曬,之後黃楚九嘅事業亦開始走下坡,真係精彩人生,大上大落。而大上海,的確係冒險家嘅樂園。

#常威💀 #蔣介石平反系列 #黃金十年 #民國歷史
2021-08-21 16:16:29
【常公子歷史頻道407回:替大軍閥平反系列之 好人內閣】

♊ 哲學家羅素(Bertrand Russell)曾經講過:「有三股動力推動著我的一生:對真理的追求,對愛情的追求,以及對人類苦難的極度不忍之情。」 這段說話可圈可點,對真理的追求就是求知識,對愛情的追求是人類的天性,至於第三點,對人類苦難的極度不忍之情,不是同理心,是關愛,也是我們現在常說的「大愛」。大部分人都會同情別人的苦難,你看見電視上非洲飢餓的皮包骨兒童,就會牽動惻隱之心。不過同情別人的苦難同時,亦祇有少數人會付諸實際行動,希望利用實際行動去改變世界的不公平,拯救受苦受難的其他人。

♏現代人喜歡嘲笑他人的「大愛」,亦不必太理論化描述,用貼地的語言,就是「連自己都顧唔掂,仲要理其他人,唔該慳啲啦」,的而且確是,自己的處境都未能改變,試問又怎能夠有力量改變其他人的處境?更何況是千里之外的陌生人?有很多時候,我們衹是為自己和自己身邊的人努力活著,能夠盡好每個應盡責任,已屬難能可貴。不過我們長大以來,一直接受的國家機器教育,就是要教導我們要幫助別人,彼此守望相助,共度難關。這是小學課本裡稱呼為「美德」的行為,但現實世界裡,卻不是以這種形式所運作,所謂美德,其實某程度上只是櫥窗裡的裝飾品,只是麻醉我們心靈變得冷漠和殘酷的精裝矯情鴉片。

♏所謂好人,又究竟是什麼意思呢?我真的不知道,其實世界上並沒有好人存在,只有凡人存在,都係凡人,就是不是好人,也不是壞人,是一種中間狀態,介乎黑色與白色之間的灰色,在某些境況和語境中,我們會成為好人; 但在另一個截然不同的環境下,我們也可以成為十惡不赦的壞人; 所有的道德判斷和價值判斷,其實都是觀點與角度的問題,也是歷史和政治的問題,當然也是時間的問題。中國的文人士大夫有一個傳統,就是當時不利兮之時,便會退隱山林,不問世事,歸園田居。以前我真的不明白他們為什麼要這樣做?現在我開始明白。不問世事,就是捨棄大愛,回復平靜,就是關愛自己。

https://youtu.be/fRmJeeDRIt0
吹水台自選台熱 門最 新手機台時事台政事台World體育台娛樂台動漫台Apps台遊戲台影視台講故台健康台感情台家庭台潮流台美容台上班台財經台房屋台飲食台旅遊台學術台校園台汽車台音樂台創意台硬件台電器台攝影台玩具台寵物台軟件台活動台電訊台直播台站務台黑 洞