大清亡國關慈禧蛋牛治 3

【常威近代史】（七百零四回）
秋風秋雨愁煞人

時間線嚟到1935年嘅10月，10月1號，中美訂立有關白銀買賣嘅秘密協定，情況應該係美國一心要幫助蔣介石建立完善貨幣制度，因為一直以來美國就係蔣Sir背後嘅金主，穩定幣制亦有助穩定政權，扶得起你，當然唔希望你跌低仆街，否則之前嘅投資就會泡湯，講嚟講去，唔好覺得有任何情與義成份存在，到頭來都係生意一盤啫。不過出嚟做過生意都知，有一種情況就係叫洗濕咗個頭，既然個頭都浸濕咗，落埋洗頭水護髮素，就無辦法唔繼續洗落去，為咗撐住個雞頭，死頂都要死頂，否則就會血本無歸。亦都係借人錢定律，唔該爭人錢要爭大嚿啲，爭個少少球零兩球嘢就追到你瘦，爭個天文數字嘅話，你條命就值錢嚕，又係明就明，唔明就唔明江湖道理。以上道理，正式嘅近代史課本絕對唔會教啩，哈哈。

同日，中央信託局開業，相信亦係統一幣制步驟之一，至此，以「四行二局」為中心嘅國家金融體系建立完成。所謂四行，就係中央銀行、中國銀行、交通銀行同中國農民銀行。上述四行，三間今日都存在，不過內容同1935年時候係兩回事，只係淨低個名相牌頭嘅，牌頭即係朵，響朵好重要，唔係黑社會術語，人係有慣性嘅動物，果朵靚，好有著數，一陣臭朵就仆街。二局則為郵政儲金匯業局同新成立的中央信託局。國民政府響先後強迫中國、交通兩間銀行「官辦」之後，國民政府又將鄂、豫、皖、贛四省農民銀行改稱為中國農民銀行，遷至南京，簡單少少啦，啲錢同各種值錢嘅儲備唔該還運曬去首都先，首都幫你保管信心保證喎。之後改組郵政儲金匯業局，加速金融集權過程，所謂金融集權，係一個比較好啲嘅稱呼，正確嚟講應該係將所有錢集中喺中央手上；正如印銀紙我哋都唔會叫印銀紙咁cheap，我哋會用個好聽啲嘅名，叫「量化寬鬆」，睇得透，一切都係名相問題，所以人要讀佛學（唔係哈佛）就係咁解。二局中嘅中央信託局直屬中央銀行，一紙需扁兩個面門，同一樣嘢嚟啫。主要辦理信託、儲蓄、保險及採購軍火等業務，資本額為1000萬元，講真真係唔係多，甚至係小。（窮掛）

10月2號，蔣Sir兼任西北「剿匪總司令」，張學良兼副總司令，司令部設於西安，紅軍25000里長征進入陝甘一帶重新建立根據地，蔣Sir絕不罷休，要剿到你一個共產黨都冇得剩。10月3號，日本為開發華北及内蒙產業，喺天津設立事務所，已經當中華民國政權唔存在鳥。10月4號，立法院通過《行政訴訟法》，法律制度逐漸完善。同一日，根據統計，天津日僑人數由918事變前嘅600人增加至7400幾人，增幅大概10倍，相信有唔少係間諜同特工。10月5號，張國燾（1897-1979）喺川康邊境綽木碉另立「中央」，另起爐灶，自稱為「主席」，除咗一個毛主席，仲有個張主席，合久必分。同一日，國民政府命令機關公文使用簡體字。10月6號，銀行家吳鼎昌（1884-1950）率領中國經濟考察團赴日本考察。10月7號，日本外相廣田對駐日大使蔣作賓再提出「對華三原則」，講嚟講去三幅被：即係唔好打仗，我係你好朋友，但你要做我條靚。同日，由上海復旦大學主辦嘅世界報紙展覽會開幕。

10月10號雙十節，《現代青年》半月刊喺北平創刊，國民政府特赦前新疆省話事人金樹仁（1879-1971），今日，第六屆全運會喺上海舉行，依一次運動會一共刷新19項全國紀錄，本屆運動會喺當時遠東最大嘅體育場上海江灣體育場舉行，38個單位嘅運動員參加咗歷時11日嘅比賽，盛況空前。10月14號，國民政府命令褒揚秋瑾（1875-1907），建構一個女民族英雄嘅意識形態圖騰，
秋瑾出生於一個官宦家庭，1903年秋瑾身著男裝到戲院看戲，轟動一時。不久，秋瑾和丈夫發生了婚姻危機，然後離婚。1904年秋瑾東至日本讀書，積極參加留日學生革命活動，加入馮自由（1882-1958）受孫中山委派在橫濱成立嘅三合會，並受封為「白紙扇」（即軍師），1905年加入中國同盟會。1907年1月在上海創辦《中國女報》，3月間回紹興府，與徐錫麟（1873-1907）等創辦明道女子學堂。開始籌資準備於7月由金華府起義，起義失敗後，秋瑾響大通學堂被捕，被關押在臥龍山（即府山）監獄，7月15日，於浙江省紹興古軒亭口被五花大綁著處斬，時年31歲。

1912年，秋瑾遺骨遷回浙江杭縣西湖西泠橋畔原墓地，同年12月，孫中山親至秋墓祭悼，並撰題輓聯：「江戶矢丹忱，重君首贊同盟會；軒亭灑碧血，愧我今招俠女魂。」在西湖秋瑾墓旁，修建風雨亭，亭以秋瑾臨刑前絕筆「秋風秋雨愁煞人」句而得名。1965年秋瑾墓被炸開破壞，然後鑿開棺材，取出秋瑾遺骨以及陪葬遺物，1981年，秋瑾墓響西泠橋另一端重建，塑漢白玉全身像，並鐫有孫中山手跡嘅「巾幗英雄」四字。

今個月，南寧國術運動大會舉行，「武化廣西」活動揭開序幕。11月，廣西國術館成立，館長白崇禧（1893-1966）主持典禮，號召去除「禮讓為國」嘅「惡習」，整個民族要有尚武精神，並希望每個人都係俠客，白崇禧喺軍隊、民團、學校中大力推行醒獅運動同武術訓練，戰爭在即，每個人都要有尚武精神，隨時預備揸枝槍上戰場！

#常威 #蔣介石平反系列  #中日戰爭 #民國歷史 #佛經抄寫員

【常公子歷史頻道488回：黃金十年系列之 繼續踢走帝國主義殖民地者】

▶隨住蔣介石嘅北伐大軍開始控制整個南方，首先從中國南方嘅心臟地帶武漢三鎮開始，大力踢走帝國主義殖民地者嘅勢力，解決「國中有國」嘅嚴重管治問題，發展過程的確係大快人心。困擾中國多時嘅「殖民地」及「租界」問題，終於搵到解決嘅途徑同方法。中國被外國勢力瓜分及播弄嘅歷史，應該源於1840年開始嘅第一次鴉片戰爭同第二次鴉片戰爭，之後嘅100年，亦係普遍認為係中華民族一段最慘痛嘅歷史，足足幾代人活於痛楚與恥辱之中，真正嘅自主獨立，要去到1949年先發生，甚至正確嚟講，係要去到20世紀60年代先開始，整個過程，足足跨越了一個世紀……

⏩https://youtu.be/dKR2cT9mwnQ

#常威💀 #常威近代史頻道 #黃金十年系列  #民國歷史 #佛經抄寫員

［常威近代史］第七百零四回 秋風秋雨愁煞人（高清錄音版）

#唔鍾意睇字可以聽

https://fb.watch/erWc9e-ZZe/

【常威近代史】（七百零六回）
到達終點

1935年10月16號，日本經濟調查團抵達北平，戰爭前夕，動作多多；10月19號，新疆鼠疫流行，已經有幾千人死於鼠疫。今日，毛澤東（1893-1976）、周恩來（1898-1976）率領嘅中央紅軍喺突破天險臘子口後，之後再翻越岷山、六盤山，今日到達陝北一個小鎮吳起鎮，同陝北紅軍以及先到達嘅紅25軍會師。自至，中央紅軍歷時一年多，途經過閩、贛、粵、湘、桂、黔、滇、川、康、甘、陝11省，浩浩蕩蕩、迂回曲折，行程25000里嘅長征終告結束，到達終點站。今個月27號，中央政治局喺榜羅鎮召開會議，確定以陝、甘、晉三省作為未來嘅發展區域，紅軍今後嘅任務就係保衛同埋擴大陝北蘇區。

中共紅一方面軍在其368天嘅戰略轉移與逃亡期間，每一、兩天就有一次遭遇戰，且共有15天大決戰。白天行軍235天，夜間行軍18天，休息共44天，平均每走114哩休息一次。紅一方面軍平均每天行軍71華里，共進行了380餘次戰役戰鬥，進攻佔領了62座縣城，紅軍陣亡嘅營以上幹部有430人，平均年齡不到30歲；武裝擊潰了中國國民政府正規軍數百個團。依一次戰略大轉移，軍隊穿越大面積雪山、高寒嘅高原、永久凍土帶同無人區，共經過11個省、18座大山、24條大河、5座連續嘅雪山。中國共產黨黨史就叫做「25000里長征」，中華民國國民政府同中國國民黨響部分場合非正式稱之為「流竄」或「西竄」，你打我我梗係走，然而由於兩岸史觀同論述側重不同，並未見到中華民國國民政府和中國國民黨對依一事件有唯一、持續嘅專有稱呼。

野火燒不盡，春風吹又生，中國共產黨經歷25000里長征，力抗蔣介石趕盡殺絕嘅幾次大圍剿，重新喺陝西延安建立根據地，一切重新開始！其生命力之強橫實在叫人咋舌，之後嘅故事大家都好清楚，1949年建立中華人民共和國嘅係共產黨，而中華民國蔣介石政權則去咗臺灣，直至今時今日，影響亦到達今時今日，甚至乎係之後嘅100年都未定。

10月20號，受日本指使，天津組織「東亞經濟協會」；同一日，甘肅蘭州下東門火藥庫爆炸，軍民死傷數百人。10月25號，立法院通過《憲法草案修正案》，今日，中蘇文化協會喺南京成立。10月26號，葡萄牙殖民地澳門政府強迫華人使用葡文，同日，著名報人戈公振（1890-1935）喺上海病逝，戈公振出生於書香世家，自幼學習勤奮，喜好書法繪畫藝術，1907年以第一名畢業於東台高等學堂。畢業後，1912年響《東台日報》任圖畫編輯，1913年從東台淮南法政學堂畢業後，到上海狄楚青（1873-1941）創辦嘅「有正書局」做學徒，次年被調至《時報》，從校對、助理編輯、編輯一直做到總編輯，在該報任職15年之久，為報紙業務改革作出了一定貢獻。1920年首創《圖畫時報》。1921年「上海新聞記者聯歡會」成立，擔任會長，1925年起在各大學教授新聞學。1927年1月29日，以記者身份乘法國郵輪「答爾塔良」號自費赴法國、瑞士、德國、意大利、英國、美國、日本等考察新聞業。同年，受國聯邀請，出席在日內瓦舉行的國際新聞專家會議，1928年返國，任《申報》主編。九一八後，積極從事抗日救亡運動，1932年3月，以記者身份隨國聯調查團赴東北調查日軍侵華真相，9月隨團前往歐洲。1933年3月到蘇聯訪問，為國內報刊撰寫大量介紹蘇聯嘅通訊報道。1935年10月22日因盲腸炎轉腹膜炎病逝於上海。

10月28號，《禁煙法》廢止，禁煙、禁毒條例公佈。同日，冀東戰區特警隊奉命開進香河維持治安，一度佔領縣城武宜亭等人逃亡到天津，「香河事件」得以順利解決。今個月20號，香河縣鄉民武宜亭同埋前北京商會會長安原齋等人，喺日本人嘅指使下，糾衆請願，要求另組「自治政府」，縣長趙鍾璞將請愿代表同埋三名日本浪人扣留。22號，23名日本憲兵分別乘坐兩輛汽車，帶領武宜亭同安原齋進入縣城，並將縣警繳械，趙鍾璞被迫出逃，「自治政府」宣佈成立，安原齋自封為縣長，之後經過商洽，確認以不追究責任為放棄自治之條件，真係又要威又要戴頭盔，不過最後都係收皮啫。香河位於北平與天津之間，係北平與天津之間嘅交通咽喉。「香河事件」發生後，各國輿論譁然，亦有外國記者嚟採訪，一時之間，香河成為咗中國、日本和國際關注嘅焦點。

10月31號，馮玉祥（1882-1948）前赴南京出席國民黨四屆六中全會。今個月，中央研究院氣象研究所所長竺可禎（1890-1974）、派顧俠響貴陽籌建貴陽測侯所，並且培訓偵測人員，正式開始地面氣象觀察，至此貴州有咗自己嘅氣象事業。今個月，趙家璧（1908-1997）主編嘅《中國新文學大系》開始出版。河北省完縣鹼地試植美國棉花成功；滬光華煤油公司以該公司受到外商傾銷影響，請求實業部將其收歸國有。

1935年10月於然結束……


#常威 #蔣介石平反系列  #中日戰爭 #民國歷史 #佛經抄寫員

［常威近代史］第七百零五回 到達終點（高清錄音版）

#唔鍾意睇字可以聽

https://fb.watch/ewrSoIM5AU/

【常公子歷史頻道489回：黃金十年系列之 音樂椅大洗牌時間】

▶時局隨住北伐大軍節節勝利，開始大洗牌，進入一個全新嘅局面。響中國近代史嘅定義上，蔣介石發動北伐戰爭之前，係所謂混亂不堪，千災萬劫、民不聊生嘅「軍閥時代」，北伐之後，就進入中華民國黃金時代。當然，咁樣嘅區分，事實上有啲牽強，首先，1927年北伐、蔣介石建立南京政權之後，中華民國之中仍然有好多軍閥存在，軍閥割據嘅情況並冇完全消失；其次，「民國時代」嘅戰亂局面，唔會比「軍閥時代」好得幾多，千災萬劫、民不聊生嘅情況依然存在。不過，無論如何，1927年嘅北伐戰爭的確係一次音樂椅大洗牌時間，舊嘅唔去，新嘅唔嚟，今場馬跑完，就要跑下一場，歷史不斷更替，人物不斷上臺下臺，其實係常態，世界上並沒有永恆不變的事物，人生嘅常態，其實就係不斷改變生活形態、調節心態適應千變萬化嘅客觀環境，要嚮前行，就要變，儘管可能係苦中求變。

⏩https://youtu.be/P3-NxwzHE9w

#常威💀 #常威近代史頻道 #黃金十年系列  #民國歷史 #佛經抄寫員

【常威近代史】（七百零七回）
貨幣終於統一

時間先嚟到1935年11月，11月1號，日本策動北平市糞夫千幾人，藉口反對糞出（即係倒屎）改為官辦，發動請願抗議，要求改組政府，連倒屎嘅都出動，真係無所不用其極，總之要搞到你立立亂為止。唔知有冇關係，11月3號，北平市長袁良（1882-1953）辭職，改由軍閥宋哲元（1885-1940）兼代。11月3號，中央、中國、交通三家銀行獲授權，可無限制買賣外匯。

11月1號，汪精衛喺國民黨四屆六中全會開幕式後突然遭到槍擊！當時代表們喺會場外拍照留念，忽然有一個青年拔槍向汪精衛射擊，擊中汪精衛左頰、左臂及背肋三處。雖然傷勢並唔重，但係背下一粒子彈一時無法取出，行刺者為晨光通訊社記者孫鳳鳴（1905-1935），佢當場俾警衛擊倒，第二日喺中央醫院死去，相信佢都無辦法唔死掛？行刺汪精衛令孫鳳鳴流芳百世，被封為抗日愛國烈士。晨光社負責人胡雲卿、賀坡光等人之後被捕，南京市警察廳再拘捕嫌疑犯20多名嚴加審問，據稱呢次刺殺，係基於佢哋對汪精衛嘅對日妥協政策不滿，純粹一腔熱血，至於有冇內幕其他幕後黑手？歷史當然唔會講比我哋知道。

做政治人物其實風險好高，汪精衛當年好彩冇被射殺，但係你睇日本前任內閣總理大臣安倍晉三（1954-2022），死得幾很冤枉？響街頭無端端俾個傻佬用自製槍械射死（當然佢係咪傻佬我哋真係唔知道），撈政治，除咗要防敵人防自己人之外，仲要防傻人，其實傻人先至最恐怖。撈政治除咗會被行刺冇咗條命仔外，仲會分分鐘坐監，身敗名裂，「風險越大、回報率越高」依條鐵則放響政治人物上其實唔係咁啱用，所以有志從事政治嘅朋友或年青人，真係要諗過度過，君子不立危牆之下，風險太高嘅嘢，都係少做比較好，明哲保身，其實冇錯！其他人點講唔洗理，把火唔燒到門口，任何人都識聲大大架——呢條就真係鐵律喇！

11月3號，亦係中華民國蔣介石政權嘅大日子，因為11月3號，法幣開始發行，中華民國幣制邁向統一。今日財政部頒佈《法幣政策實施辦法》及《兌換法幣辦法》，規定中央、中國及交通三家銀行發行嘅貨幣為法幣，以圖改變以往各家銀行皆可呈准發行貨幣嘅混亂局面，統一全國貨幣制度。財政部決定設立專門委員會，辦理法幣發行收換及保管預備金事宜，其他銀行鈔票限期兌換法幣，持有銀本位幣或其他銀類者（即係銀幣或俗稱嘅大洋），則可以交付專門委員會或指定銀行兌換法幣，以銀幣單位訂立嘅契約，到期以法幣結算繳付。國內一切公私收付款項，一切以法幣為限，禁止白銀或其他貴金屬流通。財政部亦規定中央、中國、交通三間銀行無限制收購外匯。依一次幣制改革，係響英國經濟顧問李茲羅斯（1887-1968）協助下實行，就要穩定中國嘅財政。改革辦法出臺前夕，財政部長孔祥熙（1880-1967）喺上海召集金融界領袖會談兩小時，旋即公開改革貨幣政策（即係得個知字），當日，上海市面投機活躍，物價狂漲，呢樣嘢亦都唔使講，上海錢業公會特別召集緊急執委會討論補救辦法，決定所有現銀繳存中央銀行，並且發行紙幣兌換。亦由今日開始，中國民國嘅經濟進入風高浪急嘅大時代。

之前亦都提過，中國（或中華民國）一直嘅經濟積弱，係同混亂不堪嘅貨幣制度有關（相信100年前嘅中國人好多人都唔知道貨幣原來咁重要，或者係最重要，日本勁過你，就係明治天皇似乎一早知道貨幣必須統一），所以統一貨幣係一個國家強大嘅前提，大一統亦都係為咗統一貨幣，但係貨幣本身係一種「信用」，你要相信貨幣嘅價值存在，佢先有價值，否則一切都係虛無，而貨幣本身嘅信用，就係政權本身嘅信用，俗語有云，信不信由你？而蔣介石南京政權嘅信用，大家亦心知肚明，你要我相信你？我真係相信你先得架？「信用」呢回事，其實亦都相當虛無，口講話信，但身體最誠實，而且信用本身，係需要用長年累月嘅時間來建立，一隻有實力嘅貨幣信用，據我生平觀察所得，最低限度需用半個至一個世紀時間建立出嚟。我個人亦都相當相信，中華民國幣制統一，亦都係中日戰爭全面爆發嘅最強催化劑，畀你後防站穩陣腳，就唔會咁容易入波，要打，梗係趁你最弱嘅時候或未完全崛起嘅時候打！你真正強大起嚟，就係朋友盟友唔係敵人喇，明就明，唔明都冇辦法。

11月4號，郵電部規定由郵資改收法幣，想用政府服務？用法幣啦！想交稅啊？用法幣啦！想安居樂業啊？用法幣啦！情況亦非常簡單。11月5號，日本在華銀行召開緊急會議，反對中國幣制改革，日本人立刻起扛，乜都係假，錢先係最重要！11月6號，香港滙豐銀行停止支出硬幣，發行新1元鈔票，約10萬元。響11月6號同埋11月7號，天津市先後有法商學院盧郁民教授等多人被日本人逮捕，全市人心惶惶。11月12號，國民黨第五次全國代表大會喺南京開幕；11月13號，中共中央發表宣言，反對日本吞併及蔣介石出賣華北。11月15號，兌換法辦法確定，人人都要去換法幣，同一日，國民政府簽發臺灣日機赴閩許可証。

11月只係過咗半個月，已經風起雲湧，山雨欲來……

#常威 #蔣介石平反系列  #中日戰爭 #民國歷史

【常公子歷史頻道490回：黃金十年系列之 婦女終於可以離婚鳥】

▶如狼似虎嘅北伐大軍勢如破竹，率先打敗盤據中原心臟地帶武漢三鎮嘅吳佩孚，接下來，盤據浙江上海一帶嘅笑面虎孫傳芳亦都岌岌可危，係依個時候，浙江一帶嘅財閥亦開始會晤蔣介石落part，買重佢打贏，取得最後勝利。呢種賭博，真係豪賭，當然蔣介石之前喺江浙一帶亦都經營多年，人脈線路非常巨大，究竟係有雞先？因為有蛋先？或者係調轉嚟？真係好難講。不過財閥然預先落part蔣介石身上買佢贏，最後就唔可以「共」佢哋嘅「產」鳥，大家心中明白，一切都係金錢遊戲。老實講，唔講錢唔通講心咩？

⏩https://youtu.be/KbpB31R0FHw

#常威💀 #常威近代史頻道 #黃金十年系列  #民國歷史 #佛經抄寫員

［常威近代史］第七百零七回 貨幣終於統一（高清錄音版）

#唔鍾意睇字可以聽

https://fb.watch/eCvIMEVBZB/

【常威近代史】（七百零八回）
行刺笑面虎 血灑佛堂前

1935年10月16號，日軍連日大批開抵山海關，兵力集結，戰爭其實一觸即發，只不過睇吓條導火線響邊度？同日，《大眾生活》周刊創刋。其實3日前，有一個好重要嘅人死咗，佢就係大軍閥笑面虎孫傳芳（1885-1935），自從1928年4月，孫傳芳軍響山東省被殲滅，逃往河北，此後，孫傳芳軍事及政治勢力嗖一聲完全喪失。北伐戰爭打敗之後，孫傳芳下野，做返個普通市民後，一度投靠張學良麾下，但後仍因感到人身安全受威脅而避居大連。1931年九一八事變爆發後，孫傳芳隱居於天津英租界之內禮佛誦經度日，退隱後信佛，亦都好正常舉動。1935年11月13日，孫傳芳被張宗昌部下施從濱（1867-1926）之女施劍翹（1906-1979）刺殺，身中三槍身亡。女中豪傑施劍翹之父施從濱響直奉戰爭固鎮戰鬥中戰敗，被孫傳芳部下謝鴻勛俘虜，並被孫傳芳以鐵絲捆綁送到蚌埠車站當眾割下頭顱，懸首暴屍三日三夜。施劍翹為報仇雪恨，埋伏在天津佛教居士林，趁孫傳芳誦經之時，從其背後槍擊。孫傳芳當場中棺斃亡，年50歳。葬於北京西山臥佛寺東南，即孫傳芳墓，現位於北京植物園內。所謂冤冤相報何時了？但出得嚟行，就預咗要還。半個月前，汪精衛中三槍唔死得，半個月後笑面虎死於三槍之下，人嘅命數，真係好難預料。

刺客施劍翹事後向警察自首，並被天津市警察局第一分局局長閻家琦經審問後予以拘禁。此謀殺案在當時引起極大轟動，報章、雜誌爭相報導，稱施劍翹她為「女中豪傑」、「巾幗英雄」，要求政府特赦。1936年8月13日，施劍翹被河北高等法院判處7年監禁。經馮玉祥（1882-1948）、李烈鈞（1882-1946）、于右任（1879-1964）、張繼（1882-1947）、宋哲元（1885-1940）等人出面救援，1936年10月14日，國民政府主席林森（1868-1943）簽署命令予以特赦。佢嘅刺殺行動在道德上被認定為實踐孝心，並成為合法反抗日本侵略者嘅政治象徵，1949年，施劍翹當選為蘇州市婦女聯合會副主席。1957年，她當選為北京市政協特邀委員。1979年，施劍翹罹患晚期結腸直腸癌去世，遺體被火化並安葬於蘇州城西天靈公墓。

11月22號，蔣Sir提議取消華北自治運動為條件，全面承認廣田對華三原則，退一步，又試吓可唔可以海闊天空？梗係唔得，11月23號，上海公共租界調查戶口，華人外國人戶口一共1159775人，其中華籍居民約為1120860，原來鬼佬得嗰40000人。同日，大明星胡蝶（1908-1989）與實業家潘友聲喺上海舉行婚禮。今日，河北薊（音計）密行政區督察專員殷汝耕（1885-1947）喺通縣宣佈「獨立」，次日成立冀東防共自治委員會，親自擔任委員長。今個月11號，大奸鳩土肥原賢二（1883-1948）到達北平，要求當時暫代北平市市長嘅宋哲元於本月20日前宣佈北平自治，否則日本將取河北同山東（哇）。在此之前，蔣介石亦派出熊斌（1894-1964）對宋哲元進行懷柔工作，開大定開細先？單定雙先？軍閥宋哲元一直持觀望態度，15號，殷汝耕電宋哲元催促佢自治，但宋哲元一直未有行動，於是殷汝耕自己就宣佈獨立先，仲話事先得到咗宋哲元嘅諒解同支持。

11月23號，紅軍取得直羅鎮戰役嘅勝利，為建立西北根據地奠定基礎。中央紅軍進入陝北之後，蔣介石命令東北軍董英斌部隊5個師嘅兵力，分兩路對陝甘蘇區嘅紅軍進行圍剿，20號，部隊主力第109師進入鄠縣直羅鎮，中央紅軍同紅15軍團即分兩路進入直羅鎮以北同以南陣地加以包圍，發起圍攻，全殲109師，而且喺黑水寺狙擊中又殲滅106師沈克部隊1個團，逼使108師、111師及106師殘部退回甘肅，117師退出鄜縣，紅軍大獲全勝。

11月24號，大名鼎鼎嘅日本女間諜川島芳子（1907-1948）抵達天津，暗助「華北自治委員會」搞串聯獨立，今日，國民政府喺武昌為前大總統黎元洪（1864-1928）舉行國葬，黎元洪都死咗7年鳥，補辦返；同日，北平20幾位大學教授聯合宣言反對北平自治。11月26號，國民政府明令通緝漢奸殷汝耕。11月27號，日本強行佔領津交機場、同步佔領天津、豐台車站，禁止放車南下。11月28號，倫敦中國藝術展開幕。11月29號，日本憲兵傳訊北大校長蔣夢麟（1886-1964），11月30號，何應欽（1890-1987）北上，企圖解決華北問題，想辦法拆彈。

今個月，俄國著名文學家果戈里（1809-1852）嘅名著《死靈魂》中譯本出版，當日《死魂靈》出版，就「震撼了整個俄羅斯」，成為俄羅斯文學走向獨創性和民族性嘅重要標誌。旅美嘅中國女特技飛行家張瑞芬參加國際飛行比賽中得第四！

1935年11月於焉終結。

#常威 #蔣介石平反系列  #中日戰爭 #民國歷史

［常威近代史］第七百零八回 行刺笑面虎 血灑佛堂前（高清錄音版）

#唔鍾意睇字可以聽

https://m.facebook.com/story.php?story_fbid=pfbid0VDWDsS9T7bPqkDiYXvPpMcWz9BBJk8y4vo8fReLNGByCeFpYfmf2owrnz7dXaLhpl&id=100063598605373

❤【常威近代史】第十二部《籠裏雞大作反》
▶https://play.google.com/store/books/details?id=heJ1EAAAQBAJ

🙏最新上架！請大家多多捧場！

【常公子歷史頻道491回：黃金十年系列之 君臨天下】

▶今集內容，仍然環繞著北伐軍勢如破竹，節節勝利，1927年3月，吳佩孚受壓，兵敗在即，「五省聯軍總司令」笑面虎孫傳芳一心諗住保留實力，更加唔出兵幫助吳佩孚部隊，可能係成場戰爭的轉捩點，如果孫傳芳同吳佩孚願意互相扶持，協同抗敵，相信直系亦唔會兵敗如山倒，俾北伐軍打到一棟都冇。現實中，孫傳芳同吳佩孚雖然同一個牌頭，但係各自為政，根本似敵人多過似朋友，孫傳芳又點會幫吳佩孚；相反，蔣介石北伐軍同西南軍閥李宗仁白崇禧、與國民革命軍馮玉祥嘅關係，就比較穩固小小 。雖然響不久嘅將來，北伐戰爭結束之後，佢哋之間都打咗另一場更龐大嘅中原大戰。團結永遠是力量，一盤散沙，各自為政，就會俾敵人逐一擊破，製造敵人陣型內部分裂同矛盾，永遠比直接主動進攻更為有效同省氣力，其實呢個先係鬥爭嘅真理，放響今時今日嘅世界大局，仍然有效。

⏩https://youtu.be/VtuC8Z2o2Fw

#常威💀 #常威近代史頻道 #黃金十年系列  #民國歷史 #佛經抄寫員

［常威近代史］第七百零九回 一二九學潮（高清錄音版）

#唔鍾意睇字可以聽

https://fb.watch/eL36oVnt-I/

【常威近代史】（七百一拾回）
費孝通與實物十足準備庫

1935年12月10號，親日軍隊進犯察東。12月16號，應廣西省政府邀請，對瑤族社會歷史進行考察嘅費孝通（1910-2005）、王同惠（1910-1935）夫婦，響完成對花籃瑤嘅考察後，由古陳村往羅運鄉轉移嘅途中，迷失響陰森嘅竹林裡面，費孝通誤踏虎阱，被重石壓傷。身處迷途又臨危急嘅王同惠心焦似火，極力搶救，並且茫然奔走，呼叫求援，不過因為人生路不熟，不幸失足墮崖溺水身亡，7日之後佢嘅屍體先至被搵到。村民按當地嘅風俗為佢舉行隆重嘅悼念儀式，而費孝通之後被送入梧州思達醫院治傷。王同惠係河北肥鄉縣人，基督徒。1935年畢業於燕京大學，與新婚不久嘅丈夫費孝通到金秀大瑤山從事民族考察研究，可惜不幸身亡，年僅24歲。

而佢嘅丈夫，大名鼎鼎嘅費孝通則係中國社會學家、人類學家、民族學家、社會活動家，中國社會學同人類學嘅奠基人之一。1933年畢業於燕京大學，獲社會學學士學位。1935年畢業於清華大學研究生院社會學人類學系。1936年底赴英國倫敦政經學院學習社會人類學，1938年獲英國倫敦大學博士學位，博士論文為《江村經濟》，又譯《中國農民的生活》。1938年夏回到中國，任教於雲南大學社會學1936年底赴英國倫敦政經學院學習社會人類學，師從人類學家馬林諾夫斯基（Bronisław Malinowski，1884-1942），1938年獲英國倫敦大學博士學位，博士論文為《江村經濟》，又譯《中國農民的生活》。1938年回國，任教於雲南大學社會學系，主持雲南大學和燕京大學合辦的社會學研究室。1939年與孟吟結婚。1940年至1945年任雲南大學社會學教授，1942年前赴美國訪問，響美國住咗一年。1945年參加中國民主同盟，同年起歷任西南聯大教授，清華大學教授、副教務長。1945年至1952年任清華大學副教務長、社會學教授。1952年至1957年任中央民族學院副院長、中國科學院哲學社會科學學部委員。1957年起任中央民族學院人類學教授。響五十年代反右運動中被批鬥，1979年恢復中國社會學研究工作。1979年起任中國社會學學會會長。1980年平反，響最高人民法院特別法庭審判林彪、江青反革命集團案擔任審判員。1985年任北京大學社會學研究所所長。1988年提出「中華民族多元一體格局」理論，1988年至1998年任第七、八屆全國人民代表大會常務委員會副委員長，2005年在北京逝世，享年95歲，後葬於蘇州市吳江區松陵公園。

12月18號，冀察政務委員會喺北平成立。同日，中華全國總工會宣言支持129學潮學生，四川多處發生地震，成都震級達到6級。19號，教育部長王世杰（1891-1981）指示禁止學生遊行、請願及罷課。23號，平津各大中學校奉令即日起提前放寒假，冇辦法，學潮蔓延全國，學校要提早放假，避免學生聚集。26號，蔣介石命令南京、武漢、上海實施戒嚴。同日，國軍第一軍參謀續範亭（1893-1947）響中山陵切腹自盡，以示對妥協國策嘅抗議，因刀不利未能成功切腹。12月27號，上海文化界救國會成立；29號，宋哲元喺天津宴請日軍將領。12月30號，河南許昌煙業公司總經理鄔挺生（1877-1935）喺許昌西城門被人襲擊，死於非命。依件事被認為係對英美煙草公司壟斷許昌煙草市場行為最嚴重警告。鄔挺生年輕嘅時候服務於英美煙草公司，成為高級買辦，1933年，佢以個人名義成立許昌煙業公司，但不久之後竟然將公司全權交歸美國人管理，股東痛斥其「喪心病狂，痛心曷極」。食煙仔啫，使乜咁認真呀？不過當時香菸一定係超級大生意！

12月31號除夕，國民政府特別任命李宗仁（1891-1969）、白先勇老豆白崇禧（1893-1966）為湘、桂、黔邊區剿匪正副總司令，仍然係剿匪。同日，行政院通過發行鐵路建設公債2700萬元，繼續籌旗。今個月，財政部命令中國建設銀公司籌設不動產抵押放款銀行，以救濟地產業。天津味精廠經理實業家吳蘊初（1891-1953）喺上海創立天利氮氣廠。

今個月，省鐵墾鹽四銀行號「實物十足準備庫」附喺山西太原成立。「實物十足準備庫」，聽個名就知猛料。呢個組織職員達到600人，總庫設於山西太原，喺大同、長治等20個縣設立分庫，而且同各地大商號成立「合作商號」千餘間，響風陵渡同陽泉設立巨型運輸站，於平、津、滬、漢、陝各地設立「物產商行」10餘處，經營業務以輸出糧綿為主，其次係藥材、核桃、煤炭及皮毛等貨物，係一個全國性巨大嘅貿易物流企業組織。「實物十足準備庫」亦係政壇不倒翁、中國最後一個大軍閥，多才多藝嘅閻石山（1883-1960）重掌山西政權之後，為建設實業而設立嘅官僚資本經濟組織。

1935年12月，於焉結束。

#常威 #蔣介石平反系列  #佛經抄寫員 #中日戰爭 #民國歷史

［常威近代史］第七百零一拾回 費孝通與實物十足準備庫（高清錄音版）

#唔鍾意睇字可以聽

https://fb.watch/ePvEqy0eIR/

【常公子歷史頻道492回：黃金十年系列之 奪權遊戲開始】

▶1927年3月26號蔣介石未君臨上海之前，仲有一件大事件發生，就係中共組織上海工人發動第三次起義奪權，我講過，上海係當時遠東一個最重要嘅金融中心，係西方列強喺遠東嘅財富集中地，我稱呼為大錢罌，我個人亦相信，蔣介石北伐戰爭嘅終點，並非北方嘅北京，而係南方嘅上海。共產黨喺上海嘗試利用工人運動奪權，其實已經觸動咗蔣介石嘅殺戮神經，北伐係一場革命戰爭，但係對「革命」兩個字，似乎大家都有唔同嘅理解。中共所追求嘅革命，係一場無產階級工人革命，要徹底推翻資本主義，改寫一切生產制度；而蔣介石心目中嘅「革命」，大概只係一場音樂椅輪換遊戲，以軍閥身份嘅自己，取代原來嘅軍閥。雙方響意識形態上有極大差距，甚至是兩個左右光譜的極端，起初兩個人走埋一齊，純粹因為彼此有共同敵人，如今共同敵人消失了，本來同心合力嘅兩個人，就要彼此成為對方嘅敵人，不過我再三強調嘅係，敵人之間嘅鬥爭有好多種層次，未必一定要趕盡殺絕，雞犬不留。原來敵人直系軍閥吳佩孚同孫傳芳，蔣介石政權亦都放生了，且平安終老……

⏩https://youtu.be/gm-BHJdOh9k

#常威💀 #常威近代史頻道 #黃金十年系列  #民國歷史 #佛經抄寫員

【常威近代史】（七百一拾一回）
進入1936年大時代

時間線進入1936年，整個世界正邁向恐怖戰爭嘅邊緣，第二次世界大戰發生在即，但一如1913年一樣，全世界嘅平民百姓都唔能夠相信一次人類史上最殘酷血腥嘅戰爭即將降臨到自己身上，將原來的和平安逸徹底粉碎，依一次世界大戰，徹底改寫咗人類嘅歷史，亦將整個世界帶入一個全新嘅格局，第二次世界大戰結束之後，人類真正步入後工業世界發展嘅黃金時代，戰後嘅一兩三代人，享受住血腥戰爭殘留落嚟嘅補償，直至今日21世紀，事實上我哋身邊嘅每事每物，或整個世界嘅政治經濟基本格局，都係來自二次世界大戰嘅戰果，例如兩種意識形態嘅對立同冷戰，又例如主宰戰後百年嘅美元霸權，一切一切，都係因為第二次世界大戰嘅爆發同終結。

1936年1月1號，國民政府接收牯嶺租借地行政權；上海市市民國貨年運動大會開幕；同日，浙江省奉化縣呂全世發明安全煤油燈頭。今日，新疆王盛世才（1887-1970）與蘇聯簽訂合作協定，意欲同蘇聯建立「軍事同盟」，以保障佢新疆「獨立王國」嘅地位。盛世才咁樣做亦都無可厚非，賣國固然係賣國，但係要保住自己所擁有嘅一切，向邊邊落part，盛世才自然心中有數，睇見其他軍閥向蔣Sir靠攏後嘅收場，明哲保身都是應該的。協議嘅內容包括：1.蘇聯與新疆政府負責繼續維持全省秩序及安定，不使任何外國勢力介入或滲透；2.若新疆遭受外來攻擊，蘇聯即給予政治、經濟和軍事的援助；3.如新疆獨立，蘇聯有義務支持。第一點第二點當鳩噏，第三點就講到明，新疆會獨立，而且好快會獨立，而且會由蘇聯背後撐腰成事。這份盛世財同蘇聯簽訂嘅宣言，其實亦係一份變相嘅新疆獨立宣言。去年1935年5月16號，盛世才已經同蘇聯貿易公司響烏魯木齊簽訂總額為500萬盧布嘅借款合同，年息盛惠4厘，限期5年，以土產作擔保，分期還本。之後大批蘇聯顧問同埋工程人員湧入新疆，遍佈軍事、行政、財經、交通、工程等各項領域，成為實際操縱新疆事務嘅「無形之手」，借錢畀你，就想吞埋你，亦都係正常，鬼叫你窮？個世界其實好公平，只要有錢就大曬，冇水就收皮！