【常威近代史】(五百六十六回)
兩條路線之爭 城市 vs 農村
1930年6月11號,國民政府外交部發表聲明,唔承認上海租界華洋德律風公司出賣電話營業權予國際電報電話公司,認為該項營業權應由中國政府出資收回,中國嘅電話業務,無論喺華界、租界都應該歸中國自辦,又係國中有國嘅基本問題。上個月,上海租界華洋德律風公司將電話營業權投標出讓,國際電話公司中標,得到租界工部局給予40年營業專利權。中華民國交通部認為呢件事侵害中國主權,於是寫信函請外交部向租界當局交涉。
6月3號,交通部發表收回上海租界電話理由書,指出租界當局奪取華商股權,授予外人,又指出,若政府不及時交涉收回,此做法勢必成為他日收回租界時嘅大障礙。經過成個月交涉,7月31號,上海租界工部局董事會唔理中華民國外交部反對,正式批准華洋德律風公司依照合同辦事,將電話專營權出售比國際電報電話公司,由此可見,上海租界仍然勢力龐大,鬼叫你有錢咩?冇錢邊有得惡先?
6月11號,實際主持中共中央工作嘅中央政治局常委,中央宣傳部部長李立三(1899-1967),喺上海召開中共中央政治局會議,會議通過咗由李立三起草嘅《新的革命高潮與一省或幾省的首先勝利》決議。決議認為「中國經濟政治的根本危機,在全國任何一處都是同樣繼續尖銳化,沒有絲毫根本的差別」。李立三指出「中國新的革命高潮已經逼近到我們的面前了」,「有極大的可能轉變成為全國革命的勝利」。決議要求中共喺全國各中心城市發動工人罷工同武裝暴動,要求紅軍「與主要城市的武裝暴動配合,奪取政權,建立全國革命政權」,指示紅軍「過去的遊擊戰術要根本的改變過來」。呢個就係所謂李立三路線,同毛澤東一直堅持嘅農民路線遊擊戰略,有基本上嘅分別。簡單啲講,亦都係「城市人」同「農村人」嘅分別,係「傳統馬克思主義組織工人發動革命」同 「毛澤東農民路線,以鄉村包圍城市」嘅分別。
李立三稍後制定咗全國中心城市起義,同埋集中全國紅軍主力進攻中心城市嘅大計劃。佢命令紅三軍撤斷武漢、長沙鐵路,進逼武漢;紅一軍進取南昌、九江;紅二軍團配合紅一軍進攻武漢;紅七軍進攻柳州、桂林同廣州。
6月12號,日本藉口延邊有共產黨活動,陳兵於圖們江東岸; 6月15號,蔣sir軍隊喺海軍嘅援助下,重新佔領岳陽,李宗仁白崇禧率領嘅桂系部隊退出長沙; 6月16號,閻錫山任命嘅天津稅務師,閻馮軍總司令部顧問辛博森,今日會同天津市政府及警備司令部代表接收天津海關。原來嘅天津海關稅務司勃爾逃往英國領事館避難,如果冇錯,辛博森同勃爾應該都係鬼佬。
辛博森接收天津海關口後,發表聯合聲明,指出對於擔保債務部分之關款,按舊案妥善保管,所有該關收入稅款,存放原指定銀行,即係基本格局不變,只係換咗個牌頭。6月18號,國民黨中央就此決議辦法三則:第一照會英國公使驅逐辛博森出境; 第二關閉天津海關; 第三天津海關稅款由大連青島海關代徵。6月19號,外交部照會各國,正式取消天津海關。