大清亡國關慈禧蛋牛治 3

1001 回覆
42 Like 34 Dislike
2021-11-04 12:14:47
【常公子歷史頻道426回:替大軍閥平反系列之 亂 你見過亂未】

♊ 第26屆聯合國氣候變化大會喺英國格拉斯哥舉行,作為東道主嘅英國痴線首相約翰遜發表開幕辭,提及全人類正被綁在一個末日裝置之上,距離爆炸時間只剩低小小,好快就會一鑊熟,同歸於盡!的而且確,過去一兩年,整個地球因氣候變化出現反常天氣狀態,加上新型冠狀病毒疫情肆虐,大家都可以睇到,情況其實都幾惡劣。當然如果你寄望COP26 依類咁嘅會議開多幾個,就可以挽救地球,咁你嘅情況就更加惡劣。

♉ 亦有科學家推算,如果地球持續升溫2度攝氏,去到今個世紀末期,就會有好多沿海嘅城市被淹沒,而阻止地球繼續升溫,就係要減碳,達到碳中和,大力減少使用有機化石原料,大量使用環保新能源,減少吃肉,減少砍伐森林……等等等等。其實目標都幾清晰,我亦唔想潑冷水,下一代人,同下下一代人的確會好大鑊,冇得迴避,希望大家盡做,救得幾多得幾多。就我自己嚟講,我會儘量節儉,唔會亂買嘢,唔會亂抌嘢,出入使用公共交通工具,儘可能食清淡啲簡單啲,煙就冇得戒了,我諗自己亦冇可能成為素食者,唯有其他方面多多努力,希望做多啲。我亦好相信,如果大家都肯做多啲,如果大家都唔係淨係得把口,坐言起行,個地球仲有得救,當然真正大洪水到嘅時候,我已經唔響呢個世界上……

♏COP26會議上,亦通過咗一個無約束力嘅議案(其實大部份都冇約束力,純粹講吓就算),就係希望係響2030年,全地球停止砍伐森林,呢個咁偉大嘅構想,實踐時間距離現在祇有7、8年,如果真係做得到,地球村民就真係嚮前行咗一大步,希望真係可以成功實現喇。「環保」最大嘅問題係乜嘢?就係個個得把口,你又講我又講,講到識飛天咁,但講就天下無敵,做就有心無力,或者講出十成功力,最後留力九成九,尤其是以地球上幾個超級大國為首,一方面又要經濟發展印銀紙,另一方面又要搞環保碳中和,其實兩個概念係背道而馳—— 即係一方面又想sales好好,另一方面又唔想去見客—— 其實係冇可能,凡事必須要作出犧牲,我都想唔X使返工,日日Bee八達通就有1000蚊駛,但其實冇可能……

https://youtu.be/a6yqv19OqnQ


💙最新上線,請課金支持
【常威近代史】第十一部《人生有幾多個黃金十年》
https://play.google.com/store/books/details?id=NIRKEAAAQBAJ
Kindle版
https://www.amazon.com/dp/B09KH5NWB9
2021-11-04 21:29:32
[常威近代史]第六百零八回 生於憂患 死於空難(高清錄音版)

#唔鍾意睇字可以聽

https://www.facebook.com/129055447762576/posts/836425793692201/
2021-11-05 19:01:56


【常威近代史】(六百零九回)
時代雜誌與大閘蟹

距離918事變三個月後,1931年11月17號,蔣Sir與妻子宋美齡 登上美國時代雜誌TIME封面,之前講過,光頭佬民國關公吳佩孚係第一個登上時代雜誌封面嘅中國人,我唔知道蔣Sir係咪第二個,不過就非常清楚who is 金主了?有啲嘢,其實都幾簡單。

1931年11月,中華蘇維埃共和國成立,毛澤東登上權力最高位置,事實上,依一次喺江西蘇區瑞金召開嘅中華工農兵蘇維埃第一次全國代表大會,亦都係代表咗毛澤東路線戰勝李立三路線。之前,響中國嘅共產主義運動中,出現咗兩個傑出嘅領導人物,佢哋分別係毛澤東同李立三(1899-1967),當然周恩來亦係其中一個,不過周恩來已經充分表現出佢嘅機智同靈活性,正正就係呢種機智同靈活性嘅結合,令佢喺政治鬥爭中永遠處於不敗之地,響之後嘅40年,周恩來更加將佢嘅機智靈活,發揮至淋漓盡致、無人能及境界。

響1931年之前,毛澤東仍未能夠喺全黨確立絕對嘅領導地位,原因係俄國第三國際嗰邊唔承認佢嘅豐功偉績,認為佢唔係正統嘅馬克思主義者,而李立三則響中國共產黨第六次全國大會上當選為總書記,呢次第六次全國大會,係響莫斯科舉行。李立三同毛澤東一樣都係湖南人(劉少奇都係),李立三比毛澤東小七歲,曾經喺法國參加過勤工儉學,1919年進入里昂大學,後來因為搞學生運動而被里昂大學開除,之後去咗莫斯科,飲過鹹水嘅佢,令佢喺黨內鬥爭中比毛澤東處於更有利嘅地位,因為當時國際共產主義運動正係由莫斯科共產國際領導。

中共六大之後,黨內爭論嘅焦點係,中國革命究竟應該依靠城市裡面嘅工人(傳統馬克思主義觀念,亦係馬列理論同埋蘇聯領導人所堅持嘅觀點)?抑或係依靠廣大農民?毛澤東認為,喺中國一個農民佔絕對人口優勢嘅農業國家中,農民先係真正嘅革命力量。兩條路線之爭就係咁出現,李立三1928年春天由莫斯科返回中國,佢帶返嚟嘅係列寧主義或史太林嘅政治正確性,於是佢就根據馬列主義嘅經典理論,開始準備以城市為基礎嘅工人革命起義活動,同一時間,毛澤東及其追隨者則轉移到江西福建交界打運動遊擊戰,擴展蘇區,繼續搞佢嘅農村農民路線。毛澤東當然唔認同李立三,覺得佢只講理論,唔理實際情況。

事實勝於雄辯,李立三響1928至1930年間發動嘅一連串城市起義,根本毫無作用,而且令到紅軍死傷慘重,反而毛澤東響窮山惡水中節節勝利,奇跡地抵禦咗蔣Sir 嘅三次大圍剿。於是,1931年,毛澤東響政治鬥爭中取得全面勝利,莫斯科雖然唔認同毛澤東,但係亦都冇辦法,齊天大聖你估講笑?而佢嘅政治對手李立三,則如陳獨秀一樣,被指控為托洛茨基份子(托派),並且被開除出政治局,不光彩地回到莫斯科,李立三喺莫斯科逗留咗好多年,投閒置散,直至1949年中共建國之後,佢先返番嚟中國,響承認自己年輕時所犯嘅錯誤後,佢被允許重新從事政治工作,並於1958年當上勞動部部長。但係喺文化大革命期間,佢受到紅衛兵嘅批鬥而自殺身亡。
2021-11-05 19:02:08
20至30年代城市工人革命嘅失敗,農村革命嘅成功,證明咗毛澤東嘅政治正確性,從此之後,毛澤東正式唔再受第三國際(上頭)嘅絕劉擺佈,更積極地靈活地響中國革命中開展屬於佢嘅大農民戰略,以農村包圍城市。世界上並無僥倖,政治上更加沒有,毛澤東嘅勝利,在於佢能夠喺實際經驗環境中出發去考量事物,讀書識字尋死路,能夠讀曬馬克斯列寧托洛斯基又點?並唔代表可以喺革命中取得勝利,「實踐是檢驗真理的唯一標準」聽過未先?所謂「唯物辯証法」,真正精神亦在於此。

去到1931年12月,以汪精衛為首嘅粵方國民黨,響大會上通過胡漢民所提出嘅調解粵方大會內部分裂辦法,任何地方任何組織都會分裂,大矛盾中又有小矛盾,小矛盾裡又有更小嘅矛盾,大家都需要調解矛盾,而調解矛盾嘅最好方法,就係製造一個新嘅敵人出嚟,拉一派,打一派,明就明,唔明亦都冇辦法,亦都係叫唯物辯証法。

12月2號,立法院通過《戶籍法》,12月5號,北京大學示威團南下示威,去到南京與警察發生衝突,示乜威?宣傳抗日囉,12月6號,上海「青年自動赴東北援馬抗日團」 200幾人,主動前赴東北支援馬佔山打日本仔!唔知道最後佢哋有冇去到東北呢?如果佢哋去咗,馬占山亦應該已經成為咗「偽滿洲國準黑龍江省省長」了。全國抗日氣氛熾熱,但係話事人領導者根本唔想打,亦冇得打,唔敢打。

中日戰爭爆發,經濟行情亦受影響,上海交易所上市嘅幾種主要公債暴跌,918事變發生嘅6日內,上海五種主要公債面值下跌四成!去到東三省被日軍佔領,撤入關內嘅東北軍部隊軍費又由南京中央政府支付?咁大條數,廣東、山東、湖北等省於是立刻截留稅款,上繳中央即係掟錢入鹹水海?加上918前夕,三次大圍剿紅軍,你估啲錢喺邊度嚟呢?咪發債再發債囉,唔通搵大衛高柏飛變出嚟咩?918之後,南京政府更加入不敷支,於是只有計劃暫時停止支付公債利息,以應付龐大嘅軍費開支,咁買咗債券嘅朋友,自然就覺得俾你搵咗笨柒,你下次再推公債,真係搵鬼買?一個非常嚴重嘅惡性循環,就係咁樣出現鳥。

#常威💀 #蔣介石平反系列 #黃金十年 #民國歷史
2021-11-05 19:02:24
https://www.youtube.com/playlist?list=PL0RVUAILQUOvTo8JJrayjrvd_Nbjc-0Me

❤請加入常公子的近代史世界!

#常威 #廣東話 #中國近代史 #HongKong #Chinese #History
2021-11-06 11:46:02
【常公子歷史頻道427回:替大軍閥平反系列之 第三國際猛人鮑羅廷】

♊ 一個新型冠狀病毒疫情殺到,令到全球亂過亂世佳人,今次病毒最得人驚嘅地方,病毒嘅殺傷力非常恰到好處,既會殺人,又唔會# **八亂咁殺,結果理又得,唔理又得,於是乎大家莫衷一是,好似現在咁,中國致力清零,西方國家則講要同病毒共存,要將新型冠狀病毒視作風土病,其實兩邊都冇話錯。前者清零,固然係好,冇人因病而死,但付出的代價非常龐大; 後者頂唔順,要回復經濟正常運作,但係則以人命作為代價。所以凡事凡物,真係冇話啱定錯,要睇吓你嘅立場係邊度,都係觀點與角度嘅問題,香港既然係中國嘅一部分,跟隨清零策略,亦係無可厚非。

♐ 不過成件事,又已經漸露曙光,首先,新型冠狀病毒口服藥物己經推出,根據臨床實驗,藥物能夠大大降低入院率同死亡率,如果真係有用,件事會係短時間內完全搞掂,總之領咗嘢就食口服藥,返屋企休息幾日,然後返工,同傷風感冒一樣。其次,最近日本嘅感染率大大降低,好有可能係病毒再變種之後,傳播力同殺傷力日漸減弱,不過目前證據未足,但種種跡象顯示,疫情應該會響2022年上半年消失,然後全人類回復正常生活,希望係咁,除非唔係。

♉前前後後,病毒肆虐咗兩年,大家都五癆七傷,點都要搵個借口出嚟終止亂局,因為大家印銀紙印落去,始終唔係辦法。而且除咗病毒,整條地球村嘅人民仲有好多問題要處理,例如環境問題、氣候變化問題,以及日益嚴重嘅政治分化問題,21世紀20年代,同20世紀20年代都好似,充滿挑戰,矛盾同鬥爭,大家冇辦法回避,亦冇可能回避,唯有逆難而上,面對未來。

https://youtu.be/wnpuHPyc-T8

💚【我奮鬥不奮鬥】 常公子 楊熙合著
電子書下載⬇ https://play.google.com/store/books/details?id=CVo3EAAAQBAJ
Kindle版下⬇
https://www.amazon.com/dp/B098XHWTDK
實體書訂購⬇
https://www.382now.com/product?id=325
2021-11-07 13:19:01
[常威近代史]第六百零九回 時代雜誌與大閘蟹(高清錄音版)

#唔鍾意睇字可以聽

https://www.facebook.com/129055447762576/posts/837871416880972/
2021-11-09 11:00:40
[常威近代史]第六百一拾回 傻逼 唔信你又點用你(高清錄音版)

#唔鍾意睇字可以聽

https://www.facebook.com/129055447762576/posts/838887736779340/
2021-11-10 17:28:45


【常威近代史】(六百一拾一回)
錦州失守 大局已定

上一節講到,918日本仔打到嚟,蔣Sir國民政府選擇唔反抗,十幾萬東北軍退入關內,結果關東軍創造咗人類有史以來差唔多最大嘅軍事奇跡,係短短三個月間,佔領咗相等於日本本土三倍面積嘅土地,袋袋平安,如果好似有啲經濟學家所講,土地就係財富唯一嘅來源嘅話,東北軍我諗大大話話攞咗幾十萬億美圓咁上下,仲有仲有,唔知當時有冇人知道,黑龍江省內有一個大慶油田,石油儲存量係世界上十大之一,價值何止幾十萬億美元?我個人認為,東三省有石油儲存,應該一早有人知道,開採係一回事,知道又係另一回事。有三件事,為中華人民共和國打下建國根基,第一係打贏場韓戰;第二係兩彈一星,即係擁有核武; 第三就係1959年大慶油田開始採油,百年基業,亦係由此建成。所以東三省其實好重要。蔣Sir你拱手相讓出去,相信係美國嘅意思,全國人民冇人同意,觸發抗日情緒爆發,軍人有軍人叛變,民間有民間示威,學生示威團去到南京,被開槍鎮壓有人死!大家千萬唔需要問,當時點解咁多人加入共產黨?點解國民黨內咁多鬼?理由其實簡單易明,再重複多一次,天下間冇無緣無故嘅愛,亦冇無緣無故嘅恨,人在做,天在看。報應未到,只因時辰未到。

1931年12月15號,偽奉天省政府成立,臧式毅(1884-1956,滿洲國重要人物)任偽省長。12月19號,上海文藝界反帝聯盟成立,抗日民間組織紛紛冒起。同日,國母宋慶齡打破緘默,喺上海發表《國民黨已不是一個政治力量》嘅時局聲明,指出國民黨由於「黨內自己的領袖」嘅反動行為,已經不能作為一個政治力量而存在,矛頭直指蔣Sir!連德高望重嘅國母都咁講,你話蔣Sir點會受歡迎?聲明內指出,南京及廣東兩個國民政府政權,都係依賴軍閥,諂媚帝國主義,背叛民眾,同為革命罪人。言下之意,即係話蔣Sir同汪精衛都收咗帝國主義錢,不過,普天之下,相信亦冇一場背後冇金主嘅革命,收嘅錢係乾淨定汙糟,視乎觀點與角度,宋慶齡表示,佢唔忍心見到孫中山多年嘅努力「被國民黨軍閥政客所破壞」,國母又表示,將會支持「以群眾為基礎並為群眾服務的革命」,簡單啲講,國母係共產黨,亦由國母身上反映出,孫文生前係一個百分百嘅馬克思主義者同共產主義信徒。
2021-11-10 17:28:57
12月21號,今時今日我哋開始買禮物過聖誕節,1931日軍以奪取錦州為目的,對遼西地區嘅大規模軍事行動今日開始。日軍兵分三路,右翼為獨立守備隊、騎兵第二聯隊同39旅團,進攻法庫、彰武; 左翼為第二師團,從營口渡過遼河,向田莊臺、大窪推進; 中路為第38混成旅團,從瀋陽出發,進攻大虎山、溝幫子,三支部隊最後嘅目的地都係錦州。位於遼西走廊嘅錦州係關內關外嘅咽喉要地,亦係山海關嘅天然屏障,如果能夠佔領錦州,既可切斷東三省與關內嘅聯繫,又可以坐陣進攻熱河、平津(即係北京),係非常重要嘅戰略位置,其後1945年嘅國共內戰,亦係由林彪進佔錦州後,將整個形勢完全逆轉。

由10月8號開始,日軍飛機已經不斷轟炸錦州。10月下旬,日軍出動鐵甲車沿北寧鐵路向西推進,被中國軍隊嘅鐵甲車「中山號」阻擋於繞陽河車站,11月20號,雙方交火,「中山號」寡不敵眾,被迫退到大虎山,繞陽河車站易手,11月27號,日軍直接向錦州發動總攻擊,但由於美國政府發出警告,日軍第二日被逼撤退。12月11號,日本第二次若槻內閣倒臺(若槻禮次郞,1866-1949),13號,犬養毅(1855-1932)繼任內閣總理大臣,佢上任後,隨即表態支持關東軍係中國嘅軍事行動,於是日軍繼續進攻錦州。守住錦州嘅中國軍隊包括兩個步兵旅、一個騎兵旅、一個炮兵團同三個總隊嘅公安騎兵,歷史記載,佢哋從12月21號起,同日軍苦戰咗十個晝夜,佢哋就係張學良指揮嘅東北軍,部隊苦苦支撐,死守錦州,一再向中央告急,要求支援,但係從來得不到一分糧餉同一槍一彈嘅支援,我亦唔知道點解?去到1931年嘅12月底,錦州外圍陣地全被日軍突破,1932年1月3號東北軍全部撤出錦州,退至灤洲(灤,音聯),錦州落入日本人手上。

12月24號,國民黨派趙丕廉前赴太原,恭迎閻石山、馮玉祥參加四屆一中全會,昨日嘅敵人,今日又要成為盟友,共同抗日。寧粵兩個政權宣佈大和解,國民黨重新統一。但係西南軍閥,例如李宗仁(1891-1969)、龍雲(1884-1962)及南天王陳濟棠(1890-1954)等等,均對「寧粵合作」持審慎懷疑嘅態度,你開緊一中全會嘅同時,兩廣反蔣勢力亦喺12月30號同31號召開兩次聯席會議,決定成立國民黨西南執行部、國民政府西南政務委員會,同軍事委員會西南分會,以繼續自主掌握兩廣黨、政、軍大權。當中西南政務委員會有唐紹儀(1862-1938)、蕭佛成(1862-1940)、鄧澤如(1869-1934)、李宗仁、陳濟棠、龍雲等27人,真係山頭處處,七國咁亂。

#常威💀 #蔣介石平反系列 #黃金十年 #民國歷史
2021-11-11 12:49:18
【常公子歷史頻道428回:替大軍閥平反系列之 曹錕買總統】

♊ 今集講直系軍閥大佬曹錕買總統,有錢使得鬼推磨!令佢成為中華民國國史內一個傳頌千古嘅大笑話,不過我再三強調,當時曹錕,以佢嘅實力(或者軍事實力),根本唔需要用錢買總統,佢可以用好多方法成為中華民國大總統,佢用錢收買國會議員,無非都係想得到足夠嘅票數(合法)當選,某程度上,都係維持法統嘅存在,係曹錕之後,好多人根本唔需要理會國會議員嘅票數,或者,係曹錕之後,好多負責投票嘅人已經冇咗自由意志。

♊ 政府尋日公佈香港貧窮人口,道出每四個香港人就有一個窮人,界定標準題一人家庭月入少於4000元為貧窮,五人家庭,月入少於20000元為貧,數字其實好得人驚,一家四五口,月入少於20000元,活於現在香港,其實有點不可思議。報告指出,全香港現在大約有130萬-150萬貧窮人口,貧窮人口上昇,主要同呢兩年嘅疫情所引發嘅失業情況有關,現在,新型冠狀病毒疫情,個人感覺已經到達尾聲,現在發生嘅事,都係善後問題同埋落臺階嘅問題。

♊ 經過2019年至今嘅政治大洗牌,用官方講法,香港大致上回復平靜狀態,反對聲音消失,議會爭拗亦都唔再響未來立法會存在,理論上,政府嘅施政應該會更加順暢同有效,龐大嘅貧窮人口數字,將會係特區政府嘅一大挑戰,既然再冇反對作亂嘅聲音同勢力對抗,咁剩低嘅,就係政府施政能力嘅問題,未來,香港會遇上嘅挑戰同困難,一定會比想像中大,同坐一條船上,當然想條船好,我唔能夠說挑船,亦冇資格跳船,香港是我家,希望未來會變得更加好……


https://youtu.be/Cfz4CZip2VY
2021-11-11 14:40:07
[常威近代史]第六百一拾一回 錦州失守 大局已定(高清錄音版)

#唔鍾意睇字可以聽

https://www.facebook.com/129055447762576/posts/840045149996932/
2021-11-12 23:04:32


【常威近代史】第十一部《人生有幾多個黃金十年》
https://play.google.com/store/books/details?id=NIRKEAAAQBAJ

Kindle版
https://www.amazon.com/dp/B09KH5NWB9
2021-11-13 12:16:16
【常公子歷史頻道429回:替大軍閥平反系列之 三分天下魏蜀吳】

♊ 三國時代,有魏蜀吳三分天下,當中曹姓魏國本為正統,曹操生前挾天子以令諸侯,從來並冇取而代之,嚴格嚟講,曹操係忠臣,維持大漢江山到最後,稱帝改國號、改朝換代嘅人,其實係佢個仔曹丕,唔關曹操事,後世人將篡漢罪名推到曹操身上,其實係千古奇冤,不過冇辦法,雄才大略嘅曹操被羅貫中一本《三國演義》小說描述成一代大奸人,真係有冤無路訴,歷史嘅真相,好多時候並非我哋嘅想像。

♉劉備以漢宗室後人自居,建立蜀國,自持正統,亦只不過佢係啱啱姓「劉」,因為補鞋佬,真正是否擁有皇族血統?有待質疑。蜀國建國過程,亦都相當心狠手辣,好話唔好聽,叫壞事做盡,出賣恩人,過橋抽板,冇樣嘢好睇。但係亦由於羅貫中重新演繹,劉備成為大忠臣,對照曹操,人格上係天同地。蜀漢建立之後,劉備更加起兵討伐從前嘅盟友東吳,結果慘敗收場,叫天有眼。

♊民國時代,亦都出現天下三分之勢,直系控制中央政府,為中華民國正統,關外嘅奉系張作霖,用日本人嘅支助坐大,獨佔一方。南方有一衆西南軍閥,當中孫文嘅廣州政權好似劉備一樣,以正統自居,後來得到蘇聯嘅資助,發動北伐戰爭,討伐北京中央政府,取得大勝利,成就遠遠超越劉備。 閱讀歷史,有兩樣野永遠搵唔到,第一樣嘢叫「真相」; 第二樣嘢叫「正義」,總之打贏咗,就叫正義,打贏咗叫人寫落嚟嘅,就叫真相; 唔明白呢個大道理,讀歷史會讀到一嚿雲。

https://youtu.be/1cfStboITcY

💚【我奮鬥不奮鬥】 常公子 楊熙合著
電子書下載⬇ https://play.google.com/store/books/details?id=CVo3EAAAQBAJ
Kindle版下⬇
https://www.amazon.com/dp/B098XHWTDK
實體書訂購⬇
https://www.382now.com/product?id=325
2021-11-14 15:08:49
[常威近代史]第六百一拾二回 真係要幾痴線有幾痴線(高清錄音版)

#唔鍾意睇字可以聽

https://www.facebook.com/129055447762576/posts/841740676494046/
2021-11-15 13:00:21



【常威近代史】(六百一拾三回)
攻打上海灘

1932年1月18號,國民政府派駐國聯代表,由顏惠慶(1877-1950)代替施肇基(1877-1958),國聯completely幫唔到中國,喺依個聯合國前身嘅國際組織之中,其實好多西方國家都認為918事變,基本上係中日兩國要解決嘅「滿蒙地區問題」,同中華民國正統史觀( 當然依個史觀係後來先建立)完全唔同,正統史觀,因為冇所謂「滿蒙地區」存在,一個中國嘛,五族共和嘛,當然如果你問一個滿洲人或日本人,佢哋會唔認同,世界上面嘅嘢,好多時候都有各持己見嘅問題,你自己睇度黑,人哋就見到白,所謂「正確」本身,並唔係科學問題,係政治問題,政治問題,就係立場問題,立場問題,就係主觀問題。人類畢竟就係一種主觀性同有立場嘅動物,否則就係石梨背水塘一隻馬騮。

1月18號,兩大仇人終於見面,蔣Sir同汪精衛喺杭州西湖會面,真係世紀喜相逢,兩人秘密洽談合作條件,並且打算一同進入南京,我相信會面當時,雙方保安一定極度嚴密。

1月18號,南京中央大學學生舉行全體會議,確定新校長嘅標準為,第一要係純粹嘅學者;第二要有辦理高等教育嘅豐富經驗; 第三絕對唔可以有政治色彩; 學生仲揀咗三個人,要國民政府揀一個任命。上個月,中央大學校長朱家驊(1893-1963)辭職,國民政府於本月八號任命桂崇基(1901-1990)繼任,但畀學生反對,而且桂崇基仲比學生打傷,真係惡,真係民主。31號,行政院任命任鴻雋(1886-1961)為中央大學校長,但任先生唔到任(醒目仔),此後代理校長段錫朋(1896-1948)也不被學生接受,呢期大學生真係惡。

1月21號,國際聯盟滿洲調查團成立,要出發前住滿州調查吓誰是誰非?同日,行政院命令各部門削減經費及裁員,窮見鬼。22號,孫科宣佈政府向上海銀行界每月借800萬經營,維持兩個月,唔知息口係幾多呢?1月24號,頭先提過嘅南京中央大學教授停止教學,因為冇糧出。你睇,蔣Sir下野幾大件事?1月26號,中德簽訂煉鋼廠合約,中國向德國借款美金2000萬元(頂住先)!1月28號,蔣Sir主持國民黨臨時中政會,決定任命汪精衛為行政院長,孫科為立法院院長,如果汪蔣兩人,真係咁樣團結起嚟就好,可惜絕對唔會囉!
2021-11-16 11:24:18
[常威近代史]第六百一拾三回 攻打上海灘(高清錄音版)

#唔鍾意睇字可以聽

https://www.facebook.com/129055447762576/posts/842718366396277/
吹水台自選台熱 門最 新手機台時事台政事台World體育台娛樂台動漫台Apps台遊戲台影視台講故台健康台感情台家庭台潮流台美容台上班台財經台房屋台飲食台旅遊台學術台校園台汽車台音樂台創意台硬件台電器台攝影台玩具台寵物台軟件台活動台電訊台直播台站務台黑 洞