大清亡國關慈禧蛋牛治 3

【常公子歷史頻道448回：替大軍閥平反系列之 北京政變】

♊ 今日係大年初三，同大家拜年，恭祝各位支持常公子歷史頻道嘅朋友身體健康，萬事勝意，事事順心，無風無浪又一年。

♐過去兩年，全世界被新型冠狀病毒疫情困擾，相信冇乜人會好過，香港經濟底氣夠，好有可能喺世界上少數仍然保持經濟穩定嘅地方，不過，外強中乾大勢已成。二零二二年，香港真係要諗吓何去何從？過去一兩年，經歷咗一次開天闢地嘅改變，香港再不是從前嘅香港，過往沿用嘅揾食絕活，亦都唔可以繼續用落去。世界不停在變，香港已經好多年無變過，一個武功高手，如果固步自封，必然有朝一日落後於人。20世紀末期，香港係亞洲之顛，整個亞洲所有地區都喺度模仿香港嘅成功模式，睇香港電影聽廣東歌羡慕東方之珠嘅成就，今時今日呢？明眼人都知道發生乜嘢事？所以一定要變。

♈烏克蘭局勢進一步惡化，美國已經向東歐增兵。普京繼續拉攏盟友，會唔會真係開拖，都係未知之數？中國冬季奧運會舉行在即，更為烏克蘭局面增添變數。未來幾個月，我個人預料，整個世界大過將會出現巨大變化，病毒問題要儘快解決，大家都需要搵一個下臺階當冇件事，儘快恢復經濟人脈交流，大家都需要過返正常生活，否則後果不敢想像。

🎦https://youtu.be/iVB2iVsLyKk

［常威近代史］第六百四十四回 廢兩改元（高清錄音版）

#唔鍾意睇字可以聽

https://fb.watch/aXHTZvSIcB/

【常威近代史】（六百四十五回）
秦皇島北戴河

1933年4月12號，新疆的化城防務指揮官白毓秀、督辦公署參謀陳中、航空隊長李笑天及白俄歸化軍團長安東諾夫等人發動兵變，新疆省政府主席兼邊防督辦金樹仁（1879-1941）越牆出逃。兵變眾人推舉教育廳長劉文龍（1869-1950）為臨時省政府主席，4月14號，軍閥盛世才（1897-1970）率領部隊進入迪化，與陳中等人召開會議，最後盛世才被推舉為新督辦，金樹仁見大勢已去，於4月24日通電下野，盛世才接管新疆，之後盛世才亦有「新疆王」嘅稱號。盛世才於1933年統治新疆一帶，直至1944年9月11日先離開新疆到重慶，盛世才響新疆歷時11年5個月的軍閥統治才宣告結束。

盛世才掌握軍政大權後，著手進行省政改革工作，以「實行民族平等、保障信教自由、澄清吏治、改良司法、整理財政、農林救濟、擴充教育、推行自治」為施政八大方針。取消咗原「十大綱領」中的外交歸中央、實施黨化教育、財政與中央統一等內容。1934年11月，盛世才又提出九項新任務，聲稱惟有反帝反法西斯，永久維持中蘇親善政策，才能解放中國和建設新疆。1936年4月，他陸續提出六大政策，即：反帝、親蘇、民平（民族平等）、清廉、和平、建設。為此，盛世才專門寫了《六大政策教程》一書，設制了六星旗到處懸掛，一時頗受新疆地區各民族擁護與愛戴。同年，佢甚至提出響新疆實行社會主義，並將其推行到甘肅和陝西，但被蘇聯政府勸阻。

4月15號，《中國經濟》 雜誌喺南京創利，同一日，何應欽（1890-1987）下令撤退駐秦皇島嘅守軍，日軍亦都即刻佔領秦皇島。秦皇島係河北省嘅重要軍事要點，直通唐山、天津及北平市，好出名嘅北戴河避暑勝地，就係位於秦皇島市。由1958年毛澤東時代開始，每年中共暑期中央會議一般都會響北戴河召開，中間雖然有所間斷（例如文革期間、胡錦濤時代），但幾乎每次中國共產黨全國代表大會召開之前嘅醞釀會議（所謂碰頭會），都會響北戴河地區舉行，所以將北戴河視為中華人民共和國歷年以來產生重要決策嘅地方，其實冇錯。

4月17號，著名教育家林兆翰積勞成疾，不幸逝世，林先生係清末秀才，身經庚子之難，深深感覺到推行新式教育嘅重要性，1902年，佢同退職後居天津嘅嚴修（字範孫，1860-1929）共同籌辦創辦天津第一所小學堂，名為民立第一小學堂。1904年，林先生任天津學務總董。為咗普及新式教育，林先生首倡「廢廟興學」之舉。佢仲親自積極倡辦女子小學11間，親自擔任各學校嘅校監。

除咗林兆翰，不得不提嚴修，佢係光緒九年（1883年）癸未科進士，殿試位列二甲第十一名，授翰林院編修。1898年，戊戌變法失敗後，嚴修相信中國必須變法維新，故辭官返鄉在天津棄政從教，1903年，嚴修親自主持建立了天津模範小學、天河師範學堂、北洋師範學堂、直隸女子師範學堂、直隸高等法政學堂等學校。辛亥革命之後，嚴修一直從事教育事業，1918年10月，嚴修偕同另一位學者張伯苓（1876-1951）去美國考察教育，途經日本時，正在日本讀書嘅周恩來（1898-1976）陪同嚴修參觀遊覽考察。1919年9月25日，由嚴修創辦嘅南開學校增設大學部。1920年，響南開大學就讀嘅周恩來參加學生運動後被捕，出獄後失學，嚴修出資7000元設立「嚴修獎學金」，經南開大學校董會討論，決定資助周恩來同教員李琴湘之子李福景（1901-1960）前赴歐洲勤工儉學。周恩來曾於1916年寫道，「然欲相勉以道德，相交以天真，相待如兄弟者，僅得二人焉。一曰李新慧，一曰吳峙之。」李新慧即係李福景，吳峙之即係吳國禎（1903-1984）。

4月19號，上海市商會大宗進口外國米、麥、粉類產品，令到糧食價格暴跌。同日，唐山交通大學遷往上海，北京大學、北京師範大學等學校亦預備將圖書儀器南運，既然權力中央由北京轉至南京，上述嘅事件亦會不斷發生。4月19號，江南鐵路公司係上海正式成立，選舉李石增、張靜江（1877-1950）等19人為董事，張靜江為總經理。上年7月，國民政府建設委員會委員長張靜江聯合江浙商紳，倡議修建蕪（湖）乍（浦）鐵路，自蕪湖，經廣德至浙江的吳興、嘉興，到達乍蒲海口，並為此組成商辦蕪乍輕便鐵路公司，因國民政府鐵路已經有京粵鐵路，致南京經蕪湖、南昌至廣州計劃，因此蕪乍輕便鐵路公司於上年10月改為商辦江南鐵路公司。江南鐵路公司成立後，鐵道部應張靜江嘅要求，將蕪湖至灣沚段嘅工程作價36萬，讓予該公司先行動工，1934年7月，通車至宣城。由上述的事件可以睇到，當時嘅國民政府，的確官商難分，鐵路運輸系統油水有幾豐厚？相信大家都是明白的。江浙財閥一直係蔣Sir背後最大嘅金主同支持者，有付出就必有回報，南京政權企穩陣腳之後，自然財源滾滾來。不過唔需要羡慕，投資本身有風險，買中咗，就一天光曬。眼光固然重要，運氣更加重要，時勢造英雄，有時候無可厚非。

#常威💀 #蔣介石平反系列  #中日戰爭 #民國歷史 #佛經抄寫員

【常公子歷史頻道448回：替大軍閥平反系列之 民國呂布】

♊ 今日係大年初五，繼續同大家拜年，恭祝各位支持常公子歷史頻道嘅朋友身體健康，萬事勝意，事事順心，無風無浪又一年。

♐ 農曆新年最受注目的事件，無疑是特首林鄭月娥講粗口，條片昨日喺社交媒體瘋傳，相信每一個香港人都睇過，情況相當好笑。按照常理，特首直播講粗口出街，實屬無心之失。但係反觀特首性格，佢應該係一個循規蹈矩、極度唔容易犯錯嘅人物，佢出錯，代表咗佢承受嘅壓力真係好大。北京冬奧開幕，香港嘅疫情就爆到砰砰聲，認真大吉利是。而且林特首仲未宣佈參選下屆行政長官選舉，競逐連任，相信佢最近應該幾頭痕，我經常話，行政長官呢個位唔易坐，亦都唔好玩。不過權力本身帶有無限嘅引誘同吸引力，絕對唔係我哋普通人所能明白。

♐ 冬奧開幕典禮之前，國家主席習近平同俄羅斯總統普京面談，依一次喺兩位兩年多來第一次見面，彼此堅定立場支持對方核心利益。經過過去6、7年醞釀，東西兩大陣營壁壘分明嘅冷戰格局再次出現（或者叫被成功建立起嚟），自從1991年蘇聯解體，美國一國獨大嘅單邊主義格局終於結束，2008年驚世金融海嘯發生嘅時候，世人方才知道「有敵人」原來比「冇敵人」好，「冇敵人」先係「最大嘅敵人」。件事非常玄，亦有啲古怪，難免令人設想到，世界大同根本冇辦法出現，唯一可以存在嘅情況，祇有敵我分明嘅平衡狀態。戰爭亦唔會因為敵我分明而輕易發生，反而響有得揀之下，兩大陣型可以收編唔同地域嘅不穩定因子，令和平更容易及更有效發生，呢個係真相，亦都係要相信嘅事實。「冷戰」格局並非無好處，反而係一個比較穩定嘅世界結構，呢個亦係中國【易經】陰陽並濟嘅大道理。

🎦https://youtu.be/DZZIdeK8T0s

［常威近代史］第六百四十五回 秦皇島北戴河（高清錄音版）

#唔鍾意睇字可以聽

https://fb.watch/a_j_GdcM3h/

【常威近代史】（六百四十六回）
四庫全書等於四處焚書

1933年4月20號，日本海軍擴建旅順港工程完成，為進一步大規模入侵中原做好預備功夫。早幾集都有講，中華民國正在積極向民間籌款擴展空軍，至於海軍，自1895年甲午一敗，中國嘅海軍力量遠遠及唔上日本帝國，半個世紀過去，去到20世紀30年代，日本嘅海軍實力位列世界三甲，喺日本海軍眼中，區區中華民國只不過係小菜一碟，日本人想征服嘅，係整個太平洋同亞洲，佢哋嘅最後假想敵，係太平洋對岸嘅美國，終極目標係建立一個巨大嘅東方帝國——大東亞共榮，東風力壓西風，黃皮膚壓白皮膚，改變至17世紀以來，西方一直操縱世界命運嘅格局。上一次東風壓西風失敗，100年後嘅今日，將會再一次上演，勝負當然未知，不過未來地覆天翻，就係必然。

4月21號，教育部呈請行政院准予印行《四庫全書》珍本。《四庫全書》全稱《欽定四庫全書》，係中國現存規模最大嘅一套叢書。清乾隆三十八年（1773年）開始編纂（音傳），歷時9年成書。共收書3461種，79337卷，36304冊，近230萬頁，約8億字。整套書收錄咗從先秦到清乾隆前期嘅眾多古籍，也收入同存目咗西洋傳教士參與撰述嘅著作，包括從西洋傳入中國嘅數學、天文、儀器及機械等方面的著作。所謂「四庫」，乃指經、史、子、集四部，分44類，包括《論語》、《大學》、《孟子》、《中庸》、《周易》、《周禮》、《禮記》、《詩經》、《孝經》、《尚書》、《春秋》、《爾雅》、《説文解字》、《史記》、《資治通鑑》、《孫子兵法》、《國語》、《水經注》、《戰國策》、《本草綱目》、《茶經》、《永樂大典》等經典著作，還有日本、朝鮮、越南、印度以及歐洲人嘅一些著作，為後代學者研究中國古代文化提供咗較完善嘅文獻資料。

不過，喺《四庫全書》編纂過程之中，難免要符合官方胃口同政治正確，收集圖書之餘，同時銷毀大量政治不正確嘅圖書古籍，「大編集」同時亦都係一場文化「大清洗」，乾隆年間，係由最高行政機構、直隸皇帝指揮嘅軍機處負責選擇咩書可以留低，咩書要銷毀，當中遺失咗幾多中國文化精髓？我亦都唔敢想像，魯迅佢都曾經咁樣講過：「現在不說別的，單看雍正乾隆兩朝的對於中國人著作的手段，就足夠令人驚心動魄。全毀，抽毀，剜去之類也且不說，最陰險的是刪改了古書的內容。乾隆朝的纂修《四庫全書》，是許多人頌為一代之盛業的，但他們卻不但搗亂了古書的格式，還修改了古人的文章；不但藏之內廷，還頒之文風較盛之處，使天下士子閱讀，永不會覺得我們中國的作者裡面，也曾經有過很有些骨氣的人……清朝的考據家有人說過，「明人好刻古書而古書亡」，因為他們妄行校改。我以為這之後，則清人纂修《四庫全書》而古書亡，因為他們變亂舊式，刪改原文；今人（民國）標點古書而古書亡，因為他們亂點一通，佛頭著糞：這是古書的水火兵蟲以外的三大厄。」

魯迅可能太誇張（不過誇張係佢嘅文風），不過意識形態工作就係意識形態工作，處理意識形態問題，從來都唔係講笑。不過話時話，中國嘅墮落咁啱得咁巧，就係由乾隆年間開始，可能並唔係一個巧合，除非係。

4月23號，北平教育界公葬李大釗（1889-1927），依一位我稱呼 中國共產主義之父嘅偉人，不單止把共產主義引入中國，而且自己亦都為共產主義犧牲性命，佢嘅犧牲當然有價值，借用我生母小學時候一句作文句子總結——「多少革命烈士流盡了鮮血，換得今天紅旗處處飄」。公葬李大釗之時，中國嘅土地上，的確已經紅旗處處飄揚。

4月24號，同李大釗齊名嘅陳獨秀（1879-1942） 比江蘇高等法院「以文字為叛國之宣傳」等罪，判處監禁13年。4月27號，達賴喇嘛指揮藏軍沿金沙江進襲西康，4月28號，國民政府委派黃慕松（1884-1937）為新疆孫宣慰使，佢6月到達迪化（交通真係唔發達）。當時，前新疆省政府主席金樹仁（1879-1941）被政變推翻，政局混亂。黃慕松秉承國民政府之意，令代理主席教育廳廳長劉文龍（1869-1950）正式繼任主席。黃慕松回到南京後，新疆省實力派盛世才（1897-1970）先發動兵變掌握實權。後來國民政府先追認返盛世才嘅地位。

4月28號，178個旅居墨西哥嘅華僑被驅逐回國，本日抵達上海，之前曾經提過，墨西哥排華，理由我唔清楚，應該同經濟有關，同政治無關。同日，偽滿洲國將中東鐵路蘇方副理事長庫茲涅佐夫及局長魯德義免職，並驅逐出境，條鐵路響我偽滿洲國境內運行，當然由我話事。今個月，「三民主義力行社」外圍組織「中國童子軍勵進社」成立，培養意識形態，最好有細路仔做起。另外，「國家社會黨」喺天津秘密召開第一次全國代表大會，通過黨綱同黨章，呢個「國家社會黨」政治組織，應該係當時德國「納粹黨」嘅Copycat。當時的世界，國家社會主義係一種新興嘅政治大潮流，老實講，國家社會主義呢壇嘢，就係將左右兩邊炒埋一碟、撈埋一齊，想兼容「資本主義」同「共產主義」兩邊嘅優勢，當時有人發明左另一個各相去形容呢碟佛跳牆—— 就係法西斯。

#常威💀 #蔣介石平反系列  #中日戰爭 #民國歷史 #佛經抄寫員

［常威近代史］第六百四十六回 四庫全書等於四處焚書（高清錄音版）

#唔鍾意睇字可以聽

https://fb.watch/b2dCfz5F6s/

【常威近代史】（六百四十七回）
浸過鹹水就威威火雞

時間線進入1933年嘅5月，當年中國最著名藝術家徐悲鴻（1895-1953）主持嘅中國藝術繪畫展覽喺法國巴黎國立美術館正式展出。5月4號，教育部命令嚴格進行中小學畢業會考章程，凡不參加考試者，取消其畢業資格，情況亦都非常合理。呢個例子係今時今日都非常適用，今日香港學位人有我有，但係有好多去外國野雞大學得番嚟學位，其實絕對唔符合大學資格，非常水皮，早二三十年，仲有大把人因為屋企有水去外國留學，打個白鴿轉，返嚟香港就也文也武，扮ABC唔識講中文，講真，一舊屎就算去過外國浸鹹水，都祇不過係一舊浸咗鹹水嘅屎，除咗鹹咗少少，作為一舊屎，其實本質上冇變。

啲鬼佬就係睇穿你中國人百年以來崇洋媚外籠嘢，於是乎大做中國人學位賣買生意，好多無知父母每年使幾球嘢畀個細路仔去外國吸毒飲酒溝女hea吓，鬼佬有錢賺，細路仔玩得開心又自由，父母又感覺盡咗責任，如果張沙紙好似以前咁返到嚟香港仲有用（小小），咁就真係一家便宜四家著。祇不過，時代畢竟過去了，「 浸過鹹水就威威」 已經係過去式，互聯網世界，一切透明，牛頓扮唔到牛津，不過又係嗰句，做人求安心姐，如果你俾人呃咗又覺得安心，其實冇所謂，最緊要俾人呃得開心，依個世界嘅嘢，唔係你呃我，就係我呃你，某程度上亦都係唯物辯證法嘅一種具體表現形式。

5月7號，漢奸張敬堯（1881-1933）喺北平六國飯店遇刺，第二日歸西，張敬堯早年任袁世凱第七師師長，先後投靠過皖系、直系，亦係奉系軍閥。1918年3月曾經出任湖南督軍兼省長，1932年為日本人所收買，投靠偽滿洲國，化名常世古潛入北平天津一帶活動，從間謀的活動及破壞工作。行刺張敬堯，係由軍委會特別處華北區區長鄭介民，指派白式維以鋤奸救國團名義所為。

【常公子歷史頻道449回：替大軍閥平反系列之 廢帝】

♊ 嚴格的防疫措施今日正式推行，包括收緊至兩人限聚令，頭髮都冇得剪，第五波疫情的確來勢洶洶，有人問點解香港爆得咁犀利？其實一啲都唔奇怪，衹要有留意國際新聞，每一處有Omicron嘅地方，感染嘅情況同數字都會差不多，同香港相近嘅東京同首爾，最後都係爆到唔清唔楚，因此香港亦都唔會例外，至於某一啲個別地區點解可以守得咁好？講真，我都唔明白。

♑ 不過世界上我唔明白嘅事情有好多，我亦唔會深究。我並唔係上帝，唔係全知全能，年紀大咗，對好多事情都唔會問得太多，除咗科學真理之外，其實人文世界，冇必然嘅答案，好多時候都係觀點角度嘅問題，或者係立場嘅問題。你夾硬去問，最後都唔會有答案，反而對自己身體同情緒唔好，所以都係唔好問。正如你問，點解香港唔可以「同病毒共存」？好似歐洲國家咁每日感染過萬都解除室外口罩令？呢一類問題永遠都無答案，因為香港並唔係歐洲，我哋嘅目標係「清零」（或者叫動態清零），清零冇問題，而且無可否認係最好嘅選擇，選擇「與病毒共存」嘅國家，佢哋一樣要付出巨大嘅代價同冒好大嘅風險，因為病毒會再變種，而且一定會再變種，下一輪變種會發生乜嘢事？其實並冇人知道，正如半年前，又有人知道Omicron出現嗎？最新公布數據，目前全球Omicron確診數字突破4億，有多達50萬人染疫亡，世衛稱呼情况——「慘絕人寰」。

🎦https://youtu.be/STpZkiUE6ZA

［常威近代史］第六百四十七回 浸過鹹水就威威火雞（高清錄音版）

#唔鍾意睇字可以聽

https://fb.watch/b4SOrsw-Q7/

【常威近代史】（六百四十八回）
停戰還停戰 侵略還侵略

1933年5月15號，中共中央委員，工人運動領袖鄧中夏（1894-1933）喺上海法租界被捕，十月喺南京雨花臺被殺。鄧中夏係中共創黨早期重要人物，早年就讀於私塾，之後進入衡陽中學同湖南高等師範學校學習，師從哲學家楊昌濟（1871-1920），結識咗年輕嘅毛澤東。1917年考入北京大學中文系，因受李大釗影響而傾向於共產主義。1919年，鄧參與發起五四運動，係火燒趙家樓事件主要參與者之一，之後積極投入工人運動，1924年國共第一次合作，鄧中夏以個人名義同毛澤東等人一齊響上海加入中國國民黨，任國民黨上海執行部工農部幹事。1925年中華全國總工會成立後，鄧中夏擔任秘書長兼任宣傳部長，鄧中夏亦都係省港澳大罷工嘅主要策劃者，佢先後擔任中共唔同重要職位，響南京雨花臺刑場行刑時，鄧中夏高呼著「打倒國民黨反動派！」「中國共產黨萬歲！」「全世界無產階級聯合起來！」口號英勇就義，時年39歲，係一個不折不扣嘅革命英雄，偉大嘅無產階級英勇烈士。

5月16號，國民政府指令行政院即日起恢復徵收進口貨物之關稅附加稅同救災附加稅，即係要加稅，錢唔夠駛。4月17號，四川軍閥劉文輝（1895-1976）同鄧錫侯（1889-1964）為爭奪煙稅混戰，鄧錫侯部隊掘開都江堰，造成大水災！真係人禍綿綿！無得救！5月19號，宋子文同美國總統羅斯福共同發表聲明，希望迅速恢復遠東和平。5月20號，全國航空建設會喺南京成立。5月22號，沙彌集團喺上海投資創辦中和產業股份有限公司。5月23號，同蒲鐵路舉行開工典禮。

5月26號，馮玉祥（1882-1948）、吉鴻昌（1895-1934）、方振武（1882-1941）等喺張家口召開察哈爾省民眾御侮救亡大會，決議正式組織察哈爾民眾抗日同盟軍，公推馮玉祥為總司令！當中，抗日名將方振武有個仔叫方心讓（Sir Harry Fang Sin-yang，1923－2009），香港骨科醫生，有「復康之父」之稱，香港首位骨科專科顧問醫生，香港醫學會前會長，英國醫學會香港分會前會長，麥理浩復康院及香港復康會創辦人，國際復康總會前會長，香港聖保祿醫院前院長，香港醫學組織聯會前會長，歷任香港中文大學，香港大學及香港理工學院校董。在七、八十年代出任行政、立法兩局非官守議員之職，後來分別在1996年獲封為下級勳位爵士，以及在2001年獲授大紫荊勳章。方心讓爵士女兒方敏生（1958-）是香港社會服務聯會前行政總裁，亦係林鄭月娥同學，此外方心讓亦都係前政務司司長陳方安生（1940-）叔父。

1933年6月15號，同盟軍召開代表大會，通過綱領，由方振武同吉鴻昌率師北上抗日，6月22號，同盟軍收復康保，7月1號，再收復寶昌、沽源，12號克復多倫。7月28號，蔣介石同汪精衛喺廬山發表聯合通電，指摘馮玉祥等人「擅立各種軍政名義」、「攬收散兵土匪」，引用共匪頭目，「寝假成為第二傀儡政府」，即係話馮玉祥班人另起爐灶，要馮玉祥取消同盟軍，同時國民政府增兵入察哈爾省（打自己友）。8月3號，馮玉祥接受蔣Sir、何應欽提議，通電撤銷同盟軍總部，8月14號，馮玉祥離開張家口再上泰山。9月，吉鴻昌、方振武宣佈成立抗日討賊軍，繼續遊擊於長城內外，對抗日本人。10月中旬，吉鴻昌、方振武部隊響日軍同國民黨軍隊嘅重重夾擊之下，於北平慘敗解散。歷史就係咁發生，我唔作評論。岳飛同袁崇煥點解要死？亦係同一個道理。

5月28號，蔣Sir、汪精衛、孫科等人喺廬山開會，商討華北停戰問題。同日，財政部通電撤銷妨礙農村發展嘅捐稅。29號，財政部部長陳公博（1892-1946）向上海銀行界借款2000萬元，以挽救紡織業。

5月31號，響塘沽日本陸軍運輸派出所舉行嘅中日停戰談判，中方代表被逼一字不改地喺日本人事先印好嘅停戰協議上簽名，《塘沽協定》正式生效。決定嘅主要內容為，一、中國軍隊立即自前線撤退至日本人指定地點，由延慶、昌平、高麗營、順義、通州、香河、寶坻、林亭口、寧河、蘆臺所連之綫以西以南地區；二、日軍為確悉第一項實行之情形，可用飛機或其他方法觀察之；三、第一項確實實行後，日軍歸還至長城一線；四、長城線以南，第一項協定之線以北及以東地域內之治安維持，由中國警察機關擔任。至5月7號起，日軍沿長城各處攻陷國軍陣地，佔據灤東（音聯）、灤西地區，19號佔密雲，21號攻克懷柔，對北平造成直接威脅，24號，何應欽向日軍正式申請停戰，談判自30號開始，第二日進入實質性階段，日方拿出事先印好嘅草案，要求中方代表響個半鐘頭內答覆，日方表示一字不許更改，中國代表只得屈服，喺限定時間內完全接受草案。所謂停戰，其實即係投降，任人魚肉，如取如攜。日本人答應暫時停戰，亦唔代表唔會繼續侵略中國。

#常威💀 #蔣介石平反系列  #中日戰爭 #民國歷史 #佛經抄寫員

【常公子歷史頻道451回：替大軍閥平反系列之 1924年最後一個月】

♊ 今日，係2022年2月12號，用官方嘅講法，疫情進入失控嘅地步，人心惶惶，市面一片蕭條，好有末世嘅感覺。確診人數不斷上昇，但係我哋嘅社會設施同人手明顯唔能夠承受大量患者帶嚟嘅壓力，各方面嘅支援都不足，有人甚至喺屋企等咗4、5日都未能夠入院醫治，現在特區政府正向內地求助，要求進一步支援。對於上述情況，我唔會感覺太突然，因為衹要缺口一打開，Omicron嘅傳播力可以好驚人，世界上其他城市嘅經驗已經講咗畀我哋知，由香港出現第一個本地感染個案開始，應該有人會知道，必然會到達今天嘅嚴峻地步。

⛎ 但係相比起2003年嘅沙士，今日嘅情況亦唔係太差，仲記得當日淘大花園集體染疫，不斷有人死亡，人心惶惶嘅地步比今日有過之而無不及，當日沙士來襲，造成樓價大跌，但今日我收到風，有地產經紀朋友講我知，有唔少人趁住疫情嚴峻樓價稍為回落，已經出動搵經紀掃區睇樓，佈署睇吓有乜平貨可以撈底。而且經一事長一智，今日嘅業主亦都唔會好似當年沙士咁，輕易劈價求售益你，反正有錢，大家食住等，鬥長命啫。

♉為咗壓抑疫情動態清零，封城在即，大家要有心理準備，未來幾個月，可能甚至需要禁足，唔能夠外出。不過冇辦法，煮到埋嚟唯有食，反正唔到我哋話事，最重要嘅係要調節心理，物質條件應該唔成問題，但係心理反而大件事，因為香港人均居住面積比較細，長期囚禁於一個狹隘嘅空間裡面，好容易會有情緒問題發生，一念三千，其實一切事情唯心所造，況且既然現實唔能夠改變，就應該改變心理去面對逆境，大家共勉之。

🎦https://youtu.be/8Eju7p-3Vuo

💚【我奮鬥不奮鬥】 常公子 楊熙合著
電子書下載⬇ https://play.google.com/store/books/details?id=CVo3EAAAQBAJ
Kindle版下⬇
https://www.amazon.com/dp/B098XHWTDK

實體書訂購⬇
https://www.382now.com/product?id=325

抗日名將方振武個孫女俾香港國安處拉咗，都幾諷刺

［常威近代史］第六百四十八回 停戰還停戰 侵略還侵略（高清錄音版）

#唔鍾意睇字可以聽

https://fb.watch/b8iYqTWq_b/

【常威近代史】（六百四十九回）
回族軍閥馬仲英短暫廿六歲一生

1933年6月1號，中原公司與英商福公司響焦作簽訂合資經營煤礦業合同。同一日，中華蘇維埃共和國中央政府發出「查田運動」訓令，次日又發出《 蘇區中央局關於查田運動的決議》，查田，即係調查土地分佈情況。依一次查田運動，目的在於重新劃分階級成分，沒收地主土地，重新分發給無地或少地嘅農民耕種，簡單啲講，即係鬥地主，當時毛澤東確定嘅方針係「依靠貧農，聯合中農，削弱富農，消滅地主」。

6月3號，上海萬國運動會開幕，運動員陳陵獲得田徑賽個人錦標。6月4號，內政部擬訂《婚書條例》，規定訂婚、結婚均須領取證書；同日，中華律師協會通過《 統一法權運動宣言》；同日，國際聯盟主張各國歸還中國主權。同日，民國政府財政部長宋子文與美國財政善後銀公司簽訂「棉麥借款合同」，要維持政府運作同軍費開銷，衹能夠繼續UA。該合同規定，美國財政善後銀公司貸款給中國政府5000萬美元，年息五厘，中國方面以貨物統稅同5%嘅水災附加稅餘額為擔保，中國政府需已此款項嘅4/5購買美國棉花，5/1購買美國小麥和麵粉，五年內還清本金同利息。大家睇吓個借款條件，真係優惠到爆炸，借錢畀你，計咗利息，教埋你點樣洗先最著數？真係去邊處搵？由於農產品生產過剩，美國政府急於向海外尋找市場傾銷，因此就有上述「慷慨」之舉，不過做生意啫，冇可厚非，最緊要你情我願。

6月4號，馬占山、蘇炳文等東北抗日名將由蘇聯取道德國，經意大利回國，本日抵達上海。6月7號，立法院制定憲法初稿，分為總則、民族、民權、民生及憲法保障等5章共214條，重申一次，自1911年辛亥革命以來，中國從來未有一部得到全體所有人民承認嘅憲法誕生，南京國民政府行到呢一步，其實都算係嚮前行咗一大步，不過真係冇辦法，一部國家憲法嘅出現，需要大一統作為前提，從來亦沒有例外。6月7號，新疆盛世才（1897-1970）同馬仲英（1910-1937）發生戰爭，馬仲英部隊佔領吐魯番等36個縣。

馬仲英，中國甘肅臨夏人，回族軍閥，1928年春，馮玉祥部隊國民軍響甘肅河州逮捕處決了身為馬麒（1869-1931）手下營長馬仲英父親馬寶。響青海陸軍軍校學習嘅馬仲英聞訊後，率6名好友反叛，襲擊一隊國民軍運輸隊，繳獲大批武器。到達河州後，召集當地三萬民眾建立武裝「黑虎吸馮軍」，自稱司令，插旗做軍閥！1929年被馬鴻逵收編，馬仲英自己去咗北平。據說曾受到蔣Sir接見，蔣還試圖推薦佢去中央軍校學習。此間佢還加入了中國國民黨，並以作戰參謀身份參加中原大戰。1930年馬仲英重回甘肅，多次起落，真係一生不羈放縱愛自由，1933年1月，馬仲英率領6000多人進軍新疆，占領新疆東部。之後同盛世才勢成水火，期間經過短暫談判，於1933年10月再次開戰，打打停停，最後嘅勝利者係新疆王盛世才，盛世才仲為咗抵禦馬仲英而投靠蘇聯，使新疆成為一個親共地區。1934年7月，馬仲英帶領200多名骨幹到蘇聯學習。馬本人學習飛機駕駛。1935年，中國工農紅軍西路軍進入甘肅，馬仲英同蘇聯人準備迎西路軍入疆，因後來西路軍兵敗沒有成功。同年，他將一盤錄音派人帶到南疆地區。錄音中說：「中國目前的形勢，外患日益逼近，內政日益腐敗，賣國賊無恥地賣國，日本帝國主義毫無忌憚侵占我國領土，西北地區也到了危急關頭。我們要準備抗戰！消極就要當亡國奴！同志們，本師長不久就要領導大家向光明的大道前進！」馬仲英最後結局有多種說法，有人講佢響蘇聯大清洗中被殺；響蘇聯學習飛機駕駛失事；援助西班牙內戰犧牲；在蘇德戰爭犧牲。而根據2012年蘭州大學學者赴前蘇聯地區研究表明，馬仲英很可能響盛世才要求下於1937年被史達林下令殺害，死嘅時候，根據歷史記載（如果冇錯嘅話），只有區區26歲。當年，交通資訊冇今日發達，但係好多人嘅經歷都非常濃縮同密集，今日26歲，啱啱讀完大學做咗兩年嘢，仲要仲手問阿媽攞錢拍拖嗰隻。

6月8號，中波文化協會喺南京成立，波，應該係波蘭。6月9號，國民政府宣佈蔣Sir兼任中央陸軍軍官學校校長。6月12號，宋子文出席喺倫敦召開嘅世界經濟會議；同一日，國民政府聘請德國人強立克、英國人孫幕凡為改革中國政治制度顧問，6月13號，海軍製造飛機處自行製造嘅飛機「江鳳」號試飛成功。6月15號，歐亞公司西北航空正式通航，6月16號，國民政府任命袁良（1882-1943）為北平市市長，袁良同彭湃一樣畢業於日本早稻田大學，當時當時袁良、殷汝耕（1885-1947，東京大學，早稻田大學）、殷同（1889-1942）、程克（1878-1936，東京大學）被視爲日本通四巨頭。我都相當有興趣，究竟呢四個日本通政治人物，響當時對中日之間嘅外交關係產生幾大影響？

#常威💀 #蔣介石平反系列  #中日戰爭 #民國歷史 #佛經抄寫員

❤【常威近代史】第一部《大清亡國關慈禧蛋牛治》，全面開放，免費下載， #freedownload！

Free下載連結🔽

https://play.google.com/store/books/details?id=C3hjDwAAQBAJ

［常威近代史］第六百四十八回 狂戰士短暫的二十六年人生（高清錄音版）

#唔鍾意睇字可以聽

https://fb.watch/bb6s79qaHO/

【常威近代史】（六百五十回）
新式銀行業與舊派錢莊業

1933年6月17號，國民政府公佈《兵役法》，一共12條。中日戰爭誓必爆發，加上大規模剿共，國民政府籌備全國總動員。《兵役法》 規定兵役分為國民兵役與常備兵役兩種，常備兵役為一般募兵制，由年滿20歲至25歲男子，志願參軍者充任。響地方自治完成後改行徵兵制，即係強制入伍。國民兵役為18歲至45歲男子，平時受一般軍事教育，戰爭時期依照國民政府命令服役。徵兵制度開始，可以大大提高上戰場軍人嘅數目。

6月18號，國立中央研究院總幹事、中國民權保障同盟總幹事，經濟學家楊杏佛（1893-1933）與兒子楊小佛乘車出門時，突然遭到4名便衣暴徒槍擊，楊杏伊身中三槍當場死亡，楊小佛受傷。楊杏佛，原名楊銓，江西玉山人，早年加入同盟會，算係半個革命元老，民國成立後，楊杏佛任南京總統府秘書，1913年進入美國康奈爾大學學習機械工程，1915年參與發起中國科學社。1918年回國後，曾經擔任東南大學工學院院長，1925年任孫文秘書，隨孫民北上，1928年中央研究院成立，楊杏佛成為副院長兼幹事。1928年底，楊杏佛與宋慶齡等人組織中國民權保障同盟，擔任副會長兼總幹事，經常評擊蔣Sir政府，於是招致殺身之禍，行刺楊杏佛嘅兇手，係「力行社」嘅特務，亦即係秘密警察。

6月22號，國民政府實業部公佈日本侵略中國漁業概況，日本嘅侵略令到中國漁業每年所受損失高達1.6億元。6月24號，京蕪公路竣工，本日在南京雨花臺舉行通車典禮。6月25號，丁文江（1887-1936）、葛利普（德裔美國地質學家，187-1946）、德日進（法國人，中國天主教耶穌會神父，中國舊石器時代考古學開拓者和奠基人之一，1881-1955）等人，前赴美國參加第十六屆國際地質學會大會。6月26號，國民政府委派孔祥熙（1881-1967）為國貨銀行董事長。同日，蘇聯、日本、偽滿洲國三方代表喺東京舉行買賣中東鐵路嘅會議，中國反對蘇聯出售中東鐵路與偽滿洲國，但係反對似乎無效。

6月26號，新疆再度政變。新疆王盛世才喺新疆督辦公署以宴客為名，即席將省政府秘書長陶明樾、辦公處參謀處長陳中及航空隊長李笑天當場槍殺，罪名係「破壞團結，引誘省軍謀叛」！殺人總要有一個藉口，盛世才之後表示無意奪權，率領部隊前赴塔城，純粹擺姿態，臨時省主席劉文龍（1869-1950）響驚惶中亦表示辭職，如果唔辭職，應該要死了。6月28號，逼於盛世才嘅壓力，國民政府派往新疆嘅宣慰使黃慕松（1884-1937）電請中央，承認盛世才嘅政變，維持督辦制，盛世才政變成功，完全控制新疆政局。

6月27號，國民政府任命孫殿英（1889-1947）為青海西區屯墾督辦。6月28號，蘇嘉公路竣工，本日響蘇州舉行通車禮。6月30號，中共決定將8月1號定為中國工農紅軍紀念日。另外，紅四軍軍長鄺繼勛（1895-1933）以投敵變節分子罪名，被後來真係變節投靠國民黨嘅張國燾（1897-1979）處決。

時間線進入1933年7月，儘管上海新式銀行發展迅速，但係傳統嘅舊式錢莊業仍然生意興隆，每日嘅交易額比新式銀行多出5倍。上海首間華資銀行，係由盛宣懷（1844-1916）創辦嘅中國通商銀行，中國通商銀行成立於1897年5月，為中國第一間新式銀行，但係同明末清初就已經有所發展、借貸主要憑個人信用嘅舊式錢莊業相比較而言，唔用個人關係而靠抵押借貸嘅新式銀行業，其影響力依然非常有限。1903年到1910年之間，上海海關關稅收入每年約沉澱600萬兩，均分存入錢莊生息。去到1925年，上海傳統錢莊業盈利額達到324萬兩，去到1927年，錢莊業會員共有85家。同一時期，新式銀行業基本形成，由浙江實業、興業銀行同上海儲蓄銀行組成嘅南三行； 以及由鹽業、金城、大陸、中南組成嘅北四行，南北七行佔主導地位格局，新式銀行業已經開始成熟。去到1932年，全國金融中心上海一共有新式銀行總行68間、銀行公會26個，一共持有全國新式銀行總資金嘅3/4，你話上海幾巴閉呢？不過，新式銀行業務，始終未能夠全面取代舊式錢莊業，因為錢莊業仍然同中國商界貴族有深遠淵藪，喺新浪潮下，舊式錢莊業仍然保持興旺勢頭。

1933年7月1號，吉鴻昌（1895-1934）率領抗日同盟軍收復寶昌、沽源。《文學》 月刊喺上海創刊，由生活書店發行。中央造幣廠製造新幣，經審查合適條例，開始向全面發行。7月3號，國聯行政院組織特別委員會，進行與中國合作。7月5號，安徽壽縣朱家集李三孤堆出土大批青銅器，安徽壽縣係春秋戰國時代楚國最後建都地點，故屢有楚國銅器出土，李三孤堆出土嘅青銅器，約為公元前300年，更有早到戰國初年，最晚為戰國晚期，青銅器種類豐富，係研究戰國時代楚文化重要資料，1933年朱家集發現嘅青銅器，好多已經被人即時偷走同轉手圖利。7月7號，國民政府委任劉湘（1890-1938）為四川剿匪總司令，所有川中各軍，均歸其統領。

#常威💀 #蔣介石平反系列  #中日戰爭 #民國歷史 #佛經抄寫員

❤【常威近代史】第一部《大清亡國關慈禧蛋牛治》，全面開放，免費下載， #freedownload！

Free下載連結🔽

https://play.google.com/store/books/details?id=C3hjDwAAQBAJ