大清亡國關慈禧蛋牛治 3

【常公子歷史頻道389回：替大軍閥平反系列之 阿Q正傳】

♊今集Youtube我講魯迅筆下嘅「阿Q正傳」，五四運動後，小說大行其道，「阿Q」呢個小說裡面嘅人物，正正就係當時中國人嘅典型，一貧如洗，冇固定工作，冇前途冇未來，底氣唔夠，但仍然要處處認叻，自以為是，覺得自己天下無敵。同時代出現嘅，仲有一個胡適筆下嘅「差不多先生」，凡事差不多，得過且過，如果小說真係一種可以反映現實嘅文學媒介，大家可以從「阿Q」及「差不多先生」身上睇到當時中國人嘅典型毛病。

♐就我個人見解，「阿Q」同「差不多先生」身上所反映出嘅問題，其實都係貧窮問題，作為馬克思主義信徒，我堅信所有問題其實都係經濟問題，愚昧嘅出現根本就係基礎教育不足，要搞好基礎教育，社會必須富強，錢唔能夠解決所有問題，但係錢卻可以解決大部分問題，21世紀之後中國強大崛起，你會發覺其實好多問題都已經被解決咗，當然你仍著眼於一部分缺點，而唔睇整幅大構圖變化，其實係認知方面，係犯下嚴重錯誤。

♈最近國內興起談論「躺平主義」，「躺平主義」全因為一篇網絡小文章，原文如下：『兩年多沒有工作了，都在玩，沒覺得哪裡不對，壓力主要來自身邊人互相對比后尋找的定位和長輩的傳統觀念，它們會無時無刻在你身邊出現，你每次看見的新聞熱搜也都是明星戀愛、懷孕之類的『生育周邊』，就像某些『看不見的生物』在製造一種思維強壓給你，人大可不必如此。我可以像第歐根尼只睡在自己的木桶裏曬太陽，也可以像赫拉克利特住在山洞裏思考『邏各斯』，既然這片土地從沒真實存在高舉人主體性的思潮，那我可以自己製造給自己，躺平就是我的智者運動，只有躺平，人才是萬物的尺度。』我不想深入解釋原文，但綜合問題，其實又係經濟問題，正如2019年發生喺香港嘅事，其實都係經濟問題——另一個論點，人能夠躺平而不餓死，亦都表明咗中國已經真正崛起來，國家必須有充足嘅資源及經濟實力，先能夠分派給下層不積極的人任意躺平發夢，這一點大概毋庸置疑。

♉民間智慧講畀我哋知，要發達好多時候要不擇手段，忠忠直直，始終乞食，其實又冇錯。正如躺平主義者真心明白，所謂公平競爭並不存在，遊戲本身本來就係遵從叢林法則，血肉橫飛，唔係我割你韭菜就係你割我韭菜，零和遊戲，等價交換。躺平而不參與遊戲，或者係一種另類選擇，冇話啱定錯。

✅https://youtu.be/hwZJhLg8ea8

💙最新上線，請課金支持

【常威近代史】第九部《孫文之死》
https://play.google.com/store/books/details?id=evMsEAAAQBAJ

【常威近代史】（五百四十六回）
一手史料，二手屎尿

蔣Sir雖然手握大權，但係四面楚歌，內有內反，外有內反，前門驅虎，後門進狼，真係非常唔得閒。就算係當時年青人嘅偶像胡適都唔妥蔣Sir，1929年8月28號，國民黨上海市黨部以胡適多次喺《新月》雜誌上撰文「詆譭本黨主義」，懇求國民黨中央嚴厲懲辦胡適，呢個世界嘅嘢，多一個朋友總比多一個敵人好，可惜好多人唔明白呢個道理，蔣Sir絕對係其中一個。8月29號，蔣Sir劃定何鍵（1887-1956）及劉建緒（1892-1978）兩個師專責「剿共」。當時每個師為1.1萬人計算，蔣Sir拿出2萬人專門對付共產黨，今日睇翻當然係唔夠，但係當其時，「剿共」明顯並非蔣Sir最急切應付嘅問題。

籠裏雞（不停）作反先係蔣Sir眼前最大嘅問題，四大天王李宗仁同馮玉祥已經反檯，閻錫山即處於半反檯狀態，一直手握重兵嘅唐生智（1889-1970）亦暗中同張發奎（1896-1980）串連，密謀反蔣，可惜消息走漏，唐生智立刻被蔣Sir軟禁於南京。你唔好問我，點解咁多人反蔣？其實我常公子都唔明白，世事其實非常簡單——當個個人都唔鍾意你嘅時候，就代表你做人出咗問題囉，呢個邏輯應該冇錯。近代史再閱讀落去，更得人驚嘅係，所有曾經反蔣嘅人，後來有大部份都繼續同蔣Sir服務，「忠誠」兩個字，大概冇任何價值可言，大家都只係為咗利益計算，有著數就走埋一齊，冇著數就反蔣，咁嘅局面，有乜可能有和平盛世出現呢？而蔣Sir一直容忍這種離離合合、彈出彈入嘅情況出現，大概有兩個可能性，佢係迫於無奈硬食，第二可能佢自己都係一個咁樣嘅人。

作為一個行威權主義嘅統治者，點可以容忍部下不對自己忠誠呢？老婆一腳踏兩船，相信亦冇一個老公可以接受？但要老婆忠於自己，起碼要畀足家用先得。所謂「疑人不用，用人不疑」，一個「疑」字，其實係意識形態（ideoloy）問題，亦都係宗教信仰（religion）問題，亦即係哲學（plilosophy）問題，最後係藝術（fine arts）問題，當中牽涉幾個層次。

本月，北平義賑會發表調查西北四省災情報告結果，因為各種天災，特別係旱災同水災，1929年8月為止，四省因災禍死亡人數達到600萬，病人1600萬，流亡400萬。如果呢個數字係真（亦都好有可能係真，作細機會可能比作大更大），你就可以深深體會到1929年嘅中國究竟係一個乜嘢嘅狀態，「文明」兩個字，只不過響中華大地幾個大城市中發生，我所講嘅近代史，只不過係四億民眾中其中幾百萬人（甚至乎係幾十萬人）經歷嘅歷史，四億人中嘅大部分人，根本冇被納入歷史討論範疇之中，數字足以說明一切。

上述嘅狀態得到明顯顯著溉改善，其實要去到1949，甚至乎1980年改革開放之後，距離今日只不過係40年前，歷史其實距離我極近，只不過我哋以為距離我哋極遠。

1929年9月2號，中央研究院向李盛鐸（1859-1937）購回前清檔案數千麻袋，運回歷史博物館清理。李盛鐸係著名收藏家，佢係光緒十五年（1889）殿試嘅「榜眼」（第二名），曾經出任多個官職，亦做過清帝國駐比利時大使，民國之後，亦擔任過不同政權嘅高官，屬於上流人物貴族階層，一生人收集大量書籍同檔案，最為人津津樂道嘅係敦煌藏經洞發現大量古代文獻後，李盛鐸利用其職權私藏咗大量敦煌卷子 ，都要多得呢種人，令好多珍貴嘅歷史文物同檔案資料得以保存落嚟。

叉開一筆，講吓歷史資料，所謂「史料」，英文叫Historical Data，史料亦即是可以根據為此來研究歷史題目的材料和素材，史料內容非常廣泛，並不單純侷限是文字材料。另外，史料本身的價值和可信程度亦都因人、因時而異，透過考証史料嘅真偽同價值，從而客觀地描述歷史事件嘅本貌和還原、揭櫫真相，就是歷史學者治史論史嘅責任同工作。

史料共分為兩類，是為第一手史料（Primary Sources）同第二手史料（Secondy Sources）。

第一手史料指謂歷史事件中牽涉的文本、檔案，以及史實中真實人物嘅親身經歷、見証及証辭。其涵蓋範圍甚廣，可包括目擊者或見証人的手稿、自傳、書信、遺囑、訪談資料、報導、傳記、剪報、年譜、文電、訴訟紀錄、談話紀錄、著作、照片，甚至神話傳説或影片……總之一切有可能親歷記錄歷史事實嘅材料，都可稱作第一手史料。

楊鴻烈教授於【歷史研究法】中有以下描述：「凡宇宙間可以考察出其時間性的事物或現象都是歷史的資料，簡言之即為史料。」近代學者如蔡元培、傅斯年亦有所謂「史學即是史料學」之說。以科學實証主義者嘅角度，研究歷史，某程度上就係研究「史料」。

第一手史料可定義為接近或直接歷史事件當時發生嘅資料，可較直接作為歷史根據嘅史料。至於第二手史料則是指經過後人用一手史料所作出研究及詮釋，從而作出推論，加入個人價值判斷及意見，甚至實踐描述歷史以外嘅功能。一般歷史著作、研究論文以及歷史概括報導，均可被視為第二手史料。

以第一手史料重構或重新詮釋歷史（第二手史料），往往會造成價值判斷同歷史評價，第一手史料是歷史事件嘅基本「線索」，有人咁講過，「至於線索以外的地方，正確不正確本來就是毫無標準而且無關要緊的事情，任何人衹要稍微改變一下材料取捨的標準或解讀的立場，都能對任何敘述得出截然相反的結論」。

但第一手史料同第二手史料二者嘅界限經常並不明確，例如司馬遷的【史記】就很介乎二者之間，一般所稱的「史料」，主要是指第一手史料而言。

#常威💀 #蔣介石平反系列 #黃金十年 #民國歷史

【常威近代史】第一部《大清亡國關慈禧蛋牛治》實體購買
https://www.382now.com/product?id=87

【常威近代史】第二部《中國一百年前的第一次改革開放》實體購買
https://www.382now.com/product?id=151

【常威近代史】第三部《東方維多利亞女王之死》實體購買
https://www.382now.com/product?id=165

1⃣【常威近代史】第一部《大清亡國關慈禧蛋牛治》（免費下載）
https://play.google.com/store/books/details?id=C3hjDwAAQBAJ

2⃣【常威近代史】第二部《中國一百年前第一次開放改革》
https://play.google.com/store/books/details?id=_6KMDwAAQBAJ

3⃣【常威近代史】第三部《東方維多利亞女王之死》
https://play.google.com/store/books/details?id=GaGrDwAAQBAJ

4⃣【常威近代史】第四部《霹靂大忠臣對決無敵大買辦》Round One
https://play.google.com/store/books/details?id=Np3PDwAAQBAJ

5⃣【常威近代史】第五部《霹靂大忠臣對決無敵大買辦》Round two
http://shorturl.at/dW145

6⃣【常威近代史】第六部《最九衰的大軍閥時代》Round 1
https://play.google.com/store/books/details?id=bCMNEAAAQBAJ

7⃣【常威近代史】第七部《最九衰的大軍閥時代》Round 2
https://play.google.com/store/books/details?id=lPgaEAAAQBAJ

8⃣【常威近代史】第八部《最九衰的大軍閥時代》Round 3
https://play.google.com/store/books/details?id=fY8mEAAAQBAJ

9⃣【常威近代史】第九部《孫文之死》
https://play.google.com/store/books/details?id=evMsEAAAQBAJ

❤請大家批量下載，支持公子繼續以廣東口語寫作中國近代史，大功所就，大名所居，君子於此，有讓道焉。

【常威近代史】（五百四十七回）
點解咁多人反蔣嘅？奇怪鳥

1929年9月2號，中國代表伍朝樞（伍廷芳之子，1887-1934）當選成為「國際大聯盟」副議長，認真巴閉！不過當日嘅「國際大聯盟」同今日嘅「聯合國」其實作用都非常相似，好聽啲就係為國際間維持基本秩序，其實難聽啲，只不過係幾個大國塗脂抹粉嘅化妝師。有一樣嘢非常難解決，其實都係做生意嘅問題，作為聯合國、世衛等全球性組織，好多時候洗費好大，要有金主泵水先可以維持經營，所以邊個國家畀得錢多，就係話事嗰個，理路上亦都無可厚非，我冇理由畀錢你反自己，因此歸結又係錢嘅問題，其實大部份問題都係錢嘅問題，有錢真係冇乜問題架。香港例外，香港有錢，但係問題發生喺土地上，因為土地太貴地產太貴樓太貴鋪租太貴，但係如果地產唔貴，又邊有錢呢？所以香港嘅問題，係「二律背反」問題，好很難解決。

世間上凡事凡物，其實最重要係取得平衡點，天秤傾向任何一邊，不論左右，都會產生問題，但達到平衡本身唔係一個理論性嘅行為，而係一個藝術性行為，道理正如一個樣子甜美身材高挑唱歌好聽演技精湛嘅演員未必紅得起，反而一個甩頭甩骨的騎呢怪就會大紅大紫，當中又有任何道理可言呢？世間上最難捉摸嘅，其實人嘅喜好，因為現代人本身就有反理性傾向，總有「逐臭之夫」響你身邊，連屎都覺得好味。

9月頭，日軍繼續喺長春進行軍事演習，你活咗咁耐，有冇聽過一個國家可以喺未經另一個國家合法政權同意之前，響對方國境內進行真槍實彈嘅軍事演習呢？答案應該係冇，因為如果咁樣做嘅話，同「侵略行動」幾乎沒有分別！但偏偏當時日本就係咁做，日本人嘅角度，南京蔣Sir政權響東北根本缺乏任何合法性，蔣Sir覺得東北係國民政府嘅管轄範圍（張學良易幟之後），而日本人則覺得唔係，於是我進行軍事演習就關你蔣Sir撚事，於是我扶植溥儀建立「滿洲國」亦都關你蔣Sir撚事，「中日戰爭」脈絡上亦係咁。當然冇話邊個啱邊個錯，如果世界上每一件事情都能夠攞到共識，咁一早天下太平咗好耐。

9月5號，維克多沙遜（1881-1961）喺上海興建嘅沙遜大廈落成，地址係上海外灘20號（今南京東路口），曾被譽為「遠東第一樓」，維克多沙遜男爵係英籍猶太富商沙遜家族的第四代掌門人，商人及酒店經營者，塞法迪猶太人，來自富有嘅巴格達猶太人沙遜家族商人和銀行家族，亦都係希特拉同反猶主義者口中世界金融嘅背後猶太人黑手操盤者之一。沙遜大廈樓高十層，當時係摩天大樓，大廈做價為5,600,000兩白銀，屬於凡人冇辦法理解嘅天文數字，大廈嘅底層、一樓、二樓全部出租比一般嘅商店銀行。三樓作為沙遜集團嘅本部同埋各附屬企業嘅辦公室，四樓至九樓為旅館、飯店同舞廳。旅館每間套房都佈置得極為豪華，分有中國、日本、英國、美國、法國、西班牙等格調，每個套房每日租金高達20兩至70兩，專門招待有錢人，20樓則作為維克多沙遜自用。沙遜大廈保存至今，依家係「和平飯店」五星級酒店，上海的地標之一，大家有機會去上海一定要試試入住。

9月6號，香港首次開辦航空郵遞，又創先河；同日，蘇軍同東北軍繼續喺滿洲里同綏芬河前線激戰；9月9號，國立北平研究院成立；9月10號，北平中國學術團體協會同法國雪鐵龍汽車公司訂立組織「一九學術考查團」合同，前赴新疆、蒙古等偏遠地區考察發展機遇；9月13號，蔣Sir通令全國各省主席限期辦理保甲，清查農村戶口，保甲制度為中國自宋代使用帶有軍事管理嘅戶籍管理制度，一種社會統治手段，之後在各個朝代演變為農村基本政治制度，基本內容為10戶為「甲」，10甲為「保」，稱之為「保甲」，直到1912年中華民國成立以後才停止施行。蔣Sir重提「保甲」制度，就係要釐清農村戶口及人數，保證稅收實行。中央莫財，真係少個崩都過唔到活。

9月17號，閻錫山再會馮玉祥，表示願意聯合反蔣，佢老母呢個山西王真係難以捉摸彈出彈入，佢嘅做人態度好有香港中環金融古惑仔嘅風範，結果喺一衆北洋軍閥之中，佢嘅生存時間比任何一個軍閥都要長久，來程度上，山西王閻石山都算係一個成功嘅「馬基維利主義者」，呢點無可否認。

9月17號，國民黨第四師師長張發奎（1896-1980）喺湖北宜昌通電反蔣。張法奎係擁汪派將領，1927年因廣州事變張發奎被國民黨中央查辦，今年春天，蔣Sir為討伐李宗仁，重新起用張發奎，命令佢率兵討桂，但隨住桂系部隊迅速潰敗，蔣介石同張法奎之間嘅矛盾又重新尖銳起來。9月8號，蔣Sir命令張發奎第四師由宜昌乘船東下，移防隴海路，企圖將張發圭部隊鉗制於其嫡系部隊包圍中，張接獲命令後，決定南下聯桂討蔣。

今日，張發奎解除蔣Sir派往宜昌接防嘅新編第一師曹萬順部隊嘅武裝，同時通電反蔣，並且提出三項要求：第一、取消三中全會選出嘅代表；第二、南京政府用人皆帝制餘孽，應該一律罷免；第三、請汪精衛回國主政。18號，張發奎再次通電，宣稱「護黨」，全軍起錨南下，10月底，張發奎部隊進入廣西，同桂系喺南寧成立「護黨救國軍」。

#常威💀 #蔣介石平反系列 #黃金十年 #民國歷史

✅本土唯一香港土話近代史文本

❤【常威近代史】第一部《大清亡國關慈禧蛋牛治》，全面開放，免費下載， #freedownload！

Free下載連結🔽

https://play.google.com/store/books/details?id=C3hjDwAAQBAJ

上次講到，1929年9月17號，張發奎加入桂系反蔣。9月18號，中共中央發出第49號通告——《目前政治形勢中的兩大任務：擁護蘇聯及反對軍閥戰爭》，當時嘅中華民國，因為中東鐵路問題同蘇聯正發生邊境戰爭，幸好戰爭規模並無擴大。9月19號，中央軍官學校學生因「反動嫌疑」，有200名學生被拘捕，當中20幾人拉咗去後巷打靶，兵荒馬亂，一個人嘅政治立場，會變咗生死問題，相信亦唔使我多講，大家都已經明白太多。子曰「君子不立危牆之下」，2500年前亦早有提示。

9月20號，蔣Sir下令劉峙（1892-1971）部隊討伐張發奎，老實講，其實又係軍閥混戰，同之前嘅軍閥時代其實冇分別，大家覺得有分別，只不過係一種錯覺；1929年當日嘅南京國府，其實又咪係之前嘅北洋軍閥五色旗北京中央政府，兩者都係無力以武力及制度控制全國，任由各地嘅武裝力量（軍閥）割據稱皇，時分時合，有時盟友有時敵人，戰亂不斷。有一個講法，每逢中國改朝換代，大概就會有半個世紀嘅混亂期出現，隋唐交替間嘅大混戰，唐宋交替間嘅五代十國，甚至元朝覆亡到朱元璋建立大明江山，中間大概都係經歷咗半個世紀四、五十年嘅戰亂期，如果由1900年八國聯軍打入北京慈禧著草去西安計算，去到1949年中華人民共和國建立，中間剛剛過咗半個世紀，相信並非巧合，中間有一定歷史或心理關聯。所以如果你想改朝換代，要有心理準備，你同下一代、或者下下一代都要預備喺戰亂中渡過。

9月23號，國府教育部下令各省嚴厲制止外國人及教會學校作宗教宣傳；財政部長宋子文公佈任內所發債券嘅excel，因軍政費用而負債已經總額高達1.3億，由一開始，國底嘅財政已經係一個深不見底嘅黑洞。同日，數名日本憲兵喺遼寧鐵嶺廣裕大街清樂茶園酗酒滋事，中國警察上前勸解，日本兵不服，當場打傷華警三人，跟住日軍大隊人馬包圍縣公安局，逮捕保安隊官兵30人，監押於日本憲兵營，並私刑招待。26號，保安大隊隊長盧振武積憤難抑，竟然自殺身亡，之後經過南京政府外交部同瀋陽交涉署交涉，9月28號，日軍釋放部分華警，卻提出賠償損失、及將華裕大街劃為附屬地等條件，但遭到中方拒絕。究竟邊個先係做莊啊？我睇極都唔明。

9月24號，國民政府正式警告青年人偶像胡適，4月起，胡適連續喺《新月》雜誌發表《人權與約法》、《知難行亦不易》、《我們什麼時候才可以有憲法》等文章，批評國民黨「訓政」綱領，鼓吹西方人權學說，要求實施民主憲政，保障人權，掀起了一場「人權運動」，本日，國民政府責胡適「誤解黨義，不審社會實情，放言空論」，勒令教育部對其加以警告並徹查。

#常威💀 #蔣介石平反系列 #黃金十年 #民國歷史

【常威近代史】第九部《孫文之死》
https://play.google.com/store/books/details?id=evMsEAAAQBAJ

amazon同步上架👍請大家大力支持！
https://www.amazon.com/dp/B094D663XH

【常公子歷史頻道391回：替大軍閥平反系列之 國際聯盟】

♊1914年發生咗第一次世界大戰之後，其實全人類係呆咗，因為大概冇人能夠想像得到這場戰爭所引發嘅災難會係咁大，死嘅人會係咁多，大概由一開始，大家嘅想像力實在太豐富，以為戰爭發生之後，可以好容易搞掂對手，點不知道喺長達四年嘅殘酷戰爭裡面，一齊進入失控嘅地步，冇人能夠叫停，亦冇人可以叫停，中間牽涉嘅國家愈來愈多，仲加插一場西班牙流感贈興，結果將世界嘅重心歐洲打成一片頹垣敗瓦，三大強國英國、法國同德國，無論係土地或人口上均遭受嚴重破壞。世界嘅主導地位，亦都由歐洲諸國轉移到美國身上，我哋現在身處嘅歷史格局，亦係由第一世界大戰開始建構而成。

♑響李德哈特（Sir Basil Henry Liddell Hart ）所著嘅《第一次世界大戰戰史》中，曾經有以下一段描述，其實起初英法同德國之間嘅仇恨並唔係太深，需知道佢哋嘅上層建築統治階層根本全部人有親戚關係，但係由19世紀末期開始，因為出版業嘅蓬勃，大量嘅報紙、雜誌、書籍廣泛流傳，其中就有唔少鼓動兩個陣營之間嘅仇恨增長，當中仲有大量嘅所謂間諜陰謀小說、描述對方是如何邪惡是如何想毀滅對方（當中有官方宣傳手段，亦有大量係民間自發），漸漸地，假嘅嘢都變成真，彼此對對方嘅仇恨深入骨髓，到最後非要決一勝負不可。

♈當然李德哈特唔認為呢個係爆發第一次世界大戰嘅主因，但係當時兩個陣營人民非常主動地上戰場要屠殺敵人，呢點就係千真萬確的，亦足以證明彼此間嘅仇恨係如何深厚。今日舊事重提，就係睇見相同嘅情況同樣係今時今日發生，不論是真相還是fake news，似乎每一日地球上現在嘅兩大陣營，都響度不停抹黑誣陷對手，相對於十年前，中美之間嘅仇恨亦日益加深，好似一發不可收拾，這種狀態，猶如電影重播，非常令人擔憂，如果世界上唔係有可以玉石俱焚嘅核子武器，我相信戰爭已經爆發咗好耐。

♈今時唔同往日，閱讀歷史唯一可以知道嘅係——『未來其實好難想像。』希望曾經發生過嘅歷史，唔好再喺今時今日或不久將來發生，真正嘅戰爭絕對唔係講笑，而且戰爭一旦爆發，會好似開動一部巨大嘅碎肉機，將所有周邊嘅人及國家拉入去鋒利漩渦中間攪碎，情況一如第一次世界大戰同第二次世界大戰一樣。

✅https://youtu.be/Q2HqP46Ar5E

💙最新上線，請課金支持

【常威近代史】第九部《孫文之死》
https://play.google.com/store/books/details?id=evMsEAAAQBAJ

【常威近代史】（五百四十九回）
用現代人眼光去睇古代事物：衰梗！

1929年9月25號，南方福建省政府宣佈全省戒嚴，目的當然係要對付中共的軍事滲透；同日國民政府通令各機關，用人首先要任用國民黨黨員，而裁員先從非黨員裁起。用今日角度去睇，又係不公平措施，平機會應該要插手處理，不過用當日嘅角度去睇，又係合情合理，所以事物嘅對錯，或是非黑白，要放響時代脈絡上去考量同詮釋，唔同嘅時勢，有唔同嘅演繹，你可能會問，點解可以咁做？但放響現實環境的實質操作層面上，我哋好多時候只可以咁樣做……否則會出事。

9月27號，廣西軍閥俞作柏（1889-1959）、李明瑞（1896-1931，俞作柏表弟，後來投奔紅軍）宣佈廣西獨立，脫離國府；同日賑災委員會主席許世英（1873-1964）致電蔣Sir，講畀佢知，全國嘅災民人數達到5000萬以上，賑災公債根本係杯水車薪，用當時全中國大概四億人去計算（實際數目可能介乎3-4億），5000萬災民，即係平均每八個人就有一個係，其實係非常咁大件事。我重申我對歷史嘅睇法，你活響太平盛世21世紀，千萬唔好用你嘅眼光去對待古代世界，1929年中國嘅情況，要比你所能想像嘅更加惡劣千萬倍，如果唔係咁惡劣，之後更無需要用上半個世紀先能夠改善具體情況。當時嘅共產黨人，就係睇見社會嘅貧窮惡劣現象，先至願意豁出生命去作出改變，佢哋似乎明白到，要挽救中國嘅惡劣狀態，蘇聯嘅情況講咗畀佢哋知，「共產主義」或「社會主義」政治制度係唯一嘅出路，佢哋當然冇錯，事後，亦用事實來證明佢哋冇錯。

其實又回歸原點，用現代人嘅角度去評論古代人嘅是非對錯，其實本身就係一個毫無意義嘅行為。正如我哋日常生活中，好多人喜歡以局外人嘅身份評論別人，講人是非，其實一啲意義都冇，你唔係身處其中，根本唔知道發生乜嘢事，好可惜我哋把口生出嚟除咗食飯之外，就係要講人是非，真係冇辦法。好多時候問題係「講出嚟」嘅，並非真正發生中。

科技一日千里，就響北平人力車伕破壞電車嘅同一日，由國民政府交通部同美國飛運公司合資經營嘅中國航空公司，使用一架「洛寧」飛機，成功完成由上海至武漢嘅首航，開創咗中國民航航空另一條新線。呢條航線長達864公里，係國內開闢嘅第一條空中航線，飛行時間為七小時（Sorry，當日嘅飛機的確係慢咗小小，請見諒！）。23號，飛機飛回上海回航。中國航空公司以上海為基地，以「上海-武漢」為基本航線，空中飛行亦好快被市民接受，後嚟中國航空公司引進福特及道格拉斯飛機，並且實現上海武漢即日來回，而且不斷增加新航線。

10月25號，國府將廣州市改為特別市，同日，大家仲記唔記得中國駐舊金山副領使高瑛夫婦販毒案？今日喺江寧地方法院審結，高瑛被判七年有期徒刑，罰款6660元，其妻被判四年徒刑，罰款5000元，贓物沒收並銷毀。

10月26號，共產國際執委會發信畀中共中央，為中共規定注意工人嘅罷工鬥爭、擴大遊擊戰爭、發展政治罷工等五項任務，毛澤東所行嘅農民路線，仍然未能夠被共產國際所接受，共產國際亦都好快會派人進入江西，糾正毛澤東嘅錯誤路線。

同日，教育部頒佈衛生教育實驗方案，國民政府禁止對蒙藏沿「蕃夷」而等名詞，10月28號，國民政府任命閻石山為中華民國海陸軍副總司令，只在蔣Sir一人之下；同日，第三屆太平洋國交討論會喺日本京都開幕，中國代表響會上提出廢止各國在華領事裁判權等要求，10月31號，英國正式決定交還鎮江英租界予中華民國，困擾中國幾十年嘅租界、國中有國問題，由1930年代開始，正式被掃入歷史嘅垃圾堆中。

#常威💀 #蔣介石平反系列 #黃金十年 #民國歷史

常公子最新小說作品【Master】https://play.google.com/store/books/details?id=5FIfEAAAQBAJ

Kindle版下載連結
https://www.amazon.com/dp/B08X4DK2FP

常公子，你D史評唔錯，可惜香港少文史哲愛好者，至少我身邊見就唔多不過我睇開你utube

多謝

11月12號，中國駐日本公使館舉行孫中山誕辰紀念會，蔣、馮兩派軍人發生衝突，傷十幾人。同日墨西哥政府聲明放棄係中國嘅領事裁判權；11月14號，國府教育部通令全國大學停止施行學分制，改行學年制，香港現今三大，即係香港大學、中文大學及科技大學，都係採用學分制。

11月15號，中共中央政治局決定開除陳獨秀（1879-1942）黨籍，並且批準江蘇省委將與陳獨秀關係密切嘅彭述之（1895-1983）等四人開除出黨。陳獨秀同彭述之都係中共重要嘅創建人同奠基者，1927年，喺中共「八七會議」上，中央批判陳獨秀喺國共合作中嘅右傾錯誤，並撤銷佢中央總書記嘅職務，陳獨秀離開中央，隱居於上海，佢經常將自己對中國局勢嘅意見提交中共中央，但大多數不被接納，於是佢就醉心研究語言學。1929年8月5號，陳獨秀寫咗封信畀中共中央，提出「一年來慎重考慮的結論」，認為「過去的革命已經過去，將來的革命還未到來」，中共此後應「為召集代表民眾自身利益的國民會議而奮鬥」，陳獨秀同時指責中共嘅武裝鬥爭屬於「無政府主義的空想」。陳獨秀嘅觀點受託洛斯基影響甚深，9月，佢同彭述之、尹寬（1897-1967）等黨員為核心，建立托派組織「中共左派反對派」。中共中央接信後一再對陳獨秀作出警告，但係陳獨秀堅持己見，自稱為反對派，並表示「我們的黨此時正需要反對派」。既然唔肯回頭是岸，中共中央惟有將陳獨秀區逐出黨，從此割蓆。

亦係差唔多時候，陳果夫（1892-1951）、陳立夫（1900-2001）兄弟喺蔣Sir嘅默許下，組成國民黨中央俱樂部。陳果夫當時擔任國民黨中央組織部部長，而陳立夫則擔任中央秘書長兼中央組織部副部長。以兩人為核心嘅政治派系起源於「浙江革命同志會」，1927年8月蔣Sir下嘢嘅時候，授以該組織發揮作用。因陳字英文拼寫以「C」開頭，兩兄弟就係「CC」，亦都係「中央俱樂部」英文譯名嘅縮寫，所以兩人為首嘅政治勢力亦被稱為CC系，兩個人都係蔣Sir嘅親信，佢哋掌管國民黨黨務機構，之前有講過「宋家皇朝蔣天下」，亦都有另一個講法，叫「蔣家天下陳家黨」。

#常威💀 #蔣介石平反系列 #黃金十年 #民國歷史

https://www.youtube.com/playlist?list=PL0RVUAILQUOvTo8JJrayjrvd_Nbjc-0Me

❤請加入常公子的近代史世界！

#常威 #廣東話 #中國近代史 #HongKong #Chinese #History

【常威近代史】（五百五十二回）
大家有返咁上下先可以對話

千萬唔好以為做一個梟雄或獨裁者好容易，尤其是喺亂世，個人相信簡直係最艱難嘅職業選擇，當然梟雄或獨裁者亦唔係你想做就做，一切都係時勢做英雄，當時代要將你推上去，你亦唯有硬食呢份工，呢份工當然有充足嘅退休保障或大把錢駛，但係危險性亦足以媲美騎師，分分鐘會死，而且又會連累家人同朋友，最重要嘅係，做得好自然流芳百世，做得唔好就遺臭萬年，而且好似汪精衛咁，只不過臨門一腳射失十二碼，晚年失節，就俾人鬧足100年。政治遊戲，從來都係一個最大嘅賭局，賭得大贏得大，勝利者可以贏得天下，但係輸咗千祈唔好後悔，起初冇人迫你落part，你要玩遊戲就心甘命抵，人生其實有好多唔同嘅選擇，鬼叫你唔鍾意平平無奇咩？

1929年11月17號，「護黨救國軍」第八路總司令李宗仁與第三路總司令張發奎聯合通電討蔣，戰事擴大，11月20號，響李宗仁桂系軍隊攻擊下，粵軍從梧州撤回廣州；同日，蘇聯紅軍攻佔東北重鎮滿洲里。中東鐵路事件發生後，中蘇軍隊喺滿洲里、綏芬河、札蘭諾爾不斷發生磨擦，雙方互有死傷。今個月17號，紅軍出動兩個師，響飛機、坦克嘅掩護下，向滿洲里，扎蘭諾爾同時發動總攻擊，出飛機大炮坦克同你玩鋪真，東北軍嘅守軍韓光弟旅同梁忠甲旅幾乎全軍覆歿，19號，扎蘭諾爾失守。張學良亦被迫同意接受雙方嘅和平談判要求，鬼叫你唔夠打咩？11月30號蔡運陞（1879-1959）同李紹庚（1896-1949）奉張學良命令，乖乖哋前赴邊境伯力同蘇方代表談判。

我講過，雙方都唔想打，因為大家都冇乜錢，坐埋談判最好，唔掂傾到掂。講開埋檯傾計，好多人都唔明白一個道理，從來可以傾偈嘅人，通常都係竹門對竹門、木門對木門，大家有返咁上下先可以對話，如果一方比另一方強大太多，亦根本唔需要傾，拉曬你去坐監叫你收嗲就得，傾乜卵啫？原本以爲人哋願意同你傾偈係驚你有牙，其實只係人哋俾面你讓你以為自己有發言權，結果你會錯意，以為自己真係有料到，或以為人哋真係驚咗你，「鬥而不破」只係莊家一直安排嘅格局，一夜之間打破咗，大家撕破臉了，赤裸裸以實力秤高低，原來冇料到，於是全盤輸清，呢啲事情喺歷史上亦都好常見，凡事都要講實力，實力有兩種，一種叫武力，另一種叫錢，如果兩樣野都冇，情況叫冇談判籌碼，就唔該收皮，希望大家要明白。