大清亡國關慈禧蛋牛治 3

【常威近代史】（七百三十回）
紅軍會師 25000里長征結束

時間線嚟到1936年10月，10月1號，國民政府開始徵收所得稅，增加稅收渠道，預備打仗，今日，華北軍閥宋哲元（1885-1940）同日本帝國訂立《華北經濟開放協定》，到目前為止，宋哲元明顯積極賣國，亦係日本進行華分離最主要拉攏對象，日本亦有意思比宋哲元統治華北，建立傀儡政權。但係睇返，1936年宋哲元只剩低有區區四年陽壽，廣東話俗語嗰頭近，但非常神奇嘅係，響佢死後，國共兩黨對佢嘅評價都係甚高，雖然並唔係乜嘢民族抗日英雄之類，但係亦未至於被冠上「賣國賊」或「大漢奸」之名，所以做人，做錯100件事唔緊要，最緊要做啱最重要嗰件事；相反，做啱100件事冇用，如果最重要嗰件事做錯，或者揀錯，一失足成千古恨，最後都係要遺臭萬年，大家當然明白我講緊邊個？當然係講緊中國近代史上最大嘅大漢奸汪精衛先生。

10月1號，中國當選為國聯非常任理事國，同一日，巴金（1904-2005）、林語堂（1895-1976）及魯迅（1881-1936）等21文學家聯名發表《文藝界同行為團結御侮與言論自由宣言》，團結御侮即係團結抗日。10月6號，日軍喺上海製造緊張局勢，各國軍艦紛紛抵達上海戒備，隨時預備撤僑行動，嚟到呢度，其實煲水已經滾瀉咗，隨時隨地就會爆煲，似乎日本正喺度等待一個適當機會，發動全面侵略戰爭。

10月8號，鄭天賜（1884-1970）當選為海牙國際法庭法官，鄭天錫為廣東香山人，國父孫文同鄉，佢係當代著名法學家、外交官，與王寵惠（1881-1958）齊名。鄭天錫早年就讀於香港皇仁書院，Queens呀，香港開埠之初，叫中央書院（Government Central School，當時又稱大書院。1907年前往英國留學，1912年畢業於英國倫敦大學學院法學院（UCL Faculty of Laws），1916年獲英國倫敦大學學院法學博士學位，係博士學位，唔係學士學位。鄭天賜嘅博士論文為《國際私法中關於確定契約能力的法規》（Rules of International Law Determining Capacity to Contract），乃首位在英國獲得法學博士學位嘅中國人，之後回國成為執業律師，並且於民國期間擔任不同重要司法職位，1936年，鄭天錫當選為國際聯盟於荷蘭海牙常設國際法院法官，成為繼王寵惠之後第二個當選為常設國際法院法官嘅中國人，任期本來至1945年。1940年納粹德國入侵荷蘭，鄭天錫離開海牙，避居瑞士日內瓦。1945年二戰後返回海牙，出席常設國際法院全體法官會議，後被選為國際聯盟清理委員會委員（Member of Board of Liquidation of the League of Nations）。同年返國，重任國民政府司法行政部次長。1946年至1950年間出任中華民國末任駐英國大使，鄭天錫駐英大使任內，與英國朝野人士感情融洽，去職之日的臨別贈言――「與中國人做過朋友的，永遠是朋友」，又將中國人交友重信義嘅真諦婉轉表達，可謂「一語能彰大國風」。

10月9號，紅4方面軍到達會寧，與紅1方面軍會合，22號，紅2軍團喺將臺堡，23號，紅6軍團響興隆鎮同紅1方面軍會師，至此，紅軍三大主力會師甘陝，完成25000里長征之旅。上年9月，張國燾（1897-1939）率領紅4方面軍南下，至11月間取得殲滅川軍2萬幾人嘅輝煌戰績，但係紅軍亦都傷亡近萬人，今年2月，國民黨增調重兵向紅4方面軍進攻，張國燾且戰且退，向西越過大雪山，4月抵達甘孜，爐霍地區，兵力只剩下4萬幾人。原本響湘鄂川黔根據地嘅紅2、紅6軍團，響賀龍（1896-1969）及任弼時（1904-1950）等人領導下，亦都響上年11月19號從湖南桑植嘅劉家坪開始轉移，於今年3月到達黔西，7月2號，兩軍響甘孜會師，紅2、紅6軍團合編為紅2方面軍。

呢個時候，張國燾已經乖番，不再叛逆，取消自立嘅「中央」，響朱德（1886-1976）等人嘅力爭下，紅2、紅4方面軍北上與紅1方面軍會合，沿途經過阿壩等地，於同年8月到達甘南， 中共中央命令張國燾嘅紅4方面軍喺通渭一帶配合奪取寧夏計劃，但張國燾又唔聽中央支笛，決定從蘭州渡黃河進入甘北，朱德不從，加上喺蘭州渡河時發生極大困難，張國燾先放棄個計劃，繼續北進同紅1方面軍會合。

10月10號，上海《神州日報》復刊，10月11號，中共中央發表《十月份作戰綱要》，10月12號，北平教育學術界70幾個知名人士發表對時局宣言，表明需要團結一致，共同抗日。10月15號，國民黨宣佈因為時局理由國民大會延期舉行。10月17號，國民政府電令冀察地方當局與日本簽訂《中國華北航空協定》，雖然就快打仗，但日常生活仍然係要過嘅。10月18號，臺灣400幾名反日人士被捕。

#常威 #蔣介石平反系列  #佛經抄寫員 #中日戰爭 #民國歷史

［常威近代史］第七百三十回 紅軍會師二萬五千里長征結束（高清錄音版）

#唔鍾意睇字可以聽

https://fb.watch/ggEulsEFlp/

【常威近代史】（七百三十一回）
魯迅歸天

1936年10月19號，畢生致力改造中國國民精神面貌，圖以呐喊喚醒中國民眾嘅大文學家魯迅（1881-1936）喺上海家中病逝，終年55歲，死於肺結核病，即係肺癆，突如其來，震驚全國。以今日角度，絕對係dying young！魯迅原名周樹人，1881年出生於浙江紹興，1902年前赴日本學醫，期間決心棄醫從文，從此走上咗一條作家之路，1909年魯迅返去中國，1918年發表中國新文學史上第一篇白話小說《狂人日記》，一舉成名，之後參加《新青年》刋物編輯工作，呢本重要嘅年青人文學雜誌，差唔多改寫咗一代人嘅意識形態同命運，魯迅亦成為新文化運動悍將之一，以尖銳筆觸，諷刺時弊，諷刺中國人嘅文化劣根性，影響之深，可謂無出其右。

魯迅之後出版嘅《呐喊》、《彷徨》短篇小說及《熱風》散文集，更加係幾代中國兒童必讀書。其中一篇《阿Q正傳》短篇小說，更加奠定咗魯迅嘅文壇top one地位。當中嘅阿Q，天生低智商但凡事認屎認屁，憑自我感覺良好解決一切問題，亦係魯迅筆下影射當時中國人劣根性嘅寫照，睇唔明得啖笑，睇得明就心驚膽跳。五四新文化運動高潮過後，魯迅繼續以寫作維生，出版咗大量雜文散文，但其初衷畢生未改，文筆與思路始終激烈痛切，下下入肉，驚你唔夠痛。

魯迅嘅文學修為有幾高？唔可以用今日嘅水準去評論，但係佢成為影響近代史上中國文化最深刻嘅一位文學家，就珍珠都冇咁真，亦都唔駛爭辯。其地位真係無可代替，魯迅之後，亦都冇號一個文學家嘅影響力可以達到佢嘅高度，當時社會上，我諗十個左傾的少年，有三至五個係因為魯迅而左轉，一支筆嘅威力，或者文人影響意識形態嘅威力，響魯迅身上可説發揮到淋漓盡致，時勢造英雄，真係冇錯。魯迅突如其來嘅死訊引起全國轟動。治喪委員會由宋慶齡（1893-1981）、蔡元培（1968-1940）等知名人士組成，其中包括了上海各界救國聯合會推薦嘅沈鈞儒（1875-1963）、李公朴（1902-1946）二人，10月22號，上海過萬民眾自發為魯迅舉行一個前所未有嘅隆重葬禮，以一個文學家嘅身份嚟講，真係驚天動地。魯迅嘅生命，將文學力量帶到高峰，魯迅之後，亦無以為繼，直至今時今日。

10月22號，四川省與中央合資嘅四川水泥公司成立；同一日，根據上海《申報》報導，廣西省軍隊已完全復員，李宗仁白崇禧投靠（或者叫投降）蔣介石，並唔代表佢哋要交出軍權，有啲嘢一旦交出，可能連命仔都冇埋架。今日，蔣介石處理完兩廣問題後，亦同錢大鈞（1893-1982）等十幾人飛抵西安，錢大鈞為國民革命軍創立時嘅核心人物之一，為孫文組織軍隊時嘅參謀，同時也是蔣介石嘅核心幕僚。搞掂完李宗仁同白崇禧，又要搞另一個更棘手嘅張學良。

【常公子歷史頻道 505回：黃金十年系列之 南昌暴動】

▶南昌暴動，正正就是412清黨事件發生後，國民黨同共產黨正式分裂，共產黨所發動嘅第一場武裝起義，利用軍事武裝介入同群眾暴動，企圖奪取一個城市嘅控制權，這場政變其實係成功咗，亦都成立咗無產階級政權控制南昌城，只不過政權嘅壽命非常短，只有區區3日，因為對方援軍到達而撤退，對於守唔住南昌城，之後嘅參與者亦被處分，1927年11月，共產國際代表羅明納茲在中共中央擴大會議上，以違反共產國際指示所謂「政治紀律」問題，決定將譚平山開除出黨，並給予周恩來、惲代英、李立三等人處分。不過參與南昌暴動嘅共產黨員，大多數亦成為之後中共軍方嘅中流砥柱，當中包括周恩來、朱德、賀龍、劉伯承同葉挺等等，萬丈高樓平地起，真正的成功亦只會響不斷嘅失敗當中鍛煉出來，1927年8月發生南昌暴動，22年之後，1949年共產黨奪取整個中國，建立中華人民共和國，鋼鐵就是這樣鍛煉出來的。

⏩https://youtu.be/K8Bo7wf4cB4

#常威💀 #常威近代史頻道 #黃金十年系列  #民國歷史 #佛經抄寫員

［常威近代史］第七百三十一回 魯迅歸天（高清錄音版）

#唔鍾意睇字可以聽

https://fb.watch/gk-j-RBP2-/

【常威近代史】（七百三十二回）
人之將死 其言也善

時間線進入1936年11月，距離中日全面戰爭爆發只剩低8個月，歷史大破局即將發生，中日互鬥，差唔多延續咗半個世紀，一直處於「鬥而不破」狀態裡頭，雙方可以鬥生鬥死，甚至鬥過你死我活，但係就唔可以破局，因為一旦破局，雙方都要承受唔能夠想像嘅後果，事實證明上述講法冇錯，大破局之後，日本硬食兩粒原子彈，從此以後成為美國人契弟，一晃眼就叫契哥叫咗七十年，蔣介石政權更加唔使講，一場戰爭，將江山拱手相讓。所以破局之前，真係要諗清諗楚，繼續鬥落去、繼續拉扯落去，難睇係難睇少少，但可能係一個唔錯嘅選擇。不過，「鬥而不破」係一個非常之高嘅藝術境界，其實好難掌握當中嘅平衡，政治最大嘅智慧在此，並唔響其他地方。

11月1號，6000名日軍響北平大規模演習攻防戰，千祈唔好再講戰爭係突然發生，其實預備功夫都做咗好耐鳥。11月2號，前北洋政府臨時執政段祺瑞喺上海病逝，終年72歲。段祺瑞（1865-1936）號稱北洋之虎，係袁世凱死後軍閥時代叱吒風雲一個代表人物，如果中國近代史真係有一個叫做軍閥時代，而當中有很多仆街冚家鏟嘅大軍閥，段祺瑞的確係當中嘅表表者。1926年段祺瑞出任最後職位臨時執政，3月18日，發生北洋政府鎮壓北京學生運動的三一八慘案，同年4月9日被鹿鍾麟（1884-1966）驅逐，避入東交民巷法國使館，20號下台，退居天津日租界當寓公，潛心佛學，自號「正道居士」。之後918事變發生，段祺瑞拒絕為日本人服務，離開天津，於上海終老，段祺瑞得道在黃昏，老年頗受人尊敬，可能同誠心禮佛有關，死因係胃病突發，抄錄佢嘅遺囑如下：

『余年已七十有餘，一朝怛化，揆諸生寄死歸之理，一切無所縈懷。惟我瞻四方，蹙國萬里，民窮財盡，實所痛心！生平不喜多言，往日曲突徒薪之謀，國人或不盡省記，今則本識途之驗，為將死之鳴，願我國人靜聽而力行焉！則余生雖死猶生，九原瞑目矣。國雖微弱，必有復興直道，亦至簡單：勿因我見而輕起政爭；勿尚空談而不顧實踐；勿興不急之務而浪用民財；勿信過激言行之說而自搖邦本；講外交者，勿忘鞏固國防；司教育者，勿忘保存國粹；治家者，勿棄固有之禮教；求學者，勿鶩時尚之紛華。此八勿以應萬有，所謂自力更生者在此，轉弱為強者亦在此矣！余生平不事生產，後人宜體我樂道安貧之意，喪葬力崇節簡，殮以居士服，毋以葷腥饋祭。此囑。』

人之將死，其言也善。

［常威近代史］第七百三十二回人之將死 其言也善（高清錄音版）

#唔鍾意睇字可以聽

https://fb.watch/gpLkPD14p1/

【常公子歷史頻道 506回：黃金十年系列之 文人瞿秋白】

▶經歷412血腥清黨事件後，中共原有領導人陳獨秀負起所有政治責任，宣佈下野，離開中共領導層。1927年瞿秋白臨時上馬，成為新一任中共最高領導人，瞿秋白係一個百分百嘅文人，係五四時代一個著名作家同知識份子，佢相信馬克思主義或共產主義先係唯一救國之途，瞿秋白亦係一個政治轉折式嘅人物，響瞿秋白之前，中共基本上可以被稱呼為一個「文人政權」，但響瞿秋白之後，中共為了響蔣介石血腥屠刀下繼續生存落去，已經成為咗一個「軍人政權」，其政權形態性格之改變，可說為勢世所逼，毛主席曾經講過，世界上冇無緣無故嘅愛，亦都冇無緣無故嘅恨，一切都係因果關係，一切都係物質條件同客觀環境嘅變化而催生嘅改變，係存在決定意識，並非意識決定存在，唯物辯證法嘅真義在此，人類嘅自由意志，其實係因為物質條件和客觀環境而形成或操縱或決定，……

⏩https://youtu.be/7rfXGSNYrE4

#常威💀 #常威近代史頻道 #黃金十年系列  #民國歷史 #佛經抄寫員

［常威近代史］第七百三十三回 愛國愛得不對也有罪（高清錄音版）

#唔鍾意睇字可以聽


https://fb.watch/gtJcFOvWkH/

【常威近代史】（七百三十四回）
西安事變（上）

時間線進入1936年嘅12月，今個月將有一件影響整個中國歷史大局嘅大事發生，就係中國近代史上差唔多一件最重要嘅政變將要發生，冇錯！登！登！登！就係——西安事變！

12月1號，中共領導人聯名致書蔣介石，要求共同抗日！所有人都睇得出，日本人將會對中國發動全面侵略戰爭，當時，整個世界上我諗已經冇人可以改變呢個死局面，你想唔打都要打，對方睇住你嚟食，當然日本人嘅判斷亦都係錯嘅，中國呢嚿霹靂無敵豬頭骨，並唔係你咁容易啃得落！同一日，冀東自治政府強行接收冀東各縣司法機關，好話唔好聽，其實戰爭已經開始咗。12月2號，國民黨中正會通過《遺產稅原則》，同日，朱德（1886-1976）、張國燾（1897-1979）率領紅軍總部到達陝北保安，同中共中央會合，中共軍政會師。今日，青島日本人經營嘅紗廠全部停工，27000勞工失業！12月3號，張學良請求率領東北前赴綏遠前線抗日，但被蔣介石拒絕，為政變埋下伏線。

12月4號，國民政府命令統一外交職權，同時公佈《中外合資興辦實業辦法》，今日，中國無人不識嘅名妓賽金花（1872-1936）喺北平病逝，終年62歲。賽金花可以講係中國女性主義嘅前衛人物，一生人結過三次婚，每次離婚都做番交際花又再結婚，嫁親嘅都係名人有錢人，真係唔恨得咁多。今日，蔣介石亦返抵西安，進入捕鼠器內。12月7號，張學良到華清池向蔣介石「哭諫」，再次請投蔣介石聯共抗日，但蔣介石再次拒絕 Again and again。睇到呢度，大家都睇到張學良已經畀咗好多次機會蔣介石，有陣時造反真係被逼，只要蔣介石嘅態度冇咁強硬，或者只要「口頭」應承張學良，西安事件根本唔需要發生。不過我已經講過，作為一個軍事強人或獨裁領袖，真係冇得縮，冇得退半步海闊天空，因為一縮，好容易就會產生骨牌效應兵敗如山倒，事實證明，蔣介石嘅遭遇都係一樣，所以佢基本上無錯。

12月7號，中華蘇維埃中央政府發佈命令，改組中央革命軍事委員會，以毛澤東（1893-1976）、朱德（1886-1976）、周恩來（1898-1976）、張國燾（1897-1979）、彭德懷（1898-1974）、任弼時（1904-1950）、賀龍（1896-1969）、項英（1898-1941）、林彪（1907-1971）、王稼祥（1906-1974）、徐向前（1901-1970）、陳昌浩（1906-1967）等大名23人為委員。毛澤東、朱德、周恩來、張國燾、彭德懷、任弼時、賀龍七人組成主席團。毛澤東任主席，周恩來，張國燾任副主席，朱德擔任中國紅軍總司令，張國燾擔任總政委。中央革命軍事委員會自1931年11月成立以來，一直由朱德擔任主席，今日換成毛澤東，毛澤東亦由依一刻開始，正式成為中共軍事最高領導者。

12月8號，南京朝天宮古物保存庫竣工，5151箱故宮古物從北平運抵南京存放。12月9號，西北各界抗日救國會發表《129宣言》，同一日，西安10000名學生遊行示威，要求停止內戰，一致抗日。12月10號，綏遠中國軍隊收復大廟，今日，張學良同楊虎城（1893-1949）再次分別向蔣介石進諫，last餐屎！你係唔聽吖嘛，咁就唯有動粗嚕，其實我都唔想。

12月12號，張學良，楊虎城實行「兵諫」，扣押咗響西安臨潼華清池嘅蔣介石，逼其抗日，西安事變爆發。早響10月22號，蔣介石到達西安督剿紅軍，張學友同楊虎城開始採取「諍諫」辦法，多次勸說蔣介石放棄剿共，轉向抗日，但三番四次遭到蔣介石拒絕，蔣介石甚至提出東北軍、楊虎城嘅17路軍讓出地盤，畀佢嘅中央軍進駐剿共，張學良同楊虎城感到苦諫無望，終於決定喺今日實行兵諫！今日淩晨3點鐘，東北軍突襲蔣介石喺華清池嘅臨時行營，生擒蔣介石，蔣介石被捉後，被押往西安新城大樓。與此同時，楊虎城嘅17路軍喺西安內行動，扣押咗陳誠（1898-1965）等中央軍政要員。張學良同楊虎城隨即通電全國，提出改組南京政府，全面停止內戰，共同抗日，釋放政治犯等8項抗日主張，並且電邀中共派代表到西安共商抗日救國大計。5日之後，即係12月17號，中共代表周恩來、博古（秦邦憲，1907-1946）、葉劍英（1897-1986）等到達西安。

西安事變發生之後，何應欽（1890-1987）下令討伐張學良，蔣介石則一直表現出「決為國犧牲」嘅姿態，誓不低頭，講真，依一點我非常欣賞，軍事強人的確有軍事強人嘅風度。12月14號，威廉·亨瑞·端納（William Henry Donald，1875-1946）到達西安見蔣介石，情況先開始有轉機。端納係邊位？端納係澳大利亞人，曾先後擔任過國父孫文、張學良同蔣介石、第一夫人蔣宋美齡嘅私人顧問。一生事業都在中國，曾贊助辛亥革命，後來又成為中華民國北洋政府客卿，係中華民國時期中國政壇上最為活躍嘅西人，有「中國的端納」之稱，一句到尾，佢唔係一個普通嘅西人，甚至可以講係一個超人。

下回繼續西安事變……

#常威 #蔣介石平反系列  #佛經抄寫員 #中日戰爭 #民國歷史

❤【常威近代史】第一部《大清亡國關慈禧蛋牛治》，全面開放，免費下載， #freedownload！

Free下載連結🔽

https://play.google.com/store/books/details?id=C3hjDwAAQBAJ

［常威近代史］第七百三十四回 西安事變（上）（高清錄音版）

#唔鍾意睇字可以聽

https://fb.watch/gz06YvuttO/

【常威近代史】（七百三十五回）
西安事變（下）

繼續西安事變……

威廉·亨瑞·端納（William Henry Donald，1875-1946）依個當時嘅中國通到達西安見蔣介石，調和西安事變嚴峻局勢，端納向蔣介石傳達咗英國、美國表示贊同西安張學良方面主張嘅態度。情況亦都相當簡單，當時蔣介石背後的金主就係美國人，美國人嘅態度，亦都主宰咗蔣介石嘅態度，端納並同時遞交蔣介石夫人宋美齡嘅親筆信，內裡有講——「南京方面是戲中有戲」——即係話，南京方面亦都唔係全力支持蔣介石響西安撐落去，分分鐘有人會乘機發動政變，取而代之。呢個世界嘅嘢，真係局中有局，戲中有戲，每個人表面做嘅事，未必代表佢心裡面嘅真正想法，凡事只睇表面，唔明白內裡嘅糾纏瓜葛，就大部份情況會睇錯。

端納見過蔣介石後，蔣介石亦改變咗立場，願意放低身段展開談判，佢改變立場嘅原因係乜嘢？其實冇人知道，我自己本人認為老婆宋美齡嗰封親筆信，會係非常重要嘅線索。人走茶涼，如果唔可以儘快解決事件大師兄回歸，畀人挾響西安一年半載，南京真係乜嘢事都可以發生，平日你點對人，人哋會點對你嘅。於是響西安事變爆發嘅10日後，即係1936年12月22號，宋子文（1894-1971）、宋美齡（1898-2003）代表蔣介石同張學良（1901-2001）、楊虎城（1893-1949）正式開始談判，宋家皇朝蔣天下的確冇錯，談判期間，周恩來作為中共全權代表參加，12月24號，各方面亦都非常快手達成以下六項基本協議：

1.撤退西安周圍的政府軍隊；
2.停止內戰和剿共；
3.發起全國規模的抗日運動；
4.發給共產黨軍隊軍餉；
5.釋放上海救國協會的七位領袖（七君子）；
6.改組中央政府，切換下列地方官員：包括上海市長、上海警察局局長、江蘇、安徽、江西同福建省的主席等；

「第二次國共合作」基礎方案敲定，ok！拆掂了！1936年12月25號聖誕節，蔣介石被釋放離開西安飛回南京，陪佢返去南京仲有專程「赴京請罪」嘅張學良，就係咁，震動中外、驚心動魄嘅西安事變終告和平解決。

當然，事件亦都唔係咁簡單，蔣介石願意咁順攤答應所有條件，包括停止剿共，展開第二次國共合作，都只不過係想及時離開險境嘅權宜之策，西安事變已經令蔣介石覺得顏面全失，face冇曬，你估方丈佢會點諗先？事實上，補充少少資料，咁早匆匆忙忙放走蔣介石返南京，其實楊虎城同周恩來事前都唔知情，楊虎城喺一封信中咁講過：

「這樣匆匆忙忙地放蔣，張先生事前並沒有徴得我的同意，而他一定要陪蔣走，更出乎我的意料，我原以為張縱然不對我說，一定會對周先生（周恩來）說明的，及至我和周先生見面的時候，周先生說他事前也毫無所聞……我不是不同意放蔣，但不能就這樣放啊，沒有同周先生和我商量，這還有什麼三位一體！」

吓？家陣細路仔玩泥沙嗎？釋放蔣介石咁大件事，連楊虎城同周恩來都冇事前被通知？張學良就是由始至終這樣有型，其實，自從綁架蔣介石開始，張學良就不止一次響不同場合表白過自己嘅心跡，就響送走蔣介石嘅前一日，佢向部下表明咗送蔣嘅意圖：

「你們要知道，這次事變，對蔣是一個很大的打擊，我們現在不但要放他走，而且今後還要擁護他做領袖，還要同他一起共事，所以現在我們萬不能再為難他，我們要給他撐面子，使它恢復威信，今後好見人、好說話、好做事。我親自送他就是這個意思，使他答應我們的事不能反悔……」

而蔣夫人宋美齡就對張學良點解隨蔣介石回南京作出以下詮釋：

「他必須去南京，這是他義不容辭的責任。首先，他已向他的同僚們保證，要為西安所發生的一切承擔全部責任；其次，他必須向世人證明，他的所作所為既不是出於叛變的動機，也不是打算反對委員長，反對委員長的地位和權力……一個發動兵變的高級將領急於到首都去接受對其罪行的審判，這有史以來還是第一次，這就是為什麼中央政府對漢卿（張學良）表示寬大的原因……」

12月26號，發動西安事變的主謀少帥張學良開始被軟禁，直接去到20世紀末期響臺灣先被釋放，回復自由身。風高亮節楊虎城嘅收場更加慘烈，抗日戰爭之後，佢被秋後算賬，慘遭滅門之禍。方丈是小氣的，世事的確令人沮喪非常。

10日前，1936年12月16號，紅軍開始進駐延安，從此之後，延安成為共產黨中央建國之前嘅根據地；12月22號，由於局勢變化，汪精衛從歐洲回國。12月23號，國民政府公佈《最低工資法》，規定成年工人以維持其本身及足以供給無工作能力親屬兩人之必須生活為準，至於一家三口生活必須實際數字係幾多，可能見仁見智。12月25號，國民政府公佈《勞動契約法》，同日，蔣介石安全回到南京歸位，張學良被軟禁。12月26號，偽滿洲國同日本簽訂郵政協定。12月31號大除夕，關於張學良嘅審訊亦有結果，真係好快好爽手，西安事變策劃人張學良被判處有期徒刑10年，剝奪公民權利5年，可以算係從輕發落。

驚心動魄嘅1936年，於焉結束。

#常威 #蔣介石平反系列  #佛經抄寫員 #中日戰爭 #民國歷史

【常公子歷史頻道 507回：黃金十年系列之 龍潭之役】

▶笑面虎孫傳芳破釜沉舟，發生在南京外圍的之龍潭之役，可以說是中國近代史上一場非常重要嘅關鍵戰役，首先依一場戰役規模相當之大，死傷數字亦好高，同之前好多軍閥之間嘅hea打戰事分別好大，基本上係一場生死存亡之戰，即係唔係你死，就係我亡，由代表舊勢力北洋軍閥系統嘅孫傳芳，對新崛起嘅蔣介石國民黨新勢力，雙方都係全力以赴。戰事發生之前，冇任何一方面可以佔到絕對優勢，戰役發生途中，南京蔣介石政權嘅中央政府甚至發動總徹退令，預備棄守首都南京，差少少就會俾孫傳芳反撲成功，假如龍潭之役最後嘅勝利者係孫傳芳，我諗之後近代史嘅走向會係完全兩碼子事，可以講，蔣介石一方嘅勝利其實都係出於幸運之神嘅眷顧，響軍事系統指揮同兵力上，我唔覺得蔣方有勝算，這場戰役，撇除幸運成份，我諗最重要都係士氣同意識形態問題。「點解要打？」「我為咗咩嘢打？」呢啲問題，其實每個士兵都會問自己，亦其實相當重要，甚至到咗今時今日嘅21世紀現代化戰爭中，軍隊士氣同意識形態仍然係一場戰爭中唔可以缺少嘅一環（更重要嘅一環當然係：錢），一個忠誠有信念嘅士兵上戰場，如果戰鬥力同整體表現會打高五成；相反一個無心戀戰或信念全無嘅士兵，只會盡五分力都比多咗你，咁一來一回相差就有十成，等於一個兵單位，條數好易計亦好膚淺（我份人的確好膚淺），不過，真實情況似乎都係咁～（當然下下動用核武就乜嘢都唔使計嚕～）

⏩https://youtu.be/x0aRzEJtw_k

#常威💀 #常威近代史頻道 #黃金十年系列  #民國歷史 #佛經抄寫員

［常威近代史］第七百三十五回 西安事變（上）（高清錄音版）

#唔鍾意睇字可以聽

https://fb.watch/gDvE6Z29VK/

【常威近代史】（七百三十六回）
風高亮節 捨我其誰

我的近代史抄寫工作，終於來到中日戰爭全面爆發嘅1937年，大破局終於發生，重提一次，不少現代歷史學者，都會認為中日戰爭其實在918事變、松滬戰爭時期即已經開始，「八年抗戰」應該修改為「十五年抗戰」，不過，純粹定義問題，無關宏旨；但歷史總係有驚人相似嘅地方，2022年所爆發嘅「俄烏戰爭」，事實上原點應該係2014年嘅烏克蘭顔色革命，只不過之後拉拉扯扯，拖多8年先進入全面交戰嘅大破局，中日戰爭嘅情況亦都大同小異，918事變之後，雙方都曾經盡力避免大破局發生，只不過，人世間嘅恩怨情仇真係好難透過談判協商去解決，訴諸武力，有時候亦都係最直接亦係最有效。「中日戰爭」與「俄烏戰爭」最大嘅分別，在於今日有玉石俱焚嘅核武存在，我成日都講，改變整個世界基本格局嘅人，其實係發明原子彈嘅奧本海默（1904-1967）（及其團隊），喺中日戰爭爆發嘅1937年，足以改變整個人類歷史、超巨大殺傷力武器原子彈嘅理論同概念，早已經在奧本海默腦中全部成形……

1937年嘅1月1號，楊虎城將軍喺西安閱兵並發表演說，強調決心聯合紅軍抗日，呢個時候，西安事變嘅另一個主角張學良已經被軟禁響南京。今日，柳州12對新人喺國民黨縣黨部內參加咗第一次集體結婚。依一次集團結婚係由柳州縣長楊盟發起同埋組織嘅，依一種移風易俗嘅檢省婚禮形式，得到市民嘅贊同，不過贊同還贊同，跟唔跟又係另一回事。縣政府於是制定咗《柳州縣集團結婚辦法》同《參加柳州縣第一屆集體結婚須知》等章程，響婚禮上柳州縣長楊盟致祝詞。1月2號，日本飛機響青島上空散發傳單，青島市政府向日領事館提出嚴正抗議。

1月4號，青島走私集團韓國人侮辱以及毆打海關人員，無法無天。同一日，西安東北軍將領不滿蔣介石對張學良嘅處置，決定作軍事準備，的而且確，張學良被軟禁，佢手底下幾十萬嘅東北軍又點安排呢？我諗張學良發動西安事變時，佢並未有諗到事後太多，閱讀張學良歷史，總覺得佢係個大開大合嘅人，心思並不慎密，甚至好多時候做事非常衝動，絕對唔係馬基維利主義者。可能鑒於東北軍嘅軍事行動，1月4號當日，國民政府命令特赦張學良，免除其徒刑，只將佢交畀軍事委員會「嚴加管束」，監就唔使坐，不過就妄想離開南京。

上年12月25號，張學良「赴京請罪」，同蔣介石一齊返到南京，一落機就被送到宋子文屋企軟禁，蔣介石並派人示意張學良寫一封「請罪書」，31號，高等軍事法庭會審張學良，指其「首謀伙黨，對於上官爲暴行脅迫罪名」，判處張學良有期徒刑10年剝奪公民權利5年，張學良自始開始咗無比漫長嘅囚徒生涯，當時張學良正正係37歲，正值人生最好年華，直至蔣介石、甚至蔣經國過身先有轉機，1月9號，國民政府又向西安方面施壓，要求東北軍同17路軍撤到陝西西部同甘肅，或者調東北軍駐守安徽，17路軍仍留陝西，1月11號，楊虎城部隊離開西安移駐臨潼，29號撤往渭北三原一帶，息事寧人，並冇發生內戰。東北軍嘅取向當然亦同張學良嘅意志有關，西安事變發生，就係要團結一致，共同抗日，冇奶油自己先開拖掛？

事實上，張學良被軟禁之後，佢手下嘅東北軍亦都發生好多事，部下互相爭權仇殺亦發生過，不少東北軍將領，更加希望迎救張學良，想佢離開南京，東山再起，不過張學良始終冇咁做，佢要走，難道蔣介石留得住佢？張學良事後曾經對佢嘅部下咁講過：「我原是只求問心無愧，個人如何是用不著計較的。」「凡是一個現代國家，軍隊都是國家的，東北軍也絕不是我將某一人的」。當有一日，張學良聽聞東北軍內鬨，少壯派軍官槍殺67軍軍長王以哲（1896-1937）時，佢寫信畀部下于學忠（1890-1964），信中有云：

「話不知如何說，淚不知從何處流。……兄同諸同人大力維護此東北三千萬父老所寄託此一點武裝，吾等必須將我們的血及此一點武裝，供獻與東北父老面前。」風高亮節，捨我其誰？

再節錄一段1937年6月周恩來響延安向外國記者嘅話：「和平已經取得，我們之間再也沒有戰爭了，我們可以有機會來為抗日戰爭做充分的準備了……」順帶一提，國共之間嘅公開合作大概係1937年7月15號宣佈，但日本人於7月7號就向盧溝橋發動咗軍事進攻，搶在國共公開合作前面。日本人點解要急於發動全面侵略戰爭？相信明眼人都已經一清二楚。

去翻1月5號，楊虎城同另一軍事將領于學忠被撤職留任，炒你魷魚，但係要你繼續返工，情況都幾好笑。于學忠響抗日戰爭期間，指揮第51及57軍響大別山同八路軍並肩作戰，49年後留響中國擔任唔同官職，1964年病逝於北京。1月6號，國民政府撤銷西安剿匪總司令部，1月8號，中共中央發表《為號召和平停止內戰通電》，1月9號，西安10萬軍民舉行集會，反對內戰，呼籲和平。1月11號，教育部改東北大學為國立東北大學。1月13號，蔣介石提出國民黨三中全會，徹底解決西安事變後嘅各種善後問題，1月14號，川黔鐵路公司響上海成立。1月15號，日本明令臺灣境內各學校廢止漢文科，全部人唔俾讀中文，要讀日文，執行全面歸化，同一日，川湘公路通車。

#常威 #蔣介石平反系列  #佛經抄寫員 #中日戰爭 #民國歷史

［常威近代史］第七百三十六回 風高亮節 捨我其誰（高清錄音版）

#唔鍾意睇字可以聽

https://fb.watch/gHx6dCBbr-/