大清亡國關慈禧蛋牛治 3

政府忍讓，民怨就大爆發，918事變發生後，全國各地掀起反日浪潮，各地群眾呼籲中央下令出兵東北，收復燕雲十六州。自25號起，全國各地學生組織相繼組織請願團、示威團，向當地政府或前赴南京國民政府請願示威，要求蔣Sir抗日。9月28號，上海、南京學生5000幾人冒雨前赴國民政府請願，點名要見外交部長王正廷（1882-1961），王正廷當然唔出面，但學生衝入其辦公室，指住佢嚟鬧，更加用墨水樽擊傷佢個頭！

9月29號，蔣Sir響南京陸軍軍官學校接見前來請願學生3000幾人，並要求佢哋立刻解散，回校上課。第二波發酵，全國各地紛紛成立抗日救國會、救國義勇軍、日課調查團、抗日演講隊等民間組織，工商界對918事變反應亦都頗為強烈，北平、漢口、上海、天津、南京、汕頭嘅工商業組織相繼發宣言，表示唔同日本人做生意，向日本經濟絕交，凡向日本工廠訂購嘅貨品一律取消，已經收到嘅日貨則交由抵制日貨機構存封，佢哋亦都表示，除咗抵制日貨，亦都會向繼續買賣日貨嘅商人加以懲罰。

反日浪潮一浪接一浪，9月24號，上海三萬名碼頭工人舉行罷工，拒絕為日本船隻裝卸貨物，逼使日本貨輪滯留響碼頭。9月26號，上海郵務、水電、卷烟、針織、紡織、皮革業等百多個工會，數萬名工人喺公共體育場集合，通過抗日救國決議，要求中央限令日本撤兵，否則對日宣戰，會後，舉行遊行示威後散水。政府唔敢郁，民怨沸騰，日本就坐定粒六，積極籌備建設「偽滿州國」。

我純粹出於想像，當時張學良手中有3-40萬東北軍（應該有嘅），如果真係反抗又會點呢？中日全面戰爭如果發生響1931年，情況又會點呢？美國、英國同蘇聯又會唔會介入呢？補充一點，1930年9月，德國國會大選，希特拉納粹黨得票640萬票，佔投票率18%，國會議席有107席，正一步一步邁向權力巔峰。

918事變，亦都結束咗國民政府對中共的第三次大圍剿，9月，根據共產主義遠東局嘅提議，中共喺上海成立臨時中央政治局。響當時嘅揎fit人王明（1904-1974）安排之下，博古（1907-1946）、張聞天（1900-1976）、盧福坦（1891-1969）、陳雲（1905-1995）、康生（1898-1975）同李竹聲（1903-1973）成為臨時政治局成員，博古、張聞天、盧福坦三人擔任中央常委，當中博古主持中央工作。中共六屆四中全會後，中共領導人顧順章（1904-1934）、向忠發（1879-1931）相繼被捕叛變，令到中央機關同主要領導人不得不離開上海暫避風頭，王明已經決定前赴莫斯科擔任中共駐共產國際代表團團長，周恩來亦將前往江西瑞金。博古原名秦邦憲，係王明響莫斯科中山大學同學，係「28個半布爾什維克」之一，佢一直支持王明，亦深受王明同埋共產國際東方部部長米夫（1901-1939）嘅信任，博古被指定領導中央嘅時候，只係年僅24歲。

#常威💀 #蔣介石平反系列 #黃金十年 #民國歷史

不要奮鬥了，【我奮鬥不要奮鬥】電子書限期HK$9.9 only！

https://play.google.com/store/books/details/%E5%B8%B8%E5%85%AC%E5%AD%90_%E6%88%91%E5%A5%AE%E9%AC%A5%E4%B8%8D%E8%A6%81%E5%A5%AE%E9%AC%A5?id=CVo3EAAAQBAJ&hl=zh_HK&gl=US

【常公子歷史頻道423回：替大軍閥平反系列之 排外排到變了法西斯】

♊ 世間上有一啲事永遠冇辦法避免，正如移民問題，好多時候一個社會，發展到某個階段，就需要處理移民問題，人流出出入入 其實係好正常嘅事，否則祇有人口不斷減少，個城市就會玩完或沒落，但引入新移民，就會產生其他問題，例如居住治安問題，又例如工資及文化問題。總係會有人，覺得新移民佢哋爭福利，拉低工資，或影響市容，於是就會產生排外情緒，排毒排到最嚴重時，會變成極右法西斯主義。

♑ 21世紀初期，阿拉伯之春民主運動，西非產生大量難民，佢哋因為社會動盪，橫越地中海，湧入歐洲大陸，去到今時今日，差不多20年過去，歐洲仍然未將呢批難民完全消化，或將移民問題完全解決，問題依然存在，諗深一層，即係「移民」同「排外」嘅問題，香港都曾經發生過咁嘅故事，七八十年代，北漏洞拉，大碌竹辦，大量越南難民湧港，香港成為世界第一收容港，收容十幾萬越南難民（聯合國仲爭香港好多錢，從來都未還過），有記憶嘅朋友，應該仲會記得「難民營」嘅故事，越南仔個個好惡好打得，好似今日嘅南亞幫，好得人驚，千祈唔好惹。二三十年過去，呢批越南難民同佢哋嘅後代又去咗邊呢？

♐ 當中有唔少人去咗美國，因為美國願意負起發動「越戰」嘅責任，亦有唔少完全融入咗香港社會，轉眼間已經二三代，呢批越南難民，響你同我身邊，但唔少已經冇晒難民嘅痕跡，你同我根本察覺唔到佢哋嘅存在。 毫無疑問，香港係一個依賴移民嘅城市，香港一路以嚟嘅動力，都係因為不斷有新移民而出現，你諗深一層就會明白，舊嘅唔去，新嘅唔嚟，血液本身係需要循環不斷，可能有人嚮往平靜想去復耕，每個人嘅選擇都唔同，不過如果想物業繼續昇值（或唔跌），想股票繼續有人炒，IPO隻隻二三十倍超額認購，個社會就需要繼續有新血同新資金補充注入，道理就係咁簡單。

✅https://youtu.be/9O8G8bhBDVI

［常威近代史］第六百零三回 918事變後的中國（高清錄音版）

#唔鍾意睇字可以聽
https://www.facebook.com/129055447762576/posts/830263320975115/

【常威近代史】（六百零四回）
遠交近攻係正常思維

大部分人對中日全面開啟「戰爭模式」嘅918事變都有以下一個誤解，就係關東軍反檯入侵瀋陽，係因為有絕對軍事上嘅優勢，因此蔣Sir同張學良都唔夠膽反抗，唯有硬食。但係真實情況，究竟係唔係咁呢？今集同大家分析一下，補充遺漏。

首先1931年9月18號當日，蔣Sir同學友究竟又喺邊度？首先，佢哋唔響印度。當日，蔣Sir唔響南京，蔣Sir作為國民政府主席，海陸空三軍總司令，無論係政治上定軍事上都處於中華民國嘅最高領導位置； 同樣張學良嘅身份，係東三省（ 遼寧省，吉林省，黑龍江省） 地區實際上嘅領導人，東北邊防總司令。9月18號，離開原本應該駐守陣地嘅兩大sir，究竟喺度做緊乜嘢呢？

918事變發生之前，1931年7月到9月，蔣Sir正率領30萬軍隊，對於江西省為根據地嘅中國共產黨紅軍發動第三次剿共戰爭，自1930年12月嘅第一次剿共計起，蔣Sir軍隊就一直陷入苦戰泥濘中。之前講過，剿共同時，與國民黨內部反蔣勢力嘅汪精衛為核心，響1931年5月28號成立咗「廣州國民政府」，另起爐灶，加埋廣東派同廣西派嘅「易如反蔣」聯合部隊，響事變發生前嘅5日，即係9月13號，就進襲蔣軍後方抽佢後腳，響湖南省同蔣軍交火，蔣軍係前後受敵，相當之唔得閒，當時掌蔣Sir就喺江西省同湖南省兩邊走。918當天，蔣Sir 唔係響南京、而係響江西省省會南昌得知事變嘅消息，收到風後，佢先至立刻趕返南京，而同時結束對中共嘅第三次大圍剿。當然，蔣Sir軍隊對東北局勢嘅影響力並唔係咁大，佢亦冇可能將軍力調去東北對付日本人？唔該睇吓地圖，國民政府首都南京，就係響江西省隔籬咋。

咁學友呢？張學良9月18號又做緊乜嘢事呢？原來當時張學良為咗對應華北石友三（1891-1940，馮玉祥手下「十三太保」之一，生時常依附各大勢力，叛逆無常，之後遭到部下高樹勛兵變，活埋而死）部隊挑起嘅戰亂，帶領麾下嘅東北邊防軍（東北軍）11萬5000人精銳部隊前往被稱作關內嘅長城以南華北地區平亂，1931年8月4號被鎮壓嘅依場戰亂，其實係由日方特務機關買通石友三部隊而挑起，目的就係要將張學良東北軍最精銳嘅部隊調離大本營，日本關東軍為咗918事變，專登事先安排將東北軍主力牽制喺華北地區。

另一方面，張學良向1930年嘅中原大戰中並冇「易如反蔣」，之後更易幟加入中華民國蔣Sir陣型，自己成為咗東三省領導人及東北邊防總司令，而北平天津嘅衛戍司令、河北省政府主席等重要職務都由其黨派嘅人佔據，亦即係話，整個北方都係屬於張學良嘅。由1931年起，張學良亦著手將勢力從東三省擴展到華北嘅政治經濟領域，即使冇石友三嘅叛亂，張學良繼續留喺東北原本嘅大本營瀋陽嘅可能性都唔大，而事實上，918當日，張學良正身處北平。

張學良將勢力同樁腳南移，由瀋陽吉林移向北平天津，亦係關東軍發動918事變嘅大前題，既然你唔留戀東北，咁我就冷手執個熱煎堆。而事實上，日俄戰爭之後，為咗守護關東以及保護鐵路、仲有牽制蘇聯而設置嘅關東軍部隊，喺918事變之前，只有響日本本土派嚟兩年輪換一次嘅駐紮師團同六個大隊嘅獨立守備隊，合計能夠作戰嘅兵力只有10000人左右，呢個數量，同東北軍嘅19萬人相比（或者號稱30萬東北軍），其實係小巫見大巫，兵力非常懸殊。因此，以當時關東軍嘅兵力想要係短時間內壓制住整個滿州地區，就不得不考慮趁著張學良同東北精銳部隊離開老巢，以及蔣介石忙於剿共戰爭及對付反蔣聯合呢一個時期發動事變。老實講，對關東軍嚟講，亦都係一次豪賭。

張學良嘅東北軍精銳，已經係8月頭平定咗石友三嘅叛亂，如果918事變發生之後，張學良選擇反抗，回師東北，勝負可以話係未知之數。張學良嘅選擇，亦係918事變中最大嘅變數。其實係當時，全世界都覺得非常奇怪，張學良雖然帶走11萬精銳部隊南移，但東北地區仍然有東北軍15萬（理論上係），日本兵力祇有10000人，事變後加上朝鮮等地嘅增兵，都只不過係20000人左右，同東北軍兵力相當懸殊，而關東軍竟然能夠一夜之間佔領瀋陽，四個多月內佔領整個東三省，吞拼咗足足相當於日本本土三倍嘅中國領土，其實係世界上一個巨大嘅「軍事奇跡」。與其話日本侵略東北，不如講係張學良「拱手相送」 仲比較適合。

東北軍選擇不抵抗，其實睇返歷史，自己相當唔明白。當然，不過要將責任全部歸咎于張學良，亦都係唔恰當，因為佢只係執行者，真正選擇對日本人侵略「採取容忍態度，不加抵抗」嘅，係南京國民政府，亦即係蔣Sir本人。

我非常有理由地相信，對日本發動侵略而選擇不加抵抗，蔣Sir 最大嘅考量，係唔可以再分散有限兵力多開一條大戰線，「剿共」先係最重要，「先安內、後攘外」係佢嘅基本戰略原則，畢竟以心理角度分析，論仇恨同血酬之巨大，蔣Sir同共產黨，絕對大過佢同日本人，而且共產黨近在咫尺江西省，東北同南京離天九丈遠，遠交近攻，亦係正常思維。


#常威💀 #蔣介石平反系列 #黃金十年 #民國歷史

［常威近代史］第六百零四回 遠交近攻係正常思維（高清錄音版）

#唔鍾意睇字可以聽

https://www.facebook.com/129055447762576/posts/831339020867545/

第四，日本人口中嘅「滿蒙問題」，其實相當複雜，要講，可以講到辛亥革命之前，或袁世凱時代嘅「二十一條」，給予了日本帝國響東北滿蒙地區嘅特殊地位，怕大家忘記，「二十一條」買國條約係唔關袁世凱事，極有可能係中山樵先生響革命成功之前同日本帝國嘅秘密協議。日本人成日強調，中國係一個「不遵守條約的國家」，當然，所謂中國，指謂何物亦都相當模糊？係張學良？定係蔣Sir？抑或係之前五色旗中華民國呢？抑或係1911年建立嘅南京政權？總之就有理說不清。而且喺解讀條約方面，日本人一向精過鬼，美國總統威爾遜（Thomas Woodrow Wilson，1856-1924） 就曾經講過：「日本有時候真是個難纏的國家，我從過去的經驗中也充分瞭解到，日本人對於條約的解釋有著極為巧妙的解讀。」 呢度牽涉咗一個語言哲學問題，文字係死嘅，人把口先係生勾勾，如何去解讀一條條文，最後都係觀點同角度嘅問題。正如一條寫死咗嘅法律條文，點樣去執行？點樣去解讀？響唔同時代唔同環境，亦有唔同嘅處理方法，或特定指涉，或涵蓋所有，真係睇當權者點解釋？真係睇當權者點運用？唔通到咗今時今日，大家仲唔明白？

日本亦都心知肚明發動918事變，明顯觸犯咗國際法，無論如何去掩飾，都係一個赤裸裸嘅侵略行為，當然日本軍方千方百計躲避因違反國際法而受到國際譴責，特別係美國人。因此，響918事變中，日本非常強調所謂「自衛權」，冇錯，係中國玩嘢在先，係中國不守條約侵犯日本利益在先，所以日本先不得不選擇「自衛權」去發動軍事行動，本身並唔係一個侵略行為，所以並無違反國際法。又不過，世界上有邊場戰爭唔係由「自衛權」而開始呢？錯嘅一定係對方，唔會係自己。

希特拉發動歐洲戰爭，入侵波蘭，亦都係因爲要保護喺波蘭國境內嘅德國僑民？美國投擲兩個原子彈去廣島同長崎，亦係純粹自衛行動。去到21世紀，美國出兵推翻侯賽因，係因為侯賽因擁有巨大殺傷力武器同發動911有關，亦係純粹出於自衛，係被逼嘅。真相係，侯賽因同911冇關，佢亦都冇大殺傷力武器，不過既定事實已經被製造出嚟，大家亦無謂爭拗邊個啱邊個錯，總之勝利者就係啱嘅，戰敗者就係錯嘅。愈讀得多歷史，就會明白冇所謂是非對錯存在，一切所謂正確與不正確，全因為觀點同角度嘅問題，全因為立場嘅問題。今日身為中國人嘅我，亦無論如何唔可以美化918，亦係咁解。

#常威💀 #蔣介石平反系列 #黃金十年 #民國歷史

❤【常威近代史】第一部《大清亡國關慈禧蛋牛治》，全面開放，免費下載， #freedownload！

Free下載連結🔽

https://play.google.com/store/books/details?id=C3hjDwAAQBAJ

［常威近代史］第六百零五回 再挖深陀地分析918（高清錄音版）

#唔鍾意睇字可以聽

https://www.facebook.com/129055447762576/posts/832723454062435/

【常威近代史】（六百零六回）
溥儀大師兄歸位

無論如何，918事變已成定局，蔣Sir同張學良選擇唔抵抗，希望國際社會伸裁同向日本施加壓力，不過事與願違，關東軍一手炮製出嚟嘅既定事實，將歷史推向特定方向發展，「滿洲國」建立亦屬必然歷史進程，美日兩國響太平洋上嘅霸權之爭，東風挑戰西風嘅終極一戰，亦遲早會發生，至於中日戰爭，可能只不過係成圍檯其中小菜一碟。

時局風雲變色，歷史大缺口已經打開！1931年10月2號，日本帝國以供應軍火為餌，誘內蒙古脫離中華民國獨立，内蒙古摇擺不定。10月3號，中華民國國民政府取消對閻錫山嘅通緝令，費事閻錫山傾向日本，令對方多隻King； 10月5號，國難當前，廣州中華民國政府舉行非常會議，討論寧粵議和，同意喺上海召開和平會議，但首先要求蔣Sir釋放胡漢民（1879-1936）同李濟深（1885-1959）二人； 10月6號，日本帝國發動新一輪軍事壓迫，佢哋以上海民眾反日氣氛濃厚為藉口，令佐世保軍港大批軍艦開赴上海，日本海軍第24艦隊其中4艘驅逐艦，甚至駛入黃埔江耀武揚威，你真係吹佢唔漲，夠薑就開打？但係論海軍實力，中國同日本，當時係蚊同牛嘅分別，根本冇得打。根據統計，當時日本海軍喺中華民國，停泊喺長江一帶嘅軍艦共有15艘，泊響華北青島、天津共有5艘，泊響華南廣東、福州、廈門等地共有6艘，total喺中國嘅軍艦共有31艘，簡直係黐線。

10月8號，日本派出20幾架戰機轟炸錦州，軍民死傷慘重，國民黨空軍參謀長李靖濱墜機身亡。同日，蔣Sir向上海各大學組織組成嘅義勇軍派發步槍5000支，大學組織變成軍事組織，戰爭氣氛席捲全國； 10月10號，雙十節當日，前來支援華北嘅日軍響秦皇島登陸，你退一步，人哋就進100步，鬥爭嘅嘢，大原則係一步都唔可以退，你見國際外交事務上，彼此口頭上都非常強硬，原因就咁解，仲記得，當年戈爾巴喬夫（1931-）1985年上臺，向西方國家稍稍擺出軟化姿態，講吓改革與新思維，結果就兵敗如山倒，鐵幕變成紙膜，只係區區六年之間，蘇聯就無聲解體，係一個應該記取嘅教訓。

「國際聯盟」 對日本赤裸裸嘅侵略行為，除咗口頭上嘅譴責，並冇任何實際行動，日本人食住個勢，不斷向東北增兵，蔣Sir同張學良慘被左一巴，右一巴，左一巴，右一巴！你都咪話唔陰功？

10月13號，廣州市全體警察發表宣言，宣稱10月10號當日發生嘅開槍事件係警察嘅正常防衛行動，事源係 10月10號，杜煊秦係廣州永安路公安局局長，佢所開設嘅一間雜貨店因為拒絕焚燒日貨而被群眾燒燬，於是佢指揮警察開槍打暴徒，結果殺咗15人，傷80人，真係幾痴線。10月11號，廣州各界群眾到省政府請願，獲得汪精衛（1883-1944）、鄧澤如（1869-1934）等人接見，表示會將杜煊秦交由法庭處理，廣州市公安局長陳慶雲亦都因為呢件事辭職。但係10月13號，警察發表宣言反對政府嘅處理手法，並且威脅政府全體廣州警察會集體辭職，10月13號警察發表宣言後，廣東省政府緊急訓令全體警察照常返工，不得擅離職守，兩日之後，政府突然宣佈杜煊秦著咗草，下落不明，直至去到11月4號先喺武漢被捕獲。

10月14號，教育局通令各公私立大學，範來自遼寧、吉林、黑龍江省三省學生均豁免或減免學費一個學期。同日，中國航空公司開辦南京至北京嘅航線，可以搭飛機去北京了。同日，蔣Sir 釋放胡漢民，胡漢民由南京前赴上海，結束幽禁生活。10月17號，日本邀請前清帝國肅親王、恭親王到瀋陽，大家都明白發生乜嘢事了？瘦田冇人耕，耕開有人爭，全國各地滿清遺老，忽然之間，受到日本人熱烈歡迎，唔少人畀日本人或其白手套上門敲門，預備好車及錢，go to north point！

10月21號，出席和平會議嘅粵方代表汪精衛等到達上海； 10月22號，國民政府下令禁止用糧食釀酒，以維持災民食用； 10月23號，國內第一個研究無產階級新聞學嘅群眾組織《中國新聞學研究會》 響上海成立。10月24號，教育部核准四川成都大學、成都師範大學及四川大學三校合併，定名為國立四川大學。同日，國際聯盟終於出手，叫日軍於11月16號前完全撤出中國，否則……冇事發生，你話日本人驚唔驚？驚到瀨屎啦……

11月26號，日本佔據東北之後，網羅各地滿清遺老去到東北，今日，喺日軍嘅安排下，恭親王溥偉（1880-1836） 帶領前清遺老40幾人喺瀋陽祭告昭陵，三拜九叩後，又大叫「中日親善萬歲」，並且宣讀宣言，聲稱「仰仗祖宗威靈及日本正義，推翻盤踞廿年之仇敵，臣今後當竭其心力，恢復祖宗之基業！」 11月27號，日本大佐土肥原賢二（1883-1948）秘密嚟到天津，打算將末代皇帝溥儀挾持去瀋陽，要大師兄歸位，不過亦唔需要你脅持，溥儀收拾好行李，打點好一切之後，亦都響11月8號，動身聖駕由天津到達瀋陽，同日本人蛇鼠一窩，積極籌備建設傀儡政權——滿洲國！

#常威💀 #蔣介石平反系列 #黃金十年 #民國歷史

【常威近代史】第十一部《人生有幾多個黃金十年》
▶https://play.google.com/store/books/details?id=NIRKEAAAQBAJ

Kindle版
▶https://www.amazon.com/dp/B09KH5NWB9

【常公子歷史頻道425回：替大軍閥平反系列之 唐三藏取西經】

♊ 不知不覺，封關接近兩年，就算同內地通關，似乎都係遙遙無期，新型冠狀病毒疫情眨吓眼肆虐地球已經有好一段日子，起初，大家都唔慣，有人以為封關，切斷大部份對外人流，影響會好大，甚至係個社會不能承受，但係結果話畀我哋知道，年幾時間過去，一切依然，樓價仍然高企冇回落，股市仍企住25000點，失業率亦回落，除咗要做防疫措施及戴口罩出街外，大部分人生活如常，繼續返工返學，件事其實相當奇怪，唯一可以解說，就係人類嘅適應性的確好強、好強。

♑ 原本以為唔習慣嘅嘢，其實好快會習慣，生活模式亦唔係一成不變，有人以前一年去四五次日本玩，現在兩年冇得去，又開始習慣，減少出外，就響屋企網購睇劇，大環境變化，但經濟基調似乎冇乜變化，新樓盤開售仍然排大隊，所以，太陽底下無新事，原來一切都可以習慣，一切都可以改變，變幻才是永恆。而且好多時候，人並唔係隨便可以揀擇，當冇得揀嘅時候，亦無可奈何。

♎ 佛教講斷捨離，其實亦係呢個意思，呢個世界其實冇乜嘢唔可以捨棄，你以為不可斷離，其實就是「執」，個人煩惱，大部份係來自「執念」，當乜嘢都可以放低，其實冇乜嘢可以令人煩惱。今次新型冠狀病毒疫情，其實亦係一堂佛學科，讓大家明白，無論你願意又好，不願意又好，原來一切都可以放得低，right？

✅https://youtu.be/UsQaw2RB_zE

💚【我奮鬥不奮鬥】 常公子 楊熙合著
電子書下載⬇ https://play.google.com/store/books/details?id=CVo3EAAAQBAJ
Kindle版下⬇
https://www.amazon.com/dp/B098XHWTDK
實體書訂購⬇
https://www.382now.com/product?id=325

💙最新上線，請課金支持
【常威近代史】第十一部《人生有幾多個黃金十年》
▶https://play.google.com/store/books/details?id=NIRKEAAAQBAJ

Kindle版
▶https://www.amazon.com/dp/B09KH5NWB9

［常威近代史］第六百零六回 溥儀大師兄歸位（高清錄音版）

#唔鍾意睇字可以聽

https://www.facebook.com/129055447762576/posts/834081000593347/

【常威近代史】（六百零七回）
大家咁順攤 咁就唔客氣鳥

「滿州國」project，搵齊班演員茄呢啡，密鑼緊鼓籌備開拍，好快就會正式上演，1931年10月尾，原黑河警備司令馬佔山 （1885-1950）受張學良委任，響齊齊哈爾就任黑龍江省政府代理主席兼軍事總指揮。918事變發生之後，遼寧省吉林省相繼陷於日軍之手，黑龍江省亦都岌岌可危，10月中，張學良電令馬佔山，宣佈黑龍江駐軍三萬餘人均受其指揮，10月24號，張學良又下令哈爾濱中國銀行撥款30萬元，比馬佔山重整軍備。馬佔山就任後，通電全國，表明抵抗日軍決心。馬佔山出身綠林，即係做馬賊出身，奉系東北軍將領，918事變後，血戰江橋，打響抗日第一槍，成為抗日名將。之後馬佔山響黑龍江省與日軍多次交戰，其間曾詐降於日軍並參與創建滿洲國，做過黑龍江省省長，兼任滿洲國軍政部部長（哇！），獲得休養生息後，又再次率兵對抗日軍，真係一個真真正正嘅長江九號。

1931年10月30號，民國政府訓練總監部，教育部公佈《 學生義勇軍訓練辦法》，大家要有心理準備全民皆兵，一齊對付日本仔！同日，日本由本土運輸100萬盎司白銀至哈爾濱，開始鑄造貨幣，製造通貨，凡係佔領一笪地方，第一件事就係要印銀紙，貨幣係體現主權嘅最具體同最實際嘅方法，其實一個政權或國家，就等同一種貨幣，人民及國際對政權及國家嘅穩定同信任，亦都可以由貨幣本身充分體現出嚟，1911年之後嘅中華民國一直立立亂，就係始終未能夠統一貨幣流通，再講多一次都唔怕厭，中國真正做到統一貨幣，去到1949年，而人民幣正式得到國際信用同認同，仲要經過之後50年嘅發展，真係漫漫長路有幾多風霜。

10月30號，前清帝國恭親王溥偉起草《明光帝國宣言》，作為建立偽滿洲國嘅基礎文件。10月尾，著名共產黨員劉志丹（1903-1936）領導陝甘邊一帶武裝同晉西遊擊隊會合，成立反帝同盟軍；另外，紅軍第25軍響安徽六安縣成立，鄺繼勳（1895-1933）任軍長，王平章（1901-1933）任政委。

時間線去到1931年11月，11月1號，中央蘇區第一次黨代表大會響瑞金舉行； 11月4號，日軍開始進攻黑龍江省，馬佔山部隊頑強抵抗，整個11月，馬佔山同日本關東軍、以及幫關東軍手嘅軍閥響黑龍江省展開連場激戰，完全唔落下風，加上11月份黑龍江省應該係零下幾十度，日軍凍死嘅人多過戰死，去到1931年12月7日，關東軍參謀板垣征四郎（1885-1948）到馬佔山根據地，勸說馬佔山就任將要成立嘅滿洲國黑龍江省省長，戰事先完結，之前已經講過，馬佔山只係詐降呃日本仔，之後又再反檯抗日，真係睇吓你點樣描述嘅啫。

11月7號，中國工農兵蘇維埃第一次全國代表大會喺江西瑞金區召開，正式宣佈成立中華蘇維埃共和國，計起嚟，亦可以講話係中華人民共和國立國之日。參加呢次會議嘅，有嚟自唔同根據地嘅代表、上海同武漢嘅代表、一共有600幾人。會議通過咗《中華蘇維埃共和國憲法大綱》以及《土地法》。選出毛澤東、周恩來、朱德等63人為中央執行委員。中華蘇維埃共和國臨時中央政府亦宣佈同時成立。20日後，喺中央政府執行委員會第一次會議上，毛澤東當選為主席，項英（1898-1941）、張國燾（1897-1979）當選為副主席，中央執行委員會下設人民委員會同中央革命軍事委員會，毛澤東擔任人民委員會主席，項英為副主席； 朱德擔任中央軍委主席，王稼祥（1906-1974） 、彭德懷（1898-1974）為副主席。紅軍亦都改稱為工農紅軍，歸中央軍委指揮。臨時中央政府同時亦發表對外宣言，主張廢除一切不平等條約同埋外債。捱過蔣Sir第三次大圍剿，中國共產黨終於能夠喘一口氣，搞返好政治工作，不過事情並冇咁簡單，當時嘅中共，並未企穩陣腳，中間仲要經歷一次25000里大長征，不過係之後嘅事。

11月7號，中國工農紅軍第四方面軍喺湖北黃安成立，名將徐向前（1901-1990）任總指揮，28個半布爾什維克之一陳昌浩（1906-1967）任政委。同日，一個過氣嘅軍閥，光頭佬吳佩孚到達蘭州。響北伐戰爭中失敗，一直隱居於四川嘅吳佩孚，趁住馮玉祥西北軍戰敗，甘肅空虛之際，企圖東山再起，吳佩孚由甘肅土駐軍閥馬延賢同埋魯大昌一路保駕去到蘭州，甘肅省政府代理主席馬文車更加撥款三萬元，迎接吳佩孚，不過喺歡迎大會上，有個人忽然之間衝上臺大叫「我們要歡迎人，我們不歡迎賊」，人同賊，賊同軍閥，其實界線好模糊，民國關公吳佩孚能否東山再起？以後再講。

11月8號，土肥原賢二響天津策動失意軍人組織武裝暴動，與保安隊激戰一夜，之後退回日本租界內。11月10號，中央銀行將金條二十四箱裝運美國，共值150萬美元（Why？Why?）。11月12號，國民黨第四次全國代表大會喺上海同廣州召開。同日，美國新聞界一反親華態度，高場美日親善？吓？有人原本以為，918事變之後，美國同國際社會會出嚟主持公道，幫中國攞返東北廣大領土，但既定事實似乎唔會改變，美國亦唔會因為918事變而同日本反目，日本人見大家咁順攤，咁就唔使同你客氣鳥……

#常威💀 #蔣介石平反系列 #黃金十年 #民國歷史

［常威近代史］第六百零七回 大家咁順灘 咁就唔客氣鳥（高清錄音版）

#唔鍾意睇字可以聽

https://www.facebook.com/129055447762576/posts/835303840471063/

【常威近代史】（六百零八回）
生於憂患 死於空難

日本人發動918事變佔領東北，當然經過處心積慮，美國最後唔插手，或者亦都係日本人（或軍方）一早預料到嘅結果，對於侵略東北，日本人製造咗大把籍口，例如中華民國唔遵守之前嘅承諾同條約、中國人民對日本唔友善、抵制日貨等等等等，當然呢啲理由都唔係理由，經過甲午戰爭同日俄戰爭，日本早已將中國東北視作自己地頭，同韓國一樣，係日本嘅殖民地。其實當時日本最大嘅考慮，相信未必係中國同美國嘅態度，反而係蘇聯依個世界上第一個共產主義國家，日本人強烈feel到蘇聯輸出革命路線遲早會燒到日本，鬼叫大家係鄰居咩？中共短時間嘅崛起，日本人都睇到，防共任務喺日本軍方中，亦絕對係頭等大事。中國夠窮夠亂，美國又相隔咗一個太平洋，反而蘇聯嘅紅軍就真係唔可以講笑，而且仲有日俄戰爭引伸落嚟嘅血海深仇包底，因此儘快喺東北建立根據地，擴大力量防止蘇聯赤化力量南下至日本本土，可能亦係一個重要理由。

1931年11月中旬，美國表明態度，要中華民國拱手相讓東北，滿洲國成立在即，其時，黑龍江省省長馬佔山部隊嘅抵抗亦達尾聲，長江九號馬佔山好快亦會加入滿州國陣營，做滿洲國黑龍江省省長；11月15號，河北省政府主席王樹常（1885-1960）亦親赴日本軍營，同其司令締結屈辱條件，取締抗日活動。真係你有你抗日，我有我投降，日本帝國上下一條心忠於一個天皇（裕仁），中華民國則一盤散沙，各有各做，雙方嘅分野在此，再唔好問我點解大一統咁重要？當然順帶一提，好似馬佔山，王樹常依一類投降日本嘅軍人，之後仲有好多好多，佢哋之後都話自己係長江九號，一心無間道做反間諜，時移世易，佢哋又會以另一個面貌同態度出現抗日，不過真係唔好咁認真喇，除咗汪精衛之外，世界上並無真漢奸。汪先生都可能係死得早（仲要死響日本本土），否則俾佢捱到二次世界大戰結束，佢都可能係另一個抗日名將長江十號架。

11月16號，國民政府下令，所有國內森林、礦產、荒地、漁業用地、鐵道及企業無論公有私有，凡未經中央核准而同外國簽訂嘅租售契約，一律無效，講依啲？上有政策，下有對策，中央唔強勢，邊度管得咁多呢？11月19號，日軍佔領黑龍江省齊齊哈爾，馬佔山彈盡粮絶，退至克山。

❤【常威近代史】第一部《大清亡國關慈禧蛋牛治》，全面開放，免費下載， #freedownload！

Free下載連結🔽

https://play.google.com/store/books/details?id=C3hjDwAAQBAJ