【常公子歷史頻道436回:替大軍閥平反系列之 風吹雞蛋殼 財散人安樂】
♊ 近日嘅新聞,總離不開王力宏事件,似乎無論任何時代,娛樂八卦新聞總係有最大嘅吸引力,畢竟評論明星演員歌手,都是無傷大雅,無傷大雅得啖笑,就是最好。明星演員歌手這種行業本身,就是渴望被人評論和關注,「人氣」就是「財富」,好似股票一樣,有波幅總比冇波幅好,一潭死水大家冇著數。因此我都趁下熱鬧,講講我對王力宏嘅印象。
♑ 作為一個樂迷嘅我,應該冇買過一張王力宏嘅CD,我都好喜歡聽臺灣國語歌,蕭亞軒是我至愛,但就係總唔能夠接受到王力宏同周杰倫,我自己都感覺非常奇怪。靚仔就係必然,最近因為事件發酵,仲知道王力宏原來係書香世代,王力宏太公許鳳藻仁係晚清軍人、海軍少將,祖母許留芬係清華大學才女,會計專家,著有會計學原理、會計學辭典等書;舅公許倬雲是當代史學權威,中研院院士;另一舅公許翼雲做過台灣嘅原子能委員會、姨丈李模做過蔣經國時代嘅教育部次長、李登輝時代嘅內閣政委;父親係腦科醫生。真係粒粒皆星,乜嘢叫贏在起跑線?咁就叫做贏在起跑線勒。其實好多公眾人物大明星,本身都好有背景,好多時候,背後嘅助力比才華更重要,機會唔係人人有,有一手好牌,就睇你點打?因此Mirror同姜濤好叻仔,因為佢哋冇乜背景。(雖然我都唔鍾意佢哋啲歌)
♊ 唔知點解,可能我年紀比較大,我總係覺得王力宏事件都係一樁經濟問題,就係同錢有關,應該係分贓不勻,結果有人爆大鑊,拉埋你落水,可能我嘅諗法太市儈,不過凡事用錢去考慮,脈絡就會清楚好多。不過老實講,我哋嘅人生好多時候都係畀錢控制,有人話「人」 係一個獨一無二嘅自覺主體,而我則認為,所謂「人」,只不過係一種經濟社會性動物。至於出軌問題,有時候就感覺更加荒謬,靚仔靚女當然容易出軌,人之常情。公眾認為明星演員歌手政客老師教授社工醫生護士必要有良好道德操守,都祇不過係一廂情願,大家都係人,英諺有云「No man is an island」(沒有人是孤島),其實眾生平等,你覺得某個階層嘅人應該要有更強嘅道德操守,可能祇不過係階級不平等嘅表象,難道地盤工廠工人司機外賣員清潔保安,就唔應該有更強嘅道德操守嗎?
🎦
https://youtu.be/OMPHFqzGH_o