大清亡國關慈禧蛋牛治 3

https://www.youtube.com/playlist?list=PL0RVUAILQUOvTo8JJrayjrvd_Nbjc-0Me

❤請加入常公子的近代史世界！

#常威 #廣東話 #中國近代史 #HongKong #Chinese #History

［常威近代史］第七百五十六回 殺到你驚殺到你投降為止（高清錄音版）

#唔鍾意睇字可以聽

https://fb.watch/i7tJUdCOIC/

【常威近代史】（七百五十七回）
八百壯士死守四行倉庫

1937年10月25號，上海日軍突破大場陣地，中國軍隊退守蘇州河南岸，淞滬戰爭進入尾聲，上海基本上淪陷。10月27號，第88軍524團一營800餘名官兵，響副團長謝晉元（1905-1983）指揮下，堅守閘北四行倉庫大樓，掩護守軍撤退。依一營將士，被後世稱呼為「八百壯士」，又稱「四行孤軍」，實際上嘅人數可能只有400幾人，另外有一個說法，就係連400人都冇。不過，「四行倉庫保衛戰」卻係淞滬會戰中一場可歌可泣嘅戰鬥，發生於1937年10月27日至11月1日四日間，亦標誌着淞滬會戰尾聲。

揀選四行倉庫作最後據點，理由係第88師參謀長張柏亭（1910-1985）經考察後，認為四行倉庫側後不足200米，有兩個巨型煤氣罐，內儲30萬立方米煤氣。若日本空軍投彈稍有偏差，煤氣庫會爆炸，而且四行倉庫東側是西藏北路和沿河的北蘇州路，均屬上海公共租界範圍，新垃圾橋和西藏北路又由美英軍隊、萬國商團守衛，日軍其時還不敢向美英軍隊挑釁，因此四行倉庫的確係作為司令部理想地理位置。呢個時候，蔣介石命令閘北區所有軍隊撤退，同時命令精銳嘅88師單獨留守。此舉一是為咗拖延日軍進攻速度，掩護大軍撤退，二是為了向國際社會表明中國在抵抗日本侵略戰爭上嘅堅決態度，因為九國公約簽字國正好將於當年11月3日響比利時布魯塞爾召開九國公約會議，蔣介石希望以此贏得國際社會嘅支持。

四行倉庫大樓三面為日軍包圍，一面與英租界連接，守軍抱著寧死不退讓嘅決心，同圍攻嘅日軍苦戰四日四夜，響日軍飛機轟炸，燃油火攻之下，連續擊退日軍六次圍攻，歷史記載擊斃日軍200幾人，守軍傷亡37人！戰鬥發生期間，英國人懼怕租界遭受日軍炮火波及，要求中國政府下令將524團一營全軍撤退，10月31號，由淞滬警備司令楊虎（1899-1966）指揮下，四行守軍撤入英租界，正式結束依一場「四行倉庫保衛戰」。其實「四行倉庫保衛戰」只係一場攞個小小尾彩嘅小型戰事，不過宣傳意義重大，戰爭期間，意識形態宣傳相當重要，打仗除咗打經濟打軍備打戰略，更重要係要打士氣打意識形態，淞滬會戰中方雖然慘敗，並損失國民革命軍近三分之一精銳部隊，但依一戰卻鼓舞中國軍民士氣，並向全世界傳達中國積極抗日嘅決心。

媒體亦用「八百壯士」來稱呼四行倉庫嘅守軍，同時《八百壯士歌》被創作出來以激勵軍民抵抗日本侵略。歌詞曰「中國不會亡，中國不會亡，你看那民族英雄謝團長」，《八百壯士歌》響抗戰中唱足8年，宣傳威力非同小可，雖然四行倉庫保衛戰最終並未促使九國公約會議制裁日本，蔣介石期盼嘅外國援助也毫無進展，西方各國除咗對日本提出譴責外並冇任何實際行動。不得不提，除咗蘇聯，其實仲有納粹德國響二戰歐洲爆發前曾經援助過中國抗日，不過好快德國同日本結盟組成軸心國，並於1938年結束咗對華援助。

「八百壯士」故事仲有後續，原來部隊撤退後，隨即被租界內英軍攔截沒收武器並限制自由。部隊被繳械後，被軟禁接近4年。因為日軍威脅，如果畀佢哋離開就要入侵租界。佢哋被送至公共租界西部意大利防區嘅膠州路膠州公園隔壁孤軍營進行隔離。10月31日，官兵受到國府嘉獎，各晉一級。謝晉元頒授青天白日勳章，「八百壯士」被軟禁4年期間，上海市民經常探訪他們並進行文娛表演，軍官為士兵開設了多種課程如外語、數學等。《共產黨宣言》中文譯者陳望道（1891-1977）也經常到營地探望，士兵亦繼續每日進行軍事訓練，保持高昂鬥志，堅持每日升國旗、唱國歌。守軍響「孤軍營」中被羈押期間，日本方面聲稱允許釋放這些士兵，但條件係解除武裝並以難民身份離開上海，但謝晉元一一拒絕。其間，佢多次拒絕中華民國維新政府（1938年-1940年）及汪精衛政權（1940年-1945年）勸降，展現中華兒女偉大風骨。

1941年12月8日日本偷襲珍珠港，太平洋戰爭爆發。12月9日，國民政府發佈對日本、德國和意大利宣戰佈告。12月10日，汪精衛政權上海市長陳公博致函孤軍營，要孤軍全體參加「和平運動」，但遭到拒絕。之後日軍佔領上海公共租界，1941年12月28日，日軍數百人突入孤軍營，將孤軍全部俘虜，之後被押送到不同地方分開處理，有部分仲被送到新幾內亞做苦工。抗戰勝利後，從全國各地返番上海有100多名倖存者，響四行倉庫搭棚為謝晉元守靈。國共內戰爆發，佢哋大多不願復員，有部分隨國府撤退到台灣，有部分留響中國大陸，大江大海。

時間線返去1937年嘅10月26號，八路軍129師響山西平定縣七亙村殲滅日軍24師團運輸部隊；10月27號，響日本策劃下，蒙古聯盟自治政府響歸綏成立；10月30號，隨著上海淪陷，南京岌岌可危，國府決定遷都重慶。今個月國軍亦係忻口會戰中殲敵2萬人，上海全國戲劇界救亡協會組織13支救亡演劇隊，分赴全國演出宣傳抗日，胡風（唔係修哥，1902-1985）主編嘅《七月》半月刋創刋。

1937年10月於焉結束。

#常威 #蔣介石平反系列  #佛經抄寫員 #中日戰爭 #民國歷史

🙏同大家拜年！祝大家癸卯兔年身體健康！萬事勝意！

不經不覺，【常威近代史】系列已經出版咗12本，第13本【鬼子來了！】亦好快同各位見面，雖然這12本書，祇有3本被印成實體出版，但係總算係繼續行落去，路要人行，路亦係由行人行出嚟，一句到尾，我好高興能夠繼續行落去。

▶下載總目錄

【常威近代史】第一部《大清亡國關慈禧蛋牛治》
https://play.google.com/store/books/details?id=C3hjDwAAQBAJ

【常威近代史】第二部《中國一百年前第一次開放改革》
https://play.google.com/store/books/details?id=_6KMDwAAQBAJ

【常公子近代史】第三部《東方維多利亞女王之死》https://play.google.com/store/books/details?id=GaGrDwAAQBAJ

【常威近代史】第四部《霹靂大忠臣對決無敵大買辦》Round One
https://play.google.com/store/books/details?id=Np3PDwAAQBAJ

【常威近代史】第五部《霹靂大忠臣對決無敵大買辦》Round two
https://play.google.com/store/books/details/%E5%B8%B8%E5%A8%81_%E9%9C%B9%E9%9D%82%E5%A4%A7%E5%BF%A0%E8%87%A3%E5%B0%8D%E6%B1%BA%E8%B6%85%E7%B4%9A%E5%A4%A7%E8%B2%B7%E8%BE%A6_ROUND_2?id=puXmDwAAQBAJ

【常威近代史】第六部《最九衰的大軍閥時代》Round 1
https://play.google.com/store/books/details?id=bCMNEAAAQBAJ

【常威近代史】第七部《最九衰的大軍閥時代》Round 2
https://play.google.com/store/books/details?id=lPgaEAAAQBAJ

【常威近代史】第八部《最九衰的大軍閥時代》Round 3
https://play.google.com/store/books/details?id=fY8mEAAAQBAJ

【常威近代史】第九部《孫文之死》
https://play.google.com/store/books/details?id=evMsEAAAQBAJ

【常威近代史】第十部《蔣Sir狼死開拖》
https://play.google.com/store/books/details?id=SgE8EAAAQBAJ

【常威近代史】第十一部《人生有幾多個黃金十年》
https://play.google.com/store/books/details?id=NIRKEAAAQBAJ

【常威近代史】第十二部《籠裏雞大作反》
▶https://play.google.com/store/books/details?id=heJ1EAAAQBAJ

🙏請大家多多捧場！

*available on android and ios

［常威近代史］第七百五十七回 八百壯士死守四行倉庫（高清錄音版）

#唔鍾意睇字可以聽

https://fb.watch/idWA8oQmP4/

【常威近代史】（七百五十八回）
大屠殺前夜

凡係打仗都有個問題，究竟打仗需唔需要遵守某些規則？戰爭係打破一切制度和規則嘅終極遊戲，如果制度同規則仍有險可守，亦無需要發動殺戮戰爭？所謂國際公約，或者國際法，甚至人權戰俘問題，響戰爭面前，其實無險可守。實際上響慘絕人寰嘅南京大屠殺發生之前，日本人對上海，以及中國其他城市採取嘅高空轟炸手段，已經令國際社會陷入極度不安。之前我提過，響原子彈未投擲之前，對城市進行高空轟炸，其實已經係最震撼同恐怖嘅戰爭畫面。當然任何形式嘅轟炸，口講都係以對方軍事據點為目標，不過誤炸平民濫殺無辜，亦係理所當然。當中日戰爭爆發，整個國際社會都用譴責嘅口吻批評日本，大致上道理如下：「在文明世界中所有會正確思考的人都會支持中國，反對像匪類一樣想強奪中國寶貴領土和想將中國變成他們附庸國的日本軍隊。」

上集講過，響1937年，就連納粹德國都曾經支持過中國抗日。佢哋嘅理由係，日本嘅種種作為令國民政府冇辦法統合整個中國，正中蘇聯同中共嘅下懷，希特拉呢個國家社會主義者，同蘇聯共產黨一向勢不兩立，一紙雖扁，兩個面門。英美及其他西方列強，都認為日本「愚昧、危險……現在就與全世界為敵」，1937年嘅美國，當然未能深切瞭解佢哋先係日本人最後嘅打擊目標。淞滬戰爭中最後一場「四行倉庫保衛戰」，日軍以大炮同坦克正面壓迫推進，中國軍隊仍然堅守4日四夜，國民政府蔣介石政權青天白日旗頑強地喺倉庫上飄揚，挫敗咗日本宣稱取得速勝嘅銳氣。宣傳效果重大，中國軍人英勇抗日，贏得全世界的掌聲，對照日本人嘅殘暴，全世界都渴望聽到中國人嘅英勇事蹟。不過中國雖然贏得國際社會嘅無限同情，但係無論係法國同英國，都冇提供實質嘅，例如軍備或經濟上援助，更加唔好提沉浸在孤立主義中嘅美國。「帝國主義者」係正義嘅使者，相信呢句說話嘅人，一係太年輕太天真太傻，一係就有美國護照或BNO。

回溯上一次發生係1931到1932年之間嘅第一次淞滬會戰，即918事變後延，當時好多外國人都認為，日本人嘅所為係一劑可以解決中國失序同埋內戰嘅猛藥，帝國主義者認為同日本合作會提供東亞嘅穩定局勢，並且保護佢哋嘅殖民地資產同生意興隆。不過時移世易，去到1937年，當上海淪陷之後，西方列強終於睇到日本人嘅真面目，日軍不但兇殘成性，而且完全唔會放國際法入眼內，軍國主義日本如果取得最後勝利，西方在華嘅利益亦將會完全被沒收取締，正所謂有奶便是娘，反而蔣介石政權喺世人眼中表現嘅係堅持遵守國際公約、國際合作同開放市場，並堅決抵抗侵略者同軍國主義。所以當戰爭發生幾年之後，西方列強亦都徹底改變態度，認為中國喺幾無勝算情況下，仍然單槍匹馬對付日本人，堅守國家嘅自由獨立生存嘅權利，終於響1941年，當中日戰爭爆發嘅三年後（係三年後），中國正式成為同盟國嘅一員，同西方列強並肩作戰。

不過話分兩頭說，西方列強——主要是美國英國同法國三國，佢哋真係同情中國人？真係想幫佢哋眼中嘅黃色猴子逃避鬼子殺戮？真心嘅嘢，真係冇人知道。抑或世局變化，希特拉發動歐洲戰爭，並且同墨索里尼意大利、日本軍國主義結成軸心國同盟，或者美國人終於夢醒，聞到日本人最後嘅目標係遼闊嘅太平洋？所以先至實質支持中國抗日？真相冇人知道，不過我諗如果響1937年，西方列強可以有更加具體嘅行動支持中國，唔係淨係得把口「強烈譴責」嘅話，相信響人類文明史上最慘絕人寰嘅一場南京大屠殺，未必會咁易發生。歷史無如果，我亦唔係將責任推響英美法三國身上，用武士刀斬殺中國人嘅畢竟都係日本鬼子，不過，我非常相信，如果西方列強響1937年能夠多行一步，真係可以避免大悲劇發生。

第二次淞滬會戰以上海淪陷作結，蔣介石亦損失咗佢一半以上嘅中央軍精銳部隊，換取咗國際社會無限口頭同情，其實得不償失。更重要嘅係，蔣介石亦都心知肚明「對外作戰易，對內安定難」（先安內後攘外思維），1937年8月12號淞滬會戰前夕，蔣介石就曾經咁樣講過「今共黨與政客及各方軍閥，皆思乘對外作戰之機，要脅作難、暴其野心，施其陰謀」，國民政府投入會戰所求嘅不止係打敗日本，而係更想藉此將國內敵對各方勢力團結起嚟，佢派出最精銳嘅部隊投入上海，就係想驅使其他國內嘅競爭對手，尤其是嗰啲一直口頭高喊抗日嘅人能夠出錢出力，加入並肩作戰嘅抗日行列。

大仁大義又的確係冇錯，只不過信任嘅嘢，一定要睇往績同歷史，1937年中日戰爭發生之前，同蔣介石合作過嘅人，下場係點，大家都有目共睹，唔好講中共同張學良，仲有好多軍閥，就係信你合作嘅「誠意」，最後被連根拔起，一鋪清袋。如今你忽然大仁大義起嚟，講真，真係好難捉摸，究竟信你好？抑或唔信你好呢？就好似當時擁有全國第二大兵力嘅桂系李宗仁，響公開場合就信誓旦旦表示支持蔣介石，不過佢絕對唔會跟車太貼，甚至拒絕前赴南京傾偈。有時候，面係人哋俾，架係自己攞嚟刁。

#常威💀 #蔣介石平反系列  #佛經抄寫員 #中日戰爭 #民國歷史

❤【常威近代史】第十二部《籠裏雞大作反》
▶https://play.google.com/store/books/details?id=heJ1EAAAQBAJ

🙏最新上架！請大家多多捧場！

［常威近代史］第七百五十八回 大屠殺前夜（高清錄音版）

#唔鍾意睇字可以聽

https://fb.watch/ijwsb3POO_/

【常公子歷史頻道 516回：黃金十年系列之 浚浚柒特務時代開始】

⏩https://youtu.be/pTHcT_SIyLU

#常威💀 #常威近代史頻道 #黃金十年系列 #民國歷史 #佛經抄寫員

【常威近代史】（七百五十九回）
上海淪陷

時間線去到1937年嘅11月，11月1號，蔣介石喺南翔軍事會議上，嚴令各軍不得隨意撤退。之前已經講過，中國參戰嘅軍隊其實係由不同嘅部隊混編而成，一個「混」字，大家亦都相當清楚，混亂事小，混賬事大。呢啲唔同嘅部隊，喺過去十幾年之間彼此打嚟打去，有時候係同袍，有時候係敵人，亦都係司空見慣嘅事。現在因為有共同敵人——日本鬼子——又變成咗某程度上嘅盟友，就算大家義憤填膺，一致槍口向外，不過長期以來彼此間嘅敵意同血仇，確實唔會係一夜之間消失。蔣介石嘅最高指令，個個都話遵守，全力以赴，但係去到前線，又淨低幾多成呢？呢個世界嘅嘢，其實好簡單。同你friend同你真心相對，做嘢就會做120%；但係虛以委蛇，口服心不服，同你出五成功力算你好彩。中國軍隊嘅問題，除咗軍備同金錢，仲有一樣嘢就係唔團結。蔣介石成日話先安內後攘外，你估其他人唔識得相同諗法咩？

舉個例子比大家參考下，蔣介石任命嘅第一位上海地區作戰司令官，就係篤信基督教嘅馮玉祥（1882-1948），馮玉祥從前係蔣介石嘅敵人，夥同桂系李宗仁一齊打蔣介石嘅中原大戰失敗之後，一鋪清袋，一直住喺南京，以研究、寫作、演講讓自己成為知名嘅鼓吹抗日人士，如何包裝自己，變色龍馮玉祥係當時嘅絕世高手。抗戰發生之後，蔣介石發佈馮玉祥成為上海戰區總司令，其實好多人都覺得好詫異，當然蔣介石係表達咗自己不計前嫌，大仁大義嘅氣魄，亦都示意北方戰場同上海彼此相關，再冇南拳北腿之分，不過當馮馮玉祥去到前線，當時上海就有好多官兵唔妥佢，唔聽佢指揮，所謂上樑不正下樑歪，仲要面對嘅對手係軍備軍紀遠在自己之上嘅日本皇軍，真係唔輸有鬼。但馮玉祥嘅例子，只係九牛一毛。

11月1號，中蘇訂立第一次信用借款5000萬美元嘅協議，第二次國共合作，蘇聯除咗派出空軍支援中國，仲有擲地有聲嘅金盧布經濟支援。同一日，國立長沙臨時大學開始上課。11月3號，太原失守。日本今日亦正式拒絕參加係布魯塞爾召開嘅「九國公約」會議。討論日本侵華嘅九國公約會議今日喺比利時首都布魯塞爾召開，日本同德國拒絕參加，意大利則充當日本嘅代言人。英國、法國同美國態度曖昧，不願意開罪日本，敷衍了事，終於所謂九國會議草草收場，於24號無限期休會，大會通過咗一紙宣言，重申九國公約原則，要求停止戰爭行動外，並無任何實際效果。可憐嘅蔣介石於淞滬戰爭中all ln，犧牲咗佢手中部分精銳部隊，希望換取西方列強並肩對付日本人，或至少得到更多國際外交上嘅「實質」支援，可惜事與願違，其他國家除咗得把口譴責之外，並無任何實際行動支持中國，正正是——賠了夫人又折兵。

11月5號，日軍喺杭州灣嘅金山衛同金公亭大規模登陸，火上加油！八路軍晉察冀軍區成立，後嚟成為中共十大元帥之一嘅聶榮臻（1899-1992）將任司令員兼政委。今日，日本通過德國駐華大使陶德曼（1877-1950），首次向蔣介石轉達日本對華談判條件。上個月21號，日本外相廣田弘毅（1878-1948，東京審判上唯一被處死嘅文官）會晤德國駐日大使，表示隨時預備同中國談判，希望德國從中斡旋，當然預備同你談判，並唔代表要停戰，轟炸同殺戮繼續發生。日本人開出嘅談判條件係，包括内蒙自治，擴大華北不駐兵區、承認偽滿洲國、上海停火、停止排日、共同防共、以及減少日貨進口稅等等。所有嘅條件都觸及蔣介石嘅底線，如果有得傾，亦都唔使開打啦？我亦強烈相信，如果當時蔣介石接受媾和條件，十年之內，整個中國就會同朝鮮臺灣一樣成為日本嘅殖民地。

11月7號，日本華北開發公司係北平成立。11月8號，中國青年新聞記者協會喺上海成立。11月9號，招商局將全部產業喺名義上轉交美商衛利韓公司，理由亦都好簡單，日本未同美國宣戰，屬於美國嘅財產，日本人唔可以掂。

11月11號，中國最大嘅城市，東亞第一號大錢罌上海淪陷，日軍喺今日佔領上海，而上海外國租界則淪為孤島。11月5號破曉，日軍喺艦炮、飛機掩護下，於金公亭、金山衛同時登陸，中國喺依一帶幾十里長嘅海岸線上，只有62師其中小部分部隊，以及少數地方武裝擔任守衛工作，兵力懸殊到烏蠅對航空母艦，於是幾乎響毫無抵擋嘅情況下，日軍順利大規模登陸。11月8號，日軍第10軍主力渡過黃埔江，11月9號，佔領楓涇，並向西直指嘉慶、平望。至此，滬杭公路被切斷，上海僅餘守軍陷於腹背受敵危局。於是第三戰區決定全軍撤退，但係因為命令下達得太遲，部隊已陷於混亂狀態，撤退嘅部隊擁擠於公路上，情況非常混亂。

關於淞滬戰爭，亦有一點可以提，就係中共並無參與依場重要會戰。毛澤東固然堅持部隊不介入其中，而中共得到唯一嘅讓步，就係蔣介石同意佢哋嘅行動限制喺河北同埋察哈爾嘅部分地區內，即係同意中共成立晉察冀邊區政府，大敵當前，兩黨仍然彼此極不信任，中共亦希望能以敵後遊擊作戰方式參戰，以維持自己的獨立性同自主權，且儘量小心不侵犯國民黨勢力範圍，以免發生軍事衝突。

#常威 #蔣介石平反系列  #佛經抄寫員 #中日戰爭 #民國歷史

💜最新上架
常威近代史 第十三部 【鬼子來了】

電子書下載⬇⬇
https://play.google.com/store/books/details?id=cz6qEAAAQBAJ

🙏請捧場

［常威近代史］第七百五十九回 上海淪陷（高清錄音版）

#唔鍾意睇字可以聽

https://fb.watch/ipLqe36SIg/

【常威近代史】（七百六十回）
劍指首都 宋帝南遷

1937年11月中旬，上海淪陷，淞滬之戰告一段落，南北兩線戰役，隨著太原失守，中國軍隊同樣節節敗退。戰爭嚟到呢度，大家都睇得到中國軍隊遠遠不如日本軍隊，除咗裝備不良、訓練不足、指揮平庸、與及大家互有血仇心病之外，亦除咗蔣介石手中精銳嘅部隊外，其餘中國軍隊所遵循嘅戰法都是出於第一次世界大戰時期，落後大時代三十年。在軍事上佔有絕對優勢嘅日本，固然響南北戰場上摧毁咗中國嘅補給線，以及癱瘓整個指揮系統，但係大規模嘅空襲造成大量平民百姓死傷，亦都令全世界反日氣氛高漲，日本不單遭受各方譴責，而且更加某程度上被國際孤立，依一點非常重要，因為無論中國及日本，都冇可能以一個國家之力響戰爭中獲勝，必須加入聯盟成為一員先有贏面。因此中日戰爭，亦加速咗日本向納粹德國同法西斯意大利靠攏，促成咗「軸心國」聯盟嘅形成，中國亦於三年後1941年正式加入英美法陣形並肩作戰。

反觀中國手中嘅籌碼卻在增加，響19世紀末，經濟發展潛力甚大嘅中國曾經受到國際社會重視，但去到第一次世界大戰結束後，中國不再受到國際社會關切，反覆發生嘅內戰同埋連綿不絕嘅飢荒，令中國淪為一個不堪入目嘅貧窮大國——東亞病夫——1930年大蕭條期間，各國自顧不暇，更加冇人去關注中國形勢。但抗日戰爭發生後，整個國際社會開始重新同情中國及中國人，再將注意力放響依個貧窮落後、卻以卵擊石欲爭取自由尊嚴獨立嘅四億人大國。

淞滬戰爭過後，不論係國民政府或日本，原定嘅作戰計畫皆不再有用。日本以爲只要高速佔領華北同上海，就可以結束中國戰事（蔣介石投降），但事實證明情況遠非他們預期；國民政府原本訂立嘅兩個作戰計畫之一，就係要打一場長時間嘅消耗戰，以空間換取時間，甚至將首都撤到四川重慶，蔣介石亦都明白，佢要千方百計說服跟隨佢哋嘅人、部隊、盟友、以及全體中國人民相信國民政府係有能力打敗、或磨死日本。但中日兩方面都冇乜方向，見步行步，進入芥蘭炒牛肉亂棍打死牛魔王嘅無序局面，我亦好相信，人類文明史上最凶殘嘅南京大屠殺亦係響依種失控無序嘅情況下而發生……

1937年11月12號，中共毛澤東強調統一戰線中嘅獨立自主原則，抗日戰爭發生，蔣介石個人無論係聲望及威權上都有所提昇，中共絕對唔會跟車太貼，係明智之舉。11月16號，國民黨決議國防最高會議代行中央政治委員會職權，全面進入戰爭狀態，同一日，大軍壓境下，南京國民政府機關開始向重慶、漢口、長沙等地遷移。11月19號，蘇州、嘉興相繼失守；11月20號，日本設立侵華大本營，作為戰時嘅最高統帥機關。亦響11月20號當年，國民政府正式宣佈遷都四川重慶，26號，林森（1868-1943）一行人抵達重慶並開始辦公。上個月30號，國民政府決定遷都重慶，今個月16號，國民政府主席林森乘海軍軍艦從南京沿長江西上，政府同黨部各機關亦都相繼遷移。呢個時候，國府雖然遷到重慶，但係國民黨軍政、經濟中心實際上卻喺武漢。直至後來武漢失守後，軍政中心又一度轉移到長沙、衡山。直至去到1938年底，蔣介石同國民黨最高軍事機關先開始真正遷往重慶辦公。

11月22號，蒙疆聯合委員會喺歸綏成立，當然係日本人策劃嘅傀儡政權鶵形。11月24號，日軍首次掃蕩晉察冀邊區中共軍隊。同一日，國民政府委派唐生智（1889-1970）兼任南京衛戌司令官，負責守護南京，不過依個明顯係三煞位，呢個時候，日軍都打通進攻南京嘅通道，南京早已經無險可守。11月26號，上海《時事新報》被迫停刊，財政部命令四行舊存銅元改著銅輔幣，今日，日軍正式開始進攻國民政府首都南京，南京保衛戰開始；11月27號，濟南失陷，同日，偽河南自治傀儡政府喺安陽成立，蕭瑞宣為主席，呢條友都唔知係乜水？歷史上對佢冇乜描述。11月27號，前中共最高領導人王明（1904-1974）、特務頭子康生（1898-1975）由蘇聯經新疆到達延安。10月28號，日軍喺上海派人監督海關收稅部，11月30號，中國軍隊部署南京弧形防禦線，同日常州淪陷。

今個月，國母宋慶齡發表《關於國共合作的聲明》，隨住抗日戰爭嘅深入發展，中國老百姓紛紛認購救國公債，為咗籌款，中央銀行推動民眾購買債券，規定金器、銀器等均可視為貨幣等通用，國難當前，不少民眾亦交出金銀首飾，以換購救國公債抗日。不過我必須重申一點，響廣播同報紙無辦法到達嘅農村地區，仲有好多中國民眾對抗日戰爭一無所知，在中日戰爭初期，蔣介石最重要嘅任務就係要將抗日訊息帶到每一個中國人耳中，喚起佢哋嘅愛國心，共同抗戰！畢竟日本勝在錢多，中國則勝在人多！龐大人口數量，固然係一個巨大負擔，但有時候亦都係一件——致命武器！日本侵華，其實係蛇吞象，蛇雖毒，但象體型龐大，要成隻食入肚，遠比想像中困難得多，可惜雄心萬丈嘅日本人知道呢個道理嘅時候，明顯已經太遲……

1937年11月於焉結束。

#常威 #蔣介石平反系列  #佛經抄寫員 #中日戰爭 #民國歷史

［常威近代史］第七百六十回 劍指首都 宋帝南遷（高清錄音版）

https://fb.watch/iwv2hwIRx9/

【常威近代史】（七百六十一回）
『南京大屠殺點解會發生？』

時間線進入1937年嘅12月，【常威近代史】由1840年開始敘述中國近代史，但從沒有如這刻沉重，因為今個月，一件人類文明史上最血腥殘酷最乖離荒謬嘅大屠殺，將會響中華民國首都南京發生，史稱南京大屠殺，事後統計，有30萬人於此無辜喪生。年紀越大，我就會越問依個問題：

『南京大屠殺點解會發生？』

呢個問題並無答案，雖然好多歷史書已經講出前因後果，或者鉅細無遺地描述事情發生嘅經過，但係呢啲全部都唔係答案。就我個人而言，我明白發生喺公元前261年嘅長平之戰，趙軍被秦軍坑殺45萬人，我亦明白數百年前蒙古軍隊每征服一個地方，都會屠城殺個雞犬不留，甚至乎，我可以瞭解太平天國之亂，可以死成2000萬人……畢竟呢啲事都係發生喺一個民智未開，人同野獸大概冇太大分別嘅古代世界。但係南京大屠殺，以及同時代希特拉屠殺500萬猶太人兩件慘劇，卻係發生響20世紀嘅文明時代，無論兇手或被殺嘅人，都係識字，甚至擁有基本文化修養，但係大屠殺點解又會發生呢？集體瘋狂點解可以喺咁短嘅時間之內瘋狂蔓延開去？到咗今時今日，我仍然冇辦法為依兩件慘劇搵到真正嘅答案。你可能會笑我太相信人性；但我想同你講，人性真係存在喎。問題只係點解人性會喺一定嘅條件之下突然之間瘋狂失控，難道喺每一個人嘅潛意識之中都蘊藏住野獸嘅殺戮基因？所謂文明同道德，只不過係壓制呢啲恐怖基因嘅獨栽手段或者權宜之策？

我常公子都算係半個「哈日族」，我熱愛日本嘅文化，亦響日本軟文化嘅薰陶中長大成人，最喜歡嘅作家亦都係三島由紀夫（1925-1970）。我冇辦法相信日本人會做出一如「南京大屠殺」一般嘅獸行，而且當時1937年中日雙方，仇恨真係大到要用屠殺嘅方式處理？我講我自己冇辦法搵到答案，大概就係呢個意思。「仇恨」究竟係啲乜嘢？我以爲我自己明白，但係當我讀到「南京大屠殺」段落嘅時候，我發現我自己完全明白「仇恨」到底係乜嘢？經歷過大正自由民主時代洗禮嘅日本年青軍人，點解可以做出一啲違反人倫嘅禽獸行為？當時貧窮愚昧無知嘅中國人，又真係討厭到可以被他人視作牲畜般無情殺戮？我冇辦法得到真正嘅答案。有時候我甚至諗，可能有啲事係永遠隱藏喺歷史脈路嘅背後，現代人永遠冇辦法知道。

如果你我作出某些結論，我只可以答你，人類其實係一種好容易失控嘅動物，所謂失序，亦其實好容易發生，宗教同哲學、文學同藝術有存在落去嘅必要，亦係依個原因（除非唔係）。

發完噏風，回歸歷史脈絡。1937年12月1號，國民政府部分計畫開始喺重慶辦公；同日，第九世班禪額爾德尼（1883-1937）圓寂於青海玉樹寺拉加頗章宮中。12月2號，德國駐華大使再訪蔣介石，轉達日本謀和條件，蔣介石當然無即時答應，或者當時蔣介石亦唔知道，呢個舉動亦係日本對國民政府嘅最後通牒。12月4號，日本戰機首次轟炸蘭州。12月5號，偽上海市政府宣佈成立。12月6號，國防最高會議決定接受德國使者陶德曼（Oskar Trautmann，1877-1950）調停意見，實現中日議和。嚟到呢度大家都睇，其實和談可能好快會發生，不過想唔到一個星期之後，就發生南京大屠殺慘劇。

同一日，中央電瓷製造廠喺長沙開設，12月7號，冀南「治安維護聯合會」成立；12月9號，由左派人仕夏衍（1900-1995）主編嘅《譯報》喺上海創刊，呢一份報紙係上海淪陷後，唯一由中國人創辦嘅報紙。12月10號，「山西自治政府」喺太原成立，偽政權如雨後春筍出現。12月11號，《群衆》週刊喺漢口創刊，鄧拓（1912-1966）亦都創辦《抗敵報》，宣傳反日抗戰訊息。12月13號，中共中央政治局作出關於召開第七次全國代表大會的決議。

12月13號，南京保衛戰全面失利，日軍入城，中華民國首都南京淪陷。上個月24號，蔣介石任命唐生智將軍（1889-1970）為南京衛戍司令長官，開始部署南京保衛戰，今個月5號，日軍推進到南京外圍防線附近，響當晚就向守軍陣地展開正面進攻，響強大嘅火力同埋空軍協助底下，中國軍隊節節敗退，雙方激戰到8號，國軍句容、淳化、牛首山陣地均告不守，日軍進入城郊，南京被圍。同一日，鎮江炮臺亦都淪陷，南京守軍腹背受敵。12月8號晚上，中國守軍退守復廓陣地繼續抵抗，12月10號，日軍主力向雨花臺、通濟門、光華門、紫金山第三峰幾處同時發動猛烈進攻，中國軍隊抵擋不住，當日中華門城牆被轟塌，日軍大規模蜂擁入城，守軍倉皇敗退，城中一片混亂，大多數部隊困於南京城內。南京保衛戰打咗唔夠20日，全面失守，時間可算快得驚人，大概國民政府已經傾盡全力於淞滬會戰中，上海保唔住同時，自然亦難逃國破嘅命運。

南京破城，之後就發生慘無人道嘅南京大屠殺事件；南京亦唔係日本人佔領嘅第一個中國城市，北平淪陷，上海淪陷，日本人都冇採取大規模嘅殺戮手段處理，但點解偏偏就係南京？下一集繼續……

#常威 #蔣介石平反系列  #佛經抄寫員 #中日戰爭 #民國歷史

［常威近代史］第七百六十一回 南京大屠殺點解會發生？（高清錄音版）

#唔鍾意睇字可以聽

https://fb.watch/iBGbJuS1rX/

【常威近代史】（七百六十二回）
寫在大屠殺之前

1937年11月26號，蔣介石正在前往紫金山，向國父孫文謁靈告別，呢個時候嘅蔣介石對於應該防守南京掙扎不已，「南京孤城不能守，然不能不守也」。日軍大軍壓境，蔣介石亦都心知肚明國軍根本冇可能守得住南京，但係毫不反抗就棄守呢個新中國嘅首都會俾人一個不負責任嘅觀感，政治後果將會難以想像，另外要放棄散布喺城中同埋郊區價值數百萬美元、甚至冇使用過個高射炮同埋各式火炮，蔣介石心中都會有猶豫。早響11月16號，國防最高會議已經下令將國民黨重要機關以及政府機構陸續遷往重慶，所有作戰指揮所需嘅軍官亦都動身前赴武漢，畢竟「維持政府的續存，才能抗戰到底」。畢竟一個政權的存在，不在乎有冇個爐，只在乎有冇人（或夠唔夠人）圍爐。

雖然以卵擊石，但南京保衛戰仍然有一定意義，因為蔣介石希望借此令蘇聯全面介入戰事，一件亦都係日本人最恐懼嘅事情，當時國民政府派駐蘇聯嘅特使回報蘇聯正在有此考慮，蘇聯紅軍元帥伏羅希洛夫（Marchll K. Y. Voroshilov，1881-1969）就曾經講過：「如果中國抗戰到了生死關頭，蘇聯當出兵，絕不坐視」，而蔣介石亦於11月30號以私人身份傳話畀史太林，要求蘇聯全面介入戰事。不過12月5號史太林決定不出兵，同一日南京守護戰就開打。假如史太林出兵，情況又會係點呢？

自從七七蘆溝橋事變爆發以來，蔣介石政權響尋求外交支持及國際社會援助上，可謂完全失敗，中國固然可憐，但係日本實在如狼似虎，其他國家都唔敢正面挑戰依隻東亞癲狗，南京成為孤城，中國國民政府何嘗唔係成為國際孤兒？又當然，「中國」還「中國」，「蔣介石」還「蔣介石」，呢兩個係完全唔同嘅概念，「國家」同「政權」某程度上係一體，但某程度上又可以分開嚟講，呢個問題可以解釋咗好多事。

12月10號，唐生智拒絕咗日本提出嘅勸降建議，南京保衛戰發生期間（其實只係幾日時間），平民百姓已經蜂擁離開南京城，「滿城蕭索，遷避之人，不絕於途，老百姓半肩家當，拖男負女，茫茫不知何往」，境況淒涼，然而南京保衛戰輸得亦實在太快，12月12號唐生智已經認為南京不能再守，下令部隊徹離，但撤退嘅狀況亦都相當混亂，成千上萬嘅士兵拔腿狂奔衝向下關渡口。情況有以下描述——「不僅車輛不能進退，人與人之間也無法轉動……人人爭渡，任意鳴槍，船至中流被岸上未徹部隊以槍擊毀，沉沒者有之，裝運過重沉歿者亦有之」，至於因爭相踐踏而造成的死亡人數則不清楚，根據估算，當時一共有10個師湧去下關，人數約達10萬人，因撤退而造成的死亡數字可能相當大。唐生智領導嘅南京保衛戰產生災難一般嘅敗局，可算喺戰術上嚴重犯錯，既擋不住日本人守唔住南京，又唔能夠成功爭取時間令平民同部隊平安撤離，兩頭唔到岸，事後亦有傳聞，唐生智曾經滙款40萬到香港，佢接任衛戌首都之職，只係因為貪圖軍費而非民族大義，當然無法証實。不過南京一役後，蔣介石再冇重用唐生智，佛學將軍潛修佛學渡日，國共內戰期間轉頭支持中共。

之前已經講過，淞滬會戰之後，其實中日雙方都冇佈署下一步點走，戰況進入失序狀態，中國部隊係大雜燴雜牌軍見步行步都算情有可原，強大嘅日本帝國軍隊亦唔見得相當專業，日本軍隊嘅犯錯，或指揮系統嘅混亂情況，響之後同美國打嘅太平洋戰爭中更加表露無遺，不過呢個係後話了。日軍本來冇打算攻打國民政府首都嘅計畫，無論係東京嘅參謀本部，抑或中國戰場最高指揮官松井石根（1878-1948）都好，響11月頭都冇諗過要佔領南京。真係相當好笑，一個月前日軍冇諗過佔領南京，一個月後就響南京展開大屠殺？所以凡事凡物，真係唔好相信好有佈局，其實好多事情都係隨機發生，大部份陰謀論不可信，亦係依個原因。

轉捩點係第10軍司令官柳川平助中將（1879-1945）喺杭州灣登陸後，依憑直覺嚮前推進，11月15號，佢下令部隊唔要受制於作戰區域同埋地形限制，儘量追擊潰敗嘅中國軍隊殘部，而且呢個時候，柳川平助知道國民政府蔣介石麾下最精銳嘅部隊已經喪失超過一半兵力，而且失去作戰意志，因此松井石根先同意下屬柳川平助嘅看法，認為奪取南京可以加速中國投降，日本參謀本部亦於12月1號追認同意進攻南京計畫。

但攻打南京行動要快，因此日軍以日行30公里嘅速度急行，大軍壓向南京，後勤作業趕唔上佢哋嘅行軍速度，因此軍隊都不攜帶糧食同補給，採用就地取材手法，一邊搶殺燒，一邊行軍，沿途焚毀房舍、農田甚至整條村莊。當時已經係12月冬天，除咗口糧，日軍連保暖嘅軍氈同埋冬裝都欠奉，所以到達南京嘅時候，其實已經飢寒交迫。加上之前，國民政府動用「焦土政策」（蔣介石好鍾意採用），將南京城外15公里範圍變成一片焦土廢墟，南京失守嘅時候，政府領導要員已經大撤退，城內嘅糧食同埋食水亦用盡，加上有軍人四處搶掠，情況可謂一片大混亂。

種種嘅偶然，種種嘅失序，終於響南京引發一場驚世大災難發生。我相信，某一些因素事前可以改變，慘劇未必一定會發生，只能歎一句，當時嘅中國及中國平民百姓運氣實在太差……

#常威 #蔣介石平反系列  #佛經抄寫員 #中日戰爭 #民國歷史

💜最新上架
常威近代史 第十三部 【鬼子來了】

電子書下載⬇⬇
https://play.google.com/store/books/details?id=cz6qEAAAQBAJ

🙏請捧場

【常公子歷史頻道 517回：黃金十年系列之 蔣宋聯婚】

⏩https://youtu.be/SOF2-LADa1c