大清亡國關慈禧蛋牛治 3

［常威近代史］第六百六十七回 溥儀又做皇帝（高清錄音版）

#唔鍾意睇字可以聽

https://fb.watch/c5fW5O_z_U/

【常威近代史】（六百六十八回）
活在當下才是永恆

1934年3月19號，日本（偽滿洲國）喺長城各口岸樹立「滿洲國界」字樣界碑，自行劃界，長城以外就係滿洲國，長城以內就係中華民國！真係咁都得？講咗就算？立個碑插支旗仔就建國，完全漠視國際條約，真係叫做夾硬嚟，企圖利用武力製造既定事實。當然國家胡亂劃界，從來都係軍事衝突嘅原點，第一次世界大戰結束之後，梵爾賽會議中歐洲各國重新（胡亂）劃界，其實亦種吓咗第二次世界大戰嘅火藥種子，其影響力亦超越到1945年之後，直至今時今日。

其實重申一次，如果日本唔推「滿洲國」依個project，中日之間亦唔會發生全面戰爭。當然閱讀歷史，講「如果」乜「如果」物，其實係多舊魚嘅，世界上如果有叮噹如果電話亭，就唔會有咁多問題發生。所有嘅政治，都只不過係為咗解決當前嘅問題而做，所謂對未來嘅景愿同藍圖，其實都係多餘嘅。新型冠狀病毒未發生之前，全世界人講環保，疫情發生，個個要戴口罩食外賣，環保問題氣候問題又冇人講鳥，解決疫情先；同樣道理，如果執住「50年不變」呢句說話要50年真係不變，實際上都係非常多餘，世界天天在變，變幻才是永恆，有無數當前嘅問題要解決，亦都冇辦法解決得曬，要講50年之後，就算5年都冇可能，5個月都唔得喇！聽日恒生指數升硬定跌硬？下一次賽馬某隻馬必入三甲？俾你知道，其實已經乜都唔使做。你又唔係印度神童，如果唔明白人生係活響不斷變幻之中呢個大道理，其實有時候會活得相當痛苦，「乜唔係咁嘅咩？」，問得出口，已經係大傻瓜。

不過有一點可以肯定，歷史充滿偶然性，同埋人生活於不斷變幻勢態之中，可能先係做人最大嘅樂趣。否則一切如劇本所寫下發生，有人就話係宿命論，毫無驚喜可言。「活在當下」喺大道理，明日嘅事，唔該瞓醒先講，昨日嘅事，亦都過去咗，諗嚟都無謂。

今個月，四川成都發生法院搶印事件，李治東（1917-1950）為爭奪成都地方法院院長烏紗帽而搶奪印信。民國成立以來，四川司法機關嘅人事權由本省軍政府當局掌控。當時成都地方法院院長係張鏡蓉，而被國民政府司法部任命前去取而代之嘅李治東，響四川遭到各方抵制，冇辦法，山頭主義太嚴重，空降中央官員取代地區陀地官員，講就容易，做就難過登天，做官心切嘅李治東，趁住張鏡蓉喺辦公室用印發文之際，率眾闖入搶走印信，張鏡蓉一邊借用同院檢察處印信行使職權，一方面派人將李治東抓獲。

3月20號，中國婦女運動同盟會喺上海召開臨時大會，推舉革命元老何香凝（1878-1972）15人為改組委員，何香凝就係國民黨大將廖仲愷遺孀，中共大員廖承志母親，另外何香凝亦係嶺南畫派著名畫家，真正多才多藝。同一日，盜墓者軍閥孫殿英（1889-1947）西進屯墾，遭到寧夏回族軍閥馬鴻逵（1892-1970）部隊抵制，雙方交戰數月，孫殿英屢戰屢敗，被迫通電下野，率衆殘部出走。上一年，孫殿英奉命西進屯墾，被寧夏、青海等省當局阻止，山頭主義你估講玩，於是中央軍委會命令孫殿英暫停西進，今年1月，孫殿英發出移防通電，決議再度西進，於是同馬鴻逵軍隊交戰，馬鴻逵喺石咀子、平羅同埋寧夏城垣間節節佈防，孫軍推進極慢，而且經常失手，3月19號，甘青寧 各軍聯手反攻，分路進擊孫軍，晉綏軍隊也從背後夾攻，孫殿英腹背受敵，軍心散渙大敗，只得宣告西進失敗。

3月22號，行政院制定公佈《國營企業最低工資暫行辦法》； 3月23號，日本派出漢奸喺天津招募華工數千人運往東北，同滿洲國打工，但係喺塘沽碼頭關口被扣留。3月25號，中國文化建設協會喺上海成立，陳立夫（1900-2001）為理事長，發起中國文化建設運動，重塑崩分離析嘅民族意識形態。今年10月，《文化建設》 月刊創刊號發表陳立夫文章，題目為《中國文化建設論》，認為「在民族復興運動的前夜，應該有一個轟轟烈烈的、切切實實的文化復興運動」，「需將中國固有之文化從根救起」，提出發揚固有中國文化，吸收西方文化來建設一個全新文化體系，1935年1月，王新命等十位大學教授發表《中國本位文化建設宣言》，幫手推波助瀾。依類開天闢地嘅大題目，真係講就天下無敵，做就有心無力。要民族復興最重要係有水，窮鬼又可以做什麼？如上述所講，搞掂當前要發生嘅問題先喇。今日中國富強起來，同美國平起平坐，就真係民族復興勒！

3月26號，全國經濟委員會喺南京召開第一次全體會議，決定修改中美之間棉、麥借款合同，由美金5000萬減為2000萬。民族復興係非常遙遠嘅事情，都係解決咗當前債項先，成身債拖住，好難行得遠。做人最好唔好欠債，中華民國嘅問題就係欠債太多，中國積弱嘅問題其實都係債項問題，借錢總要還，一定要明白呢個道理，有冇中介都要還。今個月，中國地理學會喺南京成立，中國著名地理學家、氣象學家竺可楨（1890-1974）為理事長。今個月，中央研究院於8號請求海軍部於西沙群島建立氣象臺，海軍部轉呈行政院請准予設立，1934年3月就係咁多。

#常威 #蔣介石平反系列  #中日戰爭 #民國歷史 #佛經抄寫員

【常公子歷史頻道463回：黃金十年系列之 廣州國民政府成立】

♊ 啱啱睇到一份新聞，內裡講2021年香港約有85000名美國公民，現在下降至70000左右，感到驚異嘅係，在政治嘅大風大浪面前，原來減少幅度比我想像低。不過不得不承認嘅係，香港依一個「中西薈萃國際化大都會」，其中「國際化」的程度正不斷地緩慢遞減中，香港會更傾向中國化，到底係好事抑或係壞事？到現在仍未清楚，對低下階層嚟講，「國際化」或「中國化」 其實關係不大，我經常表達，在香港上世紀八九十年代經濟高速繁榮向上嘅時候，我同我屋企仍然好窮，生活迫人程度比現在有過之而無不及，而且我發現經濟旺場嘅時候，社會愈不公平，貧者愈貧，富者愈富，不過上述只係我嘅個人感受，未必係真。

♑ 講講烏克蘭戰爭，打到現在，局勢仍然未明朗，雙方損失慘重，尤其是以烏克蘭為甚，幾個大城市被炸至頹垣敗瓦，俄羅斯則付出巨大嘅經濟代價，表面去睇，係雙輸局面。俄羅斯同烏克蘭都係窮國家，好難想像今次戰爭之後會有乜嘢後遺症延續，但係無論如何，今次俄烏之戰，將會徹底改變整個世界嘅政治經濟局面，隱藏多年嘅各種問題，亦會隨住潘朵拉盒子打開而蔓延全球。個人認為，停戰協議將會好快發生，因為雙方再唔能夠承受如此巨大嘅物質損失，戰爭之後，歐洲秩序會有一次大調整，中美關係亦會有全新一頁，一個全新時代（亂世） 亦會正式開啟。變幻才是永恆，從來冇錯。

♈ 4月20號，香港將會放寬防疫措施，第五波疫情嘅防疫措施下，香港嘅經濟已經蒙受巨大嘅損失，明眼人都睇到，社會冇可能繼續咁樣運行落去，必須有活水注入先有生機（一直派錢都唔係辦法）。就連一直鐵一般嘅跑馬投注額都跌，情況真係唔理想，必須儘快改變，真係變幻才是永恆。

🎦https://youtu.be/c5LFcG4AV4A

［常威近代史］第六百六十八回 活在當下才是永恒（高清錄音版）

#唔鍾意睇字可以聽

https://fb.watch/c8T33MXWLs/

【常威近代史】（六百六十九回）
江南第一腳

時間線嚟到1934年4月，4月1號，日軍開始喺唐山沿綫舉行野戰演習，隨時打過嚟，距離中日全面戰爭嘅日子愈嚟愈近了。同日，《 民族文藝月刊》 響上海創刊，由劉百川（1870-1964）擔任主編，宗旨為攻擊左翼文化，當時嘅出版界同文藝界，大部份傾左。蔣Sir 推行新生活運動，就係要打一場意識形態嘅硬仗，宣傳攻勢亦都全面配合。

講講劉百川呢個人，原來佢係一個武功高手，當時佢嘅腿法備受稱頌，有「江南第一腳」美譽。劉百川出生於安徽六安縣十里溝。由於自幼家景清貧，讀咗三年私塾後輟學，以替人放牛為生。後經族兄引薦，他拜入當地兩位鏢師門下，學習武藝，並在19歲那年高中武舉人。光緒十六年（1890年），21歲嘅劉百川響走鏢其間，遇到少林寺僧人志善，劉百川即拜他為師，學習「小羅漢」及「羅漢神打」等少林技法。其中，劉百川尤為擅長一套名曰「子午鴛鴦連環腿」腿法。正是憑藉精湛踢技，劉百川開始響武術界嶄露頭角。1910年10月，劉百川去咗河北保定軍校，擔任國術教官。據聞在此其間，佢曾經走訪香港，成為孫文貼身保鑣，由此踏上政途。1928年，劉百川受聘於南京中央國術館，任名譽教務委員會主任。1937年，抗日戰爭全面爆發，劉百川亦淡出武術界，並在杭州平海街開設一間醫館。雖然如此，晚年嘅劉百川並沒有停止授武；繼續傳承少林武藝，其中比較著名者，有民國年間嘅全國摔角亞軍陳枝青、精通內家功法嘅醫師金文炎等。弟子形容，劉百川踢技造詣極高，不僅速度快、力量大，而且能夠響不同距離都能應用自如，「江南第一腳」稱號就係由此而嚟。

4月1號，日本設置奉天、新京（長春）、哈爾濱、洮南四條鐵路管理局，由南滿鐵路株式會社經營。4月3號，國民黨元老級人馬胡漢民發表文章，稱所謂「憲法初稿」係一頁廢紙，反蔣行為。同一日，緬甸人侵入雲南省鎮康縣，企圖佔領金礦區。4月5號，由林語堂（1895-1976）主編嘅《人世間》 半月刊喺上海創刊，該刊物提倡閑式格調小品文，行輕輕鬆鬆鄧梓峰路線。同日，行政院長汪精衛今日通令各省市嚴厲查處專門損毀他人身上西裝嘅「摩登破壞團」！今年初，蔣Sir 喺南昌發起「新生活運動」，提倡簡樸嘅生活風格，一啲激進分子熱烈響應，組織「摩登破壞團」，標榜愛國傳統，以「排洋興華」為行動指標，到處手持鋒利鉸剪，對路人身上所穿嘅西服「動刀」，起初以杭州、北平活動最為頻繁，之後仲蔓延到首都南京，剪爛你件衫，真係搞笑。取締令講：「我個鑒於積弱，方提倡軍事化，若必須強人人皆長袍大褂，寧非矛盾之尤。提倡國貨故當務之急，祇宜勸加勸導，俾服長袍大褂各採用國貨絲布，服西服者採用國貨呢絨。」 冇話唔俾你著西裝，不過西裝要用國貨啫。

［常威近代史］第六百六十九回 江南第一腳（高清錄音版）

#唔鍾意睇字可以聽

https://m.facebook.com/story.php?story_fbid=401048902025060&id=100063598605373

【常威近代史】（六百七十回）
中國測量之父曹謨

1934年4月20號，宋慶齡（1893-1981）、何香凝（1878-1972）等公佈《 中華人民對日作戰的基本綱領》，號召成立中國民族武裝自衛委員會，日本人嘅威脅愈嚟愈近，佢哋侵略中國已經成為定局，無法逆轉。同日，唐山保安隊破獲「中日滿邊疆司令部」，同日，「工業獎勵法」頒佈。中華民國嘅工業，正在拾級而上，今個月，西北棉花打包機廠機器安裝完畢，創建者馮瑞生（1881-1934）親自試車驗收。

馮瑞生係西安泰德光美孚煤油股份有限公司董事長兼總經理，1930年前後，佢開始創辦「西北棉花打包機廠」，上海銀行都有入股！點解要提出嚟？因為呢一間係世代窮困嘅西北回族人嘅第一間工業企業。馮瑞生係回族人，出身貧寒，幼時就學私塾，家貧輟學，改習武術。清光緒27年(1901)西安府鄉試時中武舉。辛亥革命時，積極擁護共和。之後佢致力於興辦實業，發展民族教育，舉辦回族穆斯林的社會公益事業。曾先後創辦「西安德泰光美孚煤油股份有限公司」、「西北棉花機器打包廠」，係西北地區規模較大嘅現代民族工商業。為發展回民新式教育，1932年起，先後在西安市清真寺內投資創辦了「精一學校」、「精一夜校」及「淑德女子學校」及第一、第二兩所小學。此後，佢又喺回民聚居區域設立「陝西省立第一實驗小學」。仲資助回族青年上大學，培養專業人才。亦曾資助北平成達師範學校，為發展回民教育作出偉大貢獻。1930年發起組織了「中國回教公會陝西分會」，並被公推為主席。1931年九一八事變後，佢組織「西安回教救國會」，廣泛發動各界回族穆斯林，積極開展抗日救亡活動。佢編著有《穆罕默德傳》，並資助馬君圖等刊印《古蘭經》。曾先後擔任過陝西省政府參議、陝西石油業同業公會主席、陝西省賑務會顧問等職位。

4月21號，曹謨（音毛）（1897-1994）出席第五屆測量家國際會議，曹謨1921年畢業給北京中央測量學校高等大地測量學系。 畢業後，先後深造於德國普魯士大地測量研究所、芬蘭土爾庫大學天文學及光學研究所，精通英、法、俄、德、日語。曾先後任國民政府陸地測量總局測地學科長，行政院地政署處長，中央測量學校教育長、校長，中央測量總監，中國地理研究所測地學組組長。20年代，曹謨首創全國天文及大地測量，統一測量高程和地圖投影法，人稱「中國測量之父」。1933年創建南京紫金山天文台。抗戰勝利後，奉派至日本東京盟軍總部整理接收軍用地圖圖版並參加中美合作測量談判。晚年積極推動海峽兩岸天文學界響地震研究領域合作。

4月23號，「蒙古自治委員會」 響百靈廟正式成立。4月24號，西藏代表安欽活佛等抵達上海，迎接班禪活佛回藏。同日，廣東樂昌縣雞門山發生山崩，破壞12條村，死200幾人。4月25號，國民政府要求各大學校長只能夠喺本校任教，不得兼任其他職務； 4月26號，宋子文（1894-1971）考察西北經濟，今日提出開發西北嘅4項計劃。至於大西北幾時開發？應該係20世紀80年代之後嘅事。

4月28號，對紅軍嘅大圍剿繼續發生，國軍第67師喺上午9點30分攻佔廣昌城，中央蘇區門戶大開，上月中旬，國軍完成北起南城、西自樂安迄宜黃，南自南豐至白舍等碉堡防線，逐步逼近戰略重鎮廣昌城。本月11號至23號，國軍源盱江兩岸並行推進，響遭受紅軍強硬抵抗之後，肅清廣昌城外圍，其中周岩第6師同大名鼎鼎嘅紅軍林彪（1907-1971）、彭德懷（1898-1974部隊喺甘竹東部大羅山要地展開激烈爭奪戰，3日得失易守5次，到22號徹底佔領。4月27號，國軍響陳誠（1898-1965）嘅指揮下，向廣昌發動扇形攻勢，迫使紅軍主力今晨全綫南撤，依一役紅軍傷亡逾4000人！

時間線進入1934年嘅5月，5月1號，歐亞航空公司開辦平粵航線通航，由北平飛廣州。同一日，中國航空工程學會喺杭州成立；5月2號，實業部舉辦國貨陳列館春季展覽會，繼續提倡使用國貨。同一日，綏遠歸化市雨雹成災，冰雹成個芒果咁大，足有2寸厚，為40年來所未見。5月4號，南京市展開肅清煙賭娼三大害運動，煙即係食鴉片、賭即係賭博，娼就係叫雞，5月5號，蔣Sir修訂《新生活運動綱要》，並且修改《新生活運動須知》，詳細規定新生活運動嘅內容、目的以及組織等等。5月6號，國民政府今日頒佈《嚴禁烈性毒品暫行條例》，規定凡製造、販運及戒後復給烈性毒品者，一律實行槍決，即係拉去打靶！製毒同販毒應該打靶，但係戒咗食番都要死，真係幾得人驚！去年以來，隨住國民政府對鴉片嘅全力取締，國內煙民數目日漸減少，鴉片逐漸供過於求，於是不法分子另謀出路，將鴉片進行精煉提純，製成各種烈性毒品出售，牟取暴利。依一次國民政府命令重懲製毒、販毒及吸毒者，意在制止重新蔓延嘅熊熊「毒焰」。

#常威 #蔣介石平反系列  #中日戰爭 #民國歷史 #佛經抄寫員

❤【常威近代史】第一部《大清亡國關慈禧蛋牛治》，全面開放，免費下載， #freedownload！

Free下載連結🔽

https://play.google.com/store/books/details?id=C3hjDwAAQBAJ

［常威近代史］第六百七十回 中國測量之父（高清錄音版）

#唔鍾意睇字可以聽

https://fb.watch/cfzZfVCjQk/

5月11號，日軍喺吉林伊蘭縣強奪民田，並派出飛機轟炸民居，民眾死亡2萬幾人，都好明顯，呢啲唔係叫戰爭罪行，而係純粹大屠殺。5月13號，香港發生特大事故，石塘咀華南煤氣公司發生猛烈爆炸，死100餘人，傷1000人（另有記述死42人，傷46人）。西環大道西煤氣總局位於太平戲院對面，約在今日塘咀市政大廈位置，面向皇后大道西，煤氣總局當時共有四座煤氣鼓，一大三小，供應全香港煤氣；總局後座設有一座蒸氣爐及風泵機房，其餘皆為空地，一大一小兩座煤氣鼓位於機房背後，每日由機房將煤氣輸送到煤氣鼓儲存，當日上午10點幾，工人按常將煤氣輸入煤氣鼓，其中最大一號煤氣鼓因過於陳舊而漏氣，突然發生爆炸，大量煤氣外洩，隨東北風吹向晉成街、加倫臺一帶，並隨即引發大火，加倫臺一帶住宅頓成火海，當年二名勇敢印度保安員(一位名叫夏路林，另一位名叫山打星)衝入火場啟動緊急裝置，將煤氣鼓內嘅煤氣穿放並排出大海，而二位印度保安亦因此壯烈犧牲，因為依二位印度朋友嘅英勇行為，先控制咗損害範圍，大大減少死傷數字，所以附近居民為佢哋安放咗靈位，「夏路林」亦成為當地守護神，受當地居民長年拜祭。鑑於災情嚴重，當時港督貝璐爵士（1875-1945）亦前往災區視察及慰問災民。

5月13號，中國五四時期著名女作家廬隱（1898-1934）喺上海大華醫院因難產去世，終年36歲，廬隱著有短篇小說集《海邊故人》、《靈海潮汐》，中篇小說《歸雁》及《廬隱自傳》等，內容以描寫愛情為點，文筆清新婉約，廬隱曾與冰心（1900-1999）、林徽因（1904-1955）齊名，稱為「福州三大才女」。2003年美國哥倫比亞大學出版嘅《女作家在現代中國》（Writing Women in Modern China）之中，與蕭紅（1911-1942）、蘇雪林（1897-1999）和石評梅（1902-1928）等人並列為18個重要嘅現代中國女作家之一。

5月14號，蔣Sir 命令各省市政府嚴厲鎮壓學生運動； 5月15號，由金城銀行、南開大學、中華平等教育促進會聯合組成嘅發展華北農業經濟嘅組織—— 華北農產改進社—— 喺天津成立，由銀行家周作民（1884-1955）任理事長，該社以「改良農村生產、調劑農村金融」為主旨，首先從運銷及植棉入手，計劃喺5年來響晉、魯、豫植棉1000畝。5月16號，國民黨中央政治會議通過《禁煙三原則》。

#常威 #蔣介石平反系列  #中日戰爭 #民國歷史 #佛經抄寫員

［常威近代史］第六百七十一回 香港煤氣大爆炸（高清錄音版）

#唔鍾意睇字可以聽

https://fb.watch/ckMIF0eFIL/

【常威近代史】（六百七十二回）
殺人的苛捐雜稅

1934年5月17號，四川軍閥劉文輝（1895-1976）代表姜郁文 與西藏代表覺吉向讓簽訂和議，因爭奪西康地盤而發生的戰爭終告平息，劉文輝川康邊防軍部隊撤出西康一帶。5月20號，宋子文提出「 西北建設計劃」，中國大西北天然資源豐富，相信當時好多人都知道，不過知道還知道，點樣開發？點樣變錢先係大問題。土地是一切財富嘅根源，所謂生存空間就係土地，而土地不單指謂居住同生產，仲有土地本身蘊涵嘅天然資源，今時今日，黑金，即係石油係最重要嘅一種，天然氣又係另一種，貴金屬及各種礦物，尤其是稀土金屬更加係一個國家嘅戰略重要資源。一個國家嘅天然資源，有時候比外匯儲備更加重要。

5月21號，第二次全國財政會議喺南京召開，到會代表有114人，通過咗確定地方預算、廢除郵包稅、辦理土地陳報綱要草案、舉辦外橋營業稅、地契過戶稅、以及「整理田賦附加」、「救濟鄉村」 等等100餘件提案，由5月21號召開，到27號閉幕。會議以整理田賦、改進稅制、廢除苛捐雜稅、編制地方預算為目的。針對各地濫加田賦、苛捐雜稅繁多嘅情況，會議首先提出整理田賦，採取實施土地陳報，減輕田賦附加標準嘅辦法。其次，會議指示廢除苛捐雜稅，規定凡非土地稅類，包括營業稅類、行為取替稅、公益捐稅類等地方捐稅，均屬苛捐雜稅，一律限於7月1日至12月底分期廢除！講真，「苛捐雜稅」四個字真係好得人驚，乜都要捐，或者灠立名目收稅，即係同搶冇分別。當時中華民國，未達到大一統，到處山頭，到處軍閥，到處土匪，每股勢力都有「合法」或「非法」嘅徵稅權力，總之插支旗仔，占領個山頭，就係合法政權，因為合法政權，所以有權向領地內平民百姓收稅。講真邊個唔鍾意錢？最慘嘅都係農民，根本係同用支槍指住你搶冇分別。因此，制度、法律同組織其實好重要，「無政府主義」完全係空想同大災難，一旦無政府，冇制度同冇法律，人就會亂咁嚟。一隻野狗唔戴口罩，就會隨便咬人！你唔係相信人性本善吓嘩？

5月26號，西南彝族文化促進會喺南京成立。5月27號，日軍增兵山海關，先後派兵喺戰區內演習，用武力威脅儘快通車通關。5月29號，行政院會議決定設立海事法庭；同日，國民政府通令禁止各機關借外債，原來之前政府部門可以自己舉債？咁得意嘅？怪不知得個經濟一直咁差喇。

今個月，據《中央日報》報導，直至本月底，蔣Sir喺江西修建公路6000餘里，碉堡3000幾座，當然全部係剿共軍事用途。月底，北平師大、北大兩校教授，語言學家錢玄同（1887-1939）與胡適（1891-1962）等發起漢字改革研究會。

1934年5月，之前提過嘅游泳女將楊秀瓊（1919-1982）喺菲律賓馬尼拉舉行嘅第十屆遠東運動會上，以絕對優勢獲得50米自由式、100米自由式同100米背泳三項個人冠軍，並且同隊友合作，一齊奪得200米接力賽冠軍，「美人魚」 稱號因此風靡海內外。楊秀瓊原籍廣東東莞，6歲開始落水，13歲就喺橫渡香港九龍海峽嘅渡海泳比賽中奪取冠軍。本屆遠東運動會，中華體育總會王正廷（1882-1961）率領選手130人參加，陣容鼎盛。1934年5月於焉結束。

時間線進入1934年6月，6月1號，中日無線電路分別喺上海同東京正式開放，雖然係敵對國家，但係一樣要溝通。同日，中國第一水利工程試驗所喺天津舉行奠基典禮。6月2號，由宋子文（1894-1971）、孔祥熙（1880-1967）等發起組織嘅「中國建設銀公司」 於上海舉行創立大會，選舉出宋子文、孔祥熙及李石曾（1881-1973）等21人為董事，張靜江（1877-1950）等七人為監察。孔祥熙擔任董事長，執行董事為宋子文，公司資本定額為1000萬元，由14間華資銀行同好多財閥分別認股，公司並且與上海滙豐銀行合作，「中國建設銀公司」總公司設於上海，各地開設分公司。成立該公司嘅主要目的，係便於中外銀行共同投資、興辦雙方屬意嘅企業，並且承辦全國建設委員會所屬嘅電力同埋路礦等各項公管事業。

6月4號，賀龍（1896-1969）部隊由川至黔，攻克婺川。6月5號，四川軍閥劉湘（1890-1938）喺四川私鑄低成色銀幣，孔祥熙嚴令制止；6月6號，國民黨中央宣傳委員會喺上海設立中央圖書審查委員會；6月7號，山東省國貨推銷委員會決定以強制方式推銷國貨，至於強制方式到底係乜嘢呢？唔通用支槍指住市民要買國貨？真係唔知道嘞。6月8號，國民政府禁止徵收田賦附加稅。6月9號，日本駐京總領事，以總領事館書記生藏本英昭失蹤通知外交部，南京軍警隨即發動搜查。同一日，國民政府公佈由國民黨中央宣傳部制定嘅《圖書雜誌審查辦法》，規定一切圖書雜誌付印前，應將稿件送往國民黨中央宣傳部「圖書雜誌審查委員會」進行審查，而唔係過去規定嘅喺出版後先將圖書雜誌送審。被准許出版嘅圖書雜誌必須喺封底及封面上印上審查編號碼。而圖書雜誌出版後需送住「圖書雜誌實查委員會」作核對，如果發現書本內容同審查稿件不符，將會受到內政部調查及處分，後果自負。

#常威 #蔣介石平反系列  #中日戰爭 #民國歷史 #佛經抄寫員

【常公子歷史頻道465回：黃金十年系列之 莫斯科中山大學開學了 】

♊ 香港特首選舉塵埃落定，未開閘已經有咗結果，現任政務司李家超會成為下一任香港特首。特首跑馬仔，之前謠言滿天飛，每個人都話有消息有冷馬突圍，最後終於開出大熱門，同跑馬一樣，賠率決定一切，飛到馬到，明就明，唔明都冇辦法。新政府上場，香港將會迎上一個全新嘅開局，過去嘅一切已經不存在。誠然，經過2008金融海嘯同新冠疫情衝擊，加上俄烏戰爭爆發，新冷戰時代開始，整個世界嘅政治經濟大局已出現翻天覆地嘅巨變，未來可能會發生嘅事，可能會超出所有人想像之外，包括局內人在內。

♐ 作為一個普通人，完全控制唔到世局嘅變化，唯有戒慎恐懼，做好自己。孔子有云「君子不立危牆之下」，其實可圈可點。做人做事，其實七分能力三分天意，英雄造時勢，抑或時勢造英雄？一定係後者。主觀能力，好多時候只係作用於一個人自己身上，客觀世界根本冇辦法由人心主宰。人可以做嘅，就係改變自己對事物嘅睇法，從而遷就心境，希望活得安心。你可以話係犬儒主義，但係除卻犬儒，又可以做什麼呢？高估個人能力，其實仲危險。

♊人貴自知，好多時候背景同出生決定人生，老豆可以淨落兩間太古城畀你收租，成個人生就會唔同曬。「決定論」 其實充滿悲劇氣氛，但係人活到某個年紀，就會相信宿命難違，畢竟能夠突破宿命同命運嘅只會係少數。子曰「四十不惑」，王家衛《一代宗師》亦有講「四十歲之後，要做有把握嘅事」。所謂「有把握」，就係要清楚自己是什麼？ 清楚自己嘅能力去到邊度？最近睇過一篇文章，內裡講大部份父母都希望自己嘅孩子與眾不同，但係父母必須要承受一個真相——原來自己嘅孩子祇不過係平平無奇，只係平凡眾生嘅其中一員。

🎦https://youtu.be/oKaAhb1WQOk

［常威近代史］第六百七十二回 殺人的苛捐雜稅（高清錄音版）

#唔鍾意睇字可以聽

https://fb.watch/cnMYvDTkJ6/

【常威近代史】（六百七十三回）
儒家哲學永劫回歸

1934年6月10號，全國佛教會喺上海舉行第六屆代表大會；同日，日軍喺吉林省商雙城子建成遠東最大電臺。6月11號，保定行營搜查當地書店，搜去左傾書藉32種，共計10000餘冊，並且逮捕書店職員32人。6月13號，南京陵園工人魏宗青響明孝陵上山尋穫幾日前失蹤嘅日駐京總領事館書記藏本英明先生，原來只係藏本英明先生周圍遊覽，日方被迫向中國外交部致歉。

6月14號，由年輕導演蔡楚生（1906-1968）編導嘅電影《漁光曲》 響上海金城大戲院舉行首映禮，儘管上海當時正經受60年少見嘅酷熱天氣，但係大批觀眾仍然蜂擁而至，先睹為快！由聯華影業公司出品嘅《漁光曲》響1933年 9月投入拍攝，影片主要描述3個漁家子女成長嘅故事，以及佢哋喺苦難生活中嘅真摯感情，優美嘅海邊景色同抒情插曲貫穿全片，令觀眾樂而忘返。《漁光曲》 喺上海一年公映84日，打破《姊妹花》 同期上映60日嘅最高紀錄，年輕導演蔡楚生自此聲名鵲起。蔡楚生出生於廣東潮陽農民家庭，幼年時隨父親移居上海。22歲進入電影界，響1934年拍攝中國第一部獲得國際電影獎項電影《漁光曲》，令中國電影開始走向世界，之後有《王老五》、《迷途的羔羊》等作品，多為反映被帝國主義所壓迫下半殖民地社會民眾嘅悲劇。佢曾與阮玲玉有過一段戀情，但因當時已有家室選擇退卻。抗日戰爭期間，蔡楚生從重慶遷至香港，拍攝抗戰愛國電影。戰爭結束後，在上海製作《一江春水向東流》。中華人民共和國建立後，歷任中國人民政治協商會議第一屆全體會議代表，第一、二、三屆全國人大代表，於1698年文化大革命期間去世。

6月14號，美國醫生寧亨利喺北平西部被河北宛平土匪孫老四、侯文明、盧茂林等劫殺身亡。案發之後，美國駐天津領事去到北平，等候破案，河北省主席于學忠（1890-1964）急令偵緝隊限期偵破。18號，世界紅十字會中國分會發起響北平南河沿岸舉行追悼大會，並且將寧亨利葬於通縣。7月19號，主犯孫老四等人喺房山被捕獲，數名犯人於7月30號被判處死刑，8月14號被槍決。打劫殺人都要睇目標架！

6月16號，山東威海衛、鹿道口等地發生群眾搶鹽風潮，一共搶走鹽30000幾擔，有乜咁好笑？好奇咩？我記得香港十幾年前都曾經試過盲搶鹽，去年試過搶口罩，早排市民驚封城強檢，超級市場乜都搶X曬，無需要奇怪。但係又係咪中國人特別鍾意搶嘢？答案係唔係，全世界都有依種搶貨現象，「未雨綢繆」、「戒慎恐懼」、「君子不立危牆之下」 係傳統美德，其實又係冇錯嘅。8月16號，國民政府規定每年8月27號為孔子誕辰紀念日，孔子再一次被搬返出嚟供奉，五四時代新文化運動人人批孔批儒，儒家哲學係前朝垃圾，係阿婆條紮腳布，係中國積弱百年嘅元兇，要掟入屎坑，20年後人事幾番新，秩序感強烈嘅儒家哲學又被搬返出嚟上神檯，大概要配合蔣Sir「新生活運動」，人民要重新講道德講禮儀講文化。之後嘅不久，孔孟儒家哲學又會再一次被徹底摒棄，過咗好多好多年之後，儒家哲學又會被捧返出嚟，拯救人民嘅道德滑坡情況，如此不斷永劫回歸中。

要建立一個社會，除咗威權制度法律之外，必須有道德律存在，人倫秩序先可以建立起嚟，但係所謂道德律究竟係乜嘢呢？摩西帶領以色列人出埃及分開紅海後，行雷閃電中向子民宣示十戒，十戒就係道德律。十戒來自上帝耶和華嘅神啟，至高無上兼形而上。但中國本身冇耶和華，遠古嘅神盤古女媧玩神怪冇道德神啟留低，祇有春秋戰國時代嘅孔子孟子有，但孔子孟子是凡人，是形而下，大概問題喺依度。或者古代中國人實在太聰明，早就明白形而上嘅嘢都係作嘅吹嘅，都係靠唔住掛。

6月17號，日本東亞興業公司喺熱河開魯、科爾沁旗一帶開始實行武裝殖民。同日，英商太古公司「順天輪」 喺黃河口被洗劫，6名外國人被綁架，真係神州大地土匪處處。6月18號，又閻錫山揸旗嘅山西太原市學生舉行反對會考遊行示威，仲與警察發生衝突。吓？可以反對考試嘅咩？真係不羈放縱愛自由，睇波不賭波，睇來幹什麼？讀書不考試，讀來幹什麼？6月20號，由軍閥唐繼堯（1883-1927）創辦嘅大陸大學，改名為省立雲南大學。6月23號，蔣Sir坐鎮嘅南昌行營通令豫、鄂、皖、贛等省，6年內禁絕鴉片，禁煙都講咗幾十年，但係一直冇辦法禁晒。的而且確，響不久嘅將來，最後鴉片係被撤底禁絕了，今日應該冇乜人食鴉片，不過食咗第二啲嘢啫。

6月24號，因為剿共戰爭進入高峰期，中共蘇維埃中央政府遷移自福建寧化。6月27號，日軍喺上海虹口區無故毆打並且侮辱、拘捕平民百姓。6月29號，東方旅行社喺山海關成立，6月30號，國民政府公佈《修正海關進口稅則》。今個月，珠海遊擊隊改編成東北抗日遊擊隊哈東支隊，由共產黨人趙尚志（1908-1942）任支隊司令，李兆麟（1910-1946）任政治部主任，繼續抗日！

1934年6月於焉結束。

#常威 #蔣介石平反系列  #中日戰爭 #民國歷史 #佛經抄寫員

【常公子歷史頻道466回：黃金十年系列之 兇手是誰 】

♊ 今集繼續分析國民黨左派大將廖仲凱被刺案詳情，孫文嘅「聯俄容共」政策，得到第三國際全力支援，終極翻盤，北伐反擊中原成功，為南方國民黨政權奠下百年基石，可惜出師未捷身先死，孫文1925年早亡，如果孫文死遲十年，整個中國近代史可能已經有完全另一個面貌出現。孫文去後，國民黨利用第三國際嘅人力物力支持，打贏北伐戰爭，塵埃落定，就出現左右之爭，左派大員廖仲愷被刺，兇手直指右派大員胡漢文，胡漢民因此被放逐一段時間，之後先回歸權力中心，但已不復當年之勇，都無法與蔣介石和汪精衛相比較。

♐ 左右之爭，即信奉資本主義和共產主義之意識形態之爭，塑做了整個世界20世紀的基本面貌，到咗今時今日，就算中美關係、俄羅斯入侵烏克蘭之戰，其實都係冷戰時代左右意識形態之爭留下嚟嘅產物，當然中國及俄羅斯亦都唔係行緊共產主義了，左右意識形態之爭，經過近100年變化，早已經完全變質，不過基本格局，仍然係二元二分法，非左即右，非左即右，這種意識形態嘅左右區別，早已經烙印喺每個人嘅心中，相信未來50-100年，都好難有所改變。

♊ 最近法國大選，就有輿論指出，左右之爭已經過時，目前係「國家主義」同「全球主義」之爭，由「質變之爭」演化為「量變之爭」，用佛家語言，即係「獨善其身」比較好？還是「普度眾生」比較好？亦即係「小乘」和「大乘」之辯。並非質的問題，而是量的問題。經過四五十年嘅全球化，人口龐大及天然資源豐富嘅大國佔盡優勢，中型國家逐漸失去基本議價能力，其中以英、法、德、日呢幾個「強國」為甚，加上中國嘅強大崛起，整個世界嘅基本格局，需要一個全新嘅秩序、或一個全新嘅說法去平衡每股勢力，左右之爭，的確已經過時。

🎦https://youtu.be/gXpv2YIm9wg

［常威近代史］第六百七十三回 儒家哲學永劫回歸（高清錄音版）

#唔鍾意睇字可以聽

https://fb.watch/crkB3FF4gO/