【常威近代史】（七百八十六回）
制裁如果有用？
1938年9月16號，左派歷史學家家郭沫若（1892-1978）率領武漢各界慰勞前線抗敵將時委員會代表團，前赴前線慰勞軍隊。郭沫若係一個頗受爭議嘅人物，不過都係左右嘅問題，姑勿論如何，郭沫若一生著述頗豐，著作等身，主編《中國史稿》同《甲骨文合集》，全部作品編成《郭沫若全集》38卷。佢亦係中國新詩奠基人之一、中國歷史劇開創者同奠基人之一、中國唯物史觀史學先鋒、甲骨學四堂之一、第一屆中央研究院院士。1949年以後，曾任中國科學院首任院長、中央人民政府政務院副總理兼文化教育委員會主任、全國人大常委會副委員長、中國文聯首任主席、中國科學技術大學首任校長，取得巨大學術成就。
9月17號，日軍進犯大別山，國民黨中央社會部通告全國國文化團體，每隔半年需向當地國民黨黨部報告會務，否則即以停止活動論，好明顯又係一個反共嘅問題，當時民間嘅文化團體，邊個唔傾左呢？9月19號，國際聯盟電請日本政府接受國聯裁判，當然係關於日本對中國發動戰爭嘅問題，不過日本似乎睬你都生臭狐，佢哋已經退出國際聯盟，唔接受國際條約嘅監管，咁點解要接受你嘅裁判呢？真係問嚟都多嚿魚。不過外交辭令嘅嘢，講咗好過無講，好多時候講咗就都等於做咗，你亦唔好怪人，人之常情，做人，唔通吓吓堅砌咩？
9月22號，偽「臨時政府」同偽「維新政府」，正式向北平成立「聯合委員會」，並且發表宣言。8月23號，八路軍開始反擊進犯五台山嘅日軍；8月25號，經濟部同西康省合作籌備開發西康金礦。8月27號，日本五相會議決定設立對華中央機關，畢竟眨下眼只係區區一年之間，日本已經佔領中華民國半壁江山，都係要諗諗之後點搞？長期派兵去打去守始終唔係路。你睇吓21世紀美國從伊拉克、阿富汗撤軍，你就會明白當中嘅道理。9月28號，日本戰機首次襲擊昆明，零式戰鬥機飛到去四川雲南，仲被擊落3架添！9月29號，毛澤東致函蔣介石，表示團結退敵。