大清亡國關慈禧蛋牛治 3

【常威近代史】（六百二十回）
打完日本人打自己人

1932年5月22號，《獨立評論》週刊創刊，中華民國第一號知識份子胡適為總編輯。同日，上海有3500名郵工舉行罷工，抗議交通部駁回佢哋郵政改革嘅意見。上個月，交通部決定加郵費，引起各界反對，上海郵務工會提出歸拼匯業局、維持舊郵費、停止郵航津貼、改善郵務管理四項建議，但遭到上頭駁回，你話點就點呀？老幾呀？5月24號，北平、天津、濟南等地方嘅郵政員工亦響應罷工，其後經過上海市長吳鐵城（1888-1953），實業部部長陳公博（1892-1946）等人嘅調解，26號勞資雙方達成調解方案，同意由地方各界接受郵工嘅建議而向政府請願，當日，郵工相繼復工，件事解決咗未？唔知喎，總之你開工派信，唔好罷工就得啦。

5月23號，軍事委員會命令19路軍調往福建（閩）剿共，啱啱打完日本人，就要打自己人，5月31號任蔣光鼐（1888-1967）為福建綏靖公署主任； 5月24號，蔣Sir就任鄂、豫、皖剿共總司令，李濟琛（1885-1959）任副總司令。劇透畀大家知，大名鼎鼎抗日名將蔣光鼐於一年後會發動一場「閩變」，建立新政權，否定埋蔣Sir南京中央，真係大膽！同日，因淞滬戰爭而中斷四個月嘅京滬線恢復通車。

5月25號，南京各學校抗日會舉行慰勞抗日將士大會，5月28號，淞滬戰爭陣亡將士追掉大會喺蘇州舉行，有幾萬人參加公祭，悼念響戰爭中壯烈犧牲嘅軍民。經過918事變，加埋松滬戰爭，中日雙方嘅仇恨已經到達不能回頭嘅地步，講句公道說話，邊個啱？邊個唔啱？相信大家都心知肚明，雖然話凡事都係觀點與角度與立場嘅問題，但係中日之間嘅仇恨，就唔係咁「中性」，我仲記得，1895年甲午戰爭爆發，就發生咗一場「旅順大屠殺」，外媒可以做証，日本兵響旅順殺咗唔少中國平民，屌佢老母，你又唔見1905年打完日俄戰爭，日本人去屠殺俄國人？我都唔知點解日本人咁憎中國人？可能佢哋覺得大和民族一直被中國明、清兩朝騎住掛？從明治維新到大正年間，日本人民智開啟，其實都相當文明，絕對唔係土著野蠻人，但係唔知點解，中國人就踩親佢條尾，總係冇面畀，又係嗰句，可能大家似樣啩？咁高咁大啩？可能大家住得近啩？你老母我真係唔知道。

5月30號，日本轟炸機瘋狂轟炸海倫，全城起火。5月31號，馬佔山喺海倫召開軍事會議，改編各路義勇軍繼續抗日，佢自己擔任總指揮； 5月31號，日本侵略上海陸軍全部撤退。

❤【常威近代史】第一部《大清亡國關慈禧蛋牛治》，全面開放，免費下載， #freedownload！

Free下載連結🔽

https://play.google.com/store/books/details?id=C3hjDwAAQBAJ

［常威近代史］第六百二十回 打完日本人打自己人（高清錄音版）

#唔鍾意睇字可以聽

https://fb.watch/9IgobjYoQ5/

【常威近代史】（六百二十一回）
攘外必先安內

1932年6月7號，英文《時事日報》 響北平創刊，應該係中國人第一張辦嘅英文報紙，當然過去嘅日子上海出版嘅英文報紙應該都有中國人參與。6月10號，中國左翼作家聯盟嘅機關刊物《文學月報》 亦喺上海創刊，由姚蓬子做主編，姚蓬子（1905－1969），原名方仁，字裸人，後改名杉尊，筆名丁愛、小瑩、姚夢生、夢業、慕容梓，中國文學家、翻譯家、詩人，著名嘅左派文人，不過，大家唔識姚蓬子唔緊要，但一定要識佢個仔，因為姚蓬子個仔就係鼎鼎大名嘅姚文元（1931-2005），四人幫成員之一，亦係四人幫文膽，一篇寫於1965年11月10日響上海《文匯報》上發表嘅《評新編歷史劇〈海瑞罷官〉》，掀起了一場浩浩蕩蕩嘅文化大革命。講真，我唔肯定，但係以一篇文章嘅威力或一篇文章所帶嚟嘅後果嚟講，姚文元嘅《評新編歷史劇〈海瑞罷官〉》 一定位列歷史上三甲位置之一！姚蓬子係左翼作家嘅開山鼻祖之一，而姚文元繼承父業，將左派文章嘅威力發展到淋漓盡致嘅層次，真正虎父無犬子！

《文學月報》 主要刊登論文、創作、翻譯小說、詩歌、戲劇、書評、文藝情報及通訊等等。先後刊登魯迅嘅《論翻譯》、《辱駡和恐懼決不是戰鬥》 等重要文章及翻譯小說，另外田漢（1898-1968，國歌《義勇軍進行曲》作者）、丁玲（1804-1986，著名作品有長篇小說《太陽照在桑乾河上》）、沈端先（夏衍，1900-1995，代表作品有《法西斯細菌》），周起應（周揚，1907-1989，，歷任中國社會科學院副院長，中國文聯主席、黨組書記，中宣部副部長，中紀委常委等要職） 等等重要左翼文人也經常喺該刊上發表作品，《文學月報》 一共出版咗六期，1932年12月15號被國民政府查封。

6月11號，教育部訓令停辦國立勞動大學，有左便打！6月12號，江蘇省主席顧祝同（1893-1987）既全體委員因財政困難向行政院請求辭職，江南江蘇省，一直都係南方富庶嘅地區（到咗今日都係，江蘇省會就係杭州），當時，江蘇省都話財政困難，其他貧窮落後地區只會慘不忍睹。6月14號，國立翻譯館成立。

6月15號，滿洲國中央銀行（簡稱滿銀）正式成立，建立政權之後，最重要嘅事，就係建立中央銀行，開動印刷機印銀紙！滿洲中央銀行建立後，隨即宣佈統一貨幣，發行紙幣二億元以取代其它一切通貨，滿洲國鈔票每元價值定為純銀23.91克，即係搞銀本位。滿洲國中央銀行，係以沒收原本遼寧、吉林、黑龍江三省官銀號，同埋東北各地中國銀行分行嘅一部份財物為資本所建立（即係搶），日本嘅三井、三菱財閥，亦都通過朝鮮銀行提供部份分期貸款2000萬元，作為「滿銀」發行貨幣嘅資本。「滿銀」 由日本副總裁山成橋六全權掌握（咁樣講，總裁神主牌應該係滿洲人），「滿銀」各個重要職位及分行經理，多半由日本嘅朝鮮、金正兩間銀行同「滿鐵」嘅人員充任，其實係一間百分百嘅日本人銀行，同滿洲人應該冇乜關係。而滿州人嘅滿洲國嘅中央銀行，係一間日本銀行？所以應該稱呼為偽滿洲中央銀行（簡稱「偽滿銀」），而滿洲國亦被稱呼為偽滿洲國，就係咁解。

同日，由行政院院長汪精衞同埋軍事委員會委員長蔣介石召集嘅「剿其」會議喺廬山舉行，「不識廬山真面目，只緣身在此山中」嘅廬山，之後仲有1959年批鬥彭德懷嘅「廬山會議」，當然仲有盧山礦泉水。湖南、湖北、安徽、江西、河南等省負責剿共嘅行政首長，包括何應欽（11890-1987）、熊式輝（1893-1974）、何鍵（1887-1956）、劉鎮華（1883-1955）、夏斗寅（1885-1951）、錢大鈞（1893-1982）等人均有出席，大家坐埋一齊，傾點樣剿共？其中蔣Sir 響會議上宣佈著名語句「攘外必先安內」，消滅中共係目前首要任務，順次序，打中共重要過打日本仔。早響上年11月30號，蔣Sir 喺顧維鈞（1888-1985）就任外交部長嘅宣誓會上，就發表講話，佢當時咁講：「攘外必先安內，統一方能禦侮，未有國不統一而能取勝於外者！」 1932年12月14號，蔣Sir 再響國民政府內政會議上再次申述依一個重要政策，「攘外必先安內，是古來建業者的信條，如果內部不能安定，不但不能抵禦外悔，而且是誘至外海之源」；1934年12月，蔣Sir要求之下，「攘外必先安內」被寫入咗《國民黨四屆五中全會宣言》之內。

一句到尾，殲滅中共先係最重要，日本人同滿洲國都要企埋一邊，毛澤東《矛盾論》講過，矛盾中有小矛盾，小矛盾中有更小嘅矛盾，到處都充滿矛盾，但最重要嘅係，要抓住最重要嘅矛盾去解決。響蔣Sir心目中，最主要嘅矛盾，就係國民黨（或佢自己） 同中共之間嘅矛盾，中華民國同日本嘅矛盾，都只係次要角色。當然大家都明白，呢個只係蔣Sir 一廂情願嘅諗法，廣大中華民國國民，應該都係認為主要矛盾喺中華民國同日本嘅矛盾，不過廣大國民嘅意見，冇乜實質作為； 最重要嘅係，同蔣Sir 咁高咁大嘅張學良，心裡面都唔認為最大嘅敵人係中共……（於是乎就有西安事變了）

#常威💀 #蔣介石平反系列 #中日戰爭 #民國歷史 #佛經抄寫員

［常威近代史］第六百二十一回 攘外必先安內（高清錄音版）

#唔鍾意睇字可以聽

https://fb.watch/9L58obUiBx/

【常威近代史】（六百二十二回）
抄寫佛經工作繼續進行

1932年6月17號，國民政府行政院及外交部分別發表宣言，唔承認偽滿洲國，其實亦都冇得承認，去到最後亦都唔承認！同日，鄂、豫、皖、贛、湘五省民政建設會議開幕。6月18號，內政、軍政、教育三部為咗保護孔廟，通知各省政府禁止軍隊駐紮其中，講心嗰句，軍隊駐紮喺邊度，亦即係代表有事會發生，例如有隊軍隊要入你條村度駐紮幾日，如果你醒目嘅話，就最好收埋啲錢同黃金白銀勒。6月19號，河南澠池縣降雹兩小時，冰雹好似手掌咁大，當場打死200幾人？相當得人驚。6月20號，由涇河引水溉田嘅陝西渭北涇惠渠落成放水，今日舉行開幕典禮，俓惠渠由1922年便開始籌建，當時水利工程師李義祉籌劃據舊渠引涇水灌田，得到華洋義振會嘅援助。1930年決議修築，同年冬天開工，耗資110萬元，涇惠渠完工之後，可以灌溉農田100萬畝，全區收入每年可增加1000萬元，令到過百萬名農民免受天旱之苦。水利工程，對望天打卦嘅農民嚟講，絕對係大福利。

6月23號，內政部以偽滿洲國偽中央銀行發行紙幣二億元，呈請行政院出謀應付方法，其實相當大件事，喺中華民國旁邊有個新政權建立，仲印銀紙，更可怕嘅係，偽滿洲國印出嚟嘅銀紙，因為有日本做backup，可能信用仲強過國民政府嘅紙幣，國民政府唔腳震有鬼。？偽還偽，講到錢，好多人唔會理咁多嘢。正如今時今日，無論你點唔鍾意美國都好，永遠都係揸美金、買美債穩陣。

6月26日，內政部命令各省市縣組織古物保管會；同日錢塘江水大脹，杭州、海寧、蕭山一帶緣江灘地塌陷三萬餘畝。6月27號，上海《時報》 發行第一萬號，即係出咗27年多小小，頭版以三色版套印，亦係亞洲報紙第一次以三色套印，即係有三種顏色，當時的確破天荒，今日當然水X皮。6月28號，蔣Sir抵達漢口，成立鄂、豫、皖三省剿匪總司令部，乜都唔好理住，第一優先，就係要徹底打巢中共，蔣Sir 畢竟都係聰明人，非常明白中共為佢帶嚟嘅威脅係最大，甚至大過日本人多多聲，事後證明，蔣Sir 可以打敗日本人，但係佢自己則被中共打敗著草臺灣，佢嘅預感可説非常靈驗。

6月29號，行政院為中央大學代理校長段錫朋（1896-1948）被學生打傷事件，下令中央大學除咗喺上海設立嘅商學院、醫學院兩院之外，立刻暫行解散，聽後徹底整理。今年初，國民政府任命任鴻雋（1886-1961） 為中央大學校長，但係因為學校經費無著落而請辭唔做，中央大喺今個月發起經費獨立運動聯席會議，推定代表向國民政府請願。28號，行政院任段錫朋暫代中大校長（唔係中文大學），但係段校長到學校時俾學生拒絕並且毆打，真係咁都得？7月2號，教育部派員接收中央大學，炒哂啲講師，勒令學生3日內離校，既然大家咁好玩，不如就反枱唔好玩嚕。

6月30號，實業部主辦官商合辦嘅中國建設銀行，即係今日建行嘅前身，總股本為1000萬，官股400萬，商股600萬。

去到1932年7月，全國發生霍亂瘟疫，繼5月上海、南京開始發現霍亂流行之後，長江一帶各省及河南、陝西、綏遠等地亦都相繼傳出疫情報告，霍亂所蔓延嘅地域，幾乎遍及全國。根據當時衞生署嘅報告，各地霍亂菌毒力極強，以上海為最輕，南京就強其10倍，杭州就強20倍，咁奇怪嘅？疫情亦各處唔同，其中以長江流嘅最為嚴重，鄱陽地區截至上月中為止，已經有千幾人死亡，並且出現棺材被搶購一空嘅慘狀。霍亂最先喺上海南京開始擴散，衞生署曾經聯合首都警察廳等機關，採取防疫措施預防霍亂流行，不過病毒傳播速度之快、範圍之廣，亦係冇人能能夠估算得到。國民政府命令衛生處及救濟水災委員會推行大規模預防注射，打疫苗先，仲要係消毒工作，並且喺疫區設置臨時醫院遏止疫情進一步擴大。瘟疫有幾大破壞力？相信大家已經一清二楚。到目前為止，新型冠狀病毒Covid-19 已經施虐全球，踏入第三年，而且仲未有平息跡象，連Bill Gate話2022年會搞得掂，都完全估錯曬，如果再搞多一兩年，再多幾隻變種病毒株出現，大家繼續封關，我幾乎可以肯定，一定會有戰爭發生。

7月7號，南天王陳濟棠（1890-1954）同陳策（1894-1949）部隊混戰，陳濟棠命令空軍炸沉「飛鷹號」後，第二日戰爭結束。陳策，字籌碩，廣東文昌人，中華民國海軍上將，中華民國國民革命軍海軍第四艦隊名將，有「獨腳將軍」之稱。曾協助孫中山響廣州對抗陳炯明。日軍攻陷香港時，陳策帶領數十名英軍成功突圍，獲英皇頒授大英帝國爵級司令勳章（KBE）。

同一日，留學日本嘅女學生陶慰遜，響日本取得博士學位，亦係中國第一位有記載嘅女性獲得博士學位。中國女性，一直缺乏接受教育機會，1908年，清帝國喺北京成立女子師範學堂，算係中國女性邁向高等教育嘅第一步； 去到1920年，先有第一位女性踏足北大，1932年今日，終於有第一位中國女性得到博士學位PHD，事實上亦都係一個非常重要里程碑。今日香港，女性讀書嘅成就比男性更高，重要大學裡面嘅碩士生博士生，或者醫院嘅醫生，都係女性比例較高，十年河東，十年河西。

最後，希望養父喺天上繼續跑馬，而我喺人間繼續抄寫佛經。

#常威💀 #蔣介石平反系列 #中日戰爭 #民國歷史 #佛經抄寫員

【常公子歷史頻道434回：替大軍閥平反系列之 中國國民黨第一次全國代表大會】

♊ 我親愛的養父，剛剛在星期三12月8日中午12:20離世，想寫小小文字紀念他，我有兩個父親，分別是親生父親和養大我的養父，他們先後在今年前後腳離開。養父三年前左右，颶風山竹到訪期間摔倒，之後被證實患上腦退化症，身體狀態一天一天變差，機能急劇退化，最近年多時間，他一直躺在安老院床上，語言能力也消失，但他永遠都認得我，有時候，我感覺他是在受苦。離開，也許是一種解脫，對他來說，也絕對是好事。因此我也沒有太大的悲傷，養父吸最後一口氣的時候，我在他身旁，牽著他的手，陪伴他走最後一程，上路離開凡塵俗世，這是上天給我最大的福氣，我非常感恩。

♈ 養父是一個簡單的人，人人稱他叫「肥佬」，籍貫廣東高明，是廣東那些坦率直接的大老粗，年幼讀過幾年私墊，基本上只懂得看報紙睇馬經，喜歡飲孖蒸食煙賭馬飲鴛鴦，他對生活沒有太大的奢求，天生天養，退休前幹的都是體力勞動的粗工，據我所知，收養我之前，他有一個兒子，但未及歲滿因腸病離世，之後他和養母就收養了我，視我為己出，盡了他們的能力把我養大。我記得，我小學時候不懂英文發音，他就把英文生字帶回去問他的同事，然後再用廣東話寫下拚音教我，例如「Panda」，他會寫下「賓打」回來教我； 中二哪一年，養父看見我看金庸小說，於是乎他把一套套「笑傲江湖」、「天龍八部」、「鹿鼎記」…… 買回來給我看，我對寫小說發生興趣，也是由那個時候開始的。還有，我第一個50米直池，是他背著我游的，我喜歡游水，也是因為養父的緣故。

♊ 在我青少年時代，大概十五、六歲，我有一段時間很不喜歡養父養母，因爲我覺得他們很窮，又沒有文化沒有品味，我羡慕別人擁有的好生活及好的物質條件，而我自己則什麼都沒有，窮得連讀書的書檯都沒有一張，要住步上十層樓梯的天臺鉄皮屋，爛身爛世，連去髮型屋剪個Matchy頭也沒有錢……我為那段日子對養父養母的冷淡感覺終生羞愧，其實我，並非什麼都沒有，我早就擁有了一切，而且擁有比我應得擁有的更多，只是少不更事不知足，當年不明白，到長大了，看了孔孟聖賢書，才明白人生的真締。後來他們老了，我也盡力照顧他們，但，我又給過他們什麼呢？唯有「盡力」二字而已。

⛎ 樹欲靜而風不息，子欲養而親不在。原來那才是人生最大的遺憾……

🎦https://youtu.be/VhxrCt0EzQ0

［常威近代史］第六百二十二回 抄寫佛經工作繼續進行（高清錄音版）

#唔鍾意睇字可以聽

https://fb.watch/9RfVfefdmU/

7月24號，日本喺長春設立大同學院，是日舉行開學典禮。7月25號，偽滿洲國成立協和會，溥儀任名譽總裁。溥儀喺呢段時間應該幾開心，雖然佢喺回憶裡面寫，其實呢一段時間佢成日心驚膽跳，因為不斷俾日本人脅持做事，不過真相究竟係唔係咁呢？當然佢話係咁，我哋就要相信係咁，畢竟個人主觀感受有時候好難憑客觀事實去判別真偽。同日，利用科學研究嘅結果去開發西北嘅學術團體，西北問題研究會喺上海成立。7月26號，許笑影等人率領華僑義勇軍緬甸部隊130幾人，由南京出發前往東北參加抗日工作。7月27號，國民黨中正會決定設立懲戒委員會，專門審理政務官懲戒案件，即係成立特別處理公務員嘅法庭；同日，馬占山部隊800幾人喺安固鎮附近畀日軍伏擊，大部分官兵壯烈犧牲。同一日，上海青年愛國組織「血魂鋤奸團」警告上海商人，邊個再賣日本貨，必殺無赦！7月28號，該愛國組織向販賣日本煤炭嘅胡永昌煤號投擲炸彈，真係幾得人驚。7月尾，國民政府下令禁止《生活》週刋響豫、鄂、贛、皖等省份郵遞。

1932年7月，仲有一件大事件發生，就係還珠樓主（1902-1961）首部武俠小說《蜀山劍俠傳》問世，即刻引起哄動，還珠樓主，原名李善基，後名李壽民、李紅，四川長壽人，中國武俠小說與神魔小說作家，被譽為「現代武俠小說之王」。佢係民國初期著名嘅舊派武俠小說宗師，一生人寫個40部小說，總字數超過1700萬字。還珠樓主嘅作品可以分為兩大類，一類以《蜀山劍俠傳》、《青城十九俠》為代表，描寫出世仙俠誅滅妖邪、抵禦天劫；另一類以《雲海爭奇記》、《兵書峽》為代表，描寫入世武俠反抗外來侵略、拯救黎民百姓嘅武俠故事，佢嘅作品，當時被譽為「開中國小說界千古未有之奇觀」，相當巴閉！佢係中國仙俠武俠小說嘅開山鼻祖，地位無可代替。之後擁有佢相同成就嘅中國武俠小說作家，大概只有金庸一人。

還珠樓主同其他四位新派武俠小說家，合稱「北派五大家」，佢哋當時主要係生活喺北方，以天津作為創作中心，五人開創咗中國三、四十年代嘅新派武俠小說創作潮流，以新思想、新觀念同新文學技巧來界定新舊武俠小説，主要係白話文同半文言文嘅分別，其餘四位武俠小說作家，分別為宮白羽(白羽，1899-1966)、王度廬（1909-1977）、鄭證因（1900-1960）同朱貞木。

#常威💀 #蔣介石平反系列 #中日戰爭 #民國歷史 #佛經抄寫員

❤【常威近代史】第一部《大清亡國關慈禧蛋牛治》，全面開放，免費下載， #freedownload！

Free下載連結🔽

https://play.google.com/store/books/details?id=C3hjDwAAQBAJ

［常威近代史］第六百二十三回 還珠樓主蜀山劍俠傳（高清錄音版）

#唔鍾意睇字可以聽

https://fb.watch/9Ud1aIqdkR/

【常威近代史】（六百二十四回）
民間武裝力量問題

1932年8月1號， 英國、美國、意大利三個國家同意中國停止繳付庚子賠款一年，荷蘭更答允將庚子賠款完全退還，見你咁窮，幫吓你手，反正夾硬要你還，你都冇得還。呢個世界上，債仔同債主嘅關係好得意，有借有還固然係好，但係世界艱難，好多時候，逼死個債仔冇卵用，債仔死咗，條數都係歸零，債主亦冇好處，反而幫個債仔翻身，等佢繼續還錢，先係上策。所以有陣時你見到，有啲債仔爭人好多錢，反而身光頸靚，全因為債主全力保住佢條命，仲會投資響佢身上，希望佢可以翻身還債。所以條數一定要夠大，三兩球當然追到你瘦追到你賣樓，但爭人三兩億，你就成為了寶貝，呢個邏輯，有好多人唔明白，亦即係「大到不能倒」嘅道理，「大」，係條數夠大。

8月1號，年初響松滬戰爭中被日軍炸毀嘅上海商務印書館今日復業。商務印書館，創辦於1897年，經夏瑞芳（1871-1914）、張元濟（1867-1959）等人嘅努力經營，已經成為國內出版界嘅巨頭，附設有東方圖書館同涵芬樓。前者藏書達到50萬冊，圖片、照片5000餘種，地方誌收藏之富居全國之冠； 後者涵芬樓係收藏善本書嘅專用書庫，不過兩個書庳均在淞滬戰爭中被焚燬，文化遺產損失慘重。

請大家課金支持💪💪

❤【常威近代史】第四部《霹靂大忠臣對決無敵大買辦》Round One
https://play.google.com/store/books/details?id=Np3PDwAAQBAJ

【常公子歷史頻道434回：替大軍閥平反系列之 列寧生命最後一年（上）】

♊ 弗拉迪米爾·伊里奇·烏里揚諾夫，通稱列寧，馬克思主義者，俄羅斯共產主義革命家、政治家和政治哲學理論家，死終1924年1月21日，死的時候祇有53歲，以現世的角度，相當年輕，這兩集youtube，我會和大家講講列寧死前一年所發生嘅事，列寧嘅死因，主要係因為之前被行刺中槍，子彈留喺身體裡面，之後身體急速惡化，接二連三中風，但係佢並冇放棄佢嘅事業，響最後一年苟延殘存嘅生命裡，佢仍然發光發熱，努力維持住世界上第一個共產主義國家嘅生命廷續……

⛎列寧齡係一個偉大嘅人物，有人講，世界上除咗耶穌基督之外，最多人認識嘅人就係列寧，如果當時有FB或intragram，列寧嘅followers，可能會超過一億人以上。列寧一手將馬克思同恩格斯嘅共產主義理論變成真實，十月革命後成立世界上第一個共產主義國家，當然有好多人認為佢係十惡不赦，千古罪人，但無論如何，佢都改變咗20世紀嘅歷史，佢嘅影響力，亦都蔓延到今時今日。20世紀嘅東西冷戰，到今日21世紀嘅中美冷戰，世界上兩大意識形態嘅區分同對立，一切亦都係由列寧而開始。列寧同托洛斯基都係國際主義嘅擁護者，佢哋希望解放全世界嘅無產階級，推翻萬惡嘅資本主義生產制度，建立一個美好嘅世界，讓人人平等，再無階級。當然景願係美好嘅，做唔做到又係另一回事。

♏ 我發現最近十幾二十年，列寧鮮有人提及，畢竟都係過去式。新世界似乎唔需要再認識共產主義之父列寧係邊個？亦無需要知道佢做過乜嘢？認識列寧、或認識列寧生命中最後一年做過乜嘢？可能根本毫無意義可言，或者只係純粹動物生態奇觀畫面？的而且確係咁，世界已經行得太快，昨日嘅事情一夜之間會變得毫無意義，不過無論點都好，發生咗嘅事永遠都唔會改變，而人類係永遠活喺歷史之中，永遠會被過去所糾纏不休……

🎦https://youtu.be/4UCkvOmCXTA

［常威近代史］第六百二十四回 民間武裝力量問題（高清錄音版）

#唔鍾意睇字可以聽

https://fb.watch/9WQJWyVQqf/

【常威近代史】（六百二十五回）
馬家軍領袖馬福祥之死

1932年8月15號，陝西實業考察團分南北兩組出發考察，其實大家都明白，中國好大，其實一定蘊含非常豐厚嘅天然資源，衹要能夠有效動用到呢啲資源，國家一定能夠富強起來，不過當時中國係由零開始，距離擺脱貧窮，仲有一段相當長嘅時間，不過如果1932年去當時問中國人，如果中國真正要擺脱落後貧困情況，需要多一個世紀時間，應該冇人會相信，明明推翻咗滿清王朝，唔係一切都會更加美好嘅咩？正如1991年蘇聯解體，唔係一切都會更美好嘅咩？唔係嘅咩？

8月16號，全國體育會議喺南京召開，會議通過《 國民體育實施方案》，推廣體育活動；同一日，國民政府同意張學良辭去北京綏靖主任一職； 蘇北、魯南發生蝗災，農民損失慘重；同日，中央銀行匯兌局喺上海成立。8月17號，國民黨中正會撤改北平綏靖公署為軍事委員會北平分會，蔣Sir為委員長，情況亦都好簡單，進一步加強全國軍隊中央化，蔣Sir當然係想咁做，不過蔣Sir要控制所有隸屬不同派系嘅軍人，相信係1949年去到臺灣之後先可以做得到。

8月19號，大家仲記唔記得全國霍亂流行，一代軍頭馬家軍領袖馬福祥（1876-1932）因為染上霍亂死於送往醫院嘅途中。馬福祥一直喺西北回族軍閥嘅政治首領，馬福祥係馬家軍始祖馬千齡（1826-1910）個仔，14歲習武，行武將路線，一生一帆風順，辛亥革命前，已經係清帝國嘅西北回族領袖，辛亥革命發生，佢採取旁觀態度，由「清朝元老」一變為「地方軍閥」，起初依附袁世凱，後嚟又依附西北軍閥馮玉祥，最後又當然效忠蔣Sir，總是風向邊邊擺邊邊，北伐之後，馬福祥成為國民黨政客。今年夏天，馬福祥往返於南京、漢口、信陽之間，極力遊說蔣Sir對佢個仔馬鴻逵（外號寧夏王，1892-1970）「剿匪不力」嘅印象，佢真係好錫自己個仔，只可惜，啱啱碰上剛剛，感染疫情，就咁釘蓋，享年五十有五。

補充小小佢個仔寧夏王馬鴻逵，老竇死咗之後，馬鴻逵大權在握，領導馬家軍繼續幫手剿共同打抗日戰爭，抗日戰爭完結，國共內戰爆發，一代名將彭德懷率領紅軍打到去大西北新疆，馬家軍被彭大將軍連根拔起，對西北戰事挫敗嘅責任，由當時嘅甘肅省政府主席馬鴻逵一手承擔，1949年，本來馬鴻逵係要同蔣Sir一齊撤退去臺灣，不過佢似乎睇穿一啲嘢，詐詐諦話四姨太有病，要去香港探佢，於是乎一個屈尾十就響啟德飛機場上機飛咗去美國，先到舊金山，然後定居全美國最好住嘅城市洛杉磯，仲開咗個牧場養馬維生，優優悠悠舒舒服服活到終老，馬鴻逵一生並無申請成為美國公民，當然佢嘅後代就全部都係美國人，應該亦都唔識講中文勒。

8月19號，江蘇省高等法院以危害民國罪名，判處牛蘭及其夫人無期徒刑，牛蘭唔係牛欄牌奶粉，牛蘭（Hilaire Noulens，1894-1963），原籍波蘭嘅牛蘭夫婦，係1930年被派到泛太平洋產業同盟上海辦事處任職，但係佢兩夫婦有另一重身份，就係共產國際遠東局秘書，共產國際國際聯絡部在上海嘅秘密交通站負責人，負責轉送各種文件和經費等。1931年6月15號被上海公共租界當局拘捕並且引導到南京受審，牛蘭夫婦三度絕食，並無吐出真相。國母馬克思主義者宋慶齡、社會運動家、著名經濟學家楊杏佛（1893-1933）等人專門組織咗營救委員會，為牛蘭夫婦而奔走，並且曾經一度將其保釋出外就醫，不過牛蘭夫婦始終因為政治理由被判終身監禁，直至抗戰爆發後，先被釋放出獄。

1932年8月20號，立法院通過《森林法》，保育中華民國森林資源； 8月22號，蔣Sir推行保甲制，一人犯錯，全村有罪，大家齊齊連坐。8月23號，繼中國化學學會後，中國物理學會亦在北平成立，科學家李書華（1890-1979）任會長。8月25號，美國銀行團到達偽滿洲國瀋陽，稱呼此行係「進行投資調查」，雖然話唔承認你滿洲國嘅國際地位啫，但係一樣可以投資，一樣可以做生意，一樣可以搵錢，搵食大曬架！

8月26號，山西水災之後霍亂蔓延，波及28個縣，超過一萬人死亡。8月27號，廢止內戰大同盟會喺上海召開全國代表大會，要求全面停止內戰，共同抵抗日本人侵略。8月28號，遼寧抗日義勇軍第21路趙殿良部隊夜襲瀋陽城，同日軍激戰，炸毀日本飛機庫一所同埋12架飛機！8月30號，蒙藏教育委員會喺南京正式成立，蒙古人白雲梯（1894-1980）為主任委員。同日，教育部通令各省市學校倡用國貨，唔好再用日貨。今個月，河南青年工程師，木炭汽車發明者湯仲明（1897-1980）應西安事變領導人之一楊虎城（1893-1949）之邀，去西安示範木炭汽車嘅操作原理，以燃燒木炭代替汽油，的確係一個唔錯嘅idea，當然呢個汽車概念，只係曇花一現，木炭汽車從來未大規模生產投入市場。


#常威💀 #蔣介石平反系列 #中日戰爭 #民國歷史 #佛經抄寫員

【常公子歷史頻道435回：替大軍閥平反系列之 列寧生命最後一年（下）】

♊ 今集繼續講共產主義之父列寧生命中嘅最後一年，死神已在門前，列寧繼續燃燒生命繼續工作，我諗，佢無懼死亡，仍然燃燒生命最後一分火花維持蘇聯呢個社會主義國家嘅生存同未來，當時列寧面對嘅問題，係前所未有嘅巨大。國外，需要面對來自唔同勢力嘅嚴峻挑戰，一個唔小心，國家就會覆滅；國內，要面對官僚主義出現嘅問題，所有嘅事情，可能係耗盡心力。

♉ 我個人覺得，列寧同托洛斯基最偉大嘅地方，就係佢哋都能夠準確地預見未來，唔係話建立咗一個共產主義國家，一切就會順順利利。兩位哲人深深明白到創業難，守業更難。共產主義政權建立之後所會發生嘅問題，佢哋早已經一一料到，並且寫喺佢哋嘅著作裡面，如果大家有機會睇佢哋嘅著作，你會發覺佢哋兩個人對未來驚人嘅洞察力，當然喺佢兩位之後，亦冇人再能夠擁有如此驚人嘅預視能力。

♈ 蘇聯已經係1991年解體，令蘇聯解體，並非一如當時一般人所料發生一場東西方毀滅性嘅第三次世界大戰，事實上大約70年代，有識之士都會明白到核戰冇可能發生，因為冇人可以負上咁巨大嘅代價。令蘇聯解體嘅，反而係嚟自內部嘅官僚主義，尸位素餐嘅官僚幹部，無所作為，令國家一日一日淪落，國勢日落西山，人民離心離德，共產主義大同世界嘅理想，變成口號同埋空話，意識形態徹底解體，結果國家根基被蠶蝕到體無完膚，最後一吹即散！當然，蘇聯最後的收場，亦一早已經比列寧同托洛斯基預料到……

🎦https://youtu.be/onzVAMIiLAg

［常威近代史］第六百二十五回 馬家軍領袖馬福祥之死（高清錄音版）

#唔鍾意睇字可以聽

https://fb.watch/9_n6BsQubJ/