大清亡國關慈禧蛋牛治 3

【常公子歷史頻道474回：黃金十年系列之 民國最黑暗嘅一天】

▶今集嘅內容主題係「民國最黑暗嘅一天」，依一日係1926年3月18號，中國民眾抗議列強欺壓，封鎖大沽口，北京市民於是發動大規模示威遊行，其後被血腥鎮壓，造成47人當場死亡，189人受傷！另外，蔣介石亦都發動著名嘅「中山艦事件」，為國共分裂清黨展開序幕……

🎦https://youtu.be/a8IAKcY5c3M

#常威💀 #常公子頻道 #中國近代史 #大軍閥平反系列  #蔣介石 #中山艦事件 #民國歷史 #佛經抄寫員

💚【我奮鬥不奮鬥】 常公子 楊熙合著
電子書下載⬇ https://play.google.com/store/books/details?id=CVo3EAAAQBAJ
Kindle版下⬇
https://www.amazon.com/dp/B098XHWTDK

實體書訂購⬇
https://www.382now.com/product?id=325

【常威近代史】（六百八十七回）
中日可以唔打咩？

時間線進入1935年嘅2月，2月2號，中華民國同日本喺大灘舉行一場「和平會議」，確認將察克爾東部各地劃為非武裝地區。總之關內，就係你中華民國嘅。關外，就屬於偽滿洲國同其他勢力，同你中華民國南京政權無關；當然，蔣Sir同好多中國人都唔認同呢個劃分方法，有歷史學家講過，中日戰爭全面爆發，就係蔣Sir心知肚明如果唔打，關外地區就會永遠脫離中華民國而獨立，日本嘅思維，就係既然你拉拉扯扯，不如乾脆發動全面戰爭，佔領整個中國，製造第二個朝鮮或者臺灣。去到1935年，和平已經唔能夠存在，因為大家想法相異，邊個邊度屬於邊個？你有另一套講法，我有我一套想法，彼此風馬牛不相及，情況就係「滿洲人」係唔係「中國人」嘅一部分呢個問題？係又啱，唔係亦都啱，睇吓你企喺乜嘢立場去講。今時今日發生嘅俄烏戰爭，情況亦都係大同小異。美國全力support（經濟上）烏克蘭，同當年美國全力（或半力）support中華民國對抗日本帝國侵略一樣，歷史不斷在循環，當然滄海桑田，世道顛倒，結局亦未必會係一樣。

我經常講，預測歷史發展軌跡其實非常困難，過去歷史只係馬匹嘅「往績」，隻馬今場能唔能夠win得出？又係另外一回事。你以為你可以預測歷史（預測未來），不如首先嘗試吓下個星期日第三場邊隻馬可以跑入三甲place先喇？如果歷史發展真係咁容易perdict得到，人類世界又點會發生咁多苦難丫？

2月6號，海關 phone財政部命令，宣佈全國免征土產出口稅，土產包含啲乜？我真係唔多清楚，好多時候魔鬼總是藏在細節裡。2月8號，立法院修正通過《交易稅條例》，酌減稅率。同一日，九世班禪額爾尼德（1883-1937）喺寧夏阿拉善旗就任西陲宣化使，今日嘅十一世班禪額爾尼德有兩位，第一個係出生喺1989年、受流亡嘅十四世逹賴喇嘛（1935-）承認嘅更登確吉尼瑪；第二個係出生喺1990年、受到中華人民共和國承認嘅確吉傑布，兩位都係靈童轉生。2月8號，北平、天津成立戒毒機構，真係冇辦法唔講一句，去到1935年，兩大重要城市先至正式成立官方嘅戒毒機構？咁之前做鳩啊？毒品問題遺害中華兒女已經接近百年，如果有人認認真真早少少去做戒毒反毒工作，相信中國近代歷史會有另一個走向，上集已經講，毒品問題，係中國百年沉淪嘅重要一環。

2月10號，中共中央軍委會命令各部隊進行休整和縮編，精簡人手，輕裝上路，進行25000里征，深入不毛之地重新開始。同一日，四川省政府主席劉湘（1890-1938）及各委員就職，宣稱實行「政治剿共」。

［常威近代史］第六百八十七回 中日可以唔打咩（高清錄音版）

#唔鍾意睇字可以聽

https://fb.watch/dbo-B-3JMy/

【常威近代史】（六百八十八回）
日本預備籌建傀儡政權

1935年2月20號，日本關東軍大將特務頭子土肥原（1883-1948）到達南京，次日走訪汪精衛（1883-1944）及孫科（1891-1973），佢想做乜？相信大家都一清二楚！全面戰爭即將爆發，籌備建立傀儡政權亦都係常見政治操作，歷史嘅進程大家都非常清楚，一失足成千古恨，汪精衛後來成為日本帝國所建立傀儡政權嘅主角，成王敗寇，因此遺臭萬年，成為中國古往今來第一號大漢奸，孫文之子孫科則站啱隊，冇加入到汪精衛嘅傀儡政府，因此保住清白之身，歷史人物嘅功過定論，好多時候只不過係一線之差。汪精衛賣國就係必然（亦都係唔可以原諒），但係佢嘅動機只不過係想停止全面戰爭減少生靈塗炭，或者佢更加覺得中國成為日本嘅殖民地，四億人嘅日子或者會好過啲都未定，一心開二門，一念天堂，一念亦可地獄。

2月21號，出席蘇聯國際電影展覽會代表周儉雲、胡蝶（1908-1989）及赴蘇演出嘅中國傳統戲劇大師梅蘭芳（1894-1961）等30餘人，離開上海前赴莫斯科。由蔡楚生（1906-1968）導演嘅《漁光曲》，即響今次嘅莫斯科國際電影節上獲得「榮譽大獎」，肯定咗呢套中國電影嘅不朽崇高藝術地位。2月24號，中國勞動協會成立，另外中共始創人之一嘅何叔衡（1876-1935）喺福建長汀水口鎮附近被國軍包圍，縱身跳崖遇難。1913年，何叔衡就讀於湖南省立第一師範學校。1918年與毛澤東、蕭瑜（1894-1976）、蔡和森（1895-1931）等發起成立新民學會，1920年，與毛澤東組織發起長沙共產主義小組。後被湖南省教委派為省通俗教育館館長，主辦過《湖南通俗報》。1921年7月，佢同毛澤東作為長沙代表參加在上海召開嘅「一大」，成為中共嘅始創成員之一。1931年秋天，何叔衡進入江西中央蘇區工作，當選為中華蘇維埃共和國中央執行委員會委員、臨時中央工作檢察人民委員、內務人民委員部代理部長、臨時最高法庭主席、工農監察部部長等職。1934年中央紅軍主力突圍長征後，佢留守贛閩根據地繼續進行游擊戰。

2月25號，倫敦中國藝展會委員達維德及拉菲爾來華，選擇運英展覧嘅古物，今日到達上海。2月26號，申新紡織公司第七廠因向滙豐銀行貸款200萬元，過期未還，被滙豐銀行以220萬元低價拍賣比日商豐田紗廠，而申新第七廠嘅實際資產至少值600萬元。此舉喺上海引起轟動，輿論普遍認為0005滙豐不但摧殘中國實業，更加傷害中國法權。於是中央、中國、交通三間銀行決定籌款250萬元贖回。人情還人情，生意還生意，愛國還愛國，真係要分開嚟講。

2月27號，蔣介石、汪精衛聯名發佈嚴禁各地排日運動令，藉此回應日本外相廣田弘毅（1878-1948）嘅「中日親善」及「中日提攜」提案，大家一邊預備全面戰爭，一邊避免全面戰爭。2月28號，紅軍攻剋遵義，殲滅國軍20個團，野火燒不盡，春風吹又生。2月28號，行政院確定民國25年（即1936年）為兒童年，同日，日本強調，實行中日「經濟提攜」嘅先決條件就係根絕中國國內嘅排日運動。同日，紅軍二渡赤水。

今個月，寧夏墾殖局總辦王敏悟因在受審時頂撞馬鴻逵（1892-1970），被馬鴻逵即埸喝令拖出槍斃。執掌寧夏、青海軍政大權嘅大軍閥馬鴻逵對地方官員管制刻薄，官員稍有冒犯，輕則入獄，重則處死。王敏悟毛遂自薦，被馬鴻逵重用後，一直表現良好，最出名嘅事蹟，就係馬鴻逵問王敏悟有何治理寧夏嘅妙計？王敏悟提議丈量土地收稅，以增加財政稅入。王敏悟果然賣力，清丈出土地比原來要多九十多萬畝，只此一項就可多收稅賦568600元。咁就為馬鴻逵擴軍，發展實力開闢咗一條巨大財源，之後馬鴻逵任命王敏悟為寧夏墾殖局總辦。但奸有奸輸，王敏悟彈起咗之後，就好學唔學，去學楊修，恃才傲物，響一次牌局上得罪大老闆，馬鴻逵懷恨於心，加上身邊好多擦鞋仔乘機落井下石，於是王敏悟被懷疑貪污而遭清查家產，最搞笑嘅係，傳聞甚至連王家牆上嘅石灰亦都刮落嚟過秤，王敏悟因此被捕入獄，坐監都未夠，受審時仲要牙斬斬，終於要搞到拎去後巷打靶。

今個月，根據教育部統計，去到1935年為止，中華民國主要嘅學術研究團體一共有124個，以四億人計算，實在少得可憐。124個學術團體中，屬於社會科學方面有73個，自然科學方面有34個。好話唔好聽，前者叫任噏。經濟方面，西方列強趁你病攞你命，英國、美國、日本喺中國嘅銀行恢復發行鈔票，藉此吸收現銀，外運牟利，鬼叫你中華民國發行嘅銀紙同債券冇人信咩？醫療衛生方面，今個月為預防天花，上海市衛生局為兒童免費接種。除市立醫院免費施種外，市衛生局亦都派遣打針隊沿街接種，同前往各中小學校輪流接種天花疫苗。天花殺人無數，尤其是係兒童，經過同人類幾千年連番鬥爭，最終，世界衛生組織於1980年正式宣佈撲滅天花，使之成為首個於世上絕跡嘅人類傳染病。

1935年2月於焉結束。

#常威 #蔣介石平反系列  #中日戰爭 #民國歷史 #佛經抄寫員

［常威近代史］第六百八十八回 日本預備籌建傀儡政權（高清錄音版）

#唔鍾意睇字可以聽

https://m.facebook.com/story.php?story_fbid=pfbid02G1nuXfx7eE1tX5aZAtwr2SbvWy3aXNtWpCeRfEa8nSsuzxMbe8zdGHHmy93qyvdyl&id=100063598605373

【常公子歷史頻道475回：黃金十年系列之 歷史充滿相對性和弔詭性】

▶今集嘅內容主題係「歷史的相對性和弔詭性」，敍述歷史事實必須有既定立場，完全中立狀態亦唔存在，主旨係好多歷史故事，都係有理說不清，要睇吓你用乜嘢觀點與角度？唔同嘅立場同唔同嘅時代，可能有唔同嘅「真相」。另外，1926年3月直系奉系兩死對頭再度攜手合作，上下夾擊，夾退佔領北京城嘅馮玉祥國民軍，中華民國北京中央政府被直系奉系兩大軍閥集團瓜分

🎦https://youtu.be/ykKP6-hc9wQ

#常威💀 #常公子頻道 #中國近代史 #大軍閥平反系列  #蔣介石 #歷史哲學 #民國歷史 #佛經抄寫員

【常公子歷史頻道476回：黃金十年系列之 大轉折】

▶今集由敍述民國時代一個新聞工作者邵飄萍的遭遇而説起，原來好多事情100年過去都無任何改變。關於歷史嘅大轉折，就係一場由蔣介石自篇自導自演嘅「中山艦事件」開始，國共兩黨終於響「國共合作」的框架下攤牌，蔣介石亦終於暴露佢強人政治嘅真面目，從此國共兩黨步上長達百年，延綿至今時今日的長期鬥爭。

🎦https://youtu.be/MToyjAyNcvY

#常威💀 #常公子頻道 #中國近代史 #大軍閥平反系列  #蔣介石 #歷史哲學 #民國歷史 #佛經抄寫員

【常威近代史】（六百八十九回）
人言可畏 郎心如鐵

時間是進入1935年3月份，距離中日全面戰爭爆發愈嚟愈近，蔣Sir第五次大圍剿戰爭打到紅軍五癆七傷，中共決定展開25000里長征，深入不毛之地重整旗鼓，內憂外患，蔣Sir嘅南京中華民國政府，岌岌可危，中國近代史亦進入大變局時代。

1935年3月1號，南京市鐵路系統由江南鐵路公司承租，租期20年，月租3000元。3月4號，曾經到訪南京會見汪精衛同孫科嘅日本關東軍特務頭子兼甲級戰犯土肥原賢二（1883-1948）到達廣州，繼續佢嘅游說工作，廣州當局禁止各報章刊登其消息。土肥原先生明顯已經係國家民族嘅大敵人，但係佢仲可以周圍走製造事端，其實件事都幾荒謬。3月7號，國民黨中常委同意設立「國立戲劇音樂院」，培訓藝術戲劇人才。

3月8號，河北長垣段黃河決堤，災民達到14萬。同一日，中國嘅電影圈發生大事，著名女演員阮玲玉（1910-1935）喺家中服用安眠藥自殺，被發現後送往醫院不治身亡，年僅25歲。阮玲玉喺廣東香山人，亦即係中山人，出生於上海，1926年以15歲之齡考入明星電影公司，開始其演員生涯，佢主演嘅第一部電影叫《掛名夫妻》，1928年阮玲玉加盟大中華影片公司，主演《劫後孤鴻》等電影，之後加入聯華電影公司，1930年主演《野草閑花》，名震影壇，成為炙手可熱嘅大明星，之後主演過《一剪梅》、《城市之光》、《三個摩登女郎》、《小玩意》、《新女性》電影，成為中國最受歡迎嘅女明星。1933年，阮玲玉同丈夫張達民達成離婚協議，之後與「中國茶葉大王」唐季珊（1896-1967）共賦同居，不過活於20世紀30年代嘅中國，女性追求戀愛自由似乎係一種原罪。1935年頭，以先進婦女艾霞（1912-1934）一生經歷作藍本嘅電影《新女性》上映後，阮玲玉主演嘅角色頗受到輿論非議，同時間私生活亦都被曝光，與此同時，其前夫張達民亦否認同阮玲玉有離婚協議，向法院上訴，法院於是喺本月9號傳訊阮玲玉，阮玲玉深感壓力下自殺，留下遺言「人言可畏」四個字，出殯嘅時候，沿途默哀嘅群衆達到十萬之眾。

阮玲玉之死有兩點可以補充，首先就係佢同居男朋友唐季珊有關，傳說阮玲玉服用安眠藥昏迷後，因為佢驚人閒言閒語，所以將阮玲玉延遲送院搶救，本應條命可以救得返。另外有關阮玲玉第一任丈夫張達民，阮玲玉母親早年為張家做傭人，母女寄人籬下，而張達民即是張家四少爺，人生得青靚白淨，穿着體面，但內在卻是個不學無術、品格低劣紈絝子弟，同阮玲玉結婚之後，不求上進之餘仲要食拖鞋飯，正一死仆街。人言固然可畏，但女人係遇到壞男人更可畏。阮玲玉嘅悲劇，亦都反映出作為新時代女性響當時傳統中國社會下所受到嘅沉重壓力，女性地位真正要得到解放，頂上半邊天，係之後嘅事情。

3月9號，孔祥熙（1880-1967）喺上海召集各界領袖，商討如何挽救上海市工商業；3月11號，中東鐵路買賣草約由蘇聯、日本、偽滿洲國三方面喺東京簽字，並於3月23日正式簽署協定。3月12號，蔣介石發佈保護孔廟令；3月13號，四川士紳階級上書蔣Sir，請求制止軍隊苛徵暴殮，打劫需要理由嘅咩？3月16號，前赴東北嘅1000名旅客喺山海關被拒入境。3月17號，准南鹽務局徐州緝私隊擊斃蘇北蕭縣鹽犯4人，重傷2人，輕傷11人，並捕去1人，激起民憤，販賣私鹽的確係罪，但唔係吓吓打死人吓嘛？

3月17號，《獨立評論》142期發表著名經濟學家社會學家陳序經（1903-1967）一篇文章，名叫《關於全盤西化答吳景超先生》，著名大學者、年青人偶像胡適（1891-1962）喺該行刋嘅「編輯後記」中重申——「我是主張全盤西化的。」支持中國全面西化，陳序經認為「中國文化已不合於現代的環境和趨勢」，與胡適一貫嘅觀點互相吻合。3月31號，胡適再次呼籲全國人民「虛心接受這個科學工藝的世界文化和它背後的精神文明」？中體西用並唔足夠，要西體西用先至啱，中國文化、儒家哲學等等東西，全部都係垃圾，全部都係妨礙中華民族融入新時代嘅障礙物，要統統揚棄，一點一滴都唔可以留低，其實類似嘅黑白貓觀點，係五四運動嘅時候已經被提出，中國國勢積弱，就係因為中國傳統文化不合時宜，Right or Wrong？你睇吓日本「明治維新」全盤西化之後所獲得嘅成就？簡直就係天同地。

凡事凡物，利用睇到嘅結果推敲原因，其實都係一貫嘅思維方式。以跑馬為例，隻馬win出後，總係有千百個理由支持佢贏，事後煙永遠好好食好易食，但係事前呢？事前能夠預測邊隻馬跑出先係最重要嘛。中國當時積弱，落後於大時代，就係單單因為中國文化累事？全盤西化就可以解決問題？答案未免太簡單。就我個人意見，毒品問題明顯會喺中國文化之上，叫人戒毒一定重要過叫人放棄中國文化，不過呢個純粹係我個人觀點，不喜勿插。萬物離散嘅世事真係咁簡單？凡事都可以搵到其真正原因？凡事凡物都會有清楚嘅因果關係？歷史大概唔係咁嘅一回事，你覺得係，就太native了。

#常威 #蔣介石平反系列  #中日戰爭 #民國歷史 #佛經抄寫員

［常威近代史］第六百八十九回 人言可畏 郎心如鐵（高清錄音版）

#唔鍾意睇字可以聽


https://fb.watch/dliyAGIxOu/

當然處理內部權力問題，本身就係一項複雜嘅意識形態操作。意識形態就係（真心）相信你同唔相信你嘅問題，表面上個個都相信上頭，接受指令做嘢，但係用三分力做？半力做？抑或出盡十二成功力拼搏？出嚟嘅效果就有顯著分別。制度僵化後產生官僚主義，公務員個個hea做等出糧等退休，好多時候都係社會上邊最難解決嘅問題（高薪養廉），但係要交出政績賞罰分明，有時候又係大麻煩嘅源頭。平衡先至係藝術。

3月25號，英軍侵入中國雲南猛角、猛董地區，仆你個雞，紳士又想執死雞。3月26號，豫、鄂、皖、贛四省農民銀行改稱中國農民銀行，孔祥熙（1880-1967）任理事長。又係孔祥熙，唔係孔祥熙，就係宋子文？來來去去佢哋兩位？你話班子人才濟濟，我點能夠相信呢？3月27號，馬超俊（1886-1977）被任命為南京市市長。3月28號，國民政府通過改組中國銀行、任命張家璈（1889-1979）為中央銀行副總裁嘅決定。同時任命孔祥熙（又係佢？）為中央銀行總裁，並且正式公佈《民國24年金融公債條例》。第二日，張家璈辭去中國銀行總經理一職。3月30號，由財政部指定嘅中國銀行董事長宋子文（18941971）宣佈接受增加官股1500萬元。今個月上旬，蔣介石同孔祥熙、宋子文喺武漢商議解決「金融幣制與發行之不統一」問題，認為必須要中國銀行同交通銀行兩間大行「絕對聽命於中央，徹底合作」！今個月20號，根據孔祥熙提議，國民黨中正會通過發行金融公債1億元。規定其中2500萬元為增加中國銀行官股，1000萬元為增加交通銀行官股之用。簡單啲講，即係要控制兩間銀行主導權。

3月28號，紅軍突破烏江天險。同一日，前新疆省政府主席金樹仁（1879-1941）係江蘇受審。3月30號，瀋陽兵工廠一號汽鍋發生猛烈爆炸，炸死64名工人，日軍臨時實施戒嚴，追查主腦，即係話當恐怖襲擊查辦！同一日，廣東糧食統制會通過《禁止暹米（泰國米）入口案》，回應暹邏當局壓迫當地華僑。3月31號，中國酒精廠喺上海投產，每日生產酒精7000加侖；而簡易人身保險業務，亦響今個月響中國開辦，中國人終於有保險買。

1935年3月，焉然結束。

#常威💀 #蔣介石平反系列  #中日戰爭 #民國歷史 #佛經抄寫員

［常威近代史］第六百九十回 事唔難搞 人最難搞（高清錄音版）

#唔鍾意睇字可以聽

https://m.facebook.com/story.php?story_fbid=pfbid02Fa2HYCEJwmTi1Ej4XbcCsv1AvdenKbqnEz2kqXXipBUzXk7v8XwDXXX52YoEe2pml&id=100063598605373

【常公子歷史頻道477回：黃金十年系列之 蔣介石之初級評價】

▶今集是對民國政治強人蔣介石的初級評價，蔣Sir嘅出現，無疑將中國近代歷史帶入一個全新階段，所謂強人政治，其實同一時間喺世界上唔同嘅地方出現，大概皇權崩解，人心散離，無法得到靠倚，需要仍然有人扮演「九五之尊」的角色，去為所有紛爭或意見相左作為一個最後仲裁之角色，有時候，並非強人本身想作為強人，而是時代和民衆間接製造出來的事物。所有的政治操作，本身都是為瞭解決眼前嘅問題，至於解決咗眼前嘅問題之後製造出更多嘅問題，本來亦都係人生常態……

🎦https://youtu.be/tWRgHC24a80

#常威💀 #常公子頻道 #中國近代史 #大軍閥平反系列  #蔣介石 #歷史哲學 #民國歷史 #佛經抄寫員

你終於奶嘢啦蛋牛治

自民國建立以來，西南地區一直處於半獨立狀態，成班軍閥話就話隸屬你國民政府，但係其實各自搵食，蔣Sir一直希望引入「中央」勢力，直接控制佢哋，但礙於軍閥實力雄厚，不敢貿貿然下手。上年底，由於形勢變化，西征紅軍放棄原定計劃，改由湖南通道轉向貴州（黔），恰好為蔣Sir打入西南提供作絕佳機會。年初，蔣Sir嫡系部隊薜岳（1896-1998）入黔，以剿共為名，與黔軍約定平越、黃慶、瓮安、余慶一帶防務由中央軍負責，黔軍則移至貴陽附近，但薜岳部隊卻搶先派出主力軍直取貴陽，接管貴陽城防，就連王家烈出入城池都受到審查，處境非常難堪，於是王家烈只好率領部隊前往黔北。今年2月，黔軍響婁山關、遵義大敗於紅軍，而貴陽嘅中央軍大部分都冇推進嚟幫手，只係駐守烏江口，並冇打算全力幫拖。3月15號，因為你王家烈打敗仗，蔣Sir派人逼令王家烈交出軍權，王家烈無奈表示願意辭去主席職務，4月底，更加將所有軍職辭去，徹底交出兵權。

由小事見全局，如果真正上下一心，又點會留一條生路比紅單？蔣Sir一邊以剿共為名，其實一邊收復嗰啲半獨立嘅軍閥勢力，你以爲我「剿匪不力」派膠？你未免太年輕了太天真了。

4月7號，陝西黃帝陵舉行民族掃墓禮。4月9號，中英兩國互換照會，重新劃定雲南、緬甸邊界。4月12號，湖南省主席何鍵（1887-1956）通令湖南各學校實行「讀經」，當然唔係讀聖經，而係讀四書五經，新生活運動嘅主題，就係要搬返儒家哲學出嚟，增加民眾對中國文化（中華民族）嘅向心力同團結性，戰爭前夕減少鬼同埋二五仔嘅數目。4月13號，國民政府批准《國際電訊公約》，同一日，賑委會作出報告，上年，湖南省69個縣因為旱災餓死110萬餘人，單單長沙一地死亡人數就達到2254人。呢個係個相當可怕嘅數字，監生餓死100萬人，今日絕對係頭條大新聞，但係當年只係小兒科，只係日常生活嘅小部分（好似有人跳樓）。唔明白當中嘅分別，好難去理解中國近代史。

4月14號，戴季陶（1891-1949），于右任（1879-1964）等人發起組織中央國術研究會，中國功夫，有需要被研究同發展。4月16號，日本關東軍司令部決定撥出1000萬元作為移民費，五年內移殖300萬日本人到東北。

#常威 #蔣介石平反系列  #中日戰爭 #民國歷史 #佛經抄寫員

［常威近代史］第六百九十回 畀你知道我諗乜就你係食神喇（高清錄音版）

#唔鍾意睇字可以聽

https://fb.watch/durAT8G9hs/

【常公子歷史頻道478回：黃金十年系列之 強人政治登上世界舞臺】

▶今集敍述強人政治在20世紀初期開始登上世界舞臺，第一次世界大戰發生之後，加上全球經濟大蕭條，民衆迷失方向，需要指路明燈，有人說，民眾都是愚昧的，都是羊群心理，都是西瓜靠大邊，風吹邊邊擺邊邊，其實都係無可厚非，普羅民眾都是慵懶的，或者人性本來都是慵懶的，如果有一個適合的人選為自己決定所有，而他的決定又能夠為大家帶來最大的好處，咁點解唔將自己嘅命運交畀嗰個人去決定呢？好錯？其實冇錯，呢個係人性。人性並唔係口講，人性係需要透過實際生活而展現出來。知行合一才是真實（唯物辯證法）。

🎦https://youtu.be/28Cd5zlpPVY

#常威💀 #常公子頻道 #中國近代史 #大軍閥平反系列  #蔣介石 #歷史哲學 #民國歷史 #佛經抄寫員

【常威近代史】（六百九十二回）
臺灣最嚴重嘅一次地震

1935年4月17號，財政部制定《救濟工商業放款原則》10項，命令中央、中國、交通三間銀行及上海銀行業工會照做。情況亦都好詭異，政府勒令銀行放水借錢支持工商業，唔知有冇規定息口係幾多呢？4月20號，臺灣中部地區發生強烈地震，是自1906年梅山地震後再度重創臺灣嘅地震，也是臺灣有史以來傷亡最慘重嘅自然災害，震源喺新竹同臺中之間嘅大安溪流域，受災範圍包括新竹州1市、7郡、33街莊，臺中洲1市、5郡、26街莊，死亡人數達到3276人。地震由尋日下晝4點開始發生，淺見山突然炸裂，火山爆發噴出熔岩，烏雲蓋頂，入夜之後火山爆發更加強烈，次晨6點左右，又出現第二次強烈震動，造成空前災禍，大小住屋被破壞嘅約有54792戶，受災人數超過35萬人，直接損失高達2500萬元。

救援人員迅速趕赴現場救助，但受災較重嘅新竹地區多為山間僻地，道路崩塌，交通受阻，傷員送運困難，救援物資衹能靠人的零星運抵，去到4月24號，公路鐵路修復通車，先能夠輸送建築材料搭建難民收容所，但建築材料一時告急，甚至必須托震災事務所向日本採購。地震之後，臺灣更重視地震與氣象觀測，為此添購更多地震儀器，並增設測候所觀測餘震，促使臺灣響地震測報技術上有長足的進步。

4月21號，京蕪鐵路建成通車，全長為93公里。4月22號，國民政府公佈《學位授予法》，分為博士、碩士及學士三級，從7月1日起開始施行；4月23號，偽熱河鴉片專署強迫長城附近各村種植鴉片，每畝預繳稅收8元，睇到嚟呢度，你就會明白中國嘅毒品問題點解從來冇解決過？因為連官方政權都提倡種植鴉片販賣圖利，英國唔入口，就自己種自己賣，不過冇辦法，鴉片盈利實在太豐厚，唔通種番薯咩？我再講多次都唔怕厭，毒品遺害中華民族至深，沒有其他，沒有之一。

4月23號，上海錢莊華明銀號宣告倒閉，成為白銀外流、經濟蕭條嘅又一犧牲品。自上年中美國頒佈《白銀法案》以來，上海金融業免受經濟蕭條衝擊時一度出現嘅繁榮一去不復還。一向主要以商業同房地產業進行借貸嘅民間錢莊受影響最為嚴重，情況亦都好簡單，因為好多商店同工廠倒閉破產，借錢冇人還，錢莊出現嚴重虧蝕，就要執笠。響華明銀號之前，已經有永興同同家匯畫2大錢莊執笠，去到6月，上海有近10間銀號倒閉，做銀行都會執笠，你就知道當時嘅經濟情況究竟有幾咁蕭條同惡劣。去到1935年，其實經濟環境不斷下滑亦都唔係單單中國嘅事，日本如是，歐美西方列強亦如是，全人類捱窮，遍地哀鴻，每個國家都尋找新出路存活落去，其中一種出路叫戰爭，史上最大型戰爭二次世界大戰好快亦會發生，有人認為世界大戰發生係某啲陰謀家野心家促成的結果，例如有個人叫希特拉，但係戰爭發生嘅理由，好多時候都係同經濟有關，甚至只係同經濟有關，政治經濟密不可分。道理非常顯淺，有錢，仲會搏命？仲會打仗？唔明，亦都冇辦法，呢啲叫唯物辯証法。

4月24號，北平由本年度開始，取締男女合校，又入後波開倒車？我都唔明點解？4月26號，立法院修定通過《簡易人壽保險法》、《農創業法》、《民事訴訟法施行法》等等法例。同日，國民政府明令豁免貴州省本年田賦，紅軍已經進入貴州活動，仲唔安撫當地農民，繼續征稅嘅話，廣大農民將會全部加入共產黨了。4月29號，蘇聯駐華大使鮑格莫洛夫發表聲明，表示蘇聯對新疆絕無領土野心。真係叫做官方辭令，日本亦都曾經表示對中華民國嘅領土全無野心，不過邊忽係中華民國領土？就各有各的定義方式。

4月30號，山西太原市公安局規定妓女一律佩戴桃花章、一定要電髮同著高踭鞋！真係古靈精怪！同時規定實施毒販刺字，又入後波開倒車？財政部亦決定係本年開徵所得稅。今個月，擁有600多名男女團員嘅北平大中學生聯合歌詠團，喺紫禁城太和殿表演大合唱，其規模之大為中國前所未有。今個月上海市亦有57對年輕男女舉行集體結婚，開創全國集體結婚之先河。

今集有少少時間，講一講一個失蹤多時嘅重要角色少帥張學良（1901-2001），1933年春天，曾經同蔣Sir不咬弦嘅張學良決定離開中國前往海外考察兼旅遊，有人講佢係為咗治愈佢嘅吸毒習慣，即係旅行戒毒，成功與否，不得而知，1934年年頭張學良回歸中華民國，佢依然係一個鍾意跳舞、飲酒同打高爾夫球嘅花花公子（表面上），不過1933年11月閩變事件發生，張學良覺得佢返嚟能夠為穩定局勢提供幫助，另外東北軍亦希望佢回歸重掌大權，蔣Sir控制唔到東北軍，亦希望張學良能夠回到佢原來嘅職務上，少帥一回國，蔣Sir就任命佢為河南、湖北同安徽嘅「剿共」副總司令。其實1935年冬天，東北軍同紅軍進行咗一次大規模戰鬥，紅軍固然死傷慘重，但張學良嘅東北軍亦都損失咗整整兩個師，如果呢個就係「剿共」嘅代價，按照呢個速度，過唔到幾耐張學良亦都冇人馬去防去打日本仔了，張學良唔係四川軍閥劉湘（1890-1938），亦唔係上集所提到嘅貴州軍閥王家烈（1893-1966），蔣Sir想用「剿共」為名剿平老友張學良，實在冇咁容易……

1935年4月，於焉結束。

#常威 #蔣介石平反系列  #中日戰爭 #民國歷史 #佛經抄寫員

【常公子歷史頻道479回：黃金十年系列之 北伐開拖喇】

▶今集敍述北伐戰爭終於開打，由孫文聯俄容共政策開始，國民黨喺蘇聯第三國際嘅金盧布、人力物力支持底下，終於建立咗一支紀律性強大嘅新式意識形態軍隊，由廣州做出發點，攻打盤據中原嘅直系軍閥吳佩孚同孫傳芳，奪取整個南方控制權。歷史記載，依一場係一場正義之戰，係一次真正嘅國民革命。不過其實本質上，北伐戰爭同之前嘅軍閥內戰並冇太大相異，歷史始終係由勝利者所撰寫，勝利者擁有最後話語權，亦祇有最後嘅勝利者先可以作為是非黑白對錯、或者正義與不正義的最後仲裁，北伐戰爭係1911年辛亥革命嘅最後延續，亦係國父孫文嘅終極夢想。好可惜，上天冇比機會孫文睇到夢想實現嘅一刻……

🎦https://youtu.be/hIbDMluFuOc

#常威💀 #常公子頻道 #中國近代史 #大軍閥平反系列  #蔣介石 #歷史哲學 #民國歷史 #佛經抄寫員

［常威近代史］第六百九十二回 台灣最嚴重一次地震（高清錄音版）

#唔鍾意睇字可以聽

https://fb.watch/dBcWIhCV4d/