大清亡國關慈禧蛋牛治 3

9月26號，塘沽日軍借醉酒鬧事，佔據塘沽公安局，更加強迫華警繳械，真係咁都得？其實冇乜嘢唔得。9月27號，内蒙宣稱自治，內政部長黃紹竑（1895-1966）前赴張垣，會同察哈爾、綏遠兩省政府主席，召集各盟旗王公協商事宜。9月28號，方振武、吉鴻昌 率領抗日同盟軍喺小湯山同國軍發生激戰！大家睇清楚，唔係同日本人發生激戰，而係同國家軍隊發生激戰！即係自己人打自己人，籠裏雞作反，日本人唔揞住半邊嘴笑就奇？之後方振武吉鴻昌部隊又俾日本轟炸機轟炸，兩面夾攻，當然不支，於是退至昌平西北山中……

9月28號，捐資興學達20萬元嘅招商局總經理，著名企業家劉鴻生（1888-1956）收到國民政府嘉獎； 9月29號，山東滕縣城北發現大規模漢代古墓遗跡，墓內皆是漢晝石刻。9月29號，中華民國同美國達成嘅「棉麥借款」兌現嘅首批美國棉運抵上海！情況是這樣的，中國同日本處於戰爭邊緣，美國就大做生意，袋袋平安。9月30號，世界反帝大同盟大會喺上海秘密舉行，由國母宋慶齡（1893-1981）主持。

9月又玩完，時間線進入1933年10月。10月一開始第一件大事，就係10月3號，國民政府決定發行一億元關稅庫券，即係再發債，即係再印銀紙，即係錢唔夠使，即係泥足深陷！經濟黑洞越陷越深，唯有繼續咭冚咭，繼續借錢嚟還錢，永恆不斷，依種經濟困局，唯一嘅解決方法就係將一切推倒重來，嚟一次大撇賬！大撇賬點樣發生？戰爭就可以發生！政權更替就可以發生！同一日，國民政府行政院準予糧食出口，並且免徵出口稅，當時中國所種嘅農作物都唔夠中國人自己食，仲要出口，明顯就係為咗搵錢至上。10月4號，全國經濟委員會成立，汪精衛、孫科、宋子文任常委，邊個做都冇用，錢係唔會無中生有，除非搵大衛高柏飛做。10月6號，陳銘樞（1889-1965）由香港秘密去到福建福州，同蔣光鼐（1888-1967）等人商討兵變反蔣，即係所謂「閩變」事件，但係好奇怪，當時好多時候啲人玩逆變之前，都會途經香港打個白鴿轉，究竟大英帝國殖民地香港喺當時係擔任一個什麼的角色呢？歷史並無明確講俾我哋知道，我哋只可以——靠估。

#常威💀 #蔣介石平反系列  #中日戰爭 #民國歷史 #佛經抄寫員

【常公子歷史頻道456回：替大軍閥平反系列之 孫文之死（二）】

♊ 一連三集孫文之死，今次係第二集，星期六會推出第三集，之後替大軍閥平反系列就會完結，進入全新章節「黃金十年」系列，以常威近代史會進入第五個年頭，之後回復繼續走落去，我自己並唔知道，總之我同阿潮會行得幾遠有幾遠，加油！

♐ 自從新型冠狀病毒疫情爆發之後，人類嘅慾望不斷減少，起初係冇旅行去，到咗今日，能夠出街食一餐飯，能夠順利返工放工，或者同朋友見過面，飲杯奶茶，都變成奢侈品。世界真係變化得好快，我亦明白咗一個道理，人類嘅生活其實充滿彈性，亦並非一成不變，當要變嘅時候，亦冇得唔變。當然香港有啲嘢永遠都唔變，就係永恆高企嘅樓價，又係土地問題，哈哈。

♏ 俄烏戰爭進一步升級，相信血腥程度亦會不斷上昇，各方面的消息太多，資訊亦太多，我哋根本冇辦法辨認真偽，立場決定我們對事物嘅睇法，其實冇錯。不過死人就係死人，生命嘅價值必須尊重，否則任何價值同立場都站唔住腳！希望戰爭早日結束，無論用任何方式都好，因為血腥同仇恨一旦蔓延，就會一發不可收拾。個人都好相信，今次烏俄之戰，將會響之後幾年為整個世界帶來一場大變局大洗牌，好多嘢，雖然好似響遙遠嘅地方發生，不過一下子燒到埋身，亦都唔係乜嘢奇事。我最近成日舉一個例子，三年前當疫情開始，邊個可以估到延續到今時今日仲未斷尾呢？

🎦https://youtu.be/OIeQs0VElOA

［常威近代史］第六百五十六回 鷸蚌相爭 漁人得利 八字真言（高清錄音版）

#唔鍾意睇字可以聽

https://fb.watch/bw6-lTLHp5/

1933年10月17號，蔣Sir響南昌行營頒發行動綱要及圍剿計畫，一切準備就緒，向中共蘇區實行第五次大圍剿。今個月2號，蔣Sir喺南昌召集剿共部隊師長、參謀長以上嘅將領會議，提出戰略重點為「嚴密封鎖，穩打穩紮」，戰術嘅要點「以靜制動、以拙制巧，以實擊虛」等等，經過之前四次大圍剿都失敗收場嘅經驗，蔣Sir明白到對付紅軍變化多端嘅運動遊擊戰術，必須穩打穩紮，絕對不能被敵人再牽著鼻子走。5號，南昌行管重頒封鎖「匪區」辦法，規定凡武器藥品及其製造原料、以及糧油鹽然等日常生活用品，均在封鎖禁運之列。今日頒佈嘅行動綱要及剿圍計劃，再一次重申「步步為營，穩打穩紮」嘅原則，規定「以殲滅贛南匪軍主力及流竄於閩西、鄂南、贛西北、浙贛閩邊區匪軍為目的，區分為北路軍、西路軍及浙贛閩邊區」。第五次大圍剿兵力約為61個師7個旅及1個團，空軍五個大隊，以北路軍為進剿嘅主力，顧祝同（1893-1987）任總司令，西路軍總司令為何鍵（1887-1956），南路軍總司令為南天王陳濟棠（1890-1954），浙贛閩邊警備司令為趙觀濤（1892-1977）。

10月20號，第二屆高等考試舉行，同日西蒙古各盟旗首領要求中央「採用高度自治，建設内蒙自治政府」。10月20號，今個月十號開幕嘅中華民國第五屆全國運動會賽事全部結束，今日舉行閉幕禮。今屆賽事，多名運動選手喺南京新建嘅中央體育場創造咗佳績，一共有28個項目破全國紀錄，短跑好手劉長春（1909-1983）仲以10.7秒嘅成績平咗男子100米遠東紀錄； 香港遊泳選手楊秀瓊（1919-1982）一人奪得所有賽事五項冠軍，因而聲名大噪。之後佢因為樣子甜美，被冠以「美人魚」之稱，楊秀瓊亦係首位代表中國參加奧運會泳賽嘅女運動員。1934年7月底至8月初，獲國民政府邀請，北上江西南昌、南京、上海等地表演泳術，及宣傳「新生活運動」，1936年8月，代表中國參加第11屆柏林奧運會，完成了兩項泳賽，包括100米自由式同100米背泳。雖然響預賽已遭淘汰，但響100米背泳成績，打破全國紀錄。1939年楊秀瓊同騎師陶栢林結婚，婚後育有一子一女。1941年傳出二人感情破裂。香港淪陷期間，楊秀瓊投身抗日情報工作，楊秀瓊仲響日本憲兵隊本部接受過調查。

#常威💀 #蔣介石平反系列  #中日戰爭 #民國歷史 #佛經抄寫員

❤【常威近代史】第一部《大清亡國關慈禧蛋牛治》，全面開放，免費下載， #freedownload！

Free下載連結🔽

https://play.google.com/store/books/details?id=C3hjDwAAQBAJ

【常公子歷史頻道457回：替大軍閥平反系列之 孫文之死（三）】

♊ 一連三集孫文之死，今次係第三集，亦都係最後一集。今集之後，漫長嘅【替大軍閥平反系列】全部完成，下一round就係【黃金十年】系列。順帶一提，因為阿潮轉咗新工，工作繁忙，所以全新一輯【黃金十年】系列，即458回 將會延後一個星期先推出，即係話下一次再上新片，要到3月15號星期二，請各位多多包涵！特此通知大家。

♈今日係中國二十回節氣中嘅「驚蟄」，動物昆蟲自入冬以來即藏伏土中，不飲不食，稱為「蟄」；到了這時天氣轉暖，大地春雷，而「驚蟄」即上天以打雷方式驚醒蟄居動物的冬眠。「驚蟄」係重要嘅一個節氣，意思係要訓醒，重新開始工作，有改變嘅意思，希望中華傳統智慧會幫助香港，今日「驚蟄」之後，亂局將會改成，之前新型冠狀病毒蔓延，整個香港進入失控嘅地步，政府防疫策略莫衷一是，搞到市民人人自危，去超級市場藥房大手掃貨掃藥自保，經濟活動陷入停頓狀態，百業蕭條。今日「驚蟄」，春雷乍響，最好畀大家想一想，到底件事應該點樣行落去？因為Omicron疫情，香港社會民生已經付出極大代價，我哋亦唔可以咁樣生活落去，傷口出現，就要處理，儘快止血，否則再拖一兩個月、甚至三四個月，後果不敢想像。

⛎俄烏戰火繼續蔓延，睇唔到有停落嚟嘅跡象，死人愈嚟愈多，睇到都心噏，普京已經放膽一搏，唔會回頭，有樣野要記住，普京生於1952年，快到人生古來稀70歲，掌權半生，的確冇乜嘢好輸，亦都冇乜嘢好驚，老人當政，有時候真係要諗最後一步棋。不過話時話，其實拜登仲老過普京，亦係一個經驗老到嘅政客，佢哋個腦諗乜嘢？其實普通人好難知道。

🎦https://youtu.be/XUXMmMeUgVA

［常威近代史］第六百五十七回 從容就義 就係烈士（高清錄音版）

#唔鍾意睇字可以聽

https://fb.watch/bAy-qrMdHk/

【常威近代史】（六百五十八回）
國家最緊要富強 一係富 一係強

之發生嘅黃河大水災，情況非常嚴重，甚至有人講浸死200萬人，有好多地方嘅村莊完全被冲毀，基本上無人生還。而且洪水退卻之後，痢疾、霍亂饑荒開始大流行，喺依場大災難之中，好多人對「民生主義」 嘅現狀感到困惑不解，當成千上萬嘅人民死於非命嘅時候，國民黨嘅政客卻喺度為職位同埋權力爭執不斷，而蔣Sir更動用大軍對紅軍進行大圍剿，唔抗日不特止又積極救災，只係顧住打自己人，難免令到好多人失望。新一代嘅知識份子應為蔣Sir拒絕抗日，積極動員「安內」，佢哋已經非常不滿，廣大農村農民更加唔會明白政治嘅複雜性，佢哋只係覺得政府冷酷無情，自己受災受難，於是有更多人擁護毛澤東同共產主義，因為毛澤東似乎為農民指出一條出路，呢個世界嘅嘢，有希望總比無希望好，哀莫大於心死，蔣Sir大失民心，大概就係個時候。

1933年10月22號，南京、浦口火車渡輪工程竣工通車，10月24號，中航公司滬粵線正式開航，航程約需10小時30分，原來要去到1933年，先可以從上海搭定期航班船去廣州，以水路來往呢兩個中國南方最重要嘅城市，可想而知當時嘅交通運輸系統係幾咁落後。

10月25號，宋子文（1894-1971）請辭財政部長及行政院副院長之職，好地地點解要辭職呢？梗係有理由。10月29號，國民黨中正會接受宋子文辭職，並指派孔祥熙（1880-1967）繼任。音樂椅遊戲，你唔做就佢做，佢唔做就你做。事源於1932年6月，宋子文亦提出過請辭，當時蔣Sir要求每個月剿共軍費由1300萬增加到1800萬，大拿拿每個月增加500萬？點樣變出嚟嘅？而且呢個要求令到宋子文苦心經營嘅節流計畫流產，又要再發行新嘅公債籌錢，令到宋子文向上海銀行家作出四年內不再發行新公債嘅承諾落空。1932年7月，用宋子文作出讓步，同意復職並且將每月剿共軍費增加至1500萬元。但係場將打落嚟，每個月嘅軍費平均開支卻去到2670萬，於是1933年2月，宋子文又被逼宣佈發行新公債集資。講嚟講去，就係為咗「剿共」！之前，宋子文亦曾經前赴歐美考察，並且制定咗一套包括結束日本關稅優惠待遇等內容嘅計畫，借此削弱日本係中國嘅經濟力量，但係政府之中，除咗蔣Sir積極剿共消極抗日外，親日嘅汪精衛派更加實際控制外交，宋子文兩頭唔到岸，於是索性唔撈，掛印辭官。

［常威近代史］第六百五十八回 國家最緊要富強 一係富 一係強（高清錄音版）

#唔鍾意睇字可以聽

https://fb.watch/bDdveG8DVY/

【常威近代史】（六百五十九回）
閩變

時間線進入1933年嘅11月，中日戰爭如箭在弦，根據上海統計，截至1933年10月為止，一共有210多間民族資本企業倒閉，情況非常之咁唔理想，民間商業萎縮，政府財政狀況只會更加惡劣，一場驚世大災難，無可避免會發生。

今個月，由大英帝國煽動，加尼牙孜（1889-1941）出手，響喀什建立「 伊斯蘭東土耳其斯坦共和國」。1932年，新疆發生哈密暴動，領導者就係維吾爾族人加尼牙孜，暴動隊伍攻入迪化、焉耆等城市，並且打出「民族主義」旗號，提出「殺漢興回」！新疆政權風雨飄搖，紳仕英國乘機策動泛土耳其主義者、哈密暴動首領加尼牙孜，喺喀什建立新政權「 伊斯蘭東土耳其斯坦共和國」，加尼牙孜自任大總統，薩比提大毛拉（1883-1934）任「國務總理」 。不過呢個短命嘅國家，只有區區一年壽命，去到1934年，喺青海回族少年軍閥馬仲英（1910-1936）部隊嘅進攻之下，宣佈瓦解。

11月1號，社會民主黨人喻翊忠策動駐湘西靖縣保安第四區第一團團長賀竟成嘩變。11月2號，杭州航空學校七星期以來，因為練習不慎，已經損毀飛機十架？吓？咁都得？真係冇乜嘢唔得！由小事見大局，當年中華民國以及中華民國國民素質，真係好有問題。同一日，閩、贛2省喺建寧召開工農代表大會，正式成立閩贛蘇維埃政府，邵式平（1900-1965）任主席，葉劍英（1897-1986）任軍區司令兼政委。

11月2號，嶺南派繪畫大師高奇峰（1889-1933）喺上海病逝，高奇峰係廣東番禺人，嶺南畫派畫家開山鼻祖，與胞兄高劍父、陳樹人並稱「二高一陳」，又稱「嶺南三傑」，係嶺南派嘅開山祖師，高奇峰13歲東渡日本，專攻藝術，致力於繪畫，倡導民族主義嘅佢響日本曾經結識孫文，之後加入同盟會。高奇峰回國後被聘為嶺南大學美術系教授，佢嘅繪畫作品曾經展出於教育部全國美術展覽，中日繪畫展覽會、西湖博覽會、意大利巴拿馬萬國博覽會、比利時百年博覽會等等，評價甚高。他嘅作品融合咗中國畫傳統嘅筆墨形式同日本畫法，注重寫生同時又長於用色同水墨渲染，具有用筆雄健、敷色濕潤、形象生動嘅特點。高奇峰所畫月夜、冬雪等景物常有一種清麗秀潤、晶瑩光潔嘅意境。他畫翎毛走獸，或奔逸或細潤，不拘成法，其風格響雄健與俊美之間，晚期作品多粗獷豪邁嘅寫意之體。弟子有趙少昂（1905-1998）、張坤儀（1895-1969）、葉少秉（1896-1968）、何漆園（1899-1970）、容漱石（1903-1996）、黃少強（1900-1942）、周一峰（1890-1982）等，並稱為「天風七子」，桃李滿門，成就非凡。一個人是否大師級人物，好多時候除咗睇自身嘅成就之外，就係要睇佢有冇繼承者，真正嘅大師，要能夠承先啟後，除咗圓滿自身，更加要繼往開來。

11月5號，蔣Sir 通令核減田賦附加稅。11月6號，日本關東軍代表岡村抵達北平，與黃郛（1883-1936）、何應欽（1890-1987）交涉長城各關口控制權，平沈通車，關稅郵政等各種問題。11月7號，中國紅軍大學喺江西瑞金成立。11月11號，南京市萬人提燈遊行，提倡使用國貨。

11月12號上晝9點幾，30名身穿藍衣嘅暴徒，沖入上海華藝影片公司，「分投各辦事室，肆意搗毀寫字檯玻璃窗以及椅凳各器具，然後又至室外，打毀自備汽車2輛、曬片機1部，攝影機1具，並派發白紙印製之小傳單，上書民眾起來一起消滅共產黨！」 同時發表宣言，署名為「中國電影界產共同志會」，約七分鐘後集合列隊離去。暴力事件發生兩3日後，呢班人又以「鏟共同志會」 嘅名義響上海各戲院散發信件，警告各電影院唔准上映用田漢（1898-1968）等編導嘅左派電影，否則必以暴力手段對付。

11月16號，財政部為籌剿共軍費，以關稅庫券500萬元，向上海錢業抵押借款250萬元，條數真係好難計？同日，行政院通過洋麵粉進口徵稅原則。11月17號，商務印書館同故宮博物院訂立合同，影印出版因戰亂僅餘嘅四部《四庫全書》。11月20號，中共顎豫省委書記沈澤民（1900-1933）病逝，沈澤民係中共早期領導人，佢係矛盾沈雁冰（1896-1981）細佬，亦係著名嘅「二十八個半布爾什維克」之一。

11月20號，閩變發生，李濟深（1885-1959）、陳銘樞（1889-1965）等人喺福建發動反蔣事變，響福洲發表《中國人民臨時代表大會人民權利宣言》，128事變後，大名鼎鼎喺上海頂住日本人侵略嘅19路軍比蔣Sir調往福建剿共。1933年3月日本入侵熱河省，長城抗戰爆發，19路軍要求北上抗日但遭到拒絕，19路軍將領蔣光鼐（1888-1967）、蔡廷鍇（1892-1968）與陳銘樞、李濟深及第三黨人黃琪翔（1898-1970）等人聯合決定反蔣抗日。10月26號，19路軍同紅軍簽訂《反日反蔣的初步決定》。22號，福建人民政府喺福州成立，李濟琛為主席。南京國民政府立刻調動軍隊15萬人，同時派出飛機轟炸福州，經過反覆爭奪，1934年1月蔣軍佔領福州，李濟深、蔣光鼐、蔡廷鍇、陳銘樞等人相繼離開福建，福建事變失敗收場。

#常威💀 #蔣介石平反系列  #中日戰爭 #民國歷史 #佛經抄寫員

https://www.youtube.com/playlist?list=PL0RVUAILQUOvTo8JJrayjrvd_Nbjc-0Me

❤請加入常公子的近代史世界！

#常威 #廣東話 #中國近代史 #HongKong #Chinese #History

［常威近代史］第六百五十九回 閩變（高清錄音版）

#唔鍾意睇字可以聽

https://fb.watch/bFKbTZl3LR/

【常威近代史】（六百六十回）
中西文化巨匠徐光啟

1933年11月20號，上海證券市場因為「閩變」大上大落，各類證券平均跌咗一蚊左右，公債亦出現新低價！打仗影響股市，亦都非常正常，但係大起大落，自然就有人富貴有人跳樓；一潭死水，就大家冇肉食。要明白呢個道理，先可以瞭解股票遊戲嘅奧義，所有事情，可能到最後都只不過係為咗產生波幅引發！真係八奇思考境界。

11月24號，中國天文學會同上海天主教徒分別舉行徐光啟逝世300週年紀念會。徐光啟（1562－1633年），字子先，號玄扈，聖名保祿，南直隸松江府上海縣人，明朝末年儒學、西學、天學、數學、水利、農學、軍事學等領域學者，科學家、思想家、政治家、軍事家，於崇禎朝官至禮部尚書兼文淵閣大學士，任上病逝於北京。

徐光啟係中西文化交流同中國近代科學技術嘅先驅者，響明末，佢憂國愛民、清廉勤政，傾心竭力以實學救國利民，在西學東漸，引進西式火器同發展明軍炮兵抵禦努兒哈赤嘅後金，引種同推廣番薯、良種水稻等高產抗逆作物等過程中起咗關鍵作用。有人講，中國人識種番薯食亦都改寫咗整個歷史走向。徐光啟最著名嘅事跡就係同大名鼎鼎嘅傳教士利瑪竇（1552-1610）合作翻譯歐幾里得（公元前325-公元前265）嘅《幾何原本》前6卷，其中譯定嘅一啲重要數學術語沿用至今。此外，佢親自或組織他人與來華天主教傳教士合作編譯咗其他一系列漢文西書。徐光啟係百科全書式大人物，其盡晚年心血嘅主要工作係編纂集中國古代農學之大成嘅《農政全書》、以及系統介紹西方古典天文學嘅《崇禎曆書》。徐光啟深感中國傳統學術於邏輯嘅嚴重欠缺同數學停滯落後，因而高度重視演繹推理，以數學為著力點，倡導數學研習、普及同應用；同時，佢以理論指導實踐，長期身體力行地進行天文、水利、農業等方面科學實驗同測量以及天文望遠鏡、西式火炮等製造，歸納總結實踐經驗。徐光啟生活在16世紀末至17世紀初，與培根（1561-1626）、伽利略（1564-1642）、笛卡兒（1596-1650）等西歐學術名家同時代且並駕齊驅，係一啲方面或有過之而無不及。

響對待西學同西方文明態度上，徐光啟唔只「師夷長技以制夷」、「中體西用」，佢喺各層面上都能夠虛心學習同利用西方優秀文明成果，佢更加明白翻譯嘅重要性，「欲求超勝，必須會通；會通之前，先須翻譯。」 徐光啟除咗係一個百科全書式萬能人物，佢亦希望以「修身事天」嘅基督教信仰匡救時弊，挽回世道人心，「補儒易佛」，改良中華文化。佢亦係羅馬教廷漢傳開教之初熱忱而忠貞嘅教友領袖同護教士，被譽為中國天主教「聖教三柱石」之首。

【常威近代史】第十一部《人生有幾多個黃金十年》
▶https://play.google.com/store/books/details?id=NIRKEAAAQBAJ

Kindle版
▶https://www.amazon.com/dp/B09KH5NWB9

［常威近代史］第六百六十回 中西文化巨匠徐光啟（高清錄音版）

#唔鍾意睇字可以聽

https://fb.watch/bJfDaduhhc/

【常威近代史】（六百六十一回）
達賴歸天

1933年12月7號，高崗（1905-1954）等人喺拈花寺正式恢復紅42軍，高崗早年響西北地區從事革命活動，後任陝甘邊紅軍臨時總指揮部政治委員、紅26軍政治委員、紅15軍團政治部主任等職務，係陝北紅軍代表人物之一。抗日時期，任陝甘寧邊區保安司令、中共中央西北局書記、陝甘寧晉綏聯防軍代政委等職務。第二次國共內戰時期，任中共中央東北局副書記、書記、東北軍區司令員兼政治委員等職。1949年中華人民共和國成立後，任中央人民政府副主席、東北人民政府主席，集東北黨政軍大權於一身，號稱「東北王」。1953年，接受新職擔任國家計劃委員會主席。因與饒漱石（1903-1975）密謀取代劉少奇、周恩來而遭批判，上後自殺身亡，1955年，被開除黨籍。高崗饒漱石反革命事件，喺中華人民共和國建國初期一件重要政治大事。

12月7號，蘇、浙、皖、豫、贛、湘、鄂、滬8省市政府及糧商代表喺上海舉行糧食會議。呢次會議所作出決議，決定成立中國糧食運銷股份有限公司，簡稱為糧運局，推舉民族資本家顧馨一（1872-?）、吳恒為正副籌備主任。該公司辦理設置貨倉、運銷糧食業務、以救濟農村，調節量價，穩定便利運銷糧食為宗旨，總公司設於上海，各省市分設分公司，資本約為100萬元，由各省市糧商認購，另外中央撥借100萬元作輔助金。

12月13號，福建人民政府決定將福建分成閩海、延建、興泉、龍漳四省。同日，康藏自1930年 以來紛爭不斷，國民黨中央提出處理康藏糾紛三項辦法。第一，命令達賴代表貢覺件尼再電達賴，切實停止軍事行動，關於大青、青柯兩寺喇嘛及甘孜等防地問題，應聽候中央秉公處理，不能擅自行動；第二，勒令劉湘（1888-1938）對劉文輝（1895-1976）駐扎西康邊境軍隊酌予接濟；第三，命令青海省主席馬麟（1873-1945）加派部隊屯駐玉樹一帶，以固西防。總之又係立立亂，不過幾日後，達賴喇嘛13世就圓寂西歸，一陣再講。

12月15號，張學良由意大利威尼斯乘坐郵輪回國，臨走之前，法西斯之父墨索里尼（1883-1945）贈其皇冠大十字勳章。同一日，上海百樂門舞廳開業。百樂門大舞廳（The Paramount）係上海一個歷史悠久綜合性娛樂場所。全稱「百樂門大飯店舞廳」。該娛樂場於1933年正式對外營業，曾一度係夜上海核心地帶，紙醉金迷，吸引無數社會名流幫襯，被譽為「東方第一樂府」，百樂門大舞廳位於上海市靜安區愚園路218號，華山路路口處，東臨靜安寺。去得百樂門，就係貴族嘅象徵。1940年2月25日凌晨，當紅舞女陳曼麗被槍擊後不治身亡，轟動上海。1949年後，舞廳主體建築改造為紅都戲院，後又改為紅都電影院。1990年影院大門口雨棚因年久失修倒塌，壓死行人一名，電影院隨即被責令停止營業，進行大修。1994年，紅都影劇場更名為百樂門夜總會。2002年，百樂門舞廳重新開張，修繕後嘅百樂門，被譽為「東方百老匯」。2013年上海百樂門文化娛樂有限公司獲得百樂門舞廳經營權，百樂門修繕工程再一次啟動，2017年4月22日正式開業。

12月15號，立法院通過《中醫條例》，12月16號，日本係東北修建嘅拉濱鐵路通車，全長272公里；同一日，海關開始徵收外糧進口稅； 12月17號，第13世達賴喇嘛阿旺羅布藏塔布元嘉穆措（1876-1933） 喺拉薩圓寂，終年56歲。21號，南京國民政府追贈十三世達賴為護國弘化普慈圓覺大師。達賴13歲出生於西藏東南部達布省一個偏僻地區，2歲嘅時候破例確立為第13世達賴喇嘛轉世，得到清帝國皇帝認可。達賴18歲坐堂時，依靠神諭揭露咗一單響靴底放置魔符嘅陰謀，攝政同首相因此被捕入獄，真係稀奇古怪，1895年，20歲嘅達賴13世開始親政，在樹立權威以後，很快表現出對清帝國主權嘅輕視，西藏政府不再承認冇西藏參加嘅中英各項協定，並且抗拒英國人開闢通商路線，達賴13世反英立場，係得到佢嘅導師之一俄藉蒙古人德爾智（Agvan Dorjiev，1854-1938）嘅全力支持。1904年3月，喺江孜大敗藏軍嘅榮赫鵬（Francis Edward Younghusband，1863-1942）率領英軍迫近拉薩，達賴13世流亡外蒙。

1906年，達賴離開烏蘭巴托回到青海，1908年9月20號，達賴從五台山到達北京，覲見光緒同慈禧太后，但係無意接受「誠順贊化西天大善自在佛」邽號，並且開始萌生藉助英國對抗漢族嘅想法。1909年12月，達賴返回拉薩，之後又因為同清帝國發生衝突被迫再次出走，清帝國曾經廢黜其全部職權，並由九世班禪活偉佛確吉尼瑪（1883-1937）接手，但為確吉尼瑪所拒絕。1912年6月，達賴從印度返返西藏，不久即恢復對西藏嘅控制權。之後達賴一直謀求西藏獨立，為此先後同中央政權發生多次衝突同戰爭，響統治西藏20幾年中，達賴進行咗多項政治同經濟改革，並且一度廢除死刑，但係佢同九世班禪確吉尼瑪嘅裂痕始終無辦法彌合，俾西藏留下咗一個至今仍然難解嘅死結。

十三世達賴喇嘛一生處在英國、俄羅斯爭奪中亞霸權大博弈時代，而西藏正處於二者爭奪地區之中。外交上周旋於英國、俄羅斯、又同清政府與民國各中央政權之間保持距離，令西藏得以保持半獨立嘅自治狀態。其一生多次流亡，亦多次發動戰爭，名副其實係一個軍事和尚。

#常威💀 #蔣介石平反系列  #中日戰爭 #民國歷史 #佛經抄寫員

［常威近代史］第六百六十一回 達賴歸天（高清錄音版）

#唔鍾意睇字可以聽

https://fb.watch/bLNusN9TiR/

【常公子歷史頻道458回：黃金十年系列之 一紙雖匾兩個面門】

♊ 今集係黃金十年系列嘅第一集，黃金十年，一般指謂1927年到1937年依10年間，起點係蔣介石國民黨完成北伐，統一中原，高懸青天白日旗成立南京民國政權，而終點就係1937年7月7號嘅七七蘆溝橋事變，中日戰爭全面爆發，中間10年，被國民政府稱呼為「黃金十年」。一般理解，依10年時間就係民國國政府全力發展中國嘅美好10年。

♈ 首先要理解幾個概念，當時南京國民政府亦唔係中國國內唯一一個政權，同時間存在嘅其它政權政權仲有好多。最起碼，共產黨從來都唔承認南京政權嘅合法性；其次，中日戰爭，亦唔係響1937年發生，早響1931年918事變，中日戰爭其實早已經爆發；第三，所謂黃金十年嘅「含金量」 到底有幾多？真係見仁見智。但係我想講，叫得做黃金十年，最基本起碼要冇戰爭發生，國泰民安，但1927年到1937年之間，戰爭從來未停止過，除咗中日戰爭外，軍閥與軍閥之間嘅混戰仍然存在，而南京政府嘅剿共戰爭，更加係越演越烈，勞民傷財，慘不忍睹。

♏ 稱呼1927年到1937年之間嘅十年為亂世，其實亦不枉為過。中國嘅亂局同分裂狀態，始於1840年第一次鴉片戰爭，真正嘅大一統，要去到1949年中華人民共和國建立之後，真正嘅國泰民安，其實要到今時今日嘅21世紀，中間其實相隔咗150年，一個好漫長嘅時間，一個非常之漫長嘅醞釀期。但係到咗今日，2022年，似乎亂世又會開始，一場新型冠狀病毒成為高速催化劑，戰爭已經再次響歐洲發生，各種隱藏多時嘅問題亦都相繼爆發。未來會係點？其實冇人知道。

🎦https://youtu.be/YAZpWyi6rtA

https://www.youtube.com/playlist?list=PL0RVUAILQUOvTo8JJrayjrvd_Nbjc-0Me

❤請加入常公子的近代史世界！

#常威 #廣東話 #中國近代史 #HongKong #Chinese #History