時間線去到1929年4月,4月1號,桂系軍隊改稱為「靖難軍」,決定救援武漢,個名都幾古代feel,其實啲軍閥都幾鍾意用名相嚟欺蒙大衆,最重要係氹啲年青人上戰場掘地雷。用今日嘅術語,叫「煽動」,其實煽動有罪,又係啱嘅。同日,日本海軍開始喺東海作爲期一個月嘅海上大演習,以中國為假想敵(有需要咩?),當然我個人覺得,所有舉動,都係舖排大舉侵略東北,建立偽政權「滿洲國」,當時末代皇帝四眼仔溥儀已經響日本人手上鳥,要用架喇(咁貴買返嚟)……
4月2號,桂系李明瑞(1896-1931)倒戈投蔣,實係蔣桂戰爭嘅大轉折;同日全國律師協會成立;奉天市改稱瀋陽市;全北平街道沙罩燈改換電燈照明。4月5號,毛澤東代表紅四軍前委覆信中共中央,對中央關於時勢嘅分析同埋對紅軍嘅行動策略指示提出批評。今年2月,中共中央致信紅四軍,聲稱黨嘅力量薄弱,無力促進新嘅革命高潮,要紅四軍分成小部隊,有組織地散入湘贛邊境鄉村,進行土地革命,紅四軍於本月3日收到依封信(封信足足寄咗兩個月)。毛澤東喺回信度指出:「中央此信對客觀形勢和主觀力量的估量,都太悲觀了」、「中央要我們將隊伍分得很小,散向農村中,朱毛離開隊伍,隱匿大的目標,目的在於保存紅軍和發動群眾,這是一種不切實際的想法」。信裡面仲講:「在國民黨軍閥長期戰爭期間,我們要和蔣桂兩系爭取江西,同時兼及閩西、浙西,在三省擴大紅軍的數量,造成群眾的割據,以一年為其完成此計劃」。當時嘅中央只不過係冷氣軍師,真正面對困難同挑戰、響戰場上出生入死嘅人係毛澤東、朱德同彭德懷。
4月6號,蔣Sir電令四川省政府主席劉文輝(1895-1976)出兵討伐挑起川亂戰事嘅20軍軍長楊森(1884-1977),由1928年開始,川軍二劉,即劉湘(1890-1938)、劉文輝同楊森嘅戰爭非常激烈,蔣Sir曾經講過「中央對此,頗抱悲觀」,四川同好多地方一樣,都仲係立立亂,軍閥同武裝力量之間打嚟打去,南京中央,山高皇帝遠,其實無辦法插手。
4月11號,中共紅四軍前委在於于都召開會議,命令彭德懷率領部隊返回井岡山;4月12號,國民政府設立海軍部,楊樹莊(1882-1934)任首任部長;4月13號,中華民國加入萬國商會;4月15號,國民政府廢止1929年以前頒發嘅勛位同勛章,舊五色旗嘅中華民國留低嘅蘇州屎同牛鬼蛇神,全部要鏟走!
4月,香港發生1842年開埠以來最嚴重水荒,港英政府被迫實施食水七級管制,香港市民為咗取水苦不堪言,因為今次嘅大水荒,港英政府開始籌辦興建多個水塘貯水,由香港嘅用水問題,可以反映出香港人口不斷增長。我諗,1929年時,英帝國都只係將香港當成一個貿易轉口港交收換錢嘅小型殖民地,從來冇諗過,係若干年後,呢個小小地方,會變成亞洲超級大都會,一切都係同中國歷史發展相關,同蔣Sir同毛澤東相關。
#常威💀 #蔣介石平反系列 #黃金十年 #民國歷史