大清亡國關慈禧蛋牛治 3

💜最新上架
常威近代史 第十三部 【鬼子來了】

電子書下載⬇⬇
https://play.google.com/store/books/details?id=cz6qEAAAQBAJ

🙏請捧場

［常威近代史］第七百七十八回 百萬人會戰其實冇打（高清錄音版）

#唔鍾意睇字可以聽

https://fb.watch/jPiGtMErvC/?mibextid=Nif5oz

【常威近代史】（七百七十九回）
焦土

時間線去到1938年6月，隨住國軍主力退卻，徐州失守，武漢三鎮外圍防線全面瓦解，中華民國臨時首都武漢亦暴露喺日軍嘅天羅地網之下，50萬日軍突破隴海鐵路防線，突入中原，大軍壓境，武漢情況岌岌可危。

1938年6月1號，蔣介石命令豫東守軍作戰略轉移。同日，北平、南京兩個偽政權宣佈減免日本進出口關稅，我曾經講過，關稅係一個非常之重要嘅外交問題，好多時候引發戰爭，亦由關稅問題而起。6月2號，美國華僑5000幾人遊行反對日本侵略中國，當時嘅美國政府，係想完全唔介入任何戰爭之中（包括歐洲同遠東），當然呢個如意算盤，最後佢哋都係假打唔響，之後幾年，佢哋被迫介入，而且介入得極深，到咗最後，美國仲成為最後嘅勝利者，打造二次世界大戰之後以美國美圓為首嘅世界秩序，直至今時今日。講真，整個過程真係有少少無心插柳，行運行到腳趾尾，俗語叫——被逼發達。

6月4號，由於日本飛機不斷轟炸廣州，經由廣州前赴到香港避難嘅人就達到10萬人，相信當時亦冇人會諗到，日本將會響不久將來佔領香港呢個英國殖民地。6月6號，開封失陷，今日全國美術界抗敵協會喺武漢成立。6月8號，中國駐日使館全體管員撤回，日本飛機瘋狂轟炸廣州，嶺南大學被炸毀，全市停電。今日，東北抗日聯軍4000人響牡丹江奎山同日軍及偽警激戰獲勝。

6月9號，鑒於局面岌岌可危，駐武漢黨政軍機關開始撤退；今日日本亦都拒絕咗英美開放長江嘅要求，你想繼續做生意都唔得架。6月9號，亦都係中日戰爭爆發以來一個非常之重要嘅日子，一個可歌可泣嘅悲痛日子。因為今日上晝9點，國軍第8師蔣在珍（1896-1952）部隊喺花園口炸開黃河大堤，引發出一場慘絕人寰嘅大洪水，日軍係攻佔徐州之後，集合南北兩路兵力，預備奪取中原地帶，矛頭直指武漢三鎮。今個月1號，蔣介石喺武漢召開最高軍事會議，秘密決定炸開黃河大堤，阻止日軍西進。今個月4號，國軍奉命喺中牟縣境趙口掘堤，原定當天午夜放水，不過掘咗3日3夜水流仍然不暢，呢個時候日軍已經響6月5號攻陷開封，逼近鄭州，6月7號，新8師改在鄭州以北嘅花園口決堤，利用洪水阻擋日軍前進。

今日黃河決堤後，守軍怕缺口太少，未能做到既定戰術效果，於是又用兩門平射炮擊射河堤，將缺口擴展至370米，導致黃河改道。滔滔河水瞬間淹沒咗鄭縣、中牟等17個縣，水頭沖越隴西線並氾濫到安徽境內，數十萬人頓成水中浮屍，140萬災民無家可歸，而日本則響依場人為水災中損失約2個師團。6月11號，蔣介石又命令新8師偽造一個日本轟炸令黃河決口嘅現場，並在外國記者面前用高粱桔等農作物堵塞決口，企圖將炸開黃河大堤嘅責任推到日軍身上，咁你日本人壞事做盡，唔係你又係邊個呢？但6月16號，第一戰區司令官程潛（1882-1968）電告蔣介石，黃河決堤之後，日軍仍然繼續推進，情況可以綜合成一句説話，正正就係賠了夫人又折兵。

炸毀花園口黃河大堤，究竟浸死咗幾多平民百姓？事後已經冇辦法知道，炸堤之前，國軍有冇通報平民百姓及時撤離疏散，似乎亦都係一定冇，咁死咗嗰幾十萬中國平民百姓，就真真正正係叫做枉死，我完全無辦法理解件事係點發生？或者點解可以發生？基於戰術需要？但又製造唔到阻止日軍推進嘅效果？無情白事浸死幾十萬人，咁究竟又算唔算係戰爭罪行呢？事後當然亦冇人追究呢件事責任誰負？總之就係侵死咗幾十萬人，亦都唔好問點解？戰爭嘅荒謬絕倫，就係呢件事之中展露無遺，如果你仲想打仗，你一係就係癲嘅，一係就係傻嘅。

不過上述嘅玩法，似乎亦都係「焦土政策」嘅一部份，焦土政策係經過思考同蘊釀，早響抗戰開始前，中國嘅戰略學家就掌握咗有關俄國係1812年打敗拿破崙嘅時候，曾經放火將莫斯科夷為平地嘅事例，英國人喺南非打波爾戰爭（Boer War）亦都使用過同樣嘅策略，中國人用焦土政策打仗，更加係常用手段，中國人叫「堅壁清野」，李宗仁將軍亦都講過要用「焦土政策」對付日本人，蔣介石講到明抗戰期間國民要有犧牲嘅準備，亦都包含咗「焦土政策」嘅內容同手段。

事實上當國軍1937年11月撤出上海嘅時候，外國媒體也曾經報導「中國人放火燒了日本人所有的工廠、大批房舍和兩個大型燃煤場都付之一炬」、「撤退部隊在背後放火驅趕逃難的平民百姓，使他們蜂擁擠向法租界橋面和河岸尋求安全」、「外國軍事觀察家們，驚駭於中國軍隊在自己仍有控制權的區域內，對所有東西大使進行破壞的做法，大部份的破壞被認為是毫無目的的」……焦土政策的實施，亦不單純針對城市，整個抗戰過程其實不斷使用，目的只係為咗阻止日軍繼續推進，當中多少平民百姓失去生命？流離失所？相信已經難以估計……

之前講過日軍佔領嘅徐州，其實已經被國軍夷為平地，「堅壁清野」，唔留低任何有用嘅資源比敵人利用，其實理所當然，亦都係戰爭中常用做法，不過令黃河決堤所造成嘅大災難，就唔係「堅壁清野」四個字可以解釋到，關於呢件慘絕人寰嘅大慘事，下次我繼續講。

#常威💀 #蔣介石平反系列  #佛經抄寫員 #中日戰爭 #民國歷史

【渠頭者聯盟第十二部 明日大嶼打到虢礫緙嘞】

電子書下載⬇⬇

https://play.google.com/store/books/details?id=3DelEAAAQBAJ

💖電子書最新上市！請大家踴躍捧場！

［常威近代史］第七百七十九回焦土（高清錄音版）

#唔鍾意睇字可以聽

https://fb.watch/jXpXBQfzU9/?mibextid=Nif5oz

【常威近代史】（七百八十回）
澎湃動地 呼號震天

蔣介石下令向花園口決開黃河河堤以阻止日軍西進無疑係一個悲劇性嘅決定，佢之所以咁樣做，係基於對日本人可能嘅下一步做法所生嘅恐懼感，並唔係佢哋嘅實際行動。蔣介石預料日本人拿下鄭州呢個鐵路樞紐之後，會利用京漢鐵路響國民政府向四川轉移前進襲武漢。然而，當時不論是響東京嘅參謀本部，抑或華中方面軍同埋地區司令官，都已經下令要求原本嚮前推進嘅部隊暫停前進，所以日軍停止向西追擊係主動嘅決定，所以花園口決堤阻止日軍西進嘅論點係不可能成立。日軍喺半年後先發動武漢會戰，攻陷武漢，並非因為花園口決堤，而係因為兵力不足，需要從國內運兵嚟補充兵源。

但係黃河決堤之後，洪水就以每日16公里嘅速度嚮前奔流，淹沒所經過地區嘅一切，黃河亦都因此而改道，不再向東南流向山東，而泛流轉向西南，響進入淮河同各大湖泊之前，流經河南、安徽同江蘇等農產豐饒嘅寬闊土地，根據估計，呢次人造洪水約有80-90萬人因此流離失所而死亡，400萬人一夜之間成為難民。

《豫省災況紀實》對於黃泛區人民的悲慘遭遇做了如下描寫：

泛區居民因事前毫無聞知，猝不及備，堤防驟潰，洪流踵至；財物田廬，悉付流水。當時澎湃動地，呼號震天，其悲駭慘痛之狀，實有未忍溯想。間有攀樹登屋，浮木乘舟，以僥倖不死，因而僅保餘生，大多缺衣乏食，魂蕩魄驚。其輾轉外徙者，又以饑餒煎迫，疾病侵奪，往往橫屍道路，填委溝壑，為數不知幾幾。幸而勉能逃出，得達彼岸，亦皆九死一生，艱苦備曆，不為溺鬼，盡成流民……因之賣兒鬻女，率纏號哭，難捨難分，更是司空見慣，而人市之價日跌，求售之數愈夥，於是寂寥泛區，荒涼慘苦，幾疑非復人寰矣！

慘絕人寰，洪水不單止摧毁咗當年嘅農業收成，而且亦都影響咗往後幾年嘅收成，依件事造成嘅衝擊相當深遠，不僅係因為泛洪帶嚟大量淤泥，更因為堤防緊急決開，使得區內原本就脆弱嘅排水系統情況更加惡劣，導致衛生環境高速惡化，糧食短缺，傳染病頻生，亦引發咗1942年到1943年嘅河南大饑荒，估計約有200萬人餓死，有200-300萬人成為難民，流離失所，馮小剛2012年電影《1942》就對河南大饑荒有深刻描述。被決開嘅花園口堤防，直至去到1947年聯合國善後救濟總署嘅一項計畫實施後先至被修復。

總括而言，花園口決堤事件，根本冇需要發生！就算真係能夠拖慢日軍進攻武漢嘅步伐，所付出嘅人命代價，實在太大，完全唔符合比例。

1938年6月12號，日軍華中派遣軍所屬嘅第6師團水陸夾擊，攻陷安慶，武漢會戰序幕拉開。花園口決堤後，日軍改變戰略計畫，決定集中兵力，溯長江而上，一路直趨信陽，切斷平漢綫，迂回武漢之北；另一路沿長江兩岸西攻武漢，切斷粵漢綫，迂回武漢之南。而日軍主力則集結於長江以南，最後從北、東、南三面，合攻武漢。針對日軍嘅意圖，中國軍隊以武漢為中心作出咗新嘅戰略部署，第一戰區程潛（1882-1968）部隊駐防信陽以北平漢線以西地區，阻止華北日軍南進；第五戰區李宗仁（1891-1969）部隊駐防大別山，負責長江以北防務；第三戰區顧祝同（1893-1987）部隊駐防湖口以東嘅江南地區，阻止日軍西進；第九戰區陳誠（1898-1965）部隊，負責武漢以東嘅江南防務。

6月13號，《前衛文化》月刋響武漢創刋。6月14號，國民黨西安當局逮捕中華民族解放先鋒隊西北總長李連壁（1917-），並且勒令《救亡》雜誌停刊。同日，蔣介石命令編組第九戰區，司令長官為陳誠；6月15號，經濟部同瑞士簽訂技術合作合同；6月16號，蔣介石宣佈組織三民主義青年團；6月18號，日軍發出準備進攻武漢命令；6月20號，蒙旗抗日總動員委員會響陝西榆林成立。6月21號，日軍響潮汕前衛南澳島登陸。6月27號，教育部通令各國立大學院校，本屆統一招生，私校可自行招考。今日，日本成立華北開發股份公司；國民政府公佈《懲治貪污暫行條例》。6月28號，廈門偽政府成立；同日，日軍響蘇北炸毀運河大堤。6月30號，上海文化界國際宣傳委員會發表統計資料：自1937年7月到1938年6月底，日本軍機共對中國16個省、257個城市、18條交通線一共275處，出動飛機16710架次，進行2472次轟炸，投彈33192枚，炸死居民16532人，炸傷21752人，數字精凖得可怕。

今個月初，第一戰區由兵團司令薛岳（1896-1998）指揮嘅15萬國軍精銳部隊，響河南蘭封、商丘一帶陷入被動局面。上個月中旬，軍委會制定咗喺依一帶圍殲日軍土肥圓師團嘅計畫。胡宗南（1896-1962）、李漢魂（1895-1987）、俞濟時（1904-1990），宋希濂（1907-1993）、桂永清（1901-1954）共12個師投入戰鬥，6月25號，國軍嘅全面攻勢開展，但係佢哋遭到異常頑強嘅抵抗同埋反撲，去到29號，仍然無法取得有效嘅進展，反而被日軍迂回側背，援兵亦都開始到達。蔣介石為15萬國軍無法殲滅僅20000人嘅土圓肥師團大動肝火，指責各軍長「指揮無方，行動復懦」，桂永清、黃傑（1902-1995）被撤職，擅自退出蘭封嘅師長龍慕韓（1898-1938）被槍決。

1938年6月到此為止……

#常威💀 #蔣介石平反系列  #佛經抄寫員 #中日戰爭 #中華民國

［常威近代史］第七百八十回 澎湃動地 呼號震天（高清錄音版）

#唔鍾意睇字可以聽

https://fb.watch/k0xP-VwErR/?mibextid=Nif5oz

【常威近代史】（七百八十一回）
斷捨私欲 開生死智

對於蔣介石及一眾國軍將領，究竟佢哋有冇對花園口決堤事件、導致直接或間接過百萬條人命死亡，過千萬人流離失所，感覺慚愧呢？歷史並冇講我哋知道，甚至當時嘅國軍同蔣介石唔承認做過，就好似部份日本人唔承認南京大屠殺發生過一樣。戰爭就係咁殘酷同荒謬嘅一回事，當一切章典秩序同埋法律制度響戰爭面前瓦解，人間可以瞬間變得無比荒謬，地獄18層低處未見低。不過推根究底，一切嘅慘劇都係源於日本侵華嘅野心，正如日本人喺1942年到1943年河南大饑荒發生期間賑濟過災民，難道又可以修補佢哋發動侵略戰爭嘅罪行咩？

國軍就算千不是萬不是，但佢哋仍然係拋頭顱、灑熱血抵抗侵略者嘅主力，維護咗中華民族嘅尊嚴同國家嘅統一？但係亦唔可以完全將功補過。呢個世界嘅嘢，一單還一單計算，一單嘢啱就係啱，一單錯就係錯！臨門一腳往往最重要，如果成日撈埋防守助攻一齊嚟講，根本唔需要講。正如一個大善人如果某一次殺咗人，佢都要因為殺人嘅罪責而被判刑；同樣道理，大惡人偶然做咗一次好事，扶一次阿婆過馬路，亦唔代表可以洗白改過自新。

時間線進入1938年嘅7月，美國新聞協會向中國攝影師王小亭（1900-1981）頒發獎章，以表揚佢嘅傑出成就。王小亭供職於美國米高梅公司《今日新聞》報，響淞滬戰事中，佢係唯一拍攝到19路軍奮勇作戰新聞照片嘅攝影記者。當時佢拍攝咗日軍飛機空襲上海時一個令人慘不忍睹嘅鏡頭，呢幅相就係著名嘅新聞照片「上海南站空襲下的兒童」，大家應該睇過，有一個滿身骯髒嘅一兩歲孩子坐喺頽垣敗瓦面前放聲哭嚎。相片喺《今日新聞》刊出後，令千萬美國人心靈震動。我亦相信，當時都有唔少美國人係睇過呢幅相之後，先開始同情中國或去理解中國。新聞照片嘅威力係20世紀的確唔可以講笑，不過喺今時今日嘅21世紀現代世界，任何照片（圖）或影片，睇嚟都唔會帶來如此巨大的感染力，因為一切都太濫太膩了。

［常威近代史］第七百八十一回 斷捨私欲 開生死智（高清錄音版）

#唔鍾意睇字可以聽

https://fb.watch/k63JDXHnGE/?mibextid=Nif5oz

【常威近代史】（七百八十二回）
流血冇咁多嗰個咪叫贏囉

1938年7月7號，甘肅洮惠渠完工放水，抗戰建國紀念美術展覽會喺漢口舉行。今日，河北東部農民、礦工暴動爆發。依一場由八路軍第四縱隊宋時輪（1907-1991）、鄧華（1910-1980）部隊配合嘅暴動西起通縣、東至山海關、北起興隆、青龍，南至渤海灣。暴動隊伍組成冀熱察寧抗日聯軍，由共產黨人高志遠（1907-1939）擔任司令員，李運昌（1908-2008）、洪麟閣（1902-1938）任副司令員，他們先後攻下盧龍、遷安、玉田、樂亭、薊縣、平谷6個縣城，以及大部份重要集鎮，並且一度威脅平津兩地。去到8月，抗日聯軍同八路軍第四縱隊聯合建立了冀熱遼軍區。

共產黨喺大後方組織民眾組成民兵遊擊隊抗日，亦都係遊擊運動戰嘅其中一種戰略，毛澤東曾經講過「這一次戰爭是在中國境內打的，這就是說日本人受到敵視他們的中國人民的完全包圍」，中國同日本比，完全係冇得比，軍備固然唔夠你嚟，但係中國勝在人夠多，響日本廣大佔領區內，為咗應付依一類神出鬼沒嘅遊擊隊，以及無日無之嘅民間暴動，日本軍方不得不調派大量軍人駐守根據地，時間拖得越長，就會對日本嘅本土經濟造成巨大嘅壓力，毛澤東亦曾經咁樣講過「在佔領中國的長期負擔的重壓下，日本的經濟是要崩潰的；在無數次勝負不決的戰役的考驗下，日本軍隊的士氣是要渙散的」，以空間換取時間，每場戰役亦不在乎勝利與否，邊走邊打，就係要拖死你，要你冇時停冇時得閒，其實戰爭，真係一種偉大嘅藝術。

當然如果你認為戰爭必須有個勝利者，同一個戰敗者，其實都係一種幾古老嘅想法。現代戰爭，好多時候係為咗達成唔同嘅軍事及政治目的，尤其以代理人戰爭更甚，而二次世界大戰之後，其實世界上爆發嘅戰爭，嚴格嚟講，大部分都係代理人戰爭，真正要打嘅國家或政權好少出面出命，只係會出錢同出軍火。更加認真去講，戰爭其實係冇勝利者嘅，只有重傷者同輕傷者嘅分別，邊個受傷冇咁重、流血冇咁多嗰個咪叫贏囉，輸嗰個之後就要賠償比贏嗰個，從而建立一套新經濟秩序作利益輸送，好多時候係貨幣匯率同關稅，有陣時係石油同天然資源。

7月9號，今年3月，國民黨臨時全國代表大會決定創設三民主義青年團，並且由蔣介石擔任團長，意識形態教育，愈後生做起愈好，最好就由一出世開始做。6月16號團章公佈，宣佈以團結革命青年，力行三民主義，捍衛國家，復興民族為宗旨。今日，三民主義青年團中央臨時幹事會成立，由陳誠（1898-1965）為書記長。三民主義青年團屬中央團部下，分設支團部、區團部、分團部、區隊、分隊等各級基層組織。組織年青人上戰場，當然亦都係戰爭嘅一個非常重要部分，死完年輕力壯嘅一批，就要有第二批年輕力壯補上，唔好講道德問題，如果講道德，任何情況之下都唔應該發動任何形式嘅戰爭。

［常威近代史］第七百八十二回 流血冇咁多嗰個咪叫贏囉（高清錄音版）

#唔鍾意睇字可以聽

https://fb.watch/k9XqCzKexK/?mibextid=Nif5oz

【常威近代史】（七百八十三回）
奮鬥到最後一息

時間線進入1938年嘅8月，中日全面戰爭進入第二年，日本人以強大軍事力量，只係用咗短短一年時間，差唔多佔領咗整個中華民國半壁江山，雖然大家聽到唔少大捷小捷，但真正嘅事實係，日本軍隊無往而不利，蔣介石及其盟友嘅軍隊大部分時間只係節節後退，有時候根本打都唔使打，從南京退到武漢，蔣介石甚至不惜炸開黃河決堤，用百萬條人命阻止日本軍隊前進，仲要徒勞無功添。加上日本擁有全面空中優勢，而且仲未計海軍。中華民國（蔣介石政權）能夠將日本人打敗或趕出中國，無疑係天方夜譚，講都冇人信，唯一可以做嘅，就係拖延時間，以空間換取時間，等待日本自己自爆，自己拖垮自己，大家都知道最後嘅答案，日本真係會自爆，同埋畀美國人嘅2粒原子彈爆！

8月1號，第18集團軍高級參議宣俠父（1899-1930）喺西安遭到國民黨特務綁架殺害，宣俠父係共產黨人，1934年夏，宣俠父奉調來到上海化名「楊永清」，參加中共中央特科工作，係中央特科嘅負責人之一。1935年化名「宣古漁」，赴香港從事統戰工作。宣俠父曾任中共華南工委書記，任內推動了李濟深（1885-1959）、陳銘樞（1889-1965）、蔣光鼐（1888-1967）、蔡廷鍇（1892-1968）等組織反蔣抗日的「中華民族革命同盟」，1936年6月，李宗仁等人發動「兩廣事變」後，宣俠父任重建嘅國民革命軍第十九路軍政治部主任兼六十一師參謀長。後來擔任中華民族革命同盟梧州市委主任。1936年12月西安事變後，奉周恩來、葉劍英電示，宣俠父到西安紅軍聯絡處任職。不久，到延安參加了中國共產黨全國代表會議。宣俠父遇害後，周恩來曾三次向蔣介石追問宣俠父下落，最終獲得蔣介石答覆稱：「宣俠父是我的學生，他背叛了我，是我下令殺掉的。」1945年，中共七大召開時，中共為宣俠父舉辦追悼會。

國共雖然合作，但係明爭暗鬥不絕，政治真係唔係講玩。8月1號，華僑企業家，虎豹別墅主人胡文虎（1882-1954）喺香港創辦《星島日報》，《星島日報》到今時今日仍然出版。8月2號，四川重慶防空大隧道舉行開工典禮，重慶防空大隧道位於市中心區嘅18梯附近，從地面掘入地底約10米深左右，然後平伸約兩公里長，中途分叉成三個隧道出口，隧道共分為7段，內寬均高約2米多，兩旁設有長凳，用油燈照明，隧道建成之後預計可以一次過容納40000人，武漢雖然仍未失守，但蔣介石已經為撤退去大後方重慶做好一切準備功夫。

8月4號，駐武漢國民黨中央各行政機關全部遷移重慶；同一日，黃梅失陷，武漢已經全面暴露喺日軍面前。8月6號，《抗敵新聞》喺武漢創刊，8月7號，大敵當前，蔣介石下令疏散武漢人口，限本月15日前撤出居民50萬人，一齊前赴大後方重慶！今日，延安舉行「街頭詩運動日」活動。8月10號，日本喺上海成立華中蠶絲株式會社，控制佔領區內嘅絲綢業。8月11號，青海省祭海大典喺海靛舉行。

［常威近代史］第七百八十三回 奮鬥到最後一息（高清錄音版）

#唔鍾意睇字可以聽

https://fb.watch/kfhfPfgtRL/?mibextid=Nif5oz

【常威近代史】（七百八十四回）
「中統」「軍統」

1938年8月15號，國民政府頒佈《懲治漢奸條例》，一旦被認定為「漢奸」，相信亦沒有什麼好收場，打靶亦屬正常。不過，人在江湖往往身不由己，有得揀，邊個想做漢奸？當然條路係自己揀，打靶亦唔好喊。8月16號，中國流通圖書館喺上海開館。8月17號，武漢衛戍司令部下令解散武漢「青年救國會」等抗日救亡群眾團體，原因應該係意識形態嘅問題。8月21號，國母宋慶齡（1893-1981）喺紐約指責美國將軍火供應給日本人，大家冇聽錯，喺1941年日本偷襲珍珠港之前，美國人仍然有做日本人軍火生意，軍火交易永遠都係大生意，資本主義世界鐵則，唔通有生意唔做咩？當中亦唔涉及正義或唔正義嘅問題，一手交錢，一手交貨，基本上唔需要談論道德（唔找數就唔道德喇）。

8月22號，武漢三鎮已經暴露喺日軍嘅鉄蹄之下，日本皇軍下令攻佔漢口。8月23號，《救中國》周刋響武漢創刊，胡繩（1918-2000）擔任主編。胡早年就讀於蘇州中學，1934年考入北京大學哲學系就讀，次年退學前往上海，在中國共產黨領導下參加左翼文化運動。1937年抗戰爆發後，胡前往武漢，次年正式加入中共，任第五戰區文化工作委員會委員等職務，後又隨國民政府遷往重慶，任《新華日報》編委等職。抗戰勝利後，胡回到上海，先後出任上海和香港生活書店總編輯。中華人民共和國成立後，胡出任中共中央宣傳部教材編寫組組長、中華人民共和國新聞出版總署黨組書記、人民出版社社長等職，後升任中宣部秘書長、《學習》主編、馬列主義學院副院長、中共中央政治研究室主任、《紅旗》雜誌副主編等職。在此期間，胡繩參加了《毛澤東選集》的編輯出版工作。1975年，胡繩出任國務院政治研究室負責人之一，並參與領導毛澤東選集工作小組工作，文革結束後任毛澤東著作編輯委員會辦公室副主任兼中共中央文獻研究室副主任。1982年，胡出任中共中央黨史研究室主任，負責研究中共黨史，並參與起草《關於建國以來黨的若干歷史問題的決議》和新《中華人民共和國憲法》等重要文件。1985年接任中國社會科學院院長。1988年起當選為全國政協副主席。1998年胡繩卸去社科院院長一職，2000年於上海去世。

8月24號，中國航空公司班機「桂林」號被日軍擊落，全機12名乘客罹難，好彩當時仲未有737同747。同一日，中國外交部否認意大利調解中日戰爭嘅傳聞；8月25號，朱德發表《告國民書》，通報八路軍戰況，8月27號，國民政府喺重慶舉行祭孔典禮。8月28號，中國回民救國協會青年服務團喺漢口成立；8月30號，偽「東亞文化協議會」響北平成立，當然要加個「偽」字。

今個月，由新西蘭友人路易艾黎（1897-1987）發起組建嘅抗戰工業企業聯合體——「中國工業合作協會」響漢口成立，由孔祥熙（又係佢，1880-1967）擔任理事長，協會成立後，迅速係大後方川康、甘青、陝寧、晉豫等地區組織工、農、交、供銷等各類合作社，掀起大後方「工合」運動浪潮，「工」即係「工業」，「合」即係「合作社」。今個月，八路軍冀察熱遼軍區成立。哲學家翦伯贊（1898-1968）所編著嘅《歷史哲學教程》由上海生活書店出版。

1938年8月，國民黨兩個特務機關「中統」同「軍統」正式成立。中統，全稱為「中國國民黨中央執行委員會調查統計局」，前身為「國民黨中央組織部黨務調查科」。本年3月國民黨臨時全國代表大會決定成立，朱家驊（1893-1963）任局長，去到1940年，中統擁有特務13000人，中統以黨政機關、文化團體同大中學校為活動重點，以國民黨各級黨部為活動基地，在各省市普遍設立調查統計室，對共產黨員、國民黨內民主人士及不滿蔣介石統治嘅人進行調查同監視，當然仲會拘捕同審訊。

軍統，全名為「國民政府軍事委員會調查統計局」，前身為「復興社特務處」，賀耀祖（1889-1961）任局長，被稱為全中國最神秘的男人載笠（1897-1946）為副局長，1940年載春風坐正，遷升為局長。軍統局規模龐大，遠勝中統，抗戰時期號稱有80萬特務，滲透到國民黨軍隊、警察、機關同各交通部門，進行監視同控制，拉人殺人當然係家常便飯，唔少漢奸就係衰喺軍統手上，除咗調查漢奸，當然唔少得反共工作（好有可能呢個先係主要工作），軍統曾經同美國合作成立中美合作所，響重慶磁器口、貴州息烽、江西上饒設立集中營同監獄，囚禁同埋殺害咗大批共產黨員同埋民主人士。

軍統同中統，應該歸類為蔣介石麾下秘密警察組織，特務工作響每一個國家或政權，都係非常重要嘅一環，其實好多人都係「007」，不過佢哋唔會話你知啫。戰爭期間，特務工作尤其重要，血腥鬥爭，亦唔需要依從任何法律或制度，總之一橫一直，最後企喺度嗰個，就係啱嗰個；瞓喺度嗰個，就係死嗰個。生死問題，響戰爭中會變成好簡單同好淡泊，所以求神拜佛，千祈唔好打仗，自私少少都要講一句，千祈唔好響自己身邊或生活嘅國家或城市打仗……

1938年8月於焉結束。

#常威💀 #蔣介石平反系列  #佛經抄寫員 #中日戰爭 #中華民國

［常威近代史］第七百八十四回 中統 軍統（高清錄音版）

#唔鍾意睇字可以聽

https://fb.watch/kjxZEqPphC/?mibextid=Nif5oz

【常威近代史】（七百八十五回）
心宇將滅萬事休 天涯無處不怨尤

時間線進入1938年嘅9月，日本軍隊將武漢重重包圍，武漢三鎮淪陷亦只係時間嘅問題，蔣介石一方面下令武漢市民大規模撤出，前赴大後方，另一方面亦開始焦土政策，將武漢三鎮所有嘅工業設施及相關一切，統統炸毀燒燬，寸草不留給日本人，當中製造了幾多悲慘事件同血淚交纏，大概無從估計。蔣介石甚至為「焦土政策」建立咗「破壞部隊」，專門進行破壞，當時有新聞報導「爆炸在在武漢三鎮持續不斷……烈燄沖天，無法控制的大火給侵略者留下的只剩下廢墟和焦灰」，傳說蔣介石仲因為破壞不夠徹底而懊惱。

叉開一筆，喺武漢淪陷之後，國民政府認為日軍嘅下一個目標就係湖南首府長沙，根據當時湖南省主席張自忠（1891-1940）將軍嘅回憶，佢響1938年11月12號接到蔣介石嘅傳訊，告知「長沙如失陷，務將全城焚毀，望事前妥密準備」，張自忠於是將警衛部隊編分為100個小組，配備煤油同埋引火木柴，交待一聽到警報，即全城放火，但係似乎因為一個錯誤嘅情報，表示日軍已經渡過鄰近嘅一條河流時，觸動全城縱火令執行，但其實日軍並未如情報般接近長沙，結果長沙大火造成10000餘平民死亡，3000,000人無家可歸，當然放火之前，並冇向民眾發佈任何警告。

同早前炸開花園口黃河河堤浸死幾十萬人一樣，為咗達成戰略目的，視平民百姓嘅性命如糞土，不擇手段。有時候，睇到呢段歷史，我真係想問一個非常之尷尬嘅問題，究竟係死響日本人手上面嘅平民百姓多？抑或係死響自己人手上嘅平民百姓多呢？一般平民百姓所遭受嘅苦難，係由日本人做成？抑或係由自己人一手造成呢？

最後不禁要問一句，面對呢個惡劣情況，追求和平停戰，減少平民百姓傷亡數目，選擇韜光養晦，唔選擇燈蛾撲火，相信亦唔係一個絕對錯誤嘅選擇。好快會投靠日本人建立傀儡政權嘅大漢奸汪精衛（1883-1944），就係抱住呢個理由「和平運動」而咁樣做，你話佢邊度錯得曬呢？同樣道理，1940年納粹德國佔領法國之後，建立嘅傀儡政權維希法國（1940年7月10日－1944年8月20日），由亨利·菲利普·貝當（1856-1951）執政，1944年6月，盟軍在諾曼第登陸解放法國後，由戴高樂（1890-1970）領導嘅「法蘭西共和國臨時政府」成立，維希政府在同年9月逃到德國西格馬林根。1945年4月最後一批維希流亡者響西格馬林根飛地被俘。貝當被新嘅臨時政府以叛國罪審判、判處死刑，但戴高樂將其改為終身監禁。汪精衛並未捱到二次世界大戰結束，1944年於日本名古屋帝國大學醫院病逝，汪精衛死前曾經寫過一首《自嘲》嘅絕命詩——

「心宇將滅萬事休，天涯無處不怨尤。縱有先輩嘗炎涼，諒無後人續春秋」。

9月3號，生活、商務、中華等二十餘間書店聯名上書蔣介石，要求撤銷對戰時圖書雜誌嘅審查，抗戰固然重要，防共亦都相當重要，兩者基本上沒有任何衝突，今日，《反侵略》雜誌響武漢創刋。9月4號，國民政府通令將行政年度改用「曆年制」，以便與會計年度相一致。9月6號，國民政府通令各軍政機關確切保障人民合法權利。今日歐亞航空公司飛機連續遭受日軍襲擊。9月7號，中國向國聯揭露日軍使用毒氣及化學武器，日本兵壞事做盡，連南京大屠殺殺幾十萬人都做得出，用毒氣同化學武器算得係啲乜嘢呢？更何況戰場並唔係一處講道德的地方，響戰場上，只會充斥住殘酷同謊言，人命更加係賤過泥。今日，蔣介石下令築建武漢嘅防禦工事，睇嚟都係做吓樣比市民睇。今日，黃河防汛新堤建成，新堤長70餘里，9月9日，全國102間報紙聯合發表宣言，要求國聯制裁日本，世界上嘅任何一切嘅制裁措施，對此刻日本已經毫無作用，日本人亦都相當明白，作為窮兵贖武嘅侵略者，亦冇回頭路，只有不斷嚮前衝直至取得最後勝利為止，只有成為最後勝利者，先有可能撰寫歷史的真相，至於真相到底係乜嘢？其實真係一啲都唔重要。

9月9號，日軍召集「臨時」、「維新」一種快你政府嘅政府要員，籌備建立「中華民國聯合委員會」，為建立一個更有認受性、更大型、全國性嘅傀儡政權做好準備功夫。9月10號，暹羅當局逮捕華僑4700餘人，至於理由係乜嘢？我並唔知道。「排華」又可以有理由，都可以冇理由咁發生，真係奇怪。9月13號，中國音樂團前赴美國募捐演出，救濟國內災民。9月14號，國民政府決定係甘肅玉門老君廟一帶探採石油，如果早啲發現大慶油田，成個歷史可能會徹底改變。9月15號，國民黨官方喉舌《中央日報》是長沙遷至重慶出版。

今個月，由於國民政府機關遷移，沿海不少工廠亦都內遷入四川，令到重慶市人口激增，隨之而嚟嘅係住房租金不斷上昇，普遍租金激增5倍，但係響重慶搵一處地方落腳，亦都唔係咁容易。之前的時候，重慶嘅房租每月大概3-4蚊，但係抗戰爆發之後，就一漲再漲。重慶人滿為患，遷移到此嘅外地人士更加結伴遷至重慶以北嘅北碚、合川居住。呢兩處地方由以江蘇人為最多，當地嘅中小學，好多都係由江蘇籍嘅教員授課，結果抗戰之後，唔少四川兒童講起嘢嚟都帶住有江蘇口音，當地居民更加講笑咁講，合川同北碚，已經成為咗江蘇人嘅「殖民地」。

#常威💀 #蔣介石平反系列  #佛經抄寫員 #中日戰爭 #中華民國

［常威近代史］第七百八十五回 心宇將滅萬事休 天涯何處不怨尤（高清錄音版）

#唔鍾意睇字可以聽

https://fb.watch/krvok8xyCx/?mibextid=Nif5oz