大清亡國關慈禧蛋牛治 3

［常威近代史］第六百三十八回 對新中國未來的盼望（高清錄音版）

#唔鍾意睇字可以聽

https://fb.watch/aEUzFuIToY/

【常威近代史】（六百三十九回）
有人風高亮節有人早死早著

1933年1月25號，國民黨中執委電召過氣大軍閥馮玉祥到南京「共謀決策」，馮玉祥當然推搪，冇理由自己行入陷阱掛？同時佢亦陳述抗日嘅意見12條。中原大戰後，馮玉祥被逼離開殘部，前往晉祠退隱，又經過多次遷移，最後到達汾陽縣峪道河隱居，你以為佢會退出江湖？no啦，權力係一條毒癮，一旦染上，難過戒可樂（英），你當然話常公仔你吹水啫，但係對於從來未擁有過權力嘅平凡人嚟講，我哋一定唔會明白權力有幾令人沉醉，一句到尾，試過你就知。1931年5月，廣東國民政府成立，馮玉祥收到風後，立刻派代表前赴廣東聯絡，並且積極聯絡舊部企圖東山再起。1931年7月，馮玉祥舊部、十三太保之一石友三（1891-1940）起兵攻打張學良，但係馮玉祥嘅其他同系人馬都冇支持石友三，結果孤掌難鳴，最後全軍覆歿。

石友三敗而不僵，之後仍活躍政壇，直至去到1940年12月1日，石友三被部下高樹勛（1897-1972）出賣，高樹勛響濮陽對石友三發動兵變，逮捕石友三，將佢活埋而死，時年50歲。石友三一生中曾先後投靠馮玉祥、張學良、汪精衛、蔣介石等政治人物，甚至歸順過日本人，而又先後背叛。由於反覆無常，故有「倒戈將軍」稱號。又因喜歡採用活埋等酷刑對付敵人，故人稱「石閻王」，當然佢最後嘅收場亦係被人活埋而死。講真，呢個世界上，仲有乜嘢殘忍得過將生人活埋？依種人，早死早著。

其後，馮玉祥又聯絡策動西北軍舊部反蔣，意圖建立西北根據地，1931年8月底，雷中田（1893-1950）喺蘭州發動兵變組織臨時政府，但年底蔣Sir派兵入甘平定叛變，馮玉祥重整旗鼓嘅計畫再次失敗，今年，熱河省局勢惡化，中央邀請馮玉祥共商抗日大計，馮玉祥亦同時陳述12條意見——其內容包括，組織統一嘅軍事指揮機構，立刻調遣精銳部隊開赴前線，籌撥巨額軍費，趕製各種軍用器械彈藥，派飛機協助作戰以及接濟義勇軍等等，真係唔知你阿媽係女人？馮先生並且表示如果中央有抗日決心，佢就立刻啟程，前往南京就事。大家都係得個講字，如果真係上下一心，齊齊全力抗日，日本人亦唔敢咁張狂嚕。

1月26號，日軍進攻熱河省開魯地區。同日，中共中央發信滿州各級黨部及全體黨員，指示發動東北人民武裝抗日。今個月，中共由於無法喺國民黨統治區立足，中共臨時中央決定遷離繁華嘅上海，前往江西瑞金中央蘇區。1931年初，王明（1904-1974） 響中共中央取得實際領導權，從此不斷強調全國性嘅「革命高潮」，命令各地黨組織經常無條件發動罷工、罷課、罷市、遊行示威集會，直至武裝暴動，盲目發動城市革命，令到城市中嘅中共組織遭受到嚴重破壞。與此同時，毛澤東領導嘅紅軍則響江西福建一帶農村打遊擊，卻大有作為。但隨住臨時中央遷入江西，以博古（秦邦憲，1907-1946）為首嘅中央負責人全面推行王明路線，堅持不同意見嘅毛澤東及其追隨者往往遭受排斥整肅。結果，紅軍喺毫無軍事經驗嘅博古等人（瞎）指揮下，最終未能化解國民黨嘅「大圍剿」，最後陷入山窮水盡嘅絕地，當然之後發生嘅就係25000里長征！

1月27日，曾經叱吒風雲嘅大軍閥段祺瑞（1865-1936），離開天津，抵達上海。就係為咗唔好畀日本人所利用，九一八事變之後，日本軍隊佔領中國東北，本身都係日本底嘅段祺瑞就拒絕與日本人往來，認真抵讚。1933年1月，日軍攻占山海關，華北情勢危急，蔣Sir恐防段祺瑞為日本人利用，於是請交通銀行董事長錢新之（1888-1958）作為特使，持其親筆函赴天津邀請段祺瑞南下；段氏亦恐遭日人劫持，決定接受，於1月21日凌晨離開天津南下，1月22日抵達南京，蔣親自於下關碼頭迎接，執弟子禮。1月23日，蔣Sir同段祺瑞往謁中山陵，向孫文致意，並「與之暢談辛亥年要求共和通電以前之歷史」，謂：「此老骨格與精神，求之當世不可多得也」，之後段祺瑞移居上海，其宅邸位於法租界霞飛路嘅盛宣懷公館；日後該公館先後成為日本駐滬領事館、大日本國駐滬總領事官邸，旁邊為上海圖書館，美國駐上海領事館亦喺附近。1935年段祺瑞被任命為國民政府委員，但沒有就職。1936年11月2日，段氏病逝，享年71歲。

遺囑如下：「余年已七十有餘，一朝怛化，揆諸生寄死歸之理，一切無所縈懷。惟我瞻四方，蹙（音速）國萬里，民窮財盡，實所痛心！生平不喜多言，往日曲突徒薪之謀，國人或不盡省記，今則本識途之驗，為將死之鳴，願我國人靜聽而力行焉！則余生雖死猶生，九原瞑目矣。

國雖微弱，必有復興直道，亦至簡單：勿因我見而輕起政爭；勿尚空談而不顧實踐；勿興不急之務而浪用民財；勿信過激言行之說而自搖邦本；講外交者，勿忘鞏固國防；司教育者，勿忘保存國粹；治家者，勿棄固有之禮教；求學者，勿鶩（音霧）時尚之紛華。此八勿以應萬有，所謂自力更生者在此，轉弱為強者亦在此矣！

余生平不事生產，後人宜體我樂道安貧之意，喪葬力崇節簡，殮以居士服，毋以葷腥饋祭。此囑。」
　
1936年11月3日，蔣Sir致電中央，以其「贊成共和與再造之功，殊不可沒」、「實為元勳」，建議國葬，指示軍事委員會及軍政部派員協助治喪，又親撰輓聯懷念。

#常威💀 #蔣介石平反系列  #中日戰爭 #民國歷史 #佛經抄寫員

【常公子歷史頻道445回：替大軍閥平反系列之 究竟係質重要抑或係量重要】

♊ 今集同大家討論一個問題，就係「質」同「量」嘅問題，究竟係「質」重要？抑或係「量」重要？「質」和「量」兩者兼得，當然最好，但針無兩頭利，世界資源亦都唔係一定足夠，咁嘅情況下，人類生存，究竟係追求「質」或「量」呢？呢個問題可以咁樣去理解，「質」 是追求個人物質生活的豐盛狀熊； 而「量」即係追求整體人類生活狀態； 前者係個人主義，而後者係集體主義。用最簡單嘅語言說明，前者係資本主義制度，係追求個人嘅福祉同利益； 後者即係社會主義制度，係追求整個社會全體嘅福祉同利益，到頭來係「質」同「量」嘅分別。

♐ 近年社會上強調大愛同包容，某程度上係屬於社會主義範疇，係屬於左派嘅想法，有錢人點解要包容窮人？資源點解要作更平均嘅分配，寡頭為何不應該存在？如果純粹只係追求個人利益作為出發點，上述講法係唔需要成立，我有錢我富貴我生存得開心就得，我冇需要理會任何陌生人嘅生存狀態。但係作為一個社會主義者，我哋相當明白社會資源有限，要作出更平均分配，必須有人犧牲，或者被攤薄所得利益，呢個係理所當然，亦都冇例外。願意犧牲自己成就他人，先係真正嘅大愛同包容，口講大愛口講包容，個個都識，真係身體力行又有幾多？中國儒家哲學強調「知行合一」，口講無憑，實際行動先係最重要，講得出做得到，世上又有幾多個？

♏ 人係自私嘅動物，其實任何動物都係自私，因此強調追求個人幸福，先係符合人類動物嘅天性，強調整體利益（大愛）反而唔係。某程度上，社會主義係違反人性，當然社會主義係好，大同世界係好好，平均係好，共富係好，做得到就係最好。不過，最舒服最好嘅例子，應該係活喺資本主義社會中做一個有錢人、然後紓尊降貴大談社會主義，一邊攬住條女歎紅酒食雪茄，一邊「討論」如何拯救窮人，如何拯救世界，咁就最perfect，正如古代希臘，愛琴海邊有一班哲學家懶洋洋地半躺著、終日無所事事討論哲學人生宇宙，而背後就有一大群沒有名字嘅奴隸負責生產，提供哲學家們生存所需，咁就最perfect。其實，世間事物，都係呢種狀態裡存在。

🎦https://youtu.be/IBpUbVbZDJg

💚【我奮鬥不奮鬥】 常公子 楊熙合著
電子書下載⬇ https://play.google.com/store/books/details?id=CVo3EAAAQBAJ
Kindle版下⬇
https://www.amazon.com/dp/B098XHWTDK

［常威近代史］第六百三十九回 有人風高亮節有人早死早着（高清錄音版）

#唔鍾意睇字可以聽

https://fb.watch/aHTjXG-oUt/

【常威近代史】（六百四十回）
溫言在口 大棒在手

1933年1月28號，中國教育學會喺上海成立，以「 研究改進教育為宗旨」，劉廷芳（1892-1974）、劉湛恩（1886-1938）等15人為理事，教育為國之本，當時中國積弱嘅問題，其實都係教育嘅問題，落後西方世界太遠，落後日本太遠，教育做得唔好就冇人才，冇人才就冇錢，冇錢就收皮。當時20世紀初期，無端端發達符碌發達嘅情況並唔普遍，你估八九十年代香港咩？不過潮脹嘅時候，人人水漲船高，食住祖國堀起初期條水，傻佬盲字都唔識多隻炒吓樓炒吓股炒吓鋪就可以發達，但係潮退嘅時候，就會知道邊個冇著泳褲？今日整個世界陷於經濟大衰退邊緣，香港同香港人嘅弱點一步一步咁暴露出嚟，你估真係次次符碌俾你入黑柴咩？發覺大幅落後人前，仍繼續固步自封沾沾自喜懷緬過去美好時光，仍然冇樣嘢做得好，每樣嘢求求其其，響森林法則弱肉強食面前，唔玩完有鬼？十年河東，十年河西，以前話大陸人唔識英文，今日人哋英文好過你十倍； 以前笑人唔識玩股票炒樓玩財技，今日人哋玩得叻過你百倍； 以前笑人唔識拍電影電視劇，你今日仲拍廠景？仲未搞得掂現場收音？死得喇，鄰近地區搞高科技吸金，我哋就繼續講買樓「上車」點點點，雖然老豆淨落大把，但係始終有一日會洗曬，再唔諗點搵錢，條街就響眼前，等仆。

1月29號，長江水警總局喺武昌成立。今個月蔣Sir集結40萬主力部隊，由顧祝同（1893-1987）為司令，響江西中央蘇區發動第四次「大圍剿」，要徹底剷除中共嘅勢力，上一集講過，留蘇派王明（1904-1974）當權，行農民遊擊戰路線嘅毛澤東一派被全面壓抑，蔣Sir可能就係睇啱個時候發動前所未有嘅總攻擊！要將紅軍連根拔起。先安內，後攘外。

同一時間，紅四軍主力進入川北，開辟川陝革命根據地，為轉移陣地作好應變措施，亦為中共不久即將發生嘅25000里長征拉開歷史巨幕。

時間線進入1933年2月，2月2號，西南政務會組建西南國防委員會，以西南軍閥陳濟棠（1890-1954）、李宗仁（1891-1961）、白崇禧（1893-1966）、蔣光鼐（1888-1967）等為委員。另起爐灶，其實又係屬於「反蔣」行為。重複一次都唔怕厭，如果真係上下一心，如果當時能夠團結一致，日本人絕對唔夠膽全面放手侵略，呢個係必須相信嘅現實，上一集段祺瑞嘅遺囑講過「講外交者，勿忘鞏固國防」，要抵禦外敵，國家一定要強大，你好打，人哋先唔夠膽打你！你講大愛同包容然後放低枝槍，咁人哋就用枝槍指住你個頭要你攞曬啲錢出嚟，道理就係咁簡單，「溫言在口，大棒在手。」(Speak softly and carry a big stick.)，明白未？人人要講利益，國家要講利益，尤其是自己嘅利益！近年有人認為中國積極發展軍備，係窮兵贖武，係搞霸權主義係搞法西斯搞赤納粹，但係點解冇人講吓美國？美國嘅霸權地位全因為佢嘅經濟規模係世界第一、更重要嘅係軍事力量亦係世界第一，因此就可以不斷開印刷機印銀紙使欠全世界30萬億美元，唔明呢個道理，你唔好去睇歷史，返屋企睇兒童樂園吧！

2月4號，《自由言論》 半月刊響上海創刋，歷史系教授王造時（1903-1978）任主編，以前有個香港小姐叫黃造時，曾經飾演電視劇《射鵰英雄傳》嘅華箏公主角色。2月6號，行政院及中央古物保管委員會將北平故宮古物首批2118箱運啟南京。1月17號，國民黨中央決定將北平故宮重要文物珍品遷移南下，以防不測（驚俾人偷？邊個啊？），呢個舉動即刻受到北平市民強烈反對。1月23號，北平民衆喺中南海成立保存故宮古物協會，由周肇祥（1880-1954）呢個前清遺老任主席，通電反對南京國民政府將故宮古物南運。北平工聯、北平各團體救國會亦通電反對。1月31號，故宮古物3000箱預備啟程南下，因為遭到市民抗議及搬運工人罷工已未果。同時，北平各界團體致函國民政府，要求速定救國大計，而不必急於搬遷古物。不過民意還民意，今日天安門至西車站一帶實施戒嚴，就係為咗防止民眾滋擾搬運，政府仲將北平民眾保存故宮古物協會主席周肇祥逮捕，到22號古物喺浦口起卸時先至放返出嚟。去到1933年5月，北平分批一共運走故宮古物19560箱，哇……當中價值係幾多？應該係天文數字，當中又有幾多唔見咗或比人撻咗？睇嚟應該就冇嘅。1933年被運走嘅故宮文物，1949年亦都跟住蔣Sir去咗臺灣，因此臺灣都有一個國立故宮博物館，是為臺灣八景之一。

2月7號，蔣Sir召集軍事會議，組建南昌行營，積極調動40萬大軍圍剿紅軍；2月9號，中國電影文化協會喺上海成立，選出執委及後補執位黃子佈（夏衍，1900-1995）、陳瑜（田漢，1898-1968）、劇作家洪深（1894-1955，佢老竇係洪述祖，涉嫌謀害宋教仁真兇）、國歌《勇軍進行曲》作曲者聶耳（1912-1935）等31人。聶耳dying young，佢響1933年秘密加入共產黨，為免被捕，1935年聶耳離開上海，擬取道日本赴蘇聯。1935年7月17日，響神奈川縣藤澤市鵠沼海濱游水時不幸溺水身亡，年僅23歲。聶耳死因，亦有人話被日本特務行刺、突發心臟病等等。

#常威💀 #蔣介石平反系列  #中日戰爭 #民國歷史 #佛經抄寫員

［常威近代史］第六百四十回 溫言在口 大棒在手（高清錄音版）

#唔鍾意睇字可以聽

https://fb.watch/aLGtP1o419/

【常威近代史】（六百四十一回）
蔣Sir提倡新生活運動

1933年2月12號，全國藝術展覽會喺上海開幕。又係上海，其實閱讀中國近代史，就會發現，其實好多事情只係發生係幾個大城市之中，例如北京、上海、廣州、天津……（上海甚至係主角），某程度嚟講，其實一個國家嘅歷史，就係幾個大城市嘅歷史。上述幾個大城市，就算計算埋城市周邊的區域，總人口應該唔超過2000萬，當時中國有4-5億人，2000萬只係佔當中嘅4-5%左右，其他95%嘅人口，佢哋究竟發生乜嘢事？佢哋嘅生活又點樣過？其實冇乜人理會。正如今日，你只會聽到東京同大阪嘅消息，或者只係聽到首爾嘅消息，紐約同洛杉磯嘅消息。所謂閱讀歷史，我哋真係能夠掌握真正嘅過去？抑或只係能夠掌握一小部份嘅過去呢？正如一件事情，如果你只係知道佢5%嘅內容，你又可唔可以話知道整件事情嘅來龍去脈呢？大部分歷史，其實處於黑暗之中，能夠被記述下來嘅，從來只係小部份，甚至係少得可憐嘅一小部份。

2月13號，國民黨中央黨部命令各級黨部及各團體組織，製作「 忠孝仁愛，信義和平」 嘅牌匾懸掛禮堂中央，以資「啓廸」，呢個行為，正正就係意識形態工作。我講過，自從辛亥革命之後，新文化運動興起，傳統儒家哲學嘅意識形態就被揚棄，甚至徹底揚棄，姑勿論係好事壞事，但人倫道德始終係整個社會連結起嚟嘅紐帶，一定要存在，無論用任何形式或口實令其存在。「道德」 其實非常重要，起碼比大家想像中重要。

2月14號，浙江鎮海農民與城鎮居民3000餘人舉行元宵晚會，因為被警察阻止，於是發起暴動，將公安局搗毀，真係世上刁民何其多？同日，行政院通過實業部所制定嘅建設硫酸錏廠招收商股辦法大綱。2月15號，由美國馬克敦公司以1032000兩銀廣州市海珠橋落成。同日，中共蘇區中央作出《中央局關於閩粵贛省委的決定》，指責福建省委「顯然形成了以羅明同志為首的機會主義路線」，撤銷羅明（1901-1987）嘅中共福建省委代理書記職務，並對其隔離審查。今年1月，羅明同毛澤東交換睇法之後，佢寫咗《對工作的幾點意見》，反對向中心城市同交通要道發展，主張喺敵人力量薄弱嘅地區開展遊擊戰，即係反對王明路線。於是羅明的意見被認為係「悲觀失望」、「逃跑退卻」嘅「取消主義」。反「羅明路線」 從福建開始，一直波及到整個中央數據，大名鼎鼎嘅鄧小平（1904-1997）、毛澤覃（1905-1935）、謝唯俊（1908-1935）、古柏（1906-1935）、譚震林（1902-1983）等都受到不同程度嘅株連。

2月17號，立法院通告《考試法》、《監試法》同《典試委員會組織法》。2月18號，社會局公佈調查結果，去年北平離婚人數為1843人。2月19號，蔣Sir響南昌發表《新生活運動之要義》，發起以「禮儀廉恥」 為中心思想嘅「新生活運動」，主張由日常生活衣食住行入手，按照清潔、整齊、簡單、樸素、迅速嘅幾項標準，改造國民日常生活，令到國民日常生活可以達到軍事化、生產化、藝術化，真係無所不包，亦係無所不能。3月11號，蔣Sir又響南昌成立新生活運動促進會。冇錯，就係搞意識形態工作，國難當前，尤其是身處戰爭狀態之中，國民一定要團結，唔團结就有鬼，有鬼就好大件事，而團結則需要秩序，秩序必須用意識形態建立同維持。唔好問點解？因為有其真正需要，上面已經講過，「道德」 其實相當重要，就算喺實用嘅角度嚟講，都係相當重要。你話政治介入日常生活？但當時中國嘅最大敵人日本，就係將政治同生活完全混為一體嘅好例子，唔係點解佢哋嘅年青人可以揸住架風起了三菱牌零式戰鬥機撞向美軍艦橋以表達忠於天皇之志呢？

抛磚引玉，你又可以問，如果冇意識形態同立場生存又得唔得呢？當然係得，世界上冇嘢係唔得嘅，所謂「凡存在就是合理」，不過，乜立場都冇就即係有立場，就即「虛無主義」立場，冇品牌嘅好產品叫「無印良品」同一個道理。「無政府主義」會點？我未試過，但單憑想像，應該唔好得去邊？舉個例子，如果有個人無厘頭攞把刀埋嚟捅死你親人，然之後佢又唔需要受到法律制裁或任何道德譴責，夠曬虛無啩？咁情況又會點呢？我諗大家都唔想，大家都希望活響一個有秩序有道德人倫嘅世界之中，咁樣生命財產先有保障。至於秩序同道德去到邊個層次先係過火？呢個真係觀點與角度嘅純哲學問題喇。

2月20號，廣西興安、全縣、灌陽、龍勝等縣瑤民暴動，宣佈「殺財主佬、殺官兵、殺漢人」，世上刁民何其多？瑤族（或稱為徭族、傜族、猺族，有幾個寫法），係少數民族，為中國南方典型的山地民族，有其獨特嘅語言文化，其歷史比較悠久。有研究認為：瑤族起源於古代東夷部落，與九黎族關係密切，尊奉先祖蚩尤、盤瓠。2010年，中國的瑤族人口為285.3萬，大多數居住喺少數民族自治區，62.1%147萬響廣西，21.5%70萬響湖南，8%20萬響廣東，8%19萬響雲南，1.5%2萬響貴州 。

#常威💀 #蔣介石平反系列  #中日戰爭 #民國歷史 #佛經抄寫員

【常公子歷史頻道446回：替大軍閥平反系列之 孫文諗緊乜】

♊ 新型冠狀病毒肆虐世界進入第三年，嚴重擾亂咗人類嘅生活秩序，原來秩序，被破壞得體無完膚。終於嚟到2022年，我自己都估唔到，火藥引會喺烏克蘭引爆，目前，俄羅斯已經集結十二萬大軍響邊界，加上白俄羅斯，全面包圍烏克蘭，有傳言話，俄軍會閃電進攻烏克蘭首都基輔，建立親俄政權，重奪依一個有俄羅斯後花園之稱嘅國家——烏克蘭——嘅控制權。藉此阻止北約西方世界勢力再向東擴張，亦保持克里米亞軍港俄羅斯西面出海口嘅絕對安全。

♐北約，全稱為「大西洋公約組織」（North Atlantic Treaty Qrganisation），成立於1949年12月嘅一個軍事聯盟，參與國家當時有12個，包括美國、加拿大、英國同法國。原本嘅目的係要對抗二次世界大戰之後蘇聯向歐洲嘅擴張，成員國亦同意，響任何一個成員國受到武裝攻擊嘅時候會向彼此施以援手。作為對北約成立嘅回應，前蘇聯亦建立起東歐共產主義國家嘅軍事聯盟，名為華沙條約組織（Warsaw Pact）。但係隨住1991年蘇聯解體，華沙公約國組織亦都蕩然無存，之後有唔少前華沙公約組織成員變成咗北約嘅成員，北約組織而家有大概30名成員。

♉ 烏克蘭亦係前華沙公約組織成員，蘇聯解體後，擁有4000萬人口嘅大國烏克蘭一直同俄羅斯保持親密關係，烏克蘭曾經係全世界第三大糧食出口國，並且承繼咗蘇聯嘅軍事基礎，維持住僅次於俄羅斯嘅歐洲第二大軍事力量。但係響2014年，烏克蘭發生顏色革命分裂，政權易手，基輔由親俄改向親西方，但係烏克蘭並唔係北約成員國，北約同烏克蘭一直維持住「伙伴國」嘅關係，同時亦意味住，喺未來某個時間烏克蘭可能被允許加入北約，俄羅斯則希望從西方大國中得到保證，讓呢件事永遠唔會發生，但係西方並唔打算給予俄羅斯任何承諾，結果將局面推到今時今日嘅戰爭邊緣。

♏ 由2014年到今日，中間大約八年時間，其實烏克蘭嘅局面瞬息萬變，親俄同親西方嘅兩邊陣營內戰不絕，加上一場疫情催化，終於嚟到攤牌嘅一日，之後冇人能夠想像局勢嘅發展，打抑或唔打都好難講，但打嘅機會偏高，你估雙方集結大軍唔使錢咩？而且雙方對維持原狀都唔滿意，要改變現狀，真係需要透過一場軍事衝突發生，重新洗牌……😔

🎦https://youtu.be/8ZhinU6nBtw

［常威近代史］第六百四十一回 蔣sir提倡新生活運動（高清錄音版）

#唔鍾意睇字可以聽

https://fb.watch/aOgjpQIpw4/

【常威近代史】（六百四十二回）
熱河失守

1933年2月21號，日本連同滿洲國聯軍向熱河省發動總進攻，朝陽、開魯發生戰事。同日，上午9點，上海塘正路永泰橡膠廠發生爆炸，大火一共燒咗三個鐘頭，事件因爲膠油洩漏，引爆鍋爐，兩個鍋爐喺十分鐘內先後猛烈爆炸，當場震塌廠房，令82名男女工人葬身火海，其餘200幾個工人都受傷送院，傷亡非常慘重。2月27號，上海永和實業公司橡膠部又發生鍋爐爆炸，又有幾十人傷亡，事後廠方更加推推卸責任，對死傷工人草率處理，3月17號，上海市總工會要求按法規撫恤，呢啲工業意外，當然只是冰山一角，發生喺大城市上海，仲可以比歷史記述落嚟，其他冇記載冇報導嘅慘劇，只怕會是千倍萬倍，勞動階層生命的確毫無保障，人民左傾，係有一定理由。

2月23號，山西濟南發生金融恐慌，義聚盛銀號突然倒閉，第二日承德厚銀號亦相繼倒閉，到處發生擠提，亂世常見，不足為懼。同一日，宋子文喺南京宣佈發行新工債2000萬元，名為1933年愛國庫卷。國家冇錢抗日，自然要向民間籌旗。2月11號，宋子文親自飛往北方，同張學良巡視熱河前線，表明抗硬強一姿態，為確保守衛華北所需嘅大量現款，宋子文不得不違反保證四年內不發行新債券嘅諾言，採取此項特別措施。依一次公債發行，以華北煙酒稅收入作為擔保，一半由上海銀行吸收，另一半由平津銀行吸收。今次發行愛國債券前，宋子文喺北平會見北平銀行公會會長周作民（1884-1955），並且同錢永銘（1885-1958）、黃漢梁（1892-？）同虞洽卿（1867-1945）在內嘅上海金融家深入接觸，均獲取積極支持，所謂支持，大概就係認購一批債券先。

2月24號，國聯特別大會，以42票對1票，通過《19國委員會報告書》，全世界唔承認偽滿洲國。國際社會定調，日本人就睬你都傻，繼續發動侵略戰爭，反正潑出去嘅水亦都收唔返，好快日本亦會退出國際聯盟。

2月28號，行政院因為經費困難，決定唔派代表團前往參加芝加哥世界博覽會，博覽會上有中國商品展出。1933年世博會亦係第一屆有明確主題嘅世博會，叫「一個世紀的進步」。今個月，亦有一位著名人物訪問中國，佢係英國著名文豪蕭伯納（George Bernard Shaw，1856-1950），佢係愛爾蘭劇作家同大名鼎鼎嘅倫敦政治經濟學院嘅聯合創始人。早年靠寫作音樂和文學評論謀生，後來因寫作戲劇聞名於世，一生寫過超過60部戲劇，擅長以黑色幽默形式來揭露社會問題。1926年因「作品具有理想主義和人道主義」而獲得1925年度的諾貝爾文學獎，佢最出名嘅作品，係《賣花女》（Pygmalion）改編成音樂劇《窈窕淑女》（My Fair Lady），該音樂劇又被改編為荷里活賣座電影而家喻戶曉。

時間線進入1933年3月，3月1號，全球華僑總工會喺上海成立，隨之通電海外華僑預備一切經濟力量為抗日後援。3月2號，日軍攻陷熱河省赤峰。3月4號，日軍進軍承德，熱河省政府主席湯玉麟（1871-1937）不戰而逃，熱河省正式失守。上個月17號，日軍下達進攻熱河省作戰命令，18號，張學良抵達熱河前綫，同熱河省政府主席湯玉麟聯合發表決心守土嘅抗日通電。20號，北平軍決定成立兩個集團軍同日軍作戰，第一集團軍總司令由張學良兼任，第二集團軍由張作相（1881-1949）、湯玉麟分任正副總司令。2月21號淩晨，日本先遣部隊向熱河省東部南嶺嘅中國守軍陣地發動攻擊，總進攻正式開始。10萬日軍，兵分三路進攻熱河，勢如破竹，24號佔領開魯，25號攻下潮陽，3月2號浚原失守，潮陽至承德大道完全敞開。張作相命湯玉麟喺承德東面佈防，但湯部隊官兵不從，要求先補發3個月軍餉？吓？有汗出無糧出？張作相與湯玉麟認為大勢已去，湯玉麟扣留軍用汽車及後援汽車200幾架，由承德裝載重要財物運往平津，張作相則於當晚逃往古北口，3月4號早上，湯玉麟放棄承德西逃，拜拜你條尾嚕，於是，又係打都唔使打，日軍先頭部隊輕取熱河省首府承德，熱河戰爭結束。3月11號，張學良承擔戰敗責任，引咎辭職。

整場熱河戰爭，完全暴露中華民國軍隊抗日弱點，首先議而不決，之前已經講過，又打又話唔打，自918事變以嚟，張學良同蔣Sir嘅態度的確進退失據，某程度上，佢哋真係想日本息事寧人，建立咗偽滿洲國，要咗白山黑水嘅東北就算數，但已經步上軍國主義擴張嘅大日本帝國點會放過整個中國？當年夜祭真妃嘅光緒皇帝答應過伊藤博文「合邦」架，我侵略你係為咗幫你，係希望扶起你成為「大東亞共榮圈」內先進國家一員，擺脱貧窮落後，點解你唔明啫？

其次就係冇錢，打仗需要大量現金，前線士兵冇糧出，你叫人哋點搏命？上戰場嘅嘢，一係為錢，一係為意識形態。「忠於天皇」 係意識形態，同樣「保家衛國」都係意識形態，大概睇見戰事連連失利，蔣Sir就要大搞「新生活運動」，加強鞏固國民意識形態抗日，全民軍事化，為將會發生的中日全面戰爭做好萬全準備。

#常威💀 #蔣介石平反系列  #中日戰爭 #民國歷史 #佛經抄寫員

【常公子歷史頻道447回：替大軍閥平反系列之 山海關大戰】

♊ 2022年過了一個月，中國曆法，亦快將踏入新一年，辛丑年過去，壬寅虎年將臨，世界仍然一片混亂。Omicron疫情步入高峰，西方歐美國家控制唔到疫情，決定與病毒共存，放棄基本防疫措施。中國仍然堅守「清零」政策，當然，「清零」思維絕對正確，但「與病毒共存」亦係權宜之策，兩者皆有可取之處。不過，政府決定態度，未來一年，對待疫情的態度，或者會成為東西方意識形態進一步分裂嘅口實，畢竟，冷戰二元格局形成，世界又再回歸1991年蘇聯解體前的基本格局。

♊ 「病毒」來自大自然交集變種，是生物多樣性嘅一種表現手法，今次疫情過去之後（可能是2024卦？），亦一定會有下一次，理由相信亦唔需要解釋，生態平衡嚴重失控，所有生命及生物自然要響嚴酷嘅環境中另尋出路。正如一個年青人點解會學壞加入黑社會？好多時候係因為背景複雜同活響嚴酷嘅生存環境之中，有一個幸福富裕嘅家庭，有關愛自己嘅父母，其實好難會學壞。同樣道理，大自然生態環境越趨惡劣，大自然就會衍生更多病毒攻擊敵人，敵人是誰？敵人就係破壞大自然生態平衡嘅元兇「智人」，亦即係我哋自己。所謂平衡，亦即係等價交換，有得著，自然需要付出，世界上冇免費嘅午餐，大自然裡都沒有。

♊ 疫情延續，世界經濟下調，果然令戰爭爆發，烏克蘭局勢一觸即發，情況未許樂觀，一切拭目以待，靜觀其變。

🎦https://youtu.be/hojn2Wrorj0

［常威近代史］第六百四十二回 熱河淪陷（高清錄音版）

#唔鍾意睇字可以聽

https://fb.watch/aSmHVPvt0M/

支持繼續做落去，呢排成日睇你啲片

虎豹別墅（Haw Par Mansion）同毗鄰嘅萬金油花園（Tiger Balm Garden 或 Aw Boon Haw Garden）就係胡文虎響香港建造嘅花園別墅，位於香港大坑道，現被列為一級歷史建築。1935年胡文虎耗鉅資1,600萬港元建造（當時當然係天文數字），佔地約53.4公頃。胡文虎本人及其家屬亦居住響依處，依山而建紅牆綠瓦嘅宮殿式房屋，中國園林建築帶有很強嘅南洋色彩。它以「虎塔」及俗稱「十八層地獄」的十殿閻羅浮雕最為聞名。「十八層地獄」浮雕刻有漢字文化圈裏糅合佛、道和民間信仰中陰曹地府面貌，包括落油鑊、勾脷筋等場景，道出咗警惡勸善嘅故事，我細個第一次睇，印象非常深刻，當堂唔夠膽做壞事。胡文虎1954年病逝，後人把部份地段出售，建成豪宅，1999年7月，家族更向政府提交換地申請，重新發展僅餘部份。有關部分以一億港元出讓給長江實業集團興建私人住宅渣甸山名門，自此虎豹別墅正式關閉，停止對外開放。

3月24號，美國華僑航空救國義勇軍代表李玉聘將美洲華僑所購買嘅飛機12架捐助國民政府抗日。3月28號，喺上海《明星日報》所舉辦嘅「影后」選舉之中，胡蝶（1908-1989）以21334票當選影后，排第二嘅係陳玉梅（1910-1985），第三係阮玲玉（1910-1935）。今次選舉，除咗淪陷嘅東北四省之外，全國各地都有人投票，連日本都有投票者，後來仲有偽造選票嘅新聞添。《明星日報》 原本打算舉行盛大嘅加冕典禮，但胡蝶拒絕加冕。後嚟《明星日報》發起「航空救國遊藝茶舞大會」 慶祝胡蝶當選影后，其門票收益用來購買軍機抗日。中華民國嘅空軍同海軍，的確同日本冇得揮。

排名影后第三位嘅阮玲玉於1935年3月8日婦女節當天半夜兩點鐘響住宅服安眠藥自殺，當時同居男友，有「茶葉大王」之稱嘅唐季珊（1896-1967）發現阮玲玉服用過量安眠藥，因擔心自己名譽受損而延遲救治，阮玲玉死時年僅25歲。阮玲玉生前留下「人言可畏」、「我很對不起你，令你為我受罪」之語嘅兩封遺書，後來證實為假，所以阮玲玉之死其實大又可疑。3月14日舉殯當日，有約30萬民眾到場弔唁，送葬隊伍長達3里。美國《紐約時報》響第二日以「近代國際上之最大葬禮」為題響頭版頭條報導葬禮，舉殯當日亦有三個女影迷為阮玲玉自殺。

#常威💀 #蔣介石平反系列  #中日戰爭 #民國歷史 #佛經抄寫員

【一年一度新春優惠】

這是一系列利用廣東話母語通俗語寫成的晚清近代史讀物，只此一家，並無其他。

本書內容以現今香港人角度，用我們的港式母語，堅不離地，用風趣幽默抵死筆觸，帶讀者再重頭認識中國近代史上一個最重要的人物：慈禧太后。

西太后慈禧長期被人用枝筆抹黑，我就用枝筆同佢平反。一個有智慧有手段有能力嘅執政者，被歷史誤導為一個封建保守、禍國殃民的低智旺角行人專用區跳舞大媽阿嬋。十九世紀中葉，大清政權根本半隻腳行入棺材，慈禧居然有辦法將依個肺Can三期病人續多48年陽壽，剩係咁，已經要為佢平反再平反！

本書除了寫晚清歷史，也寫現今香港和中國，借古讚今，務求通過百多年前的歷史借鏡，令讀者重新審視自己中國人的身份和內容。
「通俗」本身就是一種力量，讀歷史一向給人非常沉悶的感覺，本書就是要掃除這種讀史障礙。要人讀得開心，睇得過癮，有得著固然是好，冇得著也最低限度得啖笑。

本書作者化身為一個死去多年的19世紀大清子民「常威」（電影【九品芝麻官】內奸角），同大家亂入中國近代史，用完全狗噏角度，左右不分，不喜勿插，但要買嚟睇睇！

⬇購買請即上⬇

https://www.382now.com/product?id=300

［常威近代史］第六百四十三回 胡文虎的虎豹別墅（高清錄音版）

#唔鍾意睇字可以聽

https://fb.watch/aU_qPM4sKY/

【常威近代史】（六百四十四回）
廢兩改元

1933年3月28號，財政部命令各海關禁止外國輪船響非通商口岸裝貨，隨便上落貨，唔駛清關，唔駛交稅，咪變咗無掩雞籠？唔得嘅。同一日，中華海員工會黨團書記廖承志喺上海被捕，廖承志（1908-1983）係國民黨鑽石元老級人馬廖仲愷（1877-1925）個仔，傾心共產主義，之後佢亦會成為中共要員。3月29號，蘇聯同偽滿洲國發生扣車事件衝突，大家邊境接壤，好難無衝突發生。二十世紀美國能夠成為超級大國，就係冇乜鄰國接壤問題，東西兩邊有太平洋同大西洋兩個巨大天然屏障保護，兩個邊境接壤嘅國家，一個叫加拿大，根本就係自己友殖民地； 另一個叫墨西哥，一早已經被打到五癆七傷，正如墨西哥人話齋，上帝佢離佢哋太遠，而美國則佢離佢哋太近。3月30號，汪精衛向中常會銷假，復任行政院院長一職，正式回歸權力圈子。同日，實業部喺江浙產絲中心區域及上海，組織蠶絲聯合統制會。3月31號，山東滕縣發現14件古代鐘鼎盤彝（音夷）。同日，中央研究院北平歷史語言研究所與心理研究所南遷。同日，上海南洋兄弟煙草公司總經理簡玉階（1875-1957）表示捐款十萬元資助訓練航空人才。1933年3月正式結束。

時間線進入1933年嘅4月，4月1號，豫、鄂、皖、贛四省農民銀行正式開業。4月3號，上海商人葉鴻英（1860-1937）私人捐款50萬興辦圖書館，支援鄉村教育。葉先生係大商人大企業家，亦係大慈善家，好多時候上述幾種身份都會重疊。響發達嘅資本主義國家，好多時候財閥有錢佬做善事，都係為咗逃稅。4月5號，偽滿洲國代表丁士源（1879-1945）前赴歐美各國游説，要求西方國家承認偽滿州國，不過無功而還遭到各國拒絕，今日佢返抵長春。同日，國民政府委任孔祥熙（1881-1967）為中央銀行總裁。孔先生為孔子第75代孫，妻子為宋靄齡。

4月6號，國民政府財政部宣佈全國廢兩改元，實行銀本位制。由即日起，所有公司款項支付一律改用銀幣，不得再使用銀兩。中央銀行自建立以來，國民政府即著手改革幣制，貨幣流通係重中之重，搞唔掂冇辦法推動經濟發展。1930年4月，財政部就曾經草擬幣制改革大綱，由收回國民營銀行發行嘅紙幣及兌換券權限嘅做起，分期逐步統一幣制。1932年7月7號，財政部長宋子文喺上海召集錢銀業代表，談到廢除銀兩採用銀元嘅制度，但錢銀業極力反對。反對理由亦都好簡單，比你中央收編，仲有生意做咩？情況你可以設想為今天嘅加密貨幣，大講去中心化，去中心化係冇王管，冇王管就可以亂嚟，一旦中心化咗，所有嘅歌仔亦都冇得唱嘞！當年嘅情況亦都係差唔多，南京政府要統一貨幣，既得利益者當然會反對，但係國民政府施壓之下，施壓一辭亦都有多層意義，相信唔需要我再多講。響壓力底下，錢銀業不得不表示同意，但卻拋出咗銀洋折價、統一鑄幣、統一發行三個建議作為權宜之策，一於拖住你先。

1933年3月3號，財政部通令上海自3月10號起率先施行費兩改元，規定咗0.715銀兩折合1銀元嘅比率，吓？咁未即係用7折回購？食水會唔會深吹啲呢？於是大家都是明白的，金融業仍對廢兩改元持觀望態度，而且紛紛倒行逆施，爭相以銀元換取銀兩（咁咪有jetso囉）。中央、中國、交通三家銀行所設嘅兌換委員會一衆委員之中，以銀兩換銀元者寥寥無幾，真係上樑不正下樑歪，亦係個個口講支持，身體往往係最誠實，民眾抗疫在家，你就響花園開party，同一個意義。至3月10號至昨日，淨兌入銀元只有區區6140萬元，「廢兩改元」幾乎成為「廢元改兩」。真係笑話一則，上述事件中，亦可反映出當時國民政府要員對財金嘅知識其實相當貧乏，幾近膚淺境界，冇計，蜀中無大將，廖化作先鋒。今日之後，國民政府仲會相繼不斷犯下唔同程度嘅金融錯誤，lastly，江山拱手於人，其實不無道理。我個人感覺，其實當時國民政府改革貨幣制度，應該邀請大金主美國華爾街嘅金融專家幫手協調籌辦，不過又係嗰句，真金白銀嘅嘢，人哋點解要幫你呢？比你搞掂獨立自主，咪自斷財路？

4月7號，法國於本日同埋10號、11號先後派遣軍南侵佔南沙群島中嘅南威島及太平島等9個小島。喂喂喂，咁即係點呀？詐詐諦偷嘢咩？4月8號，教育部籌建國立博物館，由歷史學家傅斯年（1896-1950）擔任籌備處主任。4月9號，重量級民國政治人物、前北京政府國務總理、交通系首領梁士詒（1869-1933）喺上海病死。4月10號，全國華商紗廠聯合會通知全國各廠，一律每週減工1尺。4月11號，蔣Sir 響南昌召開贛、豫、陝、蘇、浙、皖、鄂7省治安會議，全面佈置第五次「大圍剿」，1933年，對中共嘅圍剿進入全面白熱化……

#常威💀 #蔣介石平反系列  #中日戰爭 #民國歷史 #佛經抄寫員

❤【常威近代史】第一部《大清亡國關慈禧蛋牛治》，全面開放，免費下載， #freedownload！

Free下載連結🔽

https://play.google.com/store/books/details?id=C3hjDwAAQBAJ