大清亡國關慈禧蛋牛治 3

【常威近代史】第九部《孫文之死》
https://play.google.com/store/books/details?id=evMsEAAAQBAJ

amazon同步上架👍請大家大力支持！
https://www.amazon.com/dp/B094D663XH

【常威近代史】（五百五十三回）
希特拉與北京猿人

踏入20世紀20年代嘅最後一年1929年，嚟緊嘅30年代，風起雲湧，生靈塗炭，不單止是中國，整個世界人民亦會跌一部巨大嘅碎肉機裡面，冇人可以逃脫，亦冇人可以想像得到，大家經過第一次世界大戰嘅慘痛教訓，竟然會爆發另一次更可怕嘅全球性戰爭，而且中間只係相隔咗大概30年，戰爭並唔係偶發，因為有太多分歧而用盡任何方法都唔可以化解，最後只有訴諸最純粹嘅暴力，勝者為王，由勝利者掌握最後話語權，有勝利者寫之後嘅歷史解讀，由勝利者定義究竟「正義」為何物？

二次世界大戰嘅主角係德國嘅希特拉，1924年佢因發動政變坐監被釋放後，一直努力於政壇，利用佢自己嘅個人魅力，到處演講，批判凡爾賽條約，宣揚泛日耳曼主義、反猶太主義同反共主義，佢獄中所寫嘅《我的奮鬥》亦成為暢銷書，去到1929年，佢同佢嘅政黨「國家社會主義德意志勞工黨」（Nazi Party），愈嚟愈受到群眾嘅歡迎，當然1929年時，仍然冇人能夠想像到Nazi呢個玩綽頭支持度只有幾個%嘅陀地小政黨，最後會成為國內最大嘅執政黨，當時如果你同人講希特拉依個顛佬會成為德國總理，所有人都認為你痴X線。不過，原來散播仇恨，不但有市場，而且非常有市場，由日爾曼民族組成嘅德國，其實係當時世界上人口質素最高嘅國家之一，係一個咁高質素嘅國家裡面，「仇恨」都會係一種咁受歡迎嘅政治暢銷商品，咁其他國家，就可想而知。不過到咗21世紀嘅今時今日，販賣仇恨，仍然係充滿市場同好受歡迎，你話人類過去100年係進步咗，我其實唔認同，1000萬個唔認同。

叉開一筆，講下乜嘢叫做「國家社會主義」？好多人唔知道，其實納粹黨係一個高舉社會主義嘅政黨，亦係一個工人階級政黨，鼓吹集體主義淩駕個人主義、計劃經濟取代市場經濟，但係希特拉係反共嘅？咁咪互相矛盾？其實並又冇矛盾，希特拉所反嘅，係共產主義（社會主義）嘅國際路線，佢認為，一切應該以國家民族為先，社會主義應該係以壯大自己國家民族爭取生存空間為唯一目的，當然佢心目中嘅國家亦只有偉大嘅「德意志帝國」一個，真正偉大嘅民族亦只有日耳曼民族一個，世界上其餘嘅民族都係屎，而由列寧托洛斯基所遺留落嚟嘅傳統，共產主義係要解放全世界嘅無產階級，因此我哋叫做國際派（international），但自從1924年國際派巨頭托洛斯基失勢被流亡之後，所謂共產主義國際派亦名存實亡，原本係「共產國際」凌駕於「蘇共」之上，但史太林已經逆轉遊戲，由「蘇共」反過來控制「第三國際」，某程度上，就係將「國際社會主義」變成「國家社會主義」，用史太林嘅術語，即係做大蘇聯先，然後先去解放全世界。史太林嘅做法，同希特拉嘅想法，其實係一模一樣。因此希特拉亦視史太林為佢最大嘅敵人同競爭對手，當然德國同蘇聯之間嘅仇恨，仲有千絲萬縷，後來我哋更加明白，希特拉要吞拼蘇聯嘅野心，比吞拚歐洲更巨大，亦因為依個堅持同心結，堅持東西兩條戰線並行，導致佢最後嘅失敗。

1929年12月1號，響改組派策動下，唐生智（1889-1970）喺鄭州通電反蔣，出任護黨救國軍第四路總指揮，發起討蔣軍事行動，12月7號，國民政府下令撤銷唐生智所有職務，並下令對其通緝，蔣Sir隨即對唐生智、閻錫山、石友三（1891-1940）聯盟進行分化瓦解。12月20號同21號，閻錫山同石友三相繼通電擁蔣，蔣Sir中央軍乘機喺平漢線上發起對唐生智部隊總攻擊，唐軍敗退，1月13號，唐生智殘部16000人喺漯河比蔣軍繳械，唐生智濤入天津租界避難，蔣唐戰爭結束。

12月2號，國民政府委派孔祥熙（1881-1967）為國家銀行董事長，孔祥熙妻子為宋靄齡；與財長宋子文、蔣介石為姻親關係，真係一家人玩曬，宋家皇朝蔣天下呢句說話並冇錯。同日，美國英國兩國政府召會中蘇兩國政府，勸佢哋履行非戰公約，即日停止軍事行動，之前已經講過，喺蘇聯攻佔滿州里及扎蘭諾爾後，中蘇邊境戰爭已經停止，進入和談階段和平解決中東鐵路問題。

同日，中國古生物學家裴文中（1904-1982）喺河北省房山縣周口店發現首個完整嘅北京猿人頭蓋骨化石。早響1921年同1923年，考古工作者已經喺龍骨山地區發現兩枚北京猿人嘅牙齒化石，1927年，大規模嘅考古發掘工作展開，裴文中喺依次周口店發現嘅頭骨化石，頭腦嘅一部分仍然嵌喺石頭之中，腦部保存完整，但面部已經剝落，該化石頭骨眉骨突出，腦殼甚高，額部闊大，經過鑒定，距離今日大約20萬年。根據同時出土嘅犀牛同其他哺乳類動物嘅化石推斷，當時周口店嘅氣候比現在溫暖，自然環境亦更複雜，北京猿人當時生活喺洞穴裡面，主要係靠採集植物維生，亦有進行搜獵活動。從周口店北京猿人遺址嘅孢粉分析顯示，北京人數萬年嘅生活中，曾經經歷過好大嘅氣候及地形變化，北京猿人已經懂得用火同埋製造工具，用火係食熟食嘅開始，北京人所製造嘅石器工具，技術純熟、形狀完整，一切都表明，北京猿人時代，人類已經進入初步文明。

#常威💀 #蔣介石平反系列 #黃金十年 #民國歷史

【常公子歷史頻道392回：替大軍閥平反系列之 奧巴馬也冇辦法改變現實】

♊請大家原諒，Youtube停咗一個星期，因爲我同阿潮工作都好忙，存貨用盡，逼不得已，要做番小小存貨留底，個世界越嚟越緊，生活逼人，經營依一條常公子近代史youtube channel亦冇乜營利可言，只憑我同阿潮嘅堅持去維持，我哋希望繼續落去，直至我哋冇能力去做、或唔可以做為止，加油！如果大家想支持我哋，亦都相當簡單，就課金，PM本專頁就可以，再冇嘢比真金白銀更實際，我自己都係一個非常市儈嘅人😂。

♉適逢其會，今日係蘋果日報出版嘅最後一日，頭先落街都買唔到，希望之後會買到一份作為紀念，我係由蘋果日報開始創報嗰日開始捧場嘅老鬼，時間應該係1995年6月，除咗近幾年，我亦唔係日日會買蘋果嘅人，但係一星期買三、四次就一定，因爲我喜歡跑馬，總喜歡攞住份實體馬經一邊睇馬、一邊左寫寫右間間，睇嚟呢個維持咗20幾年嘅習慣亦要停止，或者市面上好快會有一份《蘋果馬經》再出現，先看看情況吧。

♈對於蘋果停刋，畢竟非常傷感。有句說話喺網上見到，或者天下無不散之筵席，但蘋果要停，亦係唔應該用咁嘅方式煞停，對於冇咗一份自己睇咗20幾年嘅報紙，心裡面總感覺戚戚然，仍然未決定之後會買邊份報紙？畢竟生活總要繼續落去，報紙總係要買，Covid-19特襲地球兩年多，大家應該明白，變幻才是永恆，任何事情都要付出代價，一切都係因果。

🔯有人話香港最近變得好快，其實係世界變得好快，香港只係一處浪頭被波及嘅地方，閱讀歷史嘅人，就有呢種感覺。其實目前，世界已經進入一個非常混亂嘅「pre-戰爭狀態」，情形如履薄冰，一個唔小心就會失控，實體戰爭係冇人想發生，我三番四次強調打仗係非常昂貴，根本冇人想打，或者亦冇人可以打得起，但係當情況去到非用戰爭嚟解決不可，亦都冇任何辦法，去深入理解第一次世界大戰同第二次世界大戰發生嘅原因，你就會明白，100年前發生嘅事情，去到今日仍然一樣倒模地重演中……

✅https://youtu.be/VhB4U-m4QCg

💙最新上線，請課金支持

【常威近代史】第九部《孫文之死》
https://play.google.com/store/books/details?id=evMsEAAAQBAJ

支持常公子

【常威近代史】（五百五十四回）
開除汪精衛 整肅改組派

1929年12月3號，唐生智、何鍵（1887-1956）等53人聯名通電，表示擁護汪精衛，聯合張發奎討蔣，主張護黨救國，完成統一，之前已經講過，「唐蔣戰爭」因此而爆發，一個月後，由蔣Sir完勝。同日， 蔡運陞與蘇俄代表簽訂《俄遼和平草約》，中俄雙方正式結束軍事衝突。12月6號，許崇智（1887-1965）電勸蔣Sir下野，劉峙（1882-1971）等17位將領通電討伐馮玉祥，唐生智等叛將，情況真係立立咁亂，有兵在手嘅軍事將領，要選擇「擁蔣」抑或「擁汪」，即係買大細檯，冇人知會開邊邊？重申一次，蔣Sir當時心目中最大嘅敵人，其實就係自己友汪精衛，其次係日本帝國嘅侵略，中共可能排第三啫。但你睇見，國民黨內支持汪精衛嘅黨人，實在太多，而且好多仲係元老級德高望重，多到高到蔣Sir根本從來冇計收編，所謂統一，就算係國民黨內嘅統一，亦根本冇可能發生，可能時間可以解決一切問題同淡化分裂，但係當時嘅蔣Sir已經冇乜時間，勢力的龐大嘅日本，一早喺側邊睇住你嚟食，而且好快就會出手同蔣Sir玩鋪勁！九一八！

12月8號，中共中央發出第60號通告，要求武裝保衛蘇聯同反對軍閥戰爭。12月11號，中國最重要的近代史人物之一鄧小平（1904-1997）終於再次出現係歷史舞臺，鄧小平、韋拔群（1894-1932）、張雲逸（1892-1974）同雷經天（1904-1959）四人領導廣西警備第四大隊、教導總隊同右江農民喺廣西白色舉行起義，呢個就係中共黨史上有名嘅「百色起義」。國共合作破裂後，韋拔群率領農軍一直喺廣西右江地區堅持活動。1929年6月，應廣西省政府主席俞作柏（1889-1959）、廣西綏靖公署主任李明瑞（1896-1931）邀請，中共派出鄧小平、張雲逸等黨員前赴廣西，與俞作柏、李明瑞建立密切嘅合作關係。張雲逸、俞作豫（1901-1930）等一批共產黨員喺廣西部隊、機關中任職。9月底，俞作柏、李明瑞反蔣失敗，李明瑞率領警備第五大隊推往左江，鄧小平同中共廣西特委率領第四大隊同教導總隊撤往右江，與韋拔群嘅農軍匯合。

本日，鄧小平等率領士兵同農軍起義，建立中國工農紅軍第七軍，張雲逸任軍長、鄧小平任政委，轄下3個縱隊，共2800餘人，12月12號，右江蘇維埃政府成立，雷經天擔任主席。如果我冇記錯嘅話，依一次中共策動嘅「百色起義」亦係近代史上有記載下，巨人鄧小平所參與嘅第一次軍事領導行動，當時嘅鄧小平，祇不過得24歲，真係唔可以講笑，名正言順革命紅褲子出身，之後嘅日子，鄧小平亦在不斷嘅戰火中磨練成長，鋼鐵就是這樣煉成的，「鋼鐵公司」就是這樣建立起來的，千萬唔好以為鋼鐵可以「睇書」煉得成。

12月12號，國民黨中央執行委員會常委會會議決定，永遠開除汪精衛黨籍，並下令對其通緝，反了！正式反檯。去年底改組派擁汪反蔣，即係策動政變喇，蔣Sir開始大力鎮壓，單單1929年， 蔣Sir下令查封改組派嘅報刊就達到66種之多，既然開始打交，就冇理由再畀你用報刊做意識形態宣傳同鼓動。6月15號，又查封改組派嘅大陸大學，令改組派組織遭受破壞。喺國民黨三全大會上，陳公博（1892-1946）、顧孟餘（1888-1972）被開除黨籍。10月，陳公博等改組派要員被通緝。今日，中常會以「勾結陳公博、顧孟餘等，設立小組織，欺騙無知青年」、「主持逆謀、聯合軍閥、顛覆黨國」等罪名，將汪精衛永遠開除出國民黨！

12月15號，已經被黨中央開除出黨嘅前領導人陳獨秀，主持召開咗「中國共產黨左牌反對派」會議，通過咗《我們的政治意見書》作為綱領。陳獨秀於本年6月開始與托派人士接觸，9月與彭述之、尹寬等人組成「中國共産黨左派反對派」，傾向托洛斯基主義，今日通過嘅意見書，係「托陳取消派」正式承認嘅標誌。意見書裡面猛烈抨擊莫斯科「共產國際」（即「第三國際」）嘅領導，評擊中共六大路線係機會主義路線，認為機會主義令到中國革命失敗；盲動主義徹底完成呢個失敗；六大以後嘅路線係繼續鞏固呢個失敗；並為下次革命預備新嘅失敗；哇……失敗前失敗後，真係認真唔畀面黨中央！意見書要求「第三國際」恢復托洛斯基嘅黨籍同埋領導工作，恢復中國黨內被開除同志嘅黨籍，並且要求改造蘇聯共產黨、共產國際、及各國支部嘅領導層，重新決定聯共、國際及中共等路線。哇……真係厲害，1930年3月開始，這份意見書喺社會廣泛散發，不過純屬文宣，無需要認真，亦不可能認真。早響1938年，被流放嘅托洛斯基已經到終點站墨西哥城落腳，並在墨西哥與支持者創建咗「世界社會主義革命黨」，即「第四國際」，與史太林控制嘅「共產國際」（即第三國際）對抗，陳獨秀同佢嘅支持者係中國所做嘅，亦祇不過係「第四國際」嘅文宣策略。

#常威💀 #蔣介石平反系列 #黃金十年 #民國歷史

【常威近代史】第九部《孫文之死》
https://play.google.com/store/books/details?id=evMsEAAAQBAJ

amazon同步上架👍請大家大力支持！
https://www.amazon.com/dp/B094D663XH

【常公子歷史頻道393回：替大軍閥平反系列之 國父孫文先係罷工之父】

♊蘋果日報停刊，翌日領導班子大換血，名副其實鷹派上臺，香港重新出發，亦會有一個全新嘅管治模式，一個全新嘅生活形態，新人事新作風，究竟未來會點樣發展？真係冇人知道。新嘅未必一定好，但舊嘅亦唔覺得好得去邊？大家懷緬以前，係咪懷緬三萬蚊一尺嘅樓價？抑或懷緬固步自封食老本嘅日子？對香港未來冇信心嘅人已經一個一個離開，另覓新天地。但對於冇選擇走定唔走嘅窮人嚟講，好似我咁樣，亦都冇辦法，唯有努力現在，期盼將來，大家加油！悲觀大概無補於事，平常心面對，生活總係要過，It is the bad time and it is the good time。

♉令人擔心嘅問題，反而係變種病毒嘅蔓延，疫苗接種率甚高嘅英國，疫情亦開始反彈，太早放寬社交距離企圖挽救經濟，可能到頭來得不償失。Bill Gate預言2022年世界會一切回復正常，睇嚟最聰明人都會估錯，放於眼前嘅現實係，疫苗有效性冇之前想像咁高，病毒同時不斷變種適應疫苗才是最可怕，響「封鎖防守疫情」同「放寬挽救經濟」之間嘅平衡，亦並非咁容易可以取得，加上疫情係全世界嘅事，並非一個國家嘅內政，你搞掂，人哋未搞掂一樣冇運行，所以預計情況會拖過2021年至2022年，眨吓眼，叫Covid-19喎，橫跨四個年頭，真真正正造成嘅經濟傷害，比第一次、第二次世界大戰更嚴重了。

♈疫情亦加劇咗國際關係嘅變化，中美之間嘅競爭，畀一場新型冠狀病毒帶上高峰，拜登雖然同俄羅斯總統普京見面，但三、四日後，就發生俄羅斯軍艦喺克里米亞海面用實彈發炮警告英國軍艦嘅事件，呢個亦都係1945年二次世界大戰結束之後，俄國第一次向北約嘅艦隻動用「實彈」，情況其實相當危險。拜登表面上無特朗普嘅強硬，但其實亦唔係綿花糖，國策印銀紙所需，亦縮都無得縮，示人於弱等於進一步將美元貶值。傳聞未來召開嘅G20上，美國總統拜登會同國家主席習近平見面，各國巨頭不斷親身見面對話，睇嚟大家都明白，再唔積極化解分歧或將關係微調改善，大家都好驚擦槍走火，真係要打仗，就要印更多銀紙找數。

✅https://youtu.be/KWpDYygqZ5c

💙最新上線，請課金支持

【常威近代史】第九部《孫文之死》
https://play.google.com/store/books/details?id=evMsEAAAQBAJ

1⃣【常威近代史】第一部《大清亡國關慈禧蛋牛治》（免費下載）
https://play.google.com/store/books/details?id=C3hjDwAAQBAJ

2⃣【常威近代史】第二部《中國一百年前第一次開放改革》
https://play.google.com/store/books/details?id=_6KMDwAAQBAJ

3⃣【常威近代史】第三部《東方維多利亞女王之死》
https://play.google.com/store/books/details?id=GaGrDwAAQBAJ

4⃣【常威近代史】第四部《霹靂大忠臣對決無敵大買辦》Round One
https://play.google.com/store/books/details?id=Np3PDwAAQBAJ

5⃣【常威近代史】第五部《霹靂大忠臣對決無敵大買辦》Round two
http://shorturl.at/dW145

6⃣【常威近代史】第六部《最九衰的大軍閥時代》Round 1
https://play.google.com/store/books/details?id=bCMNEAAAQBAJ

7⃣【常威近代史】第七部《最九衰的大軍閥時代》Round 2
https://play.google.com/store/books/details?id=lPgaEAAAQBAJ

8⃣【常威近代史】第八部《最九衰的大軍閥時代》Round 3
https://play.google.com/store/books/details?id=fY8mEAAAQBAJ

❤請大家批量下載，支持公子繼續以廣東口語寫作中國近代史，大功所就，大名所居，君子於此，有讓道焉。

【常威近代史】（五百五十五回）
黨指揮槍 理所當然

1929年12月17號，國民政府行政院決定永遠禁止發行《清史稿》，中國歷史由司馬遷《史記》開始，均由本朝以「紀、志、表、傳」體裁撰寫上朝歷史，是為「正史」，亦成為一個中國史學傳統，清帝國1911年退位後，中華民國亦依照傳統撰寫《清史》，1914年民國三年，清史館設立，此後編修清史工作歷時十多年。到1927年，主持纂修工作嘅前四川總督、湖廣總督、東三省總督兼清史館館長趙爾巽（1844-1927）見全稿已經初步成形，擔心時局多變及自己時日無多（果然當年就釘蓋），遂決定將各卷以《清史稿》嘅名稱刊行，以示其為未定本，因時間匆忙付印，於是有頗多錯漏。趙爾巽亦講「然此書成稿於遺老之手，刊行於匆促之中，謬誤屢見，用時不免戒慎，唯恐誤入歧途。」由於編修者多為前清遺老，《清史稿》書中對清朝歌功頌德，最重要係貶低辛亥革命嘅重要性。國民政蔣Sir上臺後，於今日將《清史稿》定為禁書，禁止刊印及發售；後來解禁。

不過《清史》嘅撰寫工作亦因為時局變化冇咗下文，所以世上並冇一部叫正史嘅《清史》存在，只有一部未完全完成嘅《清史稿》傳世，不過《清史稿》本身史料豐富，足足有529卷，其份量及價值仍不可忽視。今日仍有唔少歷史學者將其列入「二十五史」或「二十六史」中正史嘅最後一部。

12月20號，閻石山、張學良等聯合通電擁護中央，反對唐生智。12月21號，國民政府取消對梁士詒（1869-933）、顧維鈞（1888-1985）等人嘅通緝原案，對前朝政治人物，並無趕盡殺絕。活在當下，眼前嘅敵人先至係真正嘅敵人，12月22號，國民黨西山會議派居正等人喺上海被拘禁；同日，臺灣民眾反對日本臺灣總督重發鴉片吸食特許狀，即係有人可以合法食鴉片，呢個情況亦並非獨獨響日本帝國殖民地臺灣發生，去到五六十年代嘅英國殖民地香港，仍然有人可以合法吸食鴉片，我唔知道理由又係乜嘢？或者同健康有關？總之有特權食鴉片嘅人，一定不可能係窮人，一定係有權有勢嘅大人物，有權有勢嘅人，就可以超越法律，仲有，世界上有一樣嘢要特事特辦，響權勢面前，法治其實無險可守。

12月28號，國民政府明令，從1930年1月1日起，僑居中國嘅外國人應一律遵守中國法律同規章，從前係唔需要嘅，外國人享有領事裁判權保護，有乜冬瓜豆腐，就鼠返入租界，你吹我唔漲，中國法律冇權力審訊我啊？我只受我自己國家法律所支配同保障，「國中有國」、「被列強瓜分」就係咁解，鬼叫你冇料到咩？但繼各國相繼將租界交還中華民國國民政府後，情況得以逐步改善，依方面，蔣Sir真係有枓到嘅！

最新小說作品【Master】https://play.google.com/store/books/details?id=5FIfEAAAQBAJ

Kindle版下載連結
https://www.amazon.com/dp/B08X4DK2FP

【常威近代史】（五百五十六回）
星星之火 可以燎原

20世紀20年代結束，歷史巨流浩浩蕩蕩邁進20世紀30年代，中華民國自1911年辛亥革命建立以來，經過差唔多19年嘅無盡紛爭同戰亂，去到1930年，一切仍然在沸騰不休，雖然蔣Sir實現咗有限度嘅統一，但係整個中華民國國內，仍然處於軍閥割據年代，好多軍閥或地區軍事力量，雖然口裡效忠南京國民政府，但其實仍然自把自為，割地為王，而且唔少大軍閥，例如閻石山同桂系根本亦唔會妥蔣Sir，加上擁汪派破壞國民黨黨內團结，內戰從來冇結束過，亦會繼續發生落去。而共產黨嘅勢力亦冇被完全撲滅，仍然成為蔣Sir嘅心腹大患；強大嘅日本帝國謀著東北，志在必得，利用末代皇帝溥儀建立「滿洲國」依個大project正在密鑼緊鼓進行中，內憂外患，百九幾個問題未解決，痕都頭埋。

1930年1月1號，蔣Sir發表元旦文告，題目係《以氣節廉恥為立黨立國之本》，指斥改組派等反蔣派「以投機取巧為智，以好亂反覆為勇」，稱「本黨同志苟能以各個的革命人格，團聚為整個黨的人格，則前途一切困難，一切敵人，皆如摧朽拉萎」，由此可見，蔣Sir眼中嘅第一號問題，仍然係汪精衛依枝回馬槍。同時間，「蔣唐戰爭」正打得火熱，今日陸海空軍副司令閻錫山離太原經石家莊赴鄭州督師討伐唐生智，第二路軍總指揮劉峙（1892-1971）正面向唐部隊全線出擊，大名鼎鼎，後來參加「西安事變」嘅猛將楊虎城（1893-1949）部下突襲唐軍右側，於1月1號下午佔領唐總部駐地駐馬店，守軍潰散，唐生智倉猝逃亡。1月2號，唐生智以3個團反攻駐馬店，但被新十四師楊虎城部擊敗，全線動搖，1月4日黎明前開始總撤退。

1月1號，中國最重要嘅文學家魯迅（1881-1936）主編嘅《新芽》月刊喺上海創刊，內容主要係講文學理論同埋蘇聯文學介紹，當然唔少得評擊社會同政府嘅文章。創刊號上發表魯迅嘅雜文《流氓的變遷》、《新月社批評家的任務》，並開始連在蘇聯作家法捷耶夫（1901-1956）嘅長篇小說《毀滅》，法捷耶夫曾長期擔任俄羅斯無產階級作家協會主席和蘇聯作家協會總書記，1956年5月13日自殺身亡。《新芽》月刊亦都係「左聯」嘅機關刊物之一，「三月紀念號」發行，就為咗紀念馬克思、恩格斯同巴黎公社；五月號當然唔少得記念「五一」勞動節，打正旗號宣傳共產主義馬克思主義，於是6月就畀當局查封，禁止出版！既然意識形態同政權的口徑唔相同，真係冇理由繼續畀你宣傳反動勢力嘅。更何況，依一類刊物的出版亦並非一盤純粹嘅出版生意，當中有巨大嘅政治目的，亦有金主響背後撐腰，係權力鬥爭中意識形態嘅重要武器，所以唔應該叫「查封」，應該叫「繳械」先啱。

1月5號，毛澤東覆信畀紅四軍一縱隊年輕司令員林彪（1907-1971），對其「紅旗到底打得多久」的疑問作出答覆。毛澤東喺封信上批評咗讓紅軍放棄其鄉村家園，流動遊擊，等待發動全國性起義時機嘅悲觀主義觀點。毛澤東指出：英國、美國、日本喺中國嘅鬥爭已經到咗十分露骨嘅地步，蔣、桂、馮混戰形勢亦已經形成…反革命潮流開始下落，革命潮流開始復興中。毛澤東要林彪相信，紅色根據地必須繼續存在同發展，他亦引用一句古老說話來概括佢所有觀點——八個字：「星星之火，可以燎原」。大家當然知道最後的勝利者係邊個？但係1930年，毛澤東嘅勢力，絕對只係「星星之火」。

1月6號，閩北民軍領袖盧興邦（1880-1945）聯合海軍系統嘅福建城防司令林忠（1882-？）等發動兵變奪權，扣押政府官員，諗住戙支旗仔，自立為王，前前後後搞咗六個月，最後兵變失敗，盧興邦部隊被政府軍擊潰同收編，佢同林忠則被送往南京查辦，下落不明。

同日，國民政府考試院及其所屬嘅考選委員會同時成立，至此，國民政府5院中嘅4院已經正式設立。早響1928年10月頒佈嘅《中華民國國民政府組織法》中，考試院為五院之一，之後，籌備工作由戴季陶（1891-1949）、孫科（1891-1973）等執行，歷時一年有餘，考試院主管考選與銓敍事宜，你估淨係考試（考評局）咁簡單？係關乎全體公務員嘅遷昇考核，以前港英政府，亦有1970年成立嘅「銓敍科」同「銓敍司」，到1991年，「銓敍科」先改稱叫「公務員事務科」，亦即係今日嘅「公務員事務局」（Civil Service Bureau，CSB），當時嘅考試院，負責考選銓定全國公職候選人、公務員及專門技術人員，權力非同小可。首任考試院院長兼考選委員會委員長為戴季陶、副院長為孫科，考選委員會副委員長為邵元冲（1890-1936），銓敘部長為張難先（1874-1968）。

上海聯華影業公司推出處女作《故都春夢》，係一部反映社會生活嘅現實主義作品，喺當時一派武俠神怪片潮流中獨樹一幟，呢部電影由孫瑜（1900-1990）導演，30年代中國最重要嘅女演員阮玲玉（1910-1935）飾演女主角。

#常威💀 #蔣介石平反系列 #黃金十年 #民國歷史

【常公子歷史頻道394回：替大軍閥平反系列之 一個字：「窮」】

♊今日7月1號，去年的7月1號，港版國安法落實，起初好多人都唔覺得會貫徹執行，但一年落嚟，不單止是貫徹執行，而且係全力執行，加上一場Covid-19特襲地球，香港社會亦由混亂狀態全面回復到現在嘅平靜狀態，不過，不得不提，香港嘅防疫做得好好，失業率亦由高峰滑落，股票唔跌，樓亦唔跌，一句到尾，香港其實底氣好夠，大把有錢人，「窮」字其實冇香港份，香港仍然係福地，當然好多人感覺已經唔係。

♉近年內地興起一個詞，叫「內卷」，「內卷」的意思係當一個社會發展到某一個地步，就會停滯不前，進入瓶頸狀態，不過這並非我們國家獨有嘅問題，經濟學上，就有『中等收入陷阱』（Middle income trap）來形容這種內卷嘅情況。沉且，內卷已經開始全球化，一場延蔓了兩年多的Covid-19加速了全球性內卷化發生，第一個表述就係，上一代或上上一代在經濟飛騰時候富起來嘅人，註定要剝削下一代或下下一代年輕人嘅勞動力而繼續自保和自肥，這個根本又是個全球化現象。在每一個時代，在每一個地方，都不斷發生，而且永遠不會停止，會不斷循環回歸落去。

♈香港嘅內卷化問題，其實已經發生咗20幾年，一早已經內卷化，用廣東話嘅哩語，香港某程度上嚟講，叫「塘水滾塘魚」，如果冇咗金融股票市場吸水，一早已經香左，早兩年發生嘅亂局，其實亦都係香港內卷化嘅表象。到目前為止，我仍然未見到香港嘅出路，香港雖然富有，但係長期落去，始終要搵一條新嘅出路，重新再出發。

✅https://youtu.be/SJYaUOpypXE

💙最新上線，請課金支持

【常威近代史】第九部《孫文之死》
https://play.google.com/store/books/details?id=evMsEAAAQBAJ

【常威近代史】（五百五十七回）
「金本位」取代「銀本位」

1930年1月5號，外交部上書國民政府，請令各省市政府詳查外國駐軍及軍警情況，以便與各國交涉撤軍問題，既然一種西方列強紛紛向中華民國交還殖民地及領事裁判權，下一步亦都冇理由再駐軍警於中國國內，中華民國實現主權，再嚮前邁出一步。當然其他列強嘅態度，對日本造成重大壓力，相信當時喺中國境內，仲有大量日本軍人同警察響東北。但你哋撤退，唔代表我要撤退？西方列強嘅態度，亦促使日本要儘快攤牌，軟不了就他媽的來硬吧！

1月6號，唐生智反攻駐馬店失敗，大勢已去，唐生智表示將所有軍隊交予手下處理，本人下野出洋。打敗仗啫，唔使死嘅，呢啲事當年係司空見慣，打仗未必要生死相搏，玉石俱焚，去到二次世界大戰，人類先開始完全改變打仗嘅玩法，當然我個人認為，日本人對待戰爭嘅態度，係相當重要嘅轉折點，任何人可以用條命同你搏，威力自然事半功倍。

1月8號，金價暴漲，銀價暴跌，上海倫敦嘅白銀匯價，低至前所未有嘅地步，依一場係金融風暴！白銀一直係國際間最重要嘅交易貴金屬，但黃金會取代白銀，即所謂「金本位」取代「銀本位」，「金本位」要去到1972年先畀鴻圖大略的尼克遜取消，之後，銀紙背後唔需要有實體黃金價值support，改以國家（阿美利堅）信用support，之後嘅日子，就係任印銀紙（美金）囉。

1月13號，唐生智殘部投降，蔣介石討唐軍事行動正式結束。1月14號，山東省政府取消孔子後裔嘅特殊待遇；同日中東鐵路職員舉行大罷工，抗議蘇聯局長大量裁減中國員工；1月15號，國民黨中央政治會議決定改用「金本位」徵收海關進口稅，一夜之間，白銀時代結束，當中都唔知有幾多人仆街呢？不過咁重要嘅事，歷史課本一向好少提，經濟嘅嘢，文人實在識條鐵？不過作為一個歷史愛好者，如果唔用經濟角度去考量歷史事實，一定錯到仆街，不過世上仆街何其多？我都可能係其中一個。

1月16號，國民黨中常委任命宋子文為國府委員兼行政院副院長，真正搭直升機，即向上昇。鬼叫我兩個家姐細妹嫁咗畀中國兩個最重要嘅人咩？冇得恨咁很多。社會上有好多人自怨自艾，覺得自己冇得發圍，冇得向上游，大學first hon畢業都做唔到富豪，但又唔諗下自己嘅出生係乜？窮等人家公屋仔出身？發條毛咩？前列腺就可以發大，財富同埋人脈係數代人嘅累積，當你老竇仲供緊一層四、五尺樓仔以為自己好撚成功嘅時候，人哋已經幾代養緊馬跑打吡，呢啲叫做贏在起跑線，五班馬同一班馬永遠冇得跑，唔明呢個道理，好難生存落去，因此人要認命，但認命唔代表躺平，平凡都可以積極。

【常公子歷史頻道395回：替大軍閥平反系列之 十條尾巴與計時炸彈 】

♊七月一日，銅鑼灣發生刺傷警察事件，凶徒當場自殺，當日看見電視畫面，滿地鮮血，痛心疾首，希望類似嘅恐怖施襲事情唔會再發生，因為對所有香港人都冇好處，細心去想一想，無論喪命者、施襲者及受襲者，全部都係無辜嘅人，縱使大家意見唔一樣，亦無需要做到咁嘅地步，忍一時風平浪靜，退一步海闊天空，希望大家明白。而且，人生不如意事十常八九，世事亦往往未如人意，千萬唔好鑽牛角尖。有時候換個角度去看待事物，一切都會煥然一新，亦要明白好多嘢都返唔到轉頭，亦唔好期望山後面有更美麗嘅風景，活在當下，令自己心情儘量舒暢，做自己喜歡做嘅事，研究自己喜歡研究嘅嘢，如果你唔信宗教或神更好，人的生命祇有一次，希望大家好好活著，唔好傷害他人之餘，更不要傷害自己。

♉過去兩三年，其實好多嘢都改變咗，每日上街要戴口罩，已經係不能想像之事，我現在幾乎患上「出街恐懼症」，因為本身好怕熱好大汗，30幾度高溫仲要帶住個口罩，十秒變水人，簡直係一種折磨。出國旅行，依種娛樂行為亦已經喺我哋社會中消失，試問之前邊個可以想像得到？學生返學要上網課，冇曬人與人之間嘅接觸，產生嘅後遺症亦可以非常巨大；國際間嘅人流交往大部份停止，亦唔使我多講有幾大件事？我經常想像，香港已經係一個非常富裕嘅地區，在疫情期間經濟仍然頂得住，但係一啲比較貧窮落後嘅地方，太平盛世都好己經大鑊，其實現在嘅情況係冇辦法想像。大家睇唔到，唔代表唔存在，就算睇到，亦冇辦法可以做啲乜嘢。人生總係充充滿無奈，希望大家理解。

♑對全新嘅生活形態，其實亦都慢慢習慣中，人類嘅記憶力，亦唔係想像中咁長同咁持久，時間無疑可以沖淡一切，我再重申一次，細讀歷史你就會明白，太平盛世嘅日子並非必然，其實亂世先係常態，天下唔會永遠無事，太陽底下，問題只會每天不斷發生，人類亦唔係太聰明嘅動物，喺處理問題上往往失諸交臂，甚至往往失控，將細嘅事情弄大，亦都會成日咁樣做，因此，真係要以平常心面對，時刻告訴自己，變幻才是永恆，活著就是一個如此這般的狀況，沒有其他。

✅https://youtu.be/flJROadm0zk

💙最新上線，請課金支持

【常威近代史】第九部《孫文之死》
https://play.google.com/store/books/details?id=evMsEAAAQBAJ

【常威近代史】（五百五十八回）
做人點都要有樽鹽響手

1930年2月1號，國民政府宣佈即日起，實施關稅自主！關稅（tariff）係一個國家立國之本，關稅亦唔係單單只係一項國家收入，而係牽涉到整個國家經濟嘅生死命脈，用嚟調節出入口貿易順差或逆差，事關重大！早兩年或發展到今日嘅中美貿易戰或中美之爭，就係由關稅問題開始，「世界貿易組織」（World Trade Organization，WTO）就係一個平衡全世界貿易嘅組織，希望透過協商、協調及仲裁，減少國家與國家之間因為經濟貿易問題而出現的摩擦，個人感覺，WTO嘅實質威力比聯合國更加大，因為其實世上嘅問題，99%都係錢嘅問題。一個國家關稅不能自主，亦係話你知，依一個並非一個主權國家，只係一個大國嘅附傭國或一個任人魚肉嘅弱國。1930年前的中華民國，就係一個連關稅都不能夠完全自主嘅卑微國度，原因當然係四分五裂，冇人可以話事，去到1930年，蔣Sir嘅黃金十年，一切先推倒重來，一步一步將中華民族喪失嘅權利同樽鹽，重奪回手中。

好多人認為樽鹽唔重要，真金白銀，錢先係最重要。但係樽鹽亦係同錢有關，有樽鹽喺手，就能夠提高叫價，你連樽鹽都冇，人哋就會睇唔起你，睇唔起你，咁你又如何可以將製造出嚟嘅商品賣到好價錢呢？正如煮餸一樣要落鹽，否則就會毫無味道可言，所以做人點都有樽鹽響手，做人先可以做出一點味道來，否則平淡如水不如死咗佢算。最後，因為不如意事十常八九的緣故，做人可以乜都冇曬，但起碼有樽鹽響心中留下來，步入六呎之下前，算是對自己有個交待。

當然你可以問，點解做人要對自己有個交待？呢個問題我冇辦法為你回答，你要問你自己。如果你覺得唔需要同自己交待，咁我非常恭喜你，因為畢竟，少隻香爐少隻鬼，捨得下，係好事嚟嘅。

2月1號，曾經同鄧小平參與過百色起義嘅李明瑞（1896-1931）、俞作豫（1901-1930）喺廣西龍州起義，成立紅軍第八軍，紅軍嘅規模日漸擴大，喺唔同嘅地方打遊擊戰，雖然仍然係星星之火，但係的確有燎原之勢。2月2號，英國表示希望用五年時間分期逐步撤銷領事裁判權，拖得就拖。同日，行政院命令各省修復鄭成功（1624-1662）、戚繼光（1528-1588）祠宇，理由我唔清楚，但係一個政權要抬舉某啲歷史人物，總係有個政治目的或意識形態目的。

2月5號，上海法租界會審公廨自動改組，唔理你法國人點諗鳥，宣佈刑事案件初審、複審都由中國官員單獨審理，華洋刑事同引導案件，依從中法會審等五條簡章辦事，法國領使對租界法權控制亦日漸鬆手。該公廨自1869年4月開始辦理案件，法租界內所有華洋訴訟與華人民事刑事案件，均由法國副領事參與審理，中國官員冇話事權，1927年，公共租界臨時法院成立，法領事先將純粹華人嘅民事案件改歸中國官員獨審，此後中國不斷交涉收回上海法權，到咗今日，卒之有一個明確嘅進程。

2月10號，國民政府五院院長聯名發表《告全國軍人書》，重申中央嘅根本政策為和平統一，即係話畀大家知，希望唔係武力統一，但係統一好難和平進行，如果和平就唔會分裂啦。一波未平，一波又起。海陸空軍副總司令山西王閻石山，啱啱先幫助蔣Sir打倒叛將唐生智，2月10號，佢致電（電報，唔係手提）蔣Sir，批評蔣sir武力統一嘅做法（咁究竟係和平統一抑或武力統一呢？我好亂呀……），閻錫山指出繼續動用武力必會令到「黨內之糾紛愈烈，軍人之恐懼愈甚，深挑撥離間之機會愈多……民間之疾苦日增」，閻錫山表示佢可以同蔣Sir一齊下野，希望蔣Sir「禮讓為國」。

兩日之後，蔣Sir回電，認為「此時國難正亟，非我輩自鳴高蹈之時」，並且反問閻石山：「對於憑藉武力，謀危黨國者，舍以武力制裁之外，更有何術以實現和平統一之目的？」，講得好清楚，「以武止武」係唯一做法，對方搦住槍指住你，你插支白花係槍口上就可以令對方放低枝槍？大家未免睇得電影太多了。2月13號，閻石山再回覆電報比蔣Sir，問佢「今日所開除通緝的黨員，何者非盡力國民革命的分子？今日所討伐作戰的軍隊，何者非盡力國民革命之軍人？」，大仁大義，就係話你蔣Sir成日食碗面反碗底！由於中正要害，蔣Sir一方面未有回覆電報還擊，一方面派行政院長譚延闓（1880-1930），立法院長胡漢民（1879-1936），司法院長王寵惠（1881-1958）出面，以黨紀國法對閻錫山嘅威脅作出責備，另一方面著手部署軍事行動對付山西王。

閻石山見形勢不妙，又發電報畀蔣Sir，講自已發表意見純粹係為咗國家，並無反蔣之心，扮出弱者姿態。期間，李宗仁、白崇禧、黃紹竑、張發奎等反蔣將領亦發電報同閻錫山呼應，呼籲以武力迫蔣Sir下臺，閻錫山亦愈嚟愈大膽，電文措辭亦都愈嚟愈激烈。2月26號，蔣Sir發電報叫閻石山「臨崖勒馬」，閻石山覆電攤牌，「既然彼此見解不同，只好各行其事」。長達20幾日嘅蔣閻電報戰，亦告一段落，之後就唔係口水戰鳥，係堅打……

#常威💀 #蔣介石平反系列 #黃金十年 #民國歷史

https://www.youtube.com/playlist?list=PL0RVUAILQUOvTo8JJrayjrvd_Nbjc-0Me

❤請加入常公子的近代史世界！

#常威 #廣東話 #中國近代史 #HongKong #Chinese #History

2月18號，北平市教育局對兒童入學率進行咗調率，結果都幾驚人，根據統計，北平市總人口為105萬，其中適齡入學嘅兒童有10萬人，就學兒童為3.9萬人，其中因為家境生活困難半途輟學嘅就有2.3萬，實際就學嘅兒童只有1.6萬，由於居民貧富差異，就學率亦都唔一樣，城區比較高，東城又比西城高，北城又比南城高，東郊又比其他郊區高。但從數字可以睇得出，兒童讀書嘅比率只得16%咁大把？話曬都係前朝堂堂首都，北平市尚且如此，其他次級城市只會更加大鑊，城市尚且如此，鄉村我諗根本唔能夠想像（仲講讀書？不如講吓細路仔有冇褲著好過喇），我再重申一次——這個才是當時中國的狀況——千萬唔可以想得太美好。

2月20號，歷史語言研究所主任，「中國考古學之父」之稱嘅李濟（1896-1979）指出，安陽殷墟發掘出嚟嘅古物，足可令中國嘅美術史、文化史同社會史重新編定，殷墟係中國商朝後期王都遺址，位於河南安陽市，以殷都區小屯村為中心，橫跨洹河（音緣），東西長約6公里，南北寬約4公里，由殷墟王陵遺址與殷墟宮殿宗廟遺址、洹北商城遺址等共同組成。公元前14世紀，商湯第九代孫盤庚即位後，把都城從奄（今山東曲阜）遷到殷（今河南安陽），直至帝辛紂滅亡的273年間，殷地一直是商朝後期統治中心，因此商朝也稱殷朝。周武王伐紂滅殷後，從這裡遷走大量殷民，商都逐漸荒蕪，成為一片廢墟，故名殷墟。1899年，甲骨文被發現，後經有關學者察訪，弄清楚甲骨文真實出土地點，即今安陽小屯村。1928年，在前中央研究院蔡元培院長領導下，正式開始考古發掘工作。

2月21號，交通部同德國漢莎航空公司簽訂合辦歐亞航空郵運合同，22號，立法院通過《黨員犯罪加重處刑暫行條例》5條，應該係針對黨內反對派同叛將勒。2月25號，閻石山到五台建安村會晤馮玉祥，商量合作起兵討蔣，內戰又一觸即發，好似永遠冇辦法停止。2月26號，尼泊爾喺英國支持下，派兵進犯西藏，背後攪屎棍當然就係英國，周紳士真係難搞。2月27號，綏遠五原有一粒大隕石墜落。呢個月，上海法租界回力球場開始經營，回力球是國際公認嘅快速球賽，為西班牙國技。比賽方法簡單。球賽分單、雙打、淘汰賽等等，但係當然唔只係球賽咁簡單，勝負係可以入場投注嘅，即係話，回力球場喺一個賭場。

#常威💀 #蔣介石平反系列 #黃金十年 #民國歷史

【常公子歷史頻道396回：替大軍閥平反系列之 打交最高境界心理戰術 】

♊ 九十年代的電影【破壞之王】 令人印象深刻，內裡的中國古拳法掌門人吳孟達曾經對何金銀指出，打交嘅最高境界，就係心理戰術。因為外賣你何金銀要挑戰斷水流大師兄，雙方實力有極大距離，唯一取勝之道就是應用心理戰術，結局每一個人都知道，外賣仔何金銀創造了奇跡，奪得美人鍾麗緹歸，皆大歡喜。但所謂心理戰術，其實即係三個字：「拋浪頭」。要敵人無中生有為自己製造無形的恐懼，懼怕不存在嘅事物，是為打交嘅最高境界。這句說話我一直記在心中，在人生旅途上，獲益良多。

♐【破壞之王】 電影也不知看過多少遍，大約是我看過最多次的電影的其中之一，一對熒幕上的好拍檔，周星馳與吳孟達，一個已經仙遊，另一個已經神隱，佢哋留低嘅精彩演出，則永遠留在每一個人心裡，成為一種時代象徵。有時候喺度諗，點解現在嘅人無辦法拍出咁出色嘅喜劇？時代改變咗，技術都提昇咗，但係有啲嘢則唔見咗？究竟唔見咗啲乜？我真係唔知道，就好似心靈上欠缺了某一塊拼圖，從而感覺失落，從此亦冇辦法開懷大笑。或者真相，只係吳孟達同周星馳已經攀上頂峰，後來者根本無法超越佢哋。

♑忽然想起，21世紀初期，當時係《星際大戰二部曲：複製人特襲》（Star Wars Episode II: Attack of the Clones）上映的時間，我同一個朋友去天后宵夜食糖水，大家爭拗住由Ian McDiarmid 飾演嘅共和國議長白卜庭究竟係唔係最後大佬西斯大帝Darth Sidious嘅問題，期間我朋友指出香港有部份傳媒似乎執行著某一啲任務，不斷分化香港人，煽動仇恨，將來一定會出現大問題云云。我當時不以為然，亦不同意，覺得朋友嘅推斷嘅陰謀論冇可能發生。不過回頭已是百年身，朋友響20年前嘅預言，一一命中。

♈近幾年，發生喺自己身邊嘅事情，令我更深刻認識歷史，原來歷史書上所記載嘅嘢，有時候一定要親身經歷過，先明白當時點解可以發生？同如何發生？我以前覺得某啲歷史事件非常荒謬，根本冇可能發生，現在我明白，「荒謬」先係「常態」，愚蠢的我，本來就太高估人類的智慧和判斷力吧？

✅https://youtu.be/wNrjJjTjYxM

💙最新上線，請課金支持

【常威近代史】第九部《孫文之死》
https://play.google.com/store/books/details?id=evMsEAAAQBAJ