大清亡國關慈禧蛋牛治 3

【常公子歷史頻道452回：替大軍閥平反系列之 孫文的承繼人】

♊ 香港疫情大爆發，幾千宗一日，人心惶惶，成條街靜曬，經濟活動劇減，嚴峻情況可能會延續幾個月，大家要有心理準備，好好忍耐，我相信雨過天晴，好快會回復正常，世界總唔能夠被新型冠狀病毒繼續拖落去。我成日講，悲觀冇用，樂觀面對困境，船到橋頭自然直，人間總有出路，不必太惶恐，做好自己，調節好自己嘅心理狀態，我成日同自己講，活咗幾十年，有咩大風浪未見過？平常心過好每一天，好過自傷自憐，自我製造恐懼。

♉ 不過睇見有位三歲女童因為疫情過身，真係非常傷感，今日響電視仲見到好多老人家要響露天吹風等入院，情況不但唔理想，而且係非常嚴重，希望有更多人伸出援手，幫助有困難嘅人渡過難關。我諗當前急務，就係有輕微病徵嘅確診者要保持鎮定，乖乖留喺屋企，唔好去逼爆急症室，因為仲有好多人需要基本醫療服務，總之都係一句，大家保持鎮定，唔好恐慌，除咗長期病患者老人家同小朋友，一般人感渠Omicron應該可以自行療養康復，切記！應該要畀有需要嘅人優先使用已達到飽和嘅醫療服務。

🔯另外，亦都唔需要搶購糧食同藥物，尋日，我親眼見到有人響藥房買咗千幾蚊「必理痛」同「幸福傷風素」，將藥房存貨全部掃光，我心裡在想，真的有這個需要嗎？我自己只買了一排傍身就足夠。香港人真係好奇怪，明明活於一個富裕及資源充足嘅社會，但係就非常怕死。補充一單消息，我有朋友響天后做地產經紀，近日疫情雖然非常嚴重，但係日日仲有人出動睇樓同掃平貨，交頭竟然比平日更盛，簡直係活於平行世界中，又係嗰一句，香港真是一個奇妙和可愛嘅地方。

🎦https://youtu.be/7INHwpGdgCw

💚【我奮鬥不奮鬥】 常公子 楊熙合著
電子書下載⬇ https://play.google.com/store/books/details?id=CVo3EAAAQBAJ
Kindle版下⬇
https://www.amazon.com/dp/B098XHWTDK

實體書訂購⬇
https://www.382now.com/product?id=325

［常威近代史］第六百五十回 新式銀行業與舊派錢莊業（高清錄音版）

#唔鍾意睇字可以聽

https://fb.watch/bdPHQq0P08/

【常威近代史】（六百五十一回）
哲學家梁漱溟

1933年7月11號，國民黨元老張繼（1882-1947）夫人崔振華控告故宮博物館院長易培基（1880-1937）貪污舞弊，由最高法院檢察處批交江陵地方法院開審。25號，江寧地方法院傳招易培基及相關人士上庭，但易培基並無到庭。10月17號，易培基反控告崔振華與最高法院檢察長鄭烈「朋比勾串」、「蓄意構陷」，要求與崔振華對質。12月30號，最高法院以易培基盜賣故宮古物，屢次傳召及發出告票均隱匿不見，予以通緝。1948年，因為主要當事人已死，此案亦都不了了之。但係情況可以睇到，如果連故宮博物館院長都盜賣古物圖利，咁個世界真係無法無天，其實多年以來，又有幾多故宮嘅古物被人偷咗呢？又有幾多人因此而發達呢？真係冇人知道。但係有一點可以肯定，今日大家見到嘅故宮古物，好有可能已經係碩果僅存嘅小部分，有幾多俾人撻咗？或者有幾多俾人偷換咗？又有幾多係贗品（音雁）？又有邊個知道呢？

7月12號，第十七屆華北運動會喺青海開幕，每期4日，一共破咗八項全國紀錄。同一日，國民黨中正會為擴充首都、戚墅堰兩間發電廠，並且建設淮南發電廠，發行公債600萬元。吉鴻昌率領抗日同盟軍收復多倫。7月14號，全國鄉村建設學會響山東鄒平山東鄉村建設研究院，召開鄉村工作討論會。1930年，哲學家梁漱溟（1893-1988）創辦河南村治學院，江年又同晏陽初（1893-1990）、黃炎培（1878-1965）等人發起成立山東鄉村建設研究院同中國鄉村建設學會，並且發行刊物《鄉村建設》，佢哋主張恢復禮俗、通過教育解決農村愚、貧、弱、私通病，由鄉村建設達致民族復興。鄉村問題，即係農村問題，亦係中國最大嘅問題，中國大部分人口都係農民，居住於農村，農村唔能夠發展起來，國家亦都冇可能強大，更加談唔上什麼民族復興，但係農村問題實在太巨大，城市問題都未搞得掂？幾時輪到農村？到咗今日，農村仍有好多問題有待解決，當然相比起100年前，其實問題已經細咗好多，餵飽幾百萬人好容易，但係要餵飽幾億人就係大問題，餵飽咗先可以行第二步，愚、貧、弱、私問題，係響「食」之後，明就明，唔明都冇辦法。

講講梁漱溟，中國現代思想家、哲學家、教育家，新儒家早期代表人物之一，社會活動家，愛國民主人士，同時佢仲係一位社會改造實踐家，對推動鄉村建設不遺餘力。梁漱溟生於北京，祖籍河南開封，1917年至1924年，應蔡元培之聘，任北京大學印度哲學講習，認識咗北京大學圖書館管理員毛澤東。1921年寫成《東西文化及其哲學》，學術界公認為中國現代思想史重要著作，中國有「哲學」，其實梁漱溟大有功勞。30年代，佢為建設農村而努力。1935年8月20號，髮妻黃靖賢因難產去世，年僅42歲。梁漱溟哀悼亡妻，寫了一首白話詩紀念：「我和她結婚十多年，我不認識她，她也不認識我。現在她死了，死了也好，處在這樣的國家，這樣的社會，她死了，使我可以更多一些時間思索，更多一些時間工作。」

1937年中日全面戰爭爆發，梁奔走各地，商議抗戰的問題和防務。先後任最高國防參議會參議員、國民參政會參政員。是年8月，於國防最高參議會上同周恩來第一次見面。1938年，第一次訪問延安，重見毛澤東。為推動團結抗戰，發起組織統一建國同志會。1941年，該會改名中國民主政團同盟，1944年，中國民主政團同盟改組為中國民主同盟，梁擔任執行委員會委員。1946年，任中國民主同盟秘書長。1946年10月，因提交不同於國民黨與共產黨嘅第三方「折中方案」，辭去同盟秘書長職務，並退出中國民主同盟，專注於講學同著述。1950年至1980年，任中國人民政治協商會議全國委員會委員。此後，任全國政協常委及憲法修改委員會委員、中國孔子研究會顧問、中國文化書院院務委員會主席等職。1953年9月，受到毛澤東當眾點名批判，認為他反對總路線。1955年5月起，由另一位哲學家馮友蘭（1885-1990）帶頭，對其文化、哲學、鄉村建設理論開展全面公開批判，當時被批的，仲有梁思成（1901-1972）（被與梁漱溟合稱為「二梁」），以及胡風（1902-1985）同胡適（1891-1962）（被稱為「二胡」）。1973年，文化大革命期間，因為堅拒參與「批林批孔」運動而遭批鬥。1988年6月23日，病逝於北京市協和醫院。死後，馮友蘭為其撰輓聯道：「鉤玄決疑，百年盡瘁，以發揚儒學為己任；廷爭面折，一代直聲，為同情農夫而執言。」書下他起落一生與「農村」之不解之緣。

1933年7月16號，宋子文前赴巴黎出席國際技術合作委員會議，同日，蒙藏委員會參謀本部同達賴喇嘛代表商討康藏和平辦法。7月18號，內政部公佈，圖書發行應該送檢審查。7月22號，南昌行營規定教材需以「揭破赤匪的錯誤和罪惡」為標準。7月23號，蔣Sir 同各軍事將領喺廬山商議對紅軍嘅「第五條大圍剿」！

#常威💀 #蔣介石平反系列  #中日戰爭 #民國歷史 #佛經抄寫員

https://www.youtube.com/playlist?list=PL0RVUAILQUOvTo8JJrayjrvd_Nbjc-0Me

❤請加入常公子的近代史世界！

#常威 #廣東話 #中國近代史 #HongKong #Chinese #History

【常公子歷史頻道453回：替大軍閥平反系列之 阿烟哥的最後反撲】

♊ 今星期最痛心嘅事，莫過於響電視上睇見好多老人家去到急症室，等上病房嘅時候，需要響露天吹冷風，老實講，我自己無辦法接受，現在天氣非常凍，去得急症室嘅老人家，你將佢置於室外冷空氣之中，其實等同謀殺。幸好有關方面已經從善如流，及時將大部分老人家移至室內安置，等候入院。希望以後唔會有呢啲咁離譜嘅事發生就好。

♉ 但係由上述事件可以睇得到，香港嘅醫療系統已經因為有大量人感染omicron而瀕臨崩潰邊緣，好需要協助同支援，我再一次呼籲大家，千萬唔好一窩蜂湧去急症室，現在最需要得到治療嘅係老人家同小朋友，凡事要佢哋行先！希望大家同心協力，合作剋服難關。國家主席習近平，已經宣佈要率先壓下疫情，就連頭等大事特首換屆選舉都需要延期，可知茲事體大。

🔯 現在亦唔係時候討論關於是否應該「與病毒共存」的問題，「與病毒共存」又好，「動態清零」又好，救死扶危先係最重要，現在應該首先處理老人家及小孩子嘅問題，凡事要有次序之分，我自己會首先做好自己，除咗工作以外，減少外出，大家同心協力，一定可以渡過難關，大家共勉之！


🎦https://youtu.be/nThUUQmTVTE

［常威近代史］第六百五十一回 哲學家梁漱溟（高清錄音版）

#唔鍾意睇字可以聽

https://fb.watch/bhx8I5sb0G/

【常威近代史】（六百五十二回）
閻石山造產救國

1933年7月24號，留學德國嘅飛行家孫桐岡由德國飛抵中國，航程20000餘里。7月25號，法國政府正式宣佈，南中國海嘅9個島礁已劃入法國版圖.！1933年4月，法國派遣多艘軍艦先後進入南沙群島海域，並於七7號、10號、11號陸續佔領其中嘅南威島、太平島等9個島礁。好明顯，就係搶！亦都唔好問點解？我有軍艦插枝旗仔，你都可以派軍艦嚟打鑊甘，如果你有軍艦嘅話？7月26號，中國外交部發言人喺談話中表示，南沙群島包括被法國佔領嘅9個小島一直以嚟都係屬於中國領土，並為國際間所承認，法國方面竟然正式宣佈佔領，不知理據何在？亦未見法國政府公開任何理由。外交部又表示，除咗電示著法領事館及駐菲律賓領事館探詢情況之外，亦將會同海軍部相量對應辦法，並對法方此舉提出嚴重抗議。8月4號，外交部照會法國駐華公使，聲明中國政府響查明事實以前，保留對法國政府響7月25號宣告提出異議之權，並要求法國將9個小島名稱及經緯度查明見復。好多時候，國際糾紛好難用外交手段順利解決，最後必須訴諸暴力，如果真係有得傾，世界上唔需要有軍隊。上述事件如是，今日烏克蘭局面亦如是。

7月26號，上海舉行草地網球賽，中華網球會首獲冠軍。仍然係平行世界，上海依舊一片繁榮，而中國大部分地方則處於水深火熱狀態之中。同日，國民黨中政委批准財政部續徵關稅5%附加稅。同日，内蒙古烏蘭察布盟、錫林郭勒盟、伊克昭盟正副盟長及部分王宮貴族喺百靈廟召開第一次自治會議，通過咗《内蒙自治政府組織法》，規定「自治政府總攬内蒙古各盟部族之治權」，「除國際軍事及外交事項由中央處理外，内蒙一切行政俱依本自治政府法律命令行之」。好明顯，就係搞獨立。既然南京政府隻手伸唔到咁遠，理所當然地就有呢啲事發生。

7月26號，黃河喺永濟縣決口，永濟、平民兩縣被淹沒。今個月，南昌行營加緊封鎖江西蘇區，規定糧食、食鹽、燃料、煤油、藥材等均設專局公賣，市民要憑「良民證」方可購買，如有「濟匪」者（即係供應共產黨物資），一律處死。戰爭期間，一律特事特辦，如果你唔明國共之間點解仇恨咁大？因為中間大概牽涉好多無辜人命。另外，《塘沽協定》簽訂之後，日貨在華傾銷激增。戰爭即是經濟，經濟即時戰爭。7月31號，航空公路建設獎券喺上海開獎，中頭獎獎券號碼為226622，原來係常公子嘅幸運數字「2」同「6」，中獎嘅人為一俄籍婦人，佢獲得咗50萬元獎金，應該係天文數字，當時可以響中國買一條村。

時間線進入1933年嘅8月，今個月，西北實業公司喺太原成立，大軍閥閻錫山（1883-1960）親自擔任總經理，中原大戰之後，閻石山慘敗給蔣Sir，雖然被解除武裝，但係閻石山仍然係山西王，佢嘅影響力響山西一啲都無退減到。重返山西坐陣後，閻石山努力「自強不息」，唔搞軍隊可以搞經濟，佢親手制定《山西省政十年建設計畫案》，致力開發各種實業，名為「造產救國」，當然一邊救國，一邊亦救自己。今次成立嘅西北實業公司機構龐大，總投資額為2000萬元，經營範圍囊括採煤、冶鐵、煉鋼、電力、機器製造、軍工、紡織、印刷各種範疇，下屬工廠及礦場分佈全省各地，係華北唯一工礦業壟斷集團！西北實業公司日常業務由協理梁航標處理，人事管理上「採取組長負責、廠長全權、盈利受獎、虧損自動辭職的制度」，去到抗戰前夕的1937年，西北實業公司各廠已經擁有各類機器4900多部，煉鋼規模僅次於鞍山、漢陽煉鋼廠，每月生產填6000噸，鋼同鋼材各3600噸，太原兵工廠同瀋陽兵工廠規模相當，紡織工業也緊隨上海、天津之後，排名全國第三位！由上述事實可以睇到，閻石山的確多才多藝，唔單止淨係識打仗，仲識搞實業，難怪成為不倒翁，屹立多年。

反觀中原大戰嘅另一個主角馮玉祥，仍然醉心軍事復僻，相比下來，閻石山高佢幾班！大家亦唔係相同層次！閻石山提出「造產救國」，亦係百分百正確，要軍事實力強大，必先經濟強大，搵錢先係最重要，搵錢先係第一優先。當閻石山響山西大搞實業搵錢嘅時候，蔣Sir仍然以政治掛帥，先安內，後攘外，帶住幾十萬大軍響南昌打紅軍，中國人自己人打自己人，簡直係百分百內耗！難怪當時，有好多人對蔣Sir剿共睇唔過眼，終於就發生後來、改變整個歷史走向嘅「西安事變」。

1933年8月1號，上海市市立動物園正式開放，爲全國最早規模最大嘅動物園之一。8月4號，四川軍閥劉湘（1890-1938）同劉文輝（1895-1976）嘅部隊再次混戰，真係打極都打唔完！8月5號，中共中央發表《為帝國主義瓜分中國與國民黨的五次圍剿告全國民眾書》。同一日，上海市商會等五個團體致函中國航空協會，聲明所捐贈嘅五架飛機不供內戰，即係只可以用嚟打日本仔，唔可以用嚟打共產黨，佢哋仲要求將「不供內戰」四隻大字，塗於機身之外。民意亦都相當清楚，成日叫民眾團結一致抗日，自己卻集中最大火力打江西紅軍，點樣說得過去呢？

#常威💀 #蔣介石平反系列  #中日戰爭 #民國歷史 #佛經抄寫員

❤【常威近代史】第一部《大清亡國關慈禧蛋牛治》，全面開放，免費下載， #freedownload！

Free下載連結🔽

https://play.google.com/store/books/details?id=C3hjDwAAQBAJ

［常威近代史］第六百五十二回 閻錫山造產救國（高清錄音版）


https://fb.watch/bkpz67lbGt/

【常威近代史】（六百五十三回）
唯美詩人邵洵美的一生

1933年8月6號，外交部公佈《 國際聯盟不承認偽滿洲國辦法》通告，宣傳部規定由國民黨中央黨部發表國際國內政治報告及宣傳大綱作為各報發刊標準，邁向全面戰爭狀態，官方喉舌需要統一。8月7號，松花江江水暴漲，哈爾濱全市被淹面積877萬平方米。8月10號，由邵洵美（1906-1968）主編嘅刊物《十日談》 喺上海創刊。

拉開一筆，講講邵洵美依個唯美派詩人，原名邵雲龍，祖籍浙江餘姚，出生於上海。民國時期著名詩人、出版家、翻譯家。「新月派」代表人物之一，獅吼社、中國筆會的成員。與作家劉吶鷗（1905-1940）、穆時英（1912-1940）同為「都市現代派」代表作家。邵洵美身世顯赫，祖父邵友濂（1840-1901）係晚清一品大員，外祖父係鼎鼎大名嘅盛宣懷，生母盛樨蕙係盛宣懷四女，過繼父親邵頤元配夫人李氏，則係晚清重臣李鴻章嗣女，身世真係唔可以講笑。邵洵美早年就讀家塾，中學就讀於用英文授課嘅聖約翰中學。當時嘅佢已經係小報跟蹤的對象，16歲時，他被交際花白蓮陷害捲入一場謀殺案，被捕入獄三個月，此後，佢轉入盛家創辦的南洋路礦學校，1923年初畢業。1925年，邵洵美赴英國留學，進入劍橋大學伊曼紐爾學院讀經濟，改修英國文學，響認識咗再別康橋徐志摩（1897-1931）。1926年邵洵美回國，1925年去歐洲留學，1926年回國，睇情況應該讀唔成個學位，純粹旅遊打個白鴿轉，有錢仔真係大曬，1926年主編《獅吼》雜誌，1927年1月，邵洵美第一部詩集《天堂與五月》由光華書局出版。睇吓佢嘅詩風，走浪漫華麗唯美路線。例如依首《莎茀》：

你這從花床中醒來的香氣，
也像那處女的明月般裸體——
我又見你包著火血的肌膚，
你卻像玫瑰般開在我心裡。

同年4月，好友劉紀文（1890-1957）出任首都南京特別市嘅首任市長，邀請邵洵美任南京市政府秘書，真係你嘅朋友是什麼就決定了你是什麼，或者叫識人好過識字，但佢僅僅撈咗3個月就棄官，返番去上海繼續追求浪漫夢想。1928年邵洵美自創金屋書店，開始獨立出版書刊，《十日談》就係其代表作。邵洵美從事出版，專注理想，不以營利為目的。自此開始，散盡萬金，傾注全部心血和財力，投身出版事業22年之久（1928年到1950年），先後創辦十餘種刊物。邵洵美為人慷慨豪爽，樂善好施，常年詩酒朋儕，與徐志摩、郁達夫（1896-1945）、林語堂（1895-1976）、沈從文（1902-1988）、施蟄存（1905-2003）等人過從甚密，家中常高朋滿座，晚晚開P，加上家族嗜好賭博、鴉片，經濟狀況日漸緊張，真正嘅詩人文學家生活，窮鬼唔恨得咁多。

【常公子歷史頻道454回：替大軍閥平反系列之 一個溫賊如毛嘅世界】

♊ 香港疫情大爆發，睇嚟好快日日五位數字或以上，全民檢查開始，誓要搵出所有隱形傳播者，不過大家要有心理準備，照目前嘅數學模型推斷，全民檢測可能會搵到幾十萬個無病徵嘅帶菌者，加埋每個帶菌者身邊嘅一至兩個密切接觸者，人數可能達到七位數字，甚至接近200萬，本地隔籬設施亦都一定唔足夠，更有傳言話會大規模送確診者上深圳隔離，不過你肯，人地都未必制，唔好咁天真喇。

♏ 參考其他地區嘅例子，Omicron都係一爆不可收拾，直至去到整個社會有六、七成人感染，數字就會慢慢回落，香港並唔係特別嘅地方，相信情況都係差不多。即係話，未來兩至三個月，如果我哋唔選擇與病毒共存，唔想再有無辜嘅人犧牲性命，整個社會都要喺嚴格嘅防疫措施中渡過，剛剛財政司長陳茂波發表嘅財政預算案，亦已經配合抗疫劇本發展。

♐即係話，未來兩至三個月，都係大部份時間要喺屋企渡過，除工作之外，就要拿拿臨返屋企，要自己剪頭髮，女士要自己做facial做手甲，細路仔繼續冇得返學，仲要提早放暑假，晚市冇堂食，去到邊都要戴口罩，一張枱只可以坐兩個人，冇水遊，冇戲睇，冇乜工開，乜都冇，等消費券等政府救濟。老實講，其實都幾似戰爭狀態，當然抗疫都係一場戰爭，我哋目前亦都係身處戰爭狀態之中，大家應該習慣吓嚕。

🎦https://youtu.be/Sk4xmoCmuDs

［常威近代史］第六百五十三回 唯美詩人邵洵美的一生（高清錄音版）

#唔鍾意睇字可以聽

https://fb.watch/bnahj4qdhr/

【常威近代史】（六百五十四回）
黃河大水災

1933年8月14號，胡適等代表中國參加喺加拿大召開嘅太平洋國際學會。8月16號，黃河水情告急，黃河由魯西決口，改入故道，流入豐縣境內的大沙河，同日，上海各界清查救國捐款委員會要求政府迅速清查侵吞救國捐款案。戰爭期間，當然大把人發國難財，無需要太奇怪。8月21號，世界紅十字會中華總會通電各省市縣分會，呼籲賑濟黃河水災；方振武（1885-1941）、吉鴻昌（1885-1934）部隊集結張北一帶，繼續支持抗日； 日本向法國政府抗議，無理針吞南沙九個小島事件。

8月22號，國民政府行政院會議決定，至9月開始，公文一律採用標點符號。10月2號，國民政府公佈《公文標點舉例及行文款式》，列舉七種標點符號嘅使用方法，就係「逗號」、「句號」、「開引號關引號」、「冒號」、「書名號」同「問號」。以為暫行文式，並希望不久能夠逐漸採用教育機關公文格式辦法上規定的各種標點符號，作為統一規範標準。

8月23號，國民黨中正會通過豫、鄂、皖、贛四省剿共軍費，大約1500萬元。南昌「剿匪」 總司令部發佈《整理保甲方案》。8月25號，北平時間下晝3點50分，四川茂縣、松潘、理番等地發生強烈地震，餘震持續5日之久，波及四川全省，遠至陝西嘅西安，雲南等地方都感到震動。地震中心位於茂縣疊溪鎮以及附近20幾處村莊縱橫30里，南北十餘里全部沉陷，死傷近8000人。崩塌嘅山岩令「岷江壅塞、水勢倒流」，形成咗幾千個大小湖泊，松潘房屋倒塌近三成，傷亡6000人。次月，疊溪壅塞之水潰騰而下，洪水聲震10數里外，洪水所到之處，盡成澤國。災區廣達方圓2000餘里，總計淹溺人數喺20000以上，衝毀農田與50000畝！相當得人驚，不禁令人想起2008年嘅四川汶川大地震慘況。

8月28號，實業部喺江西設立一個鎢礦產銷局，將贛南鎢砂廉價售給外國人。鎢砂係一種重要嘅工業原料，又是一種重要嘅戰略物資，世界上以中國儲存量最多。同日，陝、冀、魯、豫、皖、蘇 六省防汛會議喺南京召開，要求國民政府急撥1000萬元處理黃河沿線嘅堵修工程。8月29號，行政院改組察哈爾省政府，委任宋哲元（1885-1940）為主席，同日，中華全國總工會上海執行局書記羅登賢（1905-1933）喺南京被殺，羅登賢早年擔任香港太古船廠鉗工，後組織參加省港工人大罷工。1927年，參加廣州暴動。1925年春，加入中國共產黨。1928年，擔任中共江蘇省委書記。1930年，任中共廣東省委書記。1931年，當選中華蘇維埃共和國中央工農民主政府委員、中共滿洲省委書記。1933年，因被人出賣，響南京雨花台被槍決。

8月30號，新綏長途汽車公司嘅五輛汽車從歸綏出發，開始漫長嘅新疆探路之旅，之前，前往新疆主要以駱駝為交通工具，單程大概需時4個月，來回就8個月。1931年冬天，朱炳召集志同道合者組建新綏長途汽車公司，經過駱駝隊一年嘅沿途考察，逐著手籌備通車事宜，10月10號，第一輛車抵達迪化，此次試行順利完成後，公司將投入20多輛汽車，每星期至少開行三班車前赴新疆。

8月30號，由上月下旬開始，黃河流域雨勢不斷，河水暴漲，上月26號，黃河響山西永濟決口，永濟、平民兩縣被淹沒。今個月7號，黃河喺河北長垣縣決口，河南汜水、武陟決堤多處，9號，河水漲至平漢鐵路橋面，南北交通斷絕。11號，山東東明、河南蘭封、考城等地黃河決口。17號，魯西荷澤地區決口，黃河河水循故道泛流東下。今日行政院開會，決定急撥400萬元賑災。今次黃河水災，受災地區一共有5省52縣，面積11000平方公里，災民超過360萬。

時間線進入1933年9月，9月1號，行政院命令內政、軍政兩部門，保護從事新聞事業人員。9月3號，中共中央根據地成立少共國際師，陳光（1905-1954）任司長，蕭華（1916-1985）任政委。9月5號，蔣Sir 今日午夜起召開牯嶺座談會，7號結束。會議決定改組全國經濟委員會，由汪精衛（1883-1944）、宋子文（1894-1971）、孫科（1891-1973）任常委，實行統制經濟。將海軍、陸軍、訓練總監3部門劃歸軍委會管轄。並且喺會議上確定對應日本嘅方針如下：首先中國嘅底線係唔可以割讓東三省、熱河，唔可以承認偽滿洲國。除此之外，其他全部「次要」嘅嘢，全部都可以傾，全部可以用作與日方嘅週旋。蔣Sir並且決定，要極力避免一切刺激一方感情嘅行動同言論，並賦予華北當局相當自由嘅權限同日本週旋。

9月6號，財政部同上海銀行簽訂1200萬元嘅借款合同，以處理黃河水災嘅嚴重災情。中華民國內憂外患，繼續逼到埋身……

#常威💀 #蔣介石平反系列  #中日戰爭 #民國歷史 #佛經抄寫員

【常公子歷史頻道455回：替大軍閥平反系列之 孫文之死（一）】

♊ 一連三集孫文之死，今次係第一集，下星期會播放第二集同第三集，孫文之死之後，漫長嘅「替大軍閥平反系列」正式結束，我嘅Youtube 進入全新系列「黃金十年系列」，將會響軍閥時代結束後，同大家一齊步入風起雲湧嘅中日全面戰爭時代，大家攜手 繼續漫步中國近代史。

♊香港疫情，每日過萬宗，仍然未到達高峰期，社會上大概已經有二三十萬人感染omicron（可能實際數字更多），檢測亦都嚴重滯後，老實講，香港實際上已經步入「與病毒共存」時代，要避都無得避，我常公子身邊已經有唔少親朋戚友感染咗又好番鳥，但佢哋電話上仲未收到檢測陽性報告。現在，大量隔籬設施正在積極興建中，本地好快亦都會進入全民檢測，將來會點發展？會點收科？其實我都唔知道。

🔯 俄羅斯同烏克蘭發生戰爭，事情發展得好快，普京可以講係殺個措手不及。但係，目前嘅情況，烏克蘭係孤軍作戰，佢嘅西方盟友除咗打咀炮之外，完全冇幫手。睇返事前事後，呢場仗係美國同北約（主要係美國）夾硬用輿論push出嚟，烏克蘭做咗夾心餅，但到戰爭真係實牙實齒發生，美國同北約竟然袖手旁觀？只係口頭遣責同利用經濟制裁手段對付俄羅斯？感覺都幾荒謬。希望美國同北約真係有後著，如果冇，烏克蘭都好X慘，因為總統澤連斯基之前已經講過，佢根本唔想同俄國打仗……（當然現在殺到埋身，亦冇得唔打）

🎦https://youtu.be/RWBsZqZ6QGM

［常威近代史］第六百五十四回 黃河大水災（高清錄音版）

#唔鍾意睇字可以聽

https://fb.watch/bqI8QLxGRT/

【常威近代史】（六百五十五回）
鼠疫殺咗好多人

1933年9月9號，黃河大水災期間，上海虹橋機場舉行各界捐獻飛機名命儀式，參觀嘅民眾多達100,000人。五架飛機分別由其資金來源而命名，「滬商」號就係上海市商會動員商界仝人捐獻；「滬工」號就係上海總工會發動工人捐獻；「滬校」號就係上海市教育界捐獻；「滬童軍」號由中國童子軍上海理事會動員童子軍募捐而得；「寧波」號為寧波旅滬同鄉會所募集捐獻。大會主席及各界代表致詞之後，授機典禮開始，五個團體推定嘅代表分別立於各飛機前，響軍樂聲中揭去覆蓋於機身上嘅旗幟，並將授機證書贈與國民政府代表徐培根。隨後，五位女性代表分別登上各飛機行擲瓶禮。行禮所採用嘅係中國30年陳年紹興酒。最後五架飛機分別由航空學校教官駕駛昇空，作飛行表演。成場大龍鳳，大家都開開心心，都係為咗團結民心，一齊抗日，對於增強國民政府空軍力量，可以講係完全沒有幫助。另一方面睇到，就係中華民國冇錢，空軍同海軍力量根本同日本冇得比。俗語有話，大蝦細俾屎餵，但係真實世界，就係行森林定律，邊個打贏邊個話事，邊個有水邊個揸莊，完全冇例外嘅。你覺得有例外，你覺得「愛」比「錢」重要，都祇不過係發緊夢。當然做人有一半時間喺度發夢，完全唔需要奇怪，但係做人清醒一啲，我諗會好小小都未定。

中國同日本嘅軍事力量，大家都係響1885年左右一齊起步。當中最大嘅分別，在於清帝國1895年打輸一場甲午戰爭，然後1911年發生咗一場大革命政權更替，然後進入大混亂軍閥割據時代。而日本方面一直政權穩定大一統狀態，民心keep住團結，經濟keep住發展，去到半個世紀之後嘅30年代，中日之間早已經變成龜兔賽跑，中國完全冇得追，仲俾日本仔踩到上頭殼頂。所以大一統好重要，所以穩定要壓倒一切，就係咁解，唔明都冇辦法，只係最簡單嘅森林法則，唔係奧數，完全唔深奧。

9月10號，瀋陽故宮博物館失火，有冇內幕冇人知道。9月13號，北平軍分會通過裁軍減餉方案，每月減餉54萬元，共裁軍57,000餘人，鬼子打到埋身仲裁軍，即係錢唔夠，又係錢嘅問題。9月15號，羅文幹（1888-1941） 調解盛世才（1897-1970）、馬仲英（1910-1936）之爭失敗，新疆戰事重開，之前已經提過，最後盛世才打敗馬仲英，收編佢嘅軍隊一統新疆，而狂戰士馬仲英則去咗蘇聯學揸飛機，好有可能係盛世才壓力之下，被史太林所殺。9月15號，共產黨人沈志遠（1902-1965）編寫嘅《新哲學詞典》出版，依一本係中國人編寫嘅第一本馬克思主義哲學詞典，冇錯，讀馬克思主義，必須要有一本馬克思主義哲學詞典，因為馬克思理主義裡面有好多專用名詞，如果唔知，好容易讀到一頭霧水。

9月18號，東北人民革命軍第一獨立師成立，楊靖宇（1905-1940）任師長兼政委；同一日，殘障軍人工廠係北平成立，用作安置事時傷殘嘅軍人。外出打仗，冇事返嚟就最好，死咗都光榮，最慘嘅就係打到殘廢，冇咗隻手，冇咗隻腳，況且，打完齋通常唔要和尚，退役軍人要重新融入社會，從來都係大問題，當然好多政府都會用「睇唔到」 嘅對應手法，因此戰爭唔係講玩，戰爭後嘅問題有時候比戰爭本身仲難處理。9月18號，偽滿洲國吉林農安、遼寧開通、通遼一帶鼠疫流行，到本日為止，農安已經蔓延23條村，死亡200幾人，通遼死亡90幾人。8月19號，日滿聯合成立防疫委員會，指定農安、開通、通遼為疫區，斷絕三縣同長春嘅一齊交通往來，22號，哈爾濱時亦決定檢查行商旅人，限制交通，防止疫情進入大城市。去到25號，鼠疫繼續蔓延，傳播速度非常快。

鼠疫係由鼠疫桿菌所致嘅烈性傳染病。所有鼠疫皆可引起敗血性鼠疫，經由血液感染身體各部位，包括腦膜。次發性感染可造成肺炎、橫膈炎或引起胸膜滲液。次發性肺鼠疫響疫情控制上特別重要，因為鼠疫可透過人類飛沫傳染，非常容易造成局部地區爆發或毀滅性大流行。以前死亡率可達50－60%，但現代醫療已可顯著降低致死率至約10%，仍然遠高於SARS及流感，一般相信歷史上鼠疫有四次鼠疫大流行，首次發生於東漢末，死亡人數約為漢朝人口三分之二，第二次大流行發生於6世紀，起源於埃及西奈半島波及到歐洲所有國家，死亡近2500萬人；第三次發生於14世紀，起源於美索不達米亞，僅歐洲就死咗2500萬人，即歷史上著名嘅黑死病；第四次發生於19世紀末至20世紀初，死亡人數1200萬人，其恐怖嘅程度僅次於20世紀初期死過億人嘅西班牙流感大遊行，同埋今時今日仲未完結嘅新型冠狀病毒疫情。

9月21號，天津北洋工學院一年級96名學生因為同校方發生衝突被全體開除被強行驅逐出校。之前，學生曾經要求免繳學費，但係未獲答允，之後學生要求更換陳舊嘅微積分課本，校方又冇理會。18號早上，學生代表去見校長，遭到總務長喝斥，於是學生譁然，要求總務長道歉，下晝3點，雙方經調解後喺禮堂見面，總務長否認曾經鬧學生，並且發誓「我若罵人，我是王八蛋」，學生於是一齊高呼「王八蛋」，最後全部被踢出校，真正體現五四精神。

#常威💀 #蔣介石平反系列  #中日戰爭 #民國歷史 #佛經抄寫員

❤【常威近代史】第一部《大清亡國關慈禧蛋牛治》，全面開放，免費下載， #freedownload！

Free下載連結🔽

https://play.google.com/store/books/details?id=C3hjDwAAQBAJ

［常威近代史］第六百五十五回 鼠疫殺咗好多人（高清錄音版）

#唔鍾意睇字可以聽

https://www.facebook.com/129055447762576/posts/900613367273443/

【常威近代史】（六百五十六回）
鷸蚌相爭漁人得利八字真言

1933年9月22號，一生不羈放縱愛自由嘅粵軍軍閥陳炯明（1878-1933）病逝於香港，享年54歲。據說死嘅時候，家徒四璧，兩袖清風，連殮葬費都有問題。成王敗寇，有人流芳百世，亦有人遺臭萬年，歷史就係這樣一回事，世界上冇陳炯明，亦都冇孫中山，亦都因為有孫中山，先有陳炯明嘅悲劇。陳炯明嘅故事，喺我嘅近代史系列，亦有好多描述，我唔再重複。RIP。

同一日，上海市運動會參賽這破八項全國紀錄，中國嘅中心，轉移到南方上海南京一帶，向全中國提供血液嘅，始終都係心臟上海。香港能夠發展成為亞洲金融中心，亦係因為上海，因為喺大時代變革之時一場龐大的資金轉移，先打造咗香港。同一日，19路軍派出吳明前赴中共中央根據地同袁國平（1906-1941）談判。

9月24號，中國電影製片廠喺江西南昌成立。9月25號，國際聯盟14屆大會喺日內瓦開幕，中國代表希望國聯正確處理中日爭端，一切都似曾相識，當日嘅中國同日本，就好似今日嘅烏克蘭同俄羅斯，國家名字雖然有所不同，但其實處境非常相似。歷史的確喺度不斷重複又重複，當然我講過，如果你希望透過閱讀歷史嚟預知未來，其實都係冇用。

20世紀30年代，爆發全球性戰爭—— 即二次世界大戰——前夕，其實同今日都非常相似，當中最唔同嘅，就係今時今日有咗「核武」同「全球化」兩個全新因素，前者因為殺傷力太大，玉石俱焚，未到最後關頭我諗冇人會敢用；後者令全球不同國家同利益集團互相更加緊密依靠，所謂牽一髮動全身，要考慮項目更加複雜。亦因為有「核武」同「全球化」兩個因素，令到二次世界大戰之後，整個地球維持咗七八十年嘅和平狀態，應該講係「比較和平嘅狀態」先啱（其實殺戮從來未停止過），不過最近世界嘅變化，好明顯睇到「平衡」快將不存在，要繼續維持平衡同和平狀態，我諗需要有全新嘅方法同技巧，但係我未睇見方法出現，整個世界所有領袖，現在差不多都係用五十年前嘅思維去思考世界，即係所謂左右意識形態冷戰思維，二元區分法、非黑即白，忠臉奸臉，敵我分明，而「聯合國」同二戰之前嘅「國際聯盟」都係一樣，係完全冇用嘅。方法嘅嘢，過去有用唔代表今日有用……不過有啲道理就幾千年都咁有用，就係「鷸蚌相爭，漁人得利 」八個字，人哋打生打死，袖手旁觀嗰個最後一定有著數，非常簡單嘅道理，小學生都明白，但小學生可能唔明白，「鷸蚌相爭」發生之前，其實漁人都有插手，否則如果「鷸蚌不相爭」，漁人怎能得利？所有事情的發生，總是發生在事情發生之前，引爆火藥庫，條藥引可能係十年前已經開始點，明我講緊乜嘢，你已經進入八奇嘅思考層次了。

同一個道理亦都恒久不變，就係「戰爭」一定要同「經濟」掛勾，打死我都唔信，如果冇呢兩三年嘅新型冠狀病毒疫情，會發生俄烏戰爭！人與人之間保持社交距離，國與國之間亦都拉開雙方距離，本來已經係夾硬做朋友，減少見面關係一定更加疏離。