大清亡國關慈禧蛋牛治 3

下？如果生日錢拿去做軍費，20枝北洋海軍

【常威近代史】（六百七十四回）
財來自有方 點會俾人知

1934年7月1號，偽滿洲國禁止東北舊紙幣流通，所有人要用偽滿洲國印嘅新銀紙，至於舊紙幣能否兌換新銀紙？如果可以兌換，匯率又係幾多折？歷史上冇記載！所以都係揸黃金同美金穩陣，當時應該唔係揸美金住，而係揸英鎊。我個人非常相信，貨幣未統一，信用不存在，難怪當時整個中國經濟一沉不振！有時候追求國家統一，真正目標係追求貨幣統一啫，政治經濟本來係同一事物。今日，《 1934年全國銀行年鑒》出版。而中斷已久嘅平沈線今日恢復通車，即係由北平市直通向偽滿洲國沈陽市，不過早晨開嘅第一班列車行至塘沽東站時就發生爆炸，整列車被迫停駛！大家都明白嘅。搭車會有機會被炸死，真係搵鬼搭？

7月2號，上海虹口租界日軍同巡捕房發生衝突，日軍要求擴大警權，中日衝突，無日無之，逐步升級。7月5號，蔣Sir改組軍政部航空署為中央航空委員會，佢自己做埋委員長，話曬事！7月6號，國民政府查禁麻醉毒品，取替土膏行店，土膏即係鴉片膏，鴉片局有兩種身份兩種用途，第一種係麻醉藥物用途，第二種係毒品用途，掛羊頭賣狗肉比目皆是，一啲都唔需要覺得奇怪，100年後嘅今日香港，坊間仲有好多藥房用依招生存緊。

7月7號，山東鄒縣天氣奇熱，氣溫升至華氏113度，即係攝氏45度，10日內熱死500-600人，睇嚟極端天氣問題，喺100年前已經出現。同日，中共工農紅軍抗日先遣隊6000幾人喺江西瑞金出發，北上抗日。依一支先遣隊係以紅7軍團組成，尋淮州（1912-1934）任軍團長，駱少華任政委。北上抗日先遣隊經閩西、閩東、閩北，浙西同皖贛邊界，10月下旬進入閩浙贛蘇區同紅10軍會合，11月初，紅7軍團同紅10軍團合編為紅10軍團，全軍人數達到10000人，由方志敏（1899-1935）領導，繼續擔負抗日先遣隊嘅任務，12月，紅10軍團主力響向閩浙贛蘇區轉移時被敵人合圍而失敗，餘部500幾人喺粟裕（1907-1984）領導下轉入浙南一帶。尋淮州響1934年冬天，隨方志敏率抗日先遣隊轉戰皖南譚家橋之役負傷，至茂林鎮傷重不治。

7月8號，重慶市市長石體元（1890-1968）任意逮捕記者，重慶各報刊停刊達4日。同日，全國礦冶地質展覽會喺天津開幕；7月9號，立法院發表《憲法初稿審查修正案》。7月11號，唐山市人力車工人千幾人，反對市公安局徵收新年牌捐，全體罷工並且舉行遊行示威。7月11號，因為監察院彈劾鐵道部長顧孟餘（1888-1972）舞弊案引發爭執，中正會決議修改彈劾辦法。上個月29號，監察委員劉侯武（1892-1975）等向監察院彈劾鐵道部長顧孟餘喺大潼路購料訂約中違法舞弊，同時公開相關文件，顧孟如對此逐條辯駁，並對提案之監察委員破口大駡。今個月6號，監察院長于右任（1879-1964）表示與監察權不能伸張，就決定辭職。不料，7月10號，劉侯武竟然收到內藏子彈嘅恐嚇信，威脅佢收回彈劾案。呢件事發生之後，中政會規定彈劾案由中政會把關，監察院不得隨意披露案情，監察院嘅權力亦都受到一定限制。貪污舞弊永遠係每一個社會中嘅大問題，亦都係一個無辦法解決嘅問題，分別係你睇得到，抑或睇唔到，分別係畀你知道，話唔畀你知道，人性如此，你唔係相信人性本善吓嘛？錢從哪裡來？財來自有方？活到咁上下年紀，應該要明白箇中道理。

7月12號，中央古物保筦委員會成立。7月13號，中國紡織業巨頭—— 上海申新紡織公司——資金枯竭，各間銀行不予續貸，業務陷入擱淺局面。申新紡織公司係中國近代棉紡織工業中規模最大嘅民族資本企業。1915年榮宗敬（1873-1937）、榮德生（1875-1952）兄弟創辦於上海。1921年組成茂新、福新、申新總公司，構成榮家資本集團。到1931年全盛時期，在國內共有9間紡織廠，總計紗錠46萬枚，布機4757台，職工逾3萬人。1932年，實際自有資本共達1800萬元，資產總值6400餘萬元。冇錯，就係顯赫有名嘅榮氏家族，當時，榮氏企業一直以借貸嚟從事擴大再生產，到1934年7月，債務已經高達6300萬元 ，但與此同時，因為世界經濟不景氣同中國嘅嚴峻局面，棉紗銷路大減，價格暴跌至民國元年1911年以下嘅水平，加上物價狂跌，市況蕭條，企業周轉困難，上年9月底開始，已經無人肯再借錢，之後情況有變，先允許再周轉多3個月貨仔，捱到今年3月，中國、上海銀行不肯再借款，16間相關往來錢莊亦堅決停止借貸，之後經過銀行家宋漢章（1872-1968）出面，中國、上海兩間銀行及13間錢莊勉強同意再借款500萬元比申新周轉，不了到咗本月初，此項派款忽然停付，申新紡織企業陷入財務困境。

7月14號，濟南酷熱天氣亦達到攝氏43.3度，好多人中暑死，同一日，新文學運動倡導者之一詩人劉半農（1891-1934）病逝，佢除咗係個詩人文學家同語言學者，佢亦係中國早期攝影理論家，著作《半農談影》，是為中國第一部攝影美學專著。

#常威 #蔣介石平反系列  #中日戰爭 #民國歷史 #佛經抄寫員

［常威近代史］第六百七十四回 財來自有方 點會畀人知（高清錄音版）

#唔鍾意睇字可以聽

https://fb.watch/ct_qUShGVV/

【常威近代史】（六百七十五回）
宇宙正像一口殘酷的井

1934年7月中旬，熱浪撲擊中原，南京等江南地區受酷熱天氣影響，6月份，江浙地區平均氣溫高達攝氏40度以上，為60年來同月份最高紀錄，7月13號中午12時至1時，南京北極閣記錄氣溫為43度。長江下游7、8月份降雨量極少，亦都破咗歷年紀錄，湖北省民政廳為此通令全省禁屠7日求雨。天災夾雜人禍，內戰不斷，加上日本人嘅侵略意圖，中華民國國運岌岌可危。縱觀當時全世界，天災人禍亦響每一笪地方不斷發生，人民生活唔好，思想就會走向極端，亂咁諗嘢，墨索里尼嘅法西斯主義、希特拉納其精粹嘅嘅納粹主義及反猶主義響歐洲大陸高速蔓延，整個世界快將天翻地覆，當然係1934年，我相信大部分地球居民都唔會相信，一場人類歷史上最大型嘅世界大戰，即將在幾年後發生，導致一場可怕嘅生靈塗炭。

正當熱浪撲擊中原，蔣Sir親自指揮對共產黨紅軍嘅「第五次大圍剿」亦進入白熱化。無可否認，蔣Sir 嘅最終目的，係要徹底地並且永遠打敗共產黨！雞犬不留！其實去到1934年，蔣Sir 已經同共產黨打咗接近6年嘅仗，作為一個軍事領袖，蔣Sir嘅一連串剿共行動，一直遭受挫折，但係蔣Sir消滅共產黨嘅決心不斷增強，呢一點可以用數量嚟衡量。1930年12月至1931年1月嘅第一次圍剿之中，佢動用咗100,000部隊； 1931年5月至6月嘅第二次圍剿，動用兵力double，去到200,000左右； 1931年7月到10月嘅第三次圍剿，再加多100,000，去到300,000兵力； 去到第四次圍剿從1933年4月到10月期間，總動員已經接近500,000兵力； 而由1933年10月開始嘅第五次圍剿，幾乎係第四次圍剿完結後就即刻開始，蔣Sir 動用兵力去到900,000人，而且蔣Sir更離開首都南京，長期留守南昌行營，親自響前線指揮。後世人有句說話話佢一直「剿匪不力」，但係講句公道說話，蔣Sir已用上全力，以接近百萬兵力全力攻打紅軍，亦押上整個中華民國南京政權嘅經濟命脈去打，何來不力呢？單以兵力數量計算，其實蔣Sir發動嘅剿共戰爭，已經完全超越之前每一次不同勢力內戰嘅規模。

如果近代史上嘅「軍閥時代」 係指內戰不絕、民不聊生。咁歷史上由1911年開始、至1927年計起結束嘅「軍閥時代」，相比起1927年之後嘅殘酷世界，可能算係一個和平時代。依一點，可以單單從戰爭死亡人數中全面反映，冇必要有所懷疑。

如火如荼發生中嘅第五次大圍剿之後再分析，1934年7月15號，根據中央社報導，偽滿州國設立「大陸研究所」，研究物理、化學、地質、農林、水利，經費達到400萬元。7月16號，根據《四川月報》報導，四川新繁縣預繳田賦高達80年，田賦應該係指農民地主向政府每年繳付嘅土地稅，小事見全局，香港都有預繳稅，預繳未來一年部分稅款，但係預繳一年，好多人都唔接受，預繳80年，你可以想像當時係一個乜嘢嘅世界？冇壓逼？冇剝削，冇水深火熱，揾鬼信？我再講多次都唔怕厭，投身革命反抗好多時候並唔係為咗理想同意識形態，文人大學生講救世，只係紙上談兵，講就天下無敵，真正革命發生，係有人走投無路，係有人被迫用條爛命孤注一擲，唔係生就係死嘅最後選擇。

7月19號，汪精衛發表談話壓制監察院彈劾鐵道部長顧孟餘（1888-1972）案，聲稱訓政時期一切權力集中於黨中央，無一機關能夠獨立於黨外，當然亦包括五院中監察院在內。講清講楚，一錘定音，中央話事，中央有最後終審權，大家再唔好再爭拗。7月21號，豫、鄂、皖、贛、閩5省奉令實施合署辦公，即五省行政歸一，可能係配合蔣Sir 嘅第五次大圍剿戰爭最後階段。7月22號，財政部要求全國各縣於明年元旦起設置「國民銀行」，即係要你賭馬會，唔好賭外圍。7月23號，天津法國、日本租界當局先至填平西開窪地水池，拓展地面面積。7月24號，國民政府代表殷同與日本代表岡村響大連談判通郵。7月26號，監察院全體監察委員請之前辭職嘅院長于右任（1879-1964）返回南京，力爭監察權！講返顧孟餘案嘅結局，最後定論，係「此案多為派系之間的矛盾和人事任命的糾葛」，最後以「不予懲戒」顧孟餘收場。結案之後，顧孟餘仍然活躍於政治舞臺，位居高職。

7月28號《廣九鐵路新約》 響香港簽字； 7月29號，行政院禁止設壇求雨；同日，蔣Sir制定《改善保安團隊大綱》；同日，地質調查所發表中國石油儲存量為3874億桶，不過距離石油投產，十劃都未有一撇。今個月，四幕話劇劇本《雷雨》響《文學季刊》發表，劇作家曹禺（1910-1996）一舉成名。曹禺原名萬家寶，出生於天津一個沒落的官僚家庭，《雷雨》呢套話劇，係敘述係一日之內，兩個舞臺背景中，集中表現出兩個家庭同佢哋嘅成員之間前後30年錯綜複雜嘅糾紛瓜葛，主要人物嘅結局最後死嘅死、走嘅走、發癲嘅發癲，呈現出強烈嘅悲劇性。根據作家嘅解釋，依一個係「自然的法則」，「宇宙正像一口殘酷的井，落在裏面，怎樣呼號也難逃脫這黑暗的坑」。

1934年7月於焉結束。

#常威 #蔣介石平反系列  #中日戰爭 #民國歷史 #佛經抄寫員

［常威近代史］第六百七十五回 宇宙正像一口殘酷的井（高清錄音版）

#唔鍾意睇字可以聽

https://fb.watch/cwLIl-JavD/

8月2號，全國經濟委員會會同內政部、財政部合組嘅全國土地委員會喺南京成立。8月4號，周作人（1885-1967）前赴東京，替日本宣傳「中日親善」。周作人係魯迅弟弟，係一個大學者、大翻譯家，要講周作人嘅經歷，可以寫幾集常威近代史，現在只係輕輕帶過，周作人同日本關係密切，抗日戰爭期間，北平被日軍佔領，佢係四個留守北京大學嘅教授之一，之後更加同汪精衛親日政權服務，1949年之後，佢選擇留響中華人民共和國，於文革期間1967年去世，享年82歲。8月4號，長城各口設卡辦事處響北平成立；8月6號，湖南省主席何鍵（1887-1956）通電全省，禁五勞祈雨、次日何鍵親到南岳，祭神求雨。

8月7號，偽滿洲國喺東北設立森林事務所，預備大規模替日本人搶佔東北森林，真係乜都搶一餐。同一日，蕭克（1907-2008）、王震（1908-1993）率領紅6軍團分別由永新、遂川地區突圍西征。今年4月，紅軍喺廣昌戰役中傷亡慘重，但係博古（1907-1946）、第三國際德國人軍事顧問李德（1900-1947）等領導人仍然堅持「用堡壘對堡壘」、「禦敵於國門之外」等戰略，將紅軍最具優勢嘅遊擊運動戰術瓦解，蔣Sir除除收緊包圍網，陳誠（1897-1965）部隊以10個團協同湯恩伯（1899-1954）部隊進佔安遠、寧化、又會同羅卓英（1896-1961）縱隊取得寧都、新豐市、黃坡間亦築建咗堡壘，7月，興國失守。7月23號，中共中央軍委會命令蕭克、王震紅6軍團選擇包圍圈薄弱位置，自行突圍西進，作為先頭部隊突圍蔣軍包圍網，第一步到達湘南桂東地區，第二步到達新田、祁陽、零陵地區；第三步橫渡湘江，並且與賀龍（1896-1969）、關向應（1902-1946）軍聯絡，探索紅軍主力轉移路線。8月12號，紅6軍團到達桂東地區。

8月9號，國民政府派出李石曾（1881-1973）前往瑞士日內瓦出席國際圖書館大會。8月10號，日本政府下令大規模驅逐橫濱華僑，當時有好多中國人住響橫濱市，中日全面戰爭就快發生，驅逐華僑亦都相當正常，乘機減少間諜數量。8月13號，山海關、秦皇島日軍舉行大規模演習，大量農田遭到破壞，軍事演習，可以有好多種玩法，亦可以成就好多唔同嘅目的，總之就唔係單單演習咁簡單。

#常威 #蔣介石平反系列  #中日戰爭 #民國歷史 #佛經抄寫員

❤【常威近代史】第一部《大清亡國關慈禧蛋牛治》，全面開放，免費下載， #freedownload！

Free下載連結🔽

https://play.google.com/store/books/details?id=C3hjDwAAQBAJ

【常公子歷史頻道467回：黃金十年系列之 笑面虎孫傳芳 】

♊ 今集講一個大軍閥笑面虎孫傳芳。響北洋軍閥世界，孫傳芳係後起之秀，屬於直系，同民國關公吳佩孚係一路，曹坤吳佩孚於「第二次直奉戰爭」敗於張作霖之後，可謂大勢已去，長江後浪推前浪，孫傳芳一躍成為直系軍閥中最強勢力，之後佔領大上海，更加將自身實力邁向巔峰，無他嘅，上海呢個大錢罌，邊個攞到，邊個就可以話事，錢畢竟係最重要，再沒有其他東西比錢更重要，你認為有，祇不過是太幼稚太天真。

♐歷史上記載，孫傳芳得到上海後，一心推行一個「大上海」project，一心要將上海打造成一個新世界，同公共租界內嘅「文明世界」接軌，當然孫傳芳並無成功，1927年響蔣Sir發動嘅北伐戰爭中一敗塗地，不但丟去上海，更加失去所有。孫傳芳失敗之後，亦標誌著軍閥時代正式過去，袁世凱脈絡下北洋軍閥主宰中華民國嘅時代，終於結束。一個新時代於焉誕生，後世對依個新時代有一個好美麗嘅描述——叫「黃金十年」，指謂1927年至1937年中日全面戰爭爆發間嘅十年。

♉我唔敢質疑「黃金十年」嘅含金量，畢竟凡事凡物，都要睇下你站在乜嘢角度同乜嘢立場去睇同去演釋。世界每一天都在變化，每一個人衹能夠活在當下，自圓其說又好、重新撰寫又好，大家到頭來衹要求一個「説法」，你說北洋軍閥不好，孫傳芳是一個大壞蛋，就是一個說法，至於這個說法中內裏嘅細節同埋真實性嘅百分比，其實完全沒有關係，當大部份人願意接受一種「説法」，嗰種「説法」就會係真相，連串嘅呢啲真相，就構成咗所謂歷史。

🎦https://youtu.be/PN0yAj6gWLA

［常威近代史］第六百七十六回 紅軍突圍包圍網（高清錄音版）

#唔鍾意睇字可以聽

https://fb.watch/cAzcwhNJnE/

【常威近代史】（六百七十七回）
錢真係咁重要 錢真係好重要

1934年8月13號，財政部禁止外國銀幣進口，外國進口嘅銀幣，即銀元，一直都係中國國內流通貨幣嘅其中一種，相信到1934年為止，已經有超過100年歷史，甚至更多。去到20世紀30年代，中國國內流通嘅貨幣五花八門，種類繁多。可能當時嘅中國人仲未有一個覺悟，國家經濟要強大起來，貨幣制度必須統一，不過冇一個大一統嘅政治環境，又點可以有一個統一嘅貨幣制度呢？到處山頭，各有各搞，你有權印銀紙，難道我沒有權印？咁就大鑊啦。今時今日大家認為常識嘅事，響當時未必有咁多人去理解到，講多次都唔怕熱厭，真正嘅貨幣統一，要去到1949年中華人民共和國建立之後，人民幣要成為一隻真正強大有信用嘅貨幣，喺1949年之後嘅50年後，即係21世紀之後嘅事。

一隻貨幣嘅能量同信用，亦同國家嘅整體國力成正比；國家唔強大，貨幣亦都唔會強大得去邊，當然亦可調轉嚟講，貨幣強大，國力自然相應強大，兩者永遠處於一個相輔相乘嘅狀態。當然你可以問，一個國家為什麼要強大？細細個die die個唔係更好嗎？呢個問題無答案，呢個係人性嘅問題，你問一問你自己，你想唔想威先？想唔想發達先？想唔想強大先？如果想，就係咁簡單。如果唔想，都冇辦法（好有可能係你老竇大把錢囉）。19世紀末期至20世紀初期，全世界最有信用嘅貨幣係英鎊，但係去到20世紀前中葉，就變成美元，呢個現象，亦都反映出英美兩個大國家嘅上昇同下降趨勢軌跡。我成日有一個感覺，經營一個國家，就係經歷一隻貨幣，真正能夠代表個一個國家嘅事物，應該就係嗰個國家嘅貨幣，而並非風土民情、民族或文化。凡事凡物都係錢，俗就係俗啲，不過係真實，你唔在乎錢，只係因為夠。

8月21號，內政部非正式公佈，三個月內水旱二災不住蹂躪整個中國，估計損失高達10億元，受災區佔全國三分二土地，非常得人驚，整個國家有三分二地區受災，又到底又係一個乜嘢嘅概念呢？以當時中國有4億人口計算，係唔係有超過2億4000萬以上人口受災？災情有幾嚴重？救災情況係點？我真係唔知道，何況當時仲未有正式系統化嘅精確統計數據提供（其實全世界到今時今日都冇），情況究竟水深火熱石破天驚到乜嘢地步呢？其實我哋無辦法想像得到。我都講過，現在我所演繹（抄寫）嘅近代史都只不過係城市人嘅近代史，係小部份中國人嘅近代史，至於當其時90%以上中國人居住嘅農村世界，根本係處於一個無記載無紀錄嘅空白世界。

8月23號，教育部通令中小學應舉行新式體育教育，任用已受訓嘅童子軍為教職員。8月24號，湘鄂贛皖各省嘅災民，幾千人去到南京乞食，次日南京市政府電請各省當局予以制止。8月25號，何鍵（1887-1956）以9個團兵力設置重圍，狙擊蕭克（1907-2008）、王震（1908-1993）率領嘅紅軍長征先遣隊渡越湘江。8月26號，蔡廷階（1892-1968）到達紐約，受到華僑熱烈歡。8月27號，今日係孔子誕辰日，國民黨中央黨部秘書長葉楚傖（1887-1946）等在曲阜主持盛大祭典。8月28號，國民政府派出王世杰（1891-1981）、李綿綸（1868-1956）為海牙公斷院公斷員。8月29號，黃河河套永濟、豐濟、長濟三大幹渠潰決。8月30號，日本女間諜川島芳子（1907-1948）喺天津秘密設置特務機關。今個月嘅大事件，仲有杭州飛機場失火，數十架飛機被焚燬。日本同蘇聯就中東鐵路問題互相攻訐。

8月31號，抗日義勇軍頻繁襲擊中東鐵路南線，中東鐵路被迫停開夜車。今個月，吉林二勇軍王德林（1875-1938）、謝文東（1887-1946）、孔憲榮（1881-1948）、趙尚志（1908-942）等人所率領嘅部隊，喺東寧召開遼（寧）、吉（林）、黑（龍江）3省抗日義勇軍代表會議，聯合組成東北抗日聯軍。東北抗日聯軍喺東邊道同黑龍江省分別成立特別司令部，並以謝文東為第一方面軍總指揮，孔明憲任第二方面軍總指揮，王德林任第三方面軍總指揮，趙尚志任第四方面軍總指揮，會議中決議各軍互相聯，絡協同抗日。

今個月，蒙古德王嘅親信韓鳳林（？-1934）喺北平戒除煙癮嘅時候，畀國民政府憲兵捕捉，並且秘密處決。德王，指德穆楚克楝鲁普親王（1902—1966年），内蒙古嘅王公，主張内蒙古獨立。德王初露頭角以來，一直響國府同埋分裂勢力之間摇擺不定，而且一再流露親日傾向，因此國府對其手下嘅分裂派人物必欲除之而後快，搞國家分裂係要死嘅。今年4月23號，德王藉助國府成立咗蒙古地方自治政務委員會，但僅僅領取到2萬元開辦費，真係一個比較恥辱嘅價錢，於是德王屢次向國府領取經費，但係都冇結果，原因同新疆王盛世才要水一樣，一來國民冇錢，二來點解要畀錢掟去冇雷公咁遠資助你搞獨立先？理由相當充分，今個月得王親信韓鳳林被殺，亦加快德王同日本嘅勾搭同眉來眼去。

1934年8月於焉結束。

#常威 #蔣介石平反系列  #中日戰爭 #民國歷史 #佛經抄寫員

［常威近代史］第六百七十七回 錢真係好重要（高清錄音版）

#唔鍾意睇字可以聽

https://fb.watch/cDewzJK5bb/

【常威近代史】（六百七十八回）
上海總工會合法化

1934年9月1號，河北遷安縣福山寺村民，響上個月30號，捕獲土匪多人，當時土匪到處都係，品流複雜。土匪當中有兩名日本浪人，之後，一眾土匪被送往縣府究辦。點知今日，一批日本浪人前赴福山尋釁滋事，當場與居民發生肢體衝突，少不免動刀動槍，村民有1人死，4人重傷。事後日方反而話有6名朝鮮人失蹤，懷疑係被福山寺村民殺死。真係口同鼻拗，惡人先告狀。9月6號，天津日本領事館派人前往福山寺調查依一單「6名朝鮮人被虐殺案」，亦搵唔到任何具體證據證明案件屬實。祇不過，經過多次交涉之後，中方又要跪低，要向每名朝鮮人家屬賠償慰藉費2000元。呢件事嘅真相我哋冇辦法知道，究竟有冇朝鮮人死？究竟邊個啱？邊個唔啱？無從稽考。祇不過，最後又係中國比錢了事，充分表現出國力強弱懸殊嘅問題。好多時候，真相或真理，其實係由權力同話語權去決定。邊個有錢邊個惡，邊個強大就係正確，其實先係真理喎。

9月1號，考古學家容庚（1894-1983）、董作賓（1895-1963）、商承祚（1902-1991），歷史學家徐中舒（1898-1991）等人喺北平成立考古學社。今日，山西省實行統制貿易，即日起限制外省及國外貨品入省，即係搞保護主義，一省保護主義。同一日，東北郵政總局被撤銷。9月4號，蘇聯同偽滿洲國簽訂《水道協議》，教育部通令限制宗教團體設立學校，教育嘅主導權，要全數回歸政權手上，所謂學校究竟是什麼東西？學校就係最重要嘅意識形態國家機器。明就明，唔明都冇辦法。

9月5號，電政會議喺南京召開，決定修理全國電綫。9月8號，胡漢民（1879-1936）、南天王陳濟棠（1890-1954）等21人自廣州致電國民黨中央執行、監察兩委員會，否定「五全大會議案」。胡漢民等人致電指出：「這種議題，無一及於當前救亡之大計，不適於救亡之需要。」佢哋自己提出議案4項，要求列入大會議題，以決議實行。9月25號，胡漢民等29人再致電質問國民黨中央，並提出要求履行本黨許落過嘅人民有言論出版自由嘅政綱，中央委員及海內外各級黨部黨員，對於黨內政治、軍事、外交應有充分的建議、討論及批評之自由。因此，因為胡漢民及陳濟棠攪局，國民黨五屆五中全會延後至12月10號先召開到。

9月11號，第五次大圍剿大局已定，行政院決定撤銷豫、鄂、皖3省邊區嘅「剿匪總司令部」。9月15號，鐵道部與當時嘅香港總督簽訂港九鐵路聯運合同。當時嘅香港總督係貝璐爵士（Sir William PEEL，1875-1945），從1930年5月9日至1935年5月17日履任香港總督，在任5年零8天。9月15號，由孔祥熙（1880-1967）任董事長，宋子文（1894-1971）任總經理嘅中國國貨銀行大樓落成，該銀行由官僚資本控制，為「四小行」之一，孔祥熙同宋子文係政府高級官員，又可以自己開銀行，抄寫近代史，喺30年代嘅中華民國金融世界，佢兩位嘅名字出現嘅次數實在太頻密，好似關於錢、資本嘅嘢，都同佢哋有關係，孔祥熙個老婆係宋靄齡（1889-1973），宋靄齡有兩個妹，宋慶齡（1893-1981）同宋美齡（1897-2003），宋慶齡係孫中山老婆，宋美齡係蔣介石老婆，宋子文係宋靄齡同宋慶齡細佬，the answer is 宋家皇朝蔣天下。

9月16號，京滬公路長途電話正式開通。9月17號，國際聯盟改選非常任理事，中國競選連任失敗。9月19號，郵政總局派員前赴北平，辦理東北通郵嘅交涉事宜。9月21號，國民政府任命馬衡（1881-1955）為北平故宮博物院院長，馬衡字叔平，別署無咎、凡將齋主，浙江鄞縣人。 金石學家，篆刻家，新浙派藝術代表人物。 曾任輔仁大學教授、故宮博物院院長。 馬衡精於金石篆刻碑帖研究，在方法上承襲清朝乾嘉學派學統，並注重文獻研究與實地考察相結合。同一日，中共中央革命軍事委員會決定將新編21，22兩師合編為紅軍第8軍團。

今個月，國民政府正式承認上海總工會嘅合法地位，30年代初期，上海成立咗全市總工會，但係國民政府不予承認，原因亦都非常簡單，因為工會代表工人力量，即係政治不正確，之前中國共產黨就係喺城市屢次發動工人革命，亦以工會為組織重心。但係工會雖然不被政權承認，工人階級始終存在，上海總工會為咗擴大影響力，於是串連幫會，實行玩黑白淡奶溝鴛鴦，相輔相成。並且成立咗「毅社」，發展咗1000多名「學生」，進入各工廠企業嘅工會領導層，呢啲「毅社」嘅學生，當然亦唔係普通學生，應該唔會戴眼鏡同著校服，應該身上邊有幾把老牛同幾枝槍。上海市總工會勢力日益坐大，加上杜月笙（1888-1951）出面調停工潮，日漸打開局面嘅上海總工會，終於獲得國民政府承認。道理亦都非常簡單，既然唔可以打巢你或徹底消滅你，就要想辦法控制你，要將你納入制度中，成為制度嘅一部分，令你有糧出做乖乖，做法非常正常，亦非常貼地同正確，而且通常由反對派變成嘅建制派，會表現得特別忠誠。

#常威 #蔣介石平反系列  #中日戰爭 #民國歷史 #佛經抄寫員

［常威近代史］第六百七十八回 上海總工會合法化（高清錄音版）

#唔鍾意睇字可以聽

https://m.facebook.com/story.php?story_fbid=417335473729736&id=100063598605373

1934年9月27號，國民黨中常會通過以《禮運大同篇》中《天下為公》一章各位孔子紀念歌，歌詞如下：

「大道之行也，天下為公。
選賢與能，講信修睦。
故人不獨親其親，不獨子其子。
使老有所终，壯有所用，幼有所長。
矜寡孤獨廢疾者，皆有所養。
男有分，女有歸。
貨惡其棄於地也，不必藏於己。
力惡其不出於身也，不必為己。
是故謀閉而不興，盗竊亂賊而不作。
故外户而不閉。是謂大同。」

大同世界，就係儒家哲學理想世界嘅圖像，其實亦都等同共產主義中最後嘅烏托邦世界，一個天下為公，無分彼此，各具所足嘅理想天地，用最簡單實際嘅現象觀察，就係歌詞最後一句「故外户而不閉」，外出唔使鎖門，因為再無盜賊偷嘢。響大同世界裡，貪婪不再發生，唔偷嘢唔係因為驚俾警察拉，唔係因為驚俾法律制裁，而係人心根本不再貪婪，係純粹道德嘅戒慎恐懼自律境界，儒家哲學講求道德自律，所謂克己復禮。「禮」亦即係「規律」、「道德律」，擴展至「秩序」、「律令」、「制度」、「法律」等等。「律令」或所謂「道德律」係外在客觀性的；「自律」則係內在主觀性的。於是就衍生咗「內外」嘅問題，究竟「道德」應是從外在客觀環境所賦予？即現代世界嘅司法法律概念，以律法約束人類行為；還是「道德」應該由個體內在自律而生，擴展至外而成普遍規律呢？究竟係由外而內？抑或係由內而外？西方人普遍相信係由外而內，而中國人則相信由內而外。兩者分別好大，由外而內，方便量化及變更，但不持久；但由內而外，則難於量化改變但持久，各有優點，又各有缺點。上述討論純粹哲學吹水，不喜勿插！

9月27號，貴州軍閥猶國才（1897-1950）通電，宣佈同王家烈（1893-1966）合作反共；9月28號，中日代表首次喺北平會晤，商討關內外交通郵問題；9月29號，黃河自劉家屋子改道東南流30里入海；9月30號，全國經濟委員會公佈《西北畜牧計劃》。今個月，陝北紅軍遊擊隊改編為中國工農紅軍陝北獨立師，西藏拉薩電臺建成，中美貿易協會喺上海成立，會長為銀行家張家璈（1889-1979），今個月，《漫畫生活月刊》喺上海創刊，豐子愷（1898-1975）、徐悲鴻（1895-1953）作畫，茅盾（1896-1981）、巴金（1904-2005）等撰文，睇嗰陣，刋物應該都係左傾鳥，另外，電郵部決定本月開辦代郵書籍業務。

1934年9月焉然結束。

#常威 #蔣介石平反系列  #中日戰爭 #民國歷史 #佛經抄寫員

❤【常威近代史】第一部《大清亡國關慈禧蛋牛治》，全面開放，免費下載， #freedownload！

Free下載連結🔽

https://play.google.com/store/books/details?id=C3hjDwAAQBAJ

【常公子歷史頻道469回：黃金十年系列之 你分裂我也分裂 】

♊ 世事的確好難預料，相信過去幾年，大家都一清二楚。新型冠狀病毒肆虐地球三年，又有誰可以估到？俄羅斯與烏克蘭的戰爭，我也萬萬想不到竟然會打到第三個月，而且還有不斷蔓延開去的趨勢，起初還以為以俄羅斯的軍事力量，可以在短時間內取得勝利，一如當年美國進攻伊拉克推翻侯賽因一樣，但情況發展下來，雙方陷於膠著狀態。我講過，俄羅斯同烏克蘭都唔係有錢國家，咁樣打落去咁樣燒錢法，真係睇見都得人驚。我非常相信，戰爭之後的後遺症會更加嚴重，而且仲會影響到全球。

♐李家超成為香港特首唯一候選人，但香港在未來要面對的問題，是非常嚴峻和複雜，不過大家放在口邊的，仍然是「居住問題」，「公屋上樓時間」、「告別劏房」等等。這些居位問題，好像從上一個世紀講到今個世紀，都從來沒有解決過。香港的問題就是一個「樓」字，成也樓，敗也樓，工作就為了買樓，為了上車，上了車就會發達……這就是香港人的命運吧？上不了車，買不了樓，就是可憐人下等人。我不知道是真是假，我只想說，人生並不只有一個「樓」字，衣食住行都有四個選項。

♊記得年紀很小的時候，有一個親戚買了德福花園，於是我們一家窮人拜年要去德福花園，當時的感覺是，那裏500呎左右的德福花園單位簡直是一個天堂，那一天的情境到今天仍然瀝瀝在目，然後又過了很多年，到了今天，我的親戚仍然住在那個德福花園的單位，好像第三代人。我不知道這個故事要表達什麼？大概一個德福花園，的確無比重要吧？

🎦https://youtu.be/HEeeIjNtoSI

［常威近代史］第六百七十九回 究竟係由外而內 抑或係由內而外（高清錄音版）

#唔鍾意睇字可以聽

https://fb.watch/cJPqsb4svN/

【常威近代史】（六百八十回）
25000里長征開始

時間線進入1934年10月，依個月係一個重要嘅轉捩點，尤其是對於被蔣Sir傾盡全力大圍剿下嘅中共！10月1號，國民黨中央宣傳委員會宣佈，決定從今日開始實行「統治言論之合理化政策」，即係講俾大家知，唔好再亂講嘢，政治正確，政治必須要正確！所謂言論自由，要在「政治正確」之框架下發生，越過紅線，就係死罪，無需要再多講！同日，全國學術工作諮詢處成立。10月2號，立法院討論《憲法草案》，決定總統由國民大會選舉產生，即係唔係全民投票產生。同日，實業部、教育部要求各地實行勞工教育，重新教導勞工乜嘢叫做政治正確？矢志要壓制工人階級嘅左傾趨勢。

10月3號，第九屆遠東熱帶國際醫學會議喺南京開幕，今日，偽滿洲國決定將東4省改為10省。10月4號，江蘇大港口連雲港工程竣工。10月5號，偽滿洲國舉行祭孔大典，宣傳孔孟之道，同南京中華民國一樣，大家都將孔子孟子搬返出嚟膜拜，希望收到實際嘅統治效果，因為中國儒家哲學，強調「克己複禮」、「忠君愛國」，可以愛中華民國，亦都可以愛偽滿洲國，就睇吓你點演繹啫。排除對象，其實都係愛，你愛嘅，唔通唔俾你愛咩？10月8號，河北大名長蘆鹽務稅警同鹽民發生衝突，稅警開槍打死18人，打雙20餘人，賣鹽啫，都要開槍殺人？

1934年10月10號雙十節，節目豐富。首先華北第18屆運動會喺天津開幕；由中國國際圖書館主辦嘅世界圖書館展覽會亦喺上海開幕；廣州舉行市政府大樓落成典禮，並實行合署辦公，提高行政效率；綏遠省政府主辦第三屆產馬大賽；海軍部第三大船塢首期工程完成。亦係雙十節當日，中共紅軍主力被迫放棄江西蘇區，由于都出發突圍，開始浩浩蕩蕩嘅「25000里長征」！中央紅軍喺歷時一年之久嘅第五次圍剿戰爭中接連失利，李德先生「堡壘對堡壘」嘅陣地堅打戰略，令紅軍損失慘重。本月初，國軍繼續向中央根據地中心地域推進，勢如破竹。10月7號開始，紅軍主力先後向興國、于都、會昌地區集中，預備進行大規模轉移。與此同時，中共派出潘漢年（1906-1977）、何長工（1901-1987）同「剿匪軍」南天王陳濟棠（1890-1954）部隊接洽談判，雙方議定「解除封鎖」、「取消敵對局面」、「可以互相借道」等條件，紅軍於是決定以南線陳濟棠部隊為突破口，從于都南部一帶進入粵北。項英（1898-1941）、瞿秋白（1899-1935）、陳毅（1901-1972）、陳潭秋（1896-1943）等被留在蘇區根據地繼續展開工作，項英擔任中央分局書記，軍區司令兼政委，陳毅則為中央辦事處主任。10月10號當晚，紅軍主力開始渡過于都河，除正規軍嘅行動外，石印機、兵工廠、軍用物資及造幣廠嘅機器、紙張、大米、電話線等等，都由臨時雇用嘅5000名挑夫隨住大軍運走，「25000里長征」正式拉開序幕，經過10日，去到10月20號，紅軍大隊全部渡過于都河，第二日，陳濟棠亦都實踐協議中「借道」嘅諾言，畀紅軍安全通過，順利進入粵北。至於陳濟棠點解要咁做？相信明白就明白，不明白就永遠不明白。