【常威近代史】(七百四十二回)
家祭無忘告乃翁
時間線進入1937年嘅4月,4月1號,中緬、中瑞郵政開辦互換匯票業務,今日,偽滿洲國實行「第一次產業五年計劃」;同日,第二屆全國美術展覽開幕;4月2號,第三屆全國氣象會議喺南京開幕,孔祥熙(1880-1967)作為中華民國代表前赴英國慶賀英王加冕典禮,登基嘅英王,係患有口吃嘅喬治六世(George VI,1895-1952),喬治六世個女就係伊利莎白女王二世,佢個孫就係查理斯三世,2011年奧斯卡最佳電影,由哥連費夫(Colin Firth,1960-)主演嘅《皇上無話兒》(The King's Speech),就係敘述喬治六世響第二次世界大戰中嘅故事。
4月4號,國民政府蘇州高等法院起訴沈鈞儒等7人。今日亦係一個非常重要嘅日子,因為4月4號清明節,國共兩黨派出代表共祭黃帝陵,黃帝陵位於陝西中部縣(今日叫黃陵縣),史書多稱為「橋陵」,傳說係中華民族始祖軒轅黃帝嘅陵墓,相傳由漢代開始,歷代都有修茸,當然軒轅黃帝係一個傳說中嘅神話人物,實際上有冇呢個人都冇人知道。國民政府成立之後,每年都有舉行祭典,今次中共中央亦派出林柏渠(1886-1960)等代表,會同南京方面派來嘅祭陵要員,一齊前往拜謁。行祭奠禮時,林柏渠獻上毛澤東親筆撰寫嘅祭文,祭典之後,國共兩黨代表都留宿響中部縣縣政府,並就有關問題交換咗意見,直至第二日先分手。
亦嚮今日,蔣介石、周恩來杭州談判結束,周恩來返回延安。蔣介石同周恩來關於「國共第二次合作」嘅談判,自上個月下旬開始,周恩來再次重申中共嘅5項要求同埋4項保證,向蔣介石提出左11項書面要求同5項口頭聲明,當中堅持陝甘寧邊區特別行政區——即係中共根據地——必須保持獨立完整,政府人員民選推薦,由南京政府任命,邊區主要負責人由南京政府派人出任,但必須由中共方面提名推薦。紅軍編整為3個師,每個師人數為15000人,總計45000人,設立總指揮部,所有紅軍領導人員保持不變,唔能夠加人或減人。由周恩來提出嘅條件睇得出,共產黨同國民黨真係一個合作關係,名義上喺埋一齊,但係行政上,則河水不犯井水,保持適當距離,不過政治就係咁嘅一回事,政治唔係綉花,亦唔係請客食飯,國共兩黨,基本上意識形態矛盾從來冇解決過,只不過大敵當前,大家暫且將恩怨擱下,打咗日本仔先,否則連個棋盤都冇埋,亦唔使繼續捉棋。
4月4號,陝西省水利局開掘嘅渭惠渠舉行放水典禮,渭惠渠係繼涇惠渠之後,渭河流域嘅另一個大型水利工程,號稱「陝西八惠渠」之最。工程自前年8月動工,今個月完成嘅係第一期工程,原定係去年12月15號舉行放水典禮,後來因為西安事變爆發延期,渭惠渠建成之後,渭河沿岸嘅農田有水灌溉,加強農業生產力。