大清亡國關慈禧蛋牛治 3

【常威近代史】（六百六十二回）
轟炸平民百姓

1933年12月19號，英國派遣武裝人員2000名侵入雲南班洪，強迫當地人修路開礦，激起民眾反抗。12月20號，湖南省新化縣錫礦山塌陷，近百名工人被壓死。12月21號，中央政治會議通過郵政為國營事等郵政立法原則六條。

12月22號，為對付蔣光鼐、蔡延鍇及陳銘樞、李濟深等人發動之閩變，國軍飛機14架轟炸福建漳州，投彈數十枚，造成300餘人死傷，全城大亂，市民爭相逃往廈門，各界紛紛致電蔣介石，抗議佢「以民眾之機，戕（音翔）民衆之命」，要求佢停止轟炸民居，重視人道精神。為咗平息福建版亂，國軍不僅派出蔣鼎文（1895-1974）率領嘅大批地面部隊進攻福建，而且仲動用空軍加以配合，12月1號，泉州中山公園舉行人民代表大會，三架空軍戰機突然出現上空，投擲11枚炸彈，當場炸死10人，其中有5個人係學生。24同25號，國軍有先後出動飛機13架，連續對福州進行掃射轟炸，已示「震攝」效果，結果平民百姓死傷慘重，惶惶不可終日，廈門商會急電國民政府，希望蔣Sir「為閩民留一條生路」。一切仿佛似曾相識，昨日如此發生，今日都係如此發生。轟炸平民百姓，絕對唔可以原諒，不過有人以平民百姓做擋箭牌同肉盾，完成其戰略或政治目的，都係唔可以原諒，一紙雖匾，兩個面門。不過我想重提一次，當戰爭一旦發生，任何日常生活遵守嘅道德規條都要拋諸腦後，唔再存在，生死本身超越道德律，要響戰爭中講人道講對錯講正義同邪惡，其實統統只係廢話，越過紅線，就係另一個世界。所以千萬唔可以讓戰爭真正發生，一旦要採用最後嘅解決方法，就乜嘢都唔使傾，乜嘢都唔使講！打贏先講！贏咗就正確！

活到有咁上下年紀，如果仲相信世間上有所謂「正義」同「公理」存在，無疑係太天真太傻。當然帶上一副美麗嘅眼鏡去過濾醜陋嘅世界，一直以來都係一種常見嘅逃避方法，本身冇錯，亦唔關道德事。做人凡事只求心安理得，心安就可以，理得好難。

12月24號，上海絲業因為絲價暴跌，65間絲廠有63間停業； 12月25號聖誕節，蔣Sir飛臨蒲城，親自指揮討閩戰事。一邊討閩，一邊剿共，配合閩變發生，今個月紅軍喺江西中央蘇區開展擴大紅軍嘅突擊月運動！至10月開始，蔣Sir 調動超過百萬大軍，200架飛機，兵分四路向紅色蘇區發動第五次大圍剿。面對嚴峻局勢，中央工農民主政府決定啟用全部力量去動員、組織同武裝民眾。紅軍因此得到補充兵源，紅一方面軍加上地方武裝民兵在內，擴展到10萬人，而且亦衞隊則擴展到20幾萬人。粗略估計，呢個時候全國紅軍累積約有30萬人。大家必須明白，依一次內戰，稱呼為剿共戰爭，雙方參戰規模同埋動員人數，已經超越咗軍閥時代嘅任何一場軍閥戰爭，而且參戰嘅已經唔再侷限係職業軍人或半職業軍人，而係全民戰爭，一切似曾相識。

12月27號，新疆張培元（1894-1934）通電反對盛世才（1897-1970），自稱北彊總司令，馬仲英（1910-1936）為南疆總司令，共同出兵攻打盛世才； 12月28號，國民政府委派王寵惠（1881-1958）為海牙公斷院公斷員，公斷院即係國際法庭前身。同一日，修築有4年之久嘅杭江鐵路今日全線通車，1929年，張靜江（1877-1950）主持浙江政務，決定自籌資金修建此鐵路，改善浙東交通狀況，之後獲得中國銀行巨額貸款，終於響1930年9月動工，杭江鐵路起自蕭山縣西興江邊車站，止於江西玉山車站，包括金華至蘭溪24公里支錢，總長為360公里，為節省成本，全線採用輕軌鋪設，工程設計同施工均本著「先求其道，次求其備」 嘅原則進行。杭江鐵路嘅修築開創咗省辦鐵路嘅先河，不久商辦江南、公營淮南鐵路均模仿杭江鐵路修建。

今個月，朝先金氏兄弟開辦嘅金筆廠比中國股東接管，從此成為民族資本企業。上海保險界商人周子柏（1907-1980）曾經開辦「穎源號」代理由朝鮮人金星建、金星翅、金星文三兄弟合辦嘅金星筆廠銷售業務。但係由於美國壟斷金筆市場，銷售情況欠佳，「穎源號」嚴重虧損，經過協商，周子柏同金氏兄弟將金星筆廠改為股份有限公司，1933年第一次股東大會召開後，賀聚道（?-1967）任董事長，周子柏任經理，廠長係金星建，依次金氏兄弟將股本以七折價轉讓於中國股東，完成收購，以前有支金筆、金火機真係好重要，依種「身份嘅象徵」金筆文化，依我記憶，要去到21世紀先玩完，今日係要有隻撈。

今個月，聯華影業公司故事片《三個摩登女性》上映，三位女演員係阮玲玉（1910-1935）、黎灼灼（1905-1990）同陳燕燕（1916-1999）。明星公司將茅盾（1896-1981）嘅短篇小說《春蠶》搬上銀幕，開創改編小說為電影劇本嘅先例； 北京近郊周口店山頂洞古人類文化遺址開始挖掘； 化學家候德榜（1890-1974）嘅著作《純鹼製造》喺美國出版，呢部係世界上第一部製鹼嘅工業專著，被奉為經典； 數學家熊慶來（1893-1969）獲法國國家理學博士學位，佢所定義嘅函數無窮極，被稱為「熊氏無窮極」； 錢瘦鐵（1897-1967）、陳小蝶（1897-1989）、孫雪泥（1889-1965）發起咗第一次全國性中國畫展覧，張大千（1898-1983）、齊白石（1864-1957）、劉海粟（1896-1994）等大師都有作品參展。

#常威💀 #蔣介石平反系列  #中日戰爭 #民國歷史 #佛經抄寫員

❤【常威近代史】第一部《大清亡國關慈禧蛋牛治》，全面開放，免費下載， #freedownload！

Free下載連結🔽

https://play.google.com/store/books/details?id=C3hjDwAAQBAJ

【常公子歷史頻道459回：黃金十年系列之 造神運動開始】

♊ 智人比猿猴優勝的地方，在於智人能夠無中生有，懂得創造，懂得把一些虛構的、概念化的東西變成現實操作。「神」是其中一種，無可否認，「神」是被創造出來的東西，「神」是人類幻想的產物，集全能至善於一身，係一個理想化的「最高存在」，其存在的目的，係為咗解答所有問題，並為世間的一切是非對錯提供最後仲裁，還有更重要的是，「神」可以令人類相信，我們在無窮的苦難中總會找到出路，神其實一早有了安排。毫無疑問，「神」 是人類創造出來安慰自己的「安慰劑」。它雖然沒有實質藥效，但卻能醫百病。

♈同樣道理，既然「神」是被創造出來，「恐懼」大部份同時也是被創造出的東西。就像看恐怖或驚慄電影一樣，我們明知一切都是假的，但是卻對所見所聞心生恐懼，或者將恐懼變成一種娛樂的方法，這是為了什麼？幾乎可以肯定的是，我們的人生裏，是需要恐懼這種心理元素。似乎所有人心裏都明白，我們遵從道德律要成為一個好人，在大部分的情況下都不是我們心中所愿，祇不過是恐懼後果而產生的唯一選項。也就是說，所謂秩序，本身就是來自恐懼。

♌ 一個社會的運作，必須有其秩序存在，無政府主義從來衹是空談和想像，而差不多所有的秩序，皆來自恐懼。這就是不同的恐懼總是不斷出現在我們身邊的理由。我相信恐懼不會停止，不同的恐懼也會繼續被製造出來，當你習慣了舊的恐懼，就有新的恐懼取代取，正如不斷有驚慄電影和恐怖電影上畫一樣，恐懼是必須的，也是我們生存的必需品和動力。


🎦https://youtu.be/KA8MV7YDAEo

［常威近代史］第六百六十二回 轟炸平民百姓（高清錄音版）

#唔鍾意睇字可以聽

https://fb.watch/bRLd5TQE5Z/

【常威近代史】（六百六十三回）
大難臨頭

時間線進入1934年，距離大災雞發生愈來愈近，不單係中國，甚至整個世界，也日漸步入火海之中，迎接一次史無前例嘅生靈塗炭同生離死別。第一次世界大戰帶嚟嘅（虛假）短暫和平，即將結束，世界各國飽受貪污舞弊、貧富懸殊、政治混亂、市場失衡、通貨膨脹、種族不平等、失業甚至饑荒問題所威脅。大部分平民百姓睇唔到將來，亦飽受目前艱苦狀態所困擾。30年代，極右法西斯主義來勢洶洶，日本軍人當道，力推軍國主義，唔理會國際聯盟嘅無力遣責，建立傀儡政權偽滿洲國，且總動員大規模入侵中國； 法西斯之父墨索里尼（1883-1945）亦都開始侵略擴張，大舉入侵非洲建立殖民地；響德國，1933年1月30號，納粹黨希特拉（1889-1945）已經當上德國總理，1933年3月5日嘅國會大選中，納粹黨嘅得票率係17,277,000票，百分比為43.9，響國會中奪取288席，成為第一大執政黨，1933年2月27日，名動一時嘅國會大樓縱火案發生，希特拉趁機以血腥手段掃除國內共產黨及其他反對派勢力，佢亦正在預備修憲成為國家元首，斬殺民主制度，邁上獨裁權力嘅頂峰。所有嘅秩序同信仰開始瓦解，當然如果你係當時，話畀每個國家嘅平民百姓知道，幾年之後就會爆發一場全球性嘅第二次世界大戰，我諗好多人根本唔會相信，或者覺得根本無可能發生。玩咩？世界大戰喎，你估玩泥沙咩？咁易打咩？但係偏偏第二次世界大戰就係咁發生咗，戰火好快蔓延全球，死咗幾千萬人甚至上億人，將一切秩序推倒重來—— 用最血腥嘅手段——推倒重來。幸好奧本海默（1904-1967） 搶先發明原子彈，否則後果會更加不堪想像——以殺止殺，原來係最後嘅結論。

1934年1月1號，國軍對福建人民革命軍發動總攻擊！同日，教育部喺上海設立全國教育電影推廣處，今日，鹽務及稅務機關開始採用公尺、公斤、公升等新嘅度量衡。1928年7月，國民政府公佈《中華民國權度標準》，重新統一混亂不堪嘅民間度量衡制度，以1公尺為標準尺，1公升為標準升，另外以與標準制有簡單比例而民間習慣相仿者為市制。但係市民對此反應冷淡，甚至各機關亦唔積極採用，人類嘅習慣真係好難改變，唔好講當時嘅中華民國，就算今日嘅香港，去街市買餸，大部分仲講緊16兩為1市斤，邊度有人用kg秤芥菜呢？2月1號，財政部命令所屬各機關實施度量衡新制，並且設立全國度量衡局，從速舉辦度量衡檢定人員養成所，講就天下無敵，做就一定有心無力。人類約定俗成嘅習慣非常之難改變，如果唔用暴力，往往係需要幾十年時間先有效果。

1月7號，強調「一個主義、一個政黨、一個領袖」去擁護蔣Sir嘅國民黨黨內組織力行社開會決定三大政策；1月8號，《文學季刊》 喺北平創刊，同日，啱啱見過墨索里尼嘅張學良回國抵達上海。1月9號，行政院要求各省政府實施造林，保育生態，同日，財政部統一全國鹽稅，一律每擔收稅10元。

1月10號，國軍佔領廈門，向福州推進，攻勢勢如破竹。國民黨中政會通過由財政部發行民國23年關稅庫卷1億元，再印銀紙，唔印銀紙邊有錢打仗？中共頒佈《優待紅軍家屬禮拜六條例》，規定凡未響紅軍中服務者，應履行每星期無償幫紅軍家屬勞動一天。青海西區屯墾督辦兼第41軍軍長孫殿英（1889-1947）命令所有部隊侵入寧夏，軍閥孫先生最出名嘅事蹟係以籌措軍餉，軍事演習為名，盜掘乾隆皇帝與慈禧太后陵墓，收羅大批珍寶，究竟偷咗幾多？真係冇人知道。

1月10號，蔣Sir 派遣特使手持其親筆信前往德國柏林，迎接前德國陸軍總司令塞克特（Hans von Seeckt，1866-1936）再次來華，擔任軍事顧問團總顧問。塞克特離開柏林前夕，當時嘅德國總統興登堡（Hindenburg，1847-1934），國防部長麥肯遜，同埋外交部長牛賴特（Konstantin Freiherr von Neurath，1873-1956）等人分別接見塞克特，表示德國政府將予以可能之支持。日本政府得悉此事後，對此表示強烈反對，要求德國駐日大使狄克森德急電拍林外交部勸阻，但德國政府未有任何表示。吓？原來國民政府用德國人做顧問打仗？德國唔係同日本一路嘅咩？軸心國嘛，媽呀，我好亂呀！個世界真係好亂啊！

1月12號，日本藉口保護僑民，增派軍艦前往福建。1月13號，福州失守在即，福建人民政府各機關撤往漳州、泉州。1月15號，國內唯一音樂刊物《音樂雜誌》季刋響上海創刋，食都未有得食，邊有時間玩音樂呢？同日，中共中央喺瑞金召開六屆五中全會，改選咗中央政治局，博古（秦邦憲，1907-1946）等人當選為中央書記處書記，王明（1904-1974）嘅左傾路線繼續得以推行。博古 為王明指定嘅中共臨時中央政治局總負責人，上年初，臨時中央從上海遷到瑞金蘇區，到咗6月，原有中共蘇區中央局撤銷，周恩來（1898-1976）嘅蘇區中央局書記職務也隨之消失，26歲嘅博古成為中央蘇區嘅最高首長，博古喺地位確立後，隨即開始喺蘇區全面推行王明路線，進一步批判毛澤東（1893-1976），將中共嘅中心任務確定為「最高速度來擴大和鞏固紅軍，和敵人進行兩條路線的決戰」。

#常威💀 #蔣介石平反系列  #中日戰爭 #民國歷史 #佛經抄寫員

https://www.youtube.com/playlist?list=PL0RVUAILQUOvTo8JJrayjrvd_Nbjc-0Me

❤請加入常公子的近代史世界！

#常威 #廣東話 #中國近代史 #HongKong #Chinese #History

［常威近代史］第六百六十三回 大難臨頭（高清錄音版）

#唔鍾意睇字可以聽

https://fb.watch/bVk6IA32JD/

【常威近代史】（六百六十四回）
究竟點樣搵活佛靈童轉世？

1934年1月15號，中華國貨產銷聯合公司喺上海成立，該公司由參加芝加哥博覽會出品協會的各省代表周貫虹等發起，以「生產救國為宗旨，輔助實業之發展，實行產銷合作」作號召，提倡做產救國，國家強大必先經濟強大，中華國貨產銷聯合公司股本為26萬元，1月30號，公司召開董監事聯席會，推舉杜月笙（1888-1951）為董事長，「衣莊大王」鄔志豪（？-1946）為總經理，王曉籟（1886-1967），史量才（1880-1934）、許世英（1873-1964）、林康候（1875-1965）、俞佐廷、鄔志豪等等為常務理事，啲名咁熟口熟面，又係成班江浙財閥大家庭玩曬，大家明嘅，亦唔需要多解釋。

1月20號，國民黨四屆四中全會喺南京召開，中國國際學會喺上海成立，黔桂公路喺廣西南丹縣舉行通車典禮； 1月22號，國民政府派顧維鈞（1888-1985）為海牙公斷院公斷員。1月27號，財政部同中國、交通等16間銀行組成嘅銀行團簽訂4400萬元嘅借款合同，借錢總要還，咪畀錢中介。同一日，中華鄉村教育社喺南京成立，何玉書（1892-1969）等16人為理事。西藏甘丹、哲蚌、色拉三大寺代表請求中央護送班禪回藏。

1月30號，青海西寧青海電訊社創立，由陳秉淵（1909-1991）主辦。1月31號，中華民國行政院會議決議，並呈請國民政府照准，以熱振活佛代攝西藏政務，同時電告西藏地方當局。上年12月17號，第13世達賴喇嘛圖登嘉措（1876-1933）喺拉薩圓寂，西藏地方政府各級僧侶官員召開大會，推舉熱振寺嘅熱振活佛（1910-1947）喺下任14世達賴喇嘛轉世以前，代辦西藏政務，定於今個月26號向國民政府呈報後獲准。5月29號，國民政府發佈命令，拆封熱振活佛為「輔國普化祥師」。順帶一提，找尋第14世達賴喇嘛轉世嘅工作，就係由熱振活佛去做，至於熱振活佛點樣搵14世達賴喇嘛靈童轉世？歷史冇講畀我哋知道，大概係一種非常之神秘嘅操作程序，好有可能涉及玄學生肖八字九宮飛星風水紫微斗數或者量子力學相對論等範疇，一般人難以理解，所以寫出嚟都冇用，講出嚟大家都唔識。但係無論如何，14世達賴喇嘛始終都轉世出現，佢就係活到今時今日嘅丹增嘉措（1935-）。

熱振活佛攝政之後，致力改善西藏同中央政府嘅關係，並採取咗好多削弱親英勢力嘅措施，當時西藏政局，分為親中派同親英派，大家唔咬弦咗幾十年。熱振活佛嘅舉動，引起咗西藏親英勢力嘅不滿，終於響1941年初，熱振活佛被逼辭職下臺。由身邊嘅經師、親英派達扎活佛（1874-1952）代理攝政職務2至3年，熱振本人則退隱到熱振寺歸隱。1943年，當選為中國國民黨第六屆中央執行委員。後來，代理攝政達扎違背約定不交權，並忌憚喺西藏擁有崇高威望嘅熱振奪回權力。抗日戰爭勝利後，國民政府曾制定支持熱振活佛復任西藏攝政政策，並採取措施響西藏壯大親漢力量。而熱振也試圖向國民政府尋求軍事及政治援助，從達扎手中奪回權力。但在英屬印度政府支持下，達扎著力打壓熱振及其他親漢力量，令熱振處境困難。而且國民政府內部在是否支持熱振問題上存在嚴重分歧，造成對熱振支持不力。

1947年，西藏境內流傳著國民政府即將出兵支持熱振奪位傳聞，達扎活佛遂派兵攻破熱振寺，逮捕熱振，囚禁於布達拉宮。因熱振寺係色拉寺嘅下屬寺院，色拉寺僧眾起兵欲奪回熱振，但遭噶廈軍隊阻擊，寡不敵眾，被迫撤離。隨後，熱振於1947年5月7日響布達拉宮內突然死亡，傳聞係遭達扎活佛毒殺。其支持者隨後亦遭達扎活佛清算，史稱「熱振事件」。五世熱振死後，達扎活佛廢除熱振活佛稱號，禁止其轉世，原來轉世都可以被禁止，真係學到嘢，並且破壞了熱振寺。直到中共入駐西藏後，1955年先認定第六世熱振活佛，熱振·單增晉美土多旺秋（1948-1997），至於第七世熱振活佛則係回歸後1997年10月13號出世嘅熱振·洛追嘉措赤烈倫珠。不過重申一次，究竟點樣搵到轉世嘅活佛？同點樣確認？我真係唔清楚，或者麥玲玲會清楚少少。

今個月，徐悲鴻（1895-1953）嘅畫展喺柏林開幕，呢個時候嘅德國，係納粹黨當政嘅年代。1934年1月，上海《時代漫畫》月刊創刊，應該係中國第一本漫畫雜誌，主編為魯少飛（1903-1995），魯少飛出生於上海，參加過北伐軍，響總政治部宣傳處任職過，佢本身係一位頗有影響力嘅漫畫家。1934年擔任《時代漫畫》主編。培養咗一批漫畫家，因此有人稱譽其為中國漫壇嘅伯樂、中國現代漫畫鼻祖。魯少飛亦曾創辦中國漫畫家協會，主辦《救亡漫畫》，《國家總動員畫報》。1949年後任人民美術出版社美術編輯組組長，魯少飛作品有《改造博士》、《魚我所欲也》、《晏子乎？》、《漁鷹》等。1993年，90大壽時被授予「中國漫畫金猴獎，亦係對佢一生響漫畫界耕耘嘅褒獎。

今個月，教育部喺南京設立東北青年教育救濟處，專門辦理救濟東北青年教育事宜，相信係偽滿洲國成立之後，唔少愛國青年會離開滿洲國，脫離日本人統治嘅魔掌。今個月，廣西苗傜教育委員會亦都成立，任務係響苗族、傜族中推行基礎教育工作。

1934年嘅第一個月於焉結束。

#常威💀 #蔣介石平反系列  #中日戰爭 #民國歷史 #佛經抄寫員

https://www.youtube.com/playlist?list=PL0RVUAILQUOvTo8JJrayjrvd_Nbjc-0Me

❤請加入常公子的近代史世界！

#常威 #廣東話 #中國近代史 #HongKong #Chinese #History

【常公子歷史頻道460回：黃金十年系列之 省港澳大罷工】

♊ 壬寅年的確不是一個好年頭，首先，新型冠狀病毒繼續肆虐，世界仍未回復完全正常，近兩三個月，香港更加因為抗疫接近停擺狀態，好多行業生意冇得做，好多做小生意嘅小老闆慘到飛起，我唔敢去想像，經過今次洗牌，香港會變成一個咩嘢嘅狀況？不過有一點可以肯定，未來3-5年，我諗冇人會再講「冇機會向上流動」依七個字，保得住現況、保得住份工、或者有嘢撈有飯開已經幾生修到，唔駛向下流動已經要還神。大概新型冠狀病毒肆虐幾年，就係要大家學懂「知足享樂」四個字。

♐有人話，你的外貌是什麼，決定了你是什麼； 或者你的父母是什麼，就決定了你是什麼。其實，應該係你身處的時代是什麼，就決定了你是什麼。生不逢時，就幾叻都冇用，在適合的時間出現在適合的地方，有時候比能力更重要。七、八十年代有錢買幾層市區樓，邊個唔發達？今日香港，財富大多數集中在一批上世紀50、60年代出生嘅人手中，因為佢哋生得逢時，食正條水，不過冇辦法，真相就是如此。

♐壬寅年除咗疫情繼續，仲發生咗俄烏戰爭，情況越演越烈，電視上所見，烏克蘭有唔少城市已經變成廢墟，烏克蘭係歐洲一個人口衆多嘅貧窮國家，經過今次戰爭，國情恐怕會一落千丈。俄烏雙方繼續談判，希望一如所料，響兩三個禮拜內達成停戰協議，否則烏克蘭頂唔順，俄羅斯都會頂唔順，戰爭引發嘅漣漪會波及冲擊整個世界，首先夾爆歐洲唔駛講，中國無可避免都要承受戰火餘波。目前我最希望，就係烏克蘭嘅善後工作會順利進行，否則連鎖反應會陸續有來……

🎦https://youtu.be/rwbld7WD5cA

💚【我奮鬥不奮鬥】 常公子 楊熙合著
電子書下載⬇ https://play.google.com/store/books/details?id=CVo3EAAAQBAJ
Kindle版下⬇
https://www.amazon.com/dp/B098XHWTDK

實體書訂購⬇
https://www.382now.com/product?id=325

［常威近代史］第六百六十四回 究竟點樣搵活佛靈童轉世（高清錄音版）

#唔鍾意睇字可以聽

https://fb.watch/bY57-HNRHK/

【常公子歷史頻道461回：黃金十年系列之 大罷工 大鎮壓】

♊ 今集同上集條聲麻麻地，同大家講聲唔好意思，可能唔記得開無線咪，用左電話收，陀地製作係差唔多，常公子頻道冇乜收入，憑住一份堅持做落去，要多謝阿潮！不過我哋唔會放棄，youtube去到461回，文本寫到665回，先去到1934年，漫漫長路，仲有好長近代史嘅路要走，我同阿潮會繼續堅持落去。

♏ 政府公佈4月20號逐步放寬防疫措施，香港經濟終露曙光，去到4月20號，最保守估計，香港已經有一半人感染過Omicron，起碼我身邊識嘅大部分人都中過招，真係變成平常不過，變成風土病。不過，最遺憾嘅係，今次第五波疫情，死咗好多老人家同埋長期病患者，香港處理疫情嘅手法可謂進退失據，既保唔住弱者生命，又重重損害經濟，更加唔好講使咗幾多公帑搞防疫，真真正正兩頭唔到岸，兩邊唔討好。今次第五波疫情，亦凸顯左我哋香港政府應變突如其來災難嘅能力實在相當有限。不過真相早啲知，好過遲啲知，人貴自知，希望下一次可以做好少少，畢竟新型冠狀病毒疫情仲未結束，（烏鴉口） 病毒一定會有變種，歐洲已經開始出現，感染個案大幅回升。可以相信，仲有第六波、第七波……當然希望唔好畀我估中。

🎦https://youtu.be/W5aiHoo4qJw

💚【我奮鬥不奮鬥】 常公子 楊熙合著
電子書下載⬇ https://play.google.com/store/books/details?id=CVo3EAAAQBAJ
Kindle版下⬇
https://www.amazon.com/dp/B098XHWTDK

實體書訂購⬇
https://www.382now.com/product?id=325

【常威近代史】（六百六十五回）
中國第一位自殺嘅女明星

時間線進入1934年2月，2月1號，中國天一保險公司係上海開業，資本為500萬元。陝西考古會喺西安成立，學者張鵬一（1867-1943）為委員長，歷史上對張鵬一嘅評價係「他生前勤奮治學，著作甚豐，已刊的著述近20種，文章多篇；未刊印的著作有近40種，是研究中國古代傳統文化及近代歷史非常珍貴的資料。」，2月1號，財政部徵收田賦改收紙幣，向統一幣制邁進一大步。粵漢鐵路韶關樂昌段正式通車。2月2號，中國地方自治會喺南京成立。2月3號，上海真如國際無線電臺舉行中英直接通報開幕典禮。同日，寧夏盜墓者軍閥孫殿英（1889-1947）、馬鴻逵（1892-1970）火拼，孫殿英部隊圍攻寧廈省城。2月6號，墨西哥華僑向國內求援，之前已經講過，墨西哥大規模排華，情況相當惡劣。2月8號，國民黨中央決定組織國民黨黨史館。2月10號，被日軍佔領接近一年多嘅山海關正式由國民政府接收。2月11號，中國文化協進會喺南京成立，陳立夫（1900-2001）為理事長。

2月12號，著名電影明星艾霞響上海服食大量鴉片自殺。艾霞生於1912年11月29號天津，大學畢業後，她愛上咗堂兄並生下一個孩子，家人不贊成這段戀情，導致艾霞愛人離開。1928年16歲她結了婚，但作為個人抗議，艾霞離開家鄉到上海從事電影事業，艾霞開始由左翼作家田漢（1998-1968）創辦嘅華南戲曲社擔任舞台劇演員，之後加入左派戲劇家聯盟，並於1932年20歲被介紹給明星影片公司。艾霞於1933年寫咗《現代女性》一書，該書於同年改編為電影。艾霞係中國電影「左翼」運動中僅有兩位女編劇之一，她一生中總共演出過八部電影。艾霞亦係第一個自殺嘅中國女電影明星，係中國電影中一個標誌性人物，由另一個女明星阮玲玉（1910-1935）擔任主演電影《新女性》，就係基於艾霞嘅生平，無獨有偶，之後阮玲玉亦都自殺而死。佢兩位之後，無數女明星以自殺結束自己生命，到今日都係，真係唔知點解？

2月12號，實業部、財政部決定豁免苛捐雜稅，減輕運費，以挽救國內瀕臨崩潰嘅絲綢業； 2月14號，上海《新生周刊》創刋，2月15號，上海《國貨月報》創刋。2月19號，蔣Sir 喺南昌行營擴大紀念周上演講《新生活運動之要義》，全面發起全國新生活運動。依照蔣Sir解釋，所謂「新生活運動」，第一要旨，就係令到一般國民具備國民道德； 第二就係要一般國民具備國民知識； 而國民道德、國民知識統統可以從基本生活中表現出嚟，蔣Sir認為中國始終唔能夠獲得平等，係因為一般國民無論衣、食、住、行各方面，都不能夠如同我們的古人、或現代外國人一樣合乎「禮義、廉、恥」。幾日後嘅23號，蔣Sir再次喺南昌行營演說，規定新生活運動嘅主要內容，以禮、義、廉、恥四維、忠、孝、仁、愛、信、義、和平八德為道德規範，實行整齊、清潔、簡單、樸素、 迅速、確實六條原則，實現國民日常生活軍事化、生產化、同藝術化三化。3月11號，新生活運動促成會成立。新生活運動，無疑就一場意識形態改造運動，不外乎都係增強民衆嘅愛國心、向心力同動員能力為重點，至於禮、義、廉、恥、忠、孝、仁、愛、信、義、和平等等，其實全部都係儒家哲學嘅範疇，講咗二千幾年，只不過重新包裝再sell過。

我哋全部都只係睇文本去認識過去歷史，20世紀初期嘅中國人係咪好大問題？其實我唔清楚，亦唔知道，只係魯迅同好多文人歷史學者講畀我哋知，當時嘅中國好多阿Q，好多孔乙己、好多差不多先生、當然仲有好多道友……，於是國家乎積弱多年，受盡外侮，任人魚肉？個真相究竟係唔係咁呢？我覺得一個國家嘅強弱，未必同國民嘅道德水平有關，或至少有直接關係。細閱歷史，相反嘅例子比比皆是，有句說話叫做「劣幣驅除良幣」，除咗應用喺貨幣層面上，其實都可以應用係好多方面。今日世界上最強嘅國家應該係美國了，無論經濟實力或軍事實力上都係，但係，應該冇人會認為美國國民嘅道德水平係世上最高，甚至乎智商最高（電影電視劇就應該係最好睇）。更加唔關乜春「禮儀廉恥忠孝仁愛信義和平」事。去返古代，滿清王朝時期，其實清帝國士大夫統治階層道德水平都好高（幾層樓咁高），全部都係儒家哲學愛好者，不過至19世紀中葉開始，就畀外國人嘅船堅炮利打到甩皮甩骨，打到一棟都冇，道德始終唔係炮彈，仁義亦從來唔可以當飯食。反而國家強大起嚟，就有需要用仁義道德去包裝裝飾，或者用作藏污納垢，當然上述只屬於個人觀點，大家可以不理。唔講道德，唔通同你講錢咩？咩！咩！咩！（羊在叫）

2月19號，國民黨上海特別市黨部奉命查禁大批圖書，涉及上海市25間書店149種圖書。國民黨中央宣傳委員會畀上海市黨部嘅密函上稱「調查上海各書局出版共產黨及左傾作家之文藝作品為數甚多」，要求「嚴行查禁，並勒令繳毀各刊物底版，已絕根據」，即係連菲林都要燒燬。25號，上海出版人聯合會代表向上海市黨部請願，之後23種圖書准予修訂刪改後再發行，解禁37種，其餘一律被禁止發行。

#常威💀 #蔣介石平反系列  #中日戰爭 #民國歷史 #佛經抄寫員

［常威近代史］第六百六十五回 中國第一位自殺嘅女明星（高清錄音版）

#唔鍾意睇字可以聽

https://fb.watch/b_-lRKtTPL/

【常威近代史】（六百六十六回）
橡膠大王陳嘉庚

1934年2月20號，班禪活佛確吉尼瑪（1883-1937）喺南京就任國民政府委員，世上活佛何其多？真係睇吓你信邊個勒？2月21號，國民黨中正會通過《地方自治原則》。上海30幾間書局召開緊急會議，就國民黨中央宣傳委員會向各書局查禁大批進步書刊事件作出決議。同一日，福建人陳嘉庚（1874-1961）嘅橡膠公司宣告破產，陳嘉庚係南洋橡膠大王，佢本身係華人企業家，慈善家，革命家，亦身為華僑領袖。佢嘅橡膠生意由1926年開始出現危機，當時因供過於求，生膠及橡膠產品價格暴跌，而陳氏嘅產品，亦競爭唔過日本同美國嘅價廉物美橡膠製品。1928年，陳氏嘅橡膠熟品製造廠新廠又比日本商人雇用黑社會縱火焚燬，損失慘重！日本人真係惡行滔天，接連遭遇挫折嘅陳嘉庚只好出售部分橡膠園套現，並向外國銀行舉債維持生意，佢嘅財產大幅減少，企業嘅控制權亦都逐漸旁落，苦撐8年，終無轉機要清盤。

不過，橡膠大王絕對唔可以講笑，佢同東南亞華僑，其實係國民黨搞革命、北伐、抗日大多數資金提供者，陳嘉庚組織「南洋華僑籌賑祖國難民總會」，動員南洋華僑踴躍捐款，購買救國公債，選送華僑機師回國，抗日期間，響滇緬公路運輸抗戰物資，為祖國抗戰作出了巨大貢獻，只計陳嘉庚個人，就一共捐出一百多架戰鬥機、一千多輛戰車、百億軍火和無數救濟糧食，響中華人民共和國成立後，陳嘉庚更出資響多山嘅福建興建鷹廈鐵路，成為中國第一條由民間人士出資興建嘅鐵路。

國共內戰期間，陳嘉庚係國共兩黨爭相拉攏嘅對象，陳氏唔贊成美國援助蔣Sir，因為佢賣國，傾向支持共產黨，解放軍攻佔北平後，陳嘉庚曾以華僑首席代表身份參加首次中國人民政治協商會議，激烈反對毛澤東沿用「中華民國」國號，最後討論後使用咗「中華人民共和國」為國號。陳嘉庚亦非常重視教育事業，新加坡、香港、廣州、廈門、南洋以及中國大陸好多獎學金以及學校都係陳嘉庚捐獻，例如廈門大學。1949年5月，陳嘉庚應毛澤東邀請，回國參加中國人民政治協商會議籌備會議，9月以華僑首席代表身份參加中國人民政治協商會議，10月1日響天安門城樓參加咗中華人民共和國開國大典。1950年陳嘉庚決定回中國定居。歷任中央人民政府委員，中國人民政治協商會議第一屆全國委員會常務委員，中央華僑事務委員會委員，華東行政委員會副主席，中華全國歸國華僑聯合會主席，第一屆全國人大常委會委員，政協第三屆全國委員會副主席等職務。1954年9月，他出席第一屆全國人大第一次會議討論憲法草案。1961年8月12日，陳嘉庚病逝於北京，享年87歲。後安葬於福建集美鰲園。佢嘅葬禮規格極高，由周恩來總理主持，毛澤東主席親筆題詞紀念，橡膠大王陳嘉庚的確係時代風雲人物。

2月22號，國民政府命令行政院、軍事委員會嚴厲執行新聞審查，2月23號，中華民國憲法草案完成初稿工作，中國嘅第一部憲法快將誕生（或者叫終於誕生），由1911年辛亥革命後開始起計，都差不多搞咗20幾年鳥，部憲法仲未出現呀（陰公）。2月24號，馬仲英派東干回軍攻克喀什，消滅「東土耳其斯坦王國」；同日，華僑委員會商討要求外交部嚴厲干涉暹羅慘殺華僑案，其實東南亞各地、甚至全世界排華、殺死華僑事件成日發生，早前就有墨西哥大規模排華事件，死咗唔少人，中國人係咪特別黑人憎？當然唔係，一切都係錢作怪，排華同埋當時歐洲反猶生義一樣，本質上相同，只係窮人仇富嘅一種表現手法，其實係階級問題，當然起初都只係仇富，但係發酵得幾十年，就變成所有猶太人都係罪人，要送入毒氣室集體毒殺，所有中國人都係魔鬼，殺你唔使預先通知。大家仲記唔記得1998年發生喺印尼嚟嘅「黑色五月暴動」排華事件，個印尼人攞住個中國人人頭嗰幅相，我到今日仲瀝瀝在目。

人類嘅仇恨心理好容易蔓延開去，正所謂好事不出門，壞事傳千里，冇錯嘅。放大別人嘅缺點，唔懂得欣賞別人嘅優點，或者鍾意用把口講是講非，其實通通都係人性，十個人之中，其實有八個係八公同八婆。要憎一個人好容易，要愛一個人好難，所以儒家哲學孔子孟子話人性本善？其實我唔信。

2月25號，中國保護動物會喺上海成立，同一日，陳濟棠突然將獨立第3旅繳械，完全打亂重編。今個月頭，陳濟棠（1890-1954）派員至龍岩見閩變失敗嘅軍閥蔡廷鍇（1892-1968），接洽收編大名鼎鼎嘅19路軍殘部，2月6號，陳濟堂經國民黨中正會同意，將19路軍殘部改編為粵軍獨立第3旅，任命19路軍軍需處長黃和春（1900-1983）為旅長，之後蔡廷鍇出走香港，今日25號，陳濟棠打亂重編第3旅，黃和春被監視，撤銷旅長職務，之後被改為第一集團軍總部參議。今個月，外交部擬定於月內對蘇聯交涉新商約，取消金樹仁（1879-1941）之前同蘇聯所訂立嘅條約。另外，今個月全國經濟委員會增設農業處，辦理農村工程、改善農業技術及農村調查等事宜。

1934年2月於焉結束。

#常威 #蔣介石平反系列  #中日戰爭 #民國歷史 #佛經抄寫員

［常威近代史］第六百六十六回 橡膠大王陳嘉庚（高清錄音版）

#唔鍾意睇字可以聽

https://fb.watch/c2tstbFh0J/

【常威近代史】（六百六十七回）
溥儀又做皇帝

1934年3月1日，左翼文化刊物之一《春光月刊》 喺上海創刊，另外主要研究歷史地理嘅《禹貢》 半月刊亦喺北平創刊。今日係大日子，因為溥儀喺日本人嘅擺佈之下再次稱帝，偽年號爲「康德」，「滿洲國」則改稱為「大滿洲帝國」，溥儀同時頒佈《組役法》，規定改稱總理各部職為「大臣」，「執政府」改稱為「宮內府」，並且新設「國璽府」。任命沈瑞麟（1874-1945）為「 宮內府大臣」，郭寶熙為「國璽尚書」，帶壞溥儀嘅國師鄭孝胥（1860-1938）為「總理大臣」兼「文教部大臣」。日本關東軍司令官兼駐滿洲國全權大使等200餘人參加稱帝儀式，溥儀拜天祭地，交足戲，溥儀稱帝儀式可以參考貝托魯奇（1941-2018）1987年拍嘅電影《末代皇帝溥儀，The Last Emperor》，內裡交代得好清楚，當然溥儀未必識講英文，中午之後日滿交換偽帝國成立之公文，表示承認，當然日本亦成為第一個承認「大滿洲帝國」國際地位嘅國家！（一笑）

日本於上年9月正式承認「滿洲國」後，即以新嘅特殊體制確保對其「滿洲國」嘅統治權，之前，駐滿洲國大使武藤信義（1868-1933）接替本莊繁（1876-1945）任關東軍司令官，武藤在任期間就發動咗熱河戰爭，同時武藤亦擔任關東廳長官，三位一體，武藤信義其實先至係滿洲國嘅太上皇，另外武藤又保薦日本人駒井德三（1885-1961）為總務廳長官，實際上掌握偽滿洲國政權，武藤信義於1933年7月病死終滿洲國首都，而所謂「溥儀帝」 只不過係日本人嘅傀儡紙板人，溥儀喺滿洲國日常做乜？大家又可以參考《The Last Emperor》。做傀儡皇帝其實幾好玩，首先應該冇乜正經事可以做，主要嘅工作可能係簽吓名，出席宴會去吓ball媾吓女，身光頸靚，又有錢落袋，衣食又無憂！天下第一正工，大家恨唔到咁多。

3月2號，藏軍偷渡通天河，與川軍劉文輝（1895-1976）部隊接觸；3月4號， 「四海」輪由廣東四會縣開赴廣州，因為超載喺珠江大涌口沉沒，300個人死！同日，交通部命令郵政總局轉令所屬郵局，於4月1號起實行代民眾訂購刊物，大家應該明點解？4月5號，上海美亞織綢廠4000幾個工人為反對廠方減低工資而舉行大罷工；同日，天津北洋女子醫院創辦人，中國第一位女西醫金雅梅（1864-1934）喺天津因肺炎病逝，享年70歲，金雅梅係浙江寧波人，中國第一位女留學生，畢業於紐約女子醫科大學，21歲時成為一名美國醫生，曾應聘在費城、華盛頓、紐約等地醫院工作。佢5歲時被美國傳教士收養，之後離開中國響美國長大，其實應該係一個100%鬼妹，但佢冇忘記祖國，從醫科大學畢業3年後，毅然回到中國。1902年，直隸總督兼北洋大臣袁世凱響天津創辦中國最早嘅公立女醫院北洋女醫局。1905年金雅梅先後在成都、上海等地行醫。1907年金雅梅嚟到天津，應聘出任北洋女醫院院長，之後更建立北洋公立女醫局附設北洋女醫學堂，培訓咗唔少中國女醫護人員，真係女權先鋒。袁世凱創立公立女子醫院，提倡女性學醫，應該冇乜人會講，因為袁世凱本身係一個出賣光緒皇帝嘅大奸鳩。

3月7號，財政部嚴禁民間私發獎券，即係唔俾你賭外圍啊。同日，國民黨中正會決定設立蒙古地方自治政務委員會，派何應欽（1890-1987）、趙戴文（1867-1943）為政府指導長官。3月10號，「首都各界抗日救國會」 決定嚴懲仍然販賣「讎貨」嘅商家，「讎貨」 即係日本貨，有仇不共戴天，嚴懲嘅意思，亦係可以超出法治之外、不受法律所約束。3月11號，蔣Sir命令四路司令對中共中央蘇區發動總攻擊，剿共進入殺戮高峰期！3月12號，世界文化合作院派莫維德來華，幫助國民政府改革職工教育及中小學教育等範疇；同一日，外交部嚴重抗議日軍喺天津越界演習。3月13號，法國150多名武裝人員侵佔雲南省建水縣峨哈寨，日本人有日本人大搶，法國人有法國人慢慢啄。

今個月，有司徒慧敏（1910-1987）、袁牧之（1909-1978）等人發起嘅電通電影公司喺上海成立，以左翼文化工作者為核心嘅電通電影公司先後拍攝咗《桃李劫》、《風雲兒女》、《自由神》及《都市風光》四部電影，其中1935年拍攝、由田漢（1898-1968）編劇、許幸之（1904-1991）導演，袁牧之、王人美（1914-1987）、顧夢鶴（1904-1991）領銜主演嘅《風雲兒女》，當中嘅電影主題曲就係《義勇軍進行曲》，亦即係今日中華人民共和國嘅國歌。1935年，電通電影公司因為政治不正確，比國民政府壓制，被迫執笠。而司徒慧敏響新中國成立後，曾經擔任中華人民共和國文化部副部長、文化部技術委員會主任及中國電影家協會副主席。而袁牧之1938年到延安，創建延安電影團，編導了大型紀錄片《延安與八路軍》，內戰時期參加了東北電影製片廠（今長春電影製片廠）嘅創建同領導工作，之後成為中華人民共和國建國後任文化部首任電影局局長。反右運動及文革中被迫害，下放到湖北丹江五七幹校。

#常威 #蔣介石平反系列  #中日戰爭 #民國歷史 #佛經抄寫員

❤【常威近代史】第一部《大清亡國關慈禧蛋牛治》，全面開放，免費下載， #freedownload！

Free下載連結🔽

https://play.google.com/store/books/details?id=C3hjDwAAQBAJ