大清亡國關慈禧蛋牛治 3

10月11號，第一次全國慈幼領袖會議喺上海開幕。10月14號，中國政府同美國政府關於白銀問題嘅換文發表，國民政府表示不禁止白銀出口，改行徵稅。同一日，財政部命令各關務處自今日起加徵白銀出口稅，規定銀本位淨徵7.5%，大條銀寶及其他銀類加徵7.75%，多0.025%，加上原本嘅出口稅2.5%，一共為10%，財政部同時命令關務處轉總稅務司及各關稅務司一體遵照辦理，劃一收10%，要搬錢（白銀）走都得，加錢囉！流失外匯，往往都係一個國家要面對嘅最大問題，入金多出金，就可以長久玩落去，當出金多過入金，就會好快玩完，道理亦都相當簡單清楚，明白入金出金嘅問題，就可以更能夠清晰瞭解每個現象，尤其是喺政治現象。好多事唔明點解會發生？就係冇清楚背後嘅金錢遊戲規律。屌！個世界唔係講錢嘅，個世界係講公義同大愛嘅，你要信，我都冇辦法。

可以咁樣講，響社會為你建立嘅遊戲規則同框架之中，自訂自己嘅遊戲規則，其實係可以嘅。正如你覺得唔著泳褲去公眾泳池游水係正確嘅，都冇問題！不過如果你唔著泳褲去公眾泳池游水，就會俾人望住，評論你條賓周嘅大細，亦會俾警察拉，仲可以起訴你公眾場所行為不檢，判你罰款判你坐監。人類畢竟係社會性嘅集體動物，只能夠喺既定框架內進行「獨立思考」同「價值判斷」，圍爐取暖一定要人多，你唔滿意個社會同既定框架嘅話，可以哩入深山做自耕農自食其力，不過能否繼續生存落去就係個人能力嘅問題了。

好多時候，自己點樣諗或者自己以咩立場去觀察呢個世界，純屬個人選擇。畢竟外在客觀世界現象的確難以用個人能力去改變，反而自己點樣諗就隨時可以改變，世界不會遷就你，要自己遷就世界。打波先嚟落雨，冇辦法改變，但係點樣喺雨中打波先開心先識笑，都係自己揀。相信明白就明白，不明白就永遠不明白。

#常威 #蔣介石平反系列  #中日戰爭 #民國歷史 #佛經抄寫員

【常公子歷史頻道470回：黃金十年系列之 雙雄並起】

♊ 今集Youtube講雙雄並起，講嘅係蔣介石同毛澤東，二人對中國近代史影響極深嘅人物，因為佢兩個嘅鬥爭，展現咗整個中國近代史嘅基本格局，影響力直至今日都冇改變過。歷史本身由人所構成，歷史其實就係敘述人嘅歷史，我好相信，人嘅性格係會改變歷史行走嘅軌跡，當然所講嘅人，並唔係普通人，而係喺權力巔峰上嘅人。毫無疑問，蔣介石同毛澤東，就係呢種人。

♈蔣介石同毛澤東活於一個變革嘅大時代，滿清王朝倒臺之後，中國需要找尋一條新嘅出路，當時嘅中國處於大分裂時代，國力積弱，落後於其他國家，如何去挽救中國？如何令中國變得更大一統更強大？相信就係蔣介石同毛澤東兩人畢生所奮鬥嘅目標。響同一個夢想面前，兩個人採用不同的方法去挽救中國，最後兩人變成生死相搏嘅敵人，代表住兩種唔同嘅意識形態作鬥爭，勝利者係邊個？相信大家都知道。

♍蔣介石同毛澤東，都被後世人稱呼為獨裁者，採取威權統治。但係在亂世，唔採用威權統治，唔行獨裁政策，根本冇可能統一國家，國家未能夠統一，貨幣未能夠統一，又如何可以發展國力同經濟呢？其實所謂中國（清帝國），響1900年八國聯軍入京後已經壽終正寢，之後嘅50年係一個大分裂嘅時代，中國分裂成多個碎片勢力，分分合合，來來回回，情況同唐代覆滅之後嘅「五代十國」時代非常相似，亦同元朝衰落後過渡至明朝非常相似，湊巧嘅係，通常呢類大分裂時代，大概都係半個世紀五、六年左右，歷史本身，的確存在驚人嘅相似性。

🎦https://youtu.be/1A0F-JDpNf0

［常威近代史］第六百八十回 25000里長佂開始（高清錄音版）

#唔鍾意睇字可以聽

https://fb.watch/cPtAssSHPV/

時間線進入1934年11月，11月1號，導淮工程喺淮陰楊莊開工。今日亦都係中國童子軍總會成立的大日子，蔣Sir任會長，戴季陶（1891-1949）任副會長。今日全國考銓會議亦喺南京召開，到11月5號閉幕，擬定關於公務員保障等95條法案。1934年11月1號，立法院亦都通過《中華民國刑法》。11月2號，南京婦女救濟會對11月1號通過嘅《中華民國刑法》表示抗議，立法院三讀通過《中華民國刑法》修正案，當場旁聽嘅南京婦女救濟會代表即刻要求修改第239條，該條刑法嘅內容係「有夫之婦與人通姦者，判兩年以下有期徒刑，其相奸者亦同」，婦女團體認為依條法例明顯表現出男女不平等。11月11號，上海婦女團體亦都召集大會提出抗議，並通電全國婦女一致聲援，11月14號，國民黨決定將該條款交由立法院覆議。

11月6號，郵電部決定廢除郵包轉口稅，國內互寄之郵包不需要再送往海關檢驗。今日，招商局「嘉禾」輪由廈門前往汕頭途中被打劫，3個人被綁架，2個警員被殺，搭下船嗻，都會俾人綁架，真正無法無天。11月7號，國民黨向美國訂購道格拉斯（Douglas）同弗力提式（Fleet）飛機52架，絕對會係一張大訂單。11月11號，錢塘江大橋開工，11月13號，不停破偽鈔集團，捕獲7人並且搜出大量偽鈔，當時中國，貨幣五花八門，防偽技術應該亦唔成熟，印假銀紙，相信絕對係大生意。

11月13號，報業鉅子，上海《申報》總經理史量才（1880-1934）喺杭州返回上海途中遭伏擊身亡，享年54歲。史量才自1908年起開始擔任《時報》主筆，1912年，史量才同張謇、趙竹君、應德閎等五人合股接辦上海《申報》，史量才出任總經理，1915年，其他人退股，史量才獨自經營。1930年，《申報》成立總管理處，邀請著名教育家陶行知（1891-1946）任顧問，黃炎培（1878-1965）、戈公振（1890-1935）猛人助陣，1932年《申報》發行量達到15萬份，成為國內最受歡迎嘅報紙。此後，史量才又買下《時事新報》、《新聞報》等大部份股權，成為上海報業大亨，《申報》以言論自由著稱，因此亦得罪好多人。史量才當日同佢個仔嘅同學、司機3人遇害，佢個仔僥倖逃脫。11月14日，《申報》刊出《本報總理史量才先生噩耗》，全國嘩然，全國各地紛紛舉行追悼會。1935年3月15日，追查案件嘅魯滌平（1887-1935）身亡，案件亦成為千古懸案。1936年，史量才葬於杭州天馬山、吉慶山麓。章太炎親撰《史君墓志銘》：「史氏之直，肇自子魚。子承其流，奮筆不紆。」、「唯夫白刃交胸，而神氣自如。」。

#常威 #蔣介石平反系列  #中日戰爭 #民國歷史 #佛經抄寫員

【常公子歷史頻道471回：黃金十年系列之 銀紙一係印返嚟 一係搶返嚟】

♊ 以前唔明白銀紙究竟係乜嘢？後來漸漸明白，銀紙所代表嘅係一種權力，係由權力衍生出嚟嘅價值。本來銀紙係代表了某一啲貴重事物嘅「票據」，例如黃金或白銀，每張銀紙理論上可以兌換到相同價值嘅黃金或白銀，即係所謂「金本位」或「銀本位」，發行銀紙嘅機構（例如銀行），理論上背後應該有同發行銀紙（即貨幣）相同價值嘅黃金或白銀儲備，即係話，理論上攞住一張100美元嘅銀紙去銀行，係可以換返價值100美元嘅黃金或白銀在手。理論上應該是這樣，一切比較公平嘛。

♏不過，「金本位」或「銀本位」到今日已經完全不存在。現在我們手握嘅銀紙，背後其實沒有任何有價值嘅嘢support，也不能兌換任何有價值的東西。或者，銀紙本身就係其「價值」所在，銀紙作為一種「票據」形式存在，本身已經超越咗「票據」嘅內容而成為另一種存在。或者又可以咁樣講，銀紙背後所代表嘅係一種「信用」，你根本相信銀紙本身嘅購買力，不在於佢背後所代表嘅「價值」，而只係你相信銀紙本身有「價值」存在。

♉至於為什麼你會相信銀紙本身有「價值」存在？這就是信心的問題，如果你不知道我在說什麼？那麼我再問你另一個問題，為什麼你會相信「美圓」比「菲律賓披索」穩陣？為什麼你願意keep「美圓」多於keep其他貨幣？這就是信心嘅問題，對於一隻貨幣嘅信心，與貨幣屬於那個國家嘅國力成正比。

🎦https://youtu.be/N1-ohhzU7RE

［常威近代史］第六百八十一回 報業鉅子史量才被刺身亡（高清錄音版）

#唔鍾意睇字可以聽

https://m.facebook.com/story.php?story_fbid=pfbid0eeVLjnh5c8MD1evQDs6oUrYTq81QdNesCjKWbfkJdCFjWNBj63BjXxB3T3D7Q7YAl&id=100063598605373

【常威近代史】（六百八十二回）
有哲學 未必有哲學史

1934年11月15號，偽滿洲國齊黑鐵路通車，全長800公里，由齊齊哈爾去到黑河。11月16號，天津市改為特別市，自治權力更大。8月18號中國會計學社成立，11月19號，8家火柴廠喺上海合組大中國火柴股份有限公司，當時火柴係大生意，因為打火機未發明或未普及，中國嘅火柴市場，長時間被日本人壟斷，國貨要急起直追，同日，中國天文學會發起組織嘅日蝕觀測委員會喺南京成立。11月20號，江西省政府劃瑞金、石城等6個縣為特別行政區，並擬定《施政建設綱要》，瑞金本來係中共蘇區中央嘅根據地，現在紅軍撤離蘇區長征，重新建立新根據地，南京政權要重新接管番。21號，南京舉行防空大演習，並實行燈火管制，似乎春江水暖鴨先知，有人已經為中日全面戰爭爆發作出預備，1934年11月，距離中日全面戰爭爆發剩下不到三年時間。

11月23號，東北通郵談判，中日雙方代表達成通郵大綱9條。11月24號，抗日名將吉鴻昌（1895-1934），原察哈爾抗日同盟軍總司令響北平就義。吉鴻昌喺組織哈察爾抗日同盟軍失敗後，避居天津，今年春天加入中國共產黨，今個月9號，吉鴻昌喺天津法租界國民飯店遇刺，受傷後被送入法國天主教堂醫院，11月10號受到法租界工部局嘅審訊，11月14號被引渡畀國民政府，被關押天津陸軍監獄，之後被押至北平，最後慘遭殺害。慷慨就義前，吉鴻昌以手為筆喺地上寫上絕命詩，詩曰：

『恨不抗日死，留作今日羞。國破尚如此，我何惜此頭。』

11月25號，華北日軍集結唐山、灤（音聯）州地區，舉行大規模軍事演習，堅打之前，當然要做好熱身動作。11月27號，蔣Sir、及汪精衛提出中央與地方職權5項標準。同一日，紅軍主力，強渡湘江，與國軍發生激戰，這一役紅軍損失慘重，一共折損35000人！今個月10號，蔣Sir國軍攻佔瑞金，從中共中央機關殘存嘅文件中，查明洪軍西征突圍嘅意圖同路線。於是蔣Sir立刻命令何鍵（1887-1956）倚仗湘江天險設防，蔣Sir咁講：「期於湘水以東地區，將匪撲滅」，而西征紅軍負重行軍，因為帶齊所有嘢突圍，單單是中央縱隊就長達10多公里，到達湘江東岸嘅時候，湘軍已經全部佈防完畢等緊你，紅軍再沒有選擇餘地，只能從界首鎮強行渡江。27號晚上，紅軍第1、第3軍團開始渡江，其餘大部分喺東岸待渡，蔣Sir下令向紅軍發動總攻擊，湘軍、桂軍、中央軍40萬大軍從南、北、東三個方向圍剿紅軍，雙方爆發激戰，戰況慘烈無比，最後紅軍付出慘重代價才能夠繼續渡江西進，依一役，雖然紅軍元氣大傷，但紅軍仍未被完全撲滅，有燈更有人。

11月27號，清華大學教授馮友蘭等11人喺北平被捕，罪名當然係叛國及勾結共產黨，馮友蘭（1895-1990）係一名偉大嘅中國哲學家，亦係中國哲學史家，被分類為新儒家學派其中一員。1895年12月4日馮友蘭生於河南省唐河縣祁儀鎮，馮氏係當地望族，絕對係有錢人，幼年時喺屋企接受教育，1910年入唐河縣立高等小學預科。1911年入開封中州公學中學班。1912年轉入武昌中華學校，同年冬入上海中國公學大學預科。1915年考入北京大學法科，入校後即改入文科中國哲學門，1918年畢業，任教於開封中等技術學院。1919年與友人創辦《心聲》月刊，同年考取公費留學資格，赴美國留學。1920年1月考入紐約哥倫比亞大學哲學系，師從杜威（John Dewey，1859-1952），又係佢，又係哥倫比亞大學。1923年論文答辯通過，次年博士論文出版後獲哥倫比亞大學哲學博士學位，馮友蘭博士論文嘅題目係《天人損益論》。

1923年馮友蘭歸國從事哲學教學工作，1928年任清華大學教授兼哲學系主任，翌年再兼任文學院院長。1931年和1934年佢最重要嘅著作《中國哲學史》上下兩卷出版，大力推崇儒學在中國哲學史上嘅正統地位。亦可以咁樣講，因為有馮友蘭，中國先有屬於自己中華民族嘅哲學史。1934年馮友蘭被捕，係因為佢獲邀出訪捷克及蘇聯，回國後分別就蘇聯見聞及歷史唯物主義作兩次演講，因此觸怒國民黨當局，但不久即獲釋。事後不久馮友蘭即加入國民黨，並與1935年當選中國國民黨第五次全國代表大會代表。1937年中日戰爭全面爆發，馮遂隨清華大學遷往雲南，任職於西南聯大，仍為哲學系教授兼文學院院長。1949年中華人民共和國成立，馮友蘭於1950年被派往農村參加土改運動工作。1952年馮友蘭被調至北京大學哲學系。1966年「文化大革命」開始，馮友蘭曾經被關入「牛棚」，1976年四人幫失勢，梁效力嘅寫作班子遭徹底清算，馮亦遭長時間關押審查，晚年被釋放，於1990年11月26日20時45分病逝於北京友誼醫院，享壽95歲。

11月29號，王正林（1912-？）喺無錫創出全國3000公尺賽跑10:02:4嘅新紀錄；同一日，立法院通過《刑事訴訟法》以及公佈《戒嚴法》，11月30號，蔣Sir下令保護全國古物。今個月，上海市立植物園開放，為國內最大嘅公共植物公園，陳毅（1901-1972）喺中共中央蘇區分局會議上，提出紅軍全面轉入遊擊戰爭；教育部亦係今個月制定實施義務教育五年計劃。

1934年11月焉然結束……

#常威 #蔣介石平反系列  #中日戰爭 #民國歷史 #佛經抄寫員

［常威近代史］第六百八十二回 有哲學未必有哲學史（高清錄音版）

#唔鍾意睇字可以聽

https://fb.watch/cW4baJmfL7/

【常威近代史】（六百八十三回）
叉開一筆講越南船民

時間線進入1934年嘅12月，12月2號，上海獅吼劇社成立。12月3號，偽滿洲國民政部發佈《集團部落建設》文告，開始大規模進行民眾歸屯併戶工作，實施製造無人區同「集團部落」嘅既定方案。乜嘢叫做「集團部落」呢？其實簡單啲嚟講，就即係集中營（concentration camp），以強制手段將民眾聚集其中居住生產，集中管理，不過換咗個名，「集團部落」個名亦好有公社feel大愛feel，真係入去先知咩料架？

滿洲國嘅「集團部落」四周圍築有三米高左右嘅高牆，場內設置木柵和鐵絲網，牆上每隔100米設置一個炮樓，整個部落祇有一個大門畀居民出入，而且出入都要登記掛號bee安心。情況亦都好簡單，居民係唔可以任意離開，如果想偷走，炮樓上邊嘅軍人就會用機關槍掃射你！直至你不能離開為止，又因為規定居民種地耕田唔能夠遠離部落太遠（怕走失），因此造成遠處土地大片荒蕪。而大多數部落內糧食奇缺，居民住房大多數為臨時建造，簡陋不堪，唔少部落居民更加住喺地窖，結果造成大批老人同孩子病死、凍死或餓死。1935年年底，奉天、安東、吉林、濱江等省已經建立集團部落近1200個，去到1939年，集團部落數目增加至13400個。假設每個「集團部落」有100人，都成過百萬人，真係唔講你唔知，原來除咗納粹德國，偽滿洲國都玩集中營依一招。

叉開一筆，其實係咪所有集中營都係十惡不赦嘅呢？將住民因某種目的或埋由而集中聚居管理，1953年12月25號聖誕節石硤尾木屋區大火，50000人一夜之間無家可歸，之後港英政府原地興建臨時徙置區安置合資格災民，因而產生咗香港之後偉大嘅、享譽國際嘅、啟發咗往後全世界無數執政者嘅公共房屋建設計劃。最初嘅「臨時徙置區」，其實都係一個集中營概念；講到呢度，我實俾人屌呢個比喻不知所謂。不過，80年代初期，作為第一收容港香港為咗安置北漏洞拉越南船民而建設嘅難民營，相信就係集中營嘅一種，營內限制出入限制燈火限制個人自由，咁仲唔係集中營？但係同一把劍，可以傷人亦可以救人，香港實行咗十幾年嘅越南難民營措施，就幫咗唔少越南船民改變命運，當中有唔少越南船民移民美國及歐洲，亦有一部分無聲無息融入香港社會成為香港人構成嘅一部分，當然我亦相信有部分當年千辛萬苦逃離越南嘅船民，之後又回歸越南嘅懷抱再次富起來。

【常公子歷史頻道472回：黃金十年系列之 蔣介石挾軍權入選中常委】

♊ 並沒有什麼想寫下，今集評論撂筆，請大家細心欣賞Youtube。

🎦https://youtu.be/XoZi1ypkMVs

💚【我奮鬥不奮鬥】 常公子 楊熙合著
電子書下載⬇ https://play.google.com/store/books/details?id=CVo3EAAAQBAJ
Kindle版下⬇
https://www.amazon.com/dp/B098XHWTDK

實體書訂購⬇
https://www.382now.com/product?id=325

［常威近代史］第六百八十三回 叉開一筆講越南船民（高清錄音版）

#唔鍾意睇字可以聽

https://m.facebook.com/story.php?story_fbid=pfbid0R5jxki94zRt83ZogAcit1KU93k2tL2wMmz55KrNggriH64zFnkNZxNAN5zUdZ5FZl&id=100063598605373

【常威近代史】（六百八十四回）
大愛平等瀨依芙

1934年12月16號，日軍喺天津八里台建築嘅飛機場完工，詭稱為「體育場」，飛機場扮體育館？真係咁都得？睇嚟日本人已經做好準備，隨時預備正面攻打中國，戰爭嘅嘢，唔係響酒吧同人爭執，話開拖就開拖嘅，其實要做一連串嘅事前功夫同思想工作，同埋要醞釀一段相當長嘅時間，響其他方法冇辦法解決問題後，先至採取嘅最後解決手段。好似2022年嘅俄烏戰爭，並唔係突然發生嘅，戰爭嘅原點係2013年至2014年烏克蘭發生嘅抗爭運動，歷時接近一年反政府示威，演變成震撼國際嘅流血革命。（詳情大家可以睇Netflix嘅Winter on fire），差不多接近10年前發生嘅一場顏色革命，先至衍生到今日嘅俄烏全面戰爭，因果相承。當年中日全面戰爭，其實原點就係1895年發生嘅甲午戰爭，前前後後，都拖咗30-40年先正式上映！

同一日，中華民族學會喺南京成立，以研究中國民族問題及文化為宗旨，意識形態工作，進一步鞏固「中華民族」呢個概念嘅根基。乜嘢係中華民族？就係包括漢、滿、蒙、回、藏五族在內，所以滿洲人嘅東北，係中華民族嘅一部份，即係中國嘅一部份，即係南京蔣Sir中華民國政權嘅一部份，係唔可以分割嘅，understand？

偽滿洲國個「偽」字，就係咁解。當然領土完整係大一統嘅基礎，一個國家領土可以隨意被分割，咁個餅就會越做越細，國力就會愈嚟愈弱，講嚟講去，其實又係「一支竹仔會易折彎」嘅老問題。又再提一次，你當然可以問點解一個國家要強大？真係麻煩你唔好再問，點解考DSE要摘星5**？點解香港大中文大學醫學院要收DSE高分嘅同學？精英制度梗係仆街，咁你想你嘅仔女入大學醫學院讀醫？抑或去旺角行蠱惑？點解？點解？其實唔使解。中國儒家哲學講人性本善，話每一個人都有向善嘅本質，至少有向善嘅傾向，即「所以謂人皆有不忍人之心者，今人乍見孺子將入於井，皆有怵惕惻隱之心」。計我話，人有向善嘅傾向就未必，但係人一定有向上向好嘅傾向，每個人都想變強變聰明變富貴變靚D，因為呢個係生物學進化論嘅問題，本身唔係道德問題，亦唔係形而上學、哲學嘅問題，而係科學嘅問題。國家係由人所組成，所以推論任何一個國家都有變大變強嘅傾向。

我呢種講法，預咗比人小。過氣啦收皮啦死老鬼，新一代係無所謂無所為，大愛躺平，笑看風雲變。活響有奴隸為你生產、且豐衣足食嘅溫室中暢談共產主義暢談大愛暢談平等，馬克思在生嘅時候，就成日嘲笑依種人，佢哋個中文名叫做：瀨依芙。

［常威近代史］第六百八十四回 大愛平等瀨伊芙（高清錄音版）

#唔鍾意睇字可以聽


https://fb.watch/d0iS1qoQAI/

【常公子歷史頻道472回：黃金十年系列之 陳獨秀上海失蹤】

🎦https://youtu.be/hL-NSvfrVYU

💚【我奮鬥不奮鬥】 常公子 楊熙合著
電子書下載⬇ https://play.google.com/store/books/details?id=CVo3EAAAQBAJ
Kindle版下⬇
https://www.amazon.com/dp/B098XHWTDK

實體書訂購⬇
https://www.382now.com/product?id=325

【常威近代史】（六百八十五回）
遵義會議

時間線進入1935年，1935年1月1號，蔣Sir宣佈今年為「新生活運動年」，蔣Sir一手推動嘅「新生活運動」邁入高潮，日本人嘅侵略近在眉睫，「先安內，後攘外」戰略亦初步達成，全國總動員嘅時間亦相當接近，總動員之前，統一思想係重中之重，意識形態操作係最重要，否則全部人係二五仔古惑仔騎牆派漢奸或間諜，仲駛打仗嘅？熟知兵法嘅人都明白，真係不在乎敵人有幾強大，只在乎自己身邊有幾多豬隊友？豬隊友尚可以接受，身邊太多二五仔就大很鑊，因為敵人唔使打你自己都會自爆收場。戰爭狀態有戰爭狀態嘅玩法，重提一點，所謂戰爭狀態未必真係真刀真槍拳來腳往，好多時候，身處戰爭狀態其實好多人都未知道真相，今日嘅世界，無可否認，早已經進入戰爭狀態中了，如果你覺得唔係，就係你嘅問題。

1月2號，汪精衛建議喺南京設置貧民住宅區，預計將可容納15萬人，睇嚟亦係為全面戰爭作出準備。1月6號，胡適喺香港大學接受名譽博士學位，並作出《新文化運動與教育問題》演講。1月8號，南苑機場舉行為北平市民所贈嘅5架飛機命名典禮，依一邊中華民國四圍籌錢買飛機，嗰一邊大日本帝國，大概三菱牌零式戰鬥機已經進入大規模生產狀態，未來幾年將會雄霸整個太平洋及亞洲嘅天空。

1月10號，內地與東北正式恢復通郵，可以寄信去偽滿洲國，偽滿洲國亦可以寄信去南京。1月11號，北平故都文物整理委員會成；同一日國民政府任命蔣Sir兼任陸軍大學校長；亦係同一日，重慶地方銀行發生擠提風波，群眾大規模逼去銀行兌現，單單就有6個人被踩死，15個人受傷，人心惶惶，可見一斑。1月12號，賑委會統計去年全國災情，受災嘅一共有25個省，總計652個縣受水旱災害。同一日，華北規模最大嘅紗廠天津裕元紗廠因為資不抵債，宣告停工清理，重整債務，令到2300人失業。

1月12號，南昌行營駐川參謀團主任賀國光（1885-1969）等一行200幾人抵達四川重慶。四川喺20年代初期形成軍閥多頭割據嘅防區式格局，其實已經亂左10幾20年，南京政府建立之後，四川各派軍閥表面服從，實際上卻擁兵自重，所謂山高皇帝遠，蜀道難難於上青天，各派軍閥不斷排斥國民黨勢力，國民黨中央黨部曾經多次圖謀派人入川建立基層「堡壘」，擴展中央勢力，但係四川軍閥又點會比你咁做？因此去到30年代初期，四川全省祇有國民黨黨員77人，你冇聽錯，只係77個，100兩友都冇，其實都幾陰公，你話四川係南京政權所控制？真係冇人信。去到1933年，四川軍閥繼續混戰，蔣Sir乘機支持劉湘（1890-1938）統一四川，跟住不委任劉湘為「四川剿匪總司令」，率領軍隊阻擋紅4軍進入四川建立根據地，但係結果係失敗嘅。1934年11月17號，面臨兵潰、財竭、內訌危機嘅劉湘親自前赴南京，向蔣Sir求救，蔣Sir跟住就派先遣隊參謀團入川，一方面救劉湘，另一方面就要接手四川政局。

1月14號，教育部規定以《新生活運動綱要》，為各大、中、小補充教材，現代香港人嘅術語，就叫國民教育。1月15號，中共中央喺遵義「柏公館」召開政治局擴大會議，出席會議嘅有毛澤東（1893-1976）、朱德（1886-1976）、陳雲（1905-1995）、周恩來（1898-1976）、張聞天（1900-1976）、博古（秦邦憲，1907-1946）、王稼祥（1906-1974）、鄧發（1906-1946）、劉少奇（1898-1969）、凱豐（1906-1955）、林彪（1907-1971）、聶榮臻（1899-1992）、彭德懷（1898-1974）、楊尚昆（1907-1998）、李卓然（1899-1989）、李富春（1900-1975）、劉伯承（1892-1986）、李德（1900-1974）、伍修權（1908-1997）、鄧小平（1904-1997）一共20人，真係粒粒天皇巨星。

博古首先作出「主報告」，強調敵軍太過強大，係今次第五次反圍剿戰失敗嘅主要原因，之後周恩來作出「副報告」，承認「三人團」（即係佢自己，李德同博古）軍事指揮上嘅失誤，主動承擔責任。其後張聞天、毛澤東相繼發言，批駁博古嘅論點。毛澤東指責其「先是冒險主義，繼而是保守主義，然後是逃跑主義」，博古、德藉軍事顧問李德嘅地位喺指責聲中，應聲落馬！「三人團」中，只有周恩來保住地位。經過3日嘅討論，決議指出李德同博古應該負上軍事領導錯誤嘅責任，取消其軍事指揮權，增選毛澤東為政治局常委，不久，則由毛澤東、周恩來、王稼祥組成新三人軍事小組，而響遵義會議，毛澤東更加成為中共實際上嘅最高領導人，重奪所有權力。呢次會議，係毛澤東一生事業嘅轉捩點。當其時，中共同紅軍已經五癆七傷，如果有人話佢哋知14年後佢哋會統一中國，相信當時都冇人會相信，不過有燈便有人，毛澤東領導下嘅中共，將會喺未來發光發熱，排除萬難，響14年後1949年建立中華人民共和國！開天闢地！

#常威 #蔣介石平反系列  #中日戰爭 #民國歷史 #佛經抄寫員

［常威近代史］第六百八十五回 遵義會議（高清錄音版）

#唔鍾意睇字可以聽

https://m.facebook.com/story.php?story_fbid=pfbid0cBeUP3tshLHn6qSSVTjRA7JYGbrcbcHrSxBRBgkJZWgMtqUJXyGGoR8w8vwyVz4cl&id=100063598605373

【常威近代史】（六百八十六回）
中國百年動盪之源頭

1935年1月15號，毛澤東響遵義會議上重奪權力，重新領導中共展開25000里長征，深入不毛腹地，重新建立紅軍根據地，響蔣Sir眼中，「第五次圍剿」取得全面勝利，紅軍實力，十去其九，只剩下星星之火，非常可惜，蔣Sir對中共嘅頑強同毅力顯然判斷錯誤，星星之火，好快亦會燎原，捲土重來，最後亦會反噬其身。

1月15號，國軍29軍與偽滿軍喺察東發生衝突，同日，《中國實業》月刊喺南京創刋；上海農會、商會分別呈請財政部及實業部，要求增加洋米、洋麥進口稅，以挽救農村，依一個基本上係永恆矛盾嘅問題，亦係一個永遠都解決唔到嘅嘛問題。1月16號，撫順煤礦2300幾名工人舉罷工，爭取更好待遇。1月17號，漢口公安局為提高警察防盜技術，於今日舉行咗大規模嘅「抓賊練習」活動，其時社會動盪，盜賊如毛，到處都係匪，好難拉得哂。1月19號，就有一個悍匪劉桂堂搶劫燕山口、界嶺口兩稅卡，打劫征稅部門，真係無法無天。1月21號，中國、意大利兩國無線電通訊正式開通。

1月22號，蘇聯同日本（即係偽滿洲國）就出售中東鐵路達成協議，蘇聯將中東鐵路路權作價1.4億日圓售與偽滿洲國（附帶一提，當年日圓相當值錢）。蘇聯、日本、偽滿洲國之間為中東鐵路路權嘅談判一共傾咗40輪，歷時一年半，到今日終於達成協議，蘇聯除咗收1.4億日圓袋袋平安外，偽滿洲國亦都要負擔蘇藉職員退職嘅津貼，即係加埋畀遣散費。協議確定由日本外務省歐亞局第一課長西春彥、蘇聯遠東部長柯資羅夫斯基、偽滿洲國外交部次長大橋忠一（1893-1975）組成起草委員會，草擬中東鐵路買賣協定。睇到依度，你咪以為偽滿州國同蘇聯好friend，一單還一單，sold鐵路收錢係一單，同你friend係另一單。去到1935年，關東軍並唔單單滿足於滿洲成為一個獨立國家，當然偽滿洲國普遍唔受國際社會承認係一種巨大壓力，但係關東軍除咗建立滿州國之外，佢哋仲企圖將華北喺國民政府嘅影響力中分離出嚟，即係攞晒成個關外東北地帶嘅控制權，但係咁樣做，就要面對一個事實——就係直接面對蘇俄呢個實力龐大嘅共產主義國家。喺當時關東軍嘅戰略部署上，佢哋亦有動員25-30軍力攻打蘇俄、速戰速決嘅想法。祇不過，打大灰熊打去莫斯科真係唔係咁簡單，當年拿破崙都打唔贏，後嚟希特拉都打唔贏，唔通到當日日本會打得贏？

1月24號，國民黨中常會規定新聞傳媒機構不得宣傳與三民主義不相符嘅其他主義，簡單啲講，就係唔可以宣傳共產主義，人頭落地嘅。1月28號，財政部宣稱廢除苛捐雜稅種類已達2600餘種，2800萬元。1月29號，中央紅軍首渡赤水；同一日，偽滿洲國外交部宣稱：「滿洲國」境內吸食鴉片人數達到90萬人，年耗鴉片約1642噸，另外吸食其他毒品亦有21萬人，即係國內有過百萬人追龍（我相信今日香港都有十零廿萬人追龍），1932年滿洲國建立時總人口有3400萬人（以人口計算，其實係當時世界上一個大國），當中漢人佔83%，滿洲人與蒙古人合計佔15%，日本人朝鮮人佔2%。即大概34個人中，有一個吸毒，呢個比例，相對於當時中國其他省份應該係比較低，不過100年數字固然唔可信（難道今日嘅數字又可信？），另外鴉片毒品問題始終係當年最嚴重嘅社會問題。中國百年動盪，其實源頭就係大英帝國輸入鴉片而生，呢個講法，我從前唔100%相信，抄寫咗咁耐近代史，我話畀你知，其實係真相，珍珠都冇咁真。

1月31號，旅日華僑被逐回國已達30批，一共239人。今日，由蔣Sir口述，陳布雷筆錄，署名徐道鄰嘅《敵乎？友乎？——中日關係之檢討》發表，引起廣泛注意。蔣Sir的確想避免中日發生全面戰爭，明眼人都知道，以當時國力比較，其實完全冇得打！不過亦係因為實力非常懸殊，所以戰爭終難避免。情況亦都係咁，點解夠膽打你？因為大隻過你囉。明白呢個道理，先可以明白所謂國際外交關係係乜嘢？

今個月，河南省教育廳推廣部主任樊粹庭（1905-1966）同演員陳素真（1918-1994）組織學社，響鄭州豫聲劇院開始對豫劇嘅革新。樊粹庭針對舊戲班組織散渙、作風不正、迷信色彩濃厚等弊病，將演員集中訓練，革除陳規陋習，制定新嘅規章制度，包括禁止豫聲劇院後臺供奉莊王爺，樊粹庭對演員講：「我就是裝王爺，以後大家有什麼問題就找我，我來解決。」，樊粹庭改良舊劇，喺舞臺美術，表演藝術上對豫劇改革良多。

本月，稱雄國內嘅天津私立國術體育專科學校籃球隊，組成南洋旅行團前赴東南亞作友誼觀摩比賽，團員包括被稱為「天津五虎」嘅唐寶堃（1910-1988）、李震忠、高長明、劉振元同尹鴻祥。佢哋去到新加坡、馬六甲、菲律賓等地方比賽，表演賽亦都經常打贏，團員們訪問期間，受到大富翁陳嘉庚（1874-1961）嘅捐贈，亦同獲得馬來西亞國王同英國總督嘅接見。

1935年1月焉然結束……

#常威 #蔣介石平反系列  #中日戰爭 #民國歷史 #佛經抄寫員

❤【常威近代史】第一部《大清亡國關慈禧蛋牛治》，全面開放，免費下載， #freedownload！

Free下載連結🔽

https://play.google.com/store/books/details?id=C3hjDwAAQBAJ

［常威近代史］第六百八十六回 中國百年動盪之源頭（高清錄音版）

#唔鍾意睇字可以聽

https://fb.watch/d5XjHISG2v/