大清亡國關慈禧蛋牛治 3

【常威近代史】（七百一拾七回）
周恩來張學良見面

時間線進入1936年嘅4月，戰爭眼看無可避免，或者蔣Sir唔想打，亦知道唔夠打，不過喺形勢上，選擇權亦唔係喺中華民國手上。日本方面，政治局面亦都係立立亂，大約兩個月前，1936年嘅2月26日，日本就發生咗一件「二二六事件」，又稱「帝都不祥事件」，直頭係一場軍事政變，當日上午由磯部淺一（1905-1937）、粟原安秀（1908-1936）等年輕軍官率領嘅，以第1師團嘅第1、第2步兵聯隊為主力嘅1400名士兵軍隊，響首都東京發動咗武裝政變，部隊攻入唔同嘅政府機構，殺害咗內大臣齋藤、財務大臣高橋同埋教育總監渡邊錠太郎（1874-1936），襲擊咗侍從長鈴木同前內大臣牧野，軍人響4日內佔領咗警視廳、陸軍大臣官邸、陸軍省同埋參謀本部，仲一度佔領東京市中心。叛軍係其宗旨書上表明立場，發動政變係要清君側、除奸臣、排軍賊。

然而叛軍並未成功殺害時任首相岡田啟介（1868-1952）和佔領皇宮，佢哋亦遭到幕後高級將領拋棄，加上昭和天皇（1901-1989）對其政變行動感到憤怒等因素，進而導致叛軍無法實現政權替換，最終於2月29日繳械投降。有別於先前數次類似青年軍官刺殺政府要員從輕發落判例，二二六事件中主謀起事者多受處重刑。在歷經一系列非公開審判後，共有19名叛軍領導人物判處死刑，另有40人判監。日本陸軍中「皇道派」勢力就此衰落，日本國內曾一度流行以刺殺方式達到政治訴求嘅活動也就此終止。

你話當時中華民國政治混亂，其實日本都唔可以講笑。去到1936年踏入夏季，其實全世界度度滾瀉屎，經濟蕭條，全球大部份國家陷入水深火熱狀態，一係躺平咁死，一係奮起打一場先死，橫死掂死，睇你點揀嘞？或者更加簡單去睇件事，社會上冇嘢撈，入伍當兵自然亦係最理想不過，有公務員糧出有皇家飯食，時勢差之下，搵食艱難，人嘅要求亦都好簡單，搵份嘢撈吓，至於份嘢撈乜？要做啲乜？其實冇乜關係，出糧嗰個要做乜就做乜囉，否則餓死街頭。衹要唔駛餓死，你叫我殺人放火都可以。有時睇見紀錄片審判啲戰犯，問啲戰犯點解可以埋沒良心做事？我都覺得好奇怪，食唔飽講咩良知呢？好似身光頸靚，衣食無憂，屋企仲要有菲傭去講共產主義，睇怕好難到肉；同樣道理，冇得食去學人講良知，你估拍戲咩？記住，唔係意識決定存在，係存在決定意識。

【常公子歷史頻道497回：黃金十年系列之 歷史分水嶺】

▶我將李大釗之死，作為歷史嘅分水嶺，中國近代史，隨著中國馬克思主義之父李大釗殉難而進入另一個階段，1927年到1937年，將會係蔣介石權傾天下嘅時代，宋家皇朝蔣天下，短短十年之間，建立咗被佢哋稱為「黃金十年」嘅大時代，當然，黃金十年嘅含金量有待商榷，不過，中國的確係進入咗一個比較穩定嘅時代，唔提經濟發展，蔣介石嘅中華民國的確能夠完全融入國際社會嘅大局之中，令中國（或叫中華民國）成為國際社會其中一個重要嘅角色。「黃金十年」仲有一個特色，就係戰爭仍然不斷，以前發生的內戰，民國政府叫做軍閥戰爭，如今發生嘅內戰，先係真正嘅內戰，當中有何不同？其實我並唔清楚。黃金十年裡，先打李宗仁同閻錫山嘅中原大戰，再大規模動員兵力力剿共產黨，最後迎上中日全面大決戰，可謂戰亂未停……

⏩https://youtu.be/XBwFhHZ5EJo

#常威💀 #常威近代史頻道 #黃金十年系列  #民國歷史 #佛經抄寫員

［常威近代史］第七百一拾七回 周恩來張學良見面（高清錄音版）

#唔鍾意睇字可以聽

https://fb.watch/fjb4cAdITa/

4月27號，紅軍第2、第6軍團渡過金沙江。同一日，國聯通過中國常任理事席案，任期一年。中華民國成為國際聯盟（即係聯合國前身）嘅常任理事國之一，都係一種國力上昇嘅表現，當然原因只有一個，就係中華民國向英美靠攏，成為自己友。4月27號，華北實行緝私新法，4月28號，粵漢鐵路全面接軌。今個月，四川旱災，但内蒙古出現數百年前所未有嘅大雪災，平均每日凍死牛羊5至600頭。著名劇作家夏衍（1900-1995）嘅歷史諷刺劇《賽金花》發表，夏衍留學日本，1927年加入中共，響上海從事翻譯同工運工作。1933年中共上海文委電影組成立，夏衍任組長，1934年，夏衍為躲避國民黨搜捕，在一公寓躲藏三個月，並創作出多幕劇《賽金花》，諷刺國民黨當局外交政策，提一提大家，賽金花係交際花。1936年首演，不久被禁。抗日戰爭爆發後，夏衍輾轉各地開展救亡運動，創辦《救亡日報》並堅持了3年多時間。1946年起，夏衍在周恩來領導下響南京、香港等地進行文化統戰工作。1949年，夏衍跟隨陳毅（1901-1972）進入上海，任上海市委宣傳部長等職務。1954年夏衍任中華人民共和國文化部副部長，分管電影與外事工作，1962年佢獲得第一屆大眾電影百花獎最佳編劇。1965年夏衍被免去文化部副部長職務，文化大革命中被迫害，入獄8年。1977年後復出，1979年當選為中國電影家協會主席。1982年進入中央顧問委員會。1994年被國務院授予「國家有傑出貢獻的電影藝術家」稱號。1995年病逝於北京，骨灰撒入錢塘江。

今個月德國醫師海柏特溫奇（1906-1936）落腳西安七賢莊一號院，海柏特係德國猶太人，德國共產黨員，柏林大學牙醫博士，1931年佢比納粹黨徒驅逐，嚟到中國，響上海設立牙醫診所。中共紅軍抵達陝北後，物資嚴重短缺，需要喺上海進行採購，並響西安設立轉運站，美國女作家史沫特萊（Agnes Smedley，1882-1950）得知此事後，就邀請海伯特去西安開診所完成秘密任務，海柏特答應，攜同助手帶同醫療器材同一條叫做「希特拉」嘅狗住進西安七賢莊行醫，一面協助中共運送物資，海伯特後來喺西安事變中不幸遭流彈擊中身亡，享年29歲。

1936年4月到此結束。


#常威 #蔣介石平反系列  #佛經抄寫員 #中日戰爭 #民國歷史

［常威近代史］第七百一拾八回 任何事物都有風水成份（高清錄音版）

#唔鍾意睇字可以聽

https://fb.watch/fn1uOH9NLt/

【常公子歷史頻道498回：黃金十年系列之 四一二之後就要選擇站邊條隊】

▶太平盛世，人不需要選擇站邊條隊？鬥爭未曾尖銳化，是非黑白未分清楚前，可以容納大量嘅中間派騎牆派溫和派或見風使舵派，風向邊擺邊邊，事實上亦都係一般人嘅做法同想法，反正世上能夠緊握宗旨做人嘅，其實先係少數派，極端派。但當社會進入尖銳鬥爭嘅時候，或進入戰爭邊緣，能夠容納中間派嘅空間就會相對急劇收窄，人需要選擇站邊條隊，事後去睇，當然明白邊種選擇先係最理想嘅選擇，但身處其中，往往無法預計未來，歷史係發生咗嘅事情，當所有事情發生之後，當勝負有結果之後，一切當然清清楚楚，勝利者亦會選擇最有利自己嘅「史實」嚟抬高自己，貶低失敗一方，呢個係人之常情，亦係文宣的手法之一……

⏩https://youtu.be/9fE7QKFI6Jg

#常威💀 #常威近代史頻道 #黃金十年系列  #民國歷史 #佛經抄寫員

【常威近代史】（七百一拾九回）
元老胡漢民也走了

時間線進入1936年嘅5月，中華民國繼續風起雲湧。5月1號，關內外貨物實行聯運，今日，立法院通過《中華民國憲法草案》修正案，5月5號，國民政府正式公佈憲法草案。響1932年嘅4月召開嘅國難會議上，關於重新召集國民大會（即國會）及制定憲法的呼聲很高。同年12月，國民黨四屆三中全會指定立法院起草憲法草案，於是立法院成立咗憲法草案起草委員會，孫文之子孫科（1891-1973）為委員長，張知本（1881-1976）、法官吳經熊（1899-1986）為副委員長。1933年6月，張知本同吳經熊各自發表各自嘅「憲法草案初稿」。1934年10月，立法院討論通過咗《中華民國憲法草案》，之後經過國民黨四屆五中、六中全會；五大、五屆一中全會審查，直至今日1936年5月1號立法會通過修正案，歷時3年有餘。自從1911年辛亥革命發生之後，不同內容嘅中華民國始終未有一部比較完整及被全國國民認同嘅完整憲法出現過，今次算係破天荒第一次，當然國家未完全統一，意識形態未完全統一，又點可能有一部憲法出現？未有雞，又點可以生金蛋？

5月2號，參加世界運動會嘅中國足球代表隊出國，國足出現！同日，國民政府任命孔祥熙（188-1967）為黃河水利委員會委員長。5月3號，廣州宣佈戒嚴。5月5號，紅軍發表《停戰議和一致抗日》通電，抛磚引玉。5月6號，日本同冀察委員會秘密簽訂《華北防共協定》，加緊控制華北各軍事要點同鐵路沿線，華北分離運動密鑼緊鼓加緊進行。5月7號，教育部要求各級學校，獎勵家境清貧、體格健全、資質聰穎、成績優良嘅學生，設立免費及公費學額，獎學金制度，提倡免費教育，當然你要叻先得，蠢又冇水，都係要繼續耕田。5月7號，華商紗廠聯合會電請行政院取締走私活動，當時日本仔走私活動真係非常猖獗，中華民國呢段時間，無論官方或民間係損失慘重（政治經濟學）。

5月9號，西藏地方政府反對國民黨中央派軍隊入藏，當然係反對啦，無啦啦成家中央軍嚟到，大家都清楚明白發生乜嘢事？除咗自治權冇梗，分分鐘連條命仔都冇埋架。9號，日本正式制定20年內，向中國東北移民100萬戶，共500萬日本人嘅龐大殖民計畫！哇！清楚明白了，20年內，中國嘅東北，就會變成日本人嘅殖民地。殖民地呢個字，語帶雙關，可以係貶義嘅（響大部份情況下），亦都可以係褒義嘅。響唔少香港人心目中，殖民地三個字絕無半點貶義成分，甚至係一種美麗嘅童年回憶，當然凡事都係觀點與角度嘅問題，更重要嘅就係立場嘅問題，立場、觀點與角度，好多時候係意識形態嘅問題，好難一時三刻改變。5月11號，實業部喺上海設立嘅魚市場開業，資本為120萬元。同一日，重慶設市，面積187平方里。

［常威近代史］第七百一拾九回 元老胡漢民也走了（高清錄音版）

#唔鍾意睇字可以聽

https://fb.watch/ft8m9OkSnf/

【常威近代史】（七百二拾回）
政治就是經濟/貨幣的延續

1936年5月14號，國際聯盟行政院決議為中華民國增設理事席位，蔣介石南京政權，正式成為國聯中一個重要成員，為國際社會所普遍承認，行到呢一步，近代史上嘅「中國」角色正式確立。當然對某啲人嚟講，當時嘅蔣介石國民黨南京政權，都只不過係軍閥混戰中嘅其中一股軍事勢力，呢個世界嘅嘢，如何定義真係觀點與角度嘅問題。

5月15號，日本開始向華北大規模增兵，首批新增日軍1800人到位。上個月6號，日軍少將松室孝良奉命係北平設立「中國駐屯軍司令部部附辦公處」，宣稱任務係「從速使華北局勢明朗化」！此後日本立刻佈署向華北增兵。5月16號，第五師團河邊旅團部正式向北平設立，去到27號，天津已經增兵到20000人，局面亦都非常「明朗化」，全面戰爭預備開打。5月15號，國民政府外交部就日本政府放任日本人、朝鮮人喺華北走私之事，提出六次嚴重抗議。同日，英美等國家因華北走私影響外債嘅擔保同對華嘅貿易，亦相繼向日本政府提出嚴正交涉。從1935年8月至今年4月，日本人響華北進行大規模嘅「武裝走私」，活動愈演愈烈，走私還走私，仲要攜帶軍用級武器，真真正正無法無天。走私活動令到中國關稅損失高達2550萬元，情況之惡劣同埋數字之驚人，實屬史無前例。呢啲由日本浪人同朝鮮人組成嘅走私集團，趁住華北政局變動不隱之際，雇用大批民船、汽船，甚至重達500噸嘅輪船，從海路大肆偷運走私貨品至秦皇島等地，然後再由陸路運抵北平、天津同關內銷售，走私貨品包括日產人做絲、砂糖及綿織品為主，之後逐漸擴展至各種貨物，而中國海關人員如果加以阻撓或將私貨扣留，走私犯將會使用暴力毆打關員，甚至開槍殺人，將扣留貨品強行奪走！上個月27號，華北開始實行緝私新法，以天津海關及北寧、津浦、平漢綫為主體增設稅卡，並收買線眼對水陸運轉私貨者檢舉告密。政府喺今日嘅抗議書中，要求日方嚴誡秦皇島等處日軍不許干涉我國海關緝私工作同包庇走私行為，並且要求將同走私罪行有關，如石河運轉公司等非法組織予以解散。

5月17號，甘肅省隴西縣遭到雹災，有冰雹重達108斤！5月18號，參加英國藝術展嘅91箱文物運回南京。今日，紅軍西北革命軍事委員會發出西征命令，決定組織中國人民紅軍西方野戰軍，任命彭德懷（1898-1974）為司令員兼政委，次日，西征紅軍分為左、中、右三路喺延長、延川出發。今個月初，紅軍抗日先鋒軍主力先後從山西省永和縣渡過黃河，撤回陝北。東征受挫結束，11號，毛澤東響延川縣大相國寺召開會議，結束東征得失，作西征動員。6月，紅軍殲滅馬鴻賓（1884-1960）一個旅，然後同甘肅馬家軍馬鴻逵（1892-1970）部隊多次交戰，形成對峙局面。並相繼喺定邊、鹽池、環縣、預旺、固北等地方建立地方政權。9月，西方野戰軍與胡宗南（1896-1962）部隊交火，10月攻佔會寧，並在山城堡一役中，與會師後的紅2、紅4方面軍一同重創國軍，不久之後，西安事變爆發，西征停止，陝甘寧邊區形成。

5月18號，仲有大件事發生，財政部代表陳光甫（1881-1976）同美國財政部部長摩根韜喺華盛頓簽訂《中美白銀協定》。第二日，美國總統羅斯福（Franklin Delano Roosevelt，1882-1945）稱，此協定不僅能夠協助中國穩定通貨，更有利於美國的貿易發展。去年底，美國政府突然停止向倫敦市場購買白銀，並同時降低響國外收買白銀嘅價格，令到世界金融市場一片混亂，銀價大跌，美國咁做嘅目的係在於阻止中國法幣同英鎊嘅聯繫（掛勾），促使白銀市場由倫敦向美國轉移，為防止出現因銀價下跌而造成法幣匯率無限下降，外匯和黃金儲備勢必被搶購一空嘅局面，國民政府只好請求美國繼續收購中國白銀。呢啲叫乜嘢，呢啲叫財技囉，不過係國家級財技。

《中美白銀協定》協定主要內容為：1.中國保持貨幣獨立，不許同世界上任何貨幣集團聯鎖（當年除了大美利堅）；2.美國承購中國白銀7500萬盎司（安士），另接受5000萬盎司，作為2000萬美元貸款之擔保；3.白銀價格將分批決定，銀價上漲時中國可向市場公開出售；4.中國須保持25%白銀為發行貨幣之準備金；5.鼓勵鑄造5角及1元銀輔幣。《中美白銀協定》簽訂之後，國民政府對「幣制改革」不得不作出修正，自此之後，法幣對美元嘅依附關係亦都隨之而確立。情況亦都簡單到不得了，中國嘅法幣，唔可以同英鎊掛鉤，亦唔可以同日元掛鉤，唔可以同任何貨幣掛鉤，只可以同我美元掛鉤，你嘅即係我嘅，我嘅即係我嘅，我中有你，你中也有我，響貨幣政策中我哋係好兄弟，當然美國係兄，其他只可以做弟，契個種。

有好多人認為，其實世界上嘅所有政治問題，都係貨幣問題，其實呢一個觀點並沒有錯，政治經濟本為一體，完全分不開，分開嚟睇嚟講，就一定係錯！軍事學巨著《戰爭論》作者勞塞維茨（Karl von Clausewitz,1870-1931）曾經講過：「戰爭是政治/政策的延續」，而我認為，「政治就是經濟/貨幣的延續」。

#常威 #蔣介石平反系列  #佛經抄寫員 #中日戰爭 #民國歷史

［常威近代史］第七百二拾回 政治就是經濟/貨幣之延續（高清錄音版）

#唔鍾意睇字可以聽

https://fb.watch/fw2q4ErpA6/

【常公子歷史頻道499回：黃金十年系列之 王國維自沉於昆明湖】

▶王國維是清末民初一位偉大的文學家和訓古學家，他的作品《人間詞話》所提出的文學境界論，奠定了中國文學的全新鑒賞高度，也重新對中國文學作品的美學作出全新定義；直到今日，仍然為人所津津樂道，是每一個中國文學愛好者必讀之近代經典。外表極似古人的一位現代學者，一生以大清遺老自居，在當時來看，是極度不合時宜。故國情懷，豈是寡情薄倖者所能了解？當然王國維自沉昆明湖是否一如屈原般是一個高尚的殉國行為？我們並不知道，不如問，楚國屈原是否殉國也有肯定的答案嗎？歷史充滿了吊詭性和不確定性，我們對歷史人物的詮釋，才是歷史本身。

⏩https://youtu.be/rKPmaSGPNGs

#常威💀 #常威近代史頻道 #黃金十年系列  #民國歷史 #佛經抄寫員

【常威近代史】（七百二拾一回）
武裝政變前夕

1936年5月19號，出席世界運動會代表及領隊戴季陶（1891-1949）及王正廷（1882-1961）出國。5月21號，歐亞航空公司機師帶相機飛行攝影，被鄭州憲兵搜獲並拘捕。5月22號，財政部、鐵道部制定《防止鐵路走私施行細則》，繼續抑壓日本人猖獗嘅走私活動。

5月23號，蘇北黑熱病流行，黑熱病正名為利什曼病（Leishmaniasis）係一種由寄生原生動物利什曼原蟲造成嘅疾病，由特定種類白蛉叮咬所散播。疾病主要分為三種：皮膚、黏膜及內臟的利什曼疾病。皮膚利什曼病會有皮膚上嘅潰瘍、黏膜利什曼病會有皮膚、鼻子上潰瘍、內臟利什曼病一開始會是皮膚上潰瘍，後來會有發燒、紅血球數量減少，以及脾臟和肝臟腫大。內臟利什曼病被稱為黑熱病，患者身體有多處潰瘍，血淋淋，相當得人驚。100年前缺乏醫療，衛生情況惡劣，當時嘅人對傷口處理亦應該冇任何知識，死好多人好正常。

今日，偽蒙古軍政府正式響嘉卜寺成立，由蒙政會委員長雲端旺楚克（雲王，1870-1938）出任政府主席，蒙政會副委員長索特那木拉布丹同沙克都爾扎布任副主席，李守信（1892-1970）為蒙古軍總司令。德王德穆楚克棟魯普（1902-1966）出任掌握軍政實權嘅總裁，軍政府所在地德化縣改名為德化市，並採用成吉思汗紀年，懸掛代表軍政府嘅藍底紅黃白條旗幟。早響1934年，「蒙政會」成立後，日本帝國就將蒙正會委員長德王作為重點扶植對象。今年2月12號，德王響德王府成立蒙古軍總司令部，自任總司令。4月，德王又喺錫盟索王府召開咗首屆「蒙古大會」，圍爐取暖，通過成立包括內外蒙古、青海在內嘅「蒙古國」方案，並於今日正式成立蒙古自治軍政府，軍政府成立之後，德王隨即出訪「滿洲國」，並且同「滿洲國」簽訂《蒙滿協定》，sorry，應該係「偽滿洲國」先啱。與此同時，内蒙古大雪成災，為數百年所未有，災區總面積達到4000餘平方公里，尤以錫盟受災最為嚴重，似乎天有啟示喎。

【常公子歷史頻道 500回：黃金十年系列之 有錢使得鬼推磨】

▶眨吓眼，Youtube常公子歷史頻道進入500回，踏入第五個年頭，其實是一件值得慶祝的事情！多謝好拍檔阿潮和我一起走過這一條漫長的近代史之路，未來會發生什麼事，我真的不知道。但有幸用自己的文字和片段，為中國近代史寫下一個小小的見證，對我嚟講，已經相當足夠。希望喜歡常公子歷史頻道的朋友，能夠給我課金，能夠給我小小的資助，讓我繼續行落去，讓我繼續寫作近代史，繼續製作Youtube片講中國近代史，課金的方法，你可以直接PM我，我會告訴你，多謝大大的支持和鼓勵，路仍然很漫長，但我和阿潮，會繼續行落去，希望有第600回，700回……

⏩https://youtu.be/cdaf0uLO5DQ

#常威💀 #常威近代史頻道 #黃金十年系列  #民國歷史 #佛經抄寫員

［常威近代史］第七百二拾一回 武裝政變前夕（高清錄音版）

#唔鍾意睇字可以聽

https://fb.watch/fCmcGvcswi/

6月5號，廣東禁止買賣期貨。6月6號，天津海河近月發現浮屍600餘具，懷疑係被日本人所殺嘅華工，如果真係日本人做，就真係喪盡天良。6月6號，中共叛徒張國燾（1897-1979）喺甘孜宣佈結束佢設立嘅中央；6月7號，中國文藝作家協會喺上海成立，同日，鄒奮韜（1895-1944）等喺香港創辦《生活日報》，6月13號，廣州各工廠、學校及民眾一共50000萬人舉行抗日示威遊行。同日，日本強化華北空軍，加派18架戰機飛抵天津。

6月14號，天津日本浪人組織走私組織「特殊貿易協會」，你聽過未？賊都可以成立協會，直情當你中華民國海關冇到喇。今日，民國奇人章太炎去世，章太炎（1869-1936），原名章炳麟，係浙江餘杭人，近代民主革命家，國學大師，清末民初思想家、史學家、樸學大師、民族主義革命者、中華民國國語設計者、中國醫學院首任院長，多重身份，因為患上鼻菌症及膽囊炎不治，響蘇州去世，享年65歲。

章太炎係一個天才式人物，自幼飽讀經史，早年因為參加過戊戌維新運動被清廷通緝，1930年因為「蘇報案」而入獄，出獄後前赴日本，積極參與革命活動，主編同盟會刊物《民報》，1911年辛亥革命後回國，被孫文聘請為總統府樞密顧問。南北和議破裂後，章太炎擁護袁世凱，歷任總統府高等顧問、東三省籌邊使等重要職務。但1913年，章太炎又策動討袁，之後被軟禁，1917年出任護法軍政府秘書長，為孫文作《代擬大元帥就職宣言》。1918年，離開廣州途徑四川、湖南、湖北，東下上海。1919年1月12日章太炎又致函孫中山，反對南北議和。

1920年，擁護聯省自治運動。1922年響上海講學，曹聚仁（1900-1972）根據記錄整理為《國學概論》。但章太炎始終沒有放棄對黎元洪、吳佩孚、孫傳芳等新舊軍閥勢力期望，反對國民革命軍北伐。1926年4月7日，上海成立反赤救國大聯合會，章太炎被推為理事長。1927年南京國民政府成立後，章太炎採取不合作態度，自命「中華民國遺民」，曾遭國民黨上海黨部通緝。1928年批評蔣介石改換國旗，佢咁講：「今之拔去五色旗，宣言以黨治國者，皆背叛民國之賊也。」1930年代活動限於上海、蘇州一帶。晚年主張讀經，並據《春秋》「非我族類，其心必異」之義，力主對日強硬。1935年，響蔣介石資助下，於蘇州錦帆路開設章氏國學講習會招收最後一批學生，並出版學刊《制言》。章太炎晚年學術由漢學轉向宋學及王陽明之心學，而其經學成就亦更注重魏晉經學，上窺兩漢經學之不足，撰有《漢學論》。又曾撰《救學弊論》批評現代教育體制，主張回歸民間辦學同書院教育。民國第一號奇人章太炎一生不羈放縱愛自由，有章瘋子之稱。

#常威 #蔣介石平反系列  #佛經抄寫員 #中日戰爭 #民國歷史

❤【常威近代史】第十二部《籠裏雞大作反》
▶https://play.google.com/store/books/details?id=heJ1EAAAQBAJ

🙏最新上架！請大家多多捧場！

［常威近代史］第七百二拾二回 民國第一號奇人歸西（高清錄音版）

#唔鍾意睇字可以聽


https://fb.watch/fGmldFNXnq/

6月22號，綏遠唯一旗幟鮮明地開展新詩歌運動嘅詩刋《塞北詩草》創刊。之前塞原社同人編輯出版嘅《塞原》文藝刋物，1934年，佢哋受到左翼作家作品同新詩歌運動嘅影響，《塞原》22期刊出新詩歌專號，佢哋認為喺內憂外患重重壓迫下嘅中國，詩歌具有強而有力地傳達人民心聲嘅功能，《塞北詩草》出版後，受到詩歌愛好者大力支持。文學研究者韓燕如（1919-2003）就係其中一位支持者，佢收集嘅民歌被編輯成專輯出版，《塞北詩草》一共出版咗七期。

6月23號，南天王陳濟堂（1890-1954）就任抗日救國軍集團總司令，同一日，廣西軍閥，白先勇老豆白崇禧（1893-1966）嚴禁廣西壯丁出省，應該隨時預備全省總動員，總動員反蔣（抗日）。6月25號，中華民國同拉脫維亞響倫敦簽訂友好條約。6月26號，日軍響北平豐臺一帶建設兵營同埋碉堡，開始向中國駐軍挑釁，試下水溫先。

今個月，左翼作家夏衍（1900-1995）嘅報告文章《包身工》響《光明》雜誌上發表，該文章大膽披露咗鮮為人知嘅上海日資紗廠工人嘅悲慘境況。作者著力描寫一個女工嘅遭遇，佢因為過度營養不良而瘦弱得別人稱呼為「蘆柴棒」，同一群失去人身自由嘅女工們響日本資本家嘅剝削下過著非人生活，響20世紀做「十五六世紀封建制度下的奴隸」。

今個月，抗日聯軍1、2軍奉命組成抗聯第1路軍，由楊靖宇（1905-1940）任總司令兼政委；魯迅（1881-1936）、巴金（1904-2005）、曹禺（1910-1996）等63個文學家發表《中國文藝工作者宣言》；著名地質學家李四光（1889-1971）調查發現黃山冰磧層為第四紀形成，佢今約5萬餘年；6月，國民政府與德國政府簽訂借款協定，由德國供給1億元軍需品（哇！），當時嘅德國政府就係希特拉納粹政權，1936年正正就係柏林奧運會舉行嘅年份，當時納粹黨勢頭崛起，整個歐洲亦進入風起雲湧嘅戰爭狀態前夜；今個月，瑞鎔船廠與英資耶松船廠合併成為上海最大嘅英聯船塢有限公司，日本亦喺廣州沙面成立特務機關。

1936年6月於焉結束。

#常威 #蔣介石平反系列  #佛經抄寫員 #中日戰爭 #民國歷史