大清亡國關慈禧蛋牛治 3

［常威近代史］第七百六十二回 寫在大屠殺之一（高清錄音版）

#唔鍾意睇字可以聽

https://fb.watch/iFrvYYuWm3/

【常威近代史】（七百六十三回）
雖然大義但要問責

好多年前，我曾經到過南京的大屠殺紀念館參觀，響萬人坑展道內那些堆積如山的人體骸骨，為年少的我帶嚟嘅無比震撼，到今日仍然瀝瀝在目，我講過，我唔明白南京大屠殺發生嘅原因？人性點解可以喺短時間內完全消失？1937年12月發生響南京嘅事，似乎係由一連串嘅偶然所引發嘅極度不幸事件，只可以講，係當時中國人嘅運氣的確係太差，而日本人響南京所犯下的禽獸暴行，亦都永遠將佢哋嘅民族釘上歷史嘅恥辱柱上，永不翻身。

1938年1月9日出版嘅《紐約時報》（The New Yorks Times），內裡有一篇由記者Tillman Durdin所撰寫嘅報導《Japanese Atrocities Marked Fall of Nanking》中，內裡有以下一段描述：

「當中國在南京最後的潰敗到來時，潰逃的市政官員和守軍造成的混亂局面結束，普通民眾如釋重負，甚至預備迎接日軍進城，而當日軍部隊由西門和南門行進入城時，市民們的確高縣著布條歡迎。」

時間係1937年12月13號，日軍並沒有抓住呢個贏得民心嘅機會，相反佢哋大肆掃蕩，殺人如麻，姦淫擄掠，無所不為，做出咗震驚世界嘅一場南京大屠殺。

響松井石根大將（1878-1948）計畫之中，原本係要將大部分嘅部隊留喺南京城外，只係象徵性比憲兵同埋圍城兩個軍各派出幾個營進城，就好似佢哋處理佔領上海同其他城市一樣，不過情況有變嘅係，日本方面因為城內未降嘅中國士兵為數甚多，而且混入係平民百姓之中，於是日軍最後畀七萬多人嘅部隊全面進入南京城，進行大掃蕩。行文至此，有兩點需要注意，第一，日本對中國進行過兩次大屠殺，第一次就係發生係1894年嘅「旅順大屠殺」，當時同樣係震驚世界，但係兩次大屠殺佢哋所持嘅理由亦都一模一樣，就係有未降嘅軍人混雜喺平民百姓之中，於是採取有殺錯無放過策略；第二點，就係由唐生智（1889-1970）領導嘅南京保衛戰，潰敗得實在太快太倉促，於是根本冇時間比軍人同部隊有秩序撤出南京，因此導致大量軍人滯留喺城內，畀咗日本人有藉口進行大屠殺。作為衛戍司令指揮官嘅唐生智其實喺慘劇所擔任嘅角色，或要負上嘅責任，其實相當大。

上集亦都講過，12月5號日軍曾經向唐生智勸降，唐生智並冇答應，當時國軍嘅局面究竟係點呢？是否早已經亂成一團，如果唐生智選擇投降，南京大屠殺又會唔會發生呢？死亡人數會不會大幅降低呢？答案永遠冇人知道，究竟係國家重要？政權重要？抑或人命重要？其實答案亦永遠冇人知道？之後大漢奸汪精衛協助日本人建立傀儡親日政權，口中最大嘅理由亦都係減低平民百姓傷亡數字，唔好作無謂嘅抵抗同犧牲，佢到底啱定錯？歷史早有定論，我亦唔作補充。但係我都可以幾肯定，如果我活喺嗰個年代，面對嗰種情況，我好有可能都會成為漢奸之一。

當然用我們現代人嘅眼光同角度去理解歷史人物、或者對佢哋做過嘅事或行為作出評論，甚至道德判斷，本身就係一件冇意義同on9嘅事情，因為所謂道德，會隨時間同空間而改變，正如1937年三妻四妾係理所當然，今日係十惡不赦一樣，更有甚者，所謂對錯，正確不正確好多時候都祇不過係政治權力嘅伸延同展現，同時代、立場與角色掛勾。不過，城破之前，唐生智同高級將領相繼安全離開（領導走先），但留低低級士兵同平民百姓予日本人屠殺，道理總係說不過去，更加唔好講唐將軍滙款去香港單嘢，一句到尾，就係失敗中嘅失敗，對南京城30萬平民百姓嘅枉死，當時負責守衛南京嘅唐生智，以及國軍嘅高級參謀將領，甚至乎蔣介石，絕對責無旁貸。再深入去分析，平民百姓性命在一場戰爭中，是否可以計算在戰略與戰術之中去運用？當然冇人話可以，但係平民百姓嘅性命，從來都係戰略武器之一，而且相當好用，同價錢便宜。

上集亦都提過，由於臨時改變戰略，急速行軍佔領南京，日軍依批部隊早已經飢寒交迫，滿腔憤怒，畀佢哋入城，就等於放一批餓咗好耐嘅癲狗去咬人（食人），情況根本係會一發不可收拾。當然最大責任就係指揮官松井石根本人，佢放得部隊入城，就預咗血流成河。12月13號早晨，谷壽夫（1882-1947）部隊首先入城，一入城，就立刻展開殺戮，血洗聚集喺中山北路中央路嘅難民群，或者唔需要理由，理由就係難民群中有好多中國軍人或疑似軍人。響燕子磯，日軍就用機關槍掃射正喺八卦洲渡江嘅十幾萬中國軍民，日軍響南京所作出嘅暴行，情況係瘋狂嘅，亦都毫無理性可言，亦都唔尊重任何國際法、軍紀或道德律，由一開始，己經係一場赤裸裸嘅瘋狂大屠殺。

日本國內，曾經有極右團體，響戰後否認南京大屠殺曾經發生過，佢哋話，稱呼為「南京事件」嘅慘劇，殺害無辜平民百姓嘅兇手其實係中國軍人、盜賊土匪同黑幫份子，當然佢哋提出嘅證據完全站唔住腳，有圖有片有真相，日本軍人喺南京所犯下戰爭罪行，冇辦法可以被抹走。事實上，絕大部分有份參與南京屠殺嘅日本軍人，事後都冇被司法審判或追究責任，佢哋有好多人可能退伍後，返回日本本土，做番個普通人，正常返工放工，結婚生仔，甚至兒孫滿堂，安享天倫，不過我想問一個問題，午夜夢迴之時，佢哋會否經常見到南京平民百姓嘅冤魂野鬼呢……

#常威 #蔣介石平反系列  #佛經抄寫員 #中日戰爭 #民國歷史

［常威近代史］第七百六十三回 雖然大義但要問責（高清錄音版）

#唔鍾意睇字可以聽

https://fb.watch/iJQjhcv48_/

【常威近代史】（七百六十四回）
血跡斑斑 馨竹難書

由1937年12月13號日軍進入南京城開始，日本人喺南京進行咗馨竹難書的驚世暴行，用「暴行」不足以形容，直頭是「獸行」，只有野獸先會咁樣做。日軍由一開始，就大規模殺害中國軍人，或者係佢哋認為係軍人嘅平民百姓，至於係軍人與否，純粹主觀決定，所謂有殺錯，冇放過。

12月14號，日軍喺中山碼頭，下關車站等地方對聚集嘅難民用機關槍瘋狂掃射，並且投擲手榴彈，令到無數人喪生。喺頭3日，日軍逮捕咗15000名中國人，以及喺城中各處再捕獲匿藏嘅25000名中國軍人，上述呢啲人，都被有系統地集體處決，就連嗰啲已經逃入由外國人設置喺城內以保護平民百姓嘅安全區內嘅數千名中國軍人也未能倖免，日本人可以說視國際法於無物。當時南京仍有好多西方人，佢哋建立咗非軍事區，即係安全區，日本軍人仍未夠膽殺美國人英國人及法國人，有唔少中國軍人拋棄武器獲准進入安全區暫避，但日軍仍然將佢哋捉出嚟集體槍殺，其兇殘暴虐嘅程度，可謂史上少見。

下關係另一個發生集體槍決嘅重要地方，日本進入南京城嘅時候，對收容戰俘毫無準備，或者佢哋根本唔打算收容任何戰俘，乾脆全部殺曬處理！為咗確保有皇室成員參加嘅勝利遊行期間安全，第16師團長中島今朝吾（1881-1945）曾經響日記內咁樣講過：

「由於我們的政策是不留下任何俘虜，所以我們認為戰俘在找到後必須要儘快處決掉。」

中島今朝吾嘅16師團，響下關直接殺害嘅中國戰俘人數，大約有4000人到16000人，其實死亡數字難以估計，連下關華僑招待所嘅5000名難民亦被殺害，死屍都被丟進河中，長江因此成為一條「屍河」；響南京北部嘅幕府山，日本有一個聯隊負責看管20000名中國官兵俘虜，幾乎冇人可以存活，血跡斑斑，天地不容。喺南京大屠殺嘅第一階段，日本已經非法處決大量中國軍人及疑似中國軍人。

12月17號，日軍華中方面司令長官松井石根（1878-1948）入城，並對劊子手谷壽夫大加獎勵，於是屠殺暴行越演越烈。軍人被大批屠殺後，之後日軍主要搜捕改裝平民裝扮嘅國民政府軍人，結果大量無辜平民百姓被處決，12月18號，57000名難民被驅逐至下關草鞋峽集體槍殺，屍體被縱火焚燒。12月下旬日本開始嘅「清街運動」同「難民登記」，又令上萬中國人無辜人頭落地！

根據記載：「日軍最常用的一種處決方式，是將十幾個人集中起來站在戰壕入口處，然後用槍射殺，他們的屍體自然就掉入坑壕，日軍再鏟土掩埋這些屍體……」，大量疑似軍人嘅平民被殺，警察同消防員亦不例外，甚至乎，任何人如果由於慌張同恐懼靠近日本士兵，都會有立刻被射殺嘅危險，去到一個地步，就係殺任何中國人，都唔需要有任何理由或負上任何責任。相信大家都聽過，有兩名日本軍官進行百人斬殺人競賽，以殺150人為目標，佢哋嘅血腥行為甚至被登上日本報紙頭條，加以表揚。

［常威近代史］第七百六十四回 血跡斑斑 罄竹難書（高清錄音版）

#唔鍾意睇字可以聽

https://fb.watch/iNY9l1yA0b/

【常威近代史】（七百六十五回）
屠殺後續

發生響1937年12月至翌年2月嘅南京大屠殺，其實只係日本人響第二次世界大戰嘅其中一個暴行，之後發生嘅太平洋戰爭以及日本入侵亞洲其它地方，都發生咗唔少殘忍嘅事情，祇不過規模遠遠比唔上南京大屠殺，日本人響戰爭中採取嘅種種手段，其實相當乖離，「殘忍」同「野蠻」差唔多亦成為當時日本軍人響戰爭中嘅代名詞，當然戰爭本身就係你死我活嘅遊戲，不過要去到日本人咁盡，同埋唔加以掩飾，歷史上亦都唔多見。大概可能佢哋太蠢（領導層），唔識得向國際社會粉飾佢哋響戰爭嘅暴行；又或者可能係佢哋太聰明，太明白遊戲規則係啲乜嘢？去到現代，大家都有一個概念——就日本人非常有禮貌，而且有公德心，唯唯諾諾，成日90度鞠躬。我唔知道現代日本人嘅禮貌表象，同佢哋喺二次世界大戰所做過嘅事情有冇關係？

不過如果論及戰爭暴行，日本人亦唔係唯一，難道納粹黨屠殺500萬猶太人，到處設立集中營殺害平民百姓就不暴力？史太林30年代血腥清黨，殘殺自己人、高壓統治民衆又不暴力？甚至乎二次世界大戰將近結束時，美國人選擇將原子彈投落廣島同長崎，殺害無數無辜平民又不暴力？當時罪有應得嘅人（戰犯們），應該大部份響東京掛？點解美國人要選擇將原子彈投落平民百姓居住嘅廣島同長崎？如果喺戰爭中犯下戰爭罪行要被審判，點解冇人向美國投擲原子彈追究責任？唯一嘅解釋，就係戰勝同戰敗嘅分別——真理嘅權杖、道德嘅標尺，從來只掌響在勝利者手中，亦係由勝利者隨便定義。

之前，我講過我唔明白南京大屠殺點解會發生？我喺度質疑人性為何潰爛至此？其實我嘅質疑亦唔單單指涉日本人響南京所作出嘅暴行，響20世紀30年代，其實整個世界上，普遍人類都已經接受咗現代文明同科技洗禮，但係當戰爭爆發，人性黑暗面同埋嗜血性竟然可以響短時間內高速蔓延開來，呢個先係我最質疑嘅地方？活於21世紀現代文明世界，我哋當然會講，90年前二次世界大戰所發生嘅事絕對唔會係今日發生，但係邊個可以保證先？今時今日嘅軍事武器殺傷力更加比二戰時候巨大得多，如果真係有第三次世界大戰發生，我幾乎可以保證死亡人數一定比二戰更加龐大。所以，無論如何唔可以讓大型戰爭再一次發生，因為後果係無人能夠想像。正如當日第一次世界大戰結束，全世界亦都冇人能夠想像只係區區20多年過去，會發生另一次更血腥更殘酷嘅二次世界大戰。

古往今來，利用「屠殺」作為戰爭中嘅其中一種手段或戰略，或被當成戰術工具性操作，經常都會發生。不過喺南京發生嘅事，似乎並唔係日本軍方一個處心積慮嘅計劃，當時南京城被日軍攻破嘅時候，日軍後勤無辦法跟上支援，進入城裡嘅軍隊喺訓練期間及經歷三個月嘅作戰，身心早已經遭到折磨近於崩潰，上頭又下達有皇室成員參與嘅勝利遊行決定，日軍軍紀亦因為憲兵制度崩壞而盪然無存，防守嘅中國軍人因為冇完善嘅撤退安排，導致大量滯留於南京城內，大概係多重巧合下，觸發咗呢場驚世慘劇嘅發生，只可以講，所有嘅事都巧合地向最壞嘅方面發展，當時喺南京嘅無辜百姓，運氣實在奇差。

另外有一個問題，就係日本人點解咁仇視中國人？大家同種同源不在話下，由1937年數起，大概10年前，918事變未發生之前，中日關係仲係處於可以接受嘅階段，1928年，蔣介石仲響東京同日本嘅高層有緊密嘅接觸同利益分贓。點解只係區區10年時間，雙方嘅仇口可以去到咁大，反共？我諗都係藉口一個，製造仇恨嘅，應該係輿論。正如第一次世界大戰前，德國同英法兩國之間嘅仇恨，亦係由輿論同媒體監生製造出嚟一樣。更加唔好講猶太人嘅事，大家本無深仇大恨，但你講我又講，你吹我又吹，結果素未謀面嘅人可以成為殺父仇人，凡係中國人喺香港旅遊就會周街屙屎？媒體輿論製造仇恨嘅威力有幾大？相信亦都唔使我多講，今時今日21世紀，呢啲事仍然喺度不斷發生-ing，希望大家引以為戒。如果歷史真正可以帶來某啲教訓，我諗依一個係唔能夠忽略嘅血腥教訓。

除此以外，單純以戰爭史嘅面向嚟睇，南京大屠殺亦成為咗一個標誌性嘅轉捩點，喺二次世界大戰中，自此之後，投降變得極少發生。響二次世界大戰之前，一場響有限地域內發生嘅戰役，尤其是係強弱懸殊嘅戰役，通常維持唔到幾耐，好多陣前指揮官都會承認戰役失敗而宣佈投降，咁樣後續嘅流血殺戮已經不再有任何意義可言。我已經問過，如果1937年12月頭，守衛南京嘅唐生智將軍接受日本人嘅勸降，情況同流血量應該會大幅改善（純粹推測）。但我哋可以睇到，南京大屠殺之後，發生喺全世界嘅各場戰役，隨住戰役喺時間同空間上嘅不斷擴大，似乎唔再有指揮官有足夠權限做出即時投降嘅決定。實際上，持續抵抗作戰到全員陣亡，就整體戰略觀點上或宣傳層面、意識形態層面上就有一定嘅正面作用，1941年蘇聯史太林，就係用上依一種玉石俱焚嘅手段去抵抗德軍強大嘅入侵。我亦唔敢包，當時從南京撤退緊去武漢嘅最高總指揮蔣介石，有冇上述呢個諗法？

#常威💀 #蔣介石平反系列  #佛經抄寫員 #中日戰爭 #民國歷史

😂【常威近代史】第一部《大清亡國關慈禧蛋牛治》
https://play.google.com/store/books/details?id=C3hjDwAAQBAJ

😂【常威近代史】第二部《中國一百年前第一次開放改革》
https://play.google.com/store/books/details?id=_6KMDwAAQBAJ

［常威近代史］第七百六十五回 屠殺後續（高清錄音版）

#唔鍾意睇字可以聽

https://fb.watch/iSKtA6JK_B/

12月28號，山東人民抗日救國軍第五軍成立，第二日，「濟南治安維持會」傀儡組織成立。12月30號，青島當局實施焦土政策，火嬈全城。今日，中國天主教領袖人物、上海富商陸伯鴻（1875-1937）喺乘坐自備汽車預備外出時，被兩個水果小販打扮嘅男子槍擊身亡，行兇者嘅意圖一直眾說紛紜，莫衷一是。陸伯鴻係一個著名嘅慈善實業家，生平去過意大利見過羅馬教宗，亦係上海嘅華商領袖，佢先後創辦咗新普育堂、普慈療養院、聖心醫院、中國公立醫院，合辦過北京中央醫院等七所慈善機構。佢早年便涉足實業，上海內地電燈公司曾經經營不善、債臺高築，苦於無人接手經營，之後陸伯鴻上任，致力宣傳普及電燈，好快就令公司轉虧為盈，之後又響李平書（1854-1927）嘅推薦下，創辦上海南市電車公司，陸伯鴻又響每輛電車車頭頂上安裝綠、白、紅三色三盞電燈，「綠白紅」就係陸伯鴻，你睇吓佢幾識宣傳自己。

12月31號，山東泰安失陷，國防最高會議決定接受德國人陶德曼（1877-1950）再次調停中日戰爭意見。今個月，日本產業會社響中國東北建立「滿洲重工業開發株式會社」，簡稱「滿業」，資本總額為4.5億日元，絕對係天文數字大額投資，股份分佈日本占一半，偽滿洲國占一半，我個人好相信，雖然偽滿洲國有一半股份，但應該冇話事權。「滿洲重工業開發株式會社」響偽滿洲國對鋼鐵、輕金屬、飛機、汽車、煤炭、金、亞鉛、銅及其他行業進行投資並指導經營。「滿洲重工業開發株式會社」成立之後，好快就取代咗「滿鐵」（滿洲國鐵路公司）嘅地位，成為咗日本喺中國東北最主要嘅國策公司，它接收咗「滿鐵」嘅大部分重工業企業，實施日本政府同偽滿洲政府制定嘅「產業開發五年計劃」，這項計畫嘅建設資金最初預定為25億日元，之後增撥為61億日圓，技術力量主要由「滿洲重工業開發株式會社」供給，重要嘅機器設備則由美國、德國兩國輸入。

點解要協助滿人建立偽滿洲國？點解要華北分離？點解發動全面中日戰爭？理由就一字咁淺，日本要奪取中國東北嘅天然資源來壯大自己，冇嘢響背絞backup，日本又點會咁大膽挑戰生產力大國美國，發動太平洋戰爭呢？不過日本到最後，都係太睇小美國嘅工業生產力，正如納粹德國，亦都太睇小蘇聯嘅工業生產能力一樣。任何一個強大國家，都唔可以放棄重工業生產，畢竟「鋼鐵」同「權力」，永遠掛鉤。

#常威💀 #蔣介石平反系列  #佛經抄寫員 #中日戰爭 #民國歷史

［常威近代史］第七百六十六回 權力與鐵（高清錄音版）

#唔鍾意睇字可以聽

https://fb.watch/iX-nPAjl2E/

❤常公子長篇科幻小說作品：

1⃣【渠頭者聯盟第一部：DSE創世紀(通往地獄的電梯)】 （免費下載）
https://play.google.com/store/books/details?id=LyxjDwAAQBAJ

2⃣【渠頭者聯盟第二部：決戰外星人朗拿度】（免費下載）
https://play.google.com/store/books/details/%E4%B8%89%E5%B3%B6%E6%82%A0%E4%BA%9E_%E6%B8%A0%E9%A0%AD%E8%80%85%E8%81%AF%E7%9B%9FII?id=Emp2DwAAQBAJ

3⃣【渠頭者聯盟第三部：上帝，你知道我為什麼要詐傻扮懵嗎？】（免費下載）
https://play.google.com/store/books/details?id=t4eNDwAAQBAJ

4⃣【渠頭者聯盟第四部：磁能線異能仨】
https://play.google.com/store/books/details?id=0eOaDwAAQBAJ

5⃣【渠頭者聯盟第五部：絕代女王反擊戰】
https://play.google.com/store/books/details?id=0eOaDwAAQBAJ

6⃣ 【渠頭者聯盟第六部：人人心中都有一個狄士尼】
https://play.google.com/store/books/details?id=K8_EDwAAQBAJ

7⃣【渠頭者聯盟第七部：老銀土愛情故事】
https://play.google.com/store/books/details?id=hFzeDwAAQBAJ

8⃣【渠頭者聯盟第八部：女王殿下之大審判日】
https://play.google.com/store/books/details?id=Q-oOEAAAQBAJ

9⃣【渠頭者聯盟第九部：異能界之Beyoud海闊天空】
https://play.google.com/store/books/details?id=41cpEAAAQBAJ

🔟【渠頭者聯盟第十部：光頭佬時間大暴走】
https://play.google.com/store/books/details?id=wR5GEAAAQBAJ

1⃣1⃣【渠頭者聯盟第十一部：由哈佬吉蒂到鉄木真去少林寺】最新上市
https://play.google.com/store/books/details?id=fmR3EAAAQBAJ

1⃣2⃣【渠頭者聯盟第十二部 明日大嶼打到虢礫緙嘞】
https://play.google.com/store/books/details?id=3DelEAAAQBAJ

🙏請大家捧場！

*available on android and ios

【常威近代史】（七百六十七回）
冇人冇立場

如果你到咗今日，仍然覺得戰爭係一場正邪之爭，有正義的一方存在，亦有邪惡一方存在。咁樣未免太年輕，作為解決問題嘅最後方法——戰爭嘅複雜性同歧義性實在太令人神暈目眩，因為戰爭本身，除咗係一個複雜問題，亦係一個意識形態問題，而識形態就係立場嘅問題，任何人都有其既定立場，中立地去描述一場戰爭基本上冇可能，正如今日嘅俄烏戰爭，難道全部俄羅斯軍人都認為自己係侵略者？相信係冇可能。正如日本嘅極右主義者，提出死咗幾萬到幾十萬人嘅南京大屠殺從沒有發生過，老實講佢哋係真心相信架，係百份百嘅「true believer」，呢個就係意識形態問題，亦係立場問題。人類要相信某一種事物存在與否，好多時候並唔係根據證據去決定，而係根據立場去選擇（大家有興趣可以睇吓1997年一套科幻電影，叫【超時空接觸】Contact，由Jodie Foster同Matthew McConaughey主演，內裡對信仰呢個問題，演繹得非常精彩）。

論述中日戰爭，我亦有我嘅既定立場，我嘅立場就係我身為一個中國人去論述呢場戰爭嘅發生經過，中間有所偏頗即係我嘅立場問題，不過我冇辦法改變呢個既定事實，就係珍珠都冇咁真嘅。

1938年1月，南京大屠殺正在中華民國首都南京發生中，日本人嘅鐵蹄踐踏中華大地，中華民國嘅一衆雜牌軍根本無法抵擋，節節敗退，轉眼間，整個北方差唔多全部落入日本人手中，而全面戰爭發生到而家，只係過咗區區未夠半年時間。事實擺喺眼前，如果認為當時中國軍隊仲可以抵抗日本人入侵，根本係發緊夢，但係當時中華民國最高統帥蔣介石對戰事卻意志堅定（口頭上），認為只能夠抗戰到底，絕無向日本妥協嘅可能性，當然佢必須要咁樣講，因為向日本人妥協或投降，亦表示佢嘅政治生命將會完結（被主降派親日派汪精衛取代），作為一個軍事強人（或汪精衛嘅政治宿敵），蔣介石當然唔希望自己的收場會是如此，大不了玉石俱焚一鑊熟（反正都係要死），繼續要中國生靈塗炭，我諗呢個係佢當時嘅諗法。

蔣介石嘅意志堅定，令佢成為最後嘅勝利者，流芳百世，佢嘅競爭者汪精衛則成為中國史上最大嘅漢奸，遺臭萬年；兩者嘅分別係天同地，但事實上，中日戰爭中蔣介石嘅最後勝利某程度上係運氣嘅主宰（或美國主宰），但運氣眷顧佢到1945，仍無法堅持到1949，萬物離散，其實冇人能夠預計邊隻馬可以首先衝過終點？政治亦冇可能係非常長遠嘅佈局，政治只係解決當前問題嘅方法，未來係點，冇人知道；手頭嘅事都做唔完，明日嘅事冇可能兼顧得到，情況大致如此，所以我從來唔相信陰謀論，反而認為好多事純粹出於偶然。

中日之間嘅調停工作一直喺背後進行中，但中國同日本都唔積極媾和，中華民國唔想講和，理由上邊已經提過；至於日本全面佔住上風，亦冇必要同下風者有太多討價還價。侵華戰爭嘅困難度，的確比日本原先想像嘅大，不過並未大到可以令佢哋有所顧忌。我個人亦都非常相信，去到1938年，日本東京最高指揮當局，早已經將注意力集中向將要發生嘅太平洋戰爭之上，侵咯中國可能只係小菜一碟。

1938年1月1號，蔣介石辭去行政院長職位，由孔祥熙（1880-1967）繼任，唔係孔祥熙就係宋子文，唔係宋子文就係孔祥熙，唔係孔祥熙就係宋子文，唔係宋子文就係孔祥熙…………一笑。同日，上海女子大學創立，校長係吳志驀，1月2號，日本23架飛機入侵南昌上空，被中國空軍擊落1架；1月3號，朝鮮、臺灣各地中國領事館被逼懸掛五色旗，中國駐日大使館向日本政府提出嚴正抗議。響日本人眼中，中華民國政權已經更替成功，蔣介石政權已經變成流亡政府。今日，作曲家冼星海（1905-1945）等喺武漢組建文化界行動委員會，上海中國國際無線電臺被日方強行接受，1月5號，電臺華籍職工全體撤退。1月5號，蘇聯志願軍空軍百幾人抵達武漢，加入中國空軍對日作戰，史太林打擦邊球，我講過，如果蘇聯全面介入，支持中國抗戰，整個歷史可能就咁改變，起碼日本人唔會夠膽咁快發動太平洋戰爭打美國，史達林如果真係開東西兩條戰線，一條抵抗日本，一條抵抗納粹德國，蘇聯唔玩完就奇鳥。

1月6號，根據國共達成協議，新四軍軍部今日喺南昌成立。隨後，江西、福建、浙江、湖南、廣東、湖北、河南、安徽等八個省13個地區嘅紅軍遊擊隊相繼統一集結，整編為「新四軍」，全軍合共10300人，規模其實相當細，只能夠打遊擊，冇可能投入大型戰事。新四軍軍長係葉挺（1896-1946），副軍長為項英（1898-1941），參謀長張雲逸（1892-1974）。下轄四個支隊，第一支隊司令員為毛主席最信任嘅人陳毅（1901-1972），第二支隊司令員張鼎丞（1898-1981）、第三支隊司令員張雲逸、第四支隊司令員高敬亭（1907-1939）。年半之後，1939年6月24號，高敬亭喺安徽肥東縣青龍場被槍決，罪名係反黨，佢亦係迄今為止中共内最後一名以「反黨」罪名被處死嘅高級幹部。1977年被平反，恢復名譽。

#常威💀 #蔣介石平反系列  #佛經抄寫員 #中日戰爭 #民國歷史

［常威近代史］第七百六十七回 冇人冇立場（高清錄音版）

#唔鍾意睇字可以聽

https://fb.watch/j0cN4ACboD/

去年從滬戰爭爆發後，韓複榘率領第三軍團承擔黃河防務，但係韓複榘為咗保存實力，不願出兵同日本人作戰，因此當日本人進軍山東嘅時候，佢一早就預備一撤退計劃，12月22號，日軍渡過黃河，24號韓複榘即放棄濟南逃逸，致使津浦路正面防務空虛，日軍逐以徐州為目標迅速南下。故仔當然唔係咁簡單，原來韓複榘仲計劃喺蔣介石遷入四川之際，聯合四川軍閥劉湘（1890-1938）同宋哲元（1885-1940）一齊倒蔣，被劉湘手下告密，於是蔣介石決心將韓複榘置於死地。當然，蔣介石本身亦都好憎佢，皆因韓複榘響西安事變期間係支持張學良（1901-2001）同楊虎城（1893-1949），得罪劉以達，點會有運行？

講埋四川軍閥劉湘嘅收場，國民政府要撤退入四川，四川嘅陀地劉湘事前當然要好好「處理」，加上佢密謀造反，證據確鑿，收場大概只有死。當韓複榘被打靶嘅時候，劉湘已經百病纏身訓響醫院，面對謀反指控，亦無力申辯，1938年1月20號，響武漢蒙主寵召，大家都認為韓複榘同劉湘嘅死係符合民心所向（當然最重要係符合蔣介石利益），係——「死得其時，死得其所」。

1月12號，日軍進駐青島，清理港口障礙，打撈沉船。1月13號，方振武（1882-1941），沈鈞儒（1875-1963）等人喺武漢發起組織兒童保育會。1月15號，係非常重要嘅一日，因為今日日本首相近衛文麿（音呂）（1891-1945）宣佈第一次對華聲明，大意係講，日本政府自從佔領南京之後，曾經給予中國反省其態度嘅機會，而國民政府依然不瞭解日本嘅真意，策劃抗戰，因此日本政府今後不以國民政府為對手，希望能與日本提攜互助嘅新政府成立同發展，並與此新政府調整兩個關係，協力建設一個全新嘅中國。18號，日本又發表《補充聲明》，稱所謂不以國民政府為對手，較之否認國民政府更為強硬，其實即係等同變相宣戰。1月12號嘅聲明，亦即係話畀全也界所有人知道，日本政府同國民政府所有私下協商調停完全告吹，亦都伸延成為歷史上軸心國最大嘅外交政策敗筆。

近衛文麿深信喺各項選擇中，最好嘅選擇就係不給予蔣介石任何餘地，亦包括中國金融財閥資本家任何餘地，結果班有錢佬亦都冇得揀，唯有繼續堅定不移、全心全意支持蔣介石抵抗到尾，因為一旦國民黨或蔣介石被消滅，佢哋手上持有嘅貨幣亦將會一文不值。

#常威💀 #蔣介石平反系列  #佛經抄寫員 #中日戰爭 #民國歷史

💜最新上架
常威近代史 第十三部 【鬼子來了】

電子書下載⬇⬇
https://play.google.com/store/books/details?id=cz6qEAAAQBAJ

🙏請捧場

［常威近代史］第七百六十八回 變相宣戰（高清錄音版）

#唔鍾意睇字可以聽

https://fb.watch/j5ahtv4Rek/

【常威近代史】（七百六十九回）
保衛武漢

國破山河在！城春草木深！

1938年1月16號，日本變相向中華民國宣戰，不宣而戰，即亦係日本人嘅戰爭態度，過多兩三年偷襲珍珠港，都係用同一種手法，「乜你唔知我會打你嘅咩？嘿嘿！」，不過打仗嘅嘢，去到第二次世界大戰時期，請大家清楚並唔係乜嘢君子之爭，總之勝者為王，結局先係最重要，用乜嘢手法其實無關痛癢，因為你打贏咗，就有絕對話語權，到時曲可以拗返直，真理永遠站在勝利者和強人一方，記住依句說話。

1月17號，全國歌詠協會喺漢口成立，冼海星（1905-1945）等擔任執委，1月18號，意大利同偽滿洲國互派大使，正常操作，軸心國成形。1月20號，國民黨軍事委員會公佈抗戰以來受獎罸將領名單，有人陞官進爵，亦有人會拉去後巷打靶，例如韓復榘。同日，山西民族革命大學喺臨汾開學。1月21號，中國電影製片廠喺昆明成立，該廠係中國抗日戰爭時期中國最重要嘅製片同抗日宣傳機構，抗日期間，出品大量抗戰短片及電影，打造人民抗敵意識形態，1949年之後跟隨蔣介石政權遷移到臺灣，繼續服務政權拍攝電影，直至1995年先正式停辦。

1月23號，國際反侵略大會中國分會喺漢口成立，1月25號，上海《文匯報》創刊，依份《文匯報》到今日仍然喺香港出版，眨下眼就快100年。1月26號，延安戰歌社舉行第一次詩歌朗誦會，內容當然係抗日反壓迫。1月26號，國軍空軍轟炸南京日軍機場，炸毀日本軍機20架！1月29號，中華全國電影界抗敵協會喺武漢成立，1月30號，蔣介石致函美國總統羅斯福（Franklin Delano Roosevelt，1882-1945），請求援助中國抗日。當時嘅羅斯福，並未有幫助中國抗日嘅打算，不過好快佢就會改變立場，全力支持蔣介石。1月30號，菲律賓馬尼拉市各界5000人集會支持中國抗戰，當時嘅菲律賓馬尼拉已經有大量中國移民居住。1月31號，為阻止日軍北上，李宗仁（1891-1969）下令炸毀蚌埠淮河鐵橋，為阻止日軍繼續推進，進行焦土政策，隨著戰事發展，之後會做得更加徹底。

今個月，日軍亦喺上海楊家宅設立第一所軍中妓院，該軍妓院妓女人數最多時達到120名，日本等二次世界大戰劣行斑斑，其中慰安婦嘅問題，就俾人一直講到今時今日，但係必須要知道，軍妓並唔係日本人獨有，每個上戰場嘅男人都有性需要，祇不過其他國家（勝利國傢）冇話畀你知點work啫。